Faʼauri si Sökhi ba Wamosumange Yehowa

ÖSI NOMOGU

Tumbu ndraʼo me 1934. Satuagu moroi ba Swiss, hizaʼi findra ira ba Timmins, sambua banua pertambangan ba Ontario, Kanada. Te me döfi 1939, ibörögö ibaso majalah Manuriaigö Mamagu ba möi ia ba gangowuloa ndra Samaduhuʼö Yehowa. Iʼohe ndraʼo hegöi ira talifusögu si daönö. Lö ara aefa daʼö, tobali ia Samaduhuʼö Yehowa.

Lö omasi Bapagu gangetula nihalönia, hizaʼi iʼomasiʼö zindruhu Mamagu ba iforege wondrorogö faʼalöfaröinia khö Yehowa. Lö iböhöli wamosumange Yehowa hewaʼae lö latehegö halöwö ndra Samaduhuʼö Yehowa ba Kanada me böröta ndröfi 1940-an. Hewaʼae iʼoʼaya-aya ia Bapagu, hizaʼi lö tebulö ihaogö gamuatania ba ifosumange sibai Bapagu. Duma-duma niforomaʼö Mamagu zanolo yaʼo hegöi ira talifusögu tanö böʼö ba wanema sindruhu. Omuso sibai dödöma me ibörögö ibulöʼö gamuatania Bapagu, iʼomasiʼö ndraʼaga.

MAMÖRÖGÖ HALÖWÖ SAFÖNU INÖTÖ

Me baŵa si Walu 1950, uʼondrasi Pertemuan Wilayah Pertambahan Teokratis ba New York City. Me no falukha ndraʼo khö ndra talifusöda ba zi sagörö ulidanö ba ufondrondrongo wanofu-nofu khö ndra talifusö si fao ba Sekolah Gilead, tefarou sibai dödögu wefao ba halöwö safönu inötö. Me no urugi nomo, uʼandrö enaʼö tobalido perintis biasa. Labeʼe wanema li ba zuragu andrö ira talifusöda moroi ba gödo ndraha ba lawaʼö khögu enaʼö tebayagö ua ndraʼo idanö. Ufalua daʼö me 1 mbaŵa si Fulu 1950. Sara waŵa aefa daʼö, tobali ndraʼo perintis biasa ba tebeʼe halöwögu ba Kapuskasing. Daʼö mbanua saröu sibai moroi ba nahia si so yaʼo iadaʼa.

Me döfi 1951, lakaoni ndra talifusöda sangila li Prancis ira panitia ndraha enaʼö findra ira ba mbanua sangogunaʼö li Prancis ba Quebec. Moguna ato zanuriaigö ba daʼö. Uʼila li Prancis hegöi Inggris, andrö wa utemaʼö wogaoni nibeʼera ba lafatenge ndraʼo ba Rouyn. Samösa lö hadöi si faʼila khögu ba daʼö. Nibeʼe khögu ha si sagörö karate ba no lasura ba daʼö hezo möido. Ba daʼö, alua zi no ututunö moroi yawa. Yaʼo hegöi Marcel tobali si fahuwu si sökhi. Omuso sibai dödögu wamalua halöwö nitemagu ba Quebec sagötö zi öfa fakhe, ba gafuriata tobali ndraʼo perintis istimewa.

GILEAD HEGÖI FANÖTÖNA SI NO TETAHA

Sagötö so ndraʼodo ba Quebec, omuso sibai dödögu me utema wogaoni wefao ba Sekolah Gilead kelas 26 ba South Lansing, New York. Fao ndraʼo wisuda me 12 mbaŵa si Dua 1956, ba labeʼe halöwögu ba Ghana,b Afrika Barat. Hizaʼi, fatua lö daʼö, mangawulido ba Kanada mato ”hauga migu” irugi awai zura-suragu.

Fitu waŵa ubaloi ba Toronto zura-suragu andrö. Toröi ndraʼo ba nomo dalifusöda Cripps hegöi ösi nomonia. Ba daʼö, falukhado khö nonora alawe sotöi Sheila, ba faoma omasiga khö nawöma. Me edöna ubeʼe ligu, tohare visa si no ara ubalo-baloi. Yaʼo hegöi Sheila, maʼohe daʼa ba wangandrö ba oya zinangea maʼangeragö. Ba gafuriata, mahalö gangetula wa mofanödo ba wamalua halöwö nitemagu. Hizaʼi, mahalö göi gangetula enaʼö faoma mafaʼoheʼö zura khö nawöma ba mafaigi hadia sindruhu-ndruhu tola mangowalu ndraʼaga ba zi so miföna. Sindruhu wa abua sibai gangetula daʼö, hizaʼi maʼila wa daʼa gangetula si tefaudu.

Me no aefa sara waŵa ndraʼo ba lala utörö kereta api, köfa barang, hegöi köfa sihombo, ofetado ba Akra, Ghana. Ba daʼö tebeʼe halöwögu tobali pengawas distrik. Mangai halöwö göi ndraʼo ba zi sagörö Ghana, fao ba daʼö Pantai Gading hegöi Togoland (iadaʼa mufotöi ia Togo). Si toʼölönia, ha yaʼo-yaʼo na mofanödo, uʼohe moto nihenaigö gödo ndraha. Omuso sibai dödögu wamalua halöwö daʼa!

Ba ngaluo Satu hegöi Migu, mangai halöwö ndraʼo ba wamaʼema huhuo ba gangowuloa ba zi sambua wilayah. Lö hadöi Nahia Gangowuloa Sebua ba daʼö. Andrö wa lafazökhi zagö moroi ba lewuö, aefa daʼö labeʼe yawa ba detenia mbulu khorema si tobali baʼa-baʼa waʼaukhu zino. Börö me lö hadöi kulkas, so ösa gurifö sawena mutaba na inötö mondrino.

So zalua si möi famaʼiki sagötö mufalua gangowuloa sebua ba daʼö. Me ifaʼema huhuonia talifusöda Herb Jennings,c samösa utusan injil, so sageu zawi saetu fesu. Isendragö ia ahatö ba mimbar. Ibatogö huhuonia talifusöda Herb, ba izumaigö ahono zawi daʼö. Hizaʼi, so daöfa ndra talifusöda sagabölö, laraʼu zawi daʼö ba lafuli laʼohe ba nahania. Labözi tawo-tawo ira talifusöda sangondrasi.

Na lö hadöi gangowuloa ba zi sambua wilayah, möido ba mbanua si so ba zi fasui daʼö ba ufuta film Masyarakat Dunia Baru Sedang Beraksi. Enaʼö laʼila videonia, utawi nukha safusi ba gotalua geu si dua rozi ba ufuta film daʼö. Omasi sibai ira! Ato niha si möi ba daʼö sawena mangila hadia nifotöi film. Labözi tawo-tawo me laʼila niha nibayagö idanö. Film daʼa zanolo yaʼira ba wangila wa sindruhu-ndruhu teʼosambuaʼö ndra Samaduhuʼö Yehowa ba so ira ba zi sagörö ulidanö.

Me no arakhagö dua fakhe ndraʼo ba Afrika, omuso sibai dödögu wangondrasi angowuloa sebua internasional ba New York City me döfi 1958. Omuso göi dödögu me falukhaga Sheila. Tohare ia moroi ba Quebec, nahia nifataro yaʼia tobali perintis istimewa. Ba zilalö, asese mafaʼoheʼö zura khö nawöma, hizaʼi iadaʼa tola faʼila bawa ndraʼaga. Usofu khönia hadia omasi ia mangowalu khögu, fao dödönia ba daʼö. Andrö wa ufaʼoheʼö zura khö dalifusöda Knorrd ba usofu khönia hadia tola fao Sheila ba Sekolah Gilead ba fao ia khögu ba Afrika. Fao dödö dalifusöda Knorr. Ba gafuriata ofeta Sheila ba Ghana. Mangowalu ndraʼaga ba Akra me 3 mbaŵa si Fulu 1959. Marasoi samösa wa sindruhu-ndruhu ifahowuʼö ndraʼaga Yehowa börö me maʼofönaiʼö ia ba waʼaurima.

MANGAI HALÖWÖ BA KAMERUN

Me döfi 1961, tebeʼe halöwöma ba Kamerun. Laʼandrö khögu ba wamasindro hegöi ba wamokai gödo ndraha ba Kamerun, ba tebeʼe halöwögu tobali samaigi-maigi halöwö nifalua ba daʼö. Börö daʼö, oya sibai sinangea ufahaʼö yaʼo, ba oya halöwögu. Me döfi 1965, manabina Sheila. Lö irai ukhalaigö wa tobali ndraʼaga satua. Omuso sibai dödöma ba wanema noro dödö si bohou andre ba no maʼera-era wangawuli ba Kanada. Hizaʼi, ba ginötö daʼö alua zi möi fangafatö dödöma.

Adudu dabina Sheila. Ifatunö khöma doto wa sindruhunia ono matua nonoma andrö. Tebai uʼolifugö zalua andrö hewaʼae no 50 fakhe numalö ginötö. Sindruhunia, abu sibai dödöma ba zalua andrö, hizaʼi lö tebulö mafalua halöwö niʼomasiʼöma ba Kamerun.

Ira talifusöda si so ba Kamerun, asese sibai göna ira folohi börö me lö faʼawö dambai ira ba politik. Itugu abölö-bölö zalua sagötö mufalua wamili presiden. Me 13 mbaŵa si Lima 1970, lö latehegö halöwö ndra Samaduhuʼö Yehowa ba daʼö. Awena lima waŵa no findra ndraʼaga ba gödo ndraha si sökhi andre, hizaʼi no lahalö nahia daʼö ira samatörö. Barö zi samigu daʼö, lafaso fefu ndra utusan injil farahu ndraʼo hegöi Sheila enaʼö maröi Kamerun. Abua sibai khöma wondröi ira talifusöda börö me maʼomasiʼö sibai ira ba aombö dödöma zalua khöra ba daʼö.

Me no maröi Kamerun, mangai halöwö ndraʼaga ba gödo ndraha Prancis ba zi önö waŵa. Lö tebulö uforege ba woʼameʼegö tödö soguna khö ndra talifusöda ba Kamerun. Me baŵa si Felendrua ba ndröfi daʼö, lafatenge ndraʼaga ba gödo ndraha Nigeria, si no ibörögö mubeʼe noro dödö ba wamaigi-maigi halöwö nifalua ba Kamerun. Ira talifusöda ba Nigeria latemaʼö ndraʼaga, ba marasoi waʼomuso dödö me tola mangai halöwö ndraʼaga ba daʼö ba zi hauga fakhe.

ANGETULA SABUA

Me döfi 1973, moguna mahalö gangetula sabua. Mofökhö Sheila. Me maʼondrasi gangowuloa sebua ba New York, ilau meʼe ba imane khögu, ”Lö sagu khögu saʼae! Marasedo ba no ara urasoi wökhö daʼa.” No fao ndraʼaga wangai halöwö ba Afrika Barat sagötö zi 14 fakhe. Omuso sibai dödögu me lö faröi ia, hizaʼi so zinangea mabulöʼö ba waʼaurima. Me no mahaogö mafatunöisi ba asese maʼohe daʼa ba wangandrö, mahalö gangetula mangawuliga ba Kanada, enaʼö ba daʼö mufadöhö wökhönia. Sindruhu-ndruhu no angetula sabua ba wondröi halöwö utusan injil hegöi halöwö safönu inötö. Afatö sibai dödöma.

Me no marugi Kanada, mohalöwö ndraʼo khö zi fahuwu khögu samawa moto ba mbanua Toronto tanö yöu. Maʼokosi sambua nomo, maʼöli gama-gama si no irai mufake, ba maforege enaʼö lö ikabi ndraʼaga foʼömö. Maʼöna-önaiʼö waʼaurima ba matötöna wa samuza inötö dania tola ifuli mangai halöwö ndraʼaga safönu inötö. Tokea sibai ndraʼaga börö me alio sibai alua nidöna-dönama andrö.

Ero hari Satu, fao ndraʼo ba halöwö fangotomosi Nahia Gangowuloa Sebua ba Norval, Ontario. Me luo daʼö, laʼandrö khögu tobali sondröniaʼö ba daʼö. Börö me itugu alö wökhö Sheila, mahalö gangetula matemaʼö halöwö si bohou andre. Findra ndraʼaga ba apartemen si so ba Nahia Gangowuloa Sebua me baŵa si Önö 1974. Omuso sibai dödöma me ifuli mangai halöwö ndraʼaga safönu inötö!

Maʼandrö sibai saohagölö börö me itugu döhö Sheila. Dua fakhe aefa daʼö, tola matema halöwö tobali satua samasui ba provinsi Manitoba, Kanada. Okafu sibai mbanua daʼa. Hizaʼi, laʼomasiʼö sibai ndraʼaga ira talifusöda ba daʼa. So sambua wamahaʼö nihalöma: Gofu hezo mufataro ndraʼaga, sabölö moguna yaʼia daʼö lö tebulö mafosumange Yehowa.

FAMAHAʼÖ SI TOHUDE

Me no mangai halöwö ndraʼaga tobali satua samasui ba zi hauga fakhe, lakaoni ndraʼaga wangai halöwö ba Mbetieli Kanada me döfi 1978. Lö ara aefa daʼö, so sambua wamahaʼö si tohude nihalögu, hizaʼi abua sibai daʼö. Tebeʼe khögu halöwö ba wamaʼema si sambua huhuo ba gangowuloa si tohude ba Montreal. Ufaʼema daʼö ba li Prancis, faʼarania sambua za amatonga. Hizaʼi, lö adöni dödö zamondrongo ba huhuogu, aföli ira. Andrö wa ibeʼe khögu mene-mene talifusöda moroi ba Departemen Dinas. No sinangea menaʼö aboto ba dödögu wa tenga sonekhe fahuhuo ndraʼodo. Hizaʼi, lö utemaʼö mene-mene si sökhi nibeʼenia börö me lö isuno wamorege nifaluagu. Ambö baga saʼae lagu wahuhuosama. So ba dödögu wa iʼalu-alui zalagu. No uʼosambuaʼö dödögu ba lala wamaʼemania mene-mene hegöi ba niha sameʼe mene-mene andrö.

Hauga hari aefa daʼö, so samösa Panitia Ndraha si fahuhuo khögu sanandrösa ba daʼö. Ufatunö khönia wa maniasa sibai ndraʼo börö me lö utemaʼö mene-mene daʼö si fao faʼasökhi dödö. Aefa daʼö, ufalukhaisi dalifusöda sameʼe khögu mene-mene andrö ba uʼandrö khönia waʼebolo dödö. Si fao faʼebolo dödö, iʼefaʼö zalagu. Salua andre zamahaʼö yaʼo wa moguna udouʼö nasa wangokhögö fangide-ngideʼö. (Amd. 16:18) No hauga kali uʼohe daʼa ba wangandrö khö Yehowa, ba uhalö gangetula wa lö irai utimbagö saʼae mene-mene nibeʼe khögu.

Iadaʼa, no mangai halöwö ndraʼo ba Mbetieli Kanada ba zi töra 40 fakhe. Iʼotarai 1985, mangai halöwö ndraʼo tobali Panitia Ndraha. Me baŵa si Dua 2021, mate woʼomogu Sheila. Tenga ha daʼö gabula dödö salua khögu. Göna göi ndraʼo fökhö. Hizaʼi, börö me oya halöwögu ba wamosumange Yehowa, ’lö itörö tödögu waʼaurigu ba zilalö’. (Sango. 5:​20, nis.) Hewaʼae oya gabula dödö salua ba waʼaurigu, hizaʼi abölö oya nasa waʼomuso dödö nirasoigu. Sindruhu-ndruhu no howu-howu sebua me tola uʼofönaiʼö wamosumange Yehowa ba waʼaurigu ba uhalö halöwö safönu inötö ba zi 70 fakhe. Mangandrödo salahi ndra talifusöda si bohou ebua enaʼö laʼofönaiʼö wamosumange Yehowa ba waʼaurira börö me faduhu dödögu wa hasambalö larasoi waʼauri si sökhi ba safönu howu-howu na lafalua daʼö.