Lala Fondrege zi Sökhi ba Wanaögö Falöʼatulö

1-2. Hadia nifalua niha sanandrösa ba walöʼatulö, ba hadia zi tola tumbu ba wangera-ngerada?

NO SO ita ba gulidanö safönu falöʼatulö. Ato sibai niha sorasoi falöʼatulö börö me numana ira, börö zikhalara mazui mado hegöi banua si toröi yaʼira. So göi zanaögö falöʼatulö börö nifalua ndra samatörö mazui nifalua niha si kayo safönu fakhögusa. Tola alua khöda mazui ba nösi nomoda walöʼatulö simane daʼö.

² Börö me fefu niha omasi ira auri ba gulidanö si lö ametaʼuö ba safönu faʼatulö, andrö wa lö ahöli dödöda na ato zofönu-fönu börö walöʼatulö salua iadaʼa. Ba wolawa falöʼatulö salua, so zamaʼoheʼö surania khö ndra samatörö, lafalua demo mazui latuhini zondröniaʼö ba politik samabuʼu wa tola iheta walöʼatulö. Hizaʼi yaʼita niha Keriso, no tafahaʼö ita wa ”tenga tana khö niha gulidanö” ita ba moguna tabaloi irege tohare Wamatörö Lowalangi ba wangeheta fefu falöʼatulö. (Yoh. 17:16) Hewaʼae simanö, tatu abu dödöda mazui mofönu ita na taʼila lafalua walöʼatulö khö zi samösa niha. Te tamane tödöda, ’Hewisa zinangeania ndraʼodo? Hadia so zi tola ufalua iadaʼa?’ Ba wameʼe fanema linia, si oföna datatutunö hewisa dödö Yehowa hegöi Yesu sanandrösa ba walöʼatulö.

FATUWU YEHOWA HEGÖI YESU WALÖʼATULÖ

3. Hadia mbörö wa fatuwu ita ba walöʼatulö? (Yesaya 5:7)

³ Itutunö khöda Sura Niʼamoniʼö wa ifazökhi ita Yehowa si fakhili-khili khönia. Na Yehowa, ”iʼomasiʼö zindruhu, simanö göi waʼatulö”. (Si. 33:5; 1 Mo. 1:26) Lö tebulö ifalua zatulö, ba lö omasi ia na so zamalua si lö atulö. (5 Mo. 32:​3, 4; Mi. 6:8; Zak. 7:9) Duma-dumania, ba götö Yesaya samaʼeleʼö, ifondrondrongo Yehowa ’dawa hörö fangabu dödö’ nirasoi ndraono Gizaraʼeli börö walöʼatulö nifalua niha si fagölö soi khöra. (Baso Yesaya 5:7.) Daʼö mbörö wa ihuku Yehowa niha samalua falöʼatulö andrö, si no hauga kali manawö oroisania.—Yes. 5:​5, 13.

4. Hewisa dödö Yesu na iʼila walöʼatulö? Beʼe duma-duma. (Faigi göi gambara.)

⁴ Simane Yehowa, iʼomasiʼö waʼatulö Yesu ba fatuwu ia ba walöʼatulö. Me so ia ba gulidanö, falukha ia khö ndra matua si no mate tambai tanga. Terou dödö Yesu ba wanolo ira matua andrö, hizaʼi lö omasi ndra sondröniaʼö agama. Lö laʼameʼegö tödö wamakao nitaögö ndra matua daʼö. Abölö laʼofönaiʼö wamalua amakhoita nifazökhira samösa sanandrösa ba ngaluo Sabato. Börö daʼö, hewisa dödö Yesu ba nifaluara? ”Abu dödönia börö me sabeʼe högö ira.”—Mrk. 3:​1-6.

5. Hadia zinangea tatörö tödöda ba ginötö mofönu ita börö walöʼatulö salua?

⁵ Mofönu sibai Yehowa hegöi Yesu ba ginötö laʼila walöʼatulö. Daʼö mbörö wa no sinangea göi tarasoi zimane daʼö. (Ef. 4:26) Hizaʼi, moguna tatörö tödöda wa tebai teʼasiwai gabula dödö na mofönu ita hewaʼae so mbörö wa tafalua daʼö. Sindruhunia, na tebai tataha wönuda mazui na lö aetu mofönu ita, tola manö göna ita fökhö ba mboto hegöi fangera-ngera. (Si. 37:​1, 8; Yak. 1:20) Börö daʼö, hadia zinangea tafalua? Datafahaʼö ita moroi ba duma-duma Yesu.

LALA YESU BA WANAÖGÖ FALÖʼATULÖ

6. Hadia walöʼatulö salua me so Yesu ba gulidanö? (Faigi göi gambara.)

⁶ Me so Yesu ba gulidanö, oya sibai walöʼatulö salua niʼilania. Iʼila wa oya sibai gamakhoita si bohou nifazökhi ndra sondröniaʼö agama irege tobali noro daʼö ba niha sato. (Mat. 23:​2-4) Iʼila göi hewisa waʼalösökhi nifalua ndra samatörö Romawi ba nono mbanuara. Ato ndra niha Yahudi somasi aefa moroi ba wamatörö andrö. So göi ösa ba gotaluara zolawa famatörö Roma, duma-dumania niha Zelot. Hewaʼae simanö, lö omasi Yesu fao ia ba niha samorege mamalua fombulöʼö. Me iʼila tohare niha sato ba edöna labaliʼö ia razo, mofanö ia ba hili.—Yoh. 6:15.

7-8. Sagötö feʼaso Yesu ba gulidanö, hadia mbörö wa lö omasi ia fao ba politik ba wangeheta falöʼatulö? (Yohane 18:36)

⁷ Sagötö feʼaso Yesu ba gulidanö, lö omasi ia fao ba politik ba wangeheta falöʼatulö. Hadia mbörö? Aboto ba dödönia wa lö faʼabölö ba niha gulidanö ba wamatörö awönia niha. (Si. 146:3; Yer. 10:23) Tebai göi laheta zi no tobali waʼa ba walöʼatulö andrö yaʼia daʼö Afökha Satana hegöi falömoʼahonoa niha. Satana andre malaʼika si lö sökhi, yaʼia zamatörö ulidanö ba iʼogunaʼö waʼabölönia ba wangaʼasogö falöʼatulö. (Yoh. 8:44; Ef. 2:2) Baero daʼö, börö walömoʼahonoa, tola manö tafalua walöʼatulö hewaʼae na niha fondrege zi sökhi ita.—Sango. 7:20.

⁸ Aboto ba dödö Yesu wa ha Famatörö Lowalangi zi tola mangeheta falöʼatulö. Daʼö mbörö wa oya iʼogunaʼö ginötö hegöi faʼabölönia ”ba wanuriaigö turia somuso dödö sanandrösa ba Wamatörö Lowalangi”. (Luk. 8:1) Ifaduhuʼö ba ”niha solofo ba sowökhi tödö ba zindruhu” wa lö saʼae alua dania korupsi hegöi falöʼatulö. (Mat. 5:6; Luk. 18:​7, 8) Hizaʼi, lö alua daʼö ba waʼabölö niha. Ha Famatörö Lowalangi si ”tenga moroi ba gulidanö andre” zi tola mamalua daʼö.—Baso Yohane 18:36.

OʼÖ DUMA-DUMA YESU NA ALUA KHÖU WALÖʼATULÖ

9. Hadia mbörö wa faduhu dödöu wa ha Famatörö Lowalangi zi tola mangeheta falöʼatulö?

⁹ Ba ”ngaluo safuria” andre, abölö oya walöʼatulö salua moroi ba götö Yesu me föna. Hewaʼae simanö, fagölö zamobörö falöʼatulö andrö, yaʼia daʼö Satana hegöi niha si no ifaelungu. (2 Ti. 3:​1-5, 13; Fam. 12:12) Simane Yesu, aboto ba dödöda wa ha Famatörö Lowalangi zi tola mangeheta falöʼatulö. Börö me omasi ita tatuhini Wamatörö andrö soroi ba dödö, lö fao ita ba demo mazui taʼalui lala tanö böʼö ba wangeheta falöʼatulö iadaʼa. Nehegö zalua khö dalifusöda Stacy.a Fatua lö ifahaʼö ia ba Zura Niʼamoniʼö, asese fao ia demo. Hizaʼi me no numalö ginötö, ibörögö aombö dödönia ba nifaluania andrö. Imane, ”Me fao ndraʼo demo, itaria imane tödögu hadia no tefaudu niʼoʼawögögu andre. Hizaʼi iadaʼa, aboto ba dödögu wa no atulö niʼoʼawögögu börö me Famatörö Lowalangi nituhinigu. Faduhu dödögu wa tola iʼoʼawögö Yehowa niha sanaögö falöʼatulö. Tebai ufalua zimane daʼö.”—Si. 72:​1, 4.

10. Hadia mbörö wa lö tefaudu wamalua demo ba wamahaʼö nifaʼema Yesu ba Mataiʼo 5:​43-48? (Faigi göi gambara.)

¹⁰ Fefu demo nifalua ba gulidanö andre, sasesenia lafalua daʼö si fao fönu ba börö me omasi ira mamadaö. (Ef. 4:31) Imane si samösa talifusöda sotöi Jeffrey, ”Hewaʼae ba wamobörö sökhi wamaluara demo, hizaʼi tola manö tebulö daʼö tobali faʼakaliru ba so niha sorabu gama-gama.” Fefu daʼö lö tefaudu ba wamahaʼö nifaʼema Yesu. Ifahaʼö ita Yesu enaʼö taforomaʼö waʼomasi ba niha fefu, farahu ba daʼö niha si faböʼö lala wangera-ngera khöda mazui niha samakao yaʼita. (Baso Mataiʼo 5:​43-48.) Yaʼita niha Keriso, moguna taforege enaʼö lö tafalua gofu hadia zi lö tefaudu ba wamahaʼö nifaʼema Yesu.

11. Hadia mbörö wa itaria abua khöda woloʼö duma-duma Yesu?

¹¹ Aboto ba dödöda wa tola iheta fefu walöʼatulö Famatörö Lowalangi. Hizaʼi, ba ginötö lafalua khöda zi lö atulö, te abua khöda woloʼö Yesu. Nehegö zalua khö dalifusöda Janiya, si no irai manaögö falöʼatulö börö me aitö gulinia. Imane, ”Me luo daʼö, mofönu sibai ndraʼo ba afökhö dödögu. Omasido na lahuku ndra niha daʼö. Andrö wa no irai tumbu ba gera-eragu wefao demo ba wolawa rasisme hegöi diskriminasi (famaböʼö-böʼöni niha moloʼö banua, mado ba tanö böʼönia). Uwalingagö abölö sökhi zalua na ufalua daʼö.” Hizaʼi ba gafuriata, aboto ba dödö Janiya wa moguna ibulöʼö lala wangera-ngerania. Imane, ”Me mböröta, utehegö tedönisi lala wangera-ngeragu ba nifalua niha böʼö. Lua-luania, abölö faduhu dödögu ba niha moroi khö Yehowa. Börö daʼö, uhalö gangetula wa lö saʼae fariawö ndraʼo ba niha si fao ba demo.” Ba daʼa taʼila wa mofönu sibai ita na taʼila walöʼatulö. Hizaʼi, böi tehegö idönisi dödömö salua andrö irege tobali ndraʼugö tana khö niha gulidanö.—Yoh. 15:19.

12. Hadia mbörö wa moguna mangelama ita ba ginötö tafili hadia nibasoda, nirongoda hegöi nifaigida?

¹² Hewisa enaʼö lö tebulö so khöda waʼahono dödö na taʼila walöʼatulö? Sambua lala si tola tafalua yaʼia na mangelama ita ba ginötö tafili hadia nibasoda, nirongoda hegöi nifaigida. Na tafaigi ba Internet, oya sibai duria nihude-hudeʼö si tobali börö wa omasi niha lafalua demo. Asese sibai lafaʼema duria ira jurnalis moloʼö bua gera-erara samösa, tenga teʼodane-dane ba zindruhu si no alua. Hizaʼi, hewisa na atulö nifaʼemara andrö? Angeragö daʼa: Hadia so gunania khöda na taʼera-era manö daʼö? Na oya tahorigö ginötöda ba wamaigi mazui ba wombaso turia simane daʼö, tola manö itugu aombö dödöda, abu dödöda mazui mofönu ita. (Amd. 24:10) Tola manö göi olifu ita wa ha Famatörö Lowalangi zi tola mangeheta falöʼatulö.

13. Hana wa möi fanoloda ba wanaögö falöʼatulö na tabaso Zura Niʼamoniʼö ero maʼökhö?

¹³ Hadia nasa zanolo yaʼita ba wanaögö falöʼatulö? Moguna tabaso ba taʼangerönusi Zura Niʼamoniʼö ero maʼökhö. Nehegö zalua khö dalifusöda ira alawe sotöi Alia. Abu sibai dödönia ba mofönu ia me iʼila lafalua zi lö atulö ba niha si so ba zi fasuinia. Mendrua manö na iʼila wa lö lahuku niha samalua daʼö. Imane, ”Uhalö khögu waʼahono dödö ba uʼangeragö daʼa: ’Hadia faduhu dödögu wa tola iʼasiwai gabula dödö andre Yehowa?’ Me luo daʼö, ubaso Yobi 34:​22-29. Tobali famasugi ba dödögu ayati daʼö wa lö hadöi niha si tola maminiʼö yaʼia föna Yehowa. Ha Yehowa Zanguhuku fondrege zatulö, ba ha yaʼia zi tola mangeheta abula dödö salua.” Tobali, hadia zi tola tafalua gasa-gasa wombaloida Famatörö Lowalangi?

SI TOLA TAFALUA IADAʼA

14. Hadia zi tola tafalua iadaʼa? (Kolose 3:​10, 11)

¹⁴ Tebai tafatörö nifalua niha böʼö, hizaʼi tola tafatörö nifaluada. Simane si no tatutunö, omasi ita taʼoʼö duma-duma Yesu ba wangoromaʼö faʼomasi. Faʼomasi zamarou yaʼita ba wangoromaʼö faʼasökhi dödö ba niha fefu, mendrua manö ba niha samalua khöda falöʼatulö. (Mat. 7:12; Rom. 12:17) Omuso dödö Yehowa na taforomaʼö waʼasökhi dödö ba tafalua zatulö ba niha fefu.—Baso Kolose 3:​10, 11.

15. Hadia lala fondrege zi sökhi ba wanaögö falöʼatulö, ba hadia mbörö?

¹⁵ Lala fondrege zi sökhi ba wanaögö falöʼatulö yaʼia na tafatunö ba niha böʼö zindruhu moroi ba Zura Niʼamoniʼö. Hadia mbörö? Börö me ”faʼaboto ba dödö sanandrösa khö Yehowa”, tola ibulöʼö gamuata zi samösa niha samuʼi ba si lö sökhi irege tobali ia niha sahakhö tödö ba somasi faʼatulö. (Yes. 11:​6, 7, 9) Na itugu ato niha samahaʼö yaʼira ba Zura Niʼamoniʼö ba labulöʼö gamuatara, itugu alö waʼato niha samalua si lö atulö. Nehegö duma-duma Jemal. Me mböröta, iwaʼö tödönia wa ira samatörö ba soinia lafakao nono mbanuara. Börö daʼö, fao ia ba ngawawa niha samadaö enaʼö tebulö zalua. Hizaʼi ba gafuriata imane, ”Tebai tafaso niha enaʼö labulöʼö gamuatara. Yaʼo samösa tola tebulö waʼaurigu tenga börö me nifaso, hizaʼi börö zindruhu moroi ba Zura Niʼamoniʼö.” Me no ifahaʼö ia Jemal ba Zura Niʼamoniʼö, lö saʼae tobali ia niha samadaö.

16. Hadia mbörö wa omasiʼö öfatunö ba niha böʼö sanandrösa ba Wamatörö Lowalangi?

¹⁶ Simane Yesu, omasi sibai ita tafatunö ba niha böʼö wa lö ara tö tohare Wamatörö Lowalangi ba wangohori falöʼatulö ba gulidanö andre. Tobali fondrara dödö duria andrö ba niha sanaögö falöʼatulö iadaʼa. (Yer. 29:11) Imane Stacy, nitötöi moroi yawa, ”Iʼogunaʼö Zura Niʼamoniʼö Yehowa ba wondrara tödöda. Sindruhu si no ufahaʼö yaʼo moroi ba Zura Niʼamoniʼö, tobali fanologu ba wangokhögö faʼahono dödö na uʼila mazui na alua khögu walöʼatulö.” Börö daʼö, datafaʼanö ita ba wanutunö turia moroi ba Zura Niʼamoniʼö si möi fondrara dödö andre. Hewisa wamaluada daʼö? Moguna tafaduhusi tödö wa atulö fefu ayati nitutunö ba artikel daʼa. Na faduhu dödöda ba daʼö, itugu tefaʼanö ita wanutunö yaʼia si fao faʼatua-tua ba zekola mazui ba nahia wohalöwö.b

17. Hadia nifalua Yehowa ba wanolo yaʼita ba wanaögö falöʼatulö?

¹⁷ Sagötö nasa Satana ”zamatörö ulidanö andre”, hasambalö tataögö ngawalö walöʼatulö. Hizaʼi gasa-gasa wombaloida ”tetiboʼö baero” Zatana, tola tataögö walöʼatulö na taʼokhögö wangera-ngera si sökhi. (Yoh. 12:31) Iʼogunaʼö ayati Zura Niʼamoniʼö Yehowa ba wamatunö khöda hadia mbörö wa oya sibai walöʼatulö salua ba hewisa dödönia ba niha sanaögö falöʼatulö. (Si. 34:​17-19) Baero daʼö, iʼogunaʼö Nononia ba wamahaʼö yaʼita hewisa lala wanaögö falöʼatulö iadaʼa. Ifahaʼö göi ita wa lö ara tö tohare Wamatörönia ba wangeheta falöʼatulö sagötö faʼara. (2 Fe. 3:13) Börö daʼö, dataforege si fao faʼowölö-ölö ba wanutunö turia somuso dödö sanandrösa ba Wamatörö Lowalangi gasa-gasa wombaloida inötö irege anönö gulidanö andre ”faʼatulö hegöi sindruhu”.—Yes. 9:7.