Bua Nitemada ba Wangefaʼö Sala Nibeʼe Yehowa

1. Hana wa abua wangila eluaha wangefaʼö sala nifalua niha gulidanö?

”NO UʼEFAʼÖ ZALAMÖ.” Tatu ahono sibai dödöda na tarongo wehede daʼö mendrua manö na no tafalua mazui tawaʼö wehede sangafökhöiʼö tödö zi samösa niha. Hizaʼi, hadia zindruhunia geluaha na iwaʼö si samösa niha, ”No uʼefaʼö zalamö”? Tola manö eluahania omasi ia ifuli fahuwu ami. Tola manö göi eluahania lö omasi ia mitutunö saʼae zalua andrö, hizaʼi tebai saʼae miʼokhögö wahuwusa simane ba zilalö. Ba daʼa taʼila wa abua sibai wangila eluaha wangefaʼö sala nifalua niha gulidanö.

2. Hewisa Zura Niʼamoniʼö wanutunönia fangefaʼö horö nifalua Yehowa? (Faigi göi nisura ba gahe zura.)

² Lala wangefaʼö Yehowa horöda yaʼita niha si lö moʼahonoa, sindruhu-ndruhu aröu faböʼö moroi ba wangefaʼöda sala niha böʼö. Lö hadöi niha si tola mangefaʼö sala simane nifalua Yehowa. Imane sanura sinunö sanandrösa khö Yehowa, ”Sindruhu-ndruhu wa öʼefaʼö zala, irege laʼataʼufi ndraʼugö.”a (Si. 130:4) Na tanehegö wangefaʼö sala nibeʼe Yehowa, tola aboto ba dödöda hewisa zindruhunia wangefaʼö sala andrö. Ba ginötö latutunö ira sanura Sura Niʼamoniʼö sanandrösa ba wangefaʼö sala moroi khö Yehowa, itaria laʼogunaʼö ngawua wehede ba li Heberaiʼo si lö irai laʼogunaʼö ba wanutunö fangefaʼö sala nibeʼe niha gulidanö.

3. Hewisa wangefaʼö sala nibeʼe Yehowa andrö? (Yesaya 55:​6, 7)

³ Na iʼefaʼö Yehowa zala zi samösa niha, sindruhu-ndruhu wa iheta horö niha daʼö ba tola ifuli sökhi gamakhaitara. Tatu taʼandrö sibai saohagölö börö me lö tebulö ba afönu wangefaʼö Yehowa horöda.—Baso Yesaya 55:​6, 7.

4. Hewisa wanolo Yehowa yaʼita enaʼö aboto ba dödöda hadia zindruhunia wangefaʼö sala andrö?

⁴ Hewisa enaʼö aboto ba dödöda yaʼita niha si lö moʼahonoa hadia zindruhunia geluaha wangefaʼö sala nibeʼe Yehowa? Ba wanolo yaʼita, isura Yehowa ba Zura Niʼamoniʼö duma-duma sanandrösa ba wangefaʼö sala nibeʼenia. Tatutunö dania ia ba artikel daʼa. Nehegö hewisa wangefaʼö Yehowa horöda hegöi enaʼö ifuli sökhi wahuwusada khönia. Famahaʼö daʼa zanolo yaʼita irege tedou waʼomasida hegöi fangandröda saohagölö khö Namada sebua faʼomasi ba sahakhö tödö.

IHETA MAZUI ITIBOʼÖ HORÖ NIHA YEHOWA

5. Hadia zalua na iʼefaʼö horöda Yehowa?

⁵ Ba Zura Niʼamoniʼö, horö andrö muʼamaedolagö ia simane noro sabua. Imane Dawido sanandrösa ba horö si no ifalua, ”Italuʼi högögu waʼebua golalöwagu, simane faʼabua noro si tebai uʼohe.” (Si. 38:4) Hizaʼi, na ifalalini gera-erania si samösa niha, omasi Yehowa ba wangefaʼö horönia. (Si. 25:18; 32:5) Ngawua wehede li Heberaiʼo nifoʼeluaha tobali ’fangefaʼö sala’ ba ayati daʼö, sindruhunia tola mufoʼeluaha ia göi ”mufazawa” mazui ”muʼohe”. Tola takhalaigö wa Yehowa andrö simane ira matua sabölö samazawa noro moroi ba galisida ba iʼohe daʼö.

6. Hawaʼaröu wangefaʼö Yehowa horöda?

⁶ Ibeʼe khöda duma-duma tanö böʼö Yehowa hawaʼaröu wangefaʼönia horöda. Imane ba Zinunö 103:​12, ”Simane otalua gatumbukha faoma aekhula, simane daʼö waʼaröu wangefaʼönia olalöwada.” Fandröndröu sibai gotalua gatumbukha ba gaekhula, ba lö irai falukha ira. Tobali, me iʼefaʼö horöda Yehowa, sindruhu-ndruhu iʼohe daʼö ba nahia fondrege zaröu si tebai takhalaigö. Tatu terara sibai dödöda ba nifaluania andre!

7. Hewisa Zura Niʼamoniʼö wanutunönia sanandrösa ba wangefaʼö Yehowa horöda? (Mikha 7:​18, 19)

⁷ Na no iʼohe horöda Yehowa ba nahia fondrege zaröu, hadia itaha khönia daʼö? Löʼö. Imane Razo Hizikia sanandrösa khö Yehowa, ”No öbeʼe furiu fefu horö si no ufalua.” Mazui simane nisura ba gahe zura, ”No öheta horögu föna duduma höröu.” (Yes. 38:​9, 17, nisura ba gahe zura.) Tobali, na no ifalalini gera-erania si samösa niha, itiboʼö horönia Yehowa irege lö oroma saʼae daʼö. Tola göi mufoʼeluaha wehede Hizikia andrö, ”No öbaliʼö hulö zi lö irai ufalua horö.” Ba wanandrösaigö tuho daʼa, ibeʼe duma-duma tanö böʼö Sura Niʼamoniʼö ba Mikha 7:​18, 19. (Baso.) Ifatunö khöda ba daʼö wa amaedola no itiboʼö horöda Yehowa ba nasi sabakha. Me götö föna, na so nitiboʼö ba nasi, tebai saʼae mufuli musöndra daʼö.

8. Hadia manö zi no tafahaʼö yaʼita?

⁸ No ihaogö wanutunö khöda Sura Niʼamoniʼö, na iʼefaʼö horöda Yehowa eluahania iheta mazui itiboʼö horö andrö irege lö moguna saʼae itahi-tahigö manö ita tödöda. Imane Dawido, ”Yaʼahowu niha si no muʼefaʼö lalö ba si no mubalugö horö; yaʼahowu niha si lö itörö tödö Yehowa horönia.” (Rom. 4:​6-8) Sindruhu-ndruhu no sahöli-höli dödöda wangefaʼö horö nibeʼe Yehowa!

IʼEFAʼÖ MAZUI ISASAI HORÖ NIHA YEHOWA

9. Hewisa woʼamaedolagö Yehowa wangefaʼönia horöda?

⁹ Börö me so höli, andrö wa tola iʼefaʼö Yehowa horö niha samalalini era-era. Enaʼö aboto ba dödöda sanandrösa ba daʼa, nehegö duma-duma tanö böʼö nibeʼe Yehowa. Imane, ”He no hulö ndro waʼoyo horömi, ba tobali afusi sibai hulö esi; he no hulö nukha soyo waʼoyo horömi, tobali afusi dania hulö mbu mbiri-biri.” (Yes. 1:18) Sindruhunia, abua sibai wangeheta do mazui laʼa-laʼa soyo na göna ia ba nukha safusi. Hizaʼi, ifaduhuʼö khöda Yehowa wa tola isasai fefu horöda. Buania, lö saʼae oroma daʼö, ba ifuli teʼamoniʼö ita.—Si. 51:7; Yes. 4:4; Yer. 33:8.

10. Hadia nasa duma-duma tanö böʼö niʼogunaʼö Yehowa?

¹⁰ Simane nitutunöda ba wamahaʼö silalö, horö andrö muʼamaedolagö ia simane ”foʼömö”. (Mat. 6:12; Luk. 11:4) Tobali, ero tafalua zala föna Yehowa, eluahania itugu ebua woʼömöda. Hizaʼi, ba ginötö iʼefaʼö horöda Yehowa, hulö no iheta fefu woʼömö andrö. Lö iʼandrö khöda ba wamuʼa horö mazui sala si no iʼefaʼö. Tatu tarasoi waʼomuso dödö sebua me ifalua daʼa Yehowa!

11. Hadia geluahania me iwaʼö Sura Niʼamoniʼö wa no teʼefaʼö horöda? (Halöwö Zinenge 3:19)

¹¹ Tenga ha iheta woʼömöda Yehowa mazui horöda, hizaʼi iʼefaʼö daʼö. (Halöwö Zinenge 3:19.) Ba woʼamaedolagö salua andre, khalaigö atö daʼa: No tesura woʼömömö ba zi sambua buku, ba so samösa niha ikhoi woʼömömö andrö. Hewaʼae simanö, börö me ha ikhoi, tola nasa laʼila niha hawaʼebua woʼömömö andrö. Börö daʼö, nifalua Yehowa tenga ha ikhoi woʼömöda, hizaʼi iʼefaʼö mazui iʼosi daʼö. Enaʼö aboto ba dödöda duma-duma andre, datatörö tödöda wa tawa fena niʼogunaʼö ba götö föna, lö alio taya. Tobali, na omasi zi samösa niha ba wolosi tawa fena andrö, moguna ibasöi nukha ba iʼosi zi no tesura andrö. Daʼö nifalua Yehowa ba horöda. Ba ginötö iʼefaʼö, hulö zi lö irai alua daʼö. Tatu taʼandrö sibai saohagölö ba nifaluania andrö!—Si. 51:9.

12. Hadia wamahaʼö nihalöda moroi ba duma-duma sanandrösa ba lawuo saweʼe-weʼe?

¹² Iʼogunaʼö duma-duma tanö böʼö Yehowa ba wanutunö khöda hewisa waʼafönu wangefaʼönia horöda. Imane, ”Utayaigö golalöwau, hulö no ubalugö ia lawuo, ba horömö andrö hulö no ubalugö ia lawuo saweʼe-weʼe.” (Yes. 44:22) Ba ginötö iʼefaʼö horöda Yehowa, amaedola no iʼogunaʼö lawuo saweʼe-weʼe ba wombalugö horöda andrö irege lö saʼae oroma ia.

13. Hewisa dödöda ba ginötö iʼefaʼö horöda Yehowa?

¹³ Hadia wamahaʼö nihalöda moroi ba duma-duma si no tatutunö? Na no iʼefaʼö horöda Yehowa, lö moguna itegu-tegu manö ita tödöda sandrohu faʼaurida. Börö ndro Yesu Keriso, sindruhu-ndruhu no teʼefaʼö woʼömöda mazui horö nifaluada. Lö hadöi göi saʼae karate mazui sura woʼomöda andrö. Simane daʼö lala wangefaʼö Yehowa horöda na tafalalini gera-erada.

IFULI ITEMA ITA YEHOWA TOBALI SI FAHUWU KHÖNIA

14. Hana wa tola faduhu dödöda wa hasambalö afönu wangefaʼö Yehowa horöda? (Faigi göi gambara.)

¹⁴ Ba ginötö iʼefaʼö horöda Yehowa, faduhu dödöda wa tola ifuli tobali ita si fahuwu khönia. Börö daʼö, böi itahi-tahigö manö ita tödöda. Lö moguna ataʼu ita alai na mofönu khöda Yehowa sagötö faʼara ba iʼalui lala wanguhuku yaʼita. Lö irai ifalua daʼö Yehowa. Hana wa tola tafaduhusi tödö daʼö? Ifuli itötöi Yeremia samaʼeleʼö wehede Yehowa, imane, ”Uʼefaʼö horöra hegöi olalöwara ba lö saʼae itörö tödögu zi no lafalua andrö.” (Yer. 31:34) Itötöi göi Faulo ngawua wehede daʼö ba zurania, ”Lö itörö tödögu saʼae horöra.” (Heb. 8:12) Hizaʼi, hadia zindruhunia geluaha wehede daʼö?

15. Hadia geluahania lö saʼae itörö tödö Yehowa horöda?

¹⁵ Ba Zura Niʼamoniʼö, ngawua wehede ’törö tödö’ lö ero-ero mufoʼeluaha ia manörö tödö hadia zi no irai alua mazui ba woʼera-era zi sambua ngawalö. Tola göi mufoʼeluaha ia hadia zinangea mufalua ba zi so miföna. Duma-dumania, no irai imane si samösa niha niʼosö ba ngai Yesu, ”He Yesu, törö tödöu ndraʼo na möiʼö ba Wamatöröu.” (Luk. 23:​42, 43) Niʼandrönia tenga ha enaʼö iʼera-era ia Yesu. Hizaʼi, enaʼö so nifalua Yesu khönia. Ba fanema li Yesu zangoromaʼö wa hasambalö dania isusugi ia Yesu. Börö daʼö, me iwaʼö Yehowa lö saʼae itörö tödönia horöda, eluahania no iʼefaʼö horöda ba lö saʼae ihuku ita börö horö si no tafalua andrö.

16. Hadia nitutunö Zura Niʼamoniʼö sangoromaʼö wa tola teʼefaʼö ita ba wangosawuyu börö wangefaʼö horö nibeʼe Yehowa?

¹⁶ Iʼogunaʼö duma-duma tanö böʼö Sura Niʼamoniʼö ba wanolo yaʼita enaʼö taʼila wa tola teʼefaʼö ita ba wangosawuyu börö wangefaʼö horö nibeʼe Yehowa. Börö me lö moʼahonoa ita ba aolo dödöda wamalua horö, andrö wa muʼamaedolagö ita ”sawuyu horö”. Hizaʼi, börö me no iʼefaʼö horöda Yehowa, no ’teʼefaʼö ita ba horö’. (Rom. 6:​17, 18; Fam. 1:5) Ba ginötö taʼila wa no iʼefaʼö horöda Yehowa, tatu tarasoi waʼomuso dödö sebua, simane si samösa sawuyu sawena teʼefaʼö.

17. Hana wa tola tawaʼö wa möi famadöhöda wangefaʼö horö nibeʼe Yehowa? (Yesaya 53:5)

¹⁷ Baso Yesaya 53:5. Ba duma-duma safuria nitutunöda, muʼamaedolagö ita simane niha si göna fökhö sabölö-bölö. Börö me göna ita fökhö ba wamati, andrö wa tekiko wahuwusada khö Yehowa. Hizaʼi, börö höli nihenaigö Yehowa yaʼia daʼö Ononia si ha sambua, amaedola no tefadöhö ita. (1 Fe. 2:24) Höli andre zi tobali dela enaʼö ifuli sökhi wahuwusada khö Yehowa. Hewisa dödöda ba ginötö tefadöhö ita ba wamati ba ifuli taʼokhögö wahuwusa si sökhi khö Yehowa? Tatu tarasoi waʼomuso dödö, simane niha nifadöhö moroi ba wökhö sabölö-bölö.

BUA NITEMADA BA WANGEFAʼÖ HORÖ NIBEʼE YEHOWA

18. Hadia manö zi no tafahaʼö yaʼita ba ngawalö duma-duma sanandrösa ba wangefaʼö horö nibeʼe Yehowa? (Faigi göi kotak ”Hewisa Wangefaʼö Horö Nibeʼe Yehowa?”)

¹⁸ Hadia manö zi no tafahaʼö yaʼita ba ngawalö duma-duma sanandrösa ba wangefaʼö horö nibeʼe Yehowa? Ba ginötö iʼefaʼö horöda Yehowa, hulö zi lö irai alua horö andrö ba lö saʼae itörö-törö tödönia daʼö. Daʼa mbörö wa tola ifuli taʼokhögö wahuwusa si sökhi khö Namada ba zorugo. Hizaʼi, moguna tatörö tödöda wa iʼefaʼö horöda Yehowa börö waʼomasi ba faʼahakhö dödönia sebua, tenga börö me no sinangea ifalua daʼö.—Rom. 3:24.

19. (a) Hadia mbörö wa taʼandrö saohagölö khö Yehowa? (Roma 4:8) (b) Hadia nitutunöda ba artikel aefa daʼa?

¹⁹ Baso Roma 4:8. Fefu ita, tatu taʼandrö sibai saohagölö khö Yehowa börö me ”sindruhu-ndruhu” no iʼefaʼö horöda. (Si. 130:4) Hizaʼi, enaʼö tola teʼefaʼö horöda, so zi tohude sinangea tafalua. Imane Yesu, ”Na lö miʼefaʼö zala niha böʼö, ba lö göi iʼefaʼö zalami Amami.” (Mat. 6:​14, 15) Börö daʼö, lö tola löʼö taʼoʼö Yehowa ba wangefaʼö sala niha böʼö. Hewisa lalania? Tatutunö ia ba artikel aefa daʼa.