Yafaduhu Dödöu Wa Iʼefaʼö Zalada Yehowa

1-2. Hewisa dödöda me taʼila wa no iʼefaʼö horöda Yehowa? (Faigi göi gambara.)

ABOTO sibai ba dödö Razo Dawido hewisa na itegu-tegu ita tödöda. (Si. 40:12; 51:​3, superskripsi) No irai ifalua horö sebua Dawido. Hizaʼi sindruhu-ndruhu ifalalini gera-erania, ba iʼefaʼö horönia Yehowa. (2 Sa. 12:13) Irasoi waʼahono dödö Dawido börö me iʼila wa no iʼefaʼö horönia Yehowa.—Si. 32:1.

² Simane Dawido, tola göi tarasoi waʼahono dödö na faduhu dödöda wa no iʼefaʼö horöda Yehowa. Na sindruhu-ndruhu no tafalalini gera-erada, tafaduhuʼö horö nifaluada, ba taforege enaʼö lö saʼae tafalua horö andrö, hasambalö iʼefaʼö horöda Yehowa, hewaʼae na horö sebua daʼö. (Amd. 28:13; Hal. 26:20; 1 Yo. 1:9) Ba ginötö iʼefaʼö horöda Yehowa, lö saʼae itörö-törö tödönia daʼö, hulö zi lö irai alua ia. Tatu möi fondrara dödöda daʼö.—Hez. 33:16.

3-4. Hewisa dödö zi samösa talifusöda ira alawe me no aefa tebayagö ia idanö, ba hadia nitutunöda ba artikel daʼa?

³ Itaria aombö dödöda hadia no iʼefaʼö horöda Yehowa. Nehegö zalua khö dalifusöda Jennifer niʼebuaʼö ba zindruhu. Me awuyu-wuyu ia, ifalua gamuata si lö sökhi ba so khönia wamini tödö. Hauga fakhe aefa daʼö ifuli ia khö Yehowa. Ba gafuriata, tola tebayagö ia idanö. Imane Jennifer, ”Me mböröta, asese ufalua gamuata fohorö hegöi femabu-mabu. Alio aukhudo ba niha ba uʼomasiʼö gefe. Uʼila wa tola iʼefaö horögu andrö Yehowa börö höli nibeʼe Yesu. Hizaʼi hewaʼae no ufalalini gera-eragu ba uʼandrö wangefa khö Yehowa, aombö nasa dödögu hadia sindruhu-ndruhu no iʼefaʼö horögu Yehowa.”

⁴ Hadia no irai örasoi göi zimane daʼö? Na simanö, törö tödöu hewisa dödö Dawido khö Yehowa. Faduhu dödönia wa no iʼefaʼö horönia Yehowa börö me iʼila wa Yehowa andrö Lowalangi sahakhö tödö. Itötöna göi Yehowa enaʼö öʼokhögö waʼafaduhu dödö simane Dawido. Ba artikel daʼa dania tatutunö hadia mbörö wa moguna tafaduhusi tödö wa no iʼefaʼö horöda Yehowa ba hewisa enaʼö faduhu dödöda ba daʼö.

HANA WA MOGUNA FADUHU DÖDÖDA WA NO IʼEFAʼÖ HORÖDA YEHOWA?

5. Hadia dandrawa niʼogunaʼö Zatana enaʼö taböhöli wamosumange Yehowa? Beʼe duma-duma.

⁵ Na faduhu dödöda wa no iʼefaʼö horöda Yehowa, lö aekhu ita ba dandrawa nifalua Zatana. Böi olifu ita wa lö iböhöli Satana wangalui lala enaʼö taböhöli wamosumange Yehowa. Duma-dumania, iforege enaʼö so ba wangera-ngerada wa tebai iʼefaʼö horöda Lowalangi. Nehegö zalua khö zi samösa ira matua ba Gorindro niʼefasi moroi ba mbanua niha Keriso börö gamuata wohorö. (1 Ko. 5:​1, 5, 13) Ba gafuriata ifalalini gera-erania, hizaʼi lö omasi Zatana na laʼefaʼö zalania ira talifusö ba mbanua niha Keriso ba lafuli latemaʼö ia. Omasi Zatana na so ba wangera-ngera ndra matua daʼö wa tebai teʼefaʼö horönia irege abu dödönia ba iböhöli wamosumange Yehowa. Simane daʼö göi nitötöna Zatana iadaʼa, ba ifalua göi dandrawa simane daʼö. Hizaʼi, ”tenga sa zi lö taʼila dandrawa nifaluania”.—2 Ko. 2:​5-11.

6. Hewisa enaʼö lö itahi-tahigö manö ia tödöda?

⁶ Na tafaduhusi tödö wa no iʼefaʼö horöda Yehowa, lö saʼae itahi-tahigö ia tödöda. Na no tafalua horö, sinangea na itahi-tahigö ia tödöda. (Si. 51:17) Sökhi daʼö, börö me tola tobali famarou dödöda ba wamalalini era-era ba ifuli tafalua zatulö. (2 Ko. 7:​10, 11) Hizaʼi na lö aetu itahi-tahigö manö ia tödöda, mendrua manö na no ara taböhöli wamalua horö andrö, tola manö ide-ide dödöda ba taböhöli wamosumange Yehowa. Hizaʼi na faduhu dödöda wa no iʼefaʼö horöda Yehowa, lö saʼae itahi-tahigö ia tödöda. Tola göi anau gölöda ba wamosumange Yehowa si fao tödö side-ide si lö sinegu ba ifuli taʼokhögö waʼomuso dödö. (Kol. 1:​10, 11; 2 Ti. 1:3) Daʼö zomasi Yehowa enaʼö taʼokhögö. Hizaʼi hewisa enaʼö faduhu dödöda wa no iʼefaʼö horöda Yehowa?

HEWISA ENAʼÖ FADUHU DÖDÖDA WA NO IʼEFAʼÖ HORÖDA YEHOWA?

7-8. Hadia niwaʼö Yehowa sanandrösa khönia, ba hadia zi tola tafaduhusi tödö ba daʼö? (2 Moze 34:​6, 7)

⁷ Angeragö hadia niwaʼö Yehowa sanandrösa khönia. Duma-dumania, nehegö wehede Yehowa khö Moze ba Hili Zinaʼi.a (Baso 2 Moze 34:​6, 7.) Hewaʼae oya gamuata si sökhi niʼokhögö Yehowa, ifili ba wamatunö khö Moze wa yaʼia ”Lowalangi sahakhö tödö ba si sökhi böwö”. Khalaigö atö, hadia tebai ihakhösi tödö nono mbanuania si no mamalalini era-era Lowalangi sahakhö tödö? Lö duhu daʼö! Na lö omasi Yehowa ba wangefaʼö horöda, eluahania yaʼia andrö Lowalangi samuʼi ba si lö faʼahakhö dödö. Lö irai simane daʼö Yehowa.

⁸ Tola tafaduhusi tödö me iwaʼö Yehowa wa Lowalangi sahakhö tödö ia. Hadia mbörö? Börö me Lowalangi sindruhu ia. (Si. 31:5) Börö daʼö, na lö tebulö itahi-tahigö manö ia tödömö börö horö si no öfalua ba zilalö, tandraigö angeragö daʼa, ’Hadia faduhu dödögu wa Yehowa andrö Lowalangi sahakhö tödö, si sökhi böwö ba omasi ia iʼefaʼö zala niha samalalini era-era?’ Na faduhu dödöu ba daʼö, yafaduhu dödöu wa no iʼefaʼö horöu Yehowa.

9. Hadia geluahania iʼefaʼö zala awö horöda Yehowa? (Sinunö 32:5)

⁹ Angerönusi hadia nifatunö ndra sanura Sura Niʼamoniʼö sanandrösa ba lala Yehowa ba wangefaʼö horö. Duma-dumania, nehegö hewisa Dawido ba wanutunö sanandrösa ba wangefaʼö sala nifalua Yehowa. (Baso Zinunö 32:5.) Imane, ”Öʼefaʼö zala awö horögu.” Ngawua wehede ba li Heberaiʼo ”öʼefaʼö”, tola mufoʼeluaha ia ”mamazawa”, ”mangai”, mazui ”molohe”. Tobali, me no iʼefaʼö horö Dawido Lowalangi Yehowa, amaedola no ifazawa ba iʼohe fefu horö Dawido. Irasoi waʼahono dödö Dawido börö me lö saʼae itahi-itahigö ia tödönia ba ngawalö horö si no ifalua. (Si. 32:​2-4) Tola göi tarasoi zimane daʼö. Na sindruhu-ndruhu no tafalalini gera-erada, lö saʼae moguna itahi-tahigö ia tödöda börö me no ifazawa horöda Yehowa ba iʼohe daʼö ba nahia saröu.

10-11. Hadia geluahania wa Yehowa andrö ”sangefaʼö sala”? (Sinunö 86:5)

¹⁰ Baso Zinunö 86:5. Itutunö Dawido wa Yehowa andrö ”sangefaʼö sala”. So sambua referensi Zura Niʼamoniʼö sanutunö sanandrösa khö Yehowa imane, ”[Yaʼia] ’sangefaʼö salaʼ—daʼö no faosatö moroi ba gamuatania.” Hana wa tola simane daʼö Yehowa? Tohu-tohu moroi ba ayati daʼö imane, ”Fahöna khöu waʼomasi si lö faröi ba niha soʼangaröfili töimö.” Simane si no tatutunö ba artikel silalö, no ifabuʼu Yehowa wa iforomaʼö waʼomasinia si lö faröi ba niha sangomasiʼö yaʼia, ba lö irai faröi ia khöra. Börö waʼomasinia si lö faröi, ”ibeʼe wangefa soroi ba dödö” ba niha samalalini era-era. (Yes. 55:7) Börö daʼö, na aombö dödöu wa no iʼefaʼö horöu Yehowa, tandraigö angeragö daʼa: ’Hadia faduhu dödögu wa hasambalö iʼefaʼö Yehowa horö niha samalalini era-era ba sangandrö faʼahakhö dödönia?’ Na faduhu dödöu, tola göi öfaduhusi tödö wa no iʼefaʼö horöu ba ginötö öʼandrö khönia waʼahakhö dödö.

¹¹ Tatu manö terara dödöda börö me no taʼila wa sindruhu-ndruhu aboto ba dödö Yehowa wa lö moʼahonoa ita. (Si. 139:​1, 2) Oroma daʼa moroi ba zinunö Dawido tanö böʼö, sanolo yaʼita enaʼö faduhu dödöda wa no iʼefaʼö horöda Yehowa.

HADIA NITÖRÖ TÖDÖ YEHOWA KHÖDA?

12-13. Moloʼö Sinunö 103:​14, hadia nitörö tödö Yehowa khöda, ba hadia nifaluania?

¹² Baso Zinunö 103:14. Itutunö Dawido hadia mbörö wa iʼefaʼö Yehowa horö niha samalalini era-era. Imane, ”Itörö tödö [Yehowa] wa yaʼita andre gawu-gawu.” Eluahania, lö tebulö itörö tödö Yehowa wa lö moʼahonoa ita. Datatutunö atö geluaha wehede Dawido andrö.

¹³ Iwaʼö Dawido wa ”aboto ba dödö [Yehowa] hewisa me tewöwöi ita”. Iwöwöi Gadamo ”moroi ba dambu”. Börö daʼö, iʼila hewisa me tewöwöi niha ba hadia manö zoguna khöra. Duma-dumania, hewaʼae moʼahonoa ira, moguna lalau manga, mörö, ba mohanu-hanu. (1 Mo. 2:7) Hizaʼi, me aekhu ba horö Gadamo ba Khawa, faböʼö saʼe geluaha wehede ”yaʼita andre gawu-gawu”. Iadaʼa, fehede daʼö zangoromaʼö wa lö moʼahonoa ita ba lö aetu talawa gisö-isö dödöda si fasala. Tobali, tenga ha iʼila Yehowa wa no aekhu ita ba horö, hizaʼi ”itörö tödönia” daʼö. Ngawua wehede Heberaiʼo nifoʼeluaha tobali ”nitörö tödö” tola daʼö geluahania si sökhi nifalua zi samösa niha. Börö daʼö, daʼa rahu-rahu si tola tahalö moroi ba wehede Dawido andrö: Iʼila Yehowa wa lö moʼahonoa ita ba itaria tafalua zala. Hizaʼi, na sindruhu-ndruhu tafalalini gera-erada, iforomaʼö khöda waʼahakhö dödö ba iʼefaʼö horöda.—Si. 78:​38, 39.

14. (a) Hadia nasa niwaʼö Dawido ba lala nifalua Yehowa ba wangefaʼö sala? (Sinunö 103:12) (b) Hadia wamahaʼö nihalöda moroi ba lala nifalua Yehowa ba wangefaʼö horö Dawido? (Faigi kotak ”Iʼefaʼö Fefu Horöda Yehowa ba Iʼolifugö Daʼö”.)

¹⁴ So nasa danö böʼö si tola tafahaʼö ita sanandrösa ba lala nifalua Yehowa ba wangefaʼö horö niha. (Baso Zinunö 103:12.) Iwaʼö Dawido ba ginötö iʼefaʼö horöda Yehowa, iʼaröuʼö horöda andrö ”simane otalua gatumbukha faoma aekhula”. Fandröndröu sibai gotalua gatumbukha hegöi aekhula, ba lö irai falukha ira. Hadia gamakhaitania daʼa ba wangefaʼö sala nifalua Yehowa? So sambua referensi sangumaʼö: ”Iʼohe horöda andrö ba nahia fondrege zaröu, irege faduhu dödöda wa lö saʼae toröi huania, lahenia, ba sindruhu-ndruhu taya ba wangera-ngerania daʼö.” Itaria, tola tefasugi ba dödöda zalua barö zilalö ha börö hua. Hizaʼi ba ginötö iʼefaʼö horöda Yehowa, sindruhu-ndruhu lö hadöi saʼae ”hua” samasugi ba dödönia horö si no tafalua. Lö saʼae itörö-törö tödönia daʼö ba lö saʼae ihuku ita börö horö andrö.—Hez. 18:​21, 22; Hal. 3:19.

15. Hadia zi tola tafalua na itahi-tahigö manö ia tödöda börö horö si no tafalua ba zilalö?

¹⁵ Hewisa wehede Dawido nisura ba Zinunö 103 tobali fanoloda irege tafaduhusi tödö wa no iʼefaʼö horöda Yehowa? Na itahi-tahigö manö ia tödöda börö horö si no tafalua ba zilalö, angeragö daʼa: Aboto ba dödö Yehowa wa lö moʼahonoa ita ba omasi ia iʼefaʼö zala gofu haniha manö zamalalini era-era, farahu ndraʼugö ba daʼö. Baero daʼö, na no iʼefaʼö horömö Yehowa, lö saʼae itörö-törö tödönia daʼö mazui ifuli ifasugi-sugi. Lö göi ihuku ndraʼugö börö zalamö si no iʼefaʼö. Lö iʼosambuaʼö dödönia Yehowa ba horö si no öfalua ba zilalö. Börö daʼö, moguna göi öfalua zimane daʼö. (Si. 130:3) Na tafaduhusi tödö wa no iʼefaʼö horöda Yehowa, lö saʼae itahi-tahigö manö ia tödöda ba tola tafosumange Yehowa si fao faʼomuso dödö.

16. Beʼe duma-duma hadia lua-luania na lö aetu itahi-tahigö manö ia tödöda börö zala si no tafalua. (Faigi göi gambara.)

¹⁶ Angeragö duma-duma daʼa. Na lö aetu itahi-tahigö manö ia tödöda, amaedola zolohe moto ita hizaʼi tafaigi-faigi manö kaca spion. Sindruhu wa sökhi na itaria tafaigi kaca spion enaʼö taʼila tatimbagö hadia zi tobali teʼala salua moroi furi. Hizaʼi enaʼö lö teʼala ita, moguna taʼosambuaʼö dödöda ba lala si so tanö fönada. Simane daʼö göi, itaria tatörö tödöda zala si no tafalua ba zilalö enaʼö tola tafaʼö ita ba zala andrö ba lö ifuli tafalua zimane daʼö. Hizaʼi, na itörö-törö manö tödöda horö si no iʼefaʼö Yehowa, tola taya waʼomuso dödöda ba lö taʼila tabeʼe khö Yehowa wondrege zi sökhi. Börö daʼö, dataʼosambuaʼö dödöda ba wamosumange Yehowa ba böi olifu ita mbuʼusa linia khöda ba zi so miföna wa ”lö saʼae itörö tödö zi no numalö”.—Yes. 65:17; Amd. 4:25.

BÖI TEBULÖ TAFADUHUʼÖ BA DÖDÖDA

17. Hadia mbörö wa moguna böi tebulö tafaduhuʼö ba dödöda wa iʼomasiʼö ita Yehowa ba no iʼefaʼö zalada?

¹⁷ Moguna lö tebulö tafaduhuʼö ba dödöda wa iʼomasiʼö ita Yehowa ba no iʼefaʼö zalada. (1 Yo. 3:19) Hadia mbörö? Börö me lö tebulö iforege Satana enaʼö so ba wangera-ngerada wa tenga sinangea iʼomasiʼö ba iʼefaʼö zalada Yehowa. Omasi ia na taböhöli wamosumange Yehowa. Itugu iforege Satana wamalua daʼö, börö me iʼila wa lö ara tö ginötö nitehe khönia. (Fam. 12:12) Tatu lö omasi ita tatehegö möna Zatana!

18. Hadia zinangea öfalua enaʼö aro waʼafaduhu dödöu wa iʼomasiʼö ba no iʼefaʼö zalamö Yehowa?

¹⁸ Enaʼö aro waʼafaduhu dödöda wa iʼomasiʼö ita Yehowa, oʼö wanuturu lala si no tatutunö ba artikel silalö. Enaʼö faduhu göi dödöda wa no iʼefaʼö horöda Yehowa, angeragö hadia niwaʼö Yehowa sanandrösa khönia samösa. Angerönusi hadia niwaʼö ndra sanura Sura Niʼamoniʼö ba lala nifalua Yehowa ba wangefaʼö horöda. Baero daʼö, lö aetu itörö tödö Yehowa wa lö moʼahonoa ndraʼugö, ba hasambalö iforomaʼö waʼahakhö dödönia khöu. Böi olifuʼö, ba ginötö iʼefaʼö horöda Yehowa lö saʼae itörö-törö tödönia daʼö. Na taʼangeragö fefu daʼö, tola aro waʼafaduhu dödöda wa Yehowa andrö Lowalangi sahakhö tödö. Simane Dawido tola tamane, ”Saohagölö Yehowa me no ’öʼefaʼö zala awö horögu’!”—Si. 32:5.