Moguna Nasa Wangide-ngideʼö

1, 2. Hadia mbörö wa itimbagö Zaulo Lowalangi? (Faigi gambara ba wamobörö wamahaʼö.)

ME IFILI Zaulo Yehowa tobali razo, so khö Zaulo wangide-ngideʼö. (I Zamueli 9:1, 2, 21; 10:20-24) Hizaʼi, me no aefa tobali ia razo, ihalö halöwö si tenga sinangea ifalua. Ba zi sambua inötö, tohare ngahönö ndrawa Wilisiti ba wanuwö ndraono Gizaraʼeli. Samaʼeleʼö sotöi Samueli iwaʼö khö Zaulo wa hasambalö tohare ia ba wameʼe sumange khö Yehowa. Hizaʼi, fatua lö tohare Zamueli, ataʼu sibai ndraono Gizaraʼeli ba ato zondröi Saulo. Andrö, lö ahono dödönia ba lö ibaloi weʼaso Zamueli, irege yaʼia samösa zameʼe sumange andrö. Tebai ifalua daʼö sindruhunia, ba lö omasi Yehowa ba nifaluania andrö.​—I Zamueli 13:5-9.

² Me no irugi Zamueli, mofönu ia khö Zaulo me lö iʼoʼö nifakhoi Yehowa. Hizaʼi, iʼosilömangilagö zala nifaluania. Iʼalui dani ba itahigö niha böʼö ba zala nifaluania. (I Zamueli 13:10-14) Iʼotarai daʼö, oya ifalua halöwö si tenga sinangea ifalua. Andrö wa itimbagö ia Yehowa tobali razo. (I Zamueli 15:22, 23) Sökhi waʼauri Zaulo me mböröta, hizaʼi sindruhu-ndruhu lö sökhi waʼaurinia ba gafuriata.​—I Zamueli 31:1-6.

3. (a) Hadia manö niwaʼö niha sanandrösa ba wangide-ngideʼö? (b) Hadia manö wanofu-nofu nitutunöda?

³ Ato niha iadaʼa, lö laʼokhögö wangide-ngideʼö. Hewaʼae simanö, lasöndra waʼauri si sökhi ba alua gohitö dödöra. Si fao faʼasiliawa lawaʼö wa abölö tohude ira moroi ba niha böʼö. Duma-dumania, imane samösa aktor hegöi politisi, ”Lö moguna khögu ngawua wehede fangide-ngideʼö. Ba utötöna wa lö irai uʼogunaʼö ia.” Hizaʼi, hana wa moguna sibai so wangide-ngideʼö ba niha Keriso? Hadia wangide-ngideʼö andrö? Ba wamahaʼö daʼa, tatutunö wanema li ba wanofu-nofu andrö. Ba wamahaʼö migu fönada, taʼila hewisa enaʼö lö aetu so khöda wangide-ngideʼö hewaʼae abua ba wamalua yaʼia.

HANA WA MOGUNA SIBAI WANGIDE-NGIDEʼÖ?

4. Hadia gamuata wayawasa andrö?

⁴ Itutunö Sura Niʼamoniʼö wa no aröu faehu ira wayawasa hegöi fangide-ngideʼö. (Baso Gamaedola 11:2.) Imane Dawido khö Yehowa, ”Timba khö genonimö zi fayawa.” (Zinunö 19:14) Hadia gamuata wayawasa andrö? Eluahania, tafalua zi tenga halöwöda, tola manö börö me lö khöda fombaloi mazui börö waʼasiliawada. Fefu ita tola so khöda wayawasa börö me lö moʼahonoa ita. Hizaʼi, simane si no tafahaʼö ita moroi ba duma-duma Razo Saulo, lö omasi Yehowa na no toʼölö-ölö ita wamalua daʼö. Imane ba Zinunö 119:21 wa ’itenawa wayawasa’ Yehowa. Hadia mbörö?

5. Hadia mbörö wa no sala sebua gamuata wayawasa?

⁵ Si oföna sibai, na tafalu-falua manö hadia ia zomasi dödöda, no taforomaʼö wa lö tafosumange Yehowa si tobali Lowalangida hegöi Samatörö yaʼita. Si dua, ba ginötö tafalua hadia zi tenga halöwöda, tola manö so wasosota ba gotaluada niha böʼö. (Gamaedola 13:10) Si tölu, laʼailasi ita niha böʼö na tafalu-falua manö gofu hadia ia zomasi dödöda. (Luka 14:8, 9) Ba daʼö tola taʼila hadia mbörö wa omasi Yehowa na so khöda wangide-ngideʼö.

HADIA MANÖ ZI TEFARAHU BA WANGIDE-NGIDEʼÖ?

6, 7. Hadia geluaha wangide-ngideʼö?

⁶ Niha Keriso si so fangide-ngideʼö lö khönia faʼasiliawa. Ba wamaiginia abölö tohude niha böʼö moroi khönia. (Filifi 2:3) Iʼila wa so zi tebai ifalua ba si fao fangide-ngideʼö itutunö hadia zalania. Omasi ia ifondro-ndrongo mbua gera-era niha böʼö ba ihalö wamahaʼö moroi ba daʼö. Niha sangokhögö fangide-ngideʼö sindruhu-ndruhu iʼomasiʼö ia Yehowa.

⁷ Itutunö Sura Niʼamoniʼö wa niha si so fangide-ngideʼö iʼila ba ifaduhuʼö wa so zi tebai ifalua mazui si lö tetehegö khönia ba wamalua. Daʼa zanolo yaʼia ba wamosumange hegöi ba wamalua si sökhi ba niha böʼö.

8. Enaʼö lö aetu so khöda wangide-ngideʼö, hadia wangera-ngera sinangea tatimbagö?

⁸ Hizaʼi, ba zi lö tadöna-döna tola manö ibörögö tumbu ba wangera-ngerada wayawasa. Hewisa wa tola alua daʼö? Tola manö ibörögö so ba wangera-ngerada wa abölö tohude ita moroi ba niha böʼö börö me so halöwö nibeʼe khöda ba mbanua niha Keriso. (Roma 12:16) Mazui, ibörögö taʼalui lala enaʼö lasuno ita niha böʼö. (I Timoteo 2:9, 10) Tola manö göi ibörögö tafatörö niha böʼö sanandrösa ba zi tola hegöi si tebai lafalua.​—I Korindro 4:6.

9. Hana wa so niha sangai halöwö si tenga halöwönia? Beʼe duma-duma moroi ba Zura Niʼamoniʼö.

⁹ Tola manö tahalö zi tenga halöwöda na lö talawa gisö-isö dödöda si fasala. Ato zamalua daʼö börö me omasi ira na lasuno ira niha, afökhö dödöra ba niha böʼö, mazui börö me lö itaha wönunia. Simane nitutunö ba Zura Niʼamoniʼö, daʼö zalua khö Gabisalomi, Usia, hegöi Nebukanesa. Ifatunö khöra Yehowa wa moguna so khöra wangide-ngideʼö.​—II Zamueli 15:1-6; 18:9-17; II Ngaʼötö 26:16-21; Danieli 5:18-21.

10. Hana wa tebai tahuku niha böʼö? Beʼe duma-duma moroi ba Zura Niʼamoniʼö.

¹⁰ So dani tanö böʼö wa itaria so zi lö mangoromaʼö fangide-ngideʼö. Angeraigö duma-duma Gabimelekhi hegöi Fetero. (I Moze 20:2-7; Mataiʼo 26:31-35) Hadia so khöra waʼasiliawa? Mazui, hadia lö laʼila zindruhu mazui lö laʼangeraigö hadia nifaluara? Börö me lö taʼila nösi dödö niha böʼö, andrö wa tebai tahuku ira.​—Baso Yakobo 4:12.

FETAROU BA ZI NO IFAKHOI LOWALANGI

11. Hadia zinangea aboto ba dödöda?

¹¹ Niha si so fangide-ngideʼö, aboto ba dödönia hadia wetaronia ba zi no ifakhoi Lowalangi. Yehowa no Lowalangi si toföfö. Ibeʼe halöwö ba niha si so ba mbanua niha Keriso. Fefu ita so halöwöda. Ibeʼe khöda Yehowa mbuala simane faʼatua-tua, nekhe-nekhe danga hegöi faʼabölö si faböʼö-böʼö, ba itehegö khöda wangogunaʼö buala andrö moloʼö zomasi ita. Na so khöda wangide-ngideʼö, tola taʼogunaʼö mbuala nibeʼe khöda si tefaudu ba zomasi Yehowa. (Roma 12:4-8) Aboto ba dödöda wa itötöna Yehowa enaʼö taʼogunaʼö daʼö ba wamosumange yaʼia hegöi ba wanolo niha böʼö.​—Baso I Fetero 4:10.

12, 13. Hadia zinangea tatörö tödöda ba ginötö tebulö halöwöda khö Yehowa?

¹² Itugu numalö ginötö, tola manö tebulö halöwöda khö Yehowa. Duma-dumania, angeraigö hadia manö zi tebulö salua khö Yesu. Si oföna, fao ia khö Namania. (Gamaedola 8:22) Itolo göi Yehowa ba wamazökhi malaʼika, ulidanö, hegöi niha. (Kolose 1:16) Aefa daʼö, tefatenge ia ba gulidanö. Tumbu ia tobali ono sawuyu ba itugu ebua-bua ia tobali satua. (Filifi 2:7) Me no aefa mate ia, mangawuli ia ba zorugo, ba me döfi 1914 tobali ia Razo ba Mbanua Lowalangi. (Heberaiʼo 2:9) Ba zi so miföna, na no aefa mamatörö ia tobali Razo ba zi hönö fakhe waʼara, ifuli itouʼö Wamatörö andrö ba danga Yehowa si no tobali ”Lowalangi ba khöra fefu”.​—I Korindro 15:28.

¹³ Tola manö göi oya zi tebulö salua ba waʼaurida. Itataria, tebulö halöwöda börö gangetula nihalöda. Duma-dumania, te lö sangowalu ita iadaʼa, hizaʼi ba zi so miföna omasi ita mangowalu. Mazui, tahalö gangetula enaʼö so khöda ndraono. Aefa daʼö, tabulöʼö waʼaurida enaʼö tola tahalö halöwö safönu inötö khö Yehowa. Tola manö göi tebulö halöwöda börö zalua khöda. Hizaʼi, hewaʼae awuyu-wuyu mazui atua ita, mofökhö mazui löʼö, iʼila Yehowa hewisa enaʼö tola tafalua zabölö sökhi ba wamosumange yaʼia. Lö iʼandrö hadia zi tebai tafalua. Ba omuso sibai dödönia ba ngawalö nifaluada khönia.​—Heberaiʼo 6:10.

14. Hewisa wa tola itolo ita fangide-ngideʼö andrö ba wangokhögö faʼomuso dödö gofu hadia ia zalua?

¹⁴ Omuso dödö Yesu ba wanemaʼö halöwö nibeʼe Yehowa khönia, ba tola göi omuso dödöda. (Gamaedola 8:30, 31) Niha si so fangide-ngideʼö, omuso dödönia ba halöwö nibeʼe khönia ba mbanua niha Keriso. Lö iʼosambuaʼö dödönia ba nifalua niha böʼö. Hizaʼi, omuso dödönia ba wamalua halöwönia ba organisasi Lowalangi. Ba wamaiginia, moroi khö Yehowa fefu daʼö. Niha si so fangide-ngideʼö iʼameʼegö tödö niha böʼö ba omasi ia ba wanolo yaʼira. Aboto ba dödönia wa ibeʼe göi khöra halöwö Yehowa.​—Roma 12:10.

FANGERA-NGERA SATULÖ SANANDRÖSA BA WANGIDE-NGIDEʼÖ

15. Hadia wamahaʼö si tola tahalö moroi ba duma-duma Gideono?

¹⁵ Duma-duma niha sangoromaʼö fangide-ngideʼö yaʼia daʼö Gideono. Me ituyu ia Yehowa ba wangefaʼö ndraono Gizaraʼeli moroi ba danga ndraono Midiano, imane Gideono, ”No fondrege zi numana ba mado Manase watalifusöta khöma, ba yaʼodo, ba no fondrege zide-ide ba zi sambua omo ndra amagu.” (Zanguhuku 6:15) Hizaʼi, faduhu dödö Gideono khö Yehowa ba itemaʼö halöwö daʼö. Iforege ba wamahaʼö yaʼia sanandrösa ba zomasi Yehowa. Aefa daʼö, iʼandrö wanuturu lala moroi khö Yehowa ba wangandrö. (Zanguhuku 6:36-40) Niha sabölö ba si lö faʼataʼu Gideono, hizaʼi atua-tua göi ia ba so khönia wangelama. (Zanguhuku 6:11, 27) Aefa daʼö, me laʼandrö khönia niha enaʼö tobali ia samatörö yaʼira, itimbagö daʼö. Ba me no aefa ifalua hadia niʼandrö Yehowa, mangawuli ia ba nomo.​—Zanguhuku 8:22, 23, 29.

16, 17. Hewisa wa tola tedou ba wamati niha si so fangide-ngideʼö?

¹⁶ Na itemaʼö halöwö si bohou zi samösa niha mazui na omasi ia idouʼö wangai halöwö ba mbanua niha Keriso, tenga daʼö geluahania wa lö khönia fangide-ngideʼö. Imane Sura Niʼamoniʼö wa sökhi na so zamosumange Yehowa somasi mangai halöwö salahi ndra talifusönia, ba enaʼö oroma waʼatedounia. (I Timoteo 4:13-15) Hizaʼi, hadia moguna tafalua halöwö si bohou ba wangoromaʼö faʼatedouda? Löʼö. Fefu ita tola taforomaʼö mbua-bua niha Keriso hegöi faʼatua-tua nibeʼe Yehowa khöda irege tola tafalua zabölö sökhi ba wamosumange yaʼia hegöi ba wanolo niha böʼö.

¹⁷ Fatua lö itemaʼö halöwö andrö, niha si so fangide-ngideʼö iʼila hadia niʼandrö khönia. Ilau mangandrö sanandrösa ba halöwö andrö ba sindruhu-ndruhu iʼangeraigö hadia tola ifalua daʼö. Hadia tobönö ginötönia hegöi faʼabölönia ba wamalua ngawalö zoguna tanö böʼö? Na tebai atö, hadia tola ibeʼe ösa halöwönia andrö ba niha böʼö? Na no aefa iʼangeraigö daʼö, niha si so fangide-ngideʼö tola ihalö gangetula wa tebai ifalua halöwö si bohou andrö. Na niha si so fangide-ngideʼö göi ita, tola tafalua daʼö.

18. (a) Hadia nifalua niha si so fangide-ngideʼö ba ginötö itema halöwö si bohou? (b) Hewisa wanolo Roma 12:3 yaʼita enaʼö so khöda wangide-ngideʼö?

¹⁸ Omasi Yehowa na lö ’fayawa ita ba wanörö lalada’ ba wefao khönia. (Mikha 6:8) Andrö, ba ginötö tatema halöwö si bohou, moguna taʼalui wanuturu lala moroi khönia ba taʼandrö enaʼö ibeʼe khöda wanolo, simane nifalua Gideono. Moguna tahaogö taʼangeraigö niwaʼö Yehowa khöda nifaʼemania ba Zura Niʼamoniʼö hegöi ba organisasinia. Datatörö tödöda wa gofu hadia ia nifaluada ba wamosumange yaʼia, tenga börö waʼabölöda daʼö, hizaʼi börö me so khö Yehowa wangide-ngideʼö ba omasi ia itolo ita. (Zinunö 18:36) Niha si so fangide-ngideʼö lö ba dödönia wangumaʼö wa abölö tohude ia moroi ba danö böʼö.​—Baso Roma 12:3.

19. Hana wa moguna so khöda wangide-ngideʼö?

¹⁹ Niha si so fangide-ngideʼö, aboto ba dödönia wa ha Yehowa zi tola manema fefu lakhömi, börö me yaʼia Zomböi hegöi Fondrege Zalawa ba mbanua si yawa awö danö. (Famaʼeleʼö 4:11) Na so khöda wangide-ngideʼö, tola owua-wua dödöda ba wamalua gofu hadia ia zi tola tafalua ba wamosumange Yehowa. Taʼosinangegö göi hadia mbua gera-era hegöi nirasoi ndra talifusöda. Na tafalua daʼö tola so wahasara dödö ba gotaluada. Niha si so fangide-ngideʼö, ihaogö iʼangeraigö fatua lö ihalö gangetula ba wamalua hadia ia, irege tola itimbagö wamalua horö sebua. Omuso sibai dödö Yehowa ba niha sangokhögö fangide-ngideʼö. Moroi ba daʼö fefu, taʼila wa moguna sibai wangide-ngideʼö ba nono mbanua Lowalangi. Ba wamahaʼö migu fönada, tatutunö hewisa enaʼö lö aetu so khöda wangide-ngideʼö hewaʼae abua ba wamalua yaʼia.