Asiwaisi Watitisa ba Asogö Waʼatulö

OMASI Lowalangi Yehowa na niha samosumange yaʼia larasoi waʼohahau dödö. Omasi ia na faoma laforege ba wondrorogö faʼatulö. Na lafalua zimane daʼö, so waʼatulö ba mbanua niha Keriso. Buania, ato niha sadöni tödö ba weʼamöi ba mbanua niha Keriso.

Duma-dumania, so samösa duku samadöhö fökhö ba Madagaskar, inehegö waʼatulö salua ba gotalua nono mbanua Yehowa. Imane tödönia, ’Na lawaʼö khögu ba wamili, agama daʼa nifiligu.’ Andrö wa iböhöli wamosumange bekhu, iʼehaogö wangowalunia enaʼö tefaudu ba zi no iwaʼö Sura Niʼamoniʼö, ba ibörötaigö ifosumange Yehowa, Lowalangi waʼatulö.

Simane ira matua daʼa, so ngahönö niha ero röfi si fao ba mbanua niha Keriso ba lasöndra waʼatulö niʼalu-aluira. Hizaʼi, imane Sura Niʼamoniʼö wa na so ’waʼafökhö dödö hegöi wasosota’ ba mbanua niha Keriso, tola tekiko wahuwusa si no teʼaʼazökhi ba tola teʼasogö gabula dödö. (Yakobo 3:14-16) Hizaʼi, ibeʼe khöda mene-mene si sökhi Sura Niʼamoniʼö enaʼö tola tatimbagö gabula dödö simane daʼö hegöi enaʼö itugu aro wahuwusada ba gotalua ndra talifusöda. Datatutunö hewisa mene-mene daʼa tola manolo ndra talifusöda.

ABULA DÖDÖ BA FANGAʼASIWAISI YAʼIA

”Abua sibai falulu fohalöwö khö dalifusöda ira matua andrö. No irai faʼuduga ba faoma malau moʼao-ao. Ba so darua niha si tohare ba lafaigi-faigi ndraʼaga.”​—CHRIS.

”So samösa dalifusöda ira alawe, asese fao ndraʼaga manuriaigö. Hizaʼi, lö saʼae omasi fao ia khögu manuriaigö. Aefa daʼö, lö omasi ia fahuhuo khögu. Lö uʼila hadia mbörö.”​—JANET.

”Fahuhuodo khö zi darua nawögu ba HP. Me imane zi samösa awögu wa ibunu telefonia, uwalinga sindruhu-ndruhu no ibunu. Ufatou-tou ia khö nawögu si samösa. Hizaʼi, sindruhunia lö nibununia telefonia.”​—MICHAEL.

”Ba mbanua niha Keriso si fao ndraʼodo, so darua perintis zi fakara-kara. Si samösa, mofönu ia ba niha böʼö. Ide-ide dödö ndra talifusöda ba nifaluara andrö.”​—GARY.

Fefu daʼa hulö tenga abula dödö sebua. Hizaʼi, tola manö tobali sokho sebua daʼa khö ndra talifusöda si farahu, ba tola mamakiko waʼatulö ba mbanua niha Keriso. Taʼandrö sibai saohagölö börö me laʼoʼö goi-goi si so ba Zura Niʼamoniʼö ira talifusöda ba ifuli mangatulö ira. Hadia goi-goi si so ba Zura Niʼamoniʼö si tola manolo yaʼira?

”Böi fasoso ami ba lala!” (I Moze 45:24) Ibeʼe mene-mene daʼa Yosefo khö ndra talifusönia sangawuli ba nomo namara. Na lö fanaha tödö khö zi samösa niha ba na alio aukhu ia, tola manö itugu lö sökhi zalua. Tola manö mofönu göi niha böʼö. Iʼila Chris wa itaria lö khönia fangide-ngideʼö ba abua khönia ba woloʼö fanuturu lala. Omasi ia ibulöʼö waʼaurinia, andrö wa iʼandrö waʼebolo dödö khö dalifusöda ira matua si no irai faʼudu ba li khönia. Iforege göi Chris ba wanaha fönunia. Me iʼila dalifusöda andrö famorege nifalua Chris, ifalua göi zimane daʼö. Iadaʼa, no mangatulö ira ba falulu fohalöwö ira ba wamosumange Yehowa.

”Na lö famagölö, ba tobali lö boto niwaʼö.” (Gamaedola 15:22) Me lö omasi fahuhuo nawönia khönia, ihalö gangetula Janet ba wamalua hadia niwaʼö ayati daʼa. Omasi ia mamagölö mazui fahuhuo khö dalifusöda andrö. Isofu Janet hadia no ifalua zala sangafökhöiʼö tödö dalifusöda ira alawe andre. Faoma no alawö-lawö ira me awena lalau fahuhuo. Hizaʼi, lahaogö wahuhuosa irege itugu sökhi zalua. Aboto ba dödö dalifusöda andre wa so khönia wangera-ngera si fasala sanandrösa ba zi no irai alua ba zilalö. Sindruhunia, lö mufalua Janet zala. Iʼandrö waʼebolo dödö Janet, ifuli fahuwu ira, ba faoma falulu fohalöwö ira ba wamosumange Yehowa.

”Andrö, na öbeʼe gameʼelau ba naha wameʼe sumange, ba na itörö tödöu ba daʼö so hadia ia zinegu dalifusöu khöu, ba röi ba daʼö gameʼelau föna naha wameʼe sumange, ba ae ua, ba atulöʼö ndraʼugö khö dalifusöu.” (Mataiʼo 5:23, 24) Ibeʼe mene-mene daʼa Yesu me Fahuhuo ia ba Hili. Me no aefa iwaʼö wehede sagafökhö Michael khö dalifusöda tanö böʼö, maniasa sibai ia. Ifalua gofu hadia ia zi tola ifalua enaʼö tola teʼatulöʼö ira. Andrö wa möi ia khö dalifusöda andrö ba sindruhu-ndruhu iʼandrö waʼebolo dödö. Hadia zalua? Imane Michael, ”Soroi ba dödö ibeʼe aefa zalagu andrö talifusöda.” Ifuli fahuwu ira.

”Faoma mibologö dödömi khö nawömi, ba faoma miʼefaʼö zala nawömi khömi, na so zinegu zamösana khö nawönia.” (Kolose 3:12-14) Hadia itörö tödömö zi darua perintis si fakara-kara nitutunö moroi siawa? Ihaogö satua sokubaloi ba wanolo yaʼira enaʼö laʼila wa tola afökhö ba tetutu dödö ndra talifusöda tanö böʼö ba nifaluara. Ibeʼe khöra mene-mene enaʼö so khöra waʼebolo dödö ba faoma larorogö waʼatulö ba mbanua niha Keriso. Latemaʼö ba lafalua mene-mene nibeʼe zatua sokubaloi andrö. Iadaʼa, falulu fohalöwö ira ba wamalua halöwö fanuriaigö turia somuso dödö.

Mene-mene si so ba Kolose 3:12-14, tola möi fanolomö enaʼö öʼokhögö wangide-ngideʼö, faʼedöna ba wangefaʼö zala niha sangafökhöiʼö dödömö, hegöi enaʼö lö öʼangera-ngeraigö zalua andrö. Hizaʼi, hewisa na tebai taʼefaʼö zala niha hewaʼae no taforege ba wamalua daʼö? Goi-goi Zura Niʼamoniʼö ba Mataiʼo 18:15 möi fanoloda. Hewaʼae huhuo Yesu ba ayati daʼö sanandrösa ba horö sebua, itutunö göi hadia zinangea tafalua na so watitisada khö ndra talifusö tanö böʼö. Si fao fangide-ngideʼö hegöi lala si sökhi, möi ita khö dalifusöda si no fatiti khöda ba tahaogö taʼalui lala ba wangaʼasiwaisi salua andrö.

Oya wanuturu lala si sökhi ba si tefaudu ba Zura Niʼamoniʼö. Sabölö tohudenia, taʼodaligö geheha niʼamoniʼö moroi khö Lowalangi irege tola taforomaʼö ”bua-bua geheha”, yaʼia daʼö ’faʼomasi, ba faʼomuso dödö, ba faʼohahau dödö, ba faʼebolo dödö, ba faʼasökhi dödö, ba faʼebua dödö, ba falöfaröi, ba falömofönu, ba famoni’. (Galatia 5:22, 23) Angeraigö daʼa. Tola sökhi wofanö zi sambua mesin na no labeʼe oli. Simane daʼö göi, aoha khöda ba wangasiwai faʼafaböʼö hegöi ba wangokhögö fahuwusa si sökhi khö ndra talifusöda na taforomaʼö mbua-bua si sökhi moroi khö Yehowa.

FAʼAFABÖʼÖ LAGU ZI SAMÖSA NIHA MONÖNÖ FAʼASÖKHI BA MBANUA NIHA KERISO

Fefu ita faböʼö-böʼö laguda zamösana. Faböʼö-böʼö göi mbua-bua, lala wangera-ngera hegöi lala wahuhuosada. Daʼa zameʼe itugu sökhi ba adöni dödöda ba wariawösa. Hizaʼi, daʼa göi zangaʼasogö faʼafaböʼö wangera-ngera hegöi falöhasara dödö. Samösa satua sokubaloi ibeʼe duma-duma wa tola alua daʼa. Imane, ”Te abua ba niha saila-aila ba wahuwusa ba niha sonekhe fahuwu. Hulö no ide-ide gamaehutara andre, hizaʼi tola tobali abula dödö sebua daʼö.” Hadia tebai faʼawö zi darua niha si faböʼö mbua-bua andre? Datafaigi darua zinenge si tobali duma-duma khöda. Fetero, niha sangumaʼö hadia zi so ba dödönia. Yohane, samösa talifusöda soʼameʼegö tödö niha böʼö, ba si toʼölönia iʼangeraigö wehedenia fatua lö iwaʼö. No aröu faehu lagura. Hizaʼi, tola falulu fohalöwö ira ba wamosumange Yehowa. (Halöwö Zinenge 8:14; Galatia 2:9) Alua göi zimane daʼö iadaʼa. So ndra talifusöda si falulu fohalöwö hewaʼae na faböʼö lagura.

Hizaʼi, hewisa na so samösa niha ba mbanua niha Keriso samalua mazui sangumaʼö fehede sangafökhöiʼö tödömö? Sökhi na ötörö tödömö wa fagölö-gölö mate Keriso salahimi, ba moguna öʼomasiʼö dalifusömö ira matua andrö. (Yohane 13:34, 35; Roma 5:6-8) Lö atulö na öhalö gangetula ba wamöhöli fahuwusa khönia mazui na öʼaröuʼö ndraʼugö khönia. Hizaʼi, sofu khöu samösa, ’Hadia no ifalua zala solawa goi-goi moroi khö Yehowa? Hadia soroi ba dödönia iʼafökhöiʼö dödögu? Mazui, hadia alua daʼa ha börö me faböʼö laguma? Sindruhunia, hadia iʼokhögö mbua-bua si sökhi si tola uʼoʼö?’

Duma-dumania, na omasi ia fahuhuo, hizaʼi yaʼugö niha si lö hede-hede, hadia omasiʼö fao khönia ba wanuriaigö hegöi ba wamahaʼö yaʼugö ba nifaluania? Mazui, hewisa na abölö oböwö ia moroi khömö? Hadia öʼila wa tola owua-wua dödöda na mamuala ita ba niha si no alawa ndröfi, niha sofökhö mazui niha soguna mutolo? Hadia öfahaʼö ndraʼugö ba zi samösa niha enaʼö itugu oböwö? Sabölö tohude, hewaʼae na faböʼö-böʼö mbua-buami, osambuaʼö dödömö ba mbua-bua si sökhi niʼokhögönia. Hewaʼae na tebai tobali si fahuwu ami, hizaʼi tola faoma ahatö ami khö nawömi. Daʼa zangaʼasogö faʼatulö ba mbanua niha Keriso hegöi khömö samösa.

Ba götö siföföna, so darua dalifusöda ira alawe sotöi Gewodia ba Zitikhe. Sinduruhu-ndruhu faböʼö lagura. Hizaʼi ifarou ira sinenge sotöi Faulo ”enaʼö ha sambua dödö, ba khö Zoʼaya”. (Filifi 4:2) Omasi göi ita falulu fohalöwö khö ndra talifusöda ba wamosumange Yehowa hegöi ba wangaʼasogö faʼatulö ba mbanua niha Keriso.

ASIWAISI GABULA DÖDÖ BA WAʼALIO

Hana wa böi taradö-radö ba waniboʼö fangera-ngera si sala sanandrösa ba niha böʼö? Tola tafagölösi dödöda hulö simane goʼo si tumbu ba kabu mbunga si sökhi. Na lö alio tasöbi goʼo andrö, tola manö ifönui zi sagörö kabu. Simane daʼö göi, na lö taheta wangera-ngera si fasala sanandrösa ba niha böʼö, tola molua-lua ia ba mbanua niha Keriso. Hizaʼi, na taʼomasiʼö Yehowa hegöi ira talifusöda, tafalua fefu hadia zi tola tafalua ba wondrorogö faʼatulö ba mbanua niha Keriso.

Na taforege ba wondrorogö faʼatulö ba niha böʼö, tatema mbua si sökhi. No irasoi daʼa samösa dalifusöda Samaduhuʼö. Itutunö waö-waö si no irai irasoi imane, ”Ba worasoigu, hulö mane ndraono ndraʼodo ibeʼe samösa dalifusöda ira alawe. Sindruhu-ndruhu fatimba ba dödögu nifaluania andrö. Itugu ara, itugu fatuwudo khönia, ba ibörötaigö lö uʼameʼegö tödö ia. So ba wangera-ngeragu, ’Yaʼia manö lö iforomaʼö wa iʼameʼegö tödö ndraʼodo, andrö wa lö moguna uʼameʼegö tödö göi ia.’”

Aefa daʼö, ifuli iʼangeraigö gamuatania talifusöda ira alawe andre ba imane, ”Aboto ba dödögu wa so göi zambö ba mbua-buagu samösa, ba afatö sibai dödögu ba daʼö. Uʼila wa moguna ubulöʼö lala wangera-ngeragu. Me no aefa ulau mangandrö khö Yehowa sanandrösa ba zalua andre, ubeʼe mbuala side-ide khö dalifusöda ira alawe andrö ba usura sambua kartu ba wangandrö faʼebolo dödönia ba gamuatagu si lö baga. Fatalagu bagi ndraʼaga ba fao dödöma ba wangolifugö zalua andrö. Iʼotarai daʼö, lö saʼae marasoi gabula dödö tanö böʼö.”

Fefu ita moguna khöda waʼatulö mazui faʼahono dödö. Hizaʼi, niha sasiliawa ba somasi fahindri tola mamakiko faʼatulö. Ba gulidanö daʼa, ato niha samalua simane daʼö. Hizaʼi, omasi Yehowa na faböʼö nono mbanuania. Ba gotalua ndra Samaduhuʼö Yehowa, moguna so waʼatulö ba fahasara dödö. Ifarou dödö Waulo Yehowa ba wanura ba niha Keriso ’enaʼö latörö zinangea lala nikaoni andrö’, ba zi no lakaoni yaʼira. Ifarou göi ira enaʼö lafalua daʼa si fao mbua-bua si sökhi. Imane, ”Yaʼaʼoi so wa lö fayawa ami, awö waʼasökhi dödö, awö waʼebolo dödö, mibologö dödömi khö nawömi, miʼomasiʼö ia, miʼoigö dödömi enaʼö lö tebulö wahasara dödö, enaʼö faböbö ami, famaböbö faʼatulö andrö.” (Efeso 4:1-3) Sindruhu-ndruhu sökhi sibai ’wamaböbö faʼatulö’ ba gotalua nono mbanua Yehowa. Andrö, datafalua fefu zi tola tafalua ba wangaʼaroʼö famaböbö andrö ba dataʼasiwai fefu gabula dödö mazui fatitisada ba gotalua ndra talifusöda.