”Faoma Mifarou Dödö Nawömi Ero Maʼökhö”

1, 2. Hadia mbörö wa moguna sibai tafarou dödö niha böʼö?

IMANE Cristina si-18 fakhe ndröfinia, ”Lö irai lafarou dödögu ira satuagu, fatimba khöra fefu nifaluagu. Sindruhu-ndruhu afökhö dödögu ba wehedera. Lawaʼö wa iraono nasa ndraʼo, lö irai ufahaʼö ndraʼo, ba esolodo göi lawaʼö. Andrö, asese ulau meʼe ba abölö omasido na lö fahuhuo ndraʼo khöra. Urasoi wa niha si lö ngaroro ndraʼo.”^[1] (Faigi gonönöta.) Tola abua waʼauri na lö lafarou dödöda niha böʼö!

² Baero daʼö, angeraigö hawaʼebua wanoloda niha böʼö ba ginötö tafarou dödöra. Imane Rubén, ”Urasoi hulö niha si lö ngaroro ndraʼo ba zi hauga fakhe. Hizaʼi samuza maʼökhö, ba ginötö fao ndraʼo manuriaigö khö samösa satua sokubaloi, iʼila wa so gabula dödögu. Ihaogö wamondro-ndrongo me ututunö nösi dödögu khönia. Aefa daʼö, ifasugi ba dödögu ngawalö zi sökhi si no ufalua. Ifasugi ba dödögu wehede Yesu—wa abölö tohude ita moroi ba ziliwi nali soya. Asese itörö tödögu ayati daʼö, ba lö aetu tofakha ia ba dödögu. Ebua sibai lua-luania khögu wehede zatua sokubaloi andrö.”—Mataiʼo 10:31.

3. (a) Hadia niwaʼö sinenge sotöi Faulo sanandrösa ba wamarou dödö niha böʼö? (b) Hadia nidunö-dunöda ba wamahaʼö andre?

³ Itutunö Sura Niʼamoniʼö wa moguna lö aetu tafarou dödö niha böʼö. Isura Faulo ba niha Keriso ba Heberaiʼo imane, ”Mifaigi, yaʼami ira talifusö, böi yatesöndra ba khömi, ha niha ia, si so tödö si lö sökhi, tödö ba wa lö mamati, ba wangerogö Lowalangi sauri; faoma mifarou dödö nawömi, ero maʼökhö.” Hadia mbörö? Itutunö Faulo, ”Fa böi tesöndra ba khömi, haniha ia, niʼabeʼeʼö tödö, ba walimosa horö andrö.” (Heberaiʼo 3:12, 13) Angeraigö hawaʼasökhi worasoimö na so niha samarou tödömö. Andrö, hadia dani khöda ba wamarou dödö ndra talifusöda? Hadia wamahaʼö si tola tahalö moroi ba lala nifalua Yehowa, Yesu hegöi Faulo ba wamarou dödö niha böʼö? Ba hadia ngawalö lala si tola tafalua ba wamarou dödö niha böʼö? Datatutunö wanofu-nofu andre.

FEFU ITA MOGUNA LAFAROU DÖDÖDA

4. Haʼökhö manö moguna wamarou dödö? Hadia mbörö wa ato niha iadaʼa lö lafarou dödö niha böʼö?

⁴ Fefu ita moguna lafarou. Ba sabölö tohudenia, moguna daʼa khö ndra satua ba wamarou dödö ndraonora. Samösa guru sotöi Timothy Evans itutunö wa iraono, ”moguna khöra wamarou dödö hulö simane zinanö moguna khönia nidanö. Na tafarou dödö ndraono, tola irasoi wa moguna ia khöda ba taʼangenanöi ia”. Hizaʼi, börö me ba ”götö safuria” auri ita, ato niha iadaʼa ha tana khöra niʼaluira ba ambö ’laʼomasiʼö nawöra’. (II Timoteo 3:1-5) So ösa zatua si lö mamarou dödö ndraonora börö me lö lafarou göi dödöra ira satuara. Moguna göi lafarou dödö ndraono si no ebua-bua, hizaʼi ha fataria alua daʼa. Duma-dumania, ato zangumaʼö wa lö irai lasuno zi no lafalua ba wohalöwöra.

5. Hewisa wa tola tafarou dödö niha böʼö?

⁵ Tola tafarou dödö niha böʼö na tasuno halöwö si sökhi si no lafalua. Tola göi tafarou dödö niha böʼö na tafatunö khöra mbua-bua si sökhi niʼokhögöra hegöi tarara dödöra ba ginötö lataögö waʼabu dödö mazui faʼafatö dödö. (I Tesalonika 5:14) Börö me asese fao ita khö ndra talifusöda, oya ginötö khöda ba wangumaʼö fehede famarou dödö. (Baso Zangombakha 4:9, 10.) Andrö, sofu khöu samösa, ’Hadia utehegö laʼila niha böʼö wa uʼameʼegö tödö ba uʼomasiʼö ira? Hegöi hadia ufalua daʼö ero so ginötö?’ Angeraigö niwaʼö Zura Niʼamoniʼö, ”Ba taroma li ba ginötö, ba ha lö asökhi!”—Gamaedola 15:23.

6. Hadia mbörö wa omasi Zatana na afatö dödö nono mbanua Lowalangi? Beʼe sambua duma-duma hewisa wamaluania daʼö.

⁶ Imane Gamaedola 24:10, ”Na hulö zi lö döla-döla ndraʼugö, na baŵa wamakao, ba si lö boto waʼabölöu.” Iʼila Satana wa na ifatöʼö dödöda, tola awuwu wahuwusada khö Yehowa. Duma-dumania, ibeʼe wanandraigö sabölö-bölö khö Yobi enaʼö ide-ide dödönia. Hizaʼi, lö möna Zatana börö me lö faröi Yobi khö Yehowa. (Yobi 2:3; 22:3; 27:5) Tola göi talawa Zatana ba taforomaʼö wa lö möna ia. Na lö taböhöli wamarou dödö nösi nomoda hegöi ira talifusöda ba mbanua niha Keriso, tola tatolo ira enaʼö owua-wua dödöra ba lö laböhöli wahuwusa khö Yehowa.

DUMA-DUMA SI TOLA TAʼOʼÖ

7, 8. (a) Hewisa wamarou Yehowa dödö niha? (b) Hewisa zatua ba woloʼö duma-duma nifalua Yehowa? (Faigi gambara ba wamobörö wamahaʼö.)

⁷ Ifarou dödö niha Yehowa. Isura sanura zinunö, ”Ahatö Yehowa ba zi no arasa tödö ba itolo zi no atata era-era.” (Zinunö 34:19) Ba ginötö ataʼu Yeremia ba ide-ide dödönia, ifabuʼu Yehowa wa hasambalö itolo ia. (Yeremia 1:6-10) Ifatenge malaʼikania Yehowa ba wangaʼaroʼö Danieli si no alawa ndröfi. Ikaoni Danieli malaʼika andrö ”omasiö”. (Danieli 10:8, 11, 18, 19) Hadia tola öfalua lala simane daʼö ba wamarou dödö ndra talifusöda, simane ndra perintis hegöi niha si no alawa ndröfi si tebai mamalua abölö oya simane nifalua niha böʼö?

⁸ Hewaʼae no ara fao-fao Yehowa khö Yesu, hizaʼi ba ginötö so Yesu ba gulidanö, iʼila Yehowa wa moguna nasa ifarou dödö Nononia. Ifondro-ndrongo Yesu me muhede Namania moroi ba zorugo ba ginötö ibörögö halöwö fanuriaigönia hegöi me lö aratö ia ba gulidanö. Ba zi dombua ginötö andrö imane Yehowa, ”Onogu daʼö, ono omasiö, waʼomasigu.” (Mataiʼo 3:17; 17:5) Tatu, tefarou sibai dödö Yesu me irongo wa iʼomasiʼö ia Amania ba omuso dödönia khönia. Ba mbongi fatua lö mate Yesu, abu sibai dödönia. Ifarou dödönia Yehowa, ifatenge malaʼikania ba wangaʼaroʼö hegöi ba wondrara dödönia. (Luka 22:43) Satua, tola miʼoʼö duma-duma Yehowa na lö aetu-aetu mifarou dödö ndraonomi. Suno ira na so zi sökhi nifaluara. Aefa daʼö ba ginötö lataögö wanandraigö ba zekola, falua fefu zi tola öfalua ba wangaʼaroʼö yaʼira hegöi ba wanolo yaʼira enaʼö anau gölöra.

9. Hadia wamahaʼö si tola tahalö moroi ba lala nifalua Yesu khö ndra nifahaʼönia?

⁹ Ibeʼe göi duma-duma si sökhi Yesu si tola taʼoʼö. Ba mbongi fatua lö mate Yesu, isasai gahe ndra nifahaʼönia ba itutunö khöra wa moguna sibai mbua-bua fangide-ngideʼö. Hizaʼi, so khöra waʼasiliawa ba fabuʼa-buʼa ira sanandrösa haniha zabölö ebua ba gotaluara, hegöi isuno-suno sibai ia Fetero wa lö irai iröi Yesu. (Luka 22:24, 33, 34) Hewaʼae simanö, lö iʼosambua wangera-ngerania Yesu ba zala nifaluara. Hizaʼi, isuno ira börö me lö faröi ira khönia. Ifabuʼu khöra wa lafalua halöwö sabölö ebua moroi ba nifaluania, ba ifaduhuʼö khöra wa iʼomasiʼö ira Yehowa. (Luka 22:28; Yohane 14:12; 16:27) Tola tasofu khöda samösa, ’Hadia uʼoʼö duma-duma Yesu hegöi usuno niha böʼö ba mbua-buara si sökhi moroi na ha uʼera-era manö zala nifaluara?’

10, 11. Hewisa Waulo ba wamarou dödö ndra talifusönia, ba hadia zedöna ifalua?

¹⁰ Asese goi idunö-dunö Faulo zi sökhi sanandrösa khö ndra talifusönia. Fao ira khönia ba weʼamöi ba mbanua böʼö ba zi hauga fakhe, ba aboto ba dödönia hewisa mbua-buara, hizaʼi lö isura zala nifaluara. Sindruhunia, isuno ira. Duma-dumania, ikaoni Dimoteo Faulo ”onogu andrö, ba khö Zoʼaya, somasi ndraʼo, si lö faröi” ba faduhu dödönia wa tola iʼameʼegö tödö Dimoteo soguna ba niha böʼö. (I Korindro 4:17; Filifi 2:19, 20) Iwaʼö Faulo khö ndra niha Keriso ba Gorindro wa Dito andrö ”awögu ia, ba khömi andrö, ba sanolo yaʼo ba halöwö andrö”. (II Korindro 8:23) Tatu tefarou dödö Dimoteo hegöi Tito ba ginötö laʼila wa iʼameʼegö tödö ira Faulo!

¹¹ Faulo hegöi awönia Baranaba, latehegö nosora ba wamarou dödö ndra talifusöra. Duma-dumania, laʼila wa ato niha sedöna wamunu yaʼira ba mbanua Lisitera. Hewaʼae simanö, lafuli möi ira ba daʼö ba wamarou tödö zawena mufahaʼö hegöi ba wanolo yaʼira enaʼö lö faröi ira khö Yehowa. (Halöwö Zinenge 14:19-22) Aefa daʼö, itaögö Waulo deʼala ba Efeso börö me mofönu sibai niha sato khöra. Hizaʼi, ara toröi ia ba daʼö ba wamarou dödö ndra talifusönia. Imane Halöwö Zinenge 20:1, 2, ’Ba ifakaoniʼö khönia ndra nifahaö Faulo, ba ifarou dödöra ba me no iʼangonasi ira, ba mofanö ia, ba weʼamöi ba Makedonia. Ba itörö danö tanö ba daʼö, ba oya niwaʼönia khöra wamarou dödö, ba irugi danö Yunani.’

TAFAROU DÖDÖ NAWÖDA ZAMÖSANA

12. Hadia mbörö wa moguna khöda weʼamöi ba gangowuloa?

¹² Omasi Yehowa zabölö sökhi khöda. Daʼö mbörö wa ifarou ita enaʼö böi taböhöli waʼowulo. Ba gangowuloa, tola tafahaʼö ita sanandrösa khönia ba tola tafarou dödö niha böʼö. (I Korindro 14:31; baso Heberaiʼo 10:24, 25.) Cristina, nitutunö ba wamobörö wamahaʼö imane, ”Sabölö omasido ba gangowuloa yaʼia daʼö faʼomasi hegöi famarou dödö nitemagu. Itaria urasoi waʼabu dödö me urugi Balai Mbanua Lowalangi. Hizaʼi, iʼondrasido samösa dalifusöda ira alawe, italagui ndraʼo, ba iwaʼö wa baga-baga ndraʼodo. Lawaʼö khögu wa laʼomasiʼö ndraʼo ba omuso sibai dödöra wamaigi faʼatedou wamatigu. Famarou dödö moroi khöra möi fondrara dödögu!” Moguna sibai tafarou dödö niha böʼö!—Roma 1:11, 12.

13. Hadia mbörö wa moguna lafarou dödö niha si no ara mamosumange Yehowa?

¹³ Moguna göi wamarou dödö ba niha si no ara mamosumange Yehowa. Duma-dumania Yosua. Ba ginötö möi ndraono Gizaraʼeli ba Danö Gamabuʼula, Yosua nifili Yehowa si tobali sondröniaʼö. Hizaʼi, iwaʼö Yehowa khö Moze enaʼö ifarou dödö Yosua hewaʼae no ara ifosumange Yehowa. Imane Yehowa, ”Ba khö Yosua, ba öbeʼe li, farou dödönia ba abeʼeʼö; yaʼia sa zolohe miyefo yaʼira andre, ba yaʼia zamaosa khöra tanö andrö, niʼila höröu.” (V Moze 3:27, 28) Moguna wamarou dödö khö Yosua börö me ba gafuriata oya wasuwöta nifaluara ba si löʼö-löʼönia kala ira sakali. (Yosua 7:1-9) Iadaʼa, tola tafarou dödö ndra satua sokubaloi hegöi satua samasui, samorege wohalöwö ba woʼameʼegö tödö ono mbanua Lowalangi. (Baso I Tesalonika 5:12, 13.) Imane samösa satua samasui, ”Itaria labeʼe khögu zura fangandrö saohagölö ira talifusö, lawaʼö wa owua-wua dödöra ba ginötö mafalukhaisi ira. Maʼiröʼö zura andrö, ba mafuli mabaso ba ginötö so gabula dödöma. Sindruhu-ndruhu daʼö zi tola mangaʼaroʼö yaʼaga.”

14. Hadia duma-duma zangoromaʼö wa sökhi na tasuno niha böʼö ba ginötö tabeʼe khöra mene-mene?

¹⁴ Ba zi sambua inötö, ibeʼe mene-mene Faulo ba niha Korindro. Ba ginötö lafalua mene-mene andrö, isuno ira Faulo. (II Korindro 7:8-11) Tatu manö, fehedenia andrö möi famarou dödö enaʼö lö aetu lafalua zatulö. Iadaʼa, satua sokubaloi hegöi ira satua ba nomo, tola laʼoʼö duma-duma Waulo andre. Andreas, sangokhögö darua ndraono side-ide imane, ”Famarou dödö tola möi fanolo ba ndraono enaʼö tedou ira ba wamati hegöi ba wangera-ngera. Tola ötanögö mene-mene khöra na öfarou dödöra. Hewaʼae laʼila iraonoda hadia zi sökhi, hizaʼi na lö aetu tafarou ira ba wamalua daʼö, tola tobali lala waʼaurira daʼö.”

HADIA ZANOLO YAʼUGÖ BA WAMAROU DÖDÖ NIHA BÖʼÖ?

15. Hadia sambua lala si tola tafalua ba wamarou dödö niha böʼö?

¹⁵ Fatunö khö ndra talifusömö ba wamati wa öʼameʼegö tödö famorege nifaluara hegöi bua-buara si sökhi. (II Ngaʼötö 16:9; Yobi 1:8) Na tafalua daʼa, taʼoʼö Yehowa hegöi Yesu. Laʼameʼegö tödö fefu ngawalö nifaluada khöra, hewaʼae lö oya zi tola tafalua simane somasi dödöda. (Baso Luka 21:1-4; II Korindro 8:12.) Duma-dumania, taʼila wa oya nifalua niha sagalawa ndröfi ba wamorege weʼamöi ba gangowuloa ba lö laböhöli göi weʼamöi manuriaigö. Hadia tafarou dödöra ba tasuno ira ba nifaluara andrö?

16. Hewisa wa tola tafarou dödö niha böʼö?

¹⁶ Aseseʼö farou niha böʼö. Ero öʼila so zi sökhi nifalua zi samösa niha, suno ia. Ba ginötö so Waulo hegöi Baranaba ba Gadriokhia Wisidia, lamane khöra ira satua gosali, ”Na so hadia ia khömi, yaʼami, ira talifusö, niwaʼö ba zato, famarou dödö, ba miwaʼö.” Iʼogunaʼö ginötö daʼö Faulo ba wamarou dödö niha. (Halöwö Zinenge 13:13-16, 42-44) Ba ginötö tafarou dödö niha böʼö, omasi göi lafarou ita niha böʼö.—Luka 6:38.

17. Hadia lala sabölö sökhi ba wanuno niha böʼö?

¹⁷ Zara-zara wanutunö. Ba ginötö isuno niha Keriso ba Diatira Yesu, izara-zara ba wanutunö hadia zi sökhi si no lafalua. (Baso Famaʼeleʼö 2:18, 19.) Hewisa tola taʼoʼö ia? Te tola tasuno samösa nina si lö donga ba lala wangebuaʼönia iraononia hewaʼae abua khönia daʼö. Mazui na samösa satua ndraʼugö, tola ösuno famorege nifalua ndraonomö ba wamosumange Yehowa. Tutunö khöra ngawalö zi sökhi niʼilamö si no lafalua. Na tazara-zara ba wanutunö ba ginötö tafarou dödö niha böʼö, tola laʼila hadia geluaha niwaʼöda.

18, 19. Hewisa wanoloda niha böʼö enaʼö lö aetu ahatö ira khö Yehowa?

¹⁸ Iwaʼö Yehowa khö Moze ba wamarou hegöi ba wangaʼaroʼö Yosua. Tatu manö, lö fahuhuo Yehowa khöda iadaʼa hegöi lö itatugöi haniha nifarouda tödö. Hizaʼi, omuso dödönia ba ginötö iʼila wamorege nifaluada ba wamarou dödö niha böʼö. (Gamaedola 19:17; Heberaiʼo 12:12) Duma-dumania, ba ginötö so samösa dalifusöda samaʼema huhuo sebua ba mbanua niha Keriso si so yaʼita, tola tawaʼö khönia wa sökhi sibai wamaʼemania huhuo andrö. Tola manö, hadia niwaʼönia möi fanoloda ba wanaögö abula dödö mazui ba wameʼe faʼaboto ba dödö sanandrösa ba ayati si lö taʼila. Isura sambua zura talifusöda ira alawe khö dalifusöda samaʼema huhuo, ”Hewaʼae lö arara fahuhuo ita, öʼila wa so gabula dödögu, örara dödögu ba öfazawado. Omasido enaʼö öʼila wa ba ginötö fahuhuo ndraʼugö, he ba mimbar mazui na fahuhuoʼö ba niha, urasoi wa hulö mbuala daʼö moroi khö Yehowa.”

¹⁹ Tola tatolo niha böʼö enaʼö ahatö ira khö Yehowa na taʼoʼö mene-mene Waulo, ”Faoma mifarou dödö nawömi, ba faoma mitolo nawömi, simane folaumi saʼae göi.” (I Tesalonika 5:11) Na ’faoma tafarou dödö nawöda, ero maʼökhö’, tola taʼomusoiʼö dödö Yehowa!