Howu-Howu Nitemada Börö Waʼomasi Yehowa

1. Hewisa lalada ba wangomusoiʼö tödö Yehowa?

KHALAIGÖ atö: Öbeʼe mbuala si tohude ba niha niʼomasiʼöu. Hewisa dödöu na ifazaumba manö bakha ba lamari mbuala daʼö? Tatu afatö dödöu. Hizaʼi, na iforomaʼö wangandrö saohagölö ba iʼogunaʼö mbuala nibeʼemö andrö, tatu omuso dödöu. Simane daʼö göi, börö me iʼomasiʼö sibai ita Yehowa, ibeʼe khöda mbuala si tohude, yaʼia daʼö itehegö Nononia tobali höli. Na taforomaʼö wa taʼameʼegö tödö ba taʼandrö saohagölö ba daʼö, tatu omuso sibai dödö Yehowa.—Yoh. 3:16; Rom. 5:​7, 8.

2. Hadia nitutunöda ba artikel daʼa?

² Hizaʼi, na no ara ita ba zindruhu, tola manö tumbu ba dödöda wa höli andrö buala si toʼölö manö. Hewaʼae omuso dödöda ba wanema buala andrö, hizaʼi hulö no tafazaumba manö ia bakha ba lamari ba taʼolifugö. Börö daʼö, enaʼö lö tebulö taʼameʼegö tödö mbuala andrö, moguna asese taʼangerönusi hadia manö zi no ifalua Lowalangi hegöi Keriso salahida. Itolo dania ita artikel daʼa. Tatutunö hadia manö mbua nitemada iadaʼa hegöi ba zi so miföna börö me so höli. Tatutunö göi hewisa wangoromaʼöda fangandrö saohagölö hegöi foʼameʼegö tödö ba waʼomasi Yehowa, mendrua manö ba migu fatua lö mufalua mazui na no aefa Wanörö Tödö.

HOWU-HOWU NITEMADA IADAʼA BÖRÖ ME SO HÖLI

3. Hadia mbua nitemada iadaʼa börö me so höli?

³ Iadaʼa tola tatema mbua moroi ba höli nibeʼe Keriso. Duma-dumania, iʼefaʼö horöda Yehowa. Sindruhunia, tenga foʼömönia wamalua daʼö. Hewaʼae simanö, omasi ia ifalua. Si fao fangandrö saohagölö, manunö zanura sinunö imane, ”Börö me si sökhi tödö ndraʼugö Yehowa ba sangefaʼö sala.”—Si. 86:5; 103:​3, 10-13.

4. Haʼökhö ibeʼe höli andrö Yehowa? (Luka 5:32; 1 Timoteo 1:15)

⁴ Te so zangumaʼö wa tenga sinangea iʼefaʼö zalania Yehowa. Hizaʼi sindruhunia, fefu ita tenga sinangea tatema wangefa horö andrö. Faulo samösa ifaduhuʼö wa ’tenga sinangea lafotöi ia sinenge’. Hewaʼae simanö imane, ”Tola tobali simane daʼa ndraʼo iadaʼa börö waʼasökhi dödö sebua moroi khö Lowalangi.” (1 Ko. 15:​9, 10) Yafaduhu dödöu, na tafalalini gera-erada, hasambalö omasi Yehowa ba wangefaʼö salada. Hadia mbörö? Tenga börö me no sinangea tatema daʼö, hizaʼi börö me iʼomasiʼö ita. Na lö tebulö örasoi wa tenga sinangea ötema daʼö, törö tödöu wa ibeʼe höli andre Yehowa ba niha samalua horö samalalini era-era, tenga ba niha si lö irai mamalua horö.—Baso Luka 5:32; 1 Timoteo 1:15.

5. Hadia no sinangea iʼefaʼö horöda Yehowa? Tutunö.

⁵ Tebai so ba dödöda wa no sinangea iʼefaʼö horöda Yehowa börö me no ara mangai halöwö ita khönia. Sindruhu wa iʼameʼegö tödö waʼalöfaröida Yehowa. (Heb. 6:10) Hizaʼi, böi olifuʼö wa ibeʼe höli andrö tobali buala, tenga si tobali fangandrönia saohagölö ba halöwö nifaluada. Na so ba dödöda wa no sinangea tatema wangefaʼö sala ha börö me no mangai halöwö ita khönia, hulö no tawaʼö wa lö moguna khöda höli, irege zaya-zaya gölö waʼamate Keriso.—Baso göi Galatia 2:21.

6. Hana wa iforege Faulo ba wangai halöwö khö Yehowa?

⁶ Iʼila Faulo wa tenga sinangea iʼefaʼö horönia Yehowa hewaʼae no iforege wangai halöwö khönia. Na simanö, hana wa iforege Faulo ba wangai halöwö khö Yehowa? Ohitö dödönia tenga ba wangoromaʼö wa no sinangea itema wangefa horö, hizaʼi börö me iʼandrö saohagölö ba waʼasökhi dödö sebua moroi khö Lowalangi. (Ef. 3:7) Simane Faulo, lö taböhöli wamosumange Yehowa si fao faʼowölö-ölö, tenga ba wangoromaʼö wa no sinangea iʼefaʼö horöda, hizaʼi börö me taʼandrö saohagölö ba taʼameʼegö tödö wangefa horö nibeʼenia.

7. Hadia nasa mbua nitemada iadaʼa moroi ba höli? (Roma 5:1; Yakobo 2:23)

⁷ Hadia nasa mbua nitemada iadaʼa moroi ba höli? Tola tobali ita si fahuwu khö Yehowa.a Simane nitutunöda ba artikel silalö, tenga ösi nomo Yehowa ita iʼotarai me tumbu. Hizaʼi, börö me so höli, tola ’atulö ita khö Lowalangi’ ba tobali si fahuwu khönia.—Baso Roma 5:1; Yakobo 2:23.

8. Hana wa taʼandrö sibai saohagölö me no itehegö khöda Yehowa taʼondrasi ia ba wangandrö?

⁸ Tola taʼondrasi Yehowa ba wangandrö börö me no tobali ita si fahuwu khönia. Tatu no töi sebua khöda daʼa. Ifondrondrongo wangandröda Yehowa ero zamösana, tenga ha fangandrö nifaʼema ba ginötö owulo nono mbanuania. Na mangandrö ita, tola tasöndra waʼahono dödö ba faʼatulö. Hizaʼi, fangandrö tenga ha dalu-dalu. Tola göi itolo ita enaʼö itugu aro wahuwusada khö Lowalangi. (Si. 65:2; Yak. 4:8; 1 Yo. 5:14) Me so Yesu ba gulidanö, asese mangandrö ia khö Yehowa, börö me iʼila wa ifondrondrongo wangandrönia Amania. Iʼila göi wa tobali fangaro wahuwusania khö Yehowa daʼö. (Luk. 5:16) Tatu taʼandrö sibai saohagölö börö me so höli irege tola tobali ita si fahuwu khö Yehowa ba fahuhuo ita khönia ba wangandrö!

HOWU-HOWU NITEMADA BA ZI SO MIFÖNA BÖRÖ ME SO HÖLI

9. Hadia mbua nitema nono mbanua Yehowa si lö faröi börö me so höli?

⁹ Ba zi so miföna, hadia mbua nitema nono mbanua Yehowa si lö faröi börö me so höli? Lasöndra waʼauri si lö aetu. Ato niha sangumaʼö wa lö duhu alua daʼö, börö me iʼotarai me föna irugi iadaʼa, fefu niha itugu atua ba mate. Hizaʼi sindruhunia, omasi Yehowa na fefu niha lasöndra waʼauri si lö aetu. Na lö menaʼö aekhu ba horö Gadamo, faduhu dödö niha ba waʼauri si lö aetu. Baero daʼö, enaʼö tola tasöndra waʼauri si lö aetu, ebua sibai mböli nibuʼa Yehowa, yaʼia me itehegö Nono omasiʼönia mate salahida.—Rom. 8:32.

10. Hadia nibalo-baloi niha nibayoini hegöi biri-biri tanö böʼö?

¹⁰ Hewaʼae ba zi so miföna awena tasöndra waʼauri si lö aetu, omasi Yehowa na takhalaigö daʼö iʼotarai iadaʼa. Ira niha nibayoini, labalo-baloi waʼauri somuso tödö ba zorugo. Fao ira khö Keriso ba wamatörö ulidanö. (Fam. 20:6) Ira biri-biri tanö böʼö, labalo-baloi waʼauri ba gulidanö Faradaiso, si lö abula dödö hegöi fökhö. (Fam. 21:​3, 4) Hadia farahu ndraʼugö ba gotalua mbiri-biri tanö böʼö? Na yaʼia, böi so ba dödöu wa ambö tohude dötönafö niʼokhögömö. Sindruhunia, tewöwöi niha enaʼö auri ira sagötö faʼara ba gulidanö. Börö daʼö, tatu tola örasoi waʼomuso dödö dania ba waʼaurimö ba zi so miföna!

11-12. Hadia howu-howu nitötönada dania ba Waradaiso? (Faigi göi gambara.)

¹¹ Khalaigö hewisa dania waʼaurimö ba gulidanö Faradaiso. Lö saʼae aombö dödöu ba ngawalö wökhö hegöi faʼamate. (Yes. 25:8; 33:24) Ibeʼe khöu Yehowa fefu zi sökhi somasi dödöu. Hadia dania zomasiʼö öfahaʼö ndraʼugö? Hadia sanandrösa ba gurifö? Fakake zinunö? Mazui melukis? Baero daʼö, moguna nasa khöda arsitek, niha si fatuka hegöi sohalöwö ba danö. Moguna göi so zondrino ba sohenaigö gö, samazökhi fakake hegöi sananö sinanö. (Yes. 35:1; 65:21) Börö me tola auri ndraʼugö sagötö faʼara, oya ginötö niʼokhögömö ba wamahaʼö yaʼugö ba nekhe-nekhe danga somasiʼö öʼila.

¹² Khalaigö hawaʼomuso dödömö ba ginötö ötemaʼö dania niha nisusugi. (Hal. 24:15) Tola göi öfahaʼö nasa ndraʼugö sanandrösa khö Yehowa, yaʼia na önehegö niwöwöinia, si tebai muʼerai waʼoya. (Si. 104:24; Yes. 11:9) Sabölö tohude, tola mangai halöwö ndraʼugö khö Yehowa ba lö itegu-teguʼö tödömö side-ide, börö me no moʼahonoa ndraʼugö! Hadia omasiʼö ötukari fefu howu-howu daʼö faoma ’faʼomuso dödö ba horö si lö arara’? (Heb. 11:25) Tatu manö löʼö! Sindruhunia, omasi ita tatehegö gofu hadia ia enaʼö tatema howu-howu daʼö. Törö tödöu, ba ginötönia dania, hasambalö alua Waradaiso, tenga saʼae ha tötönafö! Alua daʼö börö me iʼomasiʼö sibai ita Yehowa irege itehegö mate Nononia tobali höli salahida.

FOROMAʼÖ WA ÖʼAMEʼEGÖ TÖDÖ WAʼOMASI YEHOWA

13. Hewisa wangoromaʼöda wa taʼameʼegö tödö ba taʼandrö saohagölö ba waʼomasi Yehowa? (2 Korindro 6:1)

¹³ Hewisa wangoromaʼöda wa taʼameʼegö tödö ba taʼandrö saohagölö ba höli nibeʼe Yehowa? Si oföna, taʼofönaiʼö wamalua halöwö khö Lowalangi ba waʼaurida. (Mat. 6:33) Böi olifu ita wa ”mate [Yesu] salahi zato enaʼö niha sauri tenga saʼae khöra waʼaurira, hizaʼi khö Keriso si no tesusugi ba si no mate salahira”. (2 Ko. 5:15) Tobali, na taʼofönaiʼö wamalua halöwö khö Yehowa, no taforomaʼö wa lö tabaliʼö zaya-zaya gölö waʼasökhi dödö sebua niforomaʼö Lowalangida Yehowa.—Baso 2 Korindro 6:1.

14. Hewisa wangoromaʼöda wa mamati ita khö Yehowa?

¹⁴ Si dua, mamati ita khö Yehowa ba taʼoʼö wanuturu lala nibeʼenia. Eluahania, fatua lö tahalö gangetula, duma-dumania sanandrösa ba wolohi sekola salawa mazui halöwö, moguna ua taʼangeragö hadia zomasi Yehowa. (1 Ko. 10:31; 2 Ko. 5:7) Na tafaudugö nifaluada ba wamatida, tola möi fanoloda daʼö ba wangaʼaroʼö famatida, fahuwusada khö Yehowa hegöi tötönaföda.—Rom. 5:​3-5; Yak. 2:​21, 22.

15. Hadia zi tola tafalua ba migu Wanörö Tödö?

¹⁵ Si tölu, ba migu Wanörö Tödö, dataforege wamalua fefu zangoromaʼö wa taʼameʼegö tödö ba taʼandrö saohagölö ba höli. Faʼanö ndraʼugö ba wangondrasi Fanörö Tödö, ba kaoni göi niha böʼö. (1 Ti. 2:4) Tutunö khöra hadia dania nifalua ba daʼö. Tola öforomaʼö khöra video Hana Wa Itörö Waʼamate Yesu? hegöi Fanörö Tödö Faʼamate Yesu ba jw.org. Baero daʼö, moguna göi lakaoni ira satua sokubaloi fefu niha si no mamöhöli halöwö ba wamati. Khalaigö hawaʼomuso dödö zi so ba zorugo hegöi ba gulidanö na mangawuli khö Yehowa mbiri-birinia si no taya! (Luk. 15:​4-7) Ba gangowuloa si tohude andre, tatu manö taʼowai fefu ndra talifusöda. Hizaʼi, dataforege göi ba wangowai fefu niha sawena möi mazui si no ara lö falukha khöda ba Wanörö Tödö. Omasi ita na larasoi wa tatemaʼö ira!—Rom. 15:7.

16. Hana wa moguna taʼangeragö ba wondrouʼö halöwö fanuriaigö sagötö migu Wanörö Tödö?

¹⁶ Hadia tola ödouʼö wamalua halöwö fanuriaigö ba migu Wanörö Tödö? No sambua lala si sökhi daʼa ba wangoromaʼö wa öʼameʼegö tödö fefu zi no ifalua khöu Lowalangi hegöi Keriso. Na itugu oya öʼogunaʼö ginötömö ba wanuriaigö, tola itugu örasoi wanolo Yehowa irege itugu aro göi wamatimö khönia. (1 Ko. 3:9) Baero daʼö, böi lalöi ba wombaso Sura Niʼamoniʼö ba migu Wanörö Tödö si so ba mbuku Mamareso Sura Niʼamoniʼö Ero Maʼökhö mazui ba Waö-Waö Halöwö ba Gangowuloa. Tola öʼogunaʼö ayati daʼö tobali famahaʼö samösa.

17. Hadia zangomusoiʼö tödö Yehowa? (Faigi göi kotak ”Lala ba Wangoromaʼö Fangandröda Saohagölö”.)

¹⁷ Böi ide-ide dödöu na tebai öfalua fefu nitutunö ba artikel daʼa, te börö zalua khömö. Törö tödöu wa lö irai ifaedo-faedogö hawaʼoya nifaluamö Yehowa ba nifalua niha böʼö. Iʼila nösi dödömö. Omuso dödönia me iʼila wa sindruhu-ndruhu öʼameʼegö tödö mbualania si tohude, yaʼia daʼö höli.—1 Sa. 16:7; Mrk. 12:​41-44.

18. Hana wa taʼandrö sibai saohagölö khö Lowalangi Yehowa hegöi Yesu Keriso?

¹⁸ Börö me so höli, tola teʼefaʼö horöda, tola fahuwu ita khö Yehowa ba tola taʼokhögö dötönafö faʼauri si lö aetu. Yalötebulö taforomaʼö wa taʼameʼegö tödö waʼomasi Yehowa, samarou yaʼia ba wameʼe khöda howu-howu andre. (1 Yo. 4:19) Yalötebulö göi taforomaʼö wangandrö saohagölö khö Yesu, si no mangomasiʼö yaʼita irege itehegö nosonia salahida!—Yoh. 15:13.