”Sanguhuku Ulidanö Maʼasagörö” Hasambalö Ifalua Zatulö

1. Hewisa wangoromaʼö Gaberahamo wa faduhu dödönia ba waʼatulö Yehowa? (Faigi gambara ba wamobörö wamahaʼö.)

”HADIA, tenga satulö, ilau Sanguhuku ulidanö maʼasagörö andrö?” (I Moze 18:25) Niha si lö faröi sotöi Aberahamo, isofu wanofu daʼö tenga börö waʼaombö dödönia. Hizaʼi, fanofunia andre zangoromaʼö waʼafaduhu dödönia wa ihuku mbanua Zodoma hegöi Gomora Yehowa si fao faʼatulö soʼahonoa. Faduhu dödönia wa lö irai ’ifarahugö ba zi so horö zi lö horö, wamunu yaʼira’. ’Aröu’ ba dödö Gaberahamo daʼö. Aefa daʼö imane Yehowa sanandrösa khönia samösa, ”Gowe ia, soʼahonoa wolaunia; me no satulö lala andrö khönia fefu, Lowalangi si lö faröi ia, lö falimosa khönia, satulö tödö ba sadölö tödö ia!”​—V Moze 31:19; 32:4.

2. Hana wa tebai ifalua Yehowa hadia zi lö atulö?

² Hana wa faduhu dödö Gaberahamo wa hasambalö atulö hadia nifalua Yehowa? Börö me Yehowa andre no duma-duma si sökhi sanandrösa ba waʼatulö. Andrö wa hasambalö atulö goi-goi Yehowa, ba hasambalö atulö wanguhukunia. Imane Sura Niʼamoniʼö, ”Somasi ia, ba faʼatulö ba huku; ba no anönö danö faʼebua dödö Yehowa.”​—Zinunö 33:5.

3. Beʼe duma-duma walöʼatulö salua ba gulidanö iadaʼa.

³ Omuso dödöda börö me taʼila wa hasambalö atulö Yehowa. Hizaʼi, afönu falöʼatulö gulidanö andre. Duma-dumania, so niha nihuku ba labeʼe ba gurunga börö zala si lö irai lafalua. Me no lafareso tes DNA, so ösa ba gotaluara zi lö mamalua sala, hizaʼi no lahorigö ginötöra ba zi hauga fakhe bakha ba gurunga. Falöʼatulö simane daʼö tola möi fangabu dödö ba fönu. Hewaʼae simanö, so nasa walöʼatulö sabölö abua wanaögö yaʼia. Hadia daʼö?

FALÖʼATULÖ BA MBANUA NIHA KERISO

4. Hewisa wa tola tetandraigö wamati niha Keriso?

⁴ Latötöna ira niha Keriso enaʼö ha baero ba mbanua niha Keriso lataögö walöʼatulö. Hizaʼi, tola tetandraigö wamatida na taʼila mazui tarasoi hadia zi lö atulö ba mbanua niha Keriso. Na simane daʼö zalua, hadia nifaluau? Hadia tola möi fangawuwumö daʼö?

5. Hana wa lö tokea ita na taʼila mazui tarasoi walöʼatulö ba mbanua niha Keriso?

⁵ Fefu ita lö moʼahonoa ba tafalua zala. Andrö wa tola manö so niha zamalua khöda si lö atulö mazui tafalua hadia zi lö atulö ba niha böʼö ba mbanua niha Keriso. (I Yohane 1:8) Hewaʼae lö asese alua daʼa, niha Keriso si lö faröi lö tokea mazui awuwu na alua walöʼatulö. No ibeʼe khöda mene-mene si sökhi Yehowa ba Zura Niʼamoniʼö si möi fanoloda enaʼö lö faröi ita na lafalua khöda walöʼatulö ira talifusöda.​—Zinunö 55:13-15.

6, 7. Hadia walöʼatulö nirasoi samösa dalifusöda ba mbanua niha Keriso, ba hadia mbua-bua sanolo yaʼia?

⁶ Angeraigö hadia zalua khö Willi Diehl. Iʼotarai me döfi 1931, lö faröi dalifusöda Diehl wohalöwö ba Mbetieli si so ba Bern, Swiss. Me 1946, fao ia ba Sekolah Gilead kelas ke-8 ba New York, AS. Me no aefa wisuda, tebeʼe halöwönia tobali satua samasui ba Swiss. Ba waö-waö waʼaurinia, imane talifusöda Diehl wa ba mbaŵa si Lima 1949, ifatunö ba gödo ndraha si so ba Swiss wa omasi ia mangowalu. Lamane khönia ira talifusöda sangai halöwö wa lahalö fefu halöwö si so khönia. Ha ba wangai halöwö tobali perintis nitehegö khönia. Imane talifusöda Diehl, ”Lö latehegö khögu wamaʼema huhuo . . . ba ato zi lö manemaʼö yaʼaga, hulö niha si no muʼefasi ba mbanua niha Keriso ndraʼaga ba wamaigira.”

⁷ Hadia nifalua dalifusöda Diehl? Imane, ”Maʼila wa lö fasala moloʼö Daromali na mangowalu, andrö wa maʼandrö wolumöʼö ba wangandrö ba faduhu dödöma khö Yehowa.” Hewaʼae so ösa ndra talifusö si lö mangokhögö faʼaboto ba dödö sanandrösa ba lala wamaigi Yehowa wangowalu, ba gafuriatania tebohouni waʼaboto ba dödöra, ba ifuli iʼokhögö halöwönia talifusöda Diehl. Ifahowuʼö waʼalöfaröinia Yehowa.a (Faigi nisura ba gahe zura.) Datasofu khöda samösa, ’Na alua khögu walöʼatulö, hadia so khögu waʼebolo dödö ba ubaloi irege iʼehaogö Yehowa zalua andrö? Mazui, hadia uʼodaligö wangera-ngeragu samösa ba ulawa walöʼatulö andrö?’​—Gamaedola 11:2; baso Mikha 7:7.

8. Hana wa tola manö fasala wangera-ngerada na tawaʼö wa no lafalua khöda hegöi ba niha böʼö zi lö atulö?

⁸ Na örasoi wa so ösa walöʼatulö ba mbanua niha Keriso, törö tödöu wa tola fasala ndraʼugö. Hana? Lö moʼahonoa ita ba tola manö lö aboto ba dödöda hadia zalua. Lö taʼila fefu hadia zindruhunia. Hizaʼi, hewaʼae atulö mazui fasala waʼaboto ba dödöda, moguna mangandrö ita khö Yehowa sanandrösa ba zalua andrö, taʼodaligö ia, ba böi faröi ita. Daʼa zi tola molumöʼö yaʼita enaʼö lö ’abao dödöda khö Yehowa’.​—Baso Gamaedola 19:3.

9. Hadia duma-duma nitutunöda ba wamahaʼö daʼa hegöi ba wamahaʼö aefa daʼa?

⁹ Datafahaʼö ita moroi ba zi datölu nono mbanua Yehowa zanaögö walöʼatulö ba götö Zura Niʼamoniʼö. Ba wamahaʼö daʼa, tatutunö maʼuwu Gaberahamo sotöi Yosefo ba hadia zi no lafalua khönia ira talifusönia. Ba wamahaʼö aefa daʼa, tatutunö hadia nifalua Yehowa khö Razo Gahabi hegöi nitaögö zinenge sotöi Fetero ba Gandriokhia Siria. Simane duma-duma nitutunöda, alui lala si tola mangosambuaʼö dödöu khö Yehowa hegöi wangehaogö fahuwusamö khönia. Töra-töra na faduhu dödömö wa no ötaögö walöʼatulö.

NO ITAÖGÖ WALÖʼATULÖ YOSEFO

10, 11. (a) Hadia walöʼatulö salua khö Yosefo? (b) Hadia ginötö niʼokhögö Yosefo me so ia ba gurunga?

¹⁰ Yosefo, niha si lö faröi samosumange Yehowa zanaögö falöʼatulö ba niha baero. Hizaʼi, falöʼatulö sabölö afökhö nirasoinia yaʼia daʼö moroi khö ndra talifusönia. Me 17 fakhe ndröfi Yosefo, latagö ia ira talifusönia ba laʼamawa ia tobali sawuyu. Laʼohe ia ba danö Miserai. (I Moze 37:23-28; 42:21) Ba mbanua daʼö, laböbögö zi lö duhu khö Yosefo wa edöna ihoröni ndra alawe, ba labeʼe ia ba gurunga hewaʼae lö muʼetuʼö huku. (I Moze 39:17-20) Tefakao Yosefo me tobali ia sawuyu hegöi me tobali ia niha gurunga ba zi 13 fakhe waʼara. Hadia wamahaʼö si tola tahalö ba zi no alua khö Yosefo si möi fanoloda na tataögö walöʼatulö moroi khö ndra talifusöda?

¹¹ Me ba gurunga so Yosefo, labeʼe göi ba gurunga niha zamaʼoli idanö khö razo. Ba zi sambua inötö ba zi talu mbongi, mangifi zamaʼoli idanö andrö, ba itolo Yosefo Yehowa ba wamoʼeluaha daʼö. Itutunö Yosefo wa teʼefaʼö zamaʼoli idanö andrö moroi ba gurunga ba ifuli mohalöwö ia khö Waraʼo. Iʼogunaʼö ginötö daʼö Yosefo ba wanutunö hadia zalua khönia. Oya wamahaʼö si tola tahalö moroi khö Yosefo tenga ha ba zi no niwaʼö, hizaʼi ba zi lö iwaʼö göi.​—I Moze 40:5-13.

12, 13. (a) Hewisa wa tola taʼila wa lö itemaʼö manö Yosefo walöʼatulö salua khönia? (b) Hadia zi lö ifatunö Yosefo ba niha samaʼoli idanö?

¹² Baso I Moze 40:14, 15. Angeraigö wa iwaʼö Yosefo wa ”nitagö” ia. Ba Zura Niʼamoniʼö, ngawua wehede daʼa tola lafoʼeluaha ia tobali ’sinagö’. Ba daʼa oroma wa yaʼia andre niha sanaögö falöʼatulö. Itutunö göi Yosefo wa lö fasala ia ba zala si no laböbögö khönia. Daʼa mbörö wa iʼandrö khö zamaʼoli idanö ba wamatunö khö Waraʼo hadia zalua khönia. Hadia gohitö dödönia? Imane, ”Enaʼö öʼefaʼö ndraʼo ba nomo andre.”

¹³ Hadia itemaʼö manö Yosefo zalua khönia ba lö ifalua hadia ia sanandrösa ba daʼö? Löʼö! Iʼila Yosefo wa oya walöʼatulö nitaögönia. Andrö wa itutunö hadia zalua khönia ba niha zamaʼoli idanö. Itötöna wa tola itolo ia niha daʼö. Hizaʼi lö itutunö Sura Niʼamoniʼö wa no iwaʼö Yosefo ba niha böʼö hegöi khö Waraʼo wa ira talifusönia andrö niha sanagö. Sindruhunia, me möi ndra talifusönia ba danö Miserai, ba mangatulö ira khö Yosefo, itemaʼö ira Faraʼo ba iʼandrö enaʼö toröi ira ba danö Miserai ba enaʼö larasoi ”hadia sa zi sökhi ba danö” andrö.​—I Moze 45:16-20.

14. Hadia zi tola molumöʼö yaʼita enaʼö lö tawaʼö wehede safökhö na tataögö zi lö atulö bakha ba mbanua niha Keriso?

¹⁴ Na so ba wangera-ngerada wa no tataögö walöʼatulö bakha ba mbanua niha Keriso, moguna taʼangenanöi enaʼö böi tafatou-tou zalua andrö. Tatu manö, moguna taʼandrö wanolo khö ndra satua sokubaloi ba tafatunö khöra na so ndra talifusöda si no mamalua horö sebua. (III Moze 5:1) Hizaʼi, so ösa zala side-ide si tola taʼatulöʼö samösa khö ndra talifusöda ba lö moguna tafatunö ba niha böʼö hegöi khö ndra satua sokubaloi. (Baso Mataiʼo 5:23, 24; 18:15.) Böi faröi ita ba datafalua goi-goi Zura Niʼamoniʼö na alua zimane daʼö. Itaria, taʼila wa fasala lala wangera-ngerada ba zalua andrö ba taʼila wa sindruhunia tenga yaʼita zanaögö falöʼatulö andrö. Aefa daʼö, omuso dödöda börö me lö tadunö-dunö hadia zi lö sökhi sanandrösa khö ndra talifusöda si tola mamakiko fahuwusada! Datatörö tödöda wa hewaʼae atulö mazui fasala ita, lö tola möi fangehaogö hadia zalua na tawaʼö wehede safökhö. Faʼalöfaröida khö Yehowa hegöi khö ndra talifusöda, daʼa zi tola molumöʼö yaʼita enaʼö lö tafalua zala. Imane sanura zinunö wa so niha ”sanörö lalania, si lö sinegu”. Duma-dumania, niha ”si lö mamöbögö si lö duhu, lelania, si lö mamakao awönia”.​—Zinunö 15:2, 3; Yakobo 3:5.

TÖRÖ TÖDÖU WA FAHUWUSAMÖ ZABÖLÖ MOGUNA

15. Hewisa wahuwusa Yosefo khö Yehowa tola tobali howu-howu?

¹⁵ Tola tahalö wamahaʼö si sökhi tanö böʼö moroi khö Yosefo. Ba zi 13 fakhe wanaögönia falöʼatulö, iforomaʼö Yosefo wa iʼokhögö lala wangera-ngera Yehowa ba zalua andrö. (I Moze 45:5-8) Lö irai itahigö Yehowa ba zalua khönia. Tatu manö, lö olifu Yosefo hadia walöʼatulö si no alua khönia. Hizaʼi, lö iʼafökhöiʼö dödönia ba daʼö. Sabölö moguna, lö itehegö walöʼmoʼahonoa hegöi amuata si sala nifalua niha böʼö tobali fangaröuʼönia khö Yehowa. Faʼalöfaröi Yosefo zameʼe khönia inötö ba wamaigi hewisa wangehaogö Yehowa falöʼatulö ba howu-howu nitemania hegöi ösi nomonia.

16. Hana wa moguna tahatöʼö ita khö Yehowa na tataögö walöʼatulö ba mbanua niha Keriso?

¹⁶ Simanö göi, moguna taʼameʼegö tödö ba talumöʼö wahuwusada khö Yehowa. Böi tatehegö walömoʼahonoa ndra talifusöda tobali fangaröuʼöda khö Lowalangi niʼomasiʼöda ba nifosumangeda. (Roma 8:38, 39) Hizaʼi, na tataögö walöʼatulö ba mbanua niha Keriso, dataʼoʼö Yosefo ba tahatöʼö ita khö Yehowa. Okhögö wangera-ngera simane niʼokhögönia ba zalua andrö. Na no aefa tafalua fefu hadia zi tola tafalua ba taʼoʼö goi-goi Zura Niʼamoniʼö ba wangasiwaisi abula dödöda, moguna tatouʼö ba danga Yehowa fefu zalua andrö. Tola faduhu dödöda wa tola iʼasiwaisi hadia zalua ba ginötö hegöi ba lala si no itatugöi.

FAʼAFADUHU DÖDÖ BA ’ZANGUHUKU ULIDANÖ MAʼASAGÖRÖ’

17. Hewisa wangoromaʼöda wa faduhu dödöda ba ’zanguhuku ulidanö maʼasagörö’?

¹⁷ Sagötö toröi ita ba gulidanö si lö sökhi, tola manö tataögö walöʼatulö. Itaria, yaʼugö mazui niha niʼilamö tola manö mitaögö mazui miʼila hadia zi lö atulö ba mbanua niha Keriso. Böi tobali fangawuwumö daʼö. (Zinunö 119:165) Böi faröi khö Lowalangi, andrö wanolo khönia ba wangandrö, ba odaligö ia. Törö tödömö wa börö me lö moʼahonoa, tola manö lö aboto ba dödömö hadia zalua, ba tola manö lö öʼila fefu hadia zindruhunia. Oʼö duma-duma Yosefo ba timbagö wehede si lö sökhi, sonönö mamakiko hadia zalua. Safuria, moroi na öʼodaligö ndraʼugö samösa, abölö sökhi na öʼosambuaʼö dödömö ba wondrorogö faʼalöfaröimö ba baloi wangehaogö Yehowa zalua andrö. Tola öʼokhögö waʼomasi Yehowa ba howu-howunia simane niʼokhögö Yosefo. Tola faduhu dödömö khö Yehowa, ”sanguhuku ulidanö maʼasagörö”, samalua hadia zatulö ba ngawalö ”lala andrö khönia fefu”.​—I Moze 18:25; V Moze 32:4.

18. Hadia nitutunöda ba wamahaʼö aefa daʼa?

¹⁸ Ba wamahaʼö aefa daʼa, tatutunö dombua duma-duma walöʼatulö nitaögö nono mbanua Yehowa ba götö Zura Niʼamoniʼö. Duma-duma andre zanolo yaʼita ba wamaigi hewisa wangide-ngideʼö hegöi fangefaʼö zala tola möi fanoloda ba woloʼö lala wamaigi Yehowa faʼatulö.