Bua Nitemagu Börö Me Fariawö Ndraʼodo ba Niha Satua-tua

ITÖRÖ tödögu ba zi hulö wongi sokafu sibai ba zi hauga fakhe silalö ba Brookings, South Dakota, AS. Urasoi wa ba zi lö aratö itugu okafu zalua. Ba zi sambua nahia wogili gulitö so ndraʼodo hegöi niha tanö böʼö si lö atoto. Mogikhi ndraʼaga ba waʼokafu börö me lö hadöi fakake fangaukhu ba daʼö. Mozizio ndraʼaga ba zi tambai nahia nidanö sebua, ba okafu sibai nidanönia! Daʼututunö maʼifu waö-waö waʼaurigu me ide-ide ndraʼodo enaʼö aboto ba dödömö hana wa so ndraʼaga ba nahia andrö.

ÖSI NOMOGU

Tumbu ndraʼo me 7 mbaŵa si Tölu 1936. So daöfa ndraʼaga ndraono, ba yaʼodo ziakhi. Toröi ndraʼaga ba kabu side-ide si so tanö ba gatumbukha South Dakota. Fananö zinanö halöwöma, hizaʼi tenga daʼö zabölö maʼofönaiʼö. Tebayagö idanö zatuagu tobali Samaduhuʼö Yehowa me döfi 1934. No lalulu waʼaurira khö Yehowa. Famalua gohitö dödö Lowalangi zabölö laʼofönaiʼö. Töi bapagu yaʼia daʼö Clarence. Yaʼia hegöi sibayagu sotöi Alfred, tobali ira hamba sidang (iadaʼa tefotöi ia koordinator badan penatua) ba mbanua niha Keriso si so yaʼaga ba Conde, South Dakota.

Lö irai maröi weʼamöi ba gangowuloa hegöi fanuriaigö ba nomo omo ba wanutunö ba niha sanandrösa ba dötönafö sahöli-höli dödöda ba zi so miföna si so ba Zura Niʼamoniʼö. Duma-duma hegöi famomaha nibeʼe zatuama, zanolo yaʼaga ba wangomasiʼö Yehowa. Yaʼodo hegöi gaʼagu ira alawe sotöi Dorothy, tobali ndraʼaga sanuriaigö Mbanua Lowalangi me önö fakhe ndröfima. Me döfi 1943, fao ndraodo ba Sekolah Pelayanan Teokratis, sawena sibai mufalua.

Omuso sibai dödöma ero so kebaktian. Itörö tödögu kebaktian me döfi 1949 ba Sioux Falls, South Dakota. Ifaʼema huhuo talifusöda Grant Suiter, tuhonia ”Alio Ia moroi ba Niʼangeraigömö!” Itandrösaigö wa fefu niha Keriso si no tebayagö idanö moguna laʼogunaʼö waʼaurira ba wamalua halöwö fanuriaigö turia somuso dödö sanandrösa ba Mbanua Lowalangi. Aefa daʼö, ululu waʼaurigu khö Yehowa. Me 12 mbaŵa si Felezara 1949, tebayagö ndraʼo idanö ba kebaktian wilayah ba Brookings. Daʼö mbörö wa so ndraʼodo ba nahia wogili gulitö simane si no ututunö moroi yawa. So daöfa ndraʼaga nibayagö idanö ba zi sambua mbaʼa nidanö sebua nifazökhi moroi ba ziʼöli. Ba mabalo-baloi daʼö.

Aefa daʼö, uhalö gangetula wa ulau merintis. Ubörötaigö ia me 1 mbaŵa si Sara 1952, me 15 fakhe ndröfigu. Imane Sura Niʼamoniʼö, ”Si fao-fao ba zatua-tua, ba atua-tua dania.” Ato niha satua-tua ba nösi nomogu sanuhini yaʼo ba wangai angetula tobali perintis. (Gamaedola 13:20) Asese fao ndraʼo manuriaigö khö zibayagu sotöi Julius, no 60 fakhe ndröfinia. Hewaʼae atua ndröfinia moroi khögu, tola owua-wua dödöma ba wanuriaigö. Oya wamahaʼö nihalögu khönia hegöi ba waö-waö waʼaurinia. Lö ara aefa daʼö, ilau göi merintis Dorothy.

ITOLO NDRAʼODO SATUA SAMASUI

Me awuyu-wuyudo, ato ndra satua samasui hegöi foʼomora zi no irai lakaoni ira satuagu enaʼö toröi ira khöma. So sambua fongambatö zabölö manolo yaʼo yaʼia daʼö Jesse ba Lynn Cantwell. Laʼameʼegö tödö sibai ndraʼo ba lafarou dödögu. Na möi ira ba mbanua niha Keriso sahatö ba nomogu, itaria ladönisi ndraʼo wefao khöra ba wanuriaigö. Omuso sibai dödögu fariawö khöra! Omasido uʼogunaʼö ginötögu ba wamalua halöwö khö Yehowa ba tobali perintis simane yaʼira.

Satua samasui khöma aefa daʼö, Bud Miller. Me möi ia hegöi foʼomonia Joan ba mbanua niha Keriso si so yaʼaga, awena 18 fakhe ndröfigu. Ba ginötö daʼö lakaoni ndraʼo ira panitia wajib militer. Omasi ira na ufalua halöwö si lö tefaudu ba niwaʼö Yesu enaʼö lö ebua dambai ita ba politik. Hizaʼi, omasido wanuriaigö turia somuso dödö sanandrösa ba Mbanua Lowalangi. (Yohane 15:19) Uʼandrö enaʼö lafuli lafatimbaisi gangetulara andrö börö me yaʼodo samösa sanuriaigö.

Omuso sibai dödögu me möi awögu dalifusöda Miller ba wamalukhaisi ndra panitia andrö. Lö aila ia ba lö khönia faʼataʼu ba niha. Oya ayati Zura Niʼamoniʼö niʼilania. Daʼa zameʼe khögu faʼabarani! Me döfi 1954, latema gangandröwagu ira panitia tobali sanuriaigö. Iadaʼa, lö hadöi daha-tahagu ba wamalua somasi Yehowa.

Lö ara aefa daʼö, lakaoni ndraʼo mohalöwö ba Mbetieli, me luo daʼö lafotöi ia Perladangan Menara Pengawal, ba Staten Island, New York. Mohalöwö ndraʼo ba daʼö tölu fakhe waʼarania. Oya wamahaʼö nihalögu börö me falulu fohalöwö ndraʼo khö ndra talifusöda sagatua-tua.

MOHALÖWÖ BA MBETIELI

Ba kabu si so ba Staten Island, so stasiun radio WBBR. Laʼogunaʼö daʼö ira Samaduhuʼö Yehowa iʼotarai dröfi 1924 irugi 1957. Ha 15 irugi 20 niha nösi nomo Mbetieli zohalöwö ba daʼö. Ato ba gotaluama zagawuyu-wuyu ba lö hadöi faʼatua-tuama ba wamalua halöwö daʼö. Hizaʼi, samösa dalifusöda salawa dröfi si no mubayoini sotöi Eldon Woodworth, fao ia khöma wohalöwö. Hulö zatuama ia ba oya wamahaʼö nibeʼenia khöma. Itaria na so watitisa ba gotaluama, imane khöma talifusöda Woodworth, ”Baga sibai nifalua Lowalangi lö. Iʼogunaʼö niha si lö moʼahonoa ba wamalua halöwönia.”

Fao göi khöma dalifusöda Frederick W. Franz ba itolo göi ndraʼaga. Atua-tua ia ba oya niʼilania nösi Zura Niʼamoniʼö. Ba iʼameʼegö tödö sibai ndraʼaga. Sondrino göma yaʼia daʼö Harry Peterson. Töinia sindruhu Harry Papargyropoulos, hizaʼi aoha khöma wanötöi Peterson. Yaʼia andre samösa talifusöda nibayoini, ba omasi sibai ia manuriaigö. Hewaʼae oya halowö dalifusöda Peterson ba Mbetieli hizaʼi hasambalö owölö-ölö ia ba wanuriaigö. Ibeʼe ngaotu majalah ero waŵa. Oya sibai niʼilania nösi Zura Niʼamoniʼö, ba iʼila ibeʼe wanema li moroi ba wanofu-nofuma.

UFAHAʼÖDO MOROI KHÖ NDRA TALIFUSÖDA IRA ALAWE SATUA-TUA

Matanö zinanö hegöi sayu ba kabu ba maʼiröʼö ia ba kale-kale. Ba zi döfi, so mato 21.300 dumba mbua zinanö hegoi sayu nibelema ba kale-kale si tola laʼogunaʼö ösi nomo Mbetieli. Fao ndraʼodo wohalöwö khö dalifusöda ira alawe satua-tua sotoi Etta Huth. Yaʼia zangehaogö resep zinanö hegöi sayu nifazökhima. Ira talifusöda si toröi sahatö ba daʼö fao ira wohalöwö khöma, ba itatugöi ginötö wohalöwöra Etta. Hewaʼae atua-tua sibai Etta ba halöwö daʼö, lö aetu iʼameʼegö tödö ndra talifusöda samaigi-maigi halöwö andrö ba kabu. Tobali duma-duma ia khöma.

So samösa dalifusöda ira alawe sawuyu-wuyu sotöi Angela Romano mazui töinia böʼö Angie, sanolo yaʼaga ba kabu andrö. Etta zamahaʼö yaʼia ba Zura Niʼamoniʼö. Mangowalu ndraʼo khö Angie me baŵa si Öfa 1958, ba no 58 fakhe fao ndraʼaga ba wamosumange Yehowa. Faʼalöfaröi Angie khö Yehowa ba zi hauga fakhe, daʼö zangaroʼö fongambatöma. Atua-tua sibai ia, ba tola uʼodaligö ia gofu hadia gabula dödö salua khöma.

MOHALÖWÖ TOBALI UTUSAN INJIL BA SATUA SAMASUI

Me lafamawa stasiun radio WBBR si so ba Staten Island me 1957, ufuli mohalöwö ba Mbetieli Brooklyn hewaʼae lö arara. Aheta ndraʼo moroi ba Mbetieli me no aefa mangowaludo khö Angie. Tölu fakhe faʼara, merintis ndraʼaga ba Staten Island. Ba no irai mohalöwödo ba niha sowöli stasiun radio andrö, ba no lafaböʼöini döinia tobali WPOW.

Maʼöna-önaiʼö waʼaurima Angie enaʼö tola manuriaigö ndraʼaga gofu hezoso laʼogunaʼö. Buania, matema wogaoni tobali perintis istimewa me döfi 1961 ba Falls City, Nebraska. Lö ara me no marugi ba mbanua daʼö, lakaoni ndraʼaga weʼamöi ba South Lansing, New York wefao ba Sekolah Pelayanan Kerajaan sara waŵa waʼara. Owua-wua dödöma wanema famahaʼö daʼö. Me no aefa zekola, mawalinga lafuli lafohalöwö ndraʼaga ba Nebraska. Hizaʼi, labeʼe khöma halöwö si bohou, lafatenge ndraʼaga tobali utusan injil ba Kamboja! Ba mbanua si sökhi sibai si so ba Asia Tanö Raya Gatumbukha, ba daʼö mafaigi, marongo, ba marasoi nahia si bohou. Omasiga sibai maturiaigö ba niha si so ba daʼö duria somuso dödö sanandrösa ba Mbanua Lowalangi.

Hizaʼi, börö me no faböʼö politik ba Kamboja, andrö wa möi ndraʼaga ba Vietnam Tanö Raya. Me no dua fakhe toröi ndraʼaga ba daʼö, abölö-bölö sibai wökhögu andrö wa mafuliga ba Amerika Serikat. Ulau molombase enaʼö döhö wökhögu, ba mafuli malau merintis.

Me baŵa si Tölu 1965, ibörötaigö mafalua halöwö wamasui ba mbanua niha Keriso. Ba zi 33 fakhe, owua-wua dödögu tobali satua samasui hegöi distrik, ba matolo ba wamalua kebaktian. Omasido sibai halöwö daʼa börö me adöni dödögu ero so kebaktian. Ba zi hauga fakhe, möi ndraʼaga ba mbanua niha Keriso si so ba New York City hegöi si fasui yaʼia, ba möi ndraʼaga ba kebaktian nifalua ba Yankee Stadium.

MANGAWULIGA BA MBETIELI HEGÖI BA SEKOLA-SEKOLA TEOKRATIS

Ba zi hauga fakhe, oya halöwö si bohou nitemama, ba itaria lö aoha wamalua yaʼia. Me döfi 1995, laʼandrö khögu tobali samahaʼö ba Sekolah Pelatihan Pelayanan. Tölu fakhe aefa daʼö lakaoni ndraʼaga zui tobali sohalöwö ba Mbetieli. Omuso sibai dödögu börö me ba zi 40 fakhe silalö, ubörögö tobali sohalöwö safönu inötö ba Mbetieli. Mohalöwö ndraʼo ba Departemen Dinas ba tobali instruktur ba ngawalö zekola. Me 2007, lafazökhi Departemen Sekolah-Sekolah Teokratis ira Boto Solohe ba wotatugöi fefu zekola nifalua ba Mbetieli. Ba zi hauga fakhe yaʼodo zamaigi-maigi departemen daʼö.

Ba zi hauga fakhe silalö, oya zi tebulö ba wamalua ngawalö zekola ba Mbetieli. Sekolah bagi Penatua Sidang tebörögö me 2008. Dua fakhe aefa daʼö, töra 12.000 ndra satua sokubaloi nifahaʼö ba Patterson hegöi ba Mbetieli si so ba Brooklyn. Iadaʼa lafalua zekola daʼa ba ngawalö nahia si faböʼö-böʼö. Me döfi 2010, lafaböʼöni döi Sekolah Pelatihan Pelayanan tobali Sekolah Alkitab bagi Saudara Lajang, ba so zekola sawena lafazökhi yaʼia daʼö Sekolah Alkitab bagi Pasangan Kristen.

Me baŵa si Siwa 2014, teʼosambuaʼö wamalua zi dombua zekola andre tobali Sekolah bagi Penginjil Kerajaan. Tola fao ndra talifusöda si no mangowalu, hegöi si lö sangowalu. Omuso dödö ndra talifusöda moroi ba ngawalö soi me larongo wa tefalua göi zekola daʼö ba mbanua si so yaʼira. Omuso göi dödögu börö me ato ndra talifusöda si tola fao ba zekola daʼö. Ba uʼandrö göi saohagölö börö me uʼila wa ato niha zombulöʼö faʼaurira ba wamalua famahaʼö si no latema.

Na ifuli utörö tödögu waö-waö waʼaurigu me tebayagö ndraʼo idanö ba nahia wogili gulitö sokafu-kafu irugi iadaʼa, uʼandrö saohagölö khö Yehowa börö me ato niha satua-tua si no ufalukhaisi. Latolo ndraʼo enaʼö tola aro wahuwusagu khö Yehowa ba tola ufosumange ia. So zawuyu-wuyu ba satua moroi khögu. Hewaʼae faböʼö-böʼö mbanuara, hizaʼi oroma ba nifaluara wa laʼomasiʼö sibai Yehowa. Uʼandrö sibai saohagölö börö me tola fariawö ndraʼo ba niha satua-tua ba gotalua nono mbanua Yehowa ba tola ufahaʼö ndraʼo khöra.