Lafomaha Genoni Mbanua Lowalangi

1-3. Hewisa Yesu ba wamöfögö halöwö fanuriaigö enaʼö tefaʼema ba zi sagörö ulidanö, ba hadia zi tobali fanofu?

DUA fakhe manuriaigö Yesu ba Galilea. (Baso Mataiʼo 9:35-38.) Oya iʼanöröi mbanua sebua hegöi side-ide, mamahaʼö ia ba sinagoga ba manuriaigö turia si sökhi sanandrösa ba Mbanua Lowalangi. Gofu hezo manuriaigö ia, ato zohurufai yaʼia. Imane Yesu, ”Ebolo sa mbasitö”, ba moguna ato zohalöwö.

² Iföfögö halöwö fanuriaigö Yesu enaʼö tefaʼema misa. Lalania? Ifatenge 12 zinengenia ”ba wanuriaigö banua Lowalangi”. (Luk. 9:1, 2) Te manofu-nofu ndra nifahaʼönia ba halöwö andre. Fatua lö ifatenge ira, ibeʼe khöra wamomaha Yesu si fao faʼomasi simane si no itema moroi khö Namania ba zorugo.

³ Oya wanofu si tumbu ba gera-erada: Hadia wamomaha nitema Yesu khö Namania? Hadia wamomaha nibeʼe Yesu khö ndra sinengenia? Ba, hewisa iadaʼa—hadia ifomaha niha soloʼö khönia Razo Mesia ba wanuriaigö? Na yaʼia, hewisa wamaluania?

”Uʼoʼö Wamahaʼö Namagu Yaʼo, Daʼö Huhuogu”

4. Hamega ba hezo so itema Yesu wamahaʼö moroi khö Namania?

⁴ Ifaduhuʼö Yesu wa Amania zamomaha yaʼia. Me ifalua halöwö fanuriaigö imane Yesu, ”Uʼoʼö wamahaʼö Namagu yaʼo, daʼö huhuogu.” (Yoh. 8:28) Hamega ba hezo mamomaha Yesu? Famomahania tebörögö me iwöwöi ia Lowalangi tobali Ono siaʼa khönia. (Kol. 1:15) Ba zinga Namania ba zorugo, ihaogö ifondro-ndrongo Ononia ba tebai muʼerai hauga ngaotu fakhe fao ia khö ’Zamahaö yaʼia’. (Yes. 30:20) Buania, itema Ononia wamomaha si tebai takhalaigö simane amuata, halöwö, ba ohitö dödö Namania.

5. Hadia wanuturu lala nibeʼe Nama khö Nononia sanandrösa ba halöwö sedöna ifalua ba gulidanö?

⁵ Ba ginötönia, ifomaha Yehowa Nononia sanandrösa ba halöwö fanuriaigö nifaluania ba gulidanö. Datafaigi zi no tefaʼeleʼö sanandrösa ba gamakhaita Zamahaʼö khö Nononia siaʼa. (Baso Yesaya 50:4, 5.) Imane ba wamaʼeleʼö andrö wa isusugi Yehowa Nononia ”ero mahemolu”. Duma-duma daʼö zangombakha khöda hewisa zi samösa guru ba wanusugi iraono nifahaʼönia ero sihulö wongi ba wamomaha yaʼira. Imane sambua karya referensi Zura Niʼamoniʼö, ”Yehowa . . . iʼohe nononia ba zekola hulö simane samösa ono zekola aefa daʼö ifomaha ba wanuriaigö.” Ifahaʼö ba ”zekola” Nononia Yehowa ba zorugo, ”hadia niwaʼögu, hadia wehedegu”. (Yoh. 12:49) Ibeʼe Ama wanuturu lala khö Nononia sanandrösa ba wamahaʼö.a Me so Yesu ba gulidanö, tenga ha iʼogunaʼö wamahaʼö nibeʼe khönia ba wanuriaigö, tobali ifahaʼö göi ndra nifahaʼönia ba wamalua halöwö fanuriaigöra.

6, 7. (a) Hadia wamomaha nibeʼe Yesu khö ndra sinengenia, ba tefaʼanö ira ba wamalua hadia? (b) Hadia wamomaha nihonogöigö Yesu enaʼö latema ira soloʼö khönia iadaʼa?

⁶ Hadia wamomaha nibeʼe Yesu khö ndra sinengenia simane nitutunöda ba wamobörö? Moloʼö Mataiʼo faza 10, ihaogö ibeʼe khöra wanuturu lala sanandrösa ba wanuriaigö, si tefarahu: manuriaigö hezo (ayati 5, 6), hadia duriania (ayati 7), moguna muʼodaligö Yehowa (ayati 9, 10), lala ba wangondrasi sokhö omo (ayati 11-13), lala na lö latema ita sokhö omo (ayati 14, 15), ba na göna ita fanandraigö (ayati 16-23).b Famomaha si no ibeʼe Yesu andre khö ndra sinengenia ba wamaʼanö yaʼira börö me yaʼira zangagö föna ba wanuriaigö turia si sökhi me döfi siföföna M.

⁷ Hewisa göi ba ginötöda andre? Yesu, Razo Mbanua Lowalangi, no ibeʼe halöwö sabölö moguna khö ndra nifahaʼönia yaʼia daʼö ba wanuriaigö ’banua Lowalangi andrö . . . ba gulidanö misa maʼasagörö’. (Mat. 24:14) Hadia no ifahaʼö ita Razo ba wamalua halöwö sabölö moguna andre? Noa! No ihonogöi Razo moroi ba zorugö enaʼö latema ira nifahaʼönia wamomaha sanandrösa ba wanuriaigö ba fao ia khö ndra talifusöda ba wamalua halöwö.

Lafomaha Ndra Enoni Tobali Sanuriaigö

8, 9. (a) Hadia gohitö dödö wa mufalua Sekolah Pelayanan Teokratis? (b) Hewisa gangowuloa barö migu möi fanolomö enaʼö onekhe ba wanuriaigö?

⁸ No ara iʼogunaʼö organisasinia Yehowa simane kebaktian hegöi angowuloa, duma-dumania Angowuloa ba Wanuriaigö ba wamomaha ono mbanua Lowalangi ba wanuriaigö. Hewaʼae simanö, iʼotarai 1940-an ira talifusöda sondröniaʼö ba gödo sebua no labörögö wamomaha andre ba ngawalö sekola.

⁹ Sekolah Pelayanan Teokratis. Simane niʼilada ba faza si no tataluʼi, no tebörögö sekola daʼa me 1943. Hadia ha daʼö gohitö dödö ba zekola andre me mböröta enaʼö onekhe ba wamaʼema huhuo ba mbanua niha Keriso? Tenga. Ohitö dödönia yaʼia daʼö ba wamomaha ono mbanua Lowalangi ba wangogunaʼö fehedera ba wanuno Yehowa ba wanuriaigö. (Zin. 150:6) Sekola daʼa zamaʼanö ira talifusöda si no mamasuraʼö töira tobali sanuriaigö Banua Lowalangi sowölö-ölö. Iadaʼa, famomaha daʼö so ba gangowuloa barö migu.

10, 11. Haniha zi tola fao ba Sekolah Gilead iadaʼa, ba hadia gohitö dödö kurikulumnia?

¹⁰ Sekolah Alkitab Gilead Menara Pengawal. Tebörögö me hari Sinaya, 1 mbaŵa si Dua 1943 nifotöi Sekolah Alkitab Gilead Menara Pengawal. Lafaʼanö sekola andre ba wamomaha ira perintis ba enoni safönu inötö tanö böʼö ba wamalua halöwö utusan injil ba zi sagörö ulidanö. Hizaʼi, iʼotarai baŵa si Fulu 2011, laʼolaini haniha zi tola tesura töi yaʼia daʼö ira talifusöda perintis istimewa, satua samasui hegöi foʼomora, ösi nomo Mbetieli, ba utusan injil si lö irai fao ba sekola daʼa.

¹¹ Hadia gohitö dödö kurikulum Sekolah Gilead? Imane samösa samahaʼö si no ara, ”Enaʼö aro wamati ndraono sekola ba wamahaʼö ba Daromali Lowalangi ba sanolo yaʼira ba wangokhögö mbua-bua si sökhi ba wamati enaʼö tola lataögö wanandraigö ba halöwö nifaluara. Ohitö dödö tanö böʼö yaʼia daʼö enaʼö tetanögö ba dödöra waʼomasi ba wamalua halöwö fanuriaigö.”​—Ef. 4:11.

12, 13. Hadia lua-luania Sekolah Gilead ba halöwö fanuriaigö ba zi sagörö ulidanö? Beʼe duma-duma.

¹² Hadia lua-luania Sekolah Gilead ba halöwö fanuriaigö ba zi sagörö ulidanö? Töra 8.500 niha zi no lafomaha ba zekola andre iʼotarai 1943,c ba no möi utusan injil Gilead wangai halöwö ba zi töra 170 soi ba zi sagörö ulidanö. Laʼoʼö wamomaha si no latema ira utusan injil andre, tobali ira duma-duma sowölö-ölö ba wanuriaigö ba lafomaha göi niha böʼö wamalua. Yaʼira zangagö föna ba wanuriaigö ba mbanua si lö ato sanuriaigö.

¹³ Datafaigi zalua ba Jepang. Me alua Wasuwöta Gulidanö II, tebato halöwö fanuriaigö si no lafaʼanö. Me baŵa si Walu 1949, lö ikhamö dafulu zanuriaigö ba Jepang. Hizaʼi, ba gangohorita ndröfi andrö, so 13 utusan injil Gilead sowölö-ölö manuriaigö ba Jepang. Itugu monönö utusan injil si möi. Ba wamobörö, laʼosambuaʼö halöwöra ira utusan injil andre manuriaigö ba mbanua segebua; ba gafuriata, findra ira ba mbanua böʼö. Lafarou dödö niha nifahaʼöra hegöi ira talifusöda tanö böʼö enaʼö tobali ira perintis. Fangodödögöra andre so mbuania. Iadaʼa, töra 216.000 zanuriaigö Banua Lowalangi ba Jepang, ba arakhagö 40 persen ba gotaluara zi tobali perintis!d

14. Sekolah-sekolah teokratis andrö tandra hadia? (Faigi kotak ”Sekola-Sekola Famomaha Ndra Sanuriaigö Banua Lowalangi”, ngaʼörö 188.)

¹⁴ Sekolah teokratis tanö böʼö. Ato ndra talifusöda si no tetolo ba Sekolah Dinas Perintis, Sekolah Alkitab bagi Pasangan Kristen, ba Sekolah Alkitab bagi Saudara Lajang ba wondrouʼö famatira ba tobali duma-duma sowölö-ölö ba halöwö fanuriaigö.e Fefu sekolah teokratis daʼa tobali tandra wa no ifaʼanö ita Razoda ba wamalua halöwö fanuriaigö.​—II Tim. 4:5.

Mamomaha Ira Talifusöda ba Wamalua Halöwö

15. Hezo moguna laʼoʼö Yesu ira matua sangai halöwö?

¹⁵ Törö tödöu wamaʼeleʼö Yesaya sanandrösa khö Yesu, nifahaʼö Yehowa. Ba ”sekola” zorugo andrö, ifahaʼö ia Ononia ’enaʼö iʼila iʼokafui zerege tödö huhuonia andrö’. (Yes. 50:4) Ifalua Yesu zi no ifahaʼö ia; me so ia ba gulidanö, iʼokafui dödö ”serege tödö, awö zonoro”. (Mat. 11:28-30) Ba woloʼö khö Yesu, omasi ndra talifusöda ira matua sangai halöwö na tobali ira umbu waʼomuso dödö khö ndra talifusöda. Börö daʼö, oya ngawalö zekola si no lahenaigö khö ndra talifusöda sonekhe enaʼö tefaudu wanolora ira talifusöda.

16, 17. Hadia gohitö dödö wa mufalua Sekolah Pelayanan Kerajaan? (Faigi nisura ba gahe zura.)

¹⁶ Sekolah Pelayanan Kerajaan. Kelas si oföna ba zekola daʼa tebörögö me 9 mbaŵa si Tölu 1959, ba South Lansing, New York. Lakaoni zatua samasui ba enoni ba kursus daʼa, sara waŵa waʼara. Ba gafuriata, lafoʼeluaha kursus daʼa ba li böʼö moroi ba li Inggris, ba tezara-zara wamomaha ira talifusöda ba zekola daʼa ba zi sagörö ulidanö.f

¹⁷ Sanandrösa ba gohitö dödö Sekolah Pelayanan Kerajaan, imane Buku Tahunan Saksi-Saksi Yehuwa 1962 (ba li Inggris), ”Ba gulidanö safönu faʼarörö andre, samösa sondröniaʼö ba mbanua niha Keriso samaduhuʼö Yehowa enaʼö ira matua si tola mombagi inötö, si tola mangonorogö tödö ira talifusöda, ba si tobali howu-howu ba mbanua niha Keriso. Ba ginötö si fagölö, tebai iʼosiwawöi nösi nomonia ha börö mbanua niha Keriso, tobali moguna so khönia waʼatua-tua. Sindruhu-ndruhu inötö si sökhi nibeʼe khö ndra enoni mbanua niha Keriso ba zi sagörö ulidanö si möi ba Sekolah Pelayanan Kerajaan enaʼö lasöndra wamomaha si möi fanolora tobali sondröniaʼö si sökhi moloʼö goi-goi Zura Niʼamoniʼö!”​—I Tim. 3:1-7; Tit. 1:5-9.

18. Hadia gunania ba nono mbanua Lowalangi Sekolah Pelayanan Kerajaan?

¹⁸ Moguna ba nono mbanua Lowalangi Sekolah Pelayanan Kerajaan. Hewisa? Na lafalua ira satua sokubaloi hegöi enoni zi no lafahaʼö ba zekola andrö, simane Yesu, tobali ira umbu waʼomuso dödö khö ndra talifusö ba wamati. Hadia öʼandrö saohagölö wehede si sökhi, me lahaogö lafondro-ndrongo, mazui me möi lafalukhaisi ndraʼugö ba wangaʼaroʼö famatiu? (I Tes. 5:11) Ira talifusöda satua-tua andre tobali howu-howu ba mbanua niha Keriso!

19. Hadia manö nasa sekola nifalua Panitia Pengajaran, ba hadia gohitö dödönia?

¹⁹ Sekolah teokratis tanö böʼö. Panitia Pengajaran moroi ba Mboto Solohe lafaigi-faigi sekola tanö böʼö ba laʼasogö wamomaha khö ndra talifusöda sangai halöwö ba organisasi. Lafaʼanö sekola daʼa ba wanolo ira talifusöda sangai halöwö—satua sokubaloi, satua samasui, ba anggota Panitia Ndraha—enaʼö mowua halöwö nifaluara. Kursus si teʼodane-dane ba Zura Niʼamoniʼö andre zamarou tödö ndra talifusöda enaʼö larorogö wamatira ba lafalua goi-goi Zura Niʼamoniʼö ba ginötö labeʼe wanolo ba nono mbiri-biri Yehowa sebua böli si no tebeʼe khöra.​—I Fet. 5:1-3.

20. Hana wa iwaʼö Yesu fefu ita ”nifahaö Yehowa”, ba hadia gohitö dödöu?

²⁰ Sindruhu-ndruhu wa no ihonogöigö Razo Mesia enaʼö tefaudu wamomaha ira nifahaʼönia. Fefu wamomaha andre iʼotarai moroi yawa numalö mitou: Yehowa zamahaʼö Ononia, ba Ono zamahaʼö niha soloʼö khönia. Andrö wa iwaʼö Yesu yaʼita fefu ”nifahaö Yehowa”. (Yoh. 6:45; Yes. 54:13) Yalötebulö tahalö wamahaʼö moroi ba wamomaha nihenaigö Razoda. Ba, moguna tatörö tödöda wa ohitö dödö si oföna ba sekola andre yaʼia daʼö fanoloda enaʼö aro wamatida ba tola tafalua halöwöda ba wanuriaigö.