Famahaʼö moroi ba Wehede Safuria Ndra Matua si Datölu si Lö Faröi

1. Hana wa tola tafahaʼö ita moroi ba niha si no alawa döfi?

FEFU ita moguna khöda wanuturu lala ba ngawalö gangetula si tohude nihalöda ba waʼauri. Tola tatema daʼö moroi khö ndra satua sokubaloi hegöi ira talifusöda tanö böʼö si no aro ba wamati. Na abölö atua ira moroi khöda, tebai taʼosiwawöi mene-mene nibeʼera ha börö me tawaʼö tödöda ha me föna moguna daʼö. Omasi Yehowa na tafahaʼö ita moroi khö ndra talifusöda si no alawa döfi. Börö me no oya laʼa nasio moroi khöda, tatu abölö oya zi no latörö ba waʼauri, ba abölö oya waʼatua-tua hegöi faʼaboto ba dödö niʼokhögöra.—Yob. 12:12.

2. Hadia nitutunöda ba artikel daʼa?

² Ba götö Zura Niʼamoniʼö, iʼogunaʼö niha salawa döfi si lö faröi Yehowa ba wangaʼaroʼö hegöi ba wameʼe fanuturu lala ba nono mbanuania. Duma-dumania: Moze, Dawido hegöi sinenge sotöi Yohane. Auri ira ba ginötö si faböʼö-böʼö, ba lö fagölö zalua khöra. Hizaʼi, me lö ara tö mate ira, labeʼe mene-mene si sökhi khö zabölö awuyu-wuyu moroi khöra. Lahaogö sibai wamatunö wa moguna woloʼö khö Lowalangi. No itatugöi Yehowa enaʼö tesura mene-menera andrö ba Zura Niʼamoniʼö soguna khöda iadaʼa. Gofu hawaʼalawa ndröfida, hasambalö tatema mbua na tafahaʼö ita ba daʼö. (Rom. 15:4; 2 Ti. 3:16) Ba artikel daʼa dania tatutunö wehede safuria nifaʼema ndra matua si datölu andre, ba hadia wamahaʼönia khöda.

”MIFILI WAʼAURI FABÖI MATE AMI”

3. Hadia manö halöwö nifalua Moze ba wamosumange Yehowa?

³ Ha Yehowa nifosumange Moze ba zi sandrohu faʼaurinia. Mangai halöwö ia tobali samaʼeleʼö, sanguhuku, sondröniaʼö hegöi sanura sejarah. Oya sibai zi no itörö Moze ba waʼaurinia. Idöniaʼö ndraono Gizaraʼeli me mofanö ira moroi ba wangosawuyu Miserai, ba oya göi iʼila dandra sahöli-höli dödö nifalua Yehowa. Iʼogunaʼö ia Yehowa ba wanura si lima buku siföföna ba Zura Niʼamoniʼö, Sinunö 90 ba te göi Sinunö 91. Tola manö, yaʼia göi zanura buku Yobi.

4. Haʼökhö ibeʼe wamarou dödö Moze, ba hadia mbörö?

⁴ Me no irugi 120 fakhe ndröfi Moze, lö ara fatua lö mate ia, iʼowuloi fefu ndraono Gizaraʼeli ba ifasugi ba dödöra ngawalö zi no laʼila hegöi si no latörö. Me awuyu-wuyu ira nasa, so ösa ba gotaluara zangila samösa dandra sahöli-höli dödö nifalua Yehowa hegöi fanguhuku nifaluania ba niha Miserai. (2 Mo. 7:​3, 4) Laʼötö Nasi Soyo nifabali Yehowa, ba anehe ira me tehori zaradadu Waraʼo. (2 Mo. 14:​29-31) Larasoi samösa göi hewisa me ilumöʼö ba ibönökhi zoguna khöra Yehowa me so ira ba danö si mate. (5 Mo. 8:​3, 4) Iadaʼa, no arakhagö larugi Danö Amabuʼula. Börö daʼö, iʼogunaʼö Moze ginötönia safuria andre ba wamarou tödö ndraono Gizaraʼeli.a

5. Hadia zi tola lafaduhusi tödö iraono Gizaraʼeli ba wehede Moze safuria nisura ba 5 Moze 30:​19, 20?

⁵ Hadia niwaʼö Moze? (Baso 5 Moze 30:​19, 20.) Iʼaroʼö dödö ndraono Gizaraʼeli Moze wa sökhi sibai dötönafö niʼokhögöra ba zi so miföna. Börö howu-howu Yehowa, tola anau nosora ba danö nifabuʼunia andrö. Sökhi sibai danö daʼö ba atabö zinanö. Simane daʼa woʼamaedolagö Moze tanö andrö, ”Soi sowanua segebua ba si sökhi, si tenga nifazökhi dangami, omo safönu gama-gama si sökhi si lö serege dödömi, baʼa nidanö si tenga nikhao dangami, ba kabu nagu awö döla geu zaitu si tenga nitanömi, ba miʼa irege abuso ami.”—5 Mo. 6:​10, 11.

6. Hana wa itehegö Yehowa kala ndraono Gizaraʼeli ba danga soi böʼö?

⁶ Ifangelama ndraono Gizaraʼeli Moze wa lö tola löʼö laʼoʼö niwaʼö Yehowa enaʼö lö tebulö so ira ba soi si sökhi andrö. Iʼamenesi ira Moze enaʼö ’lafili waʼauri’, yaʼia na lafondrondrongo niwaʼö Yehowa ba ’lö faröi ira’ khönia. Hizaʼi, lö lafalua daʼö, laröi Yehowa. Ba gafuriata itehegö Yehowa ba niha Asiria hegöi Babilonia ba wokalaisi iraono Gizaraʼeli ba laʼohe ira ba waniboʼö.—2 Ra. 17:​6-8, 13, 14; 2 Ng. 36:​15-17, 20.

7. Hadia wamahaʼö nihalöda moroi ba wehede Moze? (Faigi göi gambara.)

⁷ Hadia wamahaʼönia khöda? Na so khöda woloʼö, tasöndra waʼauri. Simane iraono Gizaraʼeli si no arakhagö mondrugi Tanö Amabuʼula, no arakhagö göi tarugi gulidanö si bohou nifabuʼu Lowalangi. Taʼila dania hewisa na tobali Faradaiso zi sagörö ulidanö. (Yes. 35:1; Luk. 23:43) Tehori Zatana hegöi ira malaʼikania si lö sökhi. (Fam. 20:​2, 3) Lö hadöi saʼae dania agama sofaya, samandröndröu niha khö Yehowa. (Fam. 17:16) Lö hadöi famatörö gulidanö samakao ono mbanuania. (Fam. 19:​19, 20) Lö mutehegö so ba Waradaiso niha samadaö. (Si. 37:​10, 11) Teʼasogö waʼatulö hegöi fahasara dödö börö me fefu niha laʼoʼö goroisa Yehowa. Faoma laʼomasiʼö ba lafaduhusi tödö nawöra. (Yes. 11:9) Sindruhu-ndruhu no tötönafö si sökhi daʼö! Na lö tebulö taʼoʼö niwaʼö Yehowa, tenga ha ngaotu fakhe tola auri ita ba gulidanö Faradaiso, hizaʼi sagötö faʼara.—Si. 37:29; Yoh. 3:16.

8. Hadia mbua nirasoi zi samösa utusan injil börö me iʼangerönusi dötönafö faʼauri si lö aetu? (Yuda 20, 21)

⁸ Na lö tebulö taʼangerönusi dötönafö faʼauri si lö aetu nifabuʼu Lowalangi, tatu tola itugu teʼaroʼö gangetulada ba wondrorogö faʼalöfaröida khönia gofu hadia wanandraigö salua khöda. (Baso Yuda 20, 21.) Daʼö göi zamarou tödöda ba wolawa isö-isö dödö si fasala. Itutunö si samösa talifusöda si no ara mangai halöwö tobali utusan injil ba Afrika wa me mböröta asese tedönisi dödönia wamalua si lö omasi Yehowa. Imane, ”Aboto ba dödögu wa tebai usöndra waʼauri si lö aetu na lö uʼoʼö niwaʼö Yehowa. Börö daʼö, uhalö gangetula ba wolawa fondrönisi dödö andrö ba uforege wangandrö khö Yehowa. Börö wanolo moroi khönia, ba gafuriata tola ulawa gaoloma dödö si fasala andrö.”

”ENAʼÖ MOFOZU NDRAʼUGÖ”

9. Hadia manö gabula dödö si no irai alua khö Dawido?

⁹ Dawido andrö razo ba nono mbanua Yehowa ba lö faröi ia khö Lowalangi. Yaʼia göi samösa sonekhe ba musik, sanura puisi, saradadu sabölö ba samösa samaʼeleʼö. Oya sibai gabula dödö salua khönia. Duma-dumania, ba zi hauga wulu fakhe, ibini-biniʼö ia börö me iʼalui lala wamunu yaʼia Razo Saulo safökhö tödö. Me no tobali ia razo, ifuli zui ibini-biniʼö ia börö me iforege ononia Abisalomi ba worabu dadaoma waʼarazo. Hewaʼae oya gabula dödö salua khö Dawido ba oya göi zala sebua nifaluania, hizaʼi lö faröi ia khö Lowalangi sandrohu faʼaurinia. Daʼö mbörö wa ifotöi ia Yehowa niha ’sangomusoiʼö tödögu’. Tatu manö, omasi ita tafondrondrongo mene-mene Dawido!—Hal. 13:22; 1 Ra. 15:5.

10. Hana wa ibeʼe mene-mene Dawido khö Zelomo, ononia si tobali razo fangalinia?

¹⁰ Nehegö mene-mene nibeʼe Dawido khö Zelomo, ononia si tobali razo fangalinia. Awuyu-wuyu nasa Zelomo me ifili ia Yehowa ba wamazökhi osali Lowalangi si tobali nahia wamalua famosumange satulö. (1 Ng. 22:5) Hizaʼi, oya sibai gabula dödö nitaögö Zelomo. Hadia niwaʼö Dawido khönia? Datatutunö.

11. Moloʼö 1 Razo 2:​2, 3, hadia nifatunö Dawido khö Zelomo, ba hewisa wa itörö niwaʼönia andrö? (Faigi göi gambara.)

¹¹ Hadia niwaʼö Dawido? (Baso 1 Razo 2:​2, 3.) Ifatunö Dawido khö nononia wa hasambalö mofozu waʼaurinia na iʼoʼö niwaʼö Yehowa. Simane si no taʼila, mofozu waʼauri Zelomo ba zi hauga wulu fakhe. (1 Ng. 29:​23-25) Ifazökhi gosali sebua ba so ösa mbuku nisurania ba Zura Niʼamoniʼö. Mutötöi göi ngawua wehedenia ba zi hauga faosatö Zura Niʼamoniʼö. Tehöngö göi ia börö waʼatua-tua ba faʼakayonia. (1 Ra. 4:34) Hizaʼi, simane niwaʼö Dawido, lö tebulö mofozu Zelomo ha na iʼoʼö niwaʼö Yehowa. Hewaʼae simanö, me no atua Zelomo, ibörögö ifosumange lowalangi böʼö. Andrö wa lö saʼae ifahowuʼö ia Yehowa ba taya khönia waʼatua-tua irege lö iʼila saʼae ifatörö nono mbanuania si fao faʼatulö.—1 Ra. 11:​9, 10; 12:4.

12. Hadia wamahaʼö si tola tahalö moroi ba wehede Dawido?

¹² Hadia wamahaʼönia khöda? Na so khöda woloʼö, mofozu waʼaurida. (Si. 1:​1-3) Tatu manö, lö ifabuʼu Yehowa wa ibeʼe khöda waʼakayo mazui faʼatehöngö simane Selomo. Hizaʼi, hasambalö ibeʼe khöda waʼatua-tua ba wangai angetula si sökhi. (Amd. 2:​6, 7; Yak. 1:5) Goi-goi nibeʼenia möi fanoloda ba wangai angetula sanandrösa ba halöwö, sekola, hiburan hegöi kefe. Na taʼoʼö waʼatua-tua moroi khö Lowalangi, hasambalö telumöʼö ita moroi ba deʼala wamati si tola manayaigö faʼauri si lö aetu niʼokhögöda. (Amd. 2:​10, 11) Taʼokhögö göi zi fahuwu sindruhu hegöi ösi nomo safönu faʼomuso dödö.

13. Hewisa wa tola mofozu waʼauri Carmen ba gafuriata?

¹³ Carmen, si toröi ba Mozambik, iwaʼö tödönia wa folohi sekola salawa andrö lala enaʼö mofozu waʼaurida. Börö daʼö, ihalö jurusan arsitektur ba zi sambua universitas. Imane, ”Omasido sibai wamahaʼö nitemagu ba daʼö. Hizaʼi, ahori ginötögu ba faʼabölögu. Kuliah ndraʼo iʼotarai bözi 7.30 sihulö wongi irugi bözi 6 tanö owi. Abua khögu weʼamöi ba gangowuloa ba itugu awuwu wamatigu. Aboto ba dödögu wa no tobali ndraʼo sawuyu zi darua.” (Mat. 6:24) Iʼohe ba wangandrö zalua khönia andrö Carmen ba ifalua riset moroi ba publikasida. Imane nasa, ”Me no utema mene-mene si sökhi moroi khö ndra talifusö saro ba wamati hegöi moroi khö mamagu, uhalö gangetula irege uböhöli weʼamöi kuliah ba uhalö halöwö safönu inötö ba wamosumange Yehowa. Urasoi wa no uhalö gangetula fondrege zi sökhi, ba lö irai maniasa ndraʼo.”

14. Hadia duho moroi ba mene-mene nibeʼe Moze hegöi Dawido?

¹⁴ Moze hegöi Dawido, laʼomasiʼö sibai Yehowa ba laʼila wa moguna laʼoʼö niwaʼönia. Ba wehede safuria nifaʼemara, labeʼe mene-mene khö ndra samondrongo enaʼö laʼoʼö duma-dumara yaʼia na lö faröi ira khö Lowalangi Yehowa. Baero daʼö, ifangelama göi ira Moze hegöi Dawido wa niha sondröi ba sangerogö Yehowa, taya khöra wahuwusa si sökhi khönia hegöi howu-howu nifabuʼunia. Moguna göi khöda mene-menera andrö iadaʼa. Ba zi hauga wulu abad aefa daʼö, so nono mbanua Yehowa tanö böʼö sangoromaʼö wa moguna sibai tarorogö waʼalöfaröida khö Lowalangi.

”LÖ FAʼOMUSO DÖDÖGU SEBUA”

15. Hadia manö zi no irai alua khö zinenge sotöi Yohane?

¹⁵ Yohane andre sinenge niʼomasiʼö Yesu Keriso. (Mat. 10:2; Yoh. 19:26) Fao ia sagötö ifalua Yesu halöwö fanuriaigö, iʼila ngawalö dandra sahöli-höli dödö ba lö faröi ia khö Yesu ba ginötö alua gabula dödö. Me mubunu Yesu, so Yohane ba daʼö. Ba me no aefa tesusugi Yesu, ifalukhaisi Yohane. Iʼila göi hewisa waʼatedou mbanua niha Keriso me abad siföföna, iʼotarai me awena tobali ira sambua ngawawa side-ide irugi me teturiaigö duria somuso dödö ”ba gotalua niwöwöi Lowalangi ba gulidanö”.—Kol. 1:23.

16. Haniha manö zanema bua moroi ba zura Yohane?

¹⁶ Me no alawa sibai ndröfi Yohane, itema halöwö sebua ba wanura si hauga ngawua buku ba Daromali Lowalangi. Tebeʼe khönia ginötö ba wanura buku Wamaʼeleʼö sahöli-höli dödö, ”nifaʼeleʼö Yesu Keriso”. (Fam. 1:1) Isura göi Injil Yohane hegöi si tölu ngawua zurania tanö böʼö ba Zura Niʼamoniʼö. Surania si medölu ifaʼoheʼö daʼö khö Gayo, talifusönia si sara lala wamati si lö faröi. Iʼomasiʼö ia Yohane ba hulö no tobali ononia ba wamati. (3 Yo. 1) Hizaʼi, tatu manö so nasa niha böʼö si no amaedola nono ba wamati khö Yohane. Irugi iadaʼa, ato nasa niha soloʼö khö Yesu si tefarou tödö ba nisura Yohane andrö.

17. Moloʼö 3 Yohane 4, hadia mbörö wa omuso dödö Yohane?

¹⁷ Hadia nisura Yohane? (Baso 3 Yohane 4.) Isura Yohane wa omuso sibai dödönia börö me laʼoʼö niwaʼö Lowalangi ira talifusönia. Me isura Yohane zurania si medölu, so niha samazaewe famahaʼö sofaya ba samoto fahasara dödö ba mbanua niha Keriso. Hizaʼi, so nasa zi lö tebulö ’manörö lala sindruhu’. Laʼoʼö niwaʼö Yehowa ba ’lö laböhöli woloʼö oroisania’. (2 Yo. 4, 6) Ira niha si lö faröi andre, tenga ha Yohane niʼomusoiʼöra tödö, hizaʼi no göi laʼomusoiʼö dödö Yehowa.—Amd. 27:11.

18. Hadia wamahaʼö nihalöda moroi ba wehede Yohane?

¹⁸ Hadia wamahaʼönia khöda? Na lö faröi ita, tasöndra waʼomuso dödö. (1 Yo. 5:3) Duma-dumania, tarasoi waʼomuso dödö börö me taʼila wa no taʼomusoiʼö dödö Yehowa. Omuso göi dödö Yehowa na iʼila wa tatimbagö wondrönisi dödö moroi ba gulidanö andre ba tatemaʼö zindruhu. (Amd. 23:15) Omuso göi dödö ndra malaʼika. (Luk. 15:10) Tatu omuso göi dödöda na taʼila wa lö faröi ndra talifusöda si sara lala wamati, mendrua manö na göna ira fanandraigö mazui fondrönisi dödö. (2 Te. 1:4) Na tehori dania gulidanö nifatörö Zatana andre, hasambalö tarasoi waʼomuso dödö sebua börö me no tarorogö waʼalöfaröida khö Yehowa hewaʼae so ita ba gulidanö nifatörö Zatana.

19. Hadia niwaʼö Rachel sanandrösa ba wamahaʼö sindruhu ba niha böʼö? (Faigi göi gambara.)

¹⁹ Abölö ebua waʼomuso dödö nirasoida na tafahaʼö niha böʼö ba zindruhu. Rachel, si toröi ba Republik Dominika, irasoi wa no töi sebua na itolo zi samösa niha enaʼö aboto ba dödönia sanandrösa khö Lowalangida sahöli-höli dödö. Imane sanandrösa khö ndraononia ba wamati, ”Me uʼila wa ibörögö laʼomasiʼö Yehowa, laʼodaligö ia, ba labulöʼö waʼaurira enaʼö tola laʼomusoiʼö dödönia, lö hadöi fehede si tola manutunö hawaʼomuso dödögu. Abölö ebua waʼomuso dödö andrö moroi ba wamorege hegöi si no utehegö ba wamahaʼö yaʼira.”

TÖRÖ TÖDÖU WEHEDE SAFURIA MOROI KHÖ NDRA MATUA SI LÖ FARÖI ANDRE

20. Hadia manö zi fagölö ita moroi khö Moze, Dawido hegöi Yohane?

²⁰ Moze, Dawido hegöi Yohane auri ira ba götö föna, ba faböʼö zalua khöra moroi ba zalua khöda iadaʼa. Hizaʼi, so zi fagölö ita khöra. Duma-dumania, simane yaʼira, tafosumange Lowalangi satulö. Mangandrö ita khö Yehowa, taʼodaligö ia ba taʼalui wanuturu lala moroi khönia. Ba simane yaʼira göi, faduhu dödöda wa hasambalö fahöna howu-howu nibeʼe Yehowa ba niha soloʼö niwaʼönia.

21. Hadia howu-howu nitemada na taʼoʼö mene-mene moroi khö Moze, Dawido hegöi Yohane?

²¹ Börö daʼö, dataʼosambuaʼö dödöda ba woloʼö oroisa Yehowa, simane fehede safuria nifaʼema Moze, Dawido hegöi Yohane. Na tafalua daʼö, hasambalö mofozu waʼaurida. Tasöndra göi ”waʼauri” irugi zi lö aetu! (5 Mo. 30:​19, 20) Tarasoi göi waʼomuso dödö sebua börö me taʼila wa no taʼomusoiʼö dödö Namada safönu faʼomasi, samalua fefu nifabuʼunia ba lala sahöli-höli dödö, töra moroi ba nitötönada mazui nikhalaigöda.—Ef. 3:20.