Böi Tehegö Taya Waʼomasimö

1, 2. (a) Haʼökhö zi oföna sibai tefaudu ngawua wehede Yesu si so ba Mataiʼo 24:12? (b) Hewisa wangoromaʼö mbuku Halöwö Zinenge wa ato niha Keriso ba götö siföföna zondrorogö enaʼö lö mamalö aro waʼomasira? (Faigi gambara ba wamobörö wamahaʼö.)

ME SO Yesu ba gulidanö, itutunö ba niha hadia manö ’dandra waʼatua danö’. Ba gotaluania, ifaʼeleʼö wa ”ato zi taya faʼomasi”. (Mataiʼo 24:3, 12) Niha Yahudi ba götö siföföna, lawaʼö wa yaʼira andre ono mbanua Lowalangi, hizaʼi itugu taya waʼomasira khö Lowalangi.

² Hewaʼae simanö, ato niha Keriso ba götö daʼö zangokhögö mbua-bua si faböʼö. Owölö-ölö ira ba wanuriaigö ’turia somuso dödö sanandrösa khö Keriso’ ba laforomaʼö waʼomasi khö Lowalangi, ba niha si sara lala famati khöra, hegöi ba niha si lö mangila sindruhu. Yaʼira andre niha Keriso sondrorogö enaʼö lö mamalö aro waʼomasira khö Lowalangi. (Halöwö Zinenge 2:44-47; 5:42) Hizaʼi, so ösa niha Keriso siföföna si taya faʼomasi. Hana wa tola taʼila daʼa?

3. Hadia manö mbörö wa tola taya waʼomasi niha Keriso?

³ Imane Yesu khö ndra niha Keriso siföföna si toröi ba Efeso, ”No öböhöli waʼomasiu ba mböröta andrö.” (Famaʼeleʼö 2:4) Tola manö, ladönisi dödöra ira niha si so ba zifasuira somasi mangomusoiʼö tödöra samösa. (Efeso 2:2, 3) Efeso andre, sambua banua si kayo, irege niha si so ba daʼö laʼofönaiʼö wangalui faʼohahau dödö ba faʼakayo moroi ba danö böʼö. Ato zamalua amuata fohorö ba mbanua andrö ba lö laʼameʼegö tödö goi-goi Lowalangi. Abölö laʼofönaiʼö wangalui tana khöra moroi na laforomaʼö waʼomasi khö Lowalangi hegöi ba niha böʼö.

4. (a) Hewisa wa tola taya waʼomasi ba götöda iadaʼa? (b) Hadia manö zi tölu ngawalö waʼomasi sinangea tarorogö enaʼö böi taya?

⁴ Fehede Yesu sanandrösa ba waʼomasi si taya, alua ia ba götöda iadaʼa. Ato niha si taya faʼomasi khö Lowalangi. Moroi na laʼodaligö Lowalangi ba wangasiwaisi abula dödö salua ba gulidanö, zuta niha sangodaligö organisasi nifazökhi niha. Daʼö mbörö wa itugu taya waʼomasira. Tola göi taya waʼomasi niha samosumange Yehowa simane salua ba mbanua niha Keriso ba Efeso ba götö siföföna. Andrö, datatutunö tölu ngawalö waʼomasi sinangea tarorogö enaʼö böi taya: (1) faʼomasi khö Yehowa, (2) faʼomasi ba zindruhu ba Zura Niʼamoniʼö, ba (3) faʼomasi khö ndra talifusöda.

FAʼOMASI KHÖ YEHOWA

5. Hana wa moguna taʼomasiʼö Lowalangi?

⁵ Haniha zabölö taʼomasiʼö? Imane Yesu, ”’Omasiʼö Zoʼaya yaʼugö, Lowalangiu andrö, moroi siʼaikö ba dödöu, nosou maʼasambua zangomasiʼö yaʼia. Ba öhorigö gera-erau, wangomasiʼö yaʼia.’ Daʼö zebua goroisa, daʼö ziföföna.” (Mataiʼo 22:37, 38) Faʼomasida khö Lowalangi möi fanoloda ba woloʼö oroisania, enaʼö anaugölöda, ba tatimbagö zi lö sökhi. (Baso Zinunö 97:10.) Hizaʼi, Satana hegöi ulidanönia lafalua gofu hadia manö enaʼö tola awuwu ba tekiko waʼomasida khö Lowalangi.

6. Hadia lua-luania na taya waʼomasi niha khö Lowalangi?

⁶ No aröu faehu wamaigi niha gulidanö sanandrösa ba waʼomasi. Moroi na laʼomasiʼö Lowalangi, ato niha ”ha tana khöra laʼalui”. (II Timoteo 3:2) Laʼosambuaʼö wangera-ngerara ha ba ’waʼomasi nösi niha, ba he faʼomasi hörö, ba he fayawasa andrö, ba ganaʼa’. (I Yohane 2:16) No ifangelama ita sinenge sotöi Faulo hadia zalua na taʼofönaiʼö wangomusoiʼö tödöda samösa. Imane, ”Era-era nösi niha sa, ba no faʼamate.” Hadia mbörö? Börö me niha samalua simane daʼö tobali udu Lowalangi. (Roma 8:6, 7) Niha sangosambua tödöra ba wangalui kefe mazui somasi mamalua amuata fohorö, göna ira abula dödö.​—I Korindro 6:18; I Timoteo 6:9, 10.

7. Hadia mbua wangera-ngera si fasala si tola mondrönisi dödö niha Keriso iadaʼa?

⁷ Ato niha ateis, agnostik (niha si faduhu tödö wa tebai aboto ba dödöda Lowalangi) hegöi niha si faduhu tödö ba evolusi, lafarou dödö niha böʼö enaʼö lö laʼomasiʼö Lowalangi mazui enaʼö lö lafaduhusi tödö wa so Lowalangi. Laʼasogö ba wangera-ngera niha wa ha niha si bodo mazui si lö hadöi sekola zi faduhu tödö khö Zomböi. Aefa daʼö, ato niha zoʼameʼegö tödö ndra ilmuwan moroi na laʼameʼegö tödö Zomböi. (Roma 1:25) Tola manö tedönisi dödö niha Keriso ba wangera-ngera simane daʼö. Lua-luania lö aro wahuwusada khö Yehowa ba taya waʼomasida khönia.​—Heberaiʼo 3:12.

8. (a) Hadia manö zalua si tola mangaʼasogö faʼide-ide dödö ba nono mbanua Yehowa? (b) Hewisa wa tola möi fondrara dödöda Zinunö 136?

⁸ Börö me toröi ita ba gulidanö si lö sökhi nifatörö Zatana, andrö wa oya manö dani zi tola mangaʼasogö khöda faʼafatö dödö. (I Yohane 5:19) Hizaʼi, na tatehegö afatö dödöda, tola alö waʼaro wamatida ba taya waʼomasida khö Lowalangi. Duma-dumania, tola manö tataögö gabula dödö börö wökhö, faʼambö zoguna mazui börö me no alawa ndröfida. Tola göi ide-ide dödöda börö me tebai tafalua hadia ia simane ba zomasi ita. Tola afatö dödöda na lö alua hadia nitötönada. Gofu hadia wanandraigö nitaögöda, böi irai so ba wangera-ngerada wa iröi ita Yehowa. Tola taʼangeraigö ngawua wehede sondrara tödöda ba Zinunö 136:23, ”Sanörö tödö yaʼita ba waʼanumanada, me no si lö aetu waʼebua dödönia andrö!” Tola faduhu dödöda wa ifondro-ndrongo ’wangandröda’ Yehowa ba ibeʼe wanema li.​—Zinunö 116:1; 136:24-26.

9. Hadia mbörö wa tola aro waʼomasi Waulo khö Lowalangi?

⁹ Ihaogö iʼangerönusi Faulo hewisa wanolo Yehowa yaʼia, ba daʼa zanolo yaʼia enaʼö lö mamalö aro wamatinia. Isura, ”Soʼaya zanolo yaʼo, lö ataʼu ndraʼo. Hadia nilau niha khögu?” (Heberaiʼo 13:6) Börö me iʼodaligö Yehowa, daʼa zanolo yaʼia ba wangasiwaisi abula dödö ba waʼaurinia. Lö mamalö faduhu dödönia khö Yehowa hewaʼae so ia ba ginötö si basaki. Me so ia ba gurunga, ifaʼoheʼö zura ba mbanua niha Keriso ba wangaʼaroʼö niha Keriso si sara lala wamati khönia. (Efeso 4:1; Filifi 1:7; Filemo 1) Hewaʼae so wanandraigö nitaögö Waulo, lö mamalö irorogö enaʼö aro waʼomasinia khö Yehowa. Iʼodaligö ”Lowalangi wondrara dödö, fefu, sondrara tödöma”. (II Korindro 1:3, 4) Hewisa woloʼöda Waulo?

10. Hewisa wondrorogöda enaʼö lö mamalö aro waʼomasida khö Yehowa?

¹⁰ Itutunö Faulo sambua lala si tola tafalua ba wondrorogö enaʼö lö mamalö aro waʼomasida khö Lowalangi. Isura, ”Böi aetu-aetu wangandrömi.” Aefa daʼö isura nasa, ”Böi mifamalö-malö wangandrö.” (I Tesalonika 5:17; Roma 12:12) Hana wa möi fangahatöʼöda khö Lowalangi na mangandrö? Ba ginötö mangandrö ita, fahuhuo ita khö Yehowa. Daʼa zanolo yaʼita ba wangokhögö fahuwusa si sökhi khönia. (Zinunö 86:3) Ba ginötö tatutunö khö Namada ba zorugo hadia nirasoida hegöi niʼangeraigöda, tola itugu ahatö ita khönia. (Zinunö 65:3) Itugu taʼomasiʼö göi Yehowa na taʼila hewisa wameʼenia fanema li ba wangandröda andrö. Tola faduhu dödöda wa ”ahatö Yehowa, ba zi angaröfi li yaʼia, fefu”. (Zinunö 145:18) Faʼafaduhu dödöda ba waʼomasi hegöi fanuhini moroi khö Yehowa, daʼa zanolo yaʼita ba wangasiwaisi fefu gabula dödö nitaögöda iadaʼa hegöi ba zi so miföna.

FAʼOMASI BA ZINDRUHU BA ZURA NIʼAMONIʼÖ

11, 12. Hewisa enaʼö tola itugu taʼomasiʼö zindruhu ba Zura Niʼamoniʼö?

¹¹ Yaʼita niha Keriso, taʼomasiʼö zindruhu. Sindruhu andre so ia ba Daromali Lowalangi. Imane Yesu khö Namania, ”Taromalimö zi duhu.” (Yohane 17:17) Enaʼö taʼomasiʼö zindruhu ba Zura Niʼamoniʼö moguna taʼila hadia nösi Zura Niʼamoniʼö. (Kolose 1:10) Hizaʼi, tenga ha daʼö. Moguna göi taʼangeraigö hadia nisura ba Zinunö 119 sanolo yaʼita enaʼö aboto ba dödöda hadia nasa zinangea tafalua. (Baso Zinunö 119:97-100.) Ba halöwöda ero maʼökhö, moguna taʼangerönusi hadia zi no tabaso ba Zura Niʼamoniʼö. Na taʼangerönusi hadia mbua nitemada na tafalua hadia zindruhu moroi ba Zura Niʼamoniʼö, tola itugu taʼomasiʼö zindruhu.

¹² Imane sanura zinunö, ”Waʼami ba lelagu gamabuʼula limö andrö; ami moroi ba wewani ba mbawagu!” (Zinunö 119:103) Publikasi si teʼodane-dane ba Zura Niʼamoniʼö nifaʼanö organisasi Lowalangi, no amaedola gö sami. Ba ginötö taʼa gö somasi ita, tatu tabeʼe ginötöda ba worasoi faʼaminia. Simanö göi moguna tabeʼe ginötöda ba ginötö tafahaʼö ita irege tola tarasoi ”wehede omasiö” ba zindruhu, ba tola aoha khöda ba wanörö tödö hadia zi no tabaso ba tola taʼogunaʼö ba wanolo niha böʼö.​—Zangombakha 12:10.

13. Hadia zanolo Yeremia ba wangomasiʼö wehede niwaʼö Lowalangi? Ba hadia lua-luania khönia?

¹³ Samaʼeleʼö sotöi Yeremia iʼomasiʼö wehede niwaʼö Lowalangi. Imane, ”Falukhado daromali khöu, ba no amaedola gögu, ba tobali faʼomuso dödögu daromaliu andrö, ba faʼowua-wua dödögu, no töimö mbörö wamotöi yaʼodo, yaʼugö Yehowa, Lowalangi ngahönö.” (Yeremia 15:16) Ihaogö iʼangerönusi Yeremia ngawua wehede Lowalangi si sökhi sibai, ba iʼomasiʼö daʼö. Iʼameʼegö tödö halöwönia tobali sosalahini Yehowa ba samaʼema turia moroi khö Yehowa. Na taʼomasiʼö zindruhu ba Zura Niʼamoniʼö, tola aboto ba dödöda wa tohude sibai tobali Samaduhuʼö Yehowa hegöi ba wanuriaigö turia sanandrösa ba Mbanua Lowalangi ba ginötö safuria andre.

14. Hadia nasa zi tola tafalua enaʼö itugu taʼomasiʼö zindruhu ba Zura Niʼamoniʼö?

¹⁴ Hadia nasa zanolo yaʼita enaʼö itugu taʼomasiʼö zindruhu ba Zura Niʼamoniʼö? Moguna lö mamalö möi ita ba gangowuloa mbanua niha Keriso börö me ba daʼö ifahaʼö ita Yehowa. Famahaʼö ba Zura Niʼamoniʼö ero migu ba majalah Manuriaigö, no sambua lala ba wamahaʼö yaʼita. Enaʼö tola tatema mbua moroi ba gangowuloada, moguna tahaogö wamaʼanö yaʼia. Duma-dumania, tola tabaso fefu ayati si no tesura ba wamahaʼö daʼö. Iadaʼa, tola aoha khöda ba wombaso mazui ba wo-download majalah Manuriaigö andre ba wakake elektronik börö me no tehenaigö ia ba ngawalö li ba situs Web jw.org hegöi ba aplikasi JW Library. So ösa format elektronik si no tehenaigö irege alio khöda ba wanöndra ayati. Gofu hadia lala niʼogunaʼöda, tola itugu taʼomasiʼö Zura Niʼamoniʼö na tahaogö tabaso ayatinia ba taʼangerönusi daʼö.​—Baso Zinunö 1:2.

FAʼOMASI KHÖ NDRA TALIFUSÖDA

15, 16. (a) Moloʼö Yohane 13:34, 35, hadia goroisa nibeʼe Yesu khöda? (b) Hewisa waʼomasida khö ndra talifusöda, moʼamakhaita ba waʼomasida khö Lowalangi hegöi ba Zura Niʼamoniʼö?

¹⁵ Ba mbongi fatua lö mate ia, imane Yesu khö ndra nifahaʼönia, ”Oroisa si bohou ubeʼe khömi, enaʼö miʼomasiʼö nawömi; simane faʼomasigu ami, enaʼö yaʼami göi, faoma miʼomasiʼö nawömi. Ba daʼö aboto ba dödö niha fefu, wa no nifahaʼögu ami, na so khömi waʼomasimi nawömi.”​—Yohane 13:34, 35.

¹⁶ Faʼomasida khö ndra talifusöda moʼamakhaita ia ba waʼomasida khö Yehowa. Na lö taʼomasiʼö Lowalangi, tebai taʼomasiʼö ndra talifusöda. Ba na lö taʼomasiʼö ndra talifusöda, tebai taʼomasiʼö Lowalangi. Isura zinenge sotöi Yohane, ”Si lö mangomasiʼö talifusönia sa, niʼila hörönia, ba tebai omasi ia Lowalangi, si lö iʼila hörönia.” (I Yohane 4:20) Faʼomasida khö Yehowa hegöi khö ndra talifusöda moʼamakhaita ia ba waʼomasida ba Zura Niʼamoniʼö. Hadia mbörö? Na taʼomasiʼö hadia wamahaʼö moroi ba Zura Niʼamoniʼö, tola taʼoʼö goi-goi ba wangomasiʼö Lowalangi hegöi ira talifusöda.​—I Fetero 1:22; I Yohane 4:21.

17. Hadia manö zi tola tafalua ba wangoromaʼö faʼomasi?

¹⁷ Baso I Tesalonika 4:9, 10. Hadia manö zi tola tafalua ba wangoromaʼö wa taʼomasiʼö ndra talifusöda ba mbanua niha Keriso? Te so ndra talifusöda si no alawa ndröfi moguna latolo ira ba wangalui lalara ba weʼamöi ba gangowuloa mbanua niha Keriso. Te so göi zinangea muʼehaogö ba nomo dalifusöda lakha mbanua. (Yakobo 1:27) Moguna taʼameʼegö tödö, tafarou, ba tabeʼe wondrara dödö khö ndra talifusöda safatö tödö, soya noro dödö hegöi si göna abula dödö tanö böʼö. (Gamaedola 12:25; Kolose 4:11) Tola taforomaʼö wa taʼomasiʼö zi ”sara lala wamati” khöda moroi ba wehede hegöi ba nifaluada.​—Galatia 6:10.

18. Hadia zi tola manolo yaʼita na fatiti li ita khö ndra talifusöda?

¹⁸ Imane Sura Niʼamoniʼö wa ba ”götö safuria” ba gulidanö si lö sökhi andre, ato niha sangalui tana khönia ba somasi anaʼa. (II Timoteo 3:1, 2) Yaʼita niha Keriso, moguna taforege ba wondrorogö faʼomasida khö Yehowa, Taromalinia, hegöi ba niha böʼö. Börö me lö moʼahonoa ita, tola manö fatiti li ita khö ndra talifusöda. Hizaʼi, börö me taʼomasiʼö ira, lö taradö-radö ba wangasiwaisi zalua andrö, ba si fao faʼomasi taʼatulöʼö ita. (Efeso 4:32; Kolose 3:14) Böi tatehegö taya waʼomasida! Böi mamalö-malö taʼomasiʼö Yehowa, Taromalinia hegöi ira talifusöda.