Hadia Ölumöʼö Ndraʼugö khö Yehowa?

1. Börö horö ondröita, hadia nirasoi niha samosumange Lowalangi si lö faröi?

IMANE sinenge sotöi Faulo, ”Alai ndraʼo niha nifakao!” (Roma 7:24) Iadaʼa, ato niha samosumange Lowalangi si lö faröi sorasoi faʼafatö dödö ba famakao simane nirasoi Waulo. Hadia mbörö? Börö me omasi ita taʼomusoiʼö dödö Yehowa, hizaʼi lö moʼahonoa ita ba no tatema horö ondröita. Daʼö mbörö wa lö sökhi-sökhi dödöda na lö mofozu ita ba wangomusoiʼö tödönia. So ösa niha Keriso si no mamalua horö sebua sangokhögö fangera-ngera wa tebai iʼefaʼö zalara Yehowa.

2. (a) Hewisa wangoromaʼö Zinunö 34:23 wa lö moguna laʼabusi tödö sibai zala si no irai lafalua ira samosumange Lowalangi? (b) Hadia nitutunöda ba wamahaʼö daʼa? (Faigi kotak ”Famahaʼö mazui Amaedola?”)

² Iʼaroʼö dödöda Sura Niʼamoniʼö wa na talumöʼö ita khö Yehowa, lö moguna taʼabusi tödö sibai zala si no tafalua. (Baso Zinunö 34:23.) Hizaʼi, hadia geluahania talumöʼö ita khö Yehowa? Hadia nifaluada na omasi ita tatema waʼahakhö dödö hegöi fangefaʼö moroi khö Yehowa? Tola tasöndra wanema li ba zinofu daʼa na tafahaʼö ita moroi ba gamakhoita si no mutatugöi ba mbanua sawatö si so ba götö ndraono Gizaraʼeli. Amakhoita daʼa tefazökhi ia barö mbuʼusa li Goroisa, ba mufalali ia me Fendrakose 33 M. Hizaʼi, moroi khö Yehowa Goroisa andrö. Börö daʼö, moroi ba mbanua sawatö, tola tafahaʼö ita hewisa lala wamaigi Yehowa horö, niha samalua horö hegöi niha samalalini era-era. Si oföna, datatutunö hadia mbörö wa so mbanua sawatö ba ndraono Gizaraʼeli ba hewisa wangogunaʼöra daʼö.

”MIHONOGÖI MBANUA SAWATÖ”

3. Hadia nifalua ndraono Gizaraʼeli ba niha samunu?

³ Ahakhö dödö Yehowa na so niha nibunu. Na so ndraono Gizaraʼeli samunu niha, talifusö ira matua sahatö ba niha nibunu si tobali ”solau balö”, ba hasambalö ibunu niha samunu andrö. (4 Moze 35:19) Mufalua daʼa enaʼö niha si no mamunu ibeʼe waʼaurinia tobali famuʼa noso niha si lö fasala si no ibunu. Na lö iʼanemaiʼö labunu niha si no mamunu niha andrö, tola tetaʼunöisi mazui lö teʼamoniʼö saʼae Danö Gamabuʼula. Imane Yehowa, ”Ba böi mibeʼe raʼiö danö andrö si so ami” ba wamunu niha böʼö.​—4 Moze 35:33, 34.

4. Hadia zalua na so ndraono Gizaraʼeli si lö mangodödögö mamunu niha?

⁴ Hizaʼi, hadia zalua na so ndraono Gizaraʼeli si lö mangodödögö mamunu niha? Hewaʼae na lö iʼodödögö, hizaʼi fasala ia börö me no ibunu niha si lö fasala. (1 Moze 9:5) Na alua zimane daʼö, iwaʼö Yehowa wa tola laforomaʼö khönia waʼahakhö dödö. Niha si lö mangodödögö mamunu niha böʼö, tola ilau moloi moroi ba zolau balö, ba gotalua zi önö mbanua sawatö. Na latehegö khönia toröi ba mbanua daʼö, hasambalö telumöʼö ia. Hizaʼi, moguna toröi ia ba mbanua sawatö irugi mate gere sebua.​—4 Moze 35:15, 28.

5. Hana wa amakhoita sanandrösa ba mbanua sawatö möi fanoloda enaʼö itugu taʼokhögö waʼaboto ba dödö sanandrösa khö Yehowa?

⁵ Tenga moroi ba niha gamakhoita sanandrösa ba mbanua sawatö. Hizaʼi, moroi khö Yehowa. Imane khö Yosua, ”Ömane ba ndraono Gizaraʼeli, ’Fili mbanua sawatö andrö.’” No ”laʼamoniʼö” mbanua andre. (Yosua 20:1, 2, 7, 8) Ihalö gangetula Yehowa wa moguna mufaböʼöni mbanua daʼa moroi ba danö böʼö. Börö daʼö, oya wamahaʼö nihalöda sanandrösa khö Yehowa ba zi no mufakhoi andre. Duma-dumania, daʼa zanolo yaʼita enaʼö itugu aboto ba dödöda waʼahakhö dödö Yehowa. Daʼa göi zamahaʼö yaʼita lala enaʼö tola talumöʼö ita khö Yehowa iadaʼa.

MOGUNA ’IʼOMBAKHAʼÖ HUHUONIA ANDRÖ BA ZATUA MBANUA’

6, 7. (a) Tutunö hadia nifalua ndra satua mbanua ba wangetuʼö hukuma niha si lö mangodödögö mamunu niha. (Faigi gambara ba wamobörö wamahaʼö.) (b) Hana wa moguna fahuhuo niha samunu khö ndra satua mbanua?

⁶ Na so ndraono Gizaraʼeli si lö mangodödögö mamunu niha, moguna ilau moloi ba mbanua sawatö ba ’iʼombakhaʼö huhuonia andrö’ khö ndra satua mbanua si so ba mbawa göli, ba hasambalö latemaʼö ia. (Yosua 20:4) Aefa daʼö, lafangawuli ia ba mbanua salua wabunusa andrö enaʼö laʼetuʼö hukumania ira satua mbanua si so ba daʼö. (Baso 4 Moze 35:24, 25.) Na lahalö gangetula ira satua mbanua wa tenga muʼodödögö zalua andrö, lafangawuli ia ba mbanua sawatö.

⁷ Hana wa moguna fahuhuo niha samunu andrö khö ndra satua mbanua? Moguna lahaogö lafaigi ira satua mbanua enaʼö lö raʼiö ndraono Gizaraʼeli. Latolo göi niha si lö mangodödögö mamunu niha enaʼö itema mbua moroi ba waʼahakhö dödö Yehowa. Isura samösa pakar Zura Niʼamoniʼö wa na lö möi niha samunu andrö khö ndra satua mbanua, tola labunu ia. Isura göi wa niha daʼö samösa zi fasala ba waʼamatenia börö me lö iʼoʼö zi no ifakhoi Lowalangi. Börö daʼö, niha samunu moguna iʼandrö ba itemaʼö wanolo enaʼö tola auri ia. Na lö möi ia ba zi sambua banua sawatö, tola ibunu ia niha sahatö ba niha nibununia andrö.

8, 9. Hana wa moguna fahuhuo zi samösa niha Keriso si no mamalua horö sebua khö ndra satua sokubaloi?

⁸ Iadaʼa, niha Keriso si no mamalua horö sebua, moguna möi ia khö ndra satua sokubaloi enaʼö tola latolo ia irege ifuli iʼokhögö wahuwusa si sökhi khö Yehowa. Hana wa moguna sibai daʼa? Si oföna, Yehowa zotatugöi enaʼö ira satua sokubaloi zangetuʼö huku sanandrösa ba horö sebua. (Yakobo 5:14-16) Si dua, latolo niha samalalini era-era andrö ira satua sokubaloi enaʼö tola ifuli iʼokhögö wahuwusa si sökhi khö Lowalangi ba enaʼö lö ifuli ifalua horö simane daʼö. (Galatia 6:1; Heberaiʼo 12:11) Si tölu, no mutuyu ba mufahaʼö ndra satua sokubaloi ba wameʼe fondrara dödö ba niha si no mamalalini era-era enaʼö lö afatö ba ihuku ia tödönia ba zala si no ifalua. Ifotöi ndra satua sokubaloi andre Yehowa, ”sawatö na so deu laöhö”. (Yesaya 32:1, 2) Daʼa sambua dandra waʼahakhö dödö niforomaʼö Lowalangi khöda.

⁹ Ato zamosumange Lowalangi sorasoi faʼahono dödö me no fahuhuo ira khö zatua sokubaloi ba latema wanolo moroi khöra. Duma-dumania, no ifalua horö sebua samösa dalifusöda ira matua sotöi Daniel, hizaʼi ba zi hauga waŵa aefa daʼö lö ifatunö khö ndra satua sokubaloi daʼö. Imane, ”Börö me no ara numalö ginötö, imane tödögu wa tebai saʼae latolodo ira satua sokubaloi.” Hizaʼi, ataʼu ia ma laʼila niha böʼö horö si no ifalua, ba lö mamalö iʼandrö waʼebolo dödö Yehowa ero ba wamobörö wangandrönia. Ba gafuriata, iʼandrö wanolo khö ndra satua sokubaloi. Ifuli itörö tödönia, imane, ”Ataʼudo sibai fahuhuo khöra. Hizaʼi me no aefa daʼö, hulö so niha si no mangeheta noro si so ba galisigu.” Tola ifuli ilau fahuhuo khö Yehowa, lö taha-tahania. Iadaʼa, iʼokhögö dödö side-ide si lö sinegu, ba barö-barö daʼa, tobali ia enoni sohalöwö.

’MOGUNA ISAWA MBANUA DAʼÖ’

10. Enaʼö tola aefa zala niha si no mamunu niha, hadia zinangea ifalua?

¹⁰ Enaʼö tola aefa zalania, moguna iʼanemaiʼö moloi niha samunu andrö ba mbanua sawatö sahatö ba daʼö. (Baso Yosua 20:4.) Na omasi ia auri, moguna möi ba toröi ia ba mbanua daʼö irugi mate gere sebua. Moguna so nitehegönia ba wamalua daʼö. Iröi halöwönia, omonia si sökhi, ba tebai mofanö-fanö manö ia.a (Faigi nisura ba gahe zura.) (4 Moze 35:25) Hizaʼi, so mbuania daʼö. Na iröi mbanua sawatö, iforomaʼö wa lö iʼameʼegö tödö ndro niha si no ibunu ba tola teʼala waʼaurinia samösa.

11. Hewisa wangoromaʼö niha Keriso si no mamalalini era-era wa iʼandrö saohagölö ba waʼahakhö dödö Lowalangi?

¹¹ Iadaʼa, niha somasi mamalalini era-era, moguna so nifaluania enaʼö iʼefaʼö zalania Lowalangi. Moguna iböhöli wamalua horö si no ifalua. Duma-dumania, iʼaröuʼö ia ba ngawalö hadia ia si tola mondrönisi dödönia ba wamalua horö sebua. Itutunö Faulo hadia nifalua niha Keriso ba Korindro somasi mamalalini era-era. Isura, ”No abu dödömi, dali Lowalangi, hewisa wamarounia tödömi, ba wamuʼa saʼae, ba ba wofönu, ba ba waʼataʼu, ba ba wehulu dödö, ba ba wamorege, ba ba wangotuʼö!” (2 Korindro 7:10, 11) Andrö, na tafalua fefu zi tola tafalua ba woböhöli wamalua horö, no taforomaʼö khö Yehowa wa omasi ita tabulöʼö mbua-buada ba lö ba wangera-ngerada wa no sinangea tatema waʼahakhö dödönia andrö.

12. Hadia zinangea iröi niha Keriso na omasi ia enaʼö lö mamalö itema waʼahakhö dödö Yehowa?

¹² Hadia zinangea iröi niha Keriso enaʼö lö mamalö itema waʼahakhö dödö Yehowa? Moguna iröi fefu ngawalö zomasi ia si tola mondrönisi tödönia ba wamalua horö. (Mataiʼo 18:8, 9) Duma-dumania, na ladönisi ndraʼugö ira awömö ba wamalua si lö omasi Yehowa, hadia öbato fariawö khöra? Na abua khöu wanaha tödö ba ginötö öbadu duo, hadia tola öʼangenanöi zalua enaʼö lö oya öbadu ia? Na abua khömö wotayaigö gisö-isö dödö sanandrösa ba wohorö, hadia öʼaröuʼö ndraʼugö ba film, situs Web mazui halöwö nifaluamö si tola mangaʼasogö khömö fangera-ngera si raʼiö? Törö tödömö wa fefu nifaluada ba woloʼö goi-goi Yehowa, hasambalö so mbuania. Lö hadöi sabölö afökhö baero na so ba dödöda wa no iröi ita Yehowa. Ba lö hadöi sabölö sökhi baero na tarasoi ’waʼebua dödö si lö aetu’ moroi khö Yehowa.​—Yesaya 54:7, 8.

’TOBALI SAWATÖMI DAʼÖ’

13. Tutunö hana wa tola telumöʼö ba owua-wua dödö niha samunu na toröi ia ba mbanua sawatö.

¹³ Na ba mbanua sawatö so niha samunu, telumöʼö ia. Imane Yehowa sanandrösa ba mbanua daʼö, ’Tobali sawatömi daʼö.’ (Yosua 20:2, 3) Ba daʼö, lö iʼandrö Yehowa enaʼö lafuli laʼetuʼö hukumania ba zi no alua andrö. Tebai göi möi bakha ba mbanua daʼö niha solau balö ba wamunu yaʼia. Ba ginötö so niha samunu andrö ba mbanua sawatö, ilumöʼö ia Yehowa. Hizaʼi, tenga simane ba gurunga so ia. Tola ilau mohalöwö, itolo niha böʼö hegöi ifosumange Yehowa si fao faʼatulö. Tola irasoi waʼahono dödö ba faʼowua-wua dödö!

14. Hadia zi tola ifaduhusi tödö niha Keriso si no mamalalini era-era?

¹⁴ So ösa nono mbanua Lowalangi si no irai mamalua horö, lö aetu itegu-tegu ira tödöra hewaʼae no lafalalini gera-erara. So ösa zorasoi wa lö irai iʼolifugö Yehowa horö si no lafalua. Na simane daʼö nirasoimö, yafaduhu dödömö wa ba ginötö iʼefaʼö zalamö Yehowa, no iʼolifugö daʼö fefu. Lö moguna öʼabusi tödö sibai daʼö. Daʼö zalua khö Daniel, nitutunö ba wamobörö. Me no aefa labeʼe khönia mene-mene hegöi latolo ia ira satua sokubaloi enaʼö ifuli iʼokhögö dödö side-ide si lö sinegu, ohahau dödönia. Imane, ”Lö uʼabusi tödö sibai zala si no ufalua. Na no muʼefaʼö horöda, no taya saʼae daʼö. Simane niwaʼö Yehowa, ihalö noromö ba iʼaröuʼö waniboʼö yaʼia enaʼö lö irai öʼila saʼae daʼö.” Na no toröi niha samunu ba mbanua sawatö, lö moguna ataʼu ia ma tohare niha solau balö ba wamunu yaʼia. Simanö göi, na no iʼefaʼö horöda Yehowa, lö moguna ataʼu ita wa ifuli itörö tödönia ba ihuku ita ba zi so miföna.​—Baso Zinunö 103:8-12.

15, 16. Hana wa tola faduhu dödöda ba waʼahakhö dödö Yehowa?

¹⁵ Na tafaomagö ita ba ndraono Gizaraʼeli, sindruhunia abölö oya dani niʼokhögöda enaʼö tola tafaduhusi tödö waʼahakhö dödö Yehowa. Me no aefa iwaʼö Faulo wa irasoi ’wamakao’ börö me lö moʼahonoa woloʼönia Yehowa, ilau muʼao, ”Nisuno Lowalangi, börö Yesu Keriso, Soʼaya yaʼita!” (Roma 7:25) Hana wa iwaʼö daʼö? Hewaʼae no irai ifalua zala ba lö nasa mamalö ilawa gisö-isö dödönia si fasala, no ifalalini gera-erania. Andrö, faduhu dödönia wa no iʼefaʼö zalania Yehowa börö höli si no ibeʼe Yesu. Börö me no mate Yesu tobali höli, tola taʼokhögö dödö side-ide si lö sinegu ba tarasoi waʼatulö. (Heberaiʼo 9:13, 14) Börö me Yesu andre Ere Sebua khöda, ”iʼila ifoʼahonoa wangorifi sangondrasi Lowalangi, nifaʼemania, me no si lö mamalö-malö faʼauri ba wolului khöra fangumaʼö”. (Heberaiʼo 7:24, 25) Ba götö föna, ere sebua zanolo ndraono Gizaraʼeli enaʼö faduhu dödöra wa no iʼefaʼö horöra Yehowa. Börö me Yesu no Ere Sebua khöda, oya dani irege tola faduhu dödöda wa ”tatema waʼahakhö dödö, ba enaʼö falukha ita waʼebua dödö, fanolo na baŵa moguna”.​—Heberaiʼo 4:15, 16.

¹⁶ Enaʼö tola talumöʼö ita khö Yehowa, moguna mamati ita ba höli si no ibeʼe Yesu. Böi so ba wangera-ngeramö wa moguna höli ba niha fefu. Okhögö wamati wa höli andre, so mbuania khömö. (Galatia 2:20, 21) Okhögö wamati wa iʼefaʼö horömö Yehowa börö me so höli. Okhögö wamati wa tola öʼokhögö waʼauri si lö aetu börö me so höli. Höli nibeʼe Yesu, no buala nibeʼe Yehowa khömö!

17. Hana wa omasiʼö ölumöʼögö khö Yehowa?

¹⁷ Banua sawatö zanolo yaʼita enaʼö aboto ba dödöda waʼahakhö dödö Yehowa. Hadia zi no ifakhoi Lowalangi andre möi famahaʼöda wa teʼamoniʼö sibai waʼauri. Daʼa göi zangoromaʼö lala nifalua ndra satua sokubaloi ba wanolo yaʼita, lala enaʼö sindruhu-ndruhu tafalalini gera-erada hegöi lala enaʼö sindruhu-ndruhu faduhu dödöda wa no iʼefaʼö zalada Yehowa. Hadia ölumöʼögö khö Yehowa? Ha yaʼia nahia wolumöʼö si sökhi! (Zinunö 91:1, 2) Ba wamahaʼö aefa daʼa, tatutunö hewisa mbanua sawatö möi fanoloda ba woloʼö Yehowa, duma-duma si sökhi ba wangoromaʼö faʼatulö ba faʼahakhö dödö.