Toföfö Moloʼö Mbuku moroi khö Lowalangi

1, 2. (a) Hadia niwaʼö niha sanandrösa wa iʼokhögö sambua organisasi Lowalangi? (b) Hadia nidunö-dunöda ba wamahaʼö andre?

BA GINÖTÖ fahuhuo ba niha sanandrösa ba wamati, so zangumaʼö, ”Lö moguna organisasi ba wameʼe fanuturu lala khöda. Si moguna khöda fefu yaʼia daʼö wahuwusa khö Lowalangi.” Hadia atulö daʼa? Hadia sindruhunia zoroma ba daʼö?

² Ba wamahaʼö daʼa, aboto ba dödöda wa ifalua Yehowa ngawalö hadia ia ba lala si toföfö hegöi iföföʼö ono mbanuania. Tatutunö göi hadia zinangea tafalua ba ginötö ibeʼe khöda wanuturu lala organisasi Yehowa. (I Korindro 14:33, 40) Ba götö si föföna, laʼoʼö wanuturu lala moroi ba Daromali ira ono mbanua Yehowa ba tola laturiaigö duria somuso dödö ba nahia soya. Simane yaʼira, datatehegö ibeʼe khöda wanuturu lala Sura Niʼamoniʼö iadaʼa ba taʼoʼö wanuturu lala nitemada moroi ba organisasi Lowalangi. Si tobali mbuania, tola taturiaigö turia somuso dödö ba zi sagörö gulidanö. Tola göi fao ita ba wororogö enaʼö teʼosambuaʼö mbanua niha Keriso, lö raʼiö ba afönu faʼatulö.

LOWALANGI SI TOFÖFÖ YEHOWA

3. Hadia zameʼe faduhu dödömö wa Yehowa andrö Lowalangi si toföfö?

³ Ba ginötö taʼila ngawalö nifazökhi Yehowa, sindruhu-ndruhu aboto ba dödöda wa yaʼia andrö Lowalangi si toföfö. Safönu ”faʼatua-tua mege wolata danö khö Yehowa, ba era-era dödö khönia wamazökhi mbanua si yaŵa”. (Gamaedola 3:19) Oya nasa zi lö taʼila sanandrösa ba ngawalö nifazökhi Yehowa. Sindruhunia, ”hulö ha tiu-tiu li nirongoda khönia”. (Yobi 26:14) Hizaʼi, iʼotarai me ide-ide no taʼila wa no sökhi sibai ba wamaʼanö ulidanö awö mbanua si yawa. (Zinunö 8:4, 5) Faʼamofanö zuta waʼoya ndröfi ba mbanua si yawa oi toföfö. Ba angeraigö lala planet ba wamasui luo ba sistem tata surya. Tola toföfö si fao faʼahöli-höli dödö daʼö, börö me no ifaʼanö Yehowa lala wofanö planet hegöi döfi. Ba ginötö taʼangeraigö hewisa lala ”wamazökhi banua andrö, si yaŵa, faʼatua-tuania” hegöi ulidanö andre, tefarou ita ba wanuno yaʼia, wamosumange yaʼia hegöi ba wangoromaʼö faʼalöfaröi khönia.—Zinunö 136:1, 5-9.

4. Hadia mbörö wa tebai labeʼe wanema li ira satua-tua moroi ba ngawalö wanofu-nofu si tohude?

⁴ Oya niʼogunaʼö ndra satua-tua ba wamahaʼö yaʼira sanandrösa ba mbanua si yawa hegöi ulidanö andre enaʼö abölö sökhi waʼaurida. Hizaʼi, lö laʼila labeʼe wanema li ba wanofu-nofu si tohude. Duma-dumania, lö iʼila astronot hewisa zindruhunia mböröta mbanua si yawa mazui hadia mbörö wa so niha, urifö hegöi sinanö ba gulidanö. Ato zi lö mangila hana wa omasi sibai niha auri sagötö faʼara. (Zangombakha 3:11) Sambua mbörö hana wa lö laʼila labeʼe wanema li ba wanofu-nofu andrö ira satua-tua mazui niha böʼö, börö me lawaʼö wa lö hadöi Lowalangi ba lafaduhuʼö wamahaʼö evolusi. Hizaʼi, ibeʼe khöda wanema li Lowalangi moroi ba Mbukunia, Sura Niʼamoniʼö.

5. Hadia manö lala nifalua niha sangoromaʼö wa laʼodaligö goi-goi sanandrösa ba mbanua si yawa awö danö?

⁵ Oya goi-goi sanandrösa ba mbanua si yawa awö danö nifazökhi Yehowa. Lö tebulö goi-goi andrö. Simane sangehaogö listrik, tuka pipa, insinyur, pilot, dokter bedah mazui tanö böʼönia, laʼodaligö goi-goi andre ba halöwö nifaluara. Duma-dumania, nahia gate ba mboto, fagölö nahiania ero-ero niha. Andrö, iʼila dokter bedah, hezoso iʼalui daʼö ba mboto zofökhö. Laʼila fefu niha, wa na manaoka zi samösa niha moroi ba nahia salawa, lö tola löʼö aekhu ia tou ba tola manö mate. Taʼoʼö goi-goi sanandrösa ba mbanua si yawa awö danö simane huku gravitasi, börö me omasi ita enaʼö anau nosoda.

NGAWALÖ SI NO IFÖFÖʼÖ LOWALANGI

6. Hewisa wa tola taʼila wa omasi Yehowa na lafosumange ia niha ba lala si toföfö?

⁶ Sindruhu-ndruhu afönu faʼahöli-höli dödö wamaʼanö Yehowa mbanua si yawa. Tatu, omasi ia na toföfö nono mbanuania ba wamosumange yaʼia. Sindruhunia, no ihenaigö Yehowa Zura Niʼamoniʼö ba wamahaʼö yaʼita hewisa lala ba wamosumange yaʼia. Tola omuso ba owua-wua dödöda ba waʼauri, ha na taʼoʼö wanuturu lala nibeʼenia moroi ba Zura Niʼamoniʼö hegöi moroi ba organisasinia.

7. Hadia wamahaʼö si tola tahalö moroi ba lala wanura Sura Niʼamoniʼö?

⁷ Sura Niʼamoniʼö sindruhu-ndruhu buala si tohude moroi khö Lowalangi. So ösa sarjana sangumaʼö wa Sura Niʼamoniʼö andrö, mbuku niha Yahudi hegöi niha Keriso si no laʼorudugö niha. Hizaʼi, Lowalangi zangai angetula haniha zanura mbuku andrö, hawaʼara lasura ia, ba hadia nisurara. Daʼa mbörö wa fefu mbuku ba Zura Niʼamoniʼö tola möi fanolo khöda enaʼö aboto ba dödöda turia moroi khö Lowalangi. Iʼotarai I Moze irugi Wamaʼeleʼö, iforomaʼö khöda Sura Niʼamoniʼö wa so ”maʼuwu” zamohouni gulidanö andre tobali faradaiso. No tafahaʼö ita göi wa ”maʼuwu” andrö yaʼia daʼö Yesu Keriso, ba Banuania dania zamaduhuʼö wa Yehowa andrö samatörö satulö ba niha fefu.—Baso I Moze 3:15; Mataiʼo 6:10; Famaeleʼö 11:15.

8. Hezoso tola taʼila wa sökhi lala wamöföʼö ndraono Gizaraʼeli?

⁸ Iraono Gizaraʼeli, laʼoʼö Huku nibeʼe Lowalangi khöra ba sökhi sibai lala wamöföʼö yaʼira. Duma-dumania, so ”ndra alawe, sangai-ngai halöwö, si so halöwö ba zinga mbawa ndruhö nose wamaʼeleʼö”. (II Moze 38:8) So göi wanuturu lala ba ndraono Gizaraʼeli hewisa lala si toföfö ba wofindrakö kemah hegöi tabernakel. Ba gafuriata, iföföʼö gere hegöi niha lewi Razo Dawido ba wamalua halöwö ba nomo Lowalangi. (I Ngaʼötö 23:1-6; 24:1-3) Ba ginötö laʼoʼö Yehowa iraono Gizaraʼeli, ifahowuʼö ira. Toföfö, teʼosambuaʼö ba teʼatulöʼö ira.—V Moze 11:26, 27; 28:1-14.

9. Hewisa wa tola toföfö mbanua niha Keriso ba götö si föföna?

⁹ Toföfö göi mbanua niha Keriso si föföna. So mboto solohe, yaʼia daʼö sambua ngawawa ira matua sameʼe fanuturu lala ba mbanua niha Keriso. Si föföna, yaʼira andre yaʼia daʼö ira sinenge. Ba gafuriata, fao göi ndra satua sokubaloi. (Halöwö Zinenge 6:1-6; 15:6) Ibeʼe wanuturu lala Yehowa ba mboto solohe hegöi ba niha si falulu fohalöwö khöra ba wanura sura sameʼe mene-mene hegöi fanuturu lala ba mbanua niha Keriso. (I Timoteo 3:1-13; Tito 1:5-9) Hadia howu-howu nitema mbanua niha Keriso na laʼoʼö wanuturu lala moroi khö ndra boto solohe?

10. Hadia zalua ba mbanua niha Keriso ba götö si föföna me laʼoʼö wanuturu lala nibeʼe mboto solohe? (Faigi gambara ba wamobörö wamahaʼö.)

¹⁰ Baso Halöwö Zinenge 16:4, 5. Ba götö si föföna, so ösa ndra talifusöda ira matua si möi ba mbanua niha Keriso ba wangombakhaʼö khöra ’goroisa nihonogöi zinenge ba satua ba Yeruzalema’ yaʼia daʼö moroi khö ndra mboto solohe. Banua niha Keriso, laʼoʼö wanuturu lala irege ”itugu sa aro dödö mbanua, wamati, ba ero maʼökhö tedou waʼatora”. Hadia wamahaʼö si tola tahalö moroi ba duma-duma nibeʼera sanolo yaʼita ba mbanua niha Keriso iadaʼa?

HADIA ÖʼOʼÖ WANUTURU LALA?

11. Hadia zinangea lafalua ira satua sokubaloi hegöi enoni sohalöwö ba ginötö latema wanuturu lala moroi ba organisasi Lowalangi?

¹¹ Anggota Panitia Cabang mazui Panitia Negeri, satua samasui hegöi satua sokubaloi, moguna laʼoʼö wanuturu lala nitemara moroi ba organisasi Lowalangi. Sindruhunia, no itutunö khöda Mbuku moroi khö Yehowa ba woloʼö niwaʼö ndra sondröniaʼö. (V Moze 30:16; Heberaiʼo 13:7, 17) Niha si lö faröi khö Yehowa, lö mamadaö, ba lö mukökö-kökö ira ba wanuturu lala nitemara. Tatu lö omasi ita tobali simane Dioterefe, si lö mamosumange ndra talifusö sondröniaʼö. (Baso III Yohane 9, 10.) Ba ginötö taʼoʼö wanuturu lala nitemada, no fao ita ba wororogö enaʼö lö aetu teʼatulöʼö ba teʼosambuaʼö mbanua niha Keriso. Andrö, datasofu khöda samösa, ’Hadia ufarou dödö ndra talifusögu enaʼö lö faröi ira khö Yehowa? Hadia iʼanemaiʼö uʼoʼö wanuturu lala nitemagu moroi ba organisasi Lowalangi?’

12. Hewisa lala wamataro satua sokubaloi hegöi enoni sohalöwö?

¹² Barö-barö daʼa, boto solohe labulöʼö lala wamataro satua sokubaloi hegöi enoni sohalöwö ba gangowuloa. Ba duho ”Pertanyaan Pembaca” ba mbuku Menara Pengawal 15 mbaŵa si Felezara 2014, itutunö khöda wa ba götö si föföna, labeʼe halöwö ira mboto solohe khö satua samasui ba wamataro satua sokubaloi hegöi enoni sohalöwö. Andrö, iʼotarai mbaŵa si Siwa 2014, labörögö ira satua samasui ba wamataro. Ba ginötö laʼombakhaʼö ira satua sokubaloi khö zatua samasui wa so samösa dalifusö ira matua si sökhi si tola mangai halöwö tobali satua sokubaloi mazui enoni sohalöwö ba mbanua niha Keriso, ifaigi sakali satua samasui haniha ia hegöi ösi nomonia. Duma-dumania, tola fao ira ba wanuriaigö. (I Timoteo 3:4, 5) Aefa daʼö, rafe ndra satua samasui khö ndra satua sokubaloi. Lahaogö laʼosisiʼö ayati ba Daromali zanutunö mbua-bua samösa satua sokubaloi mazui enoni sohalöwö.—I Timoteo 3:1-10, 12, 13; I Fetero 5:1-3.

13. Hewisa wangoromaʼöda wa falulu fohalöwö ita ba wanuturu lala nitemada moroi khö ndra satua sokubaloi?

¹³ Labeʼe khöda wanuturu lala ira satua sokubaloi moroi ba Zura Niʼamoniʼö börö me omasi ira ba wolumöʼö hegöi ba woʼameʼegö tödö mbanua niha Keriso. Moguna falulu fohalöwö ita khöra börö me si sökhi khöda wanuturu lala andrö. (I Timoteo 6:3) Ba götö si föföna, so ösa niha ”zi lö sökhi bua-bua”. Lö mohalöwö ira, hizaʼi laʼurusai halöwö niha böʼö. Labeʼe khöra wanegu ira satua sokubaloi, hizaʼi laʼosiwawöi. Itutunö Faulo ba mbanua niha Keriso hadia zinangea lafalua ba niha simane daʼö. Imane, ”Ba böi olifu ami, böi fahuwu ami khönia.” Moguna laʼaetuʼö wahuwusa ba niha simane daʼö hizaʼi böi lafolau simane nudu. (II Tesalonika 3:11-15) Iadaʼa göi, ira satua sokubaloi latolo niha sangosiwawöi goi-goi Lowalangi, duma-dumania talifusöda si fakawa ba niha si tenga si sara lala wamati. (I Korindro 7:39) Na lö ifalalini gamuatania, tola lahalö gangetula ira satua sokubaloi ba wamaʼema huhuo wa tola laʼoʼaya mbanua niha Keriso na lafalua gamuata daʼö. Na lafaʼema huhuo ira satua sokubaloi ba mbanua niha Keriso si so yaʼugö, hadia nifaluamö? Na öʼila haniha zamalua daʼö, hadia ötimbagö wariawösa khönia? Na öfalua daʼa, tola ötolo ia enaʼö iʼila wa amuatania andrö tola tobali deʼala khönia ba iʼogorofi Yehowa daʼö. Tola manö, ifalalini gamuatania.^[1]—Faigi gonönöta.

FAO BA WOROROGÖ ENAʼÖ TEʼOSAMBUAʼÖ MBANUA NIHA KERISO, LÖ RAʼIÖ BA AFÖNU FAʼATULÖ

14. Hewisa enaʼö tola fao ita ba wanolo enaʼö lö raʼiö mbanua niha Keriso?

¹⁴ Itutunö khöda Daromali Lowalangi hadia zinangea tafalua zamösana enaʼö lö tatehegö so zi lö sökhi ba mbanua niha Keriso. Angeraigö zalua ba mbanua Korindro. Iʼomasiʼö Faulo ndra talifusö si so ba daʼö. Ato ba gotaluara nitolonia wamahaʼö ba zindruhu. (I Korindro 1:1, 2) Andrö, khalaigö hewisa dödönia me iʼila wa so samösa moroi ba gotaluara zamalua horö ba latehegö so ia ba mbanua niha Keriso! Imane Faulo khö ndra satua sokubaloi enaʼö ”nibeʼe ba danga Zatana zimanö”. Moguna laheta niha andrö moroi ba mbanua niha Keriso, lö tola löʼö laʼefasi ia. (I Korindro 5:1, 5-7, 12) Iadaʼa, tola manö lahalö gangetula ira satua sokubaloi ba woʼefasi zi samösa niha moroi ba mbanua niha Keriso börö me no ifalua horö sebua ba lö khönia famalalini era-era. Ba zalua andre, hadia tefaudu nifaluada ba niha si no laʼefasi moloʼö niwaʼö Daromali khöda? Na tafalua daʼö, tola tatolo enaʼö lö raʼiö mbanua niha Keriso. Ba tola tatolo enaʼö aboto ba dödönia wa moguna ibulöʼö wangera-ngerania ba iʼandrö wangefa moroi khö Yehowa.

15. Hewisa wondrorogöda enaʼö lö aetu teʼatulöʼö mbanua niha Keriso?

¹⁵ So gabula dödö tanö böʼö ba mbanua Korindro. So ösa dalifusö solohe talifusönia föna zanguhuku. Imane Faulo khöra, ”Hana wa lö mitaha manö dödömi, na lafatörö khömi zi lö atulö?” (I Korindro 6:1-8) Iadaʼa, so ndra talifusö ba mbanua niha Keriso si no fawuʼu li ba wangalui kefe ba wohalöwö hizaʼi ba gafuriata rugi ia mazui irasoi wa telimo ia. Andrö, laʼohe dalifusö andrö ba zanguhuku. Hizaʼi, naʼalua daʼa, tola manö laʼoʼaya Yehowa hegöi ono mbanuania. Ba tola manö so gabula dödö ba mbanua niha Keriso. Itolo ita Mbuku moroi khö Lowalangi enaʼö aboto ba dödöda wa moguna tarorogö waʼatulö ba gotalua ndra talifusöda, hewaʼae rugi ita.^[2] (Faigi gonönöta) Sindruhunia, ifahaʼö ita Yesu hewisa lala wangasiwaisi gabula dödö sebua mazui fatitisa. (Baso Mataiʼo 5:23, 24; 18:15-17.) Na taʼoʼö wanuturu lala nibeʼenia andrö, lö aetu teʼatulöʼö hegöi teʼosambuaʼö ita ba mbanua niha Keriso.

16. Hana wa teʼosambuaʼö nono mbanua Lowalangi?

¹⁶ Imane khöda Mbuku moroi khö Yehowa, ”Hiza waʼasökhi, ba ha lö omasiö, na ha sara dödö moroi yomo zi fatalifusö!” (Zinunö 133:1) Me laʼoʼö niwaʼö Yehowa, toföfö ndraono Gizaraʼeli ba teʼosambuaʼö ira. No ifaʼeleʼö Lowalangi sanandrösa ba nono mbanuania, ”Uʼorudugö ira, simane biri-biri ba kandra.” (Mikha 2:12) Ifaʼeleʼö göi Yehowa wa lafahaʼö zindruhu iraono mbanuania moroi ba Daromali ba teʼosambuaʼö ira ba wamosumange yaʼia. Imane, ”Uʼasogö ba niha mbewe si sökhi, enaʼö dozi laʼangaröfili döi Yehowa, ba enaʼö teʼanö manö ira weʼamöi enoninia.” (Zefania 3:9) Taʼandrö sibai saohagölö me tola teʼosambuaʼö ita ba wamosumange Yehowa!

17. Hadia zi lö tola löʼö lafalua ira satua sokubaloi ba ginötö so niha samalua horö sebua ba mbanua niha Keriso?

¹⁷ Na so samösa niha samalua horö sebua, moguna alio labeʼe khönia wanegu ira satua sokubaloi si fao faʼomasi. Aboto ba dödöra wa omasi Yehowa na lalumöʼö mbanua niha Keriso moroi ba ngawalö zi lö sökhi ba enaʼö lö raʼiö hegöi lö aetu teʼosambuaʼö ira. (Gamaedola 15:3) Simane nibasoda ba zura Waulo si föföna ba mbanua Korindro, iʼomasiʼö sibai ndra talifusönia ba mbanua andrö ba itegu ira ba ginötö moguna daʼö khöra. Taʼila wa alio laʼoʼö wanuturu lala moroi khö Waulo ira satua sokubaloi, börö me ba zi hauga waŵa aefa daʼö, isuno ira ba zurania si dua khöra. Na samösa dalifusöda ”sosala, si lö mudöna-döna”, moguna lategu ia ira satua sokubaloi ba lala si tefaudu.—Galatia 6:1.

18. (a) Hewisa wanuturu lala si so ba Daromali Lowalangi tola manolo mbanua niha Keriso ba götö si föföna? (b) Hadia wamahaʼö nitutunöda ba migu fönada?

¹⁸ Ba ginötö laʼoʼö wanuturu lala moroi ba Mbuku khö Lowalangi ira niha Keriso ba götö si föföna, sindruhu-ndruhu teʼosambuaʼö mbanua niha Keriso si so yaʼira, lö raʼiö ba afönu faʼatulö. (I Korindro 1:10; Efeso 4:11-13; I Fetero 3:8) Si tobali mbuania, tola lafaʼema turia somuso dödö ira talifusö ”ba nifazökhi Lowalangi andrö, si so ba gulidanö, fefu”. (Kolose 1:23) Iadaʼa, teʼosambuaʼö ba toföfö göi nono mbanua Yehowa ba laturiaigö turia somuso dödö andre ba zi sagörö ulidanö. Ba wamahaʼö migu fönada, abölö oya dandra wa omasi sibai ira ba wamosumange Lowalangi Solakhömi, Yehowa, ba laʼoʼö wanuturu lala moroi ba Mbukunia, Sura Niʼamoniʼö.—Zinunö 71:15, 16.