Oʼö Waʼatulö ba Faʼahakhö Dödö Yehowa

1, 2. (a) Hewisa wamaigi Yesu Goroisa Lowalangi? (b) Hezo oroma wa fasala lala ndra sangila amakhoita hegöi niha Farizaiʼo ba wamalua Oroisa?

IʼOMASIʼÖ Goroisa Moze Yesu. Lö ahöli dödöda daʼö, börö me Goroisa andrö moroi khö Namania, Yehowa, Sabölö tohude ba waʼauri Yesu. Ba Zinunö 40:9, ifaʼeleʼö Sura Niʼamoniʼö wa omasi sibai Yesu Goroisa Lowalangi. Imane, ”Foloʼö somasi ndraʼugö, yaʼugö Lowalangigu, ba no faʼomasigu, ba oroisamö, ba no so ba dödögu bakha.” Iforomaʼö Yesu moroi ba niwaʼö hegöi nifaluania wa moʼahonoa, so gunania ba hasambalö aʼozu Goroisa Lowalangi.​—Mataiʼo 5:17-19.

² Abu dödö Yesu me iʼila wa lö tefaudu wangogunaʼö ndra sangila amakhoita hegöi niha Farizaiʼo Goroisa Namania, irege lö ikhamö fangera-ngera niha daʼö. Imane khöra, ”Mibeʼe zambua niʼofulu lönga ba höwa ba lada”, eluahania lahaogö sibai woloʼö ngawalö zide-ide ba Goroisa. Hizaʼi, hadia zi sala? Itutunö Yesu, ”Ba no olifu ami zebua Goroisa, fanguhuku ba faʼahakhö dödö ba falöfaröi.” (Mataiʼo 23:23) Lö laʼila ira niha Farizaiʼo hadia zindruhunia nösi Goroisa, ba so ba wangera-ngerara wa abölö sökhi ira moroi ba niha böʼö. Hizaʼi, aboto ba dödö Yesu hadia gohitö dödö moroi ba Goroisa andrö, ba hadia wamahaʼö sanandrösa khö Yehowa ero sambua goroisa si so ba daʼö.

3. Hadia nitutunöda ba wamahaʼö daʼa?

³ Yaʼita niha Keriso, lö lafaso ita ba woloʼö Goroisa Moze. (Roma 7:6) Hizaʼi, hana wa ifaʼanö Goroisa andrö Yehowa ba Daromalinia, Sura Niʼamoniʼö? Omasi ia na aboto ba dödöda ba tafalua ”zebua goroisa”, yaʼia daʼö goi-goi si tobali dane-dane Goroisa. Duma-dumania, hadia goi-goi si tola tafahaʼö ita moroi ba mbanua sawatö? Ba wamahaʼö fatua lö daʼa, no tafahaʼö ita hadia zinangea ifalua niha samunu ba hadia wamahaʼönia khöda. Ba wamahaʼö daʼa, tatutunö hadia wamahaʼö nihalöda moroi ba mbanua sawatö sanandrösa khö Yehowa hegöi lala woloʼöda mbua-buania. Tatutunö wanema li ba zi tölu wanofu andre: Hewisa wa tola oroma waʼahakhö dödö Yehowa moroi ba mbanua sawatö? Hadia wamahaʼö nihalöda ba daʼö sanandrösa ba wamaigi Lowalangi faʼauri? Ba hewisa wa tola oroma waʼatulönia ba daʼö? Sagötö tatutunö daʼa, nehegö hewisa woloʼöda Amada si so ba zorugo.​—Baso Efeso 5:1.

NAHIA MBANUA SAWATÖ IFOROMAʼÖ WAʼAHAKHÖ DÖDÖ LOWALANGI

4, 5. (a) Hadia zi no mufakhoi enaʼö aoha ba niha samunu ba woloi ba mbanua sawatö, ba hadia mbörö? (b) Hadia wamahaʼö si tola tahalö sanandrösa khö Yehowa ba daʼö?

⁴ Itatugöi Yehowa enaʼö aoha wogamö zi önö banua sawatö andrö. Iwaʼö ba ndraono Gizaraʼeli enaʼö lafili tölu mbanua faoma fatambai ba zinga Yoridano. Hana? Enaʼö alio ba aoha ba niha samunu ba wogamö fazambua mbanua andrö. (4 Moze 35:11-14) Lahaogö wondrorogö lala si numalö ba mbanua daʼö. (5 Moze 19:3) Moloʼö waö-waö niha Yahudi, so dandra nifasa ba zi sandrohu lala sanolo niha samunu ba wanöndra mbanua sawatö. Börö me so mbanua sawatö ba mbanua Gizaraʼeli, iraono Gizaraʼeli si lö mangodödögö mamunu niha, lö moguna iʼalui wolumöʼö ba mbanua böʼö börö me tola tedönisi dödönia ba wamosumange lowalangi faya.

⁵ Angeraigö daʼa: Ibeʼe fareta Yehowa enaʼö labunu niha si no mamunu niha. Hizaʼi, ihaogö itatugöi enaʼö niha si lö mangodödögö mamunu niha, tola itema waʼahakhö dödö, faʼomasi ba folumöʼö. Imane samösa sameʼe mbua gera-era ba Zura Niʼamoniʼö, ”Fefu hadia ia no muhaogö mututunö, öna-öna ba aoha.” Yehowa, tenga sanguhuku samuʼi sangalu-ngalui lala wanguhuku ono mbanuania. Hizaʼi, ”si no aʼoi so faʼahakhö dödö” ia.​—Efeso 2:4.

6. Hadia laʼoʼö waʼahakhö dödö Yehowa ira niha Farizaiʼo? Tutunö.

⁶ Hizaʼi, lö laforomaʼö waʼahakhö dödö ba niha böʼö ira niha Farizaiʼo. Duma-dumania, moloʼö waö-waö niha Yahudi, lö laʼefaʼö zala niha böʼö ira niha Farizaiʼo na töra tölu kali ifalua zala si fagölö niha daʼö. Ba wangoromaʼö wa fasala gamuatara, iʼogunaʼö sambua gamaedola Yesu sanandrösa khö zi samösa niha Farizaiʼo sangandrö ba zinga zanema pajak. Imane niha Farizaiʼo, ”He Lowalangi, uʼandrö saohagölö khöu, me tenga simane niha böʼö ndraʼodo, tenga simane sorabu, ba tenga simane sohorö, ba tenga göi simane sanema beo andrö.” Hadia nitandrösaigö Yesu? ”Laʼositengagö” niha böʼö ira niha Farizaiʼo, ba lö omasi ira laforomaʼö waʼahakhö dödö.​—Luka 18:9-14.

7, 8. (a) Hewisa woloʼömö faʼahakhö dödö Yehowa? (b) Hana wa moguna so khöda wangide-ngideʼö ba wangefaʼö sala niha böʼö?

⁷ Oʼö Yehowa, tenga niha Farizaiʼo. Foromaʼö waʼahakhö dödö ba faʼomasi. (Baso Kolose 3:13.) Aohasi ba niha böʼö ba wangandrö faʼebolo dödömö. (Luka 17:3, 4) Sofu khöu samösa: ’Hadia alio ba aoha khögu wangefaʼö zala niha böʼö, hewaʼae asese laʼafökhöiʼö dödögu? Hadia sindruhu-ndruhu omasido atulö ba niha sangafökhöiʼö ba sameʼe tetutu dödögu?’

⁸ Enaʼö tola taʼefaʼö zala niha böʼö, moguna so khöda wangide-ngideʼö. Moloʼö niha Farizaiʼo, abölö sökhi ira moroi ba niha böʼö irege lö omasi ira ba wangefaʼö sala. Hizaʼi, yaʼita niha Keriso, si fao fangide-ngideʼö tafaduhuʼö wa ’ebua ba dödöda nawöda’ ba omasi ita taʼefaʼö zalara. (Filifi 2:3) Tola tasofu khöda samösa, ’Hadia uʼoʼö Yehowa ba uforomaʼö wangide-ngideʼö?’ Na so khöda wangide-ngideʼö, aoha ba niha böʼö ba wangandrö faʼebolo dödöda ba aoha khöda wangefaʼö salara. Böi taha wangoromaʼö faʼahakhö dödö ba böi alio tetutu dödömö.​—Zangombakha 7:8, 9.

AMEʼEGÖ TÖDÖ WAʼAURI BA BÖI MOʼÖMÖ NDRO AMI

9. Hewisa wanolo Yehowa ndraono Gizaraʼeli enaʼö aboto ba dödöra wa no niʼamoniʼö waʼauri?

⁹ Sambua dani wa so mbanua sawatö yaʼia daʼö ba wolumöʼö ndraono Gizaraʼeli enaʼö lö moʼömö do ira na labunu niha si lö fasala. (5 Moze 19:10) Iʼomasiʼö sibai waʼauri Yehowa, ba iʼogorofi wabunusa. (Gamaedola 6:16, 17) Börö me yaʼia Lowalangi satulö ba niʼamoniʼö, lö itehegö wabunusa hewaʼae na lö muʼodödögö daʼö. Atulö sa wa tola isöndra waʼahakhö dödö niha samunu si lö mangodödögö. Hizaʼi si oföna, moguna ifatunö khö ndra satua mbanua hadia zalua khönia. Na lahalö gangetula ira satua mbanua wa tenga niʼodödögö daʼö, tola toröi ia ba mbanua sawatö irege mate gere sebua. Eluahania, toröi ia ba daʼö sandrohu faʼaurinia. Amakhoita daʼa zamahaʼö ndraono Gizaraʼeli wa no niʼamoniʼö waʼauri. Ba wamosumange Sameʼe faʼauri, moguna laʼoigö dödöra enaʼö lö teʼala waʼauri niha böʼö labeʼe.

10. Moloʼö Yesu, hewisa wangoromaʼö niha sangila amakhoita hegöi niha Farizaiʼo wa lö laʼameʼegö tödö waʼauri niha böʼö?

¹⁰ Tenga simane Yehowa, niha sangila amakhoita hegöi niha Farizaiʼo lö laʼameʼegö tödö waʼauri niha böʼö. Imane khöra Yesu, ”No mihalö wogoe wangila lala andrö; yaʼami, ba lö si möi bakha, ba sedöna möi bakha, ba no misaisi!” (Luka 11:52) Hadia geluaha wehede Yesu? Sindruhunia, niha sangila amakhoita hegöi niha Farizaiʼo moguna labotokhi ba dödö niha böʼö Daromali Lowalangi ba latolo ira ba wangokhögö faʼauri si lö aetu. Hizaʼi, lasaisi niha somasi moloʼö Yesu, ’Salawa Sangorifi’. (Halöwö Zinenge 3:15) Eluahania, ladöniaʼö niha enaʼö tehori ira. Yaʼira andre niha sasiliawa ba sangalui tana khöra samösa, ba lö laʼameʼegö tödö waʼauri niha böʼö. Sindruhu-ndruhu afaito ba lö khöra faʼomasi!

11. (a) Hewisa wangoromaʼö Waulo wa lala wamaiginia faʼauri fagölö ba lala wamaigi Yehowa? (b) Hadia zanolo yaʼita ba woloʼö faʼowölö-ölö Waulo ba wanuriaigö?

¹¹ Hewisa woloʼöda Yehowa ba lö tobali ita simane niha sangila amakhoita hegöi niha Farizaiʼo? Tafalua daʼö na taʼameʼegö tödö ba taʼosinangegö waʼauri. Iforomaʼö daʼa sinenge sotöi Faulo me ituriaigö duria somuso dödö sanandrösa ba Mbanua Lowalangi ba niha sato. Andrö wa tola iwaʼö, ”Lö horögu ba ndrora fefu.” (Baso Halöwö Zinenge 20:26, 27.) Hizaʼi, hadia manuriaigö Waulo ha börö me lö omasi ia fasala mazui börö me Yehowa zangumaʼö khönia? Tenga. Iʼomasiʼö fefu niha Faulo. Tohude sibai waʼaurira ba wamaiginia, ba omasi ia na lasöndra waʼauri si lö aetu. (1 Korindro 9:19-23) Moguna göi taʼokhögö lala wamaigi Yehowa waʼauri. Omasi ia na fefu niha lafalalini gera-erara ba laʼokhögö waʼauri si lö aetu. (2 Fetero 3:9) Enaʼö tola taʼoʼö Yehowa, moguna taʼomasiʼö niha. Na taʼokhögö mbua-bua faʼahakhö dödö, daʼa zamarou yaʼita weʼamöi manuriaigö si fao faʼowölö-ölö ba tarasoi waʼomuso dödö.

12. Hana wa tohude sibai ba nono mbanua Lowalangi ba wondrorogö enaʼö lö teʼala waʼaurira?

¹² Enaʼö taʼokhögö lala wamaigi Yehowa faʼauri, moguna taʼokhögö mbua-bua satulö ba wondrorogö enaʼö lö teʼala waʼaurida. Böi teʼala waʼaurida ba ginötö taʼohe moto mazui na talau mohalöwö simane ba mangehaogö omo, ba wondrorogö, mazui ba weʼamöi ba nahia gangowuloa. Ba wondrorogö enaʼö lö mofökhö ba lö teʼala, abölö tohude ia moroi na taʼatalisi wangogunaʼö inötö hegöi kefe. Lö mamalö ifalua zatulö Lowalangida, ba omasi ita taʼoʼö duma-dumania. Töra-töra khö ndra satua sokubaloi, moguna laʼangeraigö hewisa enaʼö lö teʼala waʼaurira hegöi niha böʼö. (Gamaedola 22:3) Na so samösa zatua sokubaloi zamasugi ba dödömö goi-goi ba wondrorogö enaʼö lö teʼala waʼaurimö, fondro-ndrongo daʼö. (Galatia 6:1) Okhögö lala wamaigi Yehowa faʼauri, ba böi moʼömö ndro ndraʼugö.

ETUʼÖ HUKUMA MOLOʼÖ GOI-GOI YEHOWA

13, 14. Hadia zinangea lafalua ira satua mbanua ndraono Gizaraʼeli ba woloʼö faʼatulö Yehowa?

¹³ Iʼandrö Yehowa ba zatua mbanua ndraono Gizaraʼeli enaʼö laʼoʼö waʼatulönia. Si oföna, moguna laʼalui fefu hadia zindruhunia zalua. Aefa daʼö, moguna lahaogö lafatimbaisi hadia gohitö dödö, amuata, hegöi nifalua niha samunu andrö ba zilalö fatua lö laforomaʼö khönia waʼahakhö dödö. Moguna laʼosisiʼö hadia fatuwu ia ba niha nibununia ba so ba dödönia wamunu. (Baso 4 Moze 35:20-24.) Na so niha zamaduhuʼö, si löʼö-löʼönia darua, tola labunu zamunu andrö.​—4 Moze 35:30.

¹⁴ Na no laʼila hadia zindruhunia zalua, moguna aboto ba dödö ndra satua mbanua hewisa zindruhunia lala waʼauri niha samunu, tenga ha si no ifalua. Moguna laʼokhögö waʼaboto ba dödö enaʼö lö laʼosambuaʼö dödöra ba niʼila höröra ba enaʼö laʼila hana wa tola alua daʼö. Sabölö tohude, moguna so khöra geheha niʼamoniʼö Yehowa sanolo yaʼira ba woloʼö faʼahakhö dödö, faʼaboto ba dödö hegöi faʼatulönia.​—2 Moze 34:6, 7.

15. Hadia gamaehuta lala wamaigi Yesu niha samalua horö moroi ba niha Farizaiʼo?

¹⁵ Lö faʼahakhö dödö ba niha Farizaiʼo ba ginötö laʼetuʼö hukuma. Laʼosambuaʼö dödöra ba zala nifalua niha samalua horö, tenga ba lala waʼaurinia. Me manga Yesu ba nomo Mataiʼo, so ösa niha Farizaiʼo sangila yaʼia. Lasofu khö ndra nifahaʼönia, ”Hana wa orudu manga zamahaö yaʼami ba zanema beo ba ba zebua horö?” Itema lira Yesu, ”Ba zabölö, ba lö moguna zameʼe dalu-dalu, ha ba zofökhö moguna. Ba miʼae mibeʼe ba dödömi, hadia niwaʼö andrö: ’Faʼahakhö dödö zomasido, ba tenga sumange.’ Tenga sa ba wogaoni satulö möi ndraʼo, ha ba wogaoni si so horö.” (Mataiʼo 9:9-13) Hadia iʼoʼawögö niha samalua horö Yesu? Tatu löʼö. Omasi ia na lafalalini gera-erara. Daʼa sambua faosatö si tohude ba duria nifaʼemania. (Mataiʼo 4:17) Iʼila Yesu wa so ösa ’zanema beo ba sebua horö’ somasi mamulöʼö gamuatara. Tenga ha ba wemanga wa möi ira ba nomo Mataiʼo, hizaʼi börö me omasi ira laʼoʼö Yesu. (Mareko 2:15) Hizaʼi, ato niha Farizaiʼo si lö mangokhögö lala wamaigi Yesu sanandrösa khö zi samösa niha. Lö faduhu dödöra wa tola tebulö gamuata niha. Ba wamaigira lö fanötöna ba niha samalua horö. No aröu faehu ira moroi khö Yehowa, Lowalangi satulö ba sahakhö tödö!

16. Hadia zinangea laʼosisiʼö ira panitia pengadilan?

¹⁶ Iadaʼa, ira satua sokubaloi moguna laʼoʼö Yehowa, ’sangomasiʼö satulö’. (Zinunö 37:28) Si oföna, moguna ’lahaogö wanekhegö’ ba wotatugöi hadia so horö si no alua. Na so, moguna laʼoʼö wanuturu lala moroi ba Zura Niʼamoniʼö ba wangai angetula. (5 Moze 13:12-15) Na tobali ira panitia pengadilan, moguna lahaogö latatugöi hadia niha si no mamalua horö andrö sindruhu-ndruhu no ifalalini gera-erania mazui löʼö. Lö aoha wamalua daʼa börö me famalalini era-era moʼamakhaita ia ba lala wamaiginia zala si no ifalua ba hewisa dödönia ba daʼö. (Famaʼeleʼö 3:3) Niha samalua horö, moguna ifalalini gera-erania enaʼö tola itema waʼahakhö dödö.a—Faigi nisura ba gahe zura.

17, 18. Hewisa enaʼö laʼila ira satua sokubaloi wa sindruhu-ndruhu no ifalalini gera-erania si samösa niha? (Faigi gambara ba wamobörö wamahaʼö.)

¹⁷ Yehowa hegöi Yesu, laʼila hadia zi so ba wangera-ngera hegöi nirasoi zi samösa niha börö me laʼila labaso dödö niha. Hizaʼi, tebai labaso dödö niha ira satua sokubaloi. Andrö, na yaʼugö samösa satua sokubaloi, hewisa enaʼö öʼila wa sindruhu-ndruhu no ifalalini gera-erania si samösa niha? Si oföna, andrö waʼatua-tua ba faʼaboto ba dödö moroi khö Yehowa. (1 Razo 3:9) Si dua, ogunaʼö Daromali Lowalangi hegöi publikasi moroi khö ndra sawuyu si lö faröi enaʼö öʼila gamaehuta ”waʼabu dödö niha gulidanö” ba ’faʼabu dödö andrö sa, na dali Lowalangi’ yaʼia daʼö famalalini era-era sindruhu. (2 Korindro 7:10, 11) Faigi hewisa wanutunö Zura Niʼamoniʼö niha samalalini era-era hegöi si löʼö, ba nehegö hewisa wangera-ngera, nirasoi hegöi nifaluara.

¹⁸ Si tölu, angeraigö nihania, tenga sala si no ifalua. Hana wa ifalua ba ihalö gangetula daʼö? Hadia wanandraigö hegöi zoʼamböta niʼokhögönia? No ifaʼeleʼö Sura Niʼamoniʼö wa Yesu, högö mbanua niha Keriso, ”tenga niʼila hörönia dali wanguhukunia, ba tenga dali wangetuʼö huku nirongo dögi dalingania. Satulö saʼae dali khönia wameʼe huku ba zi numana, ba iʼadölöʼö wangetuʼö huku ba zebua famakao ba danö”. (Yesaya 11:3, 4) Ira satua sokubaloi, no ituyu ami Yesu ba wondrorogö mbanua niha Keriso, ba hasambalö itolo ami ba wanguhuku si fao faʼatulö ba faʼahakhö dödö. (Mataiʼo 18:18-20) Taʼandrö sibai saohagölö börö me laʼameʼegö tödö ita ira satua sokubaloi! Latolo göi ita ba wangoromaʼö faʼatulö ba faʼahakhö dödö khö nawöda.

19. Hadia wamahaʼö somasiʼö öfalua moroi ba mbanua sawatö?

¹⁹ Ösi Goroisa Moze yaʼia daʼö faʼatua-tua ”dali wangila ba dali ziduhu”. Daʼa zamahaʼö yaʼita sanandrösa khö Yehowa hegöi goi-goinia. (Roma 2:20) Banua sawatö zanutunö Goroisa samahaʼö ndra satua sokubaloi lala ”wamatunö huhuo” si fao faʼatulö. Daʼa göi zamahaʼö yaʼita ba wangoromaʼö ’faʼomasi si lö faröi ba faʼahakhö dödö’ ba niha böʼö. (Zakharia 7:9) Hewaʼae lö lafaso ita ba woloʼö Oroisa, hizaʼi lö si tebulö Yehowa. Faʼatulö ba faʼomasi lö mamalö tohude khönia. Taʼandrö sibai saohagölö me tola tafosumange Lowalangi simane yaʼia. Dataʼoʼö mbua-buania si sökhi ba talumöʼö ita khönia!