Hadia zi Tola öʼokhögö ba Weʼamöi ba Gangowuloama?

Ato niha lö omasi ira möi ba nahia wamatunö taromali börö me lö lasöndra wanuturu lala si sökhi ba fondrara dödö. Nasimanö, hadia mbörö wa öʼondrasi nahia wamatunö taromali khö ndra niha keriso Samaduhuʼö Yehowa nifotöi ”angowuloa”? Hadia zi tola öʼokhögö ba daʼö?

Omuso dödöda börö me so ita ba gotalua niha si fahuwu ba sebua faʼomasi. Ba götö ndra nifahaʼö Yesu, so gangowuloa niha keriso ero sambua banua, ba owulo ira ba wamosumange Lowalangi, lafahaʼö ira ba Zura Niʼamoniʼö ba faoma lafarou dödö nawöra. (Heberaiʼo 10:24, 25) Me owulo ira ba gotalua niha sebua faʼomasi, laʼila wa so ira ba gotalua zi fahuwu khöra yaʼia daʼö talifusöra ba wamati. (II Tesalonika 1:3; 3 Yohane 14) Maʼoʼö zimane nifalua niha keriso meföna ba masöndra waʼomuso dödö.

So gunania khöma me no mafahaʼö ndraʼaga lala wamalua goi-goi Zura Niʼamoniʼö. Simane ba götö föna, ira matua, ira alawe, hegöi iraono owulo ira ba zi sambua nahia. Ira samahaʼö satua-tua laʼogunaʼö Zura Niʼamoniʼö ba wanolo yaʼita wamalua goi-goi Lowalangi ba waʼaurida sero maʼökhö. (V Moze 31:12; Nehemia 8:8) Manunö ira fefu ba tola labeʼe mbua gera-erara zamösana, irege tola lafaduhuʼö wanötönada yaʼita niha keriso.​—Heberaiʼo 10:23.

Howu-howu börö me teʼaroʼö wamati khö Lowalangi. Iʼombakhaʼö Faulo khö nono mbanua Lowalangi ba götönia, ”Humulu sa dödögu falukha khömi . . . enaʼö faoma tafarou dödö nawöda ba wamati he yaʼami hegöi yaʼo.” (Roma 1:11, 12) Me lö taböhöli weʼamöi ba gangowuloa si fao ira talifusöda, daʼö zangabeʼe famatida ba tola tahalö gangetula wamalua ba waʼaurida goi-goi Zura Niʼamoniʼö.

Makaoni ami weʼamöi ba gangowuloama ba miʼila samösa hadia gunania. Matemaʼö ami soroi ba dödö. Lö muʼandrö gefe-lö hadöi ameʼela.

• Hezo moroi duma-duma niʼoʼöma ba gangowuloa nifaluama?

• Hadia gunania weʼamöi ba gangowuloa niha keriso?