”Daʼö Faʼema ba Niha si Lö Faröi”

1, 2. Hadia manö niwaʼö-waʼö niha sanandrösa ba halöwöra?

ATO niha iadaʼa lawaʼö wa ba lala halöwöra oroma hadia moguna ira mazui löʼö. Ba zi hauga ngawalö soi, na so zi falukha khö nawönia, sasese sibai lasofu yaʼia daʼö, ”Hadia halöwömö?”

² Itaria itutunö Sura Niʼamoniʼö sanandrösa ba zi samösa niha hegöi halöwönia. Duma-dumania, ”Mataiʼo, sanema beo”, ”Zimoni andrö, tuka guli zaŵi”, ”Luka, doto andrö, niʼomasiʼö”. (Mataiʼo 10:3; Halöwö Zinenge 10:6; Kolose 4:14) Baero daʼö, itutunö göi Sura Niʼamoniʼö halöwö nifalua zi samösa niha ba wamosumange Yehowa. Duma-dumania, Razo Dawido, samaʼeleʼö sotöi Elia, ba sinenge sotöi Faulo. Yaʼira andre, laʼameʼegö tödö sibai halöwö nibeʼe Yehowa khöra. Simanö göi ita, moguna taʼameʼegö tödö gofu hadia halöwö nibeʼe khöda ba wamosumange Yehowa.

3. Hadia mbörö wa moguna lafahaʼö zi bohou ebua ira talifusöda si no alawa ndröfi? (Faigi gambara ba wamobörö wamahaʼö.)

³ Omasi sibai ita wamosumange Yehowa ba taʼameʼegö tödö hadia ia halöwöda. Ato moroi ba gotaluada sorasoi faʼomuso dödö ba wamalua halöwö nitemada ba tadöna-döna enaʼö tola tafalua ia sagötö faʼara. Hizaʼi, na no itugu numalö saʼae ndröfi niha, tebai lafalua halöwö nifaluara me awuyu-wuyu ira. (Zangombakha 1:4) No sambua fanandraigö daʼa ba nono mbanua Yehowa. Iadaʼa, itugu tedou halöwö fanuriaigö, ba oya lala niʼogunaʼö organisasi ba wamaʼema turia somuso dödö ba niha fefu. Hizaʼi, itaria abua ba niha si no alawa ndröfi ba wamahaʼö yaʼira ba lala si bohou andre. (Luka 5:39) Si toʼölönia, na no itugu alawa ndröfi niha, alö saʼae waʼabölönia. (Gamaedola 20:29) No laforomaʼö waʼomasi ira talifusöda si no alawa ndröfi na lafahaʼö zi bohou ebua ba wangai halöwö ba organisasi Yehowa.​—Baso Zinunö 71:18.

4. Hana wa itaria abua ba niha wameʼe halöwö ba niha böʼö? (Faigi kotak ”Tani Wa Abua Khöda ba Wameʼe Halöwöda ba Niha Böʼö.”)

⁴ Itaria abua khö ndra talifusöda si no alawa ndröfi ba wameʼe halöwö khö ndra talifusöda si bohou ebua. Tola manö afatö dödöra börö me tebai saʼae lafalua halöwö somasi ira. Mazui, so khöra waʼaombö-aombö dödö ma lö aʼozu halöwö daʼö na tenga yaʼira zamalua. Tola manö göi so ba dödöra wa tebai lafahaʼö niha böʼö börö me ambö ginötöra. Andrö, moguna so waʼebolo dödö ba zi bohou ebua na lö nasa nibeʼe khöra halöwö.

5. Hadia manö wanofu-nofu ditutunöda ba wamahaʼö daʼa?

⁵ Hana wa moguna sibai latolo zi bohou ebua ira talifusöda si no alawa ndröfi enaʼö oya halöwö nifaluara? Hewisa wamaluara daʼö? (II Timoteo 2:2) Hana wa moguna laʼoromaʼö bua-bua satulö ira talifusöda si bohou ebua ba ginötö falulu fohalöwö ira khö ndra talifusöda si no alawa ndröfi hegöi si no ara ba wamati? Hana wa moguna lafahaʼö ira khö ndra talifusöda si no alawa ndröfi? Datatutunö hewisa wamahaʼö Razo Dawido ononia ba wamalua halöwö sabölö moguna.

IFAHAʼÖ ZELOMO DAWIDO

6. Hadia zomasi ifalua Razo Dawido? Hadia niwaʼö Yehowa khönia?

⁶ Ba zi hauga fakhe, göna folohi Dawido irege faböʼö-böʼö nahiania woloi. Aefa daʼö, me no tobali ia razo, toröi ia ba nomo si sökhi sibai. Andrö wa imane khö Zamaʼeleʼö sotöi Natano, ”Hiza, yaʼo, ba ba nomo eresi sodo, ba ha oloso nose dawöla goroisa Yehowa.” Omasi Dawido ba wamazökhi omo Yehowa si sökhi sibai. Imane khönia Natano, ”Falua hadia ia zi so ba dödöu, itoloʼö sa Lowalangi.” Hizaʼi tenga daʼö zomasi Yehowa. Ifatenge Natano ba wangumaʼö khö Dawido, ”Tenga yaʼugö zolau nahiagu omo.” Hewaʼae ifabuʼu Yehowa wa lö aetu fao-fao Ia khö Dawido, teʼombakhaʼö khönia wa samösa moroi ba gotalua nononia dania zangehaogö omo Lowalangi. Hadia nifalua Dawido?​—I Ngaʼötö 17:1-4, 8, 11, 12; 29:1.

7. Hadia nifalua Dawido sanandrösa ba wanuturu lala nibeʼe Yehowa?

⁷ Tola manö afatö dödö Dawido börö me sindruhu-ndruhu omasi ia wamazökhi omo Yehowa. Hewaʼae simanö, lö aetu ituhini halöwö nifalua nononia sotöi Zelomo. Itolo göi ba wamöföʼö ndra sohalöwö hegöi ba wangowuloi ziʼöli, tembaga, firö, anaʼa ba eu. Si so ba dödönia tenga haniha zanema töi ba wangehaogö omo Lowalangi andrö. Ba gafuriata, lafotöi ia omo Lowalangi nifazökhi Zelomo. Ifarou dödö Zelomo Dawido imane, ’Ba iyaʼe saʼae, yaʼugö onogu, ba yamutoloʼö Yehowa, enaʼö mofozu wolaumö, ba enaʼö ölau nomo andrö khö Lowalangiu, Yehowa, simane nifabuʼunia, nitandrösaigö khöu.’​—I Ngaʼötö 22:11, 14-16.

8. Hana wa no irai tumbu ba dödö Dawido wa tebai nasa ifazökhi nomo Lowalangi Zelomo? Hizaʼi, hadia nifalua Dawido?

⁸ Baso I Ngaʼötö 22:5. Te no irai so ba dödö Dawido wa tebai nasa ifalua halöwö sabölö moguna andre Zelomo. Omo Lowalangi andrö ”lö tola lö ebua sibai”, ba ba ginötö daʼö ”iraono” ba ”sambö faʼabeʼe” nasa Zelomo. Hizaʼi, iʼila Dawido wa hasambalö itolo Zelomo Yehowa ba wamalua halöwö sebua andre. Daʼö mbörö wa ifalua hadia ia zi tola ifalua Dawido ba wanolo Zelomo wohenaigö fefu zoguna ba halöwö sebua andre.

OMUSO DÖDÖDA BÖRÖ ME TAFAHAʼÖ NIHA BÖʼÖ

9. Hewisa enaʼö omuso dödö ndra talifusöda si no alawa ndröfi ba ginötö labeʼe halöwö ba niha böʼö? Beʼe duma-duma.

⁹ Böi afatö dödö ndra talifusöda si no alawa ndröfi ba ginötö labeʼe halöwö khö ndra talifusöda si bohou ebua. Aboto ba dödöda wa sabölö moguna yaʼia daʼö ba wamalua halöwö si no ibeʼe Yehowa. Tola alua daʼö na no tefomaha ndra talifusöda si bohou ebua ba wamalua halöwö daʼa. Khalaigö atö daʼa. Me ide-ide nasa ndraʼugö, te no irai öʼila hewisa na iʼohe moto bapamö. Me no itugu ebua ndraʼugö, ifahaʼö ndraʼugö ba wolohe moto. Na no so SIM-mö, tola öʼohe saʼae moto. Hewaʼae simanö, lö aetu ibeʼe khömö wanuturu lala bapamö. Itaria göi mifalali ami ba wolohe. Hizaʼi, na itugu alawa ndröfinia saʼae, yaʼugö zasese wolohe moto. Hadia ide-ide dödö bapamö? Tatu löʼö. Omuso dödönia börö me yaʼugö zolohe yaʼia. Simane daʼö göi ndra talifusöda si no alawa ndröfi, omuso dödöra ba ginötö laʼila ndra talifusöda si bohou ebua si no lafahaʼö latemaʼö halöwö moroi ba organisasi Yehowa.

10. Hewisa dödö Moze sanandrösa ba lakhömi hegöi halöwö?

¹⁰ Moguna taʼangenanöi enaʼö böi afökhö dödöda na so halöwö nibeʼe ba niha böʼö. Tola tafahaʼö ita khö Moze me so ösa ndraono Gizaraʼeli laʼosamaʼeleʼö ira. (Baso IV Moze 11:24-29.) Omasi itegu ira Yosua, hizaʼi imane Moze, ”Hadia yaʼugö zameʼe lala khögu? Enaʼö na samaʼeleʼö manö mbanua Yehowa fefu, enaʼö ifaʼema khöra gehehania Yehowa!” Iʼila Moze wa Yehowa zameʼe khöra halöwö daʼö. Moroi na iʼalui lakhöminia samösa, omasi ia na fefu nono mbanua Lowalangi latema halöwö. Hewisa ita? Hadia omuso dödöda ba ginötö so ndra talifusö sanemaʼö halöwö moroi khö Yehowa?

11. Hadia niwaʼö samösa dalifusöda ira matua sanandrösa ba wameʼe halöwö ba niha böʼö?

¹¹ Ato ndra talifusöda si no mamalua halöwö khö Yehowa ngafulu fakhe waʼara. So göi ndra talifusöda si bohou ebua si no lafahaʼö ba wamalua halöwö soya. Duma-dumania, talifusöda sotöi Peter. No 74 fakhe ihalö halöwö safönu inötö, 35 fakhe mohalöwö ia ba gödo ndraha Eropa. No ara tobali ia pengawas Departemen Dinas. Aefa daʼö, tebeʼe halöwö daʼa khö Paul, talifusöda ira matua si bohou ebua si no ifahaʼö Peter. Hadia afatö dödö Peter ba zi no mubulöʼö andre? Löʼö. Imane, ”Omuso dödögu börö me so ndra talifusöda si no mufahaʼö ba wanemaʼö halöwö sabölö ebua andre. Sökhi sibai wamaluara halöwö andrö.”

FOSUMANGE NIHA SABÖLÖ ATUA

12. Hadia wamahaʼö nihalöda moroi ba duma-duma Rehabeamo?

¹² Me tobali razo nono Zelomo sotöi Rehabeamo, iʼandrö wanuturu lala ba niha sabölö atua moroi khönia sanandrösa ba lala nifaluania ba halöwö si bohou andrö. Hizaʼi, itimbagö wanuturu lala andrö! Iʼoʼö wanuturu lala nibeʼe ndra awönia si fagölö ndröfi khönia. Lua-luania, fangabu dödö. (II Ngaʼötö 10:6-11, 19) Hadia wamahaʼönia khöda? Moguna taʼandrö ba taʼameʼegö tödö wanuturu lala moroi ba niha si no alawa ndröfi hegöi si no ara ba wamati. Sindruhusa wa lö mufaso ndra talifusöda si bohou ebua ba wamalua hadia ia nifalua ndra talifusöda si no alawa ndröfi. Hizaʼi, moguna göi laʼameʼegö tödö mbua wangera-ngera ndra talifusöda si no alawa ndröfi ba böi alio lahalö gangetula wa lö mofozu lala nibeʼera andrö.

13. Hadia zinangea lafalua ira talifusöda si bohou ebua ba ginötö falulu fohalöwö ira khö ndra talifusöda si no alawa ndröfi?

¹³ Itaria, ira talifusöda si bohou ebua labeʼe halöwöra ba wamaigi-maigi halöwö ndra talifusöda si no alawa ndröfi hegöi si no aro ba wamati. Hewaʼae simanö, moguna göi lafahaʼö ira khö ndra talifusöda si no alawa ndröfi. Simane duma-duma no mege, imane Paul sohalöwö ba Mbetieli sogatini Peter tobali pengawas departemen, ”Uʼandrö wanuturu lala moroi khö Peter, ba ufarou göi dödö ndra talifusöda si so ba departemen ba wamalua simane daʼö.”

14. Hadia wamahaʼö nihalöda khö Waulo hegöi Timoteo ba ginötö falulu fohalöwö?

¹⁴ Aröu faehu waʼawuyu-wuyu Dimoteo moroi khö Waulo, ba no hauga fakhe saʼae falulu fohalöwö ira. (Baso Filifi 2:20-22.) Imane Faulo ba niha Korindro, ”Ufatenge khömi Dimoteo andrö, onogu andrö, ba khö Zoʼaya, somasi ndraʼo, si lö faröi, daʼö dania zamasugi ba dödömi lala andrö khögu, ba khö Keriso Yesu, simane famahaʼögu fefu gofu heza, ba mbanua fefu.” (I Korindro 4:17) Ba daʼö taʼila wa Faulo hegöi Timoteo, falulu fohalöwö ira ba faoma latolo nawöra. Ibeʼe ginötönia Faulo ba wamahaʼö Dimoteo ’lala andrö khönia, ba khö Keriso Yesu’, ba ihaogö ifahaʼö ia Dimoteo. Iʼomasiʼö sibai Dimoteo Faulo. Faduhu dödönia khö Dimoteo wa hasambalö iʼameʼegö tödö zoguna khö ndra talifusö si so ba Korindro. Tola laʼoʼö hadia nifalua Waulo andre ira satua sokubaloi ba ginötö lafahaʼö ndra talifusöda ira matua ba wangai halöwö ba mbanua niha Keriso.

FEFU ITA TAʼOKHÖGÖ HALÖWÖ SABÖLÖ MOGUNA

15. Hewisa wanolo Roma 12:3-5 yaʼita enaʼö tatemaʼö hadia ia zi tebulö?

¹⁵ No so ita ba ginötö si tohude, börö me itugu tedou organisasi Yehowa si so ba gulidanö andre. Eluahania, oya zi tebulö salua. Tola molua-lua ba waʼaurida hadia zi tebulö andrö ba lö aoha ba wamalua daʼö. Hizaʼi, na so khöda wangide-ngideʼö ba taʼosambuaʼö dödöda ba wamalua halöwö fanuriaigö moroi ba zomasi dödöda, tola tetolo ita. Na tafalua daʼa, so khöda wahasara dödö. Isura Faulo ba niha Keriso si so ba Roma, ”Uwaʼö sa khömi, dozi ami, . . . böi fayaŵa zamösana, ha ndrohu-ndrohu, era-era zatua-tua yamuʼalui.” Aefa daʼö, itutunö wa hulö simane ndroto-ndroto mboto si faböʼö-böʼö gunania, simane daʼö göi ndra talifusöda ba mbanua niha Keriso, faböʼö-böʼö halöwöra.​—Roma 12:3-5.

16. Hadia manö zi tola lafalua ira niha Keriso enaʼö so waʼatulö hegöi fahasara dödö ba organisasi Yehowa?

¹⁶ Fefu nono mbanua Yehowa, omasi ira latuhini Mbanua Lowalangi ba lafalua gofu hadia ia niʼandrö khöra. Talifusöda si no alawa ndröfi, tola lafahaʼö zi bohou ebua. Tola ladouʼö wangai halöwö ira si bohou ebua si fao fangide-ngideʼö ba famosumange satulö. Fefu ndra talifusöda ira matua si no mangowalu, tola göi laʼameʼegö tödö wanolo moroi khö woʼomora ba ginötö so zi tebulö. Foʼomo ira alawe göi tola laʼoʼö duma-duma Ferikila, si lö faröi ba wanolo woʼomonia sotöi Akila.​—Halöwö Zinenge 18:2.

17. Ifahaʼö ndra nifahaʼönia Yesu ba wamalua hadia ia?

¹⁷ Ibeʼe duma-duma si sökhi Yesu sanandrösa ba wamahaʼö niha böʼö. Iʼila Yesu wa moguna so niha böʼö zanohugö halöwönia andrö. Tatu aboto ba dödönia wa lö moʼahonoa ndra nifahaʼönia. Hizaʼi, faduhu göi dödönia wa tola lafalua halöwö sabölö ebua moroi ba nifaluania. (Yohane 14:12) Ihaogö wamahaʼö yaʼira irege tola lafalua halöwö fanuriaigö ba zi sagörö ulidanö.​—Kolose 1:23.

18. Hadia halöwö niʼokhögöda ba zi so miföna? Hadia halöwö niʼokhögöda iadaʼa?

¹⁸ Me no aefa mate Yesu, isusugi ia Yehowa ba ibeʼe khönia halöwö si tohude. Halöwö nibeʼe khönia abölö ”alawa yaŵa zamatörö andrö fefu, ba yaŵa zalaŵa andrö, ba yaŵa zabölö, ba yaŵa zoʼaya andrö”. (Efeso 1:19-21) Hewaʼae mate ita fatua lö tohare Hamagedo, hizaʼi na tobali ita samosumange Yehowa si lö faröi hasambalö tesusugi ita ba tatema halöwö si sökhi sibai ba gulidanö si bohou. Iadaʼa, fefu ita tafalua halöwö si sökhi yaʼia daʼö ba wanuriaigö turia somuso dödö hegöi ba wamahaʼö niha böʼö. Andrö, he iraono mazui si no alawa ndröfi ’yaʼaʼoi so khöda wangai halöwö Zoʼaya andrö, böi yamamalö-malö’.​—I Korindro 15:58.