Yaso Khöu Wangide-ngideʼö ba Ginötö So zi Lö Öʼila

1. Me iwöwöi ita Yehowa, hadia waʼabölö nibeʼenia khöda, ba hadia mbörö?

ME IWÖWÖI ita Yehowa, ibeʼe khöda waʼabölö ba wangera-ngera, ba wamahaʼö yaʼita, ba wangokhögö faʼaboto ba dödö hegöi ba wamalua hadia zi no tafahaʼö yaʼita. Hadia mbörö wa simane daʼö womböwöinia yaʼita? Omasi ia na tasöndra ’waʼaboto ba dödö sanandrösa khönia’ ba tafosumange ia moloʼö faʼaboto ba dödö andrö.—Amd. 2:​1-5; Rom. 12:1.

2. (a) Hadia zinangea tafaduhuʼö? (Yobi 37:​23, 24) (Faigi göi gambara.) (b) Hadia mbuania na tafaduhuʼö daʼö?

² Hewaʼae so khöda waʼabölö ba wamahaʼö yaʼita, hizaʼi oya nasa zi lö taʼila. (Baso Yobi 37:​23, 24.) Nehegö duma-duma Yobi. Oya wanofu nifaʼema Yehowa khönia sanolo yaʼia enaʼö aboto ba dödönia wa oya nasa zi lö iʼila. Daʼa zanolo Yobi ba wangatulöʼö lala wangera-ngerania ba so khönia wangide-ngideʼö. (Yob. 42:​3-6) Simane daʼö göi, na tafaduhuʼö wa so zi lö taʼila, hasambalö wa tatema mbuania. Tola taʼokhögö wangide-ngideʼö ba faduhu dödöda wa hasambalö ifatunö khöda Yehowa hadia zoguna khöda ba wangai angetula si tefaudu.—Amd. 2:6.

3. Hadia nitutunöda ba artikel daʼa?

³ Ba artikel daʼa, tatutunö dania hadia manö zi lö taʼila, abula dödö salua khöda börö me lö taʼila daʼö, ba hadia mbuania na lö taʼila daʼö. Sagötö tatutunö ia, tola itugu faduhu dödöda wa Yehowa ”sangokhögö faʼaboto ba dödö soʼahonoa”, hasambalö ifatunö hadia zoguna khöda.—Yob. 37:16.

LÖ TAʼILA HAWAʼARA TOHARE GAMOZUA GÖTÖ DANÖ

4. Moloʼö Mataiʼo 24:​36, hadia zi lö taʼila?

⁴ Baso Mataiʼo 24:36. Lö taʼila hawaʼara tohare gamozua götö danö. Me so Yesu ba gulidanö, lö iʼila ’mbaŵa hegöi inötö’.a Ba gafuriata, ifatunö khö ndra sinengenia wa ha Yehowa zinangea motatugöi hawaʼara alua daʼö fefu. (Hal. 1:​6, 7) Faduhu dödöda wa no itatugöi Yehowa hawaʼara tohare gamozua götö danö andre, hizaʼi lö ifatunö khöda hawaʼara alua ia.

5. Hadia lua-luania börö me lö taʼila hawaʼara alua gamozua götö danö andrö?

⁵ Lö taʼila hawaʼara tö tabaloi irege tohare gamozua götö danö. Lua-luania, tola manö so khöda waʼafatö dödö ba taya waʼebolo dödöda, mendrua manö na no ara saʼae tabalo-baloi ia. Baero daʼö, te göi laʼoʼaya ita ira ösi nomoda hegöi niha böʼö börö me lö iʼila alua gamozua götö danö andre irege so khöda waʼide-ide dödö. (2 Fe. 3:​3, 4) Tola manö tawaʼö tödöda wa hasambalö so khöda wanaha tödö ba lö ide-ide dödöda ba ginötö laʼoʼaya ita na no taʼila hawaʼara tohare gamozua götö danö andre.

6. Hadia mbuania börö me lö taʼila hawaʼara tohare gamozua götö danö andre?

⁶ Sindruhunia, me lö ifatunö khöda Yehowa hawaʼara tohare gamozua götö danö, ibeʼe khöda ginötö ba wangoromaʼö wa tafosumange ia börö me taʼomasiʼö ba faduhu dödöda khönia. Omasi ita tafosumange Yehowa sagötö faʼara, tenga ha ndrege na tohare gamozua andrö. Börö daʼö, lö omasi ita taʼosambuaʼö dödöda hawaʼara tohare ”ngaluo Yehowa”, hizaʼi taʼosambuaʼö dödöda ba ngawalö zi sökhi salua dania na tohare ngaluo andrö. Na tafalua daʼö, itugu tafaduhusi tödö Yehowa ba taforege ba wangomusoiʼö tödönia.—2 Fe. 3:​11, 12.

7. Hadia zi no taʼila?

⁷ Moguna taʼangeragö hadia zi no taʼila. Ba Zura Niʼamoniʼö, oya wamaʼeleʼö nibeʼe Yehowa khöda sangoromaʼö wa tebörögö ngaluo safuria me 1914. Hizaʼi, tenga ha daʼö. Ihaogö göi izara-zara wamatunö khöda hadia dania zalua ba gulidanö na no aefa ndröfi daʼö. Faduhu dödöda wa no itugu ahatö ”ngaluo sebua andrö khö Yehowa”. (Zef. 1:14) Taʼila göi wa omasi Yehowa na taturiaigö ’duria somuso dödö sanandrösa ba Wamatörö Lowalangi’ ba niha fefu. (Mat. 24:14) Iadaʼa, no teturiaigö duria somuso dödö andrö ba zi 240 soi ba töra 1.000 ngawalö li. Tola tafalua halöwö si tohude andre si fao faʼamohiʼa dödö hewaʼae lö taʼila ’ngaluo hegöi inötönia’.

LÖ TAʼILA HADIA DANIA NIFALUA YEHOWA

8. Hadia geluaha ngawua wehede ”nifalua Lowalangi sindruhu”? (Sangombakha 11:5)

⁸ Lö ero-ero taʼila hadia ”nifalua Lowalangi sindruhu”. (Baso Zangombakha 11:5.) Ngawua wehede ”nifalua Lowalangi sindruhu” eluahania ngawalö niʼasogö Yehowa mazui nitehegönia alua ba wangoʼozui ohitö dödönia. Börö daʼö, lö taʼila sibai hadia mbörö wa ifalua zi sambua ngawalö Yehowa mazui hewisa wanolonia yaʼita. (Si. 37:5) Simane niha sagatua-tua si lö mangila hewisa sibai waʼatedou nono bakha ba dalu, lö göi taʼila sibai nifalua Yehowa.

9. Hadia lua-luania börö me lö taʼila hewisa wanolo Yehowa yaʼita?

⁹ Börö me lö taʼila hewisa wanolo Yehowa yaʼita, tola manö so gangetula si lö omasi ita tahalö börö me so khöda waʼaombö-aombö dödö. Te aombö dödöda ba wolulu faʼaurida khö Yehowa, duma-dumania ba woʼöna-önaiʼö faʼauri mazui findra ba nahia sabölö ato moguna sanuriaigö. Mazui te aombö dödöda hadia omuso nasa dödö Yehowa khöda na tebai takhamö gohitö dödöda ba wamati, na lö tatema mbua si sökhi ba wanuriaigö, mazui na alua khöda gabula dödö ba ginötö tafalua halöwö moroi ba organisasi.

10. Börö me lö taʼila hewisa wanolo Yehowa yaʼita, hadia gamuata si tola tadouʼö?

¹⁰ Sindruhunia, börö me lö taʼila hewisa wanolo Yehowa yaʼita, tola tadouʼö gamuata sabölö moguna, simane fangide-ngideʼö ba falöfayawa. Daʼa zanolo yaʼita enaʼö tafaduhuʼö wa abölö alawa lala wangera-ngera Yehowa hegöi nifaluania. (Yes. 55:​8, 9) Tafahaʼö göi ita enaʼö abölö tafaduhusi tödö ba taʼodaligö Yehowa. Na so mbua nitemada ba ginötö tafalua halöwö fanuriaigö mazui tafalua halöwö nibeʼe organisasi khöda, böi olifu ita wa Yehowa zinangea manema fanuno. (Si. 127:1; 1 Ko. 3:7) Hizaʼi, hewisa na tenga simane nitötönada zalua? Böi olifu ita wa iʼila fefu hadia ia Yehowa. (Yes. 26:12) Börö daʼö, datafalua halöwöda, ba yafaduhu dödöda wa hasambalö ifalua göi halöwönia Yehowa. Hasambalö ibeʼe wanuturu lala soguna khöda, hewaʼae na lö ifalua dandra sahöli-höli dödö simane nifaluania mböröta.—Hal. 16:​6-10.

11. Hadia manö zi tohude si no aboto ba dödöda?

¹¹ Angerönusi hadia manö zi no aboto ba dödöda sanandrösa khö Yehowa. Aboto ba dödöda wa Yehowa andrö Lowalangi sebua faʼomasi, satulö ba satua-tua. Iʼameʼegö tödö fefu nifaluada khönia hegöi khö ndra talifusöda si sara lala wamati. Lö tebulö göi ifahowuʼö niha si lö faröi khönia.—Heb. 11:6.

LÖ TAʼILA HEWISA WAʼAURIDA MAHEMOLU

12. Moloʼö Yakobo 4:​13, 14, hadia zi lö taʼila?

¹² Baso Yakobo 4:​13, 14. Sindruhunia, lö taʼila hewisa waʼaurida mahemolu. Fefu ita, tola manö göna ita ”inötö hegöi salua si lö mudöna-döna”. (Sango. 9:11) Lua-luania, lö taʼila hadia mofozu niʼera-era dödöda ba zi so miföna mazui hadia anau nosoda ba wangasiwai ohitö dödöda andrö.

13. Hadia lua-luania börö me lö taʼila hewisa waʼaurida ba zi so miföna?

¹³ Börö me lö taʼila hewisa waʼaurida ba zi so miföna, tola manö abua khöda ba wangoromaʼö faʼanau gölö. Hewisa wa tola? Na talafo taʼaombösi tödö hadia dania zalua ba zi so miföna, tola taya waʼomuso dödöda. Baero daʼö, fefu zi lö sökhi salua ba zi lö mudöna-döna, tola iʼasogö khöda waʼafawuka wangera-era hegöi faʼabu dödö. Mendrua manö nasa na lö iʼila alua zi no tatötöna, tola manö afatö dödöda ba tarasoi waʼide-ide dödö.—Amd. 13:12.

14. Hewisa enaʼö lö tebulö tarasoi waʼomuso dödö? (Faigi göi gambara.)

¹⁴ Na anau gölöda ba wanaögö fefu gabula dödö, no taforomaʼö wa tafosumange Namada si so ba zorugo börö me taʼomasiʼö ia, tenga börö me so hareda. Ifahaʼö ita Sura Niʼamoniʼö wa lö ero-ero ilumöʼö ita Yehowa moroi ba gabula dödö ba lö göi itatugöi waʼaurida ba zi so miföna. Hizaʼi, aboto ba dödönia wa teʼodaligö waʼomuso dödöda ba waʼaboto ba dödö niʼokhögöda sanandrösa ba zi so miföna. Lö tebulö tarasoi waʼomuso dödö na lö aetu taʼalui wanuturu lala moroi khönia ba taʼoʼö daʼö. (Yer. 10:23) Na tafalua ia, no amaedola tamane, ”Na itehegö Yehowa, tola auri ndraʼaga ba mafalua daʼa mazui daʼö.”—Yak. 4:15.

15. Hadia zi no taʼila sanandrösa ba zi so miföna?

¹⁵ Sindruhu wa lö taʼila hadia zalua mahemolu, hizaʼi taʼila wa hasambalö ibeʼe khöda waʼauri si lö aetu Yehowa, he ba zorugo mazui ba gulidanö. Aboto göi ba dödöda wa tebai falimo ia, ba lö si tola manaha yaʼia ba wamalua fefu zi no ifabuʼu. (Tit. 1:2) Ha yaʼia zi tola mangumaʼö, ”No iʼotarai ba wamobörö ufatunö lua-luania, ba iʼotarai me mböröta no uʼombakhaʼö ngawalö hadia zi lö nasa alua.” Oya wamaʼeleʼönia si no alua ba götö Zura Niʼamoniʼö me föna. Börö daʼö, hasambalö göi alua fefu wamaʼeleʼönia sanandrösa ba zi so miföna. (Yes. 46:10) Faduhu göi dödöda wa lö si tola mamabali yaʼita moroi ba waʼomasi Yehowa. (Rom. 8:​35-39) Hasambalö ibeʼe khöda waʼatua-tua, fondrara dödö hegöi faʼabölö ba wanaögö fefu hadia zalua. Yafaduhu dödöu wa itolo ba ifahowuʼö ita Yehowa.—Yer. 17:​7, 8.

LÖ TAʼILA HAWAʼABAKHA WANGIʼILA YEHOWA YAʼITA

16. Simane nisura ba Zinunö 139:​1-6, hadia manö niʼila Yehowa sanandrösa khöda, ba hewisa dödöda ba daʼö?

¹⁶ Baso Zinunö 139:​1-6. Ahori iʼila fefu Somböi yaʼita sanandrösa khöda. Iʼila hadia zondrönisi lala wangera-ngerada hegöi tödöda. Iʼila göi hadia niwaʼöda ba hadia zindruhunia nösi dödöda. Baero daʼö, iʼila fefu nifaluada ba hadia mbörö wa tafalua daʼö. Simane nisura Razo Dawido, lö tebulö inehe-nehegö ita Yehowa ba no ifaʼanö ia ba wanolo yaʼita. Sindruhu-ndruhu no töi sebua khöda me iʼameʼegö tödö ita Lowalangi sebua kuaso hegöi Somböi banua si yawa awö danö! Börö daʼö, tola manö fagölö nirasoida ba niwaʼö Dawido andre, ”Lö ikhamö fangera-ngeragu waʼaboto ba dödö simane daʼö, abua khögu wangiʼila.”—Si. 139:6.

17. Hadia mbörö wa abua khöda wamaduhusi tödö wa sindruhu-ndruhu aboto ba dödö Yehowa ita?

¹⁷ Yehowa andrö amaedola Ama sangomasiʼö ba soʼameʼegö tödö yaʼita ononia. Hizaʼi, te abua khöda ba wamaduhusi tödö daʼö börö lala wangebuaʼö yaʼita, si toʼölö mufalua ba mbanuada mazui nifaduhusida tödö ba zilalö. Mazui tola manö tawaʼö tödöda wa ebua sibai zala nifaluada ba zilalö irege ogoro Yehowa khöda, lö omasi ia iʼila ita ba ifandröndröu ia khöda. No irai irasoi zimane daʼö Dawido. (Si. 38:​18, 21) Baero daʼö, ba ginötö iforege si samösa niha ba wamaudugö faʼaurinia moloʼö goi-goi Lowalangi, te manofu-nofu ia, ’Na sindruhu-ndruhu aboto ba dödö Lowalangi ndraʼodo andre, hadia mbörö wa iʼandrö nasa khögu enaʼö ubulöʼö lala waʼaurigu? Hadia mbörö wa lö itemaʼö manö ndraʼo?’

18. Hana wa moguna aboto ba dödöda wa abölö iʼila ita Yehowa moroi khöda samösa? (Faigi göi gambara.)

¹⁸ Moguna aboto ba dödöda wa abölö iʼila ita Yehowa moroi ba khöda samösa, ba abölö iʼila ngawalö zi sökhi si so ba waʼaurida si lö taʼila samösa. Hewaʼae iʼila zoʼambö-amböta ita, aboto ba dödönia hadia zindruhunia zomasi ita tafalua ba lö tebulö iʼomasiʼö ita. (Rom. 7:15) Na aboto ba dödöda wa iʼila Yehowa ngawalö zi sökhi niʼokhögöda, hasambalö itugu faduhu dödöda wa tola tafosumange ia si fao faʼomuso dödö ba tola tarorogö waʼalöfaröida.

19. Hadia zi no aboto ba dödöda sanandrösa khö Yehowa?

¹⁹ Aboto ba dödöda wa Yehowa andrö no faʼomasi, ba lö aombö dödöda saʼae ba daʼö. (1 Yo. 4:8) Goi-goinia zangoromaʼö wa iʼomasiʼö ita ba omasi ia na tarasoi waʼomuso dödö ba waʼaurida. Aboto göi ba dödöda wa omasi Yehowa na tasöndra waʼauri si lö aetu. Daʼö mbörö wa ihenaigö khöda höli. Höli andrö zangaʼaroʼö tödöda wa tola taʼomusoiʼö dödö Yehowa hewaʼae niha si lö moʼahonoa ita. (Rom. 7:​24, 25) Baero daʼö, aboto göi ba dödöda wa ”abölö ebua Lowalangi moroi ba dödöda ba iʼila ngawalö hadia ia”. (1 Yo. 3:​19, 20) Sindruhu wa iʼila Yehowa fefu hadia ia sanandrösa khöda, ba faduhu dödönia wa tola tafalua fefu zomasi ia.

20. Hadia zindruhu saboto ba dödöda sanolo yaʼita ba wolawa faʼaombö dödö?

²⁰ Lö irai itaha Yehowa ngawalö zoguna khöda ba wangai angetula si sökhi. Na aboto ba dödöda daʼö, lö talafo taʼaombösi tödö hadia zi lö nasa taʼila ba taʼosambuaʼö dödöda ba zabölö tohude. Na tafalua daʼö, no taforomaʼö wa sindruhu-ndruhu faduhu dödöda khö Yehowa, ”sangokhögö faʼaboto ba dödö soʼahonoa”. (Yob. 36:4) Sindruhu wa so zi lö taʼila nasa iadaʼa. Hizaʼi, tatu tadöna-döna ginötönia dania oya tafahaʼö ita sanandrösa khö Yehowa hegöi amuatania sahöli-höli dödö sagötö faʼara.—Sango. 3:11.