Hewisa Dania ba Wangeheta Fasuwöta?

LOWALANGI DANIA ZANGEHETA FAMATÖRÖ NIHA GULIDANÖ

Iwaʼö Sura Niʼamoniʼö wa ’fefu razo ba zi sagörö ulidanö’ muʼowuloi ira ba ”ngaluo wasuwöta Sebua khö Lowalangi Fondrege Zabölö”. (Famaʼeleʼö 16:14) Fasuwöta andrö mufotöi ia Hamagedo.a Ba Hamagedo dania, Lowalangi zangeheta fefu wamatörö niha gulidanö hegöi ngawalö wasuwöta. (Famaʼeleʼö 16:16)

Iʼogunaʼö Wamatörönia Lowalangi ba wangeheta famatörö niha gulidanö. Famatörönia andrö moroi ba zorugo ba si lö irai adudu. (Danieli 2:44) No ifili Lowalangi Nononia, Yesu Keriso, si tobali Razo ba Wamatörö andrö. (Yesaya 9:​6, 7; Mataiʼo 28:18) Famatöröb daʼa nitötöi Yesu ba duma-duma wangandrö nifahaʼönia ba niha. (Mataiʼo 6:​9, 10) Yesu dania zi tobali Sondröniaʼö ba wamatörö andrö, ba fefu niha so barö wamatörönia.

Tenga simane ira sondröniaʼö ba gulidanö andre, lö iʼogunaʼö kuasonia Yesu ba zoguna khönia samösa. So göi waʼatulö khö Yesu ba lö ebua dödö zambuana. Andrö, lö hadöi saʼae dania niha nifakao börö waʼafaböʼö soi mazui mado. (Yesaya 11:​3, 4) Ba lö hadöi saʼae niha samorege ba wangandrö faʼatulö. Hadia mbörö? Börö me Yesu dania zameʼe faʼohahau dödö ba zi samö-samösa niha. ”Iʼefaʼö niha si numana siʼao khönia ba wangandrö tolo, simanö göi niha sambö faʼabölö ba si lö sanolo. . . . Iʼefaʼö ira moroi ba wamakao ba faʼalösökhi.”—Sinunö 72:​12-14.

Famatörö Lowalangi dania zangohori fefu wangöna niʼogunaʼö ba wasuwöta si so ba gulidanö. (Mikha 4:3) Ihori göi niha si lö mamöhöli ba wamalua fasuwöta hegöi samakiko faʼatulö. (Sinunö 37:​9, 10) Dozi niha farahu ba daʼö ndraono, tola larasoi waʼahono dödö gofu hezo möi ira.—Hezekieli 34:28.

Barö Wamatörö Lowalangi dania, larasoi waʼauri soʼahonoa niha gulidanö. Famatörö Lowalangi dania zangeheta fefu zi möi börö waʼudusa, simane faʼanumana, lofo, hegöi falöhadöi nahia waʼatoröi. Fefu niha dania larasoi waʼafahöna mbalazo, ö si so gizi hegöi nahia waʼatoröi si lö ametaʼuö.—Sinunö 72:16; Yesaya 65:​21-23.

Famatörö Lowalangi dania zangeheta fefu lua-lua si lö sökhi börö wasuwöta. Tefadöhö dania niha sesokho hegöi si göna faʼafawuka wangera-ngera börö wasuwöta. Niha si no mate, tesusugi dania ira ba gulidanö. (Yesaya 25:8; 26:19; 35:​5, 6) Teʼosambuaʼö fefu dania zi sambua ösi nomo ba lö saʼae itörö-törö tödöra ngawalö zi lö sökhi niʼasogö wasuwöta börö ”me no numalö zi föföna andrö”.—Famaʼeleʼö 21:4.

LOWALANGI DANIA ZANGEHETA HORÖ NIHA GULIDANÖ

Ba ginötö tohare Wamatörö Lowalangi ba gulidanö, dozi niha lafosumange Lowalangi sindruhu si hasambua sotöi Yehowa,c ”Lowalangi safönu faʼomasi ba faʼatulö”. (2 Korindro 13:11) Tefahaʼö göi niha gulidanö ba wondrorogö faʼatulö enaʼö faoma larasoi waʼahono dödö. (Yesaya 2:​3, 4; 11:9) Fefu niha somasi moloʼö khö Lowalangi, moʼahonoa ira ba teʼefaʼö moroi ba horö.—Roma 8:​20, 21.

LOWALANGI DANIA ZANGOHORI SATANA HEGÖI MALAʼIKA SI LÖ SÖKHI

Famatörö Lowalangi dania zangohori Satana hegöi malaʼika si lö sökhi sondrönisi tödö niha ba wamalua fasuwöta. (Famaʼeleʼö 20:​1-3, 10) Me no tehori ira ”fahöna dania waʼatulö ba gulidanö”.—Sinunö 72:7.

Hasambalö alua mbuʼusa li Lowalangi ba wangeheta fasuwöta. Ifatunö khöda Sura Niʼamoniʼö wa so waʼabölö khö Lowalangi ba wamalua buʼusa linia andrö, ba omasi ia wamalua daʼö.

• Lö ola waʼabölö hegöi faʼatua-tua Lowalangi. (Yobi 9:4) Lö si tebai khö Lowalangi.—Yobi 42:2.

• Lö omasi Lowalangi na tefakao niha gulidanö. (Yesaya 63:9) Ba ”fatuwu ia ba niha sangomasiʼö si lö sökhi”.—Sinunö 11:5.

• Hasambalö ifalua mbuʼusa linia Lowalangi. Lö falimo ia.—Yesaya 55:​10, 11; Tito 1:2.