Hewisa Enaʼö Tola Öhalö Samösa Gangetula?

1. Hadia manö duma-duma goroisa Zura Niʼamoniʼö, ba hadia gunania na taʼoʼö ia?

NO IBEʼE khöda goroisa Yehowa ba Zura Niʼamoniʼö enaʼö taʼila hadia zomasi ia tafalua. Duma-dumania, iʼandrö khöda enaʼö taʼaröuʼö ita moroi ba wanömba adu, fanagö, femabu, mazui amuata wohorö. (I Korindro 6:9, 10) Ba no izara-zara Ono Yehowa, Yesu, wameʼe oroisa khö ndra soloʼö khönia, ”Mibaliʼö nifahaʼö fefu soi, wamayagö idanö yaʼira ba döi Nama ba ba döi Nono ba ba döi geheha niʼamoniʼö; mifahaʼö ira ba woloʼö fefu hadia ia niwaʼögu khömi. Ba hiza, fao khömi ndraʼo, ero maʼökhö, irugi gamozua götö danö andrö.” (Mataiʼo 28:19, 20) Fefu niʼandrö Yehowa hegöi Yesu oi si sökhi khöda. Oroisa Yehowa zamahaʼö yaʼita hewisa wondrorogö botoda hegöi ösi nomoda, ba sanolo yaʼita enaʼö lö göna fökhö ba tasöndra waʼomuso dödö. Sabölö moguna, omuso dödö Yehowa ba ifahowuʼö ita ba ginötö taʼoʼö fefu goroisania, simane feʼamöi manuriaigö.

2, 3. (a) Hadia mbörö wa lö ibeʼe khöda gamakhoita Sura Niʼamoniʼö sanandrösa ba ngawalö hadia ia zalua ba waʼaurida? (b) Hadia wanofu-nofu nifatunöda ba duho daʼa? (Faigi gambara ba wamobörö wamahaʼö.)

² Lö nibeʼe Zura Niʼamoniʼö khöda amakhoita sanandrösa ba ngawalö hadia ia zalua ba waʼaurida. Duma-dumania, lö nizara-zara Zura Niʼamoniʼö hadia nukha sinangea tafake. Daʼa zangoromaʼö wa atua-tua Yehowa. Hewaʼae faböʼö-böʼö lagu wonukha niha ba zi fasui yaʼita, ba faböʼö-böʼö mode nukha ero inötö, hizaʼi moguna wanuturu lala nibeʼe Zura Niʼamoniʼö irugi mane maʼökhö. Lö göi nibeʼenia amakhoita sanandrösa ba halöwö mazui hiburan sinangea tafili, ba hewisa enaʼö lö göna ita fökhö. No itehegö Yehowa khöda zamösana hegöi khö zondröniaʼö ösi nomo ba wangai angetula sanandrösa ba daʼö.

³ Ba ginötö tahalö gangetula si tola molua-lua ba waʼaurida ba lö tasöndra goi-goinia ba Zura Niʼamoniʼö, tola manofu ita, ’Hadia omasi Yehowa ba gangetula nihalögu andre? Hadia omuso dödönia ba ngawalö nifaluagu asala lö usawö goroisania ba Zura Niʼamoniʼö? Hewisa wa tola faduhu dödögu wa omuso dödönia ba nifiligu?’

SO LUA-LUANIA KHÖDA GANGETULA NIHALÖDA HEGÖI BA NIHA BÖʼÖ

4, 5. Hadia lua-luania khöda gangetula nihalöda hegöi ba niha böʼö?

⁴ So zangumaʼö wa tola manö lafalua gofu hadia ia zomasi dödöra. Hizaʼi, omasi ita tafalua zi möi fangomusoiʼö dödö Yehowa. Börö daʼö, fatua lö tahalö gangetula moguna taʼangeraigö ba taʼoʼö hadia niwaʼö Zura Niʼamoniʼö. Duma-dumania, ifatunö khöda Sura Niʼamoniʼö hewisa dödö Lowalangi sanandrösa ba wangogunaʼö do. Börö daʼö, taʼoʼö niwaʼönia. (I Moze 9:4; Halöwö Zinenge 15:28, 29) Taʼandrö wanolo khö Yehowa enaʼö tola tahalö gangetula si tola mangomusoiʼö tödönia.

⁵ So lua-luania khöda gangetula nihalöda. Na sökhi gangetula nihalöda, tola itugu ahatö ita khö Yehowa. Angetula si lö sökhi tola ifakiko wahuwusada khönia. So göi lua-luania ba niha böʼö. Lö omasi ita taʼandrö wönu ndra talifusöda mazui tafalua hadia ia zi möi fangawuwu wamatira. Lö omasi ita taʼasogö gabula dödö ba gotalua ndra talifusöda ba mbanua niha Keriso. Börö daʼö, moguna sibai wangai angetula si sökhi.​—Baso Roma 14:19; Galatia 6:7.

6. Hadia zi tobali fanuturu lalada ba wangai angetula?

⁶ Hewisa enaʼö tola tahalö gangetula si sökhi hewaʼae lö izara-zara Sura Niʼamoniʼö wanutunö hadia manö zinangea tafalua? Moroi na tafalua hadia zomasi dödöda, moguna tahaogö woʼangeraigö hadia nifaluada, ba tahalö gangetula si tola mangomusoiʼö dödö Yehowa. Aefa daʼö, faduhu dödöda wa hasambalö itolo ita ba wanöndra mbua si sökhi.​—Baso Zinunö 37:5.

HADIA ZOMASI YEHOWA SINANGEA UFALUA?

7. Na lö hadöi oroisa ba Zura Niʼamoniʼö, hewisa enaʼö taʼila hadia zomasi Yehowa tafalua?

⁷ Hewisa enaʼö taʼila hadia zi tola mangomusoiʼö tödö Yehowa? Imane Efeso 5:17 (NW), ”Yaʼaboto ba dödömi hadia zomasi Yehowa.” Na lö hadöi oroisa si no lazara-zara ba Zura Niʼamoniʼö, moguna taʼangeraigö mazui tabotokhi ba dödöda hadia zomasi Yehowa tafalua. Hewisa enaʼö tola tafalua ia? Moguna mangandrö ita ba tatehegö gehehania wameʼe fanuturu lala khöda.

8. Hewisa wa aboto ba dödö Yesu hadia zomasi Yehowa khönia? Beʼe duma-duma.

⁸ Aboto ba dödö Yesu hadia zomasi Yehowa ifalua. Duma-dumania, dua kali me olofo niha sato, mangandrö Yesu ba ifalua dandra sahöli-höli dödö ba wameʼe göra. (Mataiʼo 14:17-20; 15:34-37) Hizaʼi, itimbagö Yesu wanandraigö nibeʼe Gafökha ba wombaliʼö kara tobali roti me olofo sibai ia ba danö si mate. (Baso Mataiʼo 4:2-4.) Aboto sibai ba dödönia Namania, ba iʼila wa lö omasi Yehowa na iʼogunaʼö geheha niʼamoniʼö ha ba zoguna khönia samösa. Faduhu dödönia wa ibeʼe Amania wanuturu lala khönia ba ibeʼe göi gö ba ginötö iʼogunaʼö.

9, 10. Hadia zanolo yaʼita enaʼö tola tahalö gangetula si sökhi? Beʼe duma-duma.

⁹ Simane Yesu, tola göi tahalö gangetula si sökhi na taʼodaligö Yehowa ba wameʼe fanuturu lala khöda. Imane Sura Niʼamoniʼö, ”Döna-döna khö Yehowa, moroi siʼaikö ba dödöu, ba böi abeʼe dödöu ba waʼonekheu. Böi aefa dödöu khönia, gofu hadia ia lala khöu, ba yaʼia zangadölö töröwau. Böi baliʼö satua-tua ndraʼugö: ataʼufi Yehowa ba aröuʼögö ba zi lö sökhi.” (Gamaedola 3:5-7) Na tafahaʼö ita ba Zura Niʼamoniʼö ba taʼila hewisa lala wangera-ngera Yehowa, aboto ba dödöda hadia zomasi ia tafalua ba waʼaurida. Itugu tafahaʼö ita ba lala wangera-ngera Yehowa, itugu aoha khöda wangai angetula si tola mangomusoiʼö tödönia. Börö daʼö, tola iʼanemaiʼö tatema wanuturu lala moroi khö Lowalangi.​—Hezekieli 11:19.

¹⁰ Khalaigö atö me möi mowöli samösa ndra alawe si no mangowalu ba iʼila sifatu si baga-baga sibai. Hizaʼi, ebua mbölinia. Hewaʼae lö si fao khönia woʼomonia, aboto ba dödönia hewisa dödö woʼomonia na ihorigö gefe ba zimane daʼö. Hana wa iʼila? No hauga fakhe mangowalu ira. Tobali, iʼila hewisa dödö woʼomonia sanandrösa ba wangogunaʼö kefe. Simanö göi, na tafahaʼö ita ba wangera-ngera Yehowa hegöi ba zi no ifalua meföna, tola taʼila hadia zomasi ia tafalua ba ngawalö zalua ba waʼaurida.

HEWISA ENAʼÖ ÖʼILA HADIA NIʼERA-ERA YEHOWA?

11. Hadia wonofu si tola tasofu khöda samösa ba ginötö tabaso ma tafahaʼö ita ba Zura Niʼamoniʼö? (Faigi kotak ”Na Öfahaʼö Ndraʼugö ba Zura Niʼamoniʼö, Sofu Khöu Samösa”.)

¹¹ Hewisa enaʼö öʼila wangera-ngera Yehowa? Sabölö moguna yaʼia daʼö böi tabato wombaso hegöi ba wamahaʼö yaʼita ba Zura Niʼamoniʼö. Na tafalua daʼa, tola tasofu khöda samösa, ’Hadia wamahaʼönia khögu sanandrösa khö Yehowa? Hadia mbörö wa ifalua zimane daʼö?’ Simane Dawido, tola taʼandrö wanolo khö Yehowa enaʼö so khöda waʼaboto ba dödö sanandrösa khönia. Imane Dawido, ”He Yehowa, tuturu khögu lala andrö khömö, fahaʼö ndraʼo ba zinörö andrö khöu. Tolodo, enaʼö utörö zi duhu andrö khöu, ba fahaʼö ndraʼo; yaʼugö sa Lowalangi andrö, sangorifi yaʼodo; khöu udöna-döna, lö mamalö-malö.” (Zinunö 25:4, 5) Na tafahaʼö ita sanandrösa khö Yehowa, tola taʼangeraigö hezo ginötö si tefaudu taʼogunaʼö ia. Hadia tola taʼogunaʼö ia ba nösi nomoda, ba wohalöwö, ba zekola, mazui ba wanuriaigö? Na taʼangeraigö daʼa, aoha khöda wangila hadia zomasi Yehowa tafalua.

12. Hewisa publikasi hegöi feʼamöi ba gangowuloa tola möi fanoloda enaʼö aboto ba dödöda wangera-ngera Yehowa?

¹² Lala tanö böʼö enaʼö taʼila hewisa wangera-ngera Yehowa, taʼameʼegö tödö hadia nifahaʼö ba gorahuania si teʼodane-dane ba Zura Niʼamoniʼö. Duma-dumania, ba ginötö tahalö gangetula, tola taʼila hewisa wangera-ngera Yehowa ba Indeks Publikasi Menara Pengawal hegöi Panduan Riset untuk Saksi-Saksi Yehuwa. So gunania göi na tahaogö tafondro-ndrongo gangowuloa niha Keriso, ba tabeʼe mbua gera-erada ba taʼangerönusi zi no tafahaʼö yaʼita. Daʼa zanolo yaʼita enaʼö taʼila hewisa wangera-ngera Yehowa. Buania, tola tahalö gangetula si tola mangomusoiʼö dödönia ba ifahowuʼö göi ita.

ANGERÖNUSI HEWISA WANGERA-NGERA YEHOWA FATUA LÖ ÖHALÖ GANGETULA

13. Na taʼila wangera-ngera Yehowa, tola tahalö gangetula si sökhi. Beʼe duma-duma.

¹³ Datafaigi sambua duma-duma hewisa wa tola tahalö gangetula si sökhi na tafatimbaisi tödöda wangera-ngera Yehowa. Te omasiʼö tobali perintis. No oya nibulöʼöu ba waʼauriu irege tola oya ginötöu weʼamöi manuriaigö. Hizaʼi, lö khöu nasa faʼafaduhu dödö wa hasambalö öʼokhögö waʼomuso dödö hewaʼae ha maʼifu gefeu ba tanö böʼönia. Tatu manö, lö niwaʼö Zura Niʼamoniʼö wa moguna tobali perintis ita na tafosumange Yehowa. Hewaʼae ha sanuriaigö ita, tola tafosumange ia. Hizaʼi, imane Yesu wa ifahowuʼö Yehowa niha solulu faʼaurinia ba wotuhini Mbanua Lowalangi. (Baso Luka 18:29, 30.) Imane nasa Sura Niʼamoniʼö wa omuso dödö Yehowa na tafalua hadia zi tola ita ba wamosumange yaʼia, ba omasi ia na tasöndra waʼomuso dödö. (Zinunö 119:108; II Korindro 9:7) Na taʼohe daʼa ba wangandrö ba taʼangerönusi, tola tahalö gangetula si tefaudu moloʼö zi tola ita, ba töra-töra nasa ifahowuʼö ita Yehowa.

14. Hewisa enaʼö tola ötatugöi hadia tefaudu ba dödö Yehowa nukha niʼogunaʼöu?

¹⁴ So duma-duma tanö böʼö. So mode nukha zomasiʼö sibai, hizaʼi öʼila wa tola manö so ndra talifusöda si tetutu tödö na öfake nukha daʼö. Lö nizara-zara Zura Niʼamoniʼö hewisa zinangeania lagu wonukhada. Tobali, hewisa enaʼö tola öʼila wangera-ngera Yehowa? Imane Sura Niʼamoniʼö, ”Simanö göi ndra alawe, ndramangehao baru soadu, ba yafao waʼaila ba faʼamoadu; böi fondrandra bu ba mani-mani ba nukha sebua böli, hadia zinangea ba ndra alawe sangumaʼö sangataʼufi Lowalangi ira; bua-bua si sökhi wangehaora.” (I Timoteo 2:9, 10) Tatu manö, moguna mene-mene daʼa ba nono mbanua Yehowa, simanö göi ba ndra matua. Na taʼangeraigö hewisa dödö ndra talifusöda, tola taʼangenanöi hadia nukha niʼogunaʼöda. Ba börö me taʼomasiʼö ndra talifusöda, lö omasi ita na tetutu dödöra. (I Korindro 10:23, 24; Filifi 3:17) Na taʼangeraigö hadia niwaʼö Zura Niʼamoniʼö ba hewisa wangera-ngera Yehowa, tola tahalö gangetula si tola mangomusoiʼö tödönia.

15, 16. (a) Hewisa dödö Yehowa na lö aetu takhalaigö gamuata wohorö? (b) Ba ginötö tafili hiburan, hewisa wa tola taʼila zomasi Yehowa? (c) Ba ginötö tahalö gangetula sabölö moguna, hadia zinangea tafalua?

¹⁵ Moroi ba Zura Niʼamoniʼö, taʼila wa afökhö ba abu dödö Yehowa me lafalua ba me laʼangeraigö zi lö sökhi niha. (Baso I Moze 6:5, 6.) Aboto ba dödöda wa lö omasi Yehowa na takhalaigö gamuata wohorö. Na lö aetu takhalaigö zimane daʼö, tola manö tafalua ia. Sindruhunia, omasi Yehowa na taʼangeraigö zohau-hau hegöi si sökhi. Imane Yakobo wa faʼatua-tua Yehowa andrö ”si oföna khönia, ba no ohau-hau, ba fanete daʼö, ba lö fasosota, ebolo dödö, iʼoʼö li, no fahöna khönia waʼahakhö dödö ba bua-bua si sökhi, lö iʼebuaʼö dödö zambuana, lö mamini tödö”. (Yakobo 3:17) Börö daʼö, tatimbagö fefu hiburan si tola mondrönisi tödöda ba wokhalaigö mazui ba woʼisö ngawalö zi raʼiö ba si lö sökhi. Na aboto ba dödöda hadia zomasi Yehowa hegöi si fatuwu khönia, tola aoha khöda wangila hezo mbuku, film, mazui games si tola tafili. Lö moguna saʼae tasofu ia ba niha böʼö.

¹⁶ Ba ginötö tahalö gangetula, oya zinangea tafili si tola mangomusoiʼö tödö Yehowa. Hizaʼi, na tahalö gangetula sabölö moguna, sökhi na taʼandrö wanuturu lala moroi khö zatua sokubaloi mazui khö ndra talifusöda saro ba wamati. (Tito 2:3-5; Yakobo 5:13-15) Tatu manö, lö taʼandrö enaʼö yaʼira zangai angetula khöda. Hizaʼi, moguna taʼangeraigö sibai hadia zi no taʼila moroi ba Zura Niʼamoniʼö ba awena tahalö gangetulada samösa. (Heberaiʼo 5:14) Imane Faulo, ”Iluʼi-luʼi sa noronia zamösana.”​—Galatia 6:5.

17. Hadia gunania na tahalö gangetula si tola mangomusoiʼö dödö Yehowa?

¹⁷ Ba ginötö tahalö gangetula si tola mangomusoiʼö dödö Yehowa, itugu ahatö ita khönia, ba tatema waʼomasi hegöi howu-howunia. (Yakobo 4:8) Itugu aro göi wamatida khö Yehowa. Börö daʼö, dataʼangerönusi nibasoda ba Zura Niʼamoniʼö enaʼö aboto ba dödöda hewisa wangera-ngerania. Tatu manö, so zi bohou nifahaʼöda yaʼita sanandrösa khö Yehowa. (Yobi 26:14) Na taʼodödögö wamahaʼö yaʼita sanandrösa khönia iadaʼa, tola atua-tua ita ba tahalö gangetula si sökhi. (Gamaedola 2:1-5) Tola manö tebulö gera-era niha gulidanö hegöi ohitö dödöra, hizaʼi lö irai tebulö Yehowa. Imane sinunö Dawido, ”Tödö Yehowa andrö, ba lö tebulö, irugi zi lö aetu, ba era-era dödönia andrö, ba lö mamalö-malö.” (Zinunö 33:11) Tola tahalö gangetula si sökhi na tafahaʼö ita ba wangera-ngera Yehowa ba tafalua hadia zi tola mangomusoiʼö tödönia.