Faʼomasi Sambua Mbua-bua si Sökhi

IBEʼE gehehania Yehowa khö zinenge sotöi Faulo ba wanura siwa ngawua mbua-bua moroi ba geheha niʼamoniʼö. (Galatia 5:22, 23) Fefu mbua-bua daʼa lafotöi ia ”bua-bua geheha”.a (Faigi nisura ba gahe zura.) Moʼamakhaita göi ia ba ’gamuata si bohou’ sinangea laʼokhögö niha Keriso. (Kolose 3:10) Simane eu si tola mowua na sökhi wombuwui yaʼia, tola iʼokhögö mbua-bua daʼa si samösa niha na itehegö mohalöwö geheha niʼamoniʼö ba waʼaurinia.​—Zinunö 1:1-3.

Bua-bua si oföna nisura Waulo yaʼia daʼö faʼomasi. Hewisa waʼatohude mbua-bua daʼa? Iwaʼö Faulo wa na lö faʼomasi, ba no ”faya” ia. (I Korindro 13:2) Hizaʼi, hadia waʼomasi andrö, ba hewisa wangokhögöda hegöi wangoromaʼöda yaʼia ero maʼökhö?

HADIA WAʼOMASI?

Hewaʼae abua wanutunö hadia waʼomasi, hizaʼi itutunö Sura Niʼamoniʼö hewisa lala wangera-ngera hegöi nifalua niha si so faʼomasi. Duma-dumania, niha si so faʼomasi no ”sebolo tödö, no sebua tödö” ba ”omuso dödönia awö zi duhu”. Na so waʼomasi ba zi samösa niha, tola ”itaha dödönia; fefu hadia ia, ba faduhu dödönia; fefu hadia ia, ba idöna-döna, fefu hadia ia ba itaögö”. So khönia waʼomasi, iʼameʼegö tödö niha ba yaʼia andre si fahuwu si lö faröi. Hizaʼi, na lö faʼomasi ba zi samösa niha, so khönia waʼafökhö dödö, faʼasiliawa, lö sökhi gamuata, ha tana khönia iʼalui, ba lö iʼefaʼö zala niha böʼö. Lö omasi ita taforomaʼö mbua-bua daʼa, hizaʼi moguna taforomaʼö waʼomasi sindruhu ba niha böʼö, faʼomasi si ’lö mangalui tana khönia’.​—I Korindro 13:4-8.

YEHOWA HEGÖI YESU LABEʼE DUMA-DUMA SOʼAHONOA BA WAʼOMASI

”No faʼomasi Lowalangi.” (I Yohane 4:8) Oroma daʼa ba halöwö hegöi nifaluania. Faʼomasinia sabölö ebua ba niha gulidanö yaʼia daʼö ifatenge Yesu ba gulidanö enaʼö tefakao ba mate salahida. Imane sinenge sotöi Yohane, ”Ba daʼö no oroma waʼomasi Lowalangi andrö ba khöda, me no ifatenge ba gulidanö Nononia Lowalangi, ononia si ha sambua andrö, enaʼö auri ita balazi ia. Ba daʼö so waʼomasi andrö, tenga wa no taʼomasiʼö Lowalangi, no wa no iʼomasiʼö ita, awö wa no ifatenge Nononia, höli, ba horöda.” (I Yohane 4:9, 10) Börö waʼomasi Lowalangi, teʼefaʼö horöda ba taʼokhögö dötönafö hegöi faʼauri.

Iforomaʼö waʼomasinia Yesu ba niha me ilulu waʼaurinia ba wamalua somasi Lowalangi. Imane khöda Faulo, ”Ba ’zomasi’ ia andrö, ba daʼö teʼamoniʼö ita, ba wameʼe sumange boto Yesu Keriso andrö, niʼosamuzaigö.” (Heberaiʼo 10:9, 10) Lö niha sangokhögö faʼomasi sebua simane daʼa. Imane Yesu, ”Fondrege waʼebua wangomasiʼö awö, na ibelegö nosonia niha föna zi fahuwu khönia.” (Yohane 15:13) Hadia tola laʼoʼö waʼomasi niforomaʼö Yesu hegöi Yehowa ira niha si lö moʼahonoa? Tola! Datatutunö lalania.

”MITÖRÖ LALA WAʼOMASI”

Ifarou ita Faulo, ”Miʼoʼö khö Lowalangi, simane iraono omasiö. Ba mitörö lala waʼomasi andrö, simane fangomasiʼö Keriso yaʼita, awö wa no ibeʼe ia salahida.” (Efeso 5:1, 2) Hadia geluaha ”mitörö lala waʼomasi”? Eluahania, taforomaʼö waʼomasi ero inötö. Tenga ha ba mbewe, hizaʼi tafalua ia. Imane Yohane, ”He yaʼami iraono, böi ba li taʼomasiʼö nawöda, ba böi ba lela, ba nilauda khönia taʼomasiʼö ia, ba sindruhu-ndruhu.” (I Yohane 3:18) Duma-dumania, taturiaigö ’duria somuso dödö moroi ba Mbanua Lowalangi’ börö me taʼomasiʼö Yehowa hegöi niha böʼö. (Mataiʼo 24:14; Luka 10:27) ’Tatörö göi lala waʼomasi’ na so khöda waʼebolo dödö, faʼebua dödö hegöi fangefaʼö sala. Taʼoʼö mene-mene Zura Niʼamoniʼö, ’Simane fangefaʼö Yehowa khömi, simanö göi ami.’​—Kolose 3:13.

Na tabeʼe mene-mene mazui degu-degu ba niha böʼö, tenga daʼö geluahania wa lö khöda faʼomasi. Duma-dumania, enaʼö tebato wege-ege ndraono, so ösa zatua samalua hadia manö zomasi ndraonora. Hizaʼi sindruhunia na iʼomasiʼö nononia satua moguna ibeʼe degu-degu. Simanö göi, hewaʼae Lowalangi andrö no faʼomasi, hizaʼi ”somasi Zoʼaya sa, ba iʼotuʼö”. (Heberaiʼo 12:6) No faʼomasi na tabeʼe degu-degu. (Gamaedola 3:11, 12) Hizaʼi, törö tödömö wa fefu ita no fasala ba asese lö mofozu wamaluada faʼomasi. Andrö, moguna tadouʼö wangoromaʼöda faʼomasi. Hewisa wamalua daʼö? Datatutunö tölu ngawua lala.

HEWISA LALA WANGOKHÖGÖDA FAʼOMASI?

Si oföna, andrö khö Lowalangi enaʼö ibeʼe khömö gehehania niʼamoniʼö börö me ba daʼö moroi waʼomasi. Imane Yesu wa ibeʼe Yehowa ”geheha niʼamoniʼö ba zangandrö khönia”. (Luka 11:13) Andrö, na taʼandrö geheha niʼamoniʼö ba tatehegö itolo ita, tola taʼokhögö waʼomasi. (Galatia 5:16) Duma-dumania, na satua sokubaloi ndraʼugö, andrö geheha niʼamoniʼö enaʼö öʼokhögö waʼomasi na öbeʼe mene-mene Zura Niʼamoniʼö ba niha böʼö. Mazui na satua ndraʼugö, andrö geheha Yehowa ba wanolo yaʼugö ba wameʼe degu-degu khö ndraonomö si fao faʼomasi.

Si dua, angeraigö hewisa wangoromaʼö Yesu faʼomasi hewaʼae laböbözi ia. (I Fetero 2:21, 23) Na so niha zameʼe tetutu dödömö mazui na ötaögö walöʼatulö, sofu khöu samösa, ’Hadia nifalua Yesu?’ Samösa dalifusöda ira alawe sotöi Leigh, ilau manofu khönia samösa fatua lö ifalua hadia ia. Imane, ”So nawögu wohalöwö zo kirim e-mail khö nawögu tanö böʼö. Ifatou-tou ndraʼo hegöi halöwö nifaluagu. Afökhö dödögu. Hizaʼi, usofu khögu samösa, ’Hewisa woloʼögu Yesu ba zalua andre?’ Me no uʼangeraigö hadia nifalua Yesu, uhalö gangetula ba wangolifugö zalua andrö ba lö ubaliʼö tandrawa. Aefa daʼö, uʼila wa no göna fökhö sabölö-bölö nawögu andrö, ba oya gabula dödönia. Uʼila wa tenga soroi ba dödönia wangumaʼö daʼö. Börö me uʼangeraigö duma-duma Yesu ba wangoromaʼö faʼomasi hewaʼae na so zangandrö fönu, tetolo ndraʼo ba wangomasiʼö nawögu wohalöwö andrö.” Na taʼoʼö Yesu, lö mamalö taforomaʼö waʼomasi ba niha böʼö.

Si tölu, tafahaʼö ita ba wangoromaʼö faʼomasi soroi ba dödö. Daʼa waʼomasi si tobali tandra niha soloʼö khö Yesu. (Yohane 13:34, 35) Iʼokhögö waʼomasi simane daʼa Yesu ba ibeʼe khöda duma-duma soʼahonoa. Lalania, iröi zorugo ”iheta khönia daʼö” salahi zoguna khöda ’irege mate’ ia. (Filifi 2:5-8) Na taʼoʼö waʼomasi niforomaʼö Yesu, itugu fagölö lala wangera-ngera hegöi nirasoida simane niʼokhögönia, ba tola taʼofönaiʼö zoguna ba niha böʼö.

BUA NA TAFOROMAʼÖ WAʼOMASI

Oya mbua na taforomaʼö waʼomasi. Datatutunö dombua duma-dumania:

• FAʼAFATALIFUSÖTADA BA ZI SAGÖRÖ ULIDANÖ: Börö me faoma so waʼomasi ba gotaluada, taʼila wa na möi ita ba mbanua niha Keriso si so ba zi sagörö ulidanö, latemaʼö ita si fao faʼowua-wua dödö. No howu-howu sebua daʼa börö me öʼila wa ’fefu ndra talifusömö ba zi sagörö ulidanö’ laʼomasiʼö ndraʼugö! (I Fetero 5:9) Ha ba gotalua nono mbanua Lowalangi so waʼomasi daʼa.

• FAʼATULÖ: ”Mibologö dödömi khö nawömi, miʼomasiʼö ia” irege tola tarasoi ’wamaböbö faʼatulö andrö’. (Efeso 4:2, 3) Tarasoi waʼatulö daʼa ba gangowuloa, kebaktian wilayah hegöi ba kebaktian regional. Sindruhu-ndruhu tohude waʼatulö daʼa ba gulidanö si no fawuka andre. (Zinunö 119:165; Yesaya 54:13) Na tagohi waʼatulö, taforomaʼö wa taʼomasiʼö niha böʼö, ba möi fangomusoiʼö dödö Namada si so ba zorugo.​—Zinunö 133:1-3; Mataiʼo 5:9.

”FAʼOMASI ANDRÖ, BAFANGAʼAZÖKHI”

Isura Faulo, ”Faʼomasi andrö, ba fangaʼazökhi.” (I Korindro 8:1) Hadia geluahania? Ba I Korindro faza 13 nifotöi ”Sinunö Faʼomasi”, itutunö hewisa wa faʼomasi andrö möi famazökhi. Niha si so faʼomasi iʼofönaiʼö ba iʼameʼegö tödö zoguna ba niha böʼö. (I Korindro 10:24; 13:5) Börö waʼatua-tua, foʼameʼegö tödö, faʼebolo dödö hegöi faʼebua dödö, tola teʼasogö waʼomasi ba nösi nomo hegöi fahasara dödö ba mbanua niha Keriso.​—Kolose 3:14.

Oya lala si tola tafalua ba wangoromaʼö faʼomasi ba niha böʼö. Hizaʼi, faʼomasida khö Lowalangi zabölö moguna ba tohude. Hana? Börö me faʼomasida khönia zameʼe fahasara dödö! Niha moroi ba ngawalö soi, li hegöi lala waʼauri ba zilalö faoma lafosumange Yehowa ba ”teʼanö manö ira weʼamöi enoninia”. (Zefania 3:9) Datahalö gangetula ba wangoromaʼö mbua geheha andre moroi khö Lowalangi ero maʼökhö.