Hadia Moguna Nasa Khöu Dane-Dane Wamahaʼö moroi ba Zura Niʼamoniʼö?

1. Hadia mbua nitemamö me no öfahaʼö ndraʼugö ba dane-dane wamahaʼö moroi ba Zura Niʼamoniʼö?

OYA mbua nitemada me no tafahaʼö ita ba dane-dane wamahaʼö moroi ba Zura Niʼamoniʼö. Duma-dumania, me no tafahaʼö ita wa töi Lowalangi yaʼia daʼö Yehowa, omasi ita tobali si fahuwu khönia. (Yes. 42:8) Me no tafahaʼö ita sanandrösa ba niha si no mate, aboto ba dödöda wa lö tefakao waʼauri nösi nomoda mazui si fahuwu khöda hewaʼae no mate ira. (Sango. 9:10) Me tafahaʼö göi ita sanandrösa ba Waradaiso, lö saʼae aombö dödöda sanandrösa ba waʼaurida ba zi so miföna. Faduhu dödöda wa tola auri ita sagötö faʼara, tenga ha 70 mazui 80 fakhe.—Si. 37:29; 90:10.

2. Moroi ba 2 Fetero 1:​12, 13, hezo oroma wa fefu niha si no ara mamosumange Yehowa tola latema mbua moroi ba dane-dane wamahaʼö ba Zura Niʼamoniʼö?

² Ba zurania si mendrua, ifaʼoheʼö daʼö Fetero ba niha Keriso si no ’aro ba zindruhu’. (Baso 2 Fetero 1:​12, 13.) Me luo daʼö, so ndra samaʼeleʼö hegöi samahaʼö sofaya bakha ba mbanua niha Keriso samorege ba wamaelungu yaʼira. (2 Fe. 2:​1-3) Hadia nifalua Wetero ba wanolo yaʼira? Ifasugi ba dödöra sanandrösa ba wamahaʼö si no laʼila. Famahaʼö daʼö zanolo yaʼira enaʼö lö faröi khö Yehowa. Hadia wamahaʼönia khöda? Tebai taʼosiwawöi dane-dane wamahaʼö moroi ba Zura Niʼamoniʼö.

3. Hana wa fefu niha Keriso moguna laʼangerönusi dane-dane wamahaʼö moroi ba Zura Niʼamoniʼö? Beʼe duma-duma.

³ Hewaʼae no ara tafosumange Yehowa, so manö nasa ngawalö zi bohou si tola tafahaʼö yaʼita moroi ba dane-dane wamahaʼö ba Zura Niʼamoniʼö. Duma-dumania simane daʼa: Niha sonekhe mondrino hegöi niha sawena mamomaha mondrino, te laʼogunaʼö faramasa si fagölö ba ginötö mondrino ira. Hizaʼi, niha sonekhe mondrino, iʼila iʼogunaʼö faramasa daʼö ba wondrino gö si bohou ba sadöni dödö niha. Simane daʼö göi niha si no ara mamosumange Yehowa hegöi niha sawena mamomaha ba Zura Niʼamoniʼö. Hewaʼae fagölö dane-dane wamahaʼö niʼilara, hizaʼi tola manö faböʼö wamahaʼö nihalöra. Hadia mbörö? Börö me tola tebulö zalua hegöi halöwö zi samösa niha bakha ba organisasi. Tobali, na taʼangerönusi dane-dane wamahaʼö moroi ba Zura Niʼamoniʼö si no ara no taʼila, tola manö so zi bohou soguna ba zalua khöda iadaʼa. Börö daʼö, datatutunö zi tölu dane-dane wamahaʼö ba Zura Niʼamoniʼö soguna khöda, hewaʼae no ara tafosumange Yehowa.

YEHOWA ANDRÖ SOMBÖI

4. Hadia mbua nitemada börö me taʼila wa Yehowa andrö Somböi yaʼita?

⁴ ”Samazökhi fefu hadia ia ba yaʼia Lowalangi.” (Heb. 3:4) No aboto ba dödöda wa Lowalangi zomböi ulidanö hegöi ösinia maʼafefu. Yaʼia andrö Somböi fondrege zatua-tua ba sebua kuaso. Börö me yaʼia zomböi yaʼita, iʼila fefu sanandrösa khöda. Iʼameʼegö tödö ita ba iʼila hadia zi sökhi khöda. Dane-dane wamahaʼö wa Yehowa andrö Somböi, daʼö zanolo yaʼita enaʼö itugu moʼeluaha waʼaurida.

5. Hadia dane-dane wamahaʼö sanolo yaʼita ba wangokhögö fangide-ngideʼö? (Yesaya 45:​9-12)

⁵ Dane-dane wamahaʼö wa Yehowa andrö Somböi, daʼö göi zanolo yaʼita ba wangokhögö fangide-ngideʼö. Nehegö duma-duma Yobi. No irai fasala lala wangera-ngerania sanandrösa khö Yehowa. Talafo iʼosambuaʼö dödönia ba waʼauri hegöi ba döi si sökhi niʼokhögönia. Daʼö mbörö wa ifasugi ba dödönia Yehowa wa yaʼia andrö Somböi sebua kuaso. (Yob. 38:​1-4) Daʼa zamasugi ba dödö Yobi wa abölö alawa lala wangera-ngera Lowalangi moroi ba lala wangera-ngera niha gulidanö. Daʼö göi nisura Yesaya samaʼeleʼö me imane, ”Hadia sinangea iwaʼö tambu laʼuri ba Zamöbözi yaʼia, ’Hadia nifaluamö?’”—Baso Yesaya 45:​9-12.

6. Hawaʼara ginötönia moguna abölö taʼangerönusi waʼatua-tua hegöi faʼabölö Zomböi yaʼita? (Faigi göi gambara.)

⁶ Na no ara tafosumange Yehowa ba oya zi no tatörö ba waʼauri, te ibörögö abölö taʼodaligö lala wangera-ngerada samösa moroi na taʼodaligö Yehowa hegöi Sura Niʼamoniʼö. (Yob. 37:​23, 24) Enaʼö lö tafalua zimane daʼö, moguna taʼangerönusi hawaʼebua waʼatua-tua hegöi faʼabölö Zomböi yaʼita. (Yes. 40:22; 55:​8, 9) Daʼa zanolo yaʼita enaʼö taʼokhögö wangide-ngideʼö ba tafaduhuʼö wa abölö alawa lala wangera-ngera Yehowa moroi ba lala wangera-ngerada.

7. Hadia nifalua Rahela ba wanemaʼö faʼatebulö?

⁷ Samösa dalifusöda si toröi ba Slovenia sotöi Rahela, irasoi samösa mbua me iʼangerönusi wa Yehowa andrö Somböi. Imane, ”Itaria abua khögu wanemaʼö angetula nihalö ndra talifusöda sondröniaʼö. Duma-dumania, lö fatema ba dödögu me awena sibai uʼila dalifusöda sogambi samaʼema huhuo. Sindruhunia, no ufaigi video gangombakhata moroi khö ndra Boto Solohe sanutunö sanandrösa ba gambi.a Daʼö mbörö wa uʼandrö wanolo khö Yehowa enaʼö tola utemaʼö waʼatebulö andre.” Aboto ba dödö Rahela wa tola ibeʼe wanuturu lala satulö Yehowa ba organisasinia börö me yaʼia Somböi banua si yawa awö danö. Daʼa zanolo Rahela ba wanemaʼö faʼatebulö andrö. Börö daʼö, na abua khöu wanemaʼö faʼaboto ba dödö mazui fanuturu lala si bohou, tandraigö angerönusi hawaʼebua waʼatua-tua hegöi faʼabölö Zomböi yaʼita.—Rom. 11:​33-36.

DANE-DANE WA ITEHEGÖ TEFAKAO NIHA LOWALANGI

8. Hadia mbua nitemada me no taʼila mbörö wa itehegö tefakao niha Yehowa?

⁸ Hana wa itehegö Lowalangi tefakao niha gulidanö? So ösa niha si lö mangila fanema linia mofönu ira khö Lowalangi mazui so ba wangera-ngera wa lö hadöi Lowalangi. (Amd. 19:3) Hizaʼi, tenga simane daʼö ndraʼugö. No öfahaʼö ndraʼugö wa tefakao niha gulidanö börö horö ondröita hegöi falömoʼahonoa, tenga börö Yehowa. No göi öfahaʼö ndraʼugö wa börö waʼebolo dödö Yehowa, zuta niha tola laʼokhögö waʼaboto ba dödö sanandrösa khönia ba laʼila hadia dania nifaluania ba wangeheta famakao sagötö faʼara. (2 Fe. 3:​9, 15) Tatu möi fondrara dödömö dane-dane wamahaʼö andre ba itugu öʼomasiʼö Yehowa.

9. Hawaʼara ginötönia moguna abölö taʼangerönusi hadia mbörö wa itehegö tefakao niha Yehowa?

⁹ No taʼila wa moguna ebolo dödöda ba wombaloi Yehowa ba wangeheta famakao ba gulidanö. Hizaʼi, ba ginötö tarasoi mazui taʼila wa tefakao niha niʼomasiʼöda, lafalua khöra zi lö atulö mazui na mate niha niʼomasiʼöda, te manofu ita, ’Hadia mbörö wa lö iʼanemaiʼö iheta wamakao salua andre Yehowa?’ (Hab. 1:​2, 3) Na alua zimane daʼö, moguna taʼangerönusi hadia mbörö wa itehegö tefakao niha satulö tödö Yehowa.b (Si. 34:19) Moguna göi taʼangerönusi mbuʼusa linia ba wangeheta famakao sagötö faʼara.

10. Hadia nifalua Anne enaʼö anau gölönia me mate mamania?

¹⁰ Me no taʼila zindruhu hadia mbörö wa itehegö alua wamakao Lowalangi, tola anau gölöda. Nehegö zalua khö Anne, samösa talifusöda si toröi ba Pulau Mayotte, Samudra Hindia. Imane Anne, ”Abu sibai dödögu me mate mamagu ba zi hauga fakhe silalö. Hizaʼi, asese ufasugi ba dödögu wa tenga Yehowa mbörö wa tefakao ita. Sindruhunia, omasi sibai ia ba wangeheta fefu wamakao hegöi ba wanusugi ösi nomoda mazui si fahuwu khöda si no mate. Börö me uʼangerönusi daʼö, urasoi waʼahono dödö. Sindruhu-ndruhu ahöli dödögu börö me urasoi waʼahono dödö simane daʼö.”

11. Me no taʼila hadia mbörö wa itehegö alua wamakao Lowalangi, hana wa itugu owölö-ölö ita weʼamöi manuriaigö?

¹¹ Me no taʼila hadia mbörö wa itehegö alua wamakao Lowalangi, itugu tefarou dödöda weʼamöi manuriaigö. Itutunö Fetero wa ato niha samalalini era-era sanöndra faʼauri börö waʼebolo dödö Yehowa. Aefa daʼö, ifatunö khöda hadia zinangea tafalua. Imane, ”Miʼangeragö hewisa ami sindruhunia. Miforege wamalua amuata satulö ba mifosumange Lowalangi soroi ba dödö.” (2 Fe. 3:11) Sambua lala ba ’wamosumange Lowalangi soroi ba dödö’ yaʼia na tafalua wanuriaigö. Simane Amada Yehowa, taʼomasiʼö niha böʼö. Omasi ita na lasöndra waʼauri ba gulidanö si bohou. Börö daʼö, si fao faʼebolo dödö ibeʼe ginötö Yehowa ba niha si so ba mbanua nituriaigömö enaʼö lafosumange ia. Tatu no töi sebua me tola falulu fohalöwö ndraʼugö khö Lowalangi ba ötolo niha böʼö enaʼö laʼokhögö waʼaboto ba dödö sanandrösa khönia fatua lö tohare gamozua götö danö andre.—1 Ko. 3:9.

SO ITA BA ”NGALUO SAFURIA”

12. Hadia mbua nitemada me no taʼila wa so ita ba ”ngaluo safuria”?

¹² No ihaogö wanutunö khöda Sura Niʼamoniʼö hewisa gamuata niha ba ”ngaluo safuria”. (2 Ti. 3:​1-5) Börö me taʼila samösa wa itugu lö sökhi gamuata niha ba zi fasuida, aboto ba dödöda wa no alua nifaʼeleʼö andrö. Daʼö mbörö wa itugu faduhu dödöda wa tola tafaduhusi tödö Daromali Lowalangi.—2 Ti. 3:​13-15.

13. Hadia wamahaʼö nihalöda ba gamaedola Yesu ba Luka 12:​15-21?

¹³ Börö me taʼila wa no so ita ba ngaluo safuria, abölö taʼosambuaʼö dödöda ba ngawalö zabölö moguna. Nehegö atö gamaedola Yesu sanandrösa ba daʼö si no tesura ba Luka 12:​15-21. (Baso.) Hadia mbörö wa mufotöi niha si kayo andrö ”sambö tödö”? Tenga börö me kayo ia, hizaʼi börö me fasala gohitö dödönia. ’Ihöna harato khönia samösa, hizaʼi lö kayo ia ba wamaigi Lowalangi’. Fasala gangetula nihalönia börö me lö ara tö mate ia. Imane khönia Lowalangi, ”Bongi andre lahalö nosou.” Hadia wamahaʼönia khöda? Börö me no itugu ahatö ngaluo safuria andre, moguna taʼangeragö daʼa: ’Hadia oroma ba gohitö dödögu wa abölö uʼosambuaʼö dödögu ba zabölö moguna? Hadia zomasido gohitö dödö ndraonogu? Hadia uʼogunaʼö waʼabölögu, inötögu hegöi kefegu ba wangöhöna harato ba gulidanö mazui ba zorugo?’

14. Hana wa moguna taʼangerönusi zindruhu wa no so ita ba ngaluo safuria? Beʼe duma-duma.

¹⁴ Na taʼangerönusi wa no so ita ba ngaluo safuria, daʼö zanolo yaʼita ba wangai angetula si tefaudu sanandrösa ba waʼaurida ba zi so miföna. Imane si samösa talifusöda ira alawe sotöi Miki, ”Me no tama ndraʼo sekola, omasido sibai ufahaʼö ndraʼo sanandrösa ba gurifö, ba mohalöwödo ba daʼö. So göi gohitö dödögu tobali perintis ba omasido mangai halöwö ba mbanua si lö ato sanuriaigö. Hizaʼi, so ösa ndra awögu ba gangowuloa soʼamenesi yaʼo. Lawaʼö khögu enaʼö uhaogö uʼangeragö hadia sindruhu-ndruhu tola faoma ugohi gohitö dödögu si dombua andrö. Lafasugi ba dödögu wa lö ara tö tohare gamozua götö danö andre. Ba gulidanö si bohou dania, tola ufahaʼö ndraʼo sanandrösa ba gurifö sagötö faʼara. Börö daʼö, uhalö gangetula ba wamahaʼö yaʼo ba nekhe-nekhe danga. Usöndra halöwögu si tola motuhini yaʼo tobali perintis, ba mangai halöwö ndraʼo ba mbanua si lö ato sanuriaigö ba Ekuador.” Iadaʼa, fao Miki khö woʼomonia si tobali satua samasui ba soi daʼö.

15. Hana wa tebai taböhöli wanuriaigö ba niha si lö nasa adöni tödö? Beʼe duma-duma. (Faigi göi gambara.)

¹⁵ Börö me no so ita ba ngaluo safuria, tohude sibai halöwö fanuriaigö nifaluada. Hizaʼi, hewisa na lö adöni dödö niha nituriaigöda? Böi böhöli. Törö tödöu wa tola tebulö zi samösa niha. Nehegö duma-duma Yakobo, akhi tiri Yesu. Iʼila samösa me ebua-bua Yesu, me tobali ia Mesia, hegöi me ahöli-höli dödö niha ba wamahaʼönia. Hizaʼi, sagötö ba zi hauga wulu fakhe, lö omasi ia tobali soloʼö khö Yesu. Awena tobali ia nifahaʼö ha me no aefa tesusugi Yesu. Baero daʼö, tobali göi ia samösa nifahaʼö sowölö-ölö!c (Yoh. 7:5; Gal. 2:9) Tobali, böi böhöli wanuriaigö ba nösi nomomö mazui ba niha böʼö si no irai fahuhuo khömö hewaʼae lö nasa adöni dödöra. Turia nifaʼemada khöra iadaʼa, tola manö ebua sibai lua-luania daʼö ba zi so miföna, hewaʼae no tebörögö dania wamakao sabölö-bölö.d

BÖI TEBULÖ ANDRÖ SAOHAGÖLÖ BA WAMASUGI BA DÖDÖ NIBEʼE YEHOWA

16. Hadia mbua nitemamö moroi ba ngawalö gö wamati nihenaigö ba niha sato? (Faigi göi kotak ”Ogunaʼö Gö Wamati Nihenaigö ba Niha Sato”.)

¹⁶ So ösa gö wamati nihenaigö ba niha si lö mangila dane-dane wamahaʼö Zura Niʼamoniʼö. Duma-dumania, mufazökhi majalah edisi umum, huhuo sebua, ba so ösa artikel hegöi video ba jw.org, ba niha si tenga Samaduhuʼö Yehowa. Hewaʼae simanö, tola tatema mbua moroi ba wamasugi ba dödö si no muhenaigö ba daʼö. Duma-dumania, itugu taʼomasiʼö Yehowa, itugu mamati ita ba Daromalinia, ba itugu onekhe ita wamahaʼö Sura Niʼamoniʼö ba niha böʼö.—Si. 19:7.

17. Hawaʼara ginötönia moguna abölö taʼangerönusi dane-dane wamahaʼö moroi ba Zura Niʼamoniʼö?

¹⁷ Yaʼita Samaduhuʼö Yehowa, omuso sibai dödöda na so waʼaboto ba dödö si bohou sanandrösa ba wamahaʼö Zura Niʼamoniʼö. Hizaʼi, tatu taʼandrö sibai saohagölö ba dane-dane wamahaʼö si no manolo yaʼita irege aboto ba dödöda Yehowa. Moguna khöda wamahaʼö andrö irugi iadaʼa. Duma-dumania, na tawaʼö tödöda wa abölö sökhi lala wangera-ngerada moroi ba wanuturu lala nibeʼe organisasi Yehowa, tola taʼokhögö wangide-ngideʼö na taʼangerönusi wa sameʼe fanuturu lala ba organisasi andre yaʼia daʼö Somböi safönu faʼatua-tua ba sebua kuaso. Na göna ita famakao mazui ba nösi nomoda, tola taʼokhögö waʼebolo dödö na taʼangerönusi hadia mbörö wa itehegö tefakao niha gulidanö Yehowa. Baero daʼö, na tahalö gangetula ba wotatugöi ohitö dödöda ba zi so miföna, tola taʼosambuaʼö dödöda ba zabölö moguna na taʼangerönusi wa no so ita ba ngaluo safuria. Tobali, yaʼitolo ita famasugi ba dödö andrö moroi khö Yehowa enaʼö itugu atua-tua ba lö faröi ita ba wamosumange yaʼia.