Famaigi Lowalangi Fasuwöta IADAʼA

Faduhu dödöda wa iʼila Lowalangi wamakao salua ba gulidanö andre, ba omasi ia iheta fefu ngawalö wamakao. (Zinunö 72:13, 14) No ifabuʼu khöda Lowalangi ba Zura Niʼamoniʼö ”ba khömi, nifakao andrö, ba fangokafu dödö, awöma”. Hawaʼara alua? ”Na toʼele dania Zoʼaya, Yesu, moroi ba zorugo, awö malaʼika waʼabölönia andrö . . . na ilau mbalö ba zi lö aboto ba dödö Lowalangi, ba ba zi lö moloʼö turia somuso dödö andrö, khö Zoʼaya yaʼita, Yesu.” (II Tesalonika 1:7, 8) Alua daʼa ba zi so föna. No iʼombakhaʼö khöda Sura Niʼamoniʼö wa ’fasuwöta sebua andrö khö Lowalangi’ lafotöi ia Hamagedo.—Famaʼeleʼö 16:14, 16.

Lö iʼogunaʼö niha Lowalangi na alua wasuwöta andre. Tobali, iʼogunaʼö Nononia sotöi Yesu Keriso, hegöi ndra malaʼika ba wanuwö niha si lö sökhi. Fasuwötara andrö dania zangefaʼö niha gulidanö moroi ba wamakao.—Yesaya 11:4; Famaʼeleʼö 19:11-16.

Lö si tebulö dödö Lowalangi sanandrösa ba wasuwöta irugi iadaʼa. Iʼogunaʼö wasuwöta ba wangohori ngawalö zi lö sökhi hegöi famakao. Iʼotarai meföna irugi iadaʼa, no aboto ba dödöda wa Lowalangi samösa zo tatugöi hawaʼara alua wasuwöta ba haniha zi möi manuwö. No itatugöi ginötö Lowalangi ba wangohori fefu zi lö sökhi ba zi so föna. Yesu zi tobali sondröniaʼö ba wasuwöta. Eluahania, lö itehegö Lowalangi ngawalö wasuwöta salua ba ginötö andre, gofu haniha zamalua yaʼia.

Duma-dumania, khalaigö atö so darua nono matua si faʼudu me lö hadöi satuara ba nomo. Lö ara aefa daʼö, labato waʼudusa ba latelefo namara. Imane siaʼa khö namania wa akhinia zombörögö faʼudusa, imane göi akhinia wa no ifakao ia gaʼania. Faoma mangadu ira khö namara, ba si samösa manötöna ia wa iʼoʼawögö ia amania, simanö göi zi samösa. Me irongo namara hadia zalua, itegu ira enaʼö böi latohugö waʼudusa ba labaloi wangawulinia ba wangatulöʼö yaʼira. Ladöna-döna wangawuli namara. Lö ara aefa daʼö, latohugö waʼudusara. Me mangawuli namara ba nomo, mofönu ia ba ndraononia ba ihuku ira börö me lö laʼoʼö niwaʼönia.

Ba ginötö andre, ato niha zangandrö fanolo khö Lowalangi na möi ira fasuwö. Hizaʼi, lö fao Lowalangi khöra. Imane Sura Niʼamoniʼö, ”Böi misulöni zi lö sökhi awönia si lö sökhi,” ba ”böi milau mbalömi”. (Roma 12:17, 19) Baero daʼö, no ifatunö khöda Lowalangi ’baze-bazeʼö ia’ ba wamalua fasuwöta ba Hamagedo. (Zinunö 37:7) Me lö khöra fombaloi, andrö lahulö danga Lowalangi wamalua fasuwöta. Börö daʼö wa mofönu khöra Lowalangi. Ihuku ira Lowalangi ba Hamagedo ba wangohori niha si lö sökhi enaʼö laʼila wa Yehowa ”sanenaŵa fanuwö irugi wondrege danö”. (Zinunö 46:10; Yesaya 34:2) Ba daʼö dania awai fefu ngawalö wasuwöta na alua Hamagedo.

Na no awai wasuwöta andre, oya howu-howu nitemada ba Mbanua Lowalangi. No asese tarongo ba wangandrö Zoʼaya me imane, ”Yatobali banuau fefu niha. Yaʼitörö zomasi ndraʼugö, hulö ba zorugo, yasimanö göi ba gulidanö.” (Mataiʼo 6:10) Famatörö Lowalangi tenga ha iheta wasuwöta, tobali iheta fefu zamobörö fasuwöta yaʼia daʼö faʼalösökhi.a (Zinunö 37:9, 10, 14, 15) Fefu niha soloʼö khö Yesu ladöna-döna howu-howu ba wamatörö Mbanua Lowalangi.—II Fetero 3:13.

Irugi hawaʼara tadöna-döna waʼatohare Mbanua Lowalangi ba wangeheta fefu ngawalö wamakao, abula dödö, ba faʼalösökhi? No itutunö khöda Sura Niʼamoniʼö wa no tarugi ”ba götö safuria andrö”. (II Timoteo 3:1-5)b Lö aratö tohare Hamagedo.

Ba duho daʼa no aboto ba dödöda, wa niha si tehori dania ba Hamagedo yaʼia daʼö niha ”si lö moloʼö turia somuso dödö andrö, khö Zoʼaya yaʼita, Yesu”. (II Tesalonika 1:8)[2] Törö tödöu wa lö omasi Lowalangi alua waʼamate ba faʼalösökhi ba niha gulidanö. (Hezekieli 33:11) Börö me ”lö omasi ia tekiko ösa” niha na alua Hamagedo, iʼila wa no teturiaigö ”turia somuso dödö, ba gulidanö misa, maʼasagörö, ba wamaduhuʼö ba niha fefu” fatua lö tohare luo Yehowa. (II Fetero 3:8, 9; Mataiʼo 24:14; I Timoteo 2:3, 4) Lafalua halöwö fanuriaigö ira Samaduhuʼö Yehowa ba zi sagörö ulidanö, enaʼö tebeʼe ginötö ba niha fefu ba wanöndra faʼaboto ba dödö sanandrösa khö Lowalangi, laʼoʼö duria somuso dödö sanandrösa khö Yesu, ba teʼorifi ira na tohare Hamagedo.