Tola So Khöu Wangide-ngideʼö Hewaʼae Abua Wamalua Yaʼia

1-3. Hadia zi lö ifalua zi samösa samaʼeleʼö moroi ba Yahudi, ba hadia lua-luania? (Faigi gambara ba wamobörö wamahaʼö.)

RAZO YEROBEAMO moroi ba Gizaraʼeli ifazökhi nahia wameʼe sumange ba mbanua Mbetieli. Ifalua daʼa ba wameʼe sumange khö mbaʼali. Andrö wa ifatenge samösa samaʼeleʼönia Yehowa moroi ba Yahudi ba wangombakha fanguhuku khö Yerobeamo. Samaʼeleʼö si so fangide-ngideʼö andre, iʼoʼö ba ifaʼema duria niwaʼö Yehowa. Mofönu sibai razo khönia, hizaʼi ilumöʼö ia Yehowa.​—I Razo 13:1-10.

² Iwaʼö Yehowa khö zamaʼeleʼö andrö wa tebai manga mazui mamadu idanö ia ba danö Gizaraʼeli, ba na mangawuli ia tebai itörö lala nitörönia mege me tohare ia. Hizaʼi, me mangawuli ia, falukha ia khö zi samösa ira matua si no numalö ndröfi. Ilimo ia niha si no numalö ndröfi andrö me iwaʼö wa no muhede khönia Yehowa ba wogaoni samaʼeleʼö andrö enaʼö möi ia manga ba mamadu idanö ba nomonia. Lö iʼoʼö niwaʼö Yehowa samaʼeleʼö andrö. Fao ia khö ndra matua si no alawa ndröfi. Lö omasi Yehowa ba nifaluania. Me mangawuli ia, tohare sageu zingo iʼa zamaʼeleʼö andrö.​—I Razo 13:11-24.

³ Lö taʼila sibai hana wa abölö ifondro-ndrongo niwaʼö ndra matua si no alawa ndröfi andrö moroi ba niwaʼö Yehowa. Hizaʼi, oroma wa ”fayawa” ia ba wanörö lala andrö khö Yehowa. (Baso Mikha 6:8.) Ba Zura Niʼamoniʼö, manörö lala Yehowa eluahania faduhu dödönia khö Yehowa, iʼodaligö wanuturu lala nibeʼenia, ba iʼoʼö hadia niwaʼö Yehowa. Niha si so fangide-ngideʼö iʼila wa lö aetu moguna mangandrö ia khö Yehowa. Na so wangide-ngideʼö khö zamaʼeleʼö andrö, isofu ua sakali khö Yehowa hadia no tebulö wanuturu lala nibeʼenia. Itaria, abua khöda wangai angetula hegöi ba wotatugöi hadia niʼandrö Yehowa khöda. Hizaʼi, na so khöda wangide-ngideʼö, taʼandrö wanuturu lala moroi khö Yehowa enaʼö tola tatimbagö ba wamalua sala sebua.

4. Hadia nitutunöda ba wamahaʼö andre?

⁴ Ba wamahaʼö migu silalö, no taʼila hadia geluaha wangide-ngideʼö ba hadia mbörö wa moguna sibai taʼokhögö daʼö iadaʼa. Hizaʼi, hewisa enaʼö tola so khöda wangide-ngideʼö? Hadia manö zalua irege tola abua khöda ba wangoromaʼö fangide-ngideʼö? Iadaʼa, tatutunö tölu ngawalö zalua si tobali dani irege abua khöda wangoromaʼö fangide-ngideʼö.​—Gamaedola 11:2.

BA GINÖTÖ TEBULÖ ZALUA KHÖDA

5, 6. Hewisa wangoromaʼö Barasilai wa so khönia wangide-ngideʼö?

⁵ Hadia nifaluada ba ginötö tatema halöwö si bohou mazui ba ginötö tebulö halöwöda, daʼö zangoromaʼö hadia sindruhu-ndruhu so khöda wangide-ngideʼö. Tola tahalö wamahaʼö moroi ba duma-duma Mbarasilai, niha si fahuwu ba si lö faröi khö Razo Dawido. Me no 80 fakhe saʼae ndröfinia, ikaoni ia Dawido enaʼö toröi ia ba nomo razo. Hewaʼae no töi sebua daʼö, hizaʼi iwaʼö Barasilai wa abölö sökhi na labeʼe halöwö daʼö khö Kimihami. Te ononia Kimihami andrö.​—II Zamueli 19:31-37.

⁶ Hana wa lö itemaʼö wogaoni daʼö Barasilai? Hadia enaʼö tola lö mohalöwö ia mazui enaʼö lö iʼabusi tödö waʼaurinia? Tenga. Ifalua daʼö Barasilai börö me so khönia wangide-ngideʼö. Iʼila wa no tebulö zalua khönia, ba itemaʼö wa so zi tebai ifalua saʼae börö me no alawa ndröfinia. (Baso Galatia 6:4, 5.) Simane Barasilai, moguna göi so khöda wangide-ngideʼö. Moroi na taʼosambuaʼö dödöda ba zomasi ita mazui tafaehu-faehusi ita ba niha böʼö, abölö baga na taʼosambuaʼö dödöda ba wameʼe zabölö sökhi khö Yehowa. Abölö moguna daʼa moroi na tasöndra halöwö sebua mazui enaʼö tehöngö ita. (Galatia 5:26) Na so khöda wangide-ngideʼö, falulu fohalöwö ita khö ndra talifusöda ba wamosumange Yehowa hegöi ba wanolo niha böʼö.​—I Korindro 10:31.

7, 8. Hewisa wa tola itolo ita fangide-ngideʼö enaʼö böi taʼodaligö ita samösa?

⁷ Tola manö abua wangoromaʼö fangide-ngideʼö ba ginötö oya halöwö nitemada. Hizaʼi, tola tahalö wamahaʼö moroi ba duma-duma Nehemia. Ba ginötö irongo Nehemia wa oya gabula dödö nitaögö niha si toröi ba Yeruzalema, ilau mangandrö enaʼö itolo ira Yehowa. (Nehemia 1:4, 11) Itema Yehowa wangandrö Nehemia. Ifili ia Razo Aretazasa tobali gumandru ba Yeruzalema. Hewaʼae so khö Nehemia kuaso hegöi harato sebua, lö irai iʼodaligö ia samösa. Iʼandrö mene-mene moroi khö Yehowa ba ero maʼökhö ibaso Goroisa Lowalangi. (Nehemia 8:1, 8, 9) Sindruhunia, tola ifatörö niha ba zomasi dödönia. Hizaʼi, lö iʼogunaʼö kuasonia ba wamalua soguna khönia samösa mazui ba wamalua si lö sökhi.​—Nehemia 5:14-19.

⁸ Simane Nehemia, hewaʼae oya halöwö nitemada mazui na tebulö lala halöwöda, moguna so khöda wangide-ngideʼö. Lö omasi ita taʼodaligö waʼabölöda mazui si no irai tatörö. Hewisa wa tola ibörögö iʼodaligö ia si samösa niha? Duma-dumania, te so samösa zatua sokubaloi si lö mangandrö ba ginötö ihalö gangetula soʼamakhaita ba mbanua niha Keriso. Mazui so ndra talifusöda, oföna ua lahalö gangetula awena mangandrö ira enaʼö ifahowuʼö gangetulara andrö Yehowa. Hizaʼi, niha si so fangide-ngideʼö lö iʼodaligö ia samösa hewaʼae na no toʼölö ia. Lö aetu itörö tödönia wa tebai ifaomagö waʼabölönia ba waʼabölö Yehowa. (Baso Gamaedola 3:5, 6.) Ba gulidanö daʼa, ato niha sangalui tana khönia ba omasi ira na abölö tohude ira moroi ba niha böʼö. Hizaʼi, lö omasi lafalua daʼö ira samosumange Yehowa. Böi so ba wangera-ngerada wa abölö sökhi ita moroi ba niha böʼö na no taʼokhögö halöwö sebua, he ba nomo mazui ba mbanua niha Keriso. Moguna tatörö tödöda wetaroda ba zi no itatugöi Lowalangi ba moguna göi falulu fohalöwö ita khö ndra talifusöda.​—I Timoteo 3:15.

BA GINÖTÖ LATEGU MAZUI NA LASUNO ITA

9, 10. Hewisa wa tola itolo ita fangide-ngideʼö ba ginötö lategu mazui lafalua khöda zi lö atulö?

⁹ Tatu abao dödöda na so niha sangumaʼö fehede si lö atulö khöda. Daʼö zalua khö Khana. Hewaʼae iʼomasiʼö sibai ia foʼomonia ira matua, hizaʼi lö ohahau dödö Khana. Lö aetu iʼoʼaya ia Penina, niha si fahindri khönia. Omasi ia moʼono, hizaʼi tebai. Sambua inötö me abu sibai dödönia, möi ia mangandrö ba tabernakel. Iʼila Ere Sebua sotöi Eli wa mege-ege ia, ba iwalingagö si mabu Khana andre! Tola manö mofönu Khana me luo daʼö. Hizaʼi, ihaogö wanema wehede Eli. Aefa daʼö, ba wangandrönia, ifuli iwaʼö wehede sangoromaʼö famati hegöi faʼomasinia khö Yehowa.​—I Zamueli 1:5-7, 12-16; 2:1-10.

¹⁰ Fangide-ngideʼö tola möi fanoloda ba wameʼe ”folawa zi lö sökhi zi sökhi”. (Roma 12:21) Afönu faʼalösökhi gulidanö nifatörö Zatana andre. Andrö, böi tokea ita na lafalua khöda zi lö atulö. Moguna tataha wönuda. (Zinunö 37:1) Hizaʼi, abölö afökhö na alua daʼa ba gotalua ndra talifusöda ba mbanua niha Keriso. Na alua daʼa, moguna taʼoʼö duma-duma Yesu. Imane Sura Niʼamoniʼö, ”Me lahede-hedeʼö ia, ba lö ifuli ihede-hedeʼö” hizaʼi ”ibeʼe ba danga zangatulöʼö fanguhuku andrö.” (I Fetero 2:23) So wangide-ngideʼö khö Yesu ba iʼila wa hasambalö ihori fefu zi lö atulö Yehowa. (Roma 12:19) Moguna göi so khöda wangide-ngideʼö ba ’böi tasulöni zi lö sökhi awönia si lö sökhi’.​—I Fetero 3:8, 9.

11, 12. (a) Hewisa wa tola taforomaʼö wangide-ngideʼö na lasuno mazui lahöni-höni ita niha böʼö? (b) Hewisa wangoromaʼöda fangide-ngideʼö moroi ba lagu wonukhada hegöi bua-buada?

¹¹ Tola göi oroma wangide-ngideʼöda na lasuno mazui na lahöni-höni ita niha böʼö. Lasuno ba lahöni-höni sibai Gesitera börö me yaʼia andrö samösa ba gotalua ndra alawe si sökhi zikhala ba Persia. Ba zi döfi, labeʼe khönia wangehao mboto, simane iraono alawe sawuyu-wuyu tanö böʼö si fahindri ba wangai tödö razo. Hizaʼi, Gesitera nifili razo tobali ratu. Hewaʼae no itema fefu daʼö, lö tebulö gamuatania. Lö iʼalui dana khönia. Iforomaʼö wangide-ngideʼö, faʼasökhi dödö, ba ifosumange niha böʼö.​—Gesitera 2:9, 12, 15, 17.

¹² Na so khöda wangide-ngideʼö, sökhi lala wonukhada hegöi bua-buada, ba taforomaʼö wa taʼameʼegö tödö niha böʼö. Moroi na tahöni-höni manö ita mazui taforege enaʼö toröi-röi dödö niha khöda, omasi ita taʼokhögö ”waʼebolo dödö ba faʼahono-hono”. (Baso I Fetero 3:3, 4; Yeremia 9:23, 24) Moroi ba wehede hegöi ba nifaluada, ba daʼö oroma hewisa dödöda sanandrösa ba waʼaurida samösa. Duma-dumania, tola manö ibörögö so ba wangera-ngerada wamalua gofu hadia ia enaʼö lasuno ita niha böʼö sanandrösa ba wohalöwö, faʼatua-tua mazui börö niha si faʼila khöda. Mazui, taforege enaʼö laʼila niha wa tola mofozu ita ba wamalua hadia ia zi tohude hewaʼae na sindruhunia tola alua daʼö börö wanolo moroi ba niha böʼö. Hizaʼi, törö tödöu hadia nifalua Yesu. Tola manö iʼogunaʼö waʼatua-tuania enaʼö lasuno ia niha böʼö. Hizaʼi, lö ifalua daʼö. Sasesenia, ayati moroi ba Daromali Lowalangi niʼogunaʼönia. Lö omasi ia na lasuno ia niha. Omasi ia na ha Yehowa nisuno.​—Yohane 8:28.

BA GINÖTÖ TAHALÖ GANGETULA

13, 14. Hewisa wa tola itolo ita fangide-ngideʼö ba wangai angetula si sökhi?

¹³ Moguna so khöda wangide-ngideʼö ba ginötö tahalö gangetula mazui ba ginötö lahalö gangetula niha böʼö si tola molua-lua ba waʼaurida. Me ba Kaizaria so zinenge sotöi Faulo, omasi möi ia ba Yeruzalema ba wangasiwai halöwö nibeʼe Yehowa khönia. Hizaʼi, iwaʼö khönia samaʼeleʼö sotöi Agabo wa na möi ia ba daʼö hasambalö laraʼu ia ba tola manö labunu. Laʼandrö khönia göi ira talifusöda enaʼö lö mofanö ia. Hizaʼi, ihalö gangetula Waulo wa hasambalö möi ia ba Yeruzalema. Hadia daʼö geluahania wa iʼodaligö ia samösa? Löʼö. So khönia wangide-ngideʼö ba sindruhu-ndruhu faduhu dödönia khö Yehowa. So göi wangide-ngideʼö khö ndra talifusöda si so ba daʼö. Andrö wa fao dödöra ba gangetula nihalö Waulo ba latehegö mofanö ia.​—Halöwö Zinenge 21:10-14.

¹⁴ Fangide-ngideʼö zanolo yaʼita ba wangai angetula si sökhi hewaʼae lö taʼila mazui tebai tafatörö hadia zalua. Duma-dumania, te so ba wangera-ngerada ba wangai halöwö safönu inötö. Hizaʼi, hewisa na mofökhö ita? Hewisa na mofökhö zatuada ba moguna tatolo ira? Hewisa na no atua ita? Lö taʼila tabeʼe wanema li ba wanofu-nofu daʼa hewaʼae no mangandrö ita ba taʼangera-ngeraigö manö daʼö. (Zangombakha 8:16, 17) Hizaʼi, na faduhu dödöda khö Yehowa, tola taʼila ba tatemaʼö hadia zi tebai tafalua. Moguna tafatimbaisi fefu hadia zatulö, taʼandrö mene-mene, ba sabölö tohudenia taʼandrö wanuturu lala. Moguna göi taʼoʼö fefu wanuturu lala moroi ba geheha Yehowa. (Baso Zangombakha 11:4-6.) Tola ifahowuʼö gangetula nihalöda Yehowa mazui itolo ita ba wombulöʼö hadia ia niʼera-erada.​—Gamaedola 16:3, 9.

LALA ENAʼÖ TOLA ITUGU TAʼOKHÖGÖ WANGIDE-NGIDEʼÖ

15. Hewisa wa tola taʼokhögö wangide-ngideʼö na taʼangerönusi sanandrösa khö Yehowa?

¹⁵ Hewisa enaʼö itugu taʼokhögö wangide-ngideʼö? Datatutunö öfa ngawalö lala. Si oföna, moguna taʼangerönusi sanandrösa khö Yehowa, tahaogö taʼangeraigö waʼebua dödö Lowalangi. Na tafagölösi ita khö Yehowa, ba daʼö taʼila hawaʼide-ide ita ba sinduruhu-ndruhu lö oya niʼilada. (Yesaya 8:13) Törö tödöu wa Lowalangi Fondrege Zabölö nifosumangeda, tenga niha gulidanö mazui malaʼika. Na taʼangerönusi daʼö, tola taʼokhögö wangide-ngideʼö ba tatouʼö ita ba ”danga Lowalangi”.​—I Fetero 5:6.

16. Hadia mbörö wa tola taʼokhögö wangide-ngideʼö na taʼangerönusi waʼomasi Lowalangi?

¹⁶ Lala si dua yaʼia daʼö na taʼangerönusi hawaʼebua waʼomasi Yehowa khöda. Ifaomagö mbanua niha Keriso Faulo hulö simane boto niha. Moguna khö Yehowa fefu ndroto-ndroto niha nifazökhinia. (I Korindro 12:23, 24) So so ba dödö Yehowa ita zamösana. Lö ifagölö-gölösi ita ba niha böʼö, ba lö aetu iʼomasiʼö ita hewaʼae tafalua zala. Tola ohahau dödöda börö me taʼila wa iʼomasiʼö ita Yehowa.

17. Hadia mbuania na taʼosambuaʼö dödöda ba zi sökhi nifalua niha böʼö?

¹⁷ Si tölu, itugu taʼokhögö wangide-ngideʼö na taʼosambuaʼö dödöda ba zi sökhi nifalua niha böʼö, simane nifalua Yehowa. Moroi na taforege enaʼö lahöni-höni ita niha mazui na tatatugöi hadia ia nifalua niha, abölö sökhi na taʼandrö khöra mene-mene ba tatemaʼö hadia mbua gera-erara. (Gamaedola 13:10) Omuso dödöda ba ginötö latema halöwö sebua ira talifusöda. Ba taʼandrö saohagölö khö Yehowa me no itehegö khöda ba wamosumange yaʼia.​—I Fetero 5:9.

18. Hana wa itugu taʼokhögö wangide-ngideʼö na tafahaʼö dödöda side-ide?

¹⁸ Si öfa, itugu taʼokhögö wangide-ngideʼö na taʼogunaʼö goi-goi Zura Niʼamoniʼö ba wamahaʼö dödöda side-ide. Goi-goi Zura Niʼamoniʼö zamahaʼö yaʼita enaʼö aboto ba dödöda hewisa lala wangera-ngera Yehowa hegöi tödönia. Na tafaigi fefu hadia ia moloʼö lala wamaigi Yehowa, tola tahalö gangetula sangomusoiʼö tödö Lowalangi. Na tafahaʼö ita, talau mangandrö, ba tafalua ba waʼaurida hadia ia zi no tafahaʼö ita, tola itugu tefahaʼö dödöda side-ide. (I Timoteo 1:5) Tafahaʼö ita ba wangofönaiʼö niha böʼö. Na tafalua daʼö, ifabuʼu Yehowa wa ’ifoʼahonoa ita’, itolo ita enaʼö itugu taʼokhögö wangide-ngideʼö.​—I Fetero 5:10.

19. Hadia zanolo yaʼita enaʼö lö aetu taʼokhögö wangide-ngideʼö?

¹⁹ Hadia itörö tödömö zamaʼeleʼö moroi ba Yahudi nidunö-dunöda ba wamobörö wamahaʼö? Mate ia ba taya göi wahuwusania khö Yehowa börö me lö khönia saʼae fangide-ngideʼö. Hizaʼi, tola taforomaʼö wangide-ngideʼö hewaʼae abua wamalua yaʼia. Duma-dumania, ato zamosumange Yehowa si lö faröi ba wangoromaʼö fangide-ngideʼö. Na no itugu ara tafosumange Yehowa, itugu taʼodaligö ia. (Gamaedola 8:13) Tola tatörö lala Yehowa gofu hadia ia zalua khöda. Daʼö no sambua töi sebua khöda. Andrö, datafalua gofu hadia ia zi tola tafalua enaʼö lö aetu taʼokhögö wangide-ngideʼö ba tatörö lala Yehowa irugi zi lö aetu.