Fazaewe Turia Somuso Dödö sanandrösa ba Waʼebua Dödö
”Famaduhuʼö turia somuso dödö, turia waʼebua dödö Lowalangi andrö.”—HALÖWÖ ZINENGE 20:24.
1, 2. Hewisa wangoromaʼö Waulo wa iʼandrö saohagölö ba waʼebua dödö Lowalangi?
SI FAO faʼatulö dödö imane Faulo, ”Ba tenga zaya-zaya gölö waʼebua dödö [Lowalangi].” (Baso I Korindro 15:9, 10.) Sindruhu-ndruhu iʼila Waulo wa tebai itema waʼahakhö dödö Lowalangi. Börö me föna no tobali ia solohi ndra niha Keriso.
2 Me arakhagö mate Waulo, isura khö Dimoteo, ”Uʼandrö saohagölö khö Keriso Yesu, Soʼaya yaʼita, sangabölöʼö yaʼo, me no iwaʼö tödönia, lö faröi ndraʼo, me ifataro ndraʼo ba halöwö andrö.” (I Timoteo 1:12-14) Hadia halöwö andrö? Itutunö Faulo khö ndra satua sokubaloi ba mbanua niha Keriso si so ba Efeso, ”Ba lö ba dödögu nosogu, lö itörö ligu naʼi, ba wangoʼozui lalagu, awö halöwögu andrö, nitemagu khö Zoʼaya, Yesu, famaduhuʼö turia somuso dödö, turia waʼebua dödö Lowalangi andrö.”—Halöwö Zinenge 20:24.
3. Hadia halöwö sebua nibeʼe khö Waulo? (Faigi gambara ba wamobörö wamahaʼö.)
3 Hadia ”turia somuso dödö” nituriaigö Waulo, ba hewisa wa oroma waʼebua dödö Yehowa ba daʼö? Imane Faulo khö ndra niha Keriso ba Efeso, ”No mirongo nihonogöi Lowalangi, ba waʼebua dödönia andrö, nibeʼe ba dangagu, ba khömi andrö.” (Efeso 3:1, 2) Iʼandrö Yesu khö Waulo enaʼö ituriaigö duria somuso dödö andre khö zi tenga niha Yahudi. Iadaʼa, niha ba ngawalö soi tola fao ira ba wamatörö Mbanua Lowalangi nifatörö Mesia. (Baso Efeso 3:5-8.) Owölö-ölö Waulo ba wanuriagö ba tobali ia duma-duma khö ndra niha Keriso iadaʼa. Iforomaʼö wa faʼebua dödö Lowalangi andrö tenga ”si lö eluaha” mazui si lö guna khönia.
HADIA FAʼEBUA DÖDÖ LOWALANGI ZAMAROU YAʼUGÖ?
4, 5. Hana wa tola tawaʼö ”turia somuso dödö ba Mbanua Lowalangi” fagölö ia ba duria somuso dödö ba ”waʼebua dödö Lowalangi”?
4 Ba götö safuria andre, so halöwö nono mbanua Yehowa ba wanuriaigö ”Mbanua Lowalangi andrö, turia somuso dödö, ba gulidanö misa, maʼasagörö, ba wamaduhuʼö ba niha fefu.” (Mataiʼo 24:14) Turia somuso dödö ba Mbanua Lowalangi fagölö ia ba ”turia somuso dödö ba waʼebua dödö Lowalangi”. Hewisa wa tola? Börö me fefu howu-howu nitemada moroi ba Mbanua Lowalangi no faʼebua dödö Lowalangi daʼö. (Efeso 1:3) Owölö-ölö Waulo weʼamöi manuriaigö ba wangoromaʼö fangandrö saohagölönia börö waʼebua dödö Yehowa. Hadia tola taʼoʼö simane nifalua Waulo?—Baso Roma 1:14-16.
5 Ba wamahaʼö migu silalö, aboto ba dödöda hewaʼae niha si so horö ita, tola tatema howu-howu moroi ba waʼebua dödö Yehowa ba ngawalö lala. Börö me no oya tatema howu-howu, so zi tobali halöwöda yaʼia daʼö wamahaʼö niha böʼö sanandrösa hewisa Yehowa wangoromaʼö faʼomasinia, ba hewisa göi tola latema mbuania. Hadia lala zi tola tafalua ba wanolo niha böʼö wangandrö saohagölö ba waʼebua dödö Lowalangi?
FAZAEWE TURIA SOMUSO DÖDÖ SANANDRÖSA BA HÖLI ANDRÖ
6, 7. Me tatutunö ba niha böʼö sanandrösa ba höli andrö, hewisa tola tafazaewe duria somuso dödö ba waʼebua dödö Lowalangi?
6 Iadaʼa, ato niha zi lö mangila wa fasala ira na lafalua horö. Andrö wa lö laʼila wa moguna khöra höli. Ba ginötö si fagölö göi, itugu ato niha saboto ba dödö wa lö ohahau dödöra ba lala waʼaurira. Ba me fahuhuo ira khö ndra Samaduhuʼö Yehowa, ato zi lö mangila hadia horö andrö, hadia lua-luania khöda, ba hadia zi nangea tafalua enaʼö böi iʼosawuyu ita horö. Me laʼila hadia geluaha horö andrö, laʼandrö saohagölö niha satulö tödö, börö me no ibeʼe Yehowa Nononia ba gulidanö enaʼö teʼefaʼö ita moroi ba horö ba faʼamate. Ifalua daʼa Yehowa börö waʼomasinia ba waʼebua dödönia.—I Yohane 4:9, 10.
7 Osisiʼö hadia niwaʼö Waulo sanandrösa khö Nono niʼomasiʼö Yehowa, ”Ba daʼö so khöda wangöhöli andrö, ba ndronia, fangefa lalö andrö, dali wa no aʼoi so waʼebua dödönia [Yehowa].” (Efeso 1:7) Höli nibeʼe Keriso andre, no tandra sebua ba waʼomasi Lowalangi khöda, ba daʼa göi dandra waʼebua dödönia sahöli-höli dödö. Daʼa sambua fanolo, samahaʼö yaʼita wa na mamati ita ba höli Yesu, tola teʼefaʼö horöda ba tola taʼokhögö dödö side-ide si lö sinegu! (Heberaiʼo 9:14) Tatu manö, daʼa duria somuso dödö sinangea tafaʼema ba niha böʼö!
BEʼE WANOLO BA NIHA ENAʼÖ TOBALI IRA SI FAHUWU KHÖ LOWALANGI
8. Hana wa moguna teʼatulöʼö niha si so horö khö Lowalangi?
8 Na so niha si lö mamati ba höli Yesu, no tobali ia nudu Lowalangi. Andrö, so halöwöda ba wamaʼema khöra wa tola tobali ira si fahuwu khö Lowalangi. Isura Yohane, ”Khö zamati khö Nono andrö so waʼauri si lö aetu, lö iʼila dania waʼauri si lö mamati khö Nono andrö, lö tebulö wönu Lowalangi khönia.” (Yohane 3:36) Omuso dödöda börö me höli Keriso andrö tola tobali ita si fahuwu khö Lowalangi. Itutunö Faulo, ”Me no fabali ami föna, me no faʼudu ami, ba gera-erami, ba mbua-mbuami andrö, si lö sökhi, ba no iʼatulöʼö ami iadaʼe, faʼamate andrö, ba mboto nösinia andrö.”—Kolose 1:21, 22.
Mohalöwö ita ba wamaʼema ba niha wa tola tobali ira si fahuwu khö Lowalangi
9, 10. (a) Hadia halöwö nibeʼe Keriso khö ndra talifusönia nibayoini? (b) Hewisa ”mbiri-biri böʼö” ba wanolo niha nibayoini?
9 Ibeʼe Keriso khö ndra talifusönia nibayoini ba gulidanö ”halöwö fangatulö”. Itutunö Faulo khöra, ”Fefu daʼö, ba moroi ba Lowalangi, si no mangatulöʼö yaʼita khönia, ba khö Yesu Keriso, si no mameʼe göi khöda halöwö fangatulö andrö. Lowalangi sa zi no mangatulöʼö khönia ösi gulidanö, ba khö Keriso, lö ibeʼe ömöra lalöra andrö, ba no ibeʼe ba dödöma Daromali andrö ba wangatulö andrö. Ba no sinenge ndraʼaga, salahi Keriso, hulö na Lowalangi zamarou tödö niha, ba lima andrö, mangandrö ndraʼaga, salahi Keriso, mamane: ’Mifaʼatulöʼögö ami khö Lowalangi.’”—II Korindro 5:18-20.
10 No halöwö sebua khö ndra ”mbiri-biri böʼö” ba wanolo niha nibayoini ba wamalua halöwö fanuriaigö. (Yohane 10:16) Tobali ”nifatenge” mazui ”niʼoʼou” khö Keriso ”mbiri-biri böʼö” ba lafalua halöwö sabölö ebua, yaʼia daʼö halöwö fanuriaigö, ba wamahaʼö sindruhu ba niha hegöi ba wanolo yaʼira enaʼö tobali si fahuwu khö Yehowa. Manolo niha tobali si fahuwu khö Yehowa no halöwö sabölö moguna ba wanuriaigö turia somuso dödö ba waʼebua dödö Lowalangi.
FAHAʼÖ NIHA WA YEHOWA SAMONDRO-NDRONGO FANGANDRÖ
11, 12. Hana wa no turia somuso dödö ba niha na lafahaʼö ira wa tola mangandrö ira khö Yehowa?
11 Ato niha mangandrö ira börö daʼö zameʼe ohahau dödöra, hizaʼi lö sindruhu-ndruhu faduhu dödöra wa ifondro-ndrongo Lowalangi wangandröra. Moguna aboto ba dödöra wa Yehowa andrö ”Samondro-ndrongo fangandrö.” Isura Dawido, ”Samondro-ndrongo fangandrö ndraʼugö, dozi niha mangondrasi yaʼugö. No ilangö ndraʼo ngawalö golalöwa, ba salama andrö, ba yaʼugö zangefaʼö.”—Zinunö 65:3, 4.
Ba ginötö tafahaʼö niha hewisa lala wangandrö sindruhu, tatolo ira tobali si fahuwu khö Yehowa
12 Itutunö Yesu khö ndra nifahaʼönia, ”Na so hadia manö niʼandrömi khö Nama, ba ibeʼe khömi ba döigu.” (Yohane 16:23, NW) Eluahania tola taʼandrö ”hadia manö” zi tefaudu ba gohitö dödö Yehowa. Isura Yohane, ”Daʼö wa lö aiwö, si so khöda ba khönia: na so niʼandröda, hadia ia, si faudu ba zomasi ia, ba ifondro-ndrongo khöda.” (I Yohane 5:14) Omuso sibai dödöda börö me tatolo niha enaʼö aboto ba dödöra wa fangandrö andre tenga ha mameʼe faʼohahau dödö, hizaʼi daʼa lala enaʼö lahatöʼö ira ba ”Dadaoma waʼahakhö dödö” Yehowa! (Heberaiʼo 4:16, NW) Ba ginötö tafahaʼö niha hewisa lala wangandrö sindruhu, haʼökhö mufaʼema ia, ba hadia zi nangea laʼandrö, tatolo ira tobali si fahuwu khö Yehowa, ba tola terara dödöra na so gabula dödö.—Zinunö 4:2; 145:18.
FAʼEBUA DÖDÖ BA GULIDANÖ SI BOHOU
13, 14. (a) Hadia halöwö sebua sahöli-höli dödö khö ndra niha nibayoini ba götö si so föna? (b) Hadia halöwö sahöli-höli dödö nifalua niha nibayoini ba niha gulidanö?
13 Abölö oya iʼoromaʼö Yehowa waʼebua dödönia ”ba götö si so föna”. Hewisa wa tola? Ibeʼe Yehowa halöwö sebua sahöli-höli dödö khö zi 144.000 niha samatörö awö Keriso ba zorugo. Itutunö Faulo hadia halöwö sebua andrö, imane, ”Lowalangi andrö, si no aʼoi so faʼahakhö dödö, ba waʼomasinia andrö, si no fahöna, faʼomasinia ita, he me no si mate ita, ba golalöwa andrö, ba no iʼorifi ita, awö Keriso—faʼahakhö dödö, wa no auri ami—ba no ifao wanusugi yaʼita ba famawuʼa yaʼita, famaʼaso yaʼita ba mbanua zorugo, ba khö Keriso Yesu.”—Efeso 2:4-7, NW.
14 Abua wokhalaigö ngawalö sahöli-höli dödö nihenaigö Yehowa khö ndra niha Keriso nibayoini, ba ginötö mamatörö ira awö Keriso ba zorugo. (Luka 22:28-30; Filifi 3:20, 21; I Yohane 3:2) Yehowa, ”Iʼoromaʼö ba götö si so föna waʼahakhö dödönia andrö, si no aʼoi so, si no fahöna” khöra. Yaʼira si so ba lala si tohude. Yaʼira andre ”Yeruzalema si bohou” ono alawe nihalö khö Keriso. (Famaʼeleʼö 3:12; 17:14; 21:2, 9, 10) Fao ira wohalöwö khö Yesu ba ’wamadöhö wökhö soi niha baero’. Latolo niha gulidanö enaʼö teʼefaʼö ira moroi ba horö ba faʼamate hegöi ba wanolo yaʼira enaʼö moʼahonoa.—Baso Famaʼeleʼö 22:1, 2, 17.
15, 16. Hewisa wangoromaʼö Yehowa faʼebua dödönia khö ”mbiri-biri böʼö” ba götö si so föna?
15 Itutunö ba Efeso 2:7, wa iʼoromaʼö Lowalangi waʼebua dödönia ”ba götö si so föna”. Ba ginötö daʼö göi, niha si so ba gulidanö larasoi ”waʼahakhö dödönia andrö, si no aʼoi so, si no fahöna”. (Luka 18:29, 30) So sambua nifalua Yehowa sahöli-höli dödö zangoromaʼö faʼebua dödönia ba gulidanö yaʼia daʼö wanusugi niha moroi ba ”lewatö”. (Yohane 5:28, 29) Haniha nisusugi? Niha si lö faröi si no mate fatua lö mate Keriso hegöi ”mbiri-biri böʼö” si lö faröi khö Yehowa ba luo safuria. Fefu niha si lö faröi andre, ifuli tesusugi ira ba wamosumange Yehowa.
16 Zuta niha si no mate fatua lö laʼila haniha Lowalangi, ba tesusugi göi ira. Isura Yohane, ”Ba uʼila zi no mate fefu, he satua, ba he iraono, föna dadaoma andrö so ira, ba tebokai zura; ba tebokai zura böʼö, yaʼia zura waʼauri andrö. Ba tehuku si mate andrö, balazi nisura ba zura andrö, dali mbua-buara. Ba ibeʼe baero asi zi mate andrö khönia, ba faʼamate andrö, ba lewatö, ba labeʼe baero zi mate andrö, khöra, ba tehuku, dali mbua-buara zamösana.” (Famaeleʼö 20:12, 13, NW) Niha nisusugi, tola lafahaʼö ira sanandrösa khö Yehowa ba wamaduhuʼö famatörönia. Moguna lafahaʼö ira ba laʼoʼö goi-goi Zura Niʼamoniʼö hegöi fanuturu lala si so ba ”ngaʼölu zura”. Fanuturu lala si bohou andre zangoromaʼö faʼebua dödö Yehowa.
BÖI BÖHÖLI WANURIAIGÖ TURIA SOMUSO DÖDÖ
17. Hadia zi nangea tatörö tödöda na möi ita manuriaigö?
17 Iadaʼa, itugu moguna halöwö fanuriagö turia somuso dödö sanandrösa ba Mbanua Lowalangi, börö me no ahatö luo andrö! (Mareko 13:10) Moguna tatörö tödöda hadia gohitö dödöda na möi ita manuriaigö, yaʼia daʼö wa mosumange Yehowa. Hewisa wa tola tafalua daʼö? Moguna taʼombakhaʼö ba niha hadia howu-howu nitemada si tola mangomusoiʼö dödöda ba gulidanö si bohou, ba tola taʼokhögö daʼö ha börö waʼebua dödö Yehowa sahöli-höli dödö.
Böi mamalö-malö ba wamosumange, hulö simane ”niha si sökhi, nibeʼe faʼebua dödö Lowalangi”.—I Fetero 4:10 (Faigi ngenoli si 17-19)
18, 19. Hewisa wa mosumangeda faʼebua dödö Yehowa andrö?
18 Ba ginötö manuriaigö ita ba niha, tola tatutunö khöra na mamatörö Mbanua Keriso dania, lasöndra howu-howu niha moroi ba höli ba itugu ara tobali moʼahonoa ira. Imane Sura Niʼamoniʼö, ”Nifazökhi Lowalangi andrö, niʼefaʼö ba wangosawuyu waʼatekiko andrö, ba wolohe yaʼia ba waʼaefa nono Lowalangi andrö, si so lakhömi.” (Roma 8:21) Tola alua daʼa ha börö waʼebua dödö Yehowa.
19 Tatema halöwö sebua yaʼia daʼö wamaʼema ba niha fefu sanandrösa ba zi no ifabuʼu sahöli-höli dödö si so ba Famaʼeleʼö 21:4, 5, ”[Lowalangi] iʼosi dania daŵa hörö fefu ba höröra, ba lö faʼamate saʼae, ba lö faʼabu dödö, ba lö fegeʼege, ba lö faʼafökhö saʼae, me no numalö zi föföna andrö”. Ba Yehowa zi dadao ba dadaoma andrö, imane, ”Hiza, ubohoini fefu hadia ia!” Imane nasa, ”Tanö ba zura, me si lö tebulö ba me no sindruhu Daromali andre”. Ba ginötö lö mamalö-malö ita ba wanuriaigö turia somuso dödö ba niha, sindruhu-ndruhu tafosumange waʼebua dödö Yehowa!