Hana Wa Moguna Möi Ita ba Gangowuloa?

1-3. (a) Hewisa niha Keriso wangoromaʼöra wa omasi ira weʼamöi ba gangowuloa? (Faigi gambara ba wamobörö wamahaʼö.) (b) Hadia nifatunöda ba duho daʼa?

ME AWENA 17 fakhe ndröfi Corinna, laraʼu ninania ba laʼohe ba nahia wangosawuyu. Aefa daʼö laʼohe göi Corinna ba Siberia, töra saribu kilometer moroi ba nomonia. Laʼosawuyu ia wohalöwö ba kabu. Itaria lafaso ia wohalöwö ba zokafu-kafu ba lö labeʼe khönia nukha saweʼe-weʼe. Hewaʼae simanö, Corinna hegöi talifusöda ira alawe tanö böʼö lahalö gangetula wa lafalua gofu hadia ia enaʼö tola laröi kabu ba möi ira ba gangowuloa.

² Imane Corinna, ”Mofanöga tanö owi moroi ba naha wohalöwöma ba matörö tanö 25 kilometer numalö ba stasiun kereta api. Mofanö kereta api bözi dua sihulö wongi, ba önö za ndraʼaga ba kereta api. Aefa daʼö, fulu kilometer matörö tanö numalö ba nahia gangowuloa.” Omuso sibai dödö Corinna wamalua daʼa. Imane, ”Ba gangowuloa, mafahaʼö ndraʼaga ba mbuku Manuriaigö ba maʼanunöisi lagu Kerajaan. Fefu daʼa tobali famarou dödö hegöi fangaʼaroʼö wamatima.” Talifusöda si darua andre mangawuli ira ba kabu tölu hari aefa daʼö, ba lö irai laʼila ira sokhö kabu ba ginötö mofanö ira.

³ Ono mbanua Yehowa labase-baseʼö ginötö waʼowulo khö ndra talifusöra ba wamati. Duma-dumania, niha Keriso si föföna omasi sibai ira na owulo ba wamosumange Yehowa hegöi ba wamahaʼö yaʼira sanandrösa khönia. (Halöwö Zinenge 2:42) Tatu manö omasi ndraʼugö göi weʼamöi ba gangowuloa. Hizaʼi, te abua khöu na lö aetu-aetu weʼamöi ba gangowuloa, simane ndra talifusö tanö böʼö. Te oya ginötö niʼogunaʼöu ba wohalöwö mazui erege dödöu. Börö daʼö, hadia zi tola manolo yaʼugö enaʼö tola möi ndraʼugö ba gangowuloa?^[1] (Faigi gonönöta.) Hewisa enaʼö tafarou niha nifahaʼöda ba Zura Niʼamoniʼö hegöi niha böʼö enaʼö owölö-ölö ira weʼamöi ba gangowuloa? Ba duho daʼa itutunö khöda hadia mbörö wa möi ita ba gangowuloa (1) so gunania khöda, (2) tetolo niha böʼö, ba (3) möi fangomusoiʼö dödö Yehowa.^[2]—Faigi gonönöta.

SO GUNANIA KHÖDA GANGOWULOA

4. Hewisa wa tola tefahaʼö ita ba gangowuloa sanandrösa khö Yehowa?

⁴ Tefahaʼö ita ba gangowuloa. Ba gangowuloa tefahaʼö ita sanandrösa khö Yehowa. Duma-dumania, oya mbanua niha Keriso zangogunaʼö mbuku Mendekatlah kepada Yehuwa ba Wamahaʼö Zura Niʼamoniʼö ba Gangowuloa. Hewisa dödöu me tafahaʼö ita ba gamuata Yehowa ba me örongo hewisa dödö ndra talifusöda sanandrösa khönia? Tatu manö monönö waʼomasiu khö Yehowa. Ba gangowuloa tafahaʼö ita ba Zura Niʼamoniʼö ba ginötö tafondro-ndrongo huhuo sebua, famadumaisi hegöi ba wamondro-ndrongo fombaso Sura Niʼamoniʼö. (Nehemia 8:8) Angeraigö hadia nisöndrada ero migu ba ginötö tafaʼanö ita ba wombaso Sura Niʼamoniʼö hegöi ba wamondro-ndrongo hadia wamahaʼö nisöndra ndra talifusöda.

5. Na möi ndraʼugö ba gangowuloa, hewisa wa tetolo ndraʼugö ba woʼaurifagö goi-goi Zura Niʼamoniʼö hegöi ba wondrouʼö halöwö fanuriaigö?

⁵ Ba gangowuloa, tefarou ita enaʼö taʼoʼaurifagö ba waʼaurida hadia zi no taʼila moroi ba Zura Niʼamoniʼö. (I Tesalonika 4:9, 10) Ba wamahaʼö mbuku Manuriaigö, hadia no irai tefarou dödöu ba wondrouʼö wangai halöwö khö Yehowa, enaʼö itugu sökhi wangandröu, mazui ba wangefaʼö zala ndra talifusöda? Ba gangowuloa tefahaʼö ita hewisa weʼamöi manuriaigö hegöi ba wanolo niha böʼö enaʼö so khöra waʼaboto ba dödö moroi ba Zura Niʼamoniʼö.​—Mataiʼo 28:19, 20.

6. Hewisa gangowuloada möi famarou dödö ba fangaʼaroʼö wamatida?

⁶ Tefarou ita ba gangowuloa. Ulidanö nifatörö Zatana andre ibeʼe khöda faʼawuwu ba wamati ba iʼasogö gabula dödö hegöi faʼide-ide dödö. Hizaʼi, ba gangowuloada ibeʼe khöda wamarou dödö hegöi faʼabölö enaʼö lö aetu-aetu tahalö halöwö khö Yehowa. (Baso Halöwö Zinenge 15:30-32.) Asese tadunö-dunö hewisa wa tola alua zi no tefaʼeleʼö ba Zura Niʼamoniʼö. Daʼa zondrouʼö faʼafaduhu dödöda wa hasambalö alua zi no ifabuʼu Yehowa ba zi so föna. Tasöndra wamarou dödö khö ndra talifusöda tenga ha ba ginötö lafaʼema huhuo, hizaʼi ba ginötö labeʼe mbua gera-erara hegöi ba wanuno Yehowa soroi ba dödö. (I Korindro 14:26) Na fahuhuo ita khöra fatua lö tebörögö gangowuloa hegöi na no awai, ohahau dödöda börö me ato zi fahuwu khöda sangomasiʼö yaʼita.​—I Korindro 16:17, 18.

7. Hadia mbörö wa moguna möi ita ba gangowuloa?

⁷ Ba gangowuloa tatema wanolo geheha Lowalangi. Iʼogunaʼö Yesu geheha niʼamoniʼö ba wondröniaʼö mbanua niha Keriso. Ifarou ita enaʼö ’tafondro-ndrongo hadia niwaʼö geheha ba mbanua andrö’. (Famaʼeleʼö 2:7) Itolo ita eheha niʼamoniʼö ba wotimbagö fondrönisi dödö ba zi lö sökhi hegöi falöʼataʼu weʼamöi manuriaigö. Tola göi itolo ita ba wangai angetula si sökhi. Daʼö mbörö wa taʼodödögö weʼamöi ba gangowuloa hegöi ba wanemaʼö fanolo moroi ba geheha Lowalangi.

TATOLO NDRA TALIFUSÖDA BA GANGOWULOA

8. Hewisa wa tetolo ndra talifusöda na möi ita ba gangowuloa, na tabeʼe mbua gera-erada, hegöi na manunö ita? (Faigi kotak ”So Khönia Waʼomuso Dödö”.)

⁸ Ba gangowuloa, tebeʼe ginötö khöda ba wangoromaʼö faʼomasi khö ndra talifusöda. Ato ndra talifusöda sanaögö abula dödö. Imane Faulo, ”Ba datafaoma tafaigi nawöda.” (Heberaiʼo 10:24, 25) Taʼoromaʼö waʼomasi khö ndra talifusöda na möi ita ba gangowuloa ba wamarou dödöra zamösana. Ba gangowuloa tola fariawö ba fahuhuo ita khöra, ba taʼameʼegö tödö hadia zalua khöra. Tafarou göi dödöra na lafondro-ndrongo mbua gera-era nifaʼemada hegöi sinunö niʼanunöisida soroi ba dödö.​—Kolose 3:16.

9, 10. (a) Tutunö hewisa wa tola tefarou dödöda owulo khö ndra talifusöda moroi ba wehede Yesu nisura ba Yohane 10:16. (b) Na möi ita ba gangowuloa, hewisa wa tola tatolo dalifusöda si tenga si sara lala wamati nösi nomonia?

⁹ Na möi ita ba gangowuloa, tatolo mbanua niha Keriso enaʼö faoma ahatö ita zamösana. (Baso Yohane 10:16.) Iʼoʼamaedolagö ia Yesu simane kubalo ba ira nifahaʼönia simane nono mbiri-biri. Angeraigö atö duma-duma daʼa: Na so dua rozi nono mbiri-biri ba hili, dua rozi zi so ba ndraso, ba sara tö so ba nahia tanö böʼö, hadia mufotöi zi lima rozi andre ha sambawa nikubaloi? Löʼö, börö me lö tebulö fao-fao zi sambawa nikubaloi ba laʼoʼö gubalora. Simanö göi ita, böi aröu ita moroi khö ndra talifusöda, börö daʼö moguna möi ita ba gangowuloa. Moguna fao ita khöra börö me yaʼita ”ha sambawa nikubaloi” ba woloʼö ”samösa gubalo”.

¹⁰ Ba gangowuloa, teʼosambuaʼö ita simane ösi nomo si so faʼomasi. (Zinunö 133:1) So ösa ndra talifusöda si no latiboʼö ira satuara mazui talifusöra ba waʼaniha. Ifabuʼu khöra Yesu wa ibeʼe dalifusö simane ösi nomora sangomasiʼö ba soʼameʼegö tödö yaʼira. (Mareko 10:29, 30) Na lö aetu-aetu möi ndraʼugö ba gangowuloa, tola tobali ndraʼugö simane ama, ina, talifusö ira matua mazui ira alawe khö ndra talifusöda ba mbanua niha Keriso. Na taʼangeraigö fefu daʼa, tafalua zabölö sökhi enaʼö taʼondrasi gangowuloa.

TAʼOMUSOIʼÖ DÖDÖ YEHOWA

11. Hadia zinangea tabeʼe khö Yehowa ba ginötö möi ita ba gangowuloa?

¹¹ Ba gangowuloa, tabeʼe khö Yehowa hadia zinangea itema. Börö me yaʼia Zomböi yaʼita, moguna taʼandrö saohagölö khönia, tafosumange ba tasuno ia. (Baso Famaʼeleʼö 7:12.) Tola tafalua daʼa ba gangowuloa ba ginötö mangandrö ita khö Yehowa, manunö ba fahuhuo ita sanandrösa khönia. Sindruhu-ndruhu daʼa ginötö si sökhi khöda ba wamosumange Yehowa ero migu!

12. Hewisa dödö Yehowa na taʼoʼö goroisania weʼamöi ba gangowuloa?

¹² Yehowa zamazökhi yaʼita. Börö daʼö, moguna taʼoʼö niwaʼönia. Iʼoʼou ita enaʼö böi taböhöli weʼamöi ba gangowuloa, mendrua manö me no ahatö ginötö. Tobali, na taʼoʼö goroisa Yehowa, tola omuso dödönia. (I Yohane 3:22) Itöngöni ba iʼameʼegö tödö fefu nifaluada ba weʼamöi ba gangowuloa.​—Heberaiʼo 6:10.

13, 14. Hana wa tola ahatö ita khö Yehowa hegöi khö Yesu na möi ita ba gangowuloa?

¹³ Na möi ita ba gangowuloa, taforomaʼö khö Yehowa wa omasi ita ahatö khönia hegöi khö Nononia. Ba gangowuloa, tafahaʼö ita ba Zura Niʼamoniʼö hegöi khö Yehowa hadia zinangea tafalua ba hewisa lala waʼaurida. (Yesaya 30:20, 21) Na möi ba gangowuloada niha si tenga samosumange Yehowa, tola laʼila wa Lowalangi zondröniaʼö yaʼita. (I Korindro 14:23-25) Yehowa zondröniaʼö angowuloada, iʼogunaʼö gehehania, ba moroi khönia fefu wamahaʼö nitemada. Tobali, na möi ita ba gangowuloa, tafondro-ndrongo niwaʼö Yehowa, tarasoi hawaʼebua waʼomasinia ba itugu ahatö ita khönia.

¹⁴ Imane Yesu, Högö mbanua niha Keriso, ”Ba zorudu zi darua, ba ma si datölu, ba döigu, ba daʼö sodo khöra ba gotaluara.” (Mataiʼo 18:20) Imane nasa Sura Niʼamoniʼö wa ’mowaö-waö Yesu ba gotalua’ mbanua niha Keriso. (Famaʼeleʼö 1:20–2:1) Fao Yehowa hegöi Yesu khöda ba yaʼira zangabölöʼö yaʼita ba gangowuloa. Moloʼö yaʼugö, hewisa dödö Yehowa na iʼila fefu hadia nifaluau enaʼö ahatö ndraʼugö khönia hegöi khö Nononia?

15. Hewisa wa no taʼoʼö niwaʼö Lowalangi na möi ita ba gangowuloa?

¹⁵ Na möi ita ba gangowuloa, taforomaʼö khö Yehowa wa omasi ita taʼoʼö niwaʼönia. Lö irai ifaso ita Yehowa ba woloʼö niwaʼönia. (Yesaya 43:23) Tobali, na taʼoʼö goroisania, no taforomaʼö wa taʼomasiʼö ia ba faduhu dödöda wa no sinangea iwaʼö khöda hadia zi tola tafalua. (Roma 6:17) Duma-dumania, hadia zinangea tafalua na imane kafaloda wa moguna oya tabeʼe ginötöda ba wohalöwö irege lö taʼila möi ba gangowuloa? Tola manö samuza inötö lö latehe khöda ira samatörö weʼamöi ba gangowuloa ba wamosumange Yehowa, lahuku ita, laʼandrö gefe, labeʼe ita ba gurunga, mazui labeʼe khöda hukuma sabölö ebua. Mazui, abölö aolo dödöda wamalua halöwö tanö böʼö moroi na möi ita ba gangowuloa. Ba zalua andre, ilulu khöda Yehowa ba wangai angetula samösa. (Halöwö Zinenge 5:29) Hizaʼi, ero tafili ba woloʼö linia, no taʼomusoiʼö dödönia.​—Gamaedola 27:11.

BÖI BATO WEFAO KHÖ NDRA TALIFUSÖDA WEʼAMÖI BA GANGOWULOA

16, 17. (a) Hezo taʼila wa moguna sibai ba niha Keriso si föföna weʼamöi ba gangowuloa? (b) Hewisa dödö dalifusöda George Gangas sanandrösa ba gangowuloa mbanua niha Keriso?

¹⁶ Me no awai owulo niha Keriso ba Wendrakose 33 M, lö labato weʼamöi mamosumange Yehowa. ”Ba lö tebulö ira nifahaʼö zinenge, ba he ba wefao, ba he ba wamoboto roti ba ba wangandrö.” (Halöwö Zinenge 2:42) Lö laböhöli weʼamöi ba gangowuloa hewaʼae so wolohi moroi khö ndra samatörö Romawi hegöi ira sondröniaʼö ba agama Yahudi. Hewaʼae abua wamalua daʼö, lafalua zi tola lafalua enaʼö tola owulo ira fefu.

¹⁷ Simanö göi ba ginötö andre, omuso dödö nono mbanua Yehowa weʼamöi ba gangowuloa. So samösa dalifusöda sotöi George Gangas si no tobali anggota Badan Pimpinan ba zi 22 fakhe faʼara imane, ”Na owulo ndraʼo khö ndra talifusö, daʼa no sambua faʼomuso dödö sebua khögu ba waʼaurigu. Omasido sibai na yaʼo zi oföna tohare ba Balai Kerajaan, ba na tola yaʼo zafuria mangawuli. Owua-wua dödögu na fahuo-huo ba nono mbanua Lowalangi. Na so ndraʼo ba gotaluara, hulö zi so ba nomo ndraʼo, ba waradaiso ba wamati.” Imane nasa, ”Gohitö dödögu sabölö ebua yaʼia daʼö wangondrasi angowuloa.”

18. Hewisa dödöu sanandrösa ba gangowuloada, ba hadia zomasi öfalua?

¹⁸ Hadia simane daʼö göi dödöu sanandrösa ba wamosumange Yehowa? Na yaʼia, odödögö weʼamöi ba gangowuloa hewaʼae so zanaisi yaʼugö. Foromaʼö khö Yehowa wa fao dödöu ba niwaʼö Razo Dawido me imane, ”He Yehowa, omasido nahiau omo andrö, nahia lakhömiu.”​—Zinunö 26:8.