Laʼefasi Ira moroi ba Agama Sofaya

1. Hewisa tola taʼila wa teʼefaʼö nono mbanua Lowalangi moroi ba Mbabilona Sebua, ba hadia manö wanofu-nofu sinangea tabeʼe wanema li?

BA WAMAHAʼÖ migu silalö, tafahaʼö ita wa niha Keriso si lö faröi laʼohe ira ba Mbabilona Sebua. Hizaʼi, so duria somuso dödö, lö laʼohe ira ba daʼö sagötö faʼara. Taʼila daʼa moroi ba Zura Niʼamoniʼö. Iʼoʼou nono Mbanuania Lowalangi enaʼö ’laheta’ ira moroi ba gangorudua agama-agama sofaya ba zi sagörö ulidanö. (Baso Famaʼeleʼö 18:4.) Daʼa zangoromaʼö wa teʼefaʼö niha Keriso ba Mbabilona Sebua. Omasi sibai ita taʼila hamega alua daʼö! Hizaʼi, si föföna moguna tabeʼe wanema li ba wanofu-nofu andre: Hadia gohitö dödö Ono Zekola ba Zura Niʼamoniʼö sanandrösa ba Mbabilona Sebua fatua lö döfi 1914? Hawaʼebua waʼomasi ndra talifusö ba weʼamöi manuriaigö sagötö Wasuwöta Gulidanö I? Hadia laʼohe nono mbanua Lowalangi ba Mbabilona me götö daʼö börö me moguna labeʼe khöra wanegu?

”ADUDU MBABILONA”

2. Hadia gohitö dödö Ono Zekola ba Zura Niʼamoniʼö fatua lö alua Wasuwöta Gulidanö I?

² Ba zi hauga fakhe fatua lö alua Wasuwöta Gulidanö I (1914-1918), Charles Taze Russell hegöi Ono Zekola ba Zura Niʼamoniʼö tanö böʼö, laʼila wa lö hadöi gereja samahaʼö sindruhu ba Zura Niʼamoniʼö. Andrö lö omasi ira fao ba agama sofaya andrö. Me döfi 1879, itutunö Zionʼs Watch Tower wa fefu gereja lawaʼö wa yaʼira andre niʼowalu si lö faröi khö Keriso. Hizaʼi, latuhini göi ndra samatörö ba sindruhunia no si fao ba Mbabilona Sebua ira. Ifotöi ira Sura Niʼamoniʼö si tobali sohorö.—Baso Famaʼeleʼö 17:1, 2.

3. Hadia nifalua Ono Zekola ba Zura Niʼamoniʼö sangoromaʼö wa lö fao ira saʼae ba agama sofaya? (Faigi gambara ba wamobörö wamahaʼö.)

³ Ira matua hegöi ira alawe si lö faröi, laʼila wa na latuhuni agama sofaya, lö ifahowuʼö ira Lowalangi. Andrö, ato moroi ba gotaluara lafaʼoheʼö zura ba gereja ba wangombakha wa laheta ira moroi ba daʼö. So ösa zombaso samösa zura andrö föna niha sato ba gereja. Na lö latehe khöra ba wombaso sura andrö, lafaʼoheʼö ia ba niha fefu si so ba gereja andrö. Laforomaʼö Ono Zekola ba Zura Niʼamoniʼö wa lö omasi ira fao saʼae ba agama sofaya! Na lafalua daʼa ba ndröfi-dröfi silalö, tola manö labunu ira. Hizaʼi me döfi 1870, ato ndra samatörö si lö faʼawö saʼae ba gereja simane si no lafalua mböröta. Andrö, lö ataʼu niha fahuhuo sanandrösa ba Zura Niʼamoniʼö ba tola göi lö fao dödöra ba wamahaʼö ba gereja.

4. Sagötö Wasuwöta Gulidanö I, hadia nifalua Nono Zekola ba Zura Niʼamoniʼö sanandrösa ba Mbabilona Sebua? Tutunö.

⁴ Aboto ba dödö Ono Zekola ba Zura Niʼamoniʼö wa lö ibönö na ha latutunö ba nösi nomora, awöra, hegöi niha ba gereja wa lö fao ira saʼae ba agama sofaya. Omasi ira na fefu niha ba zi sagörö ulidanö laʼila wa Babilona Sebua andrö agama sofaya si no muʼoʼamaedolagö simane sohorö! Andrö, iʼotarai mbaŵa si Felendrua 1917 irugi mböröta döfi 1918, ngahönö Nono Zekola ba Zura Niʼamoniʼö lafazaewe 10.000.000 risalah sanandrösa ba duho ”The Fall of Babylon” (Kejatuhan Babilon). Si fao faʼabarani, itutunö risalah andrö sanandrösa ba wamahaʼö gereja si fasala. Simane nikhalaigöda, mofönu sibai ndra sondröniaʼö ba gereja! Hizaʼi, lö laböhöli Ono Zekola ba Zura Niʼamoniʼö. Laʼosambuaʼö dödöra enaʼö lö laböhöli wanuriaigö ba laʼoʼö ”Lowalangi, moroi ba woloʼöda ba niha.” (Halöwö Zinenge 5:29) Hadia niforomaʼö khöda moroi ba zalua andre? Daʼa zangoromaʼö wa lö laʼohe ira matua hegöi ira alawe niha Keriso ba Mbabilona me götö Wasuwöta Gulidanö I. Hizaʼi, me götö daʼö laforege enaʼö teʼefaʼö ira moroi ba agama sofaya ba latolo niha böʼö ba wamalua daʼö göi.

OWÖLÖ-ÖLÖ SAGÖTÖ WASUWÖTA GULIDANÖ I

5. Hadia mbörö wa tola tawaʼö wa owölö-ölö ndra talifusöda sagötö Wasuwöta Gulidanö I?

⁵ Me mböröta, taʼila wa sagötö Wasuwöta Gulidanö I, lö omuso dödö Lowalangi ba nono mbanuania börö me lö owölö-ölö ira ba wanuriaigö. Börö daʼö, faduhu dödöda wa itehegö Yehowa laʼohe ira ba Mbabilona Sebua ba zi hauga fakhe. Hizaʼi, ira talifusöda samosumange Lowalangi si lö faröi iʼotarai 1914 irugi 1918, ba gafuriata latutunö wa yaʼira si tobali sambua ngawawa, no laforege enaʼö lö laböhöli ba wanuriaigö. Na abölö oya taʼila sanandrösa ba zalua khö Nono Zekola ba Zura Niʼamoniʼö me götö daʼö, tola abölö aboto ba dödöda hadia zalua nisura ba Zura Niʼamoniʼö.

6, 7. (a) Hadia manö wanandraigö nitaögö Nono Zekola ba Zura Niʼamoniʼö sagötö Wasuwöta Gulidanö I? (b) Hadia zangoromaʼö wa owölö-ölö Nono Zekola ba Zura Niʼamoniʼö?

⁶ Sindruhunia, sagötö Wasuwöta Gulidanö I, owölö-ölö sibai Nono Zekola ba Zura Niʼamoniʼö weʼamöi manuriaigö. Hizaʼi lataögö wanandraigö. Datatutunö hadia zi dombua ngawalö andrö. Si föföna, lö laʼila Ono Zekola ba Zura Niʼamoniʼö hewisa lala wanuriaigö na ha Sura Niʼamoniʼö niʼogunaʼöra. Si toʼölönia, labeʼe mbuku ba niha, ba mbuku daʼö zanutunö sindruhu khöra. Andrö, ba ginötö lö itehe samatörö mbuku The Finished Mystery (Rahasia yang Tergenap) me mböröta ndröfi 1918, abua khö ndra talifusöda weʼamöi manuriaigö. Si dua, me götö daʼö so wökhö flu Spanyol. Fökhö sabölö-bölö andre alio göna ba niha irege abua khö ndra talifusöda weʼamöi misa hegöi manuriaigö. Hewaʼae lataögö daʼö, laforege Ono Zekola ba Zura Niʼamoniʼö enaʼö lö laböhöli wanuriaigö.

⁷ Me döfi 1914, Ono Zekola ba Zura Niʼamoniʼö si lö atoto andre lafuta ”Drama Foto Penciptaan”. Video andre, angorudua gambara hegöi film si so li. Daʼa zi bohou me götö daʼö. Itutunö Drama andrö waö-waö niha iʼotarai me tewöwöi Gadamo irugu awai Wamatörö Keriso. Me döfi 1914, me lafuta video andrö si föföna sibai so töra 9.000.000 niha samaigi. Khalaigö atö. Abölö ato ira moroi ba waʼato ndra Samaduhuʼö Yehowa ba zi sagörö ulidanö iadaʼa! Moloʼö gangombakhata tanö böʼö, me döfi 1916 töra 809.000 sangondrasi angowuloa ba Amerika Serikat, ba me döfi 1918 monönö irugi arakhagö 950.000 niha. Sindruhu-ndruhu owölö-ölö Nono Zekola ba Zura Niʼamoniʼö!

8. Hewisa ndra talifusöda sangai halöwö laʼaroʼö dödö Nono Zekola ba Zura Niʼamoniʼö sagötö Wasuwöta Gulidanö I?

⁸ Sagötö Wasuwöta Gulidanö I, ira talifusö sangai halöwö laforege ba wangaʼasogö lektur Zura Niʼamoniʼö hegöi ba wamarou tödö fefu Ono Zekola ba Zura Niʼamoniʼö. Fotuhini si fao faʼomasi andre zangaʼaroʼö yaʼira irege lö aetu owölö-ölö ira ba wanuriaigö. Samösa sanuriaigö sowölö-ölö me götö daʼö sotöi Richard H. Barber imane, ”Mofozu halöwöma ba wamaʼanö lala enaʼö lö aetu laʼondrasi mbanua niha Keriso ira satua samasui hegöi enaʼö tehenaigö majalah The Watch Tower ba tola lafaʼoheʼö ba Kanada hewaʼae lö latehe ba daʼö.” Imane nasa, ”Omuso sibai dödögu wanemaʼö halöwö ba wamaʼoheʼö mbuku The Finished Mystery side-ide sonaha ba nono kandre khö ndra talifusö si no lahalö mbukura ira samatörö. Iʼandrö khöma Rutherford ba wamalua kebaktian ba mbanua-banua ba Amerika Serikat tanö ba gaekhula hegöi ba wamatenge solohe huhuo ba wamarou dödö ndra talifusöda.”

SO ÖSA ZINANGEA LATEGU

9. (a) Hadia mbörö wa moguna labeʼe wanegu ba nono mbanua Lowalangi iʼotarai me döfi 1914 irugi 1919? (b) Hewaʼae moguna labeʼe khöra wanegu, hizaʼi hadia zi tebai tawaʼö?

⁹ So zinangea lategu khö Nono Zekola ba Zura Niʼamoniʼö. Lö aboto sibai ba dödöra sanandrösa ba niwaʼö Yehowa enaʼö laʼoʼö niwaʼö ndra samatörö. (Roma 13:1) Daʼö mbörö wa yaʼira si no tobali sambua ngawawa, ha ifataria lö fao ira ba wasuwöta. Duma-dumania, me 30 mbaŵa si Lima 1918, iʼandrö presiden Amerika Serikat ba nono mbanuania enaʼö mangandrö ira sanandrösa ba waʼatulö. The Watch Tower ifarou dödö Nono Zekola ba Zura Niʼamoniʼö enaʼö fao ira ba wangandrö. So ösa ndra talifusöda zameʼe dolo-tolo ba wotuhini wasuwöta, ba so moroi ba gotaluara si tobali saradadu ba fao ira ba wasuwöta. Hewaʼae moguna labeʼe khöra wanegu, tenga daʼö geluahania wa daʼö dani irege laʼohe ira ba Mbabilona Sebua. Sindruhunia, no arakhagö teʼefaʼö ira moroi ba gangorudua agama-agama sofaya ba zi sagörö ulidanö sagötö Wasuwöta Gulidanö I.—Baso Luka 12:47, 48.

10. Hewisa wangoromaʼö Ono Zekola ba Zura Niʼamoniʼö wa laʼameʼegö tödö waʼauri?

¹⁰ Atulösa wa lö aboto sibai ba dödö Nono Zekola ba Zura Niʼamoniʼö hadia geluaha ba niha Keriso lö faʼawö ba politik. Hizaʼi, aboto ba dödöra wa fasala na labunu niha. Andrö, hewaʼae so ösa dalifusöda si tobali saradadu hegöi solohe wana sagötö Wasuwöta Gulidanö I, hizaʼi lö omasi ira labunu nawöra niha irege so ösa moroi ba gotaluara labeʼe tanö föna ba wasuwöta enaʼö mate ira.

11. Ba ginötö latimbagö Ono Zekola ba Zura Niʼamoniʼö wefao ba wasuwöta, hadia nifalua ndra samatörö?

¹¹ Mofönu sibai Gafökha börö me lö faröi ndra talifusöda khö Lowalangi. Andrö, ifazökhi ”somböi fangabu dödö, samaliʼö huku”. (Zinunö 94:20) Jenderal angkatan bersenjata Amerika Serikat sotöi James Franklin Bell, ifatunö khö Rutherford hegöi Van Amburgh wa laforege ira samatörö ba wamazökhi goroisa si bohou zanutunö wa labunu niha zanimbagö wefao ba wasuwöta. Sindruhunia, itandrösaigö wehedenia andrö khö Nono Zekola ba Zura Niʼamoniʼö. Si fao fofönu, iwaʼö jenderal andrö khö Dalifusöda Rutherford wa lö aʼozu lafazökhi goroisa andrö börö me lö fao dödö presiden Amerika Serikat. Aefa daʼö imane jenderal andrö, ”Hizaʼi maʼila hewisa lala ba wondraʼu yaʼami, ba hasambalö maraʼu ami!”

12, 13. (a) Hadia mbörö wa ara laʼefasi ndra talifusöda si dawalu ba gurunga? (b) Me no labeʼe ira ba gurunga, hadia laböhöli woloʼö khö Yehowa? Tutunö.

¹² Ba gafuriata, lasöndra lala ira samatörö ba wanguhuku Ono Zekola ba Zura Niʼamoniʼö. Laraʼu dalifusöda Rutherford, Van Amburgh hegöi daönö dalifusöda tanö böʼö zosalahini Lembaga Menara Pengawal. Moloʼö hakim zangai kasus andre, abölö lö sökhi ira moroi ba saradadu Jerman. Imane wa hasambalö abölö-bölö lahuku ira börö me no laʼoʼaya ndra samatörö, militer, hegöi fefu gereja. Andrö, dawalu Nono Zekola ba Zura Niʼamoniʼö no ara tebeʼe ira ba gurunga ba Atlanta, Georgia. Hizaʼi, me no awai wasuwöta, laʼefasi ira ba laheta wamaböbögö zi lö duhu nibeʼe khöra.

¹³ Hewaʼae labeʼe ira ba gurunga, ira matua si dawalu andre laʼosambua dödöra ba woloʼö goi-goi Lowalangi. Hewisa wa tola taʼila daʼa? Lafaʼoheʼö zura khö presiden Amerika Serikat ba wangandrö enaʼö laʼefasi ira moroi ba gurunga. Ba zura andrö, lawaʼö wa no tesura ba Zura Niʼamoniʼö wa tebai labunu niha, andrö haniha manö zi no molulu faʼaurinia khö Lowalangi ba iʼosiwawöi goroisania, lö omuso dödö Lowalangi khönia ba tola tehori ia dania. Latutunö wa daʼö mbörö irege tebai ba lö omasi ira labunu niha. Lö khöra faʼataʼu ba wanura zura andrö khö presiden! Lö aombö dödö ndra talifusöda andre wa hasambalö laʼoʼö Yehowa.

TEʼEFAʼÖ NONO MBANUA LOWALANGI!

14. Tutunö hadia zalua iʼotarai 1914 irugi 1919 moroi ba Daromali.

¹⁴ Itutunö ba Maleakhi 3:1-3 hadia zalua ba Nono Zekola ba Zura Niʼamoniʼö iʼotarai 1914 irugi mböröta ndröfi 1919. (Baso.) Yehowa Lowalangi ”Zoʼaya”, ba Yesu Keriso ”malaʼika wawuʼusa li”, tohare ia ba wamareso niha nibayoini si no muʼamaedolagö simane ”nono Lewi”. Me no aefa ibeʼe khöra degu-degu ba iʼamoniʼö ira Yehowa, latemaʼö halöwö si bohou. Me döfi 1919, ifataro ”zawuyu andrö, si lö faröi, satua-tua” Yesu ba wameʼe fanuturu lala hegöi ba wamahaʼö fefu genoni Lowalangi. (Mataiʼo 24:45) Ba gafuriata, teʼefaʼö nono mbanua Lowalangi moroi ba Mbabilona Sebua. Iʼotarai daʼö, monönö waʼatua-tuara sanandrösa ba gohitö dödö Lowalangi ba itugu laʼomasiʼö ia. Laʼandrö sibai saohagölö börö howu-howu nitemara moroi khö Lowalangi!^[1]—Faigi gonönöta.

15. Hewisa wangoromaʼöda wa taʼandrö sibai saohagölö börö me no teʼefaʼö ita moroi ba Mbabilona Sebua?

¹⁵ Taʼandrö sibai saohagölö börö me no teʼefaʼö ita moroi ba Mbabilona Sebua. Tebai ihori agama sindruhu Satana. Lö mofozu ia! Hizaʼi, moguna tatörö tödöda hadia mbörö wa iʼefaʼö ita Yehowa. Ohitö dödönia enaʼö teʼorifi fefu niha. (II Korindro 6:1) Hizaʼi, no ifatörö zuta niha satulö tödö agama sofaya, ba moguna tatolo ira! Dataforege ba woloʼö ndra talifusöda si lö faröi andre ba wanolo niha enaʼö teʼefaʼö ira moroi ba Mbabilona Sebua.