Taʼandrö Saohagölö ba Waʼebua Dödö Lowalangi

1, 2. (a) Tutunö gamaedola niʼogunaʼö Yesu sanandrösa khö zokhö kabu agu. (b) Hewisa gamaedola daʼa itutunö khöda sanandrösa ba waʼoböwö hegöi faʼebua dödö?

SIHULÖ wongi, samösa zokhö kabu agu möi ia ba fasa ba wangalui sohalöwö. Ifatunö hauga gazi, ba so ndra matua somasi mohalöwö ba kabunia andrö. Hizaʼi, börö me ambö khönia zohalöwö, ifuli möi ia ba fasa ba wangalui ndra matua sohalöwö khönia. Fawuʼu li ia wa ibeʼe gazira si tefaudu. Ba zi tanö owi, iʼowuloi ndra sohalöwö khönia ba ibeʼe gazira. Niha sohalöwö maʼö-maʼökhö hegöi si ha sambua za, ifagölösi wameʼe gazira. Hizaʼi, so zohalöwö maʼö-maʼökhö, lö omasi ia ba nifalua zokhö kabu. Andrö imane zokhö kabu, ’Hadia lö fao dödöu ba gazi nibeʼegu? Hadia tebai ubeʼe hauga manö gazi somasido ba zohalöwö khögu? Hadia afökhö dödöu börö me oböwö ndraʼo?’​—Mataiʼo 20:1-15

² Moroi ba waö-waö nitutunö Yesu, ifahaʼö ita hadia zabölö moguna sanandrösa ba ”waʼebua dödö” Yehowa.^[1] (Faigi gonönöta.) (Baso II Korindro 6:1.) Hewisa lalania? So zangumaʼö wa ndra matua sohalöwö maʼö-maʼökhö, sinangea itema gazi sebua moroi ba danö böʼö. Hizaʼi, sokhö kabu iforomaʼö waʼebua dödönia khö zohalöwö hewaʼae ha sambua za mohalöwö ia. Samösa niha satua-tua sangumaʼö wa ngawua wehede ”faʼebua dödö” ba Zura Niʼamoniʼö eluahania ”buala nibeʼe zi lö mangandrö sulö mazui buala nibeʼe khö zi samösa niha si tenga sinangeania itema.”

BUALA WAʼOBÖWÖ YEHOWA

3, 4. Hewisa wangoromaʼö Yehowa faʼebua dödönia ba niha gulidanö, ba hadia mbörö?

³ Ifatunö khöda Sura Niʼamoniʼö wa faʼebua dödö Lowalangi si tenga sinangea taʼokhögö no sambua ”mbuala”. (Efeso 3:7) Börö me lö moʼahonoa woloʼöda goi-goi Yehowa, andrö wa tenga sinangea tatema waʼebua dödö moroi khö Lowalangi. Sindruhunia, sinangea mate ita. Imane Razo Zelomo, ”Löʼö sa niha satulö ba gulidanö solau si sökhi lö olalöŵa.” (Zangombakha 7:20) Ba gafuriata imane Faulo, ”Noa sa ahori mamazökhi horö ira, ba löʼö sa si sökhi turiara khö Lowalangi” ba ”luo horö sa, ba faʼamate”.​—Roma 3:23; 6:23a.

⁴ Börö me iʼomasiʼö sibai niha gulidanö Yehowa, ibeʼe ’Nononia si ha sambua’ enaʼö mate ia salahida. Moroi ba waʼebua dödönia, daʼa nibeʼenia sabölö ebua. (Yohane 3:16) Itutunö Faulo wa Yesu andrö ”nifoʼaya lakhömi ba sumange, börö wamakao andrö, nitahania, faʼamate andrö, enaʼö itandra waʼamate, salahi niha fefu, balazi waʼebua dödö Lowalangi”. (Heberaiʼo 2:9) Atulö, ”ba buala faʼebua dödö Lowalangi andrö, ba no faʼauri si lö aetu ba khö Keriso Yesu, Soʼaya yaʼita.”​—Roma 6:23b.

5, 6. Hadia lua-luania na ifatörö ita (a) horö? (b) faʼebua dödö?

⁵ Hana wa tola so horöda ba mate ita? Imane Sura Niʼamoniʼö, ”Samösa sa mbörö, wa no salawa waʼamate.” Börö me ngaʼötö Gadamo ita, lua-luania lö moʼahonoa ita ba mate. (Roma 5:12, 14, 17) Hizaʼi, tola tafili enaʼö lö ifatörö ita horö. Hewisa lalania? Ba ginötö taforomaʼö wamati ba höli nibeʼe Keriso, taʼokhögö waʼebua dödö moroi khö Yehowa. Imane Sura Niʼamoniʼö, ”Ba ba zi no aʼoi so horö, ba mendrua manö wa no aʼoi so waʼahakhö dödö göi, enaʼö simane faʼabölö horö andrö, ba wamunu, simanö göi waʼabölö waʼahakhö dödö andrö, moroi ba wangaʼatulö andrö, ba waʼauri si lö aetu, börö Yesu Keriso, Soʼaya yaʼita.”​—Roma 5:20, 21.

⁶ Hewaʼae ba mbawa horö so ita, hizaʼi tola tatimbagö enaʼö böi ifatörö ita horö andrö. Ba ginötö tafalua zala, tola taʼandrö wangefa moroi khö Yehowa. Imane Faulo, ”Tenga sa barö mbaŵa goroisa so ami, no barö mbaŵa waʼahakhö dödö so ami.” (Roma 6:14) Hewisa wa tola tahalö khöda wamahaʼö moroi ba waʼebua dödö Lowalangi? Imane Faulo, ”Noa sa toʼele waʼebua dödö Lowalangi andrö . . . ifahaʼö ita, enaʼö taböhöli wa lö ba dödöda Lowalangi, awö wangisö andrö, ba gulidanö, ba enaʼö satua-tua ita, ba satulö tödö, ba soloʼö li Lowalangi, ba götö daʼe ba gulidanö.”​—Tito 2:11, 12.

FAʼEBUA DÖDÖ ”SI NO OYA NGAWALÖ ANDRÖ”

7, 8. Hadia geluahania faʼebua dödö Yehowa ”si no oya ngawalö andrö”? (Faigi gambara ba wamobörö wamahaʼö.)

⁷ Isura Fetero, ”Faoma mitolo nawömi, balazi hadia nitema zamösana buala andrö, simane niha si sökhi, nibeʼe faʼebua dödö Lowalangi andrö ba danga faʼebua dödö si no oya ngawalö andrö.” (I Fetero 4:10) Hadia geluahania faʼebua dödö Yehowa ”si no oya ngawalö andrö”? Eluahania, gofu hadia gabula dödö nitaögöda ba waʼauri, ibeʼe Yehowa hadia niʼogunaʼöda enaʼö lö faröi ita. (I Fetero 1:6) Lö mamalö-malö ibeʼe khöda wanolo si tefaʼudu niʼogunaʼöda ba ginötö so wanandraigö.

⁸ Isura Yohane, ”Me no manema ita fefu faʼebua dödö si lö aetu-aetu moroi ba zi no aʼoi so khönia.” (Yohane 1:16) Börö me oya lala nifalua Yehowa ba wangoromaʼö waʼebua dödönia, andrö wa tola oya tatema howu-howu. Hadia manö howu-howu andrö?

9. Hadia zi tola tatema moroi ba waʼebua dödö Yehowa, ba hewisa wa tola taʼandrö saohagölö ba daʼö?

⁹ Iʼefaʼö Yehowa horöda. Taʼandrö saohagölö ba waʼebua dödö Yehowa, börö me iʼefaʼö horöda. Hizaʼi, ifalua daʼö ha na tafalalini gera-erada ba lö mamalö-malö tatimbagö gisö-isö dödö si fasala. (Baso I Yohane 1:8, 9.) Itutunö Faulo khö ndra niha Keriso nibayoini ba götönia, hewisa wangefaʼö Yehowa zala. Imane, ”[Lowalangi] si no mangefaʼö yaʼita ba waʼabölö zogömi-gömi andrö, si no mamawuʼa yaʼita, si no molohe yaʼita ba mbanua Nono waʼomasinia andrö. Ba zi so khöda fangöhöli, fangefaʼö horö andrö.” (Kolose 1:13, 14) Taʼandrö sibai saohagölö ba waʼebua dödö Lowalangi, ba omasi ita wamosumange yaʼia. Ba börö me iʼefaʼö zalada Yehowa, andrö wa oya tatema howu-howu sahöli-höli dödö.

10. Hadia zi tola tatema börö waʼebua dödö Lowalangi?

¹⁰ Tola fahuwu ita khö Lowalangi. Börö me lö moʼahonoa ita, andrö iʼotarai me tumbu, no tobali ita nudu Lowalangi. Hizaʼi, imane Faulo, ”Na noa sa muʼatulö ita Lowalangi, ba waʼamate Nononia, me si faʼudu ita.” (Roma 5:10) Börö höli andrö, tola teʼatulöʼö ita khö Lowalangi ba tobali ita si fahuwu khönia. Itutunö Faulo daʼa hegöi amakhaitania ba waʼebua dödö Lowalangi khö ndra talifusö nibayoini, ”Me no satulö tödö ita, iwaʼö Lowalangi, balazi ba wamati, ba no atulö ita Lowalangi, börö Zoʼaya yaʼita, Yesu Keriso. Moroi khönia göi, wa tola taʼondrasi mege waʼebua dödö andrö, si lö tebulö khöda.” (Roma 5:1, 2) Taʼandrö sibai saohagölö börö me tola fahuwu ita khö Yehowa!

11. Hewisa ndra niha nibayoini wolohe ”mbiri-biri böʼö” ba waʼatulö?

¹¹ Tola atulö ita föna Lowalangi. Isura Danieli wa ba götö safuria dania, ”satua-tua” yaʼia daʼö niha nibayoini ”si no ato molohe ba waʼatulö”. (Baso Danieli 12:3.) Hewisa wamalua niha nibayoini? Laturiaigö duria somuso dödö ba lafahaʼö zuta ”mbiri-biri böʼö” ba goi-goi Yehowa. (Yohane 10:16) Daʼö zanolo yaʼira enaʼö atulö föna Lowalangi, ba alua daʼa ha börö waʼebua dödö Yehowa. Itutunö Faulo, ”Ba saoha gölö wa iwaʼö Lowalangi satulö ira, faʼebua dödönia, börö wangöhöli andrö, ba khö Keriso Yesu.”​—Roma 3:23, 24.

12. Hewisa gamakhaitania fangandrö ba faʼebua dödö Lowalangi?

¹² Tola ahatö ita khö Lowalangi ba wangandrö. Tola mangandrö ita khö Yehowa börö waʼebua dödönia. Itutunö Faulo wa dadaoma Yehowa andrö no ”dadaoma waʼahakhö dödö”, ba ikaoni ita enaʼö tahatöʼö ita ba ”böi aiwö”. (Heberaiʼo 4:16a, NW) Tola mangandrö ita ero inötö ba döi Yesu. Daʼa sambua töi sebua khöda! Imane Faulo, ”Lö aiwö, awö lala, ba wanötöna, moroi ba wamati andrö khönia.”​—Efeso 3:12.

13. Hewisa waʼebua dödö andrö ”wanolo yaʼita ba ginötö si tefaudu”?

¹³ Tola tasöndra wanolo ba ginötö si tefaudu. Iʼoʼou ita Faulo enaʼö mangandrö ita khö Yehowa ero so gabula dödöda, ”enaʼö tatema waʼahakhö dödö, ba enaʼö falukha ita waʼebua dödö, fanolo na baŵa moguna”. (Heberaiʼo 4:16b) Ero tataögö gabula dödö ba waʼaurida, tola taʼandrö wanolo moroi khö Yehowa. Ba ifondro-ndrongo wangandröda Yehowa, hewaʼae na tenga sinangea ifalua daʼö. Asese iʼogunaʼö ndra talifusöda ba wamati ba wameʼe fanolo khöda. Itema wangandröda Yehowa, ”tobali tola abeʼe dödöda wangumaʼö: ’Yehowa zanolo yaʼo, lö ataʼu ndraʼo. Hadia nilau niha khögu?’”—Heberaiʼo 13:6, NW.

14. Hewisa tola terara dödöda börö waʼebua dödö Yehowa andrö?

¹⁴ Tola terara dödöda. Daʼa sambua howu-howu sebua wondrara dödö nibeʼe Yehowa khöda ba ginötö tataögö gabula dödö. (Sinunö 51:19) Me latandraigö niha Keriso ba Desalonika, isura Waulo, ”Ba yaʼia, Soʼaya yaʼita, Yesu Keriso ba Lowalangi, Amada, si no mangomasiʼö yaʼita, ba si no mameʼe fondrara dödö khöda, si lö aetu, awö wanötöna si sökhi ba waʼebua dödö, ba yamurara dödömi ba yamuʼaroʼö.” (II Tesalonika 2:16, 17) Terara dödöda börö me taʼila waʼebua dödö Yehowa andrö, iʼomasiʼö ba iʼameʼegö tödö ita!

15. Börö waʼebua dödö Lowalangi, hadia wanötöna nitemada?

¹⁵ So khöda wanötöna faʼauri si lö aetu. Börö me niha si so horö ita, lö khöda dötö nafö na lö itolo ita Yehowa. (Baso Zinunö 49:8, 9.) Hizaʼi, ibeʼe khöda Yehowa wanötöna sahöli-höli dödö. Hadia daʼö? Imane Yesu, ’Somasi Namagu, enaʼö so waʼauri si lö aetu khö zangila Ono fefu, samati khönia.’ (Yohane 6:40) Andrö, so khöda wanötöna faʼauri sagötö faʼara börö me so waʼebua dödö Yehowa. Imane Faulo, ”Noa sa toʼele waʼebua dödö Lowalangi andrö, sangorifi niha fefu.”​—Tito 2:11.

BÖI OGUNAʼÖ WAʼEBUA DÖDÖ YEHOWA BA WAMALUA ZALA

16. Hewisa niha Keriso si föföna laʼogunaʼö waʼebua dödö Lowalangi ba wamalua zala?

¹⁶ Oya howu-howu nitemada ba waʼebua dödö Yehowa andrö. Hizaʼi, böi tamane wangumaʼö, börö waʼebua dödönia andrö tola manö tafalua zala. Moroi ba gotalua niha Keriso si föföna, so ’zangogunaʼö waʼebua dödö Lowalangida andrö . . . Ba wamalua horö’. (Yuda 4, NW) Niha Keriso sifaröi andre, so ba wangera-ngerara wa tola manö lafalua horö börö me hasambalö iʼefaʼö zalara Yehowa. Ladönisi göi dödö ndra talifusö tanö böʼö, enaʼö fao ira ba wamalua horö andrö. Iadaʼa, haniha manö zamalua daʼö no ”iʼosiwawöi geheha faʼebua dödö andrö”.​—Heberaiʼo 10:29.

17. Hadia mene-mene nibeʼe Fetero?

¹⁷ Ba ginötö iadaʼa, iʼogunaʼö Satana lala daʼö enaʼö so ba wangera-ngera niha Keriso wa tola manö lafalua zala börö me hasambalö iʼefaʼö zalara Yehowa. Sindruhu wa iʼefaʼö Yehowa zala niha na lafalalini gera-erara. Hizaʼi, omasi ia na tatimbagö gisö-isö dödöda ba wamalua horö. Ibeʼe geheha khö Wetero Yehowa ba wanura, ”Ba yaʼami niʼomasiʼö, me no tohöna miʼila, ba miʼangelama, fa lö adöni ami göi ba waʼelungu zi lö moloʼö andrö, ba fa lö tebulö ami ba waʼaromi andrö. Ba yatedou khömi waʼebua dödö andrö, ba faʼaboto ba dödömi Soʼaya yaʼita Yesu Keriso.”​—II Fetero 3:17, 18.

BÖRÖ WAʼEBUA DÖDÖ, SO HALÖWÖ SINANGEA TAFALUA

18. Börö waʼebua dödö Yehowa, hadia halöwö niʼokhögöda?

¹⁸ Taʼandrö sibai saohagölö ba waʼebua dödö Yehowa. Andrö, taʼogunaʼö howu-howu nitemada ba wamosumange Yehowa hegöi ba wanolo niha böʼö. Moʼömö ita khöra. Hewisa tola taʼogunaʼö howu-howu andrö? Imane Faulo, ”Ba no faehu gameʼela andrö khöda, balazi waʼebua dödö andrö si no falukha ita, . . . ba na so zi so halöwö, ba yamuhaogö halöwönia, ba na famahaʼö ba yamamahaʼö, ba na famarou tödö, ba yamufarou dödö niha, . . . ba na sahakhö tödö, ba yamoroi ba dödönia.” (Roma 12:6-8, NW) Andrö, börö waʼebua dödö Yehowa moguna göi owölö-ölö ita ba halöwö fanuriagö, wamahaʼö niha ba Zura Niʼamoniʼö, mamarou dödö ndra talifusöda ba wamati, hegöi ba wangefaʼö zala niha zangafökhöiʼö dödöda.

19. Hadia halöwö nitutunöda ba migu föna?

¹⁹ No oya howu-howu nitemada börö waʼebua dödö Yehowa, ba tola tafalua zabölö sökhi yaʼia daʼö ”famaduhuʼö turia somuso dödö, turia waʼebua dödö Lowalangi andrö”. (Halöwö Zinenge 20:24) Tatutunö halöwö daʼa ba wamahaʼö migu fönada.