Mafahaʼö Ndraʼaga khö Zamahaʼö Fondrege zi Sökhi Sandrohu Faʼaurima

DUMA-DUMA MOROI KHÖ NDRA SATUAGU

Me döfi 1957, findra zatuagu moroi ba Italia numalö ira ba mbanua Kindersley, Saskatchewan, Kanada. Lö ara aefa daʼö, lafahaʼö ira ba zindruhu, ba daʼö zabölö maʼofönaiʼö ba waʼaurima. Lö olifu ndraʼo me ide-idedo, asese fao ndraʼaga yaʼaga si sambua omo weʼamöi manuriaigö. Börö daʼö, itaria ulau mbude-bude wa no tobali ndraʼo ”perintis ekstra” iʼotarai me walu fakhe ndröfigu!

Niha si tosasa zatuagu. Hewaʼae simanö, labeʼe khöma duma-duma si sökhi ba wolulu faʼauri khö Yehowa. Duma-dumania, me döfi 1963, oya gama-gama nifamawara enaʼö tola fao ndraʼaga ba gangowuloa sebua internasional ba Pasadena, Kalifornia, AS. Me döfi 1972, findra ndraʼaga ba Trail, British Columbia, Kanada, mato 1.000 kilometer waʼaröu enaʼö tola manuriaigö ndraʼaga ba niha sangogunaʼö li Italia si toröi ba daʼö. Mohalöwö bapagu tobali petugas kebersihan hegöi pemeliharaan ba zi sambua toko sebua. Lö omasi ia itema dadaoma sabölö alawa börö me omasi ia iʼosambuaʼö dödönia ba wamosumange Yehowa.

Uʼandrö sibai saohagölö me no tobali ira duma-duma khögu hegöi khö ndra talifusögu si datölu. Daʼa dane-dane saro khögu enaʼö lö faröi ndraʼo ba wamosumange Yehowa. So sambua wamahaʼö si lö irai uʼolifugö: Na uʼofönaiʼö wamalua Famatörö Lowalangi, hasambalö irorogö ndraʼo Yehowa.—Mat. 6:33.

ME AWENA MANGAI HALÖWÖ SAFÖNU INÖTÖ

Me döfi 1980, mangowalu ndraʼo khö dalifusöda ira alawe si baga-baga sotöi Debbie, sangokhögö ohitö dödö ba wamati. Omasiga sibai mangai halöwö safönu inötö, andrö wa tölu waŵa me no aefa mangowaluga, ibörögö merintis Debbie. Siwa waŵa aefa daʼö, findra ndraʼaga ba mbanua niha Keriso side-ide si lö ato sanuriaigö, ba ibörögö merintis ndraʼo.

No irai ide-ide sibai dödöma ba mahalö gangetula wa hasambalö findra ndraʼaga. Hizaʼi fatua lö daʼö, malau fahuhuo khö zatua samasui. Si fao faʼomasi ba lö ibiniʼö wangumaʼö khöma imane, ”Sindruhunia hulö no miʼabua-buaisi zalua khömi andrö. Talafo miʼosambuaʼö dödömi ba gabula dödö salua. Na miʼosambuaʼö dödömi ba ngawalö zi sökhi, hasambalö wa tola misöndra daʼö.” Daʼa mene-mene soguna khöma. (Si. 141:5) Iʼanemaiʼö mafalua daʼö, ba sindruhu wa oya sibai zi sökhi nisöndrama. Duma-dumania, iadaʼa tola maʼila wa so ndra talifusöda ba mbanua niha Keriso somasi mondrouʼö halöwö nifaluara khö Yehowa, farahu ba daʼö ndra si bohou ebua hegöi ira talifusöda ira alawe si tenga si sara lala wamati woʼomora. No tobali famahaʼö si sökhi daʼö khöma. Mafahaʼö ndraʼaga ba wangalui ngawalö zi sökhi ba moguna mabaloi wanuturu lala moroi khö Yehowa ba gabula dödö nitaögöma. (Mi. 7:7) Daʼö mbörö wa ifuli marasoi waʼomuso dödö ba itugu sökhi zalua.

Samahaʼö yaʼaga ba sekolah dinas perintis siföföna sibai, no irai mangai halöwö ia ba soi tanö böʼö. Me laforomaʼö khöma koda ba latutunö ngawalö wanandraigö hegöi howu-howu si no larasoi sagötö mangai halöwö ira ba soi böʼö, tefarou dödöma tobali utusan injil. Daʼö mbörö wa mabaliʼö ohitö dödöma ba wamalua halöwö daʼa.

Börö daʼö, findra ndraʼaga me 1984 ba Quebec, töra 4.000 kilometer waʼaröunia moroi ba British Columbia. Börö me li Prancis zasese laʼogunaʼö ba mbanua daʼö, moguna mafahaʼö ndraʼaga ba li si bohou hegöi sasese mufalua ba daʼö. Taha-taha tanö böʼö yaʼia daʼö asese ambö kefema. Samuza maʼökhö, awai mbalazoma ha kentang niʼozaragöma ba kabu niha böʼö si no latehegö khöma. Ifalala-lala wamazökhi kentang daʼö Debbie, ba ami sibai! Hewaʼae oya gabula dödö salua, hizaʼi maforege enaʼö lö taya waʼomuso dödöma. Marasoi göi wanolo moroi khö Yehowa.—Si. 64:10.

Samuza maʼökhö, matema telefo ba zi lö madöna-döna. Lakaoni ndraʼaga wangai halöwö ba Mbetieli Kanada. Faruka fakhöyö wangera-ngerama börö me no göi mafasuraʼö döima ba Sekolah Gilead. Hewaʼae simanö, matema manö wogaoni andrö. Me no marugi Mbetieli, manofu ndraʼaga khö dalifusöda Kenneth Little, samösa Panitia Cabang, ”Hewisa me no mafasuraʼö döima ba Sekola Gilead?” Imane khöma, ”Dania tafahuhuosi daʼö na no lakaoni ami.”

Samigu aefa daʼö, lakaoni ndraʼaga ba Sekolah Gilead. Börö daʼö, moguna mahalö gangetula. Imane khöma talifusöda Little, ”Gofu hadia gangetula nihalömi iadaʼa, samuza maʼökhö tola manö miwaʼö tödömi wa abölö sökhi gangetula tanö böʼö. Hizaʼi, böi olifu ami, lö hadöi angetula sabölö tohude moroi ba danö böʼö, börö me fagölö-gölö no ifahowuʼö daʼö Yehowa.” Andrö wa mahalö gangetula wefao ba Sekolah Gilead, ba sagötö zi hauga fakhe marasoi samösa wa itörö niwaʼö dalifusöda Little. Asese göi maʼogunaʼö mene-mene daʼa na fahuhuo ndraʼaga khö ndra talifusöda sabua ba wangai angetula hezo halöwö somasi latema.

FAʼAURIMA TOBALI UTUSAN INJIL

Omuso sibai dödöma me tola fao ndraʼaga ba gotalua zi 24 siswa Gilead kelas 83. Mufalua daʼö ba Brooklyn, New York, me baŵa si Öfa 1987. Instruktur siföföna ba sekolama andrö yaʼia daʼö talifusöda Ulysses Glass hegöi Jack Redford. Alio sibai numalö zi lima waŵa andrö. Wisuda ndraʼaga me 6 mbaŵa si Siwa 1987. Lafataro ndraʼaga ba Haiti, faoga dalifusöda John hegöi Marie Goode.

Me döfi 1962, mufofanö ndra utusan injil moroi ba Haiti. Iʼotarai daʼö, lö hadöi utusan injil moroi ba sekolah Gilead nifatenge ba daʼö. Tölu migu me no aefa wisuda, marugi Haiti. Mangai halöwö ndraʼaga ba mbanua niha Keriso side-ide si ha 35 sanuriaigö si so ba mbanua sohili. Me luo daʼö, awuyu nasa ndraʼaga ba lö oya zi no matörö. Baero daʼö, ha yaʼaga zi toröi ba nomo utusan injil. Tosasa sibai waʼauri niha ba daʼö ba lö laʼila mombaso. Sagötö toröi ndraʼaga ba daʼö, lö sökhi gamuata niha börö zalua ba politik, lafalua demo ba laforege ba wolawa samatörö. Baero daʼö, alua göi nangi fuyu.

Oya wamahaʼö si tola mahalö moroi khö ndra talifusöda saro ba wamati si toröi ba Haiti. Hewaʼae tosasa waʼaurira, lö tebulö larorogö waʼomuso dödö nirasoira. Laʼomasiʼö Yehowa hegöi halöwö fanuriaigö. Duma-dumania, so samösa dalifusöda ira alawe si no atua ba si lö mangila mombaso, hizaʼi so 150 ayati si no itanö ba dödönia. Salua khöma ero maʼökhö, daʼö zanolo yaʼaga enaʼö owölö-ölö ndraʼaga ba wanuriaigö sanandrösa ba Wamatörö Lowalangi. Omasiga mafatunö ba niha wa ha daʼa zi tola mangeheta abula dödö niha gulidanö. Omuso sibai dödöma me maʼila wa so ösa niha nifahaʼöma zangai angetula tobali perintis biasa, perintis istimewa, hegöi satua sokubaloi.

Me so ndraʼaga ba Haiti, falukhado khö Trevor, samösa misionaris moroi ba gereja Mormon. Awuyu-wuyu nasa ia ba no hauga kali mafadunö-dunö sanandrösa ba Zura Niʼamoniʼö. Hauga fakhe aefa daʼö, utema zura nifaʼoheʼönia ba imane khögu, ”Labayagö dania ndraʼo idanö ba gangowuloa ba zi sambua wilayah sakali daʼa! Omasido mangawuli ba Haiti ba tobalido perintis istimewa ba mbanua si toröi yaʼo me tobalido misionaris Mormon.” Ba sindruhu, lafalua daʼö darua ira foʼomonia.

EROPA HEGÖI AFRIKA

Lafatenge ndraʼaga ba zi sambua banua si so ba Eropa sawena muturiaigö duria somuso dödö. Me döfi 1992, marugi Ljubljana, Slovenia, sahatö ba mbanua si tumbu ndra satuagu fatua lö findra ira ba Italia. Me marugi daʼa, lö nasa si tebato wasuwöta ba mbanua si no irai ifatörö Yugoslavia. Gödo ndraha ba Wina, Austria, ba Zagreb, Kroasia, hegöi ba Beograd, Serbia, zamaigi-maigi halöwö fanuriaigö ba mbanua daʼö. Iadaʼa, ahori so gödo ndraha ba soi si no irai ifatörö Yugoslavia andrö.

Ifuli zui mafahaʼö ndraʼaga ba li si bohou hegöi ba zi toʼölö mufalua ba mbanua sawena marugi. Asese lamane niha si toröi ba daʼa, ”Abua li khöma.” Ba sindruhu daʼö! Daʼö mbörö wa ahöli-höli dödöma khö ndra talifusöda si lö faröi ba wanema halöwö si bohou. Maʼila samösa hewisa danga Yehowa wamahowuʼö yaʼira. Ba daʼa zui anehe ndraʼaga hewisa wanolo nibeʼe Yehowa ba wangasiwai abula dödö si fao faʼomasi ba ginötö si tefaudu. Oya wamahaʼö si no mahalö ba zilalö si tola maʼogunaʼö sagötö mangai halöwö ndraʼaga ba Slovenia. Oya göi wamahaʼö si bohou nihalöma ba daʼa.

Hizaʼi, tebulö zui halöwö nitemama. Me döfi 2000, lafatenge ndraʼaga ba Pantai Gading ba Afrika Barat. Hizaʼi börö me alua wasuwöta ba daʼö, lafindrakö ndraʼaga ba Sierra Leone me baŵa si Felezara 2002. Awena sibai tebato wasuwöta salua ba daʼö iʼotarai me 11 fakhe silalö. Sindruhu wa abua sibai khöma wondröi Pantai Gading ba zi lö madöna-döna. Hewaʼae simanö, famahaʼö si no matema barö daʼa zanolo yaʼaga enaʼö lö tebulö waʼomuso dödöma.

Maʼosambuaʼö dödöma ba wanolo niha somasi mamahaʼö yaʼira ba Zura Niʼamoniʼö hegöi ira talifusöda si lö faröi sagötö alua wasuwöta. Hewaʼae tosasa ira, hizaʼi laforomaʼö waʼoböwö. So samösa dalifusöda ira alawe sameʼe baru khö Debbie. Ba wamobörö lö omasi Debbie, hizaʼi imane khönia talifusöda andrö, ”Me alua wasuwöta, ira talifusöda moroi ba soi böʼö zanolo yaʼaga. Iadaʼa yaʼaga göi.” Omasiga maʼoʼö duma-dumara.

Ba gafuriata mangawuliga ba Pantai Gading, hizaʼi ifuli alua waʼakaliru politik ba daʼö. Me baŵa si Felezara 2004, findra ndraʼaga matörö helikopter, ba ha tasi si 10 kilogram waʼabua zi tola maʼohe ero samösa. Bongi daʼö ba zalo möröga ba naha ndra saradadu Prancis. Mahemolunia, laʼohe ndraʼaga ba Swiss. Talu mbongi me ofeta ndraʼaga ba gödo ndraha Swiss. Iʼanemaiʼö latemaʼö ndraʼaga ira talifusöda Panitia Ndraha hegöi instruktur Sekolah Pelatihan Pelayanan, simanö göi woʼomora. Latalagui ndraʼaga, labeʼe öma gö saukhu-aukhu hegöi coklat Swiss soya sibai. Terara sibai dödöma.

Gasa-gasa, lafataro ndraʼaga ba Ghana. Aefa daʼö mangawuliga zui ba Pantai Gading börö me lö saʼae faʼakaliru ba daʼö. Faʼasökhi dödö moroi khö ndra talifusöda zanolo yaʼaga ba wanaögö inötö si basaki andrö irege tola mafalua halöwöma. Sindruhu sa wa faʼomasi ba gotalua zi fatalifusö, no sinangea so daʼö ba organisasi Yehowa. Hizaʼi, yaʼo hegöi Debbie lö tebulö mawaʼö tödöma wa tohude sibai daʼö. Ba gafuriata aboto ba dödöma wa faʼabasaki salua andre tobali famahaʼö sebua böli khöma.

TIMUR TENGAH

Me döfi 2006, matema zura moroi ba gödo sebua, lafatenge ndraʼaga ba Timur Tengah. Eluahania ifuli zui so zalua hegöi abula dödö si bohou. Moguna mafahaʼö ndraʼaga ba li si bohou hegöi si toʼölö mufalua ba mbanua daʼö. Oya sibai zinangea mafahaʼö yaʼaga ba mbanua safönu abula dödö ba politik hegöi agama andre. Hewaʼae simanö, omuso dödöma me maʼila ndra talifusöda moroi ba ngawalö soi hasara dödöra ba woloʼö fanuturu lala moroi ba organisasi Yehowa. Ahöli-höli göi dödöma khö ndra talifusöda si toröi ba daʼö börö me anau gölöra wanaögö folohi moroi ba nösi nomora, awöra sekola, awöra wohalöwö hegöi si falazi omo khöra.

Me döfi 2012, möiga ba pertemuan istimewa ba mbanua Tel Aviv, Israel. Daʼa gangowuloa sebua sato niha siföföna sibai lafalua ira samosumange Yehowa iʼotarai me Fendrakose 33 M. Sindruhu-ndruhu wa tebai muʼolifugö daʼa!

Sagötö weʼasoma ba Timur Tengah, lafataro ndraʼaga weʼamöi ba zi sambua soi si lö manehegö halöwö nifaluada. Maʼohe mato hauga ngawua publikasi, malau manuriaigö, ba maʼondrasi gangowuloa ba zi sambua wilayah si lö ato niha. So ösa ndra sanuriaigö si fao khöma, ba mahaogö mafalua ia si fao fangelama. Börö daʼö, lö ataʼu ndraʼaga hewaʼae so ndra saradadu solohe fana ba oya sibai pos nahia ndra saradadu ba wamareso niha.

MANGAWULI BA AFRIKA

Me döfi 2013, matema halöwö si bohou si faböʼö sibai, yaʼia daʼö mangai halöwö ba gödo ndraha ba mbanua Kinshasa, Kongo. Ebolo sibai soi daʼa ba no baga-baga, hizaʼi tosasa sibai nono mbanuania. Iʼotarai me föna, asese alua wasuwöta ba soi daʼa. Ba wamobörö mawaʼö tödöma wa ’no irai toröi ndraʼaga ba Afrika. Tatu manö no tefaʼanö ndraʼaga.’ Hizaʼi sindruhunia, oya nasa zinangea mafahaʼö ndraʼaga, mendrua manö sanandrösa ba weʼamöi manuriaigö ba mbanua si lö hadöi lala sebua mazui soroso. Hewaʼae simanö, oya zi sökhi nirasoima ba daʼa. Duma-dumania, tola maʼila wa anau gölö ndra talifusöda ba omuso dödöra hewaʼae na tosasa ira ba wangalui soguna. Omasi sibai ira manuriaigö ba laforege weʼamöi ba gangowuloa hegöi ba wangondrasi angowuloa ba zi sambua wilayah. Maʼila samösa hewisa waʼatedou halöwö fanuriaigö ba daʼö. Tola alua daʼö börö wanolo hegöi howu-howu moroi khö Yehowa. Sagötö mangai halöwö ndraʼaga ba Kongo, oya ngawalö zi sökhi si möi famahaʼöma. Ato zi fahuwu khöma ba amaedola nösi nomora ndraʼaga.

Ba gafuriata ndröfi 2017, matema zui halöwö si bohou yaʼia daʼö mangai halöwö ba Mbetieli Afrika Selatan. Lö irai mangai halöwö ndraʼaga ba gödo ndraha simane daʼa faʼebua. Sindruhu-ndruhu faböʼö göi halöwöma. Ifuli zui oya zinangea mafahaʼö yaʼaga, hizaʼi tobali fanoloma wamahaʼö si no matema ba zilalö. Ato sibai ndra talifusöda si no ngafulu fakhe mangai halöwö ba daʼö, ba lö si faröi ira. Maʼomasiʼö sibai ira. Ahöli-höli dödöma me maʼila wahasara dödö ba nösi nomo Mbetieli hewaʼae no faböʼö-böʼö mado awö zi toʼölö lafalua. Anehe göi ndraʼaga hewisa wameʼe Yehowa faʼahono dödö ba nono mbanuania samorege ba wamohouni amuatara ba samalua goi-goi Zura Niʼamoniʼö.

Yaʼo hegöi Debbie, no marasoi ngawalö halöwö si möi fangomuso dödöma, mafahaʼö ndraʼaga ba wamaudugö nifaluama moloʼö sasese lafalua ba mbanua nirugima ba mafahaʼö ndraʼaga göi ba ngawalö li si bohou. Hewaʼae na abua daʼö, hizaʼi lö tebulö marasoi waʼomasi si lö faröi moroi khö Yehowa, yaʼia me iʼogunaʼö organisasinia hegöi ira talifusö si sara lala wamati. (Si. 144:2) Faduhu dödöma wa famahaʼö si no matema ba zilalö, daʼö mbörö wa tobali ndraʼaga ono mbanua Yehowa si lö faröi.

Uʼandrö sibai saohagölö ba ngawalö wamahaʼö nibeʼe ndra satuagu, fotuhini moroi khö woʼomogu Debbie hegöi duma-duma sahöli-höli dödö moroi khö ndra talifusö ba zi sagörö ulidanö. Gofu hadia zalua ba zi so miföna, no mahalö gangetula wa omasiga na lö tebulö ifahaʼö ndraʼaga Samahaʼö Fondrege zi Sökhi, Yehowa.