Ira Talifusö Ira Matua si Bohou Ebua, Miʼoʼö Mareko hegöi Timoteo

1-2. Hadia manö zi tola tobali taha-taha khö Mareko hegöi Timoteo ba wangai halöwö khö Lowalangi?

OMUSO sibai dödöda me ato ndra talifusöda si bohou ebua somasi mangai halöwö salahi niha böʼö. (Si. 110:3) Yaʼami ira talifusö si bohou ebua, hadia omasi ami na oya zi tola mifalua ba wamosumange Yehowa hegöi ba wangai halöwö salahi ndra talifusö ba mbanua niha Keriso? Faduhu dödöma wa omasi ami! Hizaʼi, te so zi tobali taha-tahami ba wamalua daʼö. Hadia aombö dödömi na oya mitehegö ginötömi ba wangai halöwö Lowalangi börö waʼataʼu? Hadia no irai mitimbagö halöwö nibeʼe khömi börö me ambö faduhu dödömi wa tola mifalua daʼö? Na daʼö nirasoimi, böi ide-ide dödömi. So göi ndra talifusöda tanö böʼö sorasoi daʼö.

² Simane daʼö nirasoi Mareko hegöi Timoteo. Hewaʼae simanö, lö labaliʼö taha-tahara waʼataʼu ba faʼaombö dödö ba wangai halöwö salahi niha böʼö. Sindruhunia, te no ahono-hono dödö Mareko toröi ba nomo ninania me ikaoni ia Faulo hegöi Baranaba wefao khöra ba wamalua halöwö utusan injil siföföna. (Hal. 12:​12, 13, 25) Moguna iröi nomonia Mareko enaʼö oya zi tola ifalua ba halöwö khö Lowalangi. Si oföna, findra ia ba Gandriokhia. Aefa daʼö, fao ia khö Waulo hegöi Baranaba weʼamöi ba mbanua sagaröu. (Hal. 13:​1-5) Simane Mareko, te ba nomo zatuania göi toröi Dimoteo me iwaʼö khönia Faulo enaʼö fao ira ba wamalua halöwö fanuriaigö. Awuyu-wuyu ndröfi Dimoteo me luo daʼö ba lö oya nasa zi no ifalua. Tola manö aombö dödönia ba lö omasi ia fao khö Waulo. (Baso göi 1 Korindro 16:​10, 11 hegöi 1 Timoteo 4:12.) Hizaʼi lö ifalua daʼö. Omasi ia fao khö Waulo ba oya howu-howu nitemania.—Hal. 16:​3-5.

3. (a) Hezo taʼila wa iʼameʼegö tödö Faulo zi darua si bohou ebua andrö? (2 Timoteo 4:​6, 9, 11; faigi göi gambara.) (b) Hadia dania nitutunöda ba artikel daʼa?

³ Oya wamahaʼö si sökhi si no latema ira Mareko hegöi Timoteo, irege oya halöwö si tola lafalua ba mbanua niha Keriso iʼotarai me awuyu-wuyu ira. Iʼameʼegö tödö Faulo ndra talifusö si bohou ebua andre. Oroma daʼö yaʼia me iʼandrö khö Mareko hegöi Timoteo enaʼö lafalukhaisi ia me iʼila arakhagö mate ia. (Baso 2 Timoteo 4:​6, 9, 11.) Hadia mbörö wa iʼomasiʼö sibai ira Faulo? Hewisa woloʼö ndra si bohou ebua duma-dumara? Ba hewisa enaʼö so mbuania khöu mene-mene Waulo safönu faʼomasi?

OʼÖ DUMA-DUMA MAREKO SOMASI MAMOREGE FOHALÖWÖ

4-5. Hewisa wangoromaʼö Mareko wa omasi ia mangai halöwö salahi niha böʼö?

⁴ Mangai halöwö salahi niha böʼö eluahania muforege wanolo yaʼira ba lö muböhöli wamalua daʼö hewaʼae afökhö. No tobali duma-duma khöda Mareko ba wamalua daʼa. Me lö omasi Waulo wolohe yaʼia ba wamalua halöwö utusan injil si mendrua, te afatö dödö Mareko ba afökhö dödönia. (Hal. 15:​37, 38) Hewaʼae simanö, lö ibaliʼö taha-tahania daʼö Mareko ba wangai halöwö salahi niha böʼö.

⁵ Mofanö Mareko fao ira zi tenga böʼönia sotöi Baranaba ba wangai halöwö ba mbanua tanö böʼö. Mato 11 fakhe aefa daʼö, fao Mareko ba gotalua niha sotuhini Faulo me lakuru Waulo ba Roma. (File. 23, 24) Iʼandrö sibai saohagölö Faulo me ituhini ia Mareko, irege ifotöi ia Faulo ”umbu wondrara dödögu”.—Kol. 4:​10, 11.

6. Hadia mbua nitema Mareko börö me fariawö ia khö ndra niha Keriso saro ba wamati? (Faigi göi nisura ba gahe zura.)

⁶ Oya mbua nitema Mareko börö me fariawö ia khö ndra niha Keriso saro ba wamati. Me no falulu fohalöwö ira Waulo ba Roma, mofanö Mareko ba Mbabilona falulu fohalöwö ia khö Wetero. Fahuwu sibai ira irege ifotöi ia Fetero simane ononia. (1 Fe. 5:13) Me falulu fohalöwö ira, te idunö-dunö khönia Fetero ngawalö zahöli-höli dödö sanandrösa ba waʼauri hegöi halöwö fanuriaigö nifalua Yesu. Ba gafuriata, isura fefu daʼö Mareko ba Injil Mareko.a

7. Hewisa Seung-Woo ba woloʼö duma-duma Mareko? (Faigi göi gambara.)

⁷ Iforege Mareko ba wangai halöwö khö Yehowa ba fariawö ia khö ndra talifusö saro famati. Yaʼami ira talifusöma si bohou ebua, hewisa woloʼömi duma-duma Mareko? Na omasi ami oya mifalua halöwö khö Yehowa hizaʼi lö nibeʼe khömi halöwö ba mbanua niha Keriso, böi ide-ide dödömi. Mibaloi si fao faʼebolo dödö ba miʼalui hadia zi tola mifalua ba wangai halöwö khö Yehowa hegöi ba mbanua niha Keriso. Nehegö duma-duma salua khö Seung-Woo, si no tobali satua sokubaloi iadaʼa. Me awuyu-wuyu ia, asese ifaedo-faedogö ia khö ndra talifusöda si bohou ebua tanö böʼö. So ösa ba gotaluara zi no manema halöwö ba mbanua niha Keriso. Ide-ide dödö Seung-Woo ba afatö dödönia. Samuza maʼökhö, ifatunö nösi dödönia andrö khö ndra satua sokubaloi. So samösa zatua sokubaloi sangumaʼö khönia enaʼö lö iböhöli wangai halöwö salahi niha böʼö, hewaʼae na lö laʼila nifaluania andrö ira talifusöda sato. Ifalua mene-mene daʼö Seung-Woo. Ibörögö itolo ndra talifusöda si no alawa döfi, simanö göi ndra talifusö si lö hadöi lala weʼamöi ba gangowuloa. Me ifuli itörö tödönia zalua khönia andrö, ba gafuriata imane, ”Awena aboto ba dödögu hadia geluahania mangai halöwö salahi niha böʼö. Omuso sibai dödögu me no utolo ndra talifusöda.”

OʼÖ DUMA-DUMA DIMOTEO SOʼAMEʼEGÖ TÖDÖ NIHA BÖʼÖ

8. Hana wa Timoteo nifili Waulo si tobali awönia? (Filifi 2:​19-22)

⁸ Omasi Waulo na ifuli möi ia ba mbanua si no irai mamakao yaʼia ba zilalö. Börö daʼö, moguna khönia ndra talifusöda si barani si möi awönia. Si oföna, iwaʼö khö Zila, samösa talifusöda si no ara mamosumange Yehowa. (Hal. 15:​22, 40) Ba gafuriata, iʼohe göi Dimoteo. Hadia mbörö wa Timoteo nifili Waulo? Börö me sökhi duria Dimoteo ba mbanua niha Keriso. (Hal. 16:​1, 2) Iʼameʼegö tödö göi niha böʼö.—Baso Wilifi 2:​19-22.

9. Hewisa wangoromaʼö Dimoteo wa iʼameʼegö tödö ndra talifusö?

⁹ Iʼotarai me no falulu fohalöwö ia khö Waulo, iforomaʼö Timoteo wa abölö iʼameʼegö tödö niha böʼö moroi khönia samösa. Börö daʼö, me mofanö Waulo iröi Dimoteo hegöi Sila ba Mberea, faduhu dödönia wa tola iʼabölöʼö ndra talifusö si bohou andrö Timoteo. (Hal. 17:​13, 14) Me luo daʼö, tatu manö no oya wamahaʼö si no ihalö Timoteo moroi ba duma-duma Zila. Börö daʼö, ifatenge ia Faulo ha samösa ba Desalonika ba wamarou tödö ndra talifusö si toröi ba daʼö. (1 Te. 3:2) Sagötö zi 15 fakhe aefa daʼö, lö iböhöli wamahaʼö yaʼia Timoteo ba ’wege-ege awö zege-ege’. (Rom. 12:15; 2 Ti. 1:4) Ifahaʼö ia ba worasoi ba itöfaigö ba dödönia wamakao salua khö ndra talifusönia. Hewisa göi ndra si bohou ebua woloʼöra duma-duma Dimoteo?

10. Hadia zanolo Woo-jae irege abölö iʼameʼegö tödö niha böʼö?

¹⁰ Samösa dalifusöda ira matua sotöi Woo-jae, ifahaʼö ia hewisa lala ba woʼameʼegö tödö niha böʼö. Me awuyu-wuyu ia, abua sibai khönia fahuo-huo khö ndra talifusöda si no alawa döfi ba mbanua niha Keriso. Na möi ia ba gangowuloa, ha asala iʼowai ndra talifusöda andrö, aefa daʼö ilau mofanö. Hizaʼi, so samösa zatua sokubaloi samarou tödönia enaʼö ibörögö wahuhuosa khö ndra talifusöda andrö ba ifatunö hadia zadöni dödönia ba nifaluara. Ifarou ia nasa satua sokubaloi andrö enaʼö iʼangeragö hadia zomasi ira. Ifalua mene-mene daʼö Woo-jae. Iadaʼa, no lafataro ia tobali satua sokubaloi. Imane Woo-jae, ”Abölö aoha khögu iadaʼa fahuo-huo khö ndra talifusöda hewaʼae na no faböʼö-böʼö waʼalawa ndröfira. Omuso dödögu börö me aboto ba dödögu hadia niʼaombösira tödö. Daʼa zanolo yaʼo ba wangila hadia zoguna khö ndra talifusöda ba hadia zinangea ufalua ba wanolo yaʼira.”

11. Hewisa lala enaʼö abölö miʼameʼegö tödö ndra talifusöda ba mbanua niha Keriso? (Faigi göi gambara.)

¹¹ Yaʼami ira talifusöma si bohou ebua, tola mifomaha ami ba woʼameʼegö tödö ira talifusöda. Mitandraigö fariawö khö ndra talifusöda ba gangowuloa hewaʼae no faböʼö-böʼö waʼalawa ndröfira hegöi lala waʼaurira ba zilalö. Misofu duriara ba mihaogö wamondrondrongo. Na mifalua daʼö, tola miʼila hadia zinangea mifalua ba wanolo yaʼira. Te awena dania miʼila wa so ndra talifusöda si no alawa döfi si lö onekhe mangogunaʼö JW Library^® mazui si lö awö weʼamöi manuriaigö. Hadia tola mitolo ira ba wangogunaʼö fakake elektronik? Hadia tola fao ami khöra weʼamöi manuriaigö? No tobali ami duma-duma ba mbanua niha Keriso na miʼalui lala ba wanolo ira talifusöda.

TEMA MBUA MOROI BA MENE-MENE WAULO SAFÖNU FAʼOMASI

12. Hadia nifalua ndra talifusöda ono matua enaʼö latema mbua moroi ba mene-mene Waulo khö Dimoteo?

¹² Oya mene-mene si sökhi nibeʼe Waulo soguna ba waʼauri hegöi ba halöwö fanuriaigö nifalua Dimoteo. (1 Ti. 1:18; 2 Ti. 4:5) Yaʼami ira talifusöma ono matua, tola göi mitema mbua moroi ba mene-mene daʼö. Hewisa lalania? Mibaso zura si dombua nifaʼoheʼö Waulo khö Dimoteo, ba mikhalaigö wa khömi mufanandrösa daʼö. Angeragö hadia manö mene-mene si tola öfalua ba waʼaurimö. Datatutunö duma-dumania.

13. Hewisa enaʼö lö taböhöli wamosumange Lowalangi soroi ba dödö?

¹³ ”Yatobali ohitö dödöu wamahaʼö yaʼugö ba wamosumange Lowalangi soroi ba dödö.” (1 Ti. 4:7b) Niha samosumange Lowalangi soroi ba dödö yaʼia daʼö niha si lö faröi khö Yehowa ba samalua ngawalö zangomusoiʼö tödönia. Sindruhunia, tenga iʼotarai me tumbu tobali ita samosumange Lowalangi. Moguna taforege wamalua daʼö. Hewisa lalania? Me iwaʼö Faulo ”yatobali ohitö dödöu”, iʼogunaʼö ngawua wehede soʼamaedolagö zi samösa atlet samorege ba wamomaha yaʼia fatua lö fao ia ba watandrisa. Moguna irorogö ngawalö zi sökhi si toʼölö ifalua sanolo yaʼia enaʼö iʼosambuaʼö dödönia ba gohitö dödönia. Simane daʼö göi, moguna tarorogö ngawalö zi sökhi si toʼölö tafalua sanolo yaʼita enaʼö abölö ahatö ita khö Yehowa.

14. Hadia zinangeania gohitö dödöda ba ginötö tabaso Zura Niʼamoniʼö? Beʼe duma-duma.

¹⁴ Ba ginötö öforege wombaso Sura Niʼamoniʼö ero maʼökhö, törö tödöu wa ohitö dödömö yaʼia daʼö enaʼö abölö ahatö ndraʼugö khö Yehowa. Duma-dumania, hadia wamahaʼö si tola öhalö me öbaso sanandrösa khö Yesu hegöi ira matua si kayo? (Mrk. 10:​17-22) Faduhu dödö ndra matua daʼö wa Yesu andrö Mesia, hizaʼi lö omasi ia ba woloʼö Yesu börö me ambö famatinia. Hewaʼae simanö, iʼomasiʼö ia Yesu. Hadia adöni dödömi ba lagu wahuhuosa Yesu khö ndra matua daʼö? Ba daʼa oroma wa omasi Yesu na ihalö gangetula si sökhi ira matua andrö. Faduhu dödöda wa simane daʼö göi dödö Yehowa. (Yoh. 14:9) Me öʼangerönusi waö-waö daʼa hegöi salua khömö, sofu khöu samösa, ’Hadia zinangea uforege enaʼö itugu ahatö ndraʼo khö Yehowa ba itugu oya zi tola ufalua salahi niha böʼö?’

15. Hadia mbörö wa moguna laforege ira talifusöda ono matua enaʼö tobali ira duma-duma ba mbanua niha Keriso? Beʼe duma-duma. (1 Timoteo 4:​12, 13)

¹⁵ ”Yatobali ndraʼugö duma-duma ba niha si lö faröi.” (Baso 1 Timoteo 4:​12, 13.) Ibeʼe mene-menenia Faulo khö Dimoteo enaʼö itugu onekhe ia ba wombaso hegöi ba wamahaʼö. Hizaʼi, tenga ha daʼö. Iʼandrö göi khönia Faulo enaʼö tobali ia duma-duma ba wangoromaʼö faʼomasi, famati hegöi faʼohau-hau. Hadia mbörö? Börö me abölö mobiso gamuata moroi ba wehede. Duma-dumania, labeʼe khöu halöwö ba wamaʼema huhuo sebua sanandrösa ba lala enaʼö owölö-ölö ba wanuriaigö. Tatu manö, abölö aoha khömö wamaʼema daʼö na no öfalua samösa wondrege zi sökhi ba halöwö fanuriaigö. Baero daʼö, abölö tefarou dödö ndra talifusö samondrongo ba woloʼö fanuturu lala nifaʼemamö.—1 Ti. 3:13.

16. (a) Hezo manö tola tobali duma-duma ndra talifusöda ono matua? (b) Hewisa enaʼö tobali duma-duma zi samösa talifusöda ono matua ”ba wehede”?

¹⁶ Simane nitutunö Waulo ba 1 Timoteo 4:​12, tola tobali duma-duma ndra talifusöda ono matua ba zi lima ngawalö andre, yaʼia daʼö ”ba wehede, ba gamuata, ba waʼomasi, ba wamati, hegöi ba waʼohau-hau”. Tandraigö baliʼö famahaʼömö samösa daʼa. Na omasiʼö tobali duma-duma ”ba wehede”, angeragö hewisa enaʼö tola tobali famarou dödö niha böʼö wehedemö. Duma-dumania, na toröi ndraʼugö nasa khö ndra satuamö, hadia tola abölö asese öforomaʼö khöra wangandrö saohagölö? Na möiʼö ba gangowuloa, hadia tola öforege nasa ba wameʼe bua gera-eramö faoma fehedemö samösa? Na no aefa gangowuloa, hadia tola öfatunö ba niha sangai huhuo hadia manö zomasiʼö moroi ba huhuonia? Famorege nifaluamö enaʼö tobali ndraʼugö duma-duma ba wehede, daʼö zangoromaʼö faʼatedoumö ba wamati.—1 Ti. 4:15.

17. Hadia zi tola manolo si samösa talifusöda ono matua ba wogamö ohitö dödönia ba wamati? (2 Timoteo 2:22)

¹⁷ ”Erogö wangisö zi bohou ebua, gohi zindruhu.” (Baso 2 Timoteo 2:22.) Ibeʼe mene-menenia Faulo khö Dimoteo enaʼö ilawa ngawalö gisö-isö dödö si möi famangoloi dödönia ba wolohi ohitö dödö ba wamati ba si tola mamakiko fahuwusania khö Yehowa. Te omasi ndraʼugö wamalua ngawalö halöwö somasi dödöu. Hewaʼae na lö fasala daʼö, hizaʼi tola arörö ndraʼugö irege lö saʼae inötöu ba wamalua halöwö ba wamati. Duma-dumania, angeragö hawaʼoya öhorigö ginötöu fa-olahraga, fa-internet, mazui fa-game. Hadia tola öʼogunaʼö ösa ginötö daʼö ba wamalua halöwö ba wamati? Te tola fao ndraʼugö ba wangehaogö mazui ba wondrorogö Nahia Gangowuloa ba mbanua niha Keriso si farahu yaʼugö, mazui manuriaigö ba nahia sato niha. Na öfalua daʼö, tola manö ösöndra nawöu si tola manolo yaʼugö ba wogamö ohitö dödö ba wamati.

HOWU-HOWU NITEMADA

18. Hadia howu-howu nitema Mareko hegöi Timoteo?

¹⁸ Oya zi no latehegö ira Mareko hegöi Timoteo ba wangai halöwö salahi niha böʼö, irege larasoi waʼomuso dödö hegöi faʼahono dödö. (Hal. 20:35) Itehegö ginötönia Mareko weʼamöi ba mbanua sagaröu ba wangai halöwö salahi niha böʼö. Isura göi ngawalö zadöni dödöda sanandrösa ba waʼauri Yesu hegöi halöwö nifaluania. Falulu fohalöwö göi Dimoteo khö Waulo ba wamasindro banua niha Keriso ba tobali ia umbu wamarou dödö khö ndra talifusö si sara lala wamati. Tatu manö omuso dödö Yehowa khö Mareko hegöi Timoteo börö me oya nitehegöra ba wamalua somasi ia.

19. Hana wa moguna laʼameʼegö tödö mene-mene Waulo andre ira talifusöda ono matua, ba hadia mbuania na lafalua daʼö?

¹⁹ Aboto ba dödöda wa ebua sibai waʼomasi Waulo khö Dimoteo, moroi ba zura nifaʼoheʼönia khö zi fahuwu khönia andre. Hizaʼi, Yehowa zameʼe fanuturu lala khö Waulo me isura zura andrö. Tobali, ösi zura daʼö göi zangoromaʼö wa iʼomasiʼö sibai ndra si bohou ebua Yehowa, farahu ndraʼugö ba daʼö. Omasi ia na mofozu ndraʼugö. Börö daʼö, haogö angerönusi mene-mene Waulo andrö ba falua daʼö. Forege wangai halöwö salahi niha böʼö soroi ba dödö. Na öfalua daʼö iadaʼa, örasoi waʼomuso dödö ba waʼaurimö ba tola ”ökhamö waʼauri sindruhu” ba zi so miföna.—1 Ti. 6:​18, 19.