Fahasara Dödö ba Wanörö Tödö

1, 2. Ba ndröfi 2018, hadia gangowuloa sangosambuaʼö yaʼita si fao faʼahöli-höli dödö, ba hadia mbörö? (Faigi gambara ba wamobörö wamahaʼö.)

BA TANGGAL 31 mbaŵa si Tölu 2018, zuta niha ba zi sagörö ulidanö laʼondrasi gangowuloa nifalua sakali ba zi döfi. Na no aekhu luo, ira Samaduhuʼö Yehowa hegöi niha böʼö, fao ira ba wanörö tödö hadia zi no ifalua Yesu khöda. Ero röfi, Fanörö Tödö faʼamate Keriso andre zangosambuaʼö niha si fao faʼahöli-höli dödö, töra moroi ba gangowuloa tanö böʼö si so ba zi sagörö ulidanö.

² Sindruhu-ndruhu omuso dödö Yehowa hegöi Yesu me laʼila zuta niha sangondrasi angowuloa si tohude nifalua ba zi hauga za, ba zi sagörö ulidanö. Imane Sura Niʼamoniʼö, ”Ba hiza zato sibai, si tebai iʼerai niha, moroi ba ngawalö soi fefu, ba moroi ba ngawalö niwa fefu, ba moroi ba ngawalö mado fefu, ba moroi ba ngawalö li fefu.” Muʼao ira, ”Fangorifi khö Lowalangida, si dadao ba dadaoma andrö, ba khö Nono Mbiri-biri andrö.” (Famaʼeleʼö 7:9, 10) Daʼa Wanörö Tödö sahöli-höli dödö nifalua ero röfi, ato niha samosumange Yehowa hegöi Yesu börö zi sökhi si no lafalua!

3. Hadia wanofu-nofu nitutunö ba wamahaʼö daʼa?

³ Ba wamahaʼö daʼa, tola öʼila wanema li moroi ba zi öfa wanofu-nofu andre: (1) Hewisa wamaʼanögu yaʼo ba Wanörö Tödö irege tola sindruhu-ndruhu utema mbuania? (2) Hewisa Wanörö Tödö andre möi fanolo ba wangosambuaʼö ono mbanua Lowalangi? (3) Hadia nifaluagu ba wangaʼasogö fahasara dödö ba gotalua nono mbanua Lowalangi? (4) Hadia laböhöli saʼae wamalua Fanörö Tödö andrö? Na yaʼia, hawaʼara?

HEWISA WAMAʼANÖDA YAʼITA BA WANGONDRASI FANÖRÖ TÖDÖ ENAʼÖ TOLA TATEMA MBUANIA?

4. Hana wa moguna sibai taʼondrasi Wanörö Tödö?

⁴ Hana wa moguna sibai taʼondrasi Wanörö Tödö? Sambua dani yaʼia daʼö ba wamosumange Yehowa. Faduhu dödöda wa Yehowa hegöi Yesu lahaogö lanehegö niha samorege ba wangondrasi angowuloa si tohude andrö ba ndröfi daʼö. Omasi ita na iʼila Yehowa hegöi Yesu wa hasambalö taʼondrasi Wanörö Tödö baero na sindruhu-ndruhu tebai saʼae möi ita. Na oroma ba nifaluada wa tohude sibai khöda gangowuloada, no tabeʼe sambua dani khö Yehowa enaʼö lö aetu so döida ba ’zura famasugi ba dödö’. Lafotöi göi mbuku daʼa ”sura waʼauri”. Ba daʼö so döi niha somasi ibeʼe waʼauri si lö aetu Yehowa.​—Maleakhi 3:16; Famaʼeleʼö 20:15.

5. Hauga migu fatua lö mufalua Wanörö Tödö, hewisa ’wosekhegömö tödömö na samati ndraʼugö’?

⁵ Hauga migu fatua lö mufalua Wanörö Tödö, moguna oya ginötöda ba wangandrö ba tahaogö taʼangeragö hewisa waʼaro wahuwusada khö Yehowa. (Baso 2 Korindro 13:5.) Imane sinenge sotöi Faulo ba niha Keriso, ”Misekhegö dödömi na samati ami.” Hewisa wamalua yaʼia? Tola tasofu khöda samösa: ’Hadia sindruhu-ndruhu faduhu dödögu wa daʼa organisasi si no ifili Yehowa ba wamalua somasi ia? Hadia no ufalua zabölö sökhi ba wanuriaigö hegöi ba wamahaʼö sanandrösa ba duria somuso dödö? Hadia oroma ba nifaluagu wa so khögu waʼafaduhu dödö, wa so ita ba ngaluo safuria ba no ahatö wangohori famatörö Zatana? Hadia itugu aro waʼafaduhu dödögu khö Yehowa hegöi khö Yesu iʼotarai me awena ubörögö wamosumange Yehowa?’ (Mataiʼo 24:14; 2 Timoteo 3:1; Heberaiʼo 3:14) Na tahaogö taʼangeragö wanema li moroi ba wanofu-nofu daʼö tola taʼila haniha ita zindruhunia.

6. (a) Hadia lala ba wanöndra faʼauri si lö aetu? (b) Hewisa zi samösa satua sokubaloi ba wamaʼanö yaʼia ba Wanörö Tödö ero röfi, ba hewisa enaʼö tola öfalua zimane daʼö?

⁶ Sambua lala si tola öfalua ba wamaʼanö yaʼugö ba Wanörö Tödö yaʼia daʼö baso ba haogö angeragö wamahaʼö sanutunö hana wa tohude sibai gangowuloa daʼö. (Baso Yohane 3:16; 17:3.) Sambua lala ba wanöndra faʼauri si lö aetu yaʼia daʼö taʼokhögö waʼaboto ba dödö sanandrösa khö Yehowa ba mamati ita khö Nononia, Yesu. Ba wamaʼanö yaʼita ba Wanörö Tödö, moguna tafili wamahaʼö si tola manolo yaʼita enaʼö itugu ahatö ita khöra. Daʼa nifalua zi samösa talifusöda si no ara tobali satua sokubaloi. Ba zi hauga fakhe, no iʼowuloi wamahaʼö Manuriaigö sanutunö Fanörö Tödö ba faʼomasi niforomaʼö Yehowa hegöi Yesu khöda. Ba zi hauga migu fatua lö mufalua Wanörö Tödö, ifuli ibaso wamahaʼö daʼö ba ihaogö iʼangeragö hana wa tohude sibai gangowuloa daʼö. Itaria, inönö waʼoya artikel andrö sambua mazui dombua. Ihaogö ibaso ba iʼangeragö ayati Zura Niʼamoniʼö nibaso ba Wanörö Tödö. Itutunö satua sokubaloi andrö, börö me no ifalua fefu daʼö so wamahaʼö si bohou nitemania ero röfi. Sabölö tohudenia, itugu iʼomasiʼö Yehowa hegöi Yesu. Na öfalua göi zimane daʼö, monönö waʼomasiu khö Yehowa hegöi khö Yesu. Itugu öʼandrö saohagölö ba zi no lafalua ba tola itugu oya mbua nitemamö ba Wanörö Tödö.

FANÖRÖ TÖDÖ ZI TOLA MANGOSAMBUAʼÖ YAʼITA

7. (a) Hadia niʼangandröi Yesu ba Mbongi Watomesa Zoʼaya? (b) Hadia zangoromaʼö wa no ifondrondrongo Yehowa wangandrö Yesu?

⁷ Ba Mbongi Watomesa Zoʼaya, iwaʼö wangandrö si tohude Yesu. Mangandrö ia sanandrösa ba wahasara dödö si sökhi si no laʼokhögö Amania. Mangandrö göi Yesu enaʼö teʼosambuaʼö ndra nifahaʼönia simane daʼö. (Baso Yohane 17:20, 21.) Tatu no ifondrondrongo Yehowa wangandrö Nononia andrö. Faehu moroi ba gangowuloa tanö böʼö, Fanörö Tödö andre zangoromaʼö wa sindruhu-ndruhu teʼosambuaʼö ndra Samaduhuʼö Yehowa. Ba ngaluo daʼö, zuta niha moroi ba ngawalö soi hegöi uli si faböʼö-böʼö sowulo ba zi sagörö ulidanö. Laforomaʼö wa faduhu dödöra wa no ifatenge Nononia Yehowa. Ba zi hauga nahia, lö toʼölö fao niha si faböʼö soi ba wamalua angowuloa sanandrösa ba agama. Na lafalua daʼö, tola manö so ba wangera-ngera niha böʼö wa lö tefaudu nifaluara. Hizaʼi, tenga daʼö nirasoi Yehowa hegöi Yesu. Moloʼö yaʼira, no si sökhi sibai na owulo ita ba Wanörö Tödö.

8. Hadia niwaʼö Yehowa khö Hezekieli?

⁸ Yaʼita ono mbanua Yehowa, lö ahöli-höli dödöda na teʼosambuaʼö ita ba lala simane daʼö. No ifaʼeleʼö khö Hezekieli wahasara dödö daʼa Yehowa. Ifarou Hezekieli ba wangai dombua siʼo, sara moroi ba ”mado Yuda” ba sara moroi ba ”mado Yosefo”. Iʼorudugö daʼö tobali sambua siʼo. (Baso Hezekieli 37:15-17.) Itutunö ”Fanofu Zombaso” ba Manuriaigö mbaŵa si Fitu 2016, ”Iʼogunaʼö zamaʼeleʼö sotöi Hezekieli Yehowa, ba wamaʼeleʼö wa mangawuli nono mbanuania ba Danö Gamabuʼula ba teʼosambuaʼö ira tobali sambua soi. Itutunö khöda ba wamaʼeleʼö andrö göi, wa niha samosumange Lowalangi teʼosambuaʼö ira tobali ono mbanua ba luo safuria dania.”

9. Ba Wanörö Tödö ero röfi, hezo tola taʼila wa no alua wamaʼeleʼö Hezekieli sanandrösa ba wahasara dödö?

⁹ Iʼotarai me döfi 1919, ifuli ihaogö ba iʼowuloi niha nibayoini Yehowa. Yaʼira andre no amaedola siʼo moroi ba ”mado Yuda”. Itugu ara, itugu ato niha sanötöna sauri ba gulidanö si fao ba niha nibayoini, ba laʼamaedolagö ira siʼo moroi ba ”mado Yosefo”. No ifabuʼu Yehowa wa iʼosambuaʼö zi dombua siʼo andrö tobali ”sara siʼo” ba dangania. (Hezekieli 37:19) Iʼosambuaʼö niha nibayoini hegöi ’biri-biri böʼö’ tobali ”ha sambawa nikubaloi”. (Yohane 10:16; Zakharia 8:23) Iadaʼa, si dombua ngawawa andre no teʼosambuaʼö ba fao ira ba wamosumange Yehowa. Ha samösa Razora, Yesu Keriso, si so ba wamaʼeleʼö Hezekieli ba ifotöi ia Lowalangi ”enonigu Dawido”. (Hezekieli 37:24, 25) Ba ginötö owulo ita ero röfi ba Wanörö Tödö faʼamate Yesu, tola taʼila wa no teʼosambuaʼö zi dombua ngawawa andre simane nifaʼeleʼö Hezekieli. Hizaʼi, hadia nifaluada zamösana ba wangoromaʼö hegöi ba wangaʼasogö fahasara dödö ba gotalua nono mbanua Lowalangi?

HADIA ZI TOLA TAFALUA ZAMÖSANA BA WANGAʼASOGÖ FAHASARA DÖDÖ?

10. Hewisa wangaʼasogöda fahasara dödö ba gotalua nono mbanua Lowalangi?

¹⁰ Hadia lala si oföna sinangea tafalua ba wangaʼasogö fahasara dödö? Yaʼia daʼö taforege wangokhögö fangide-ngideʼö. Me so Yesu ba gulidanö, iwaʼö khö ndra nifahaʼönia enaʼö laʼokhögö wangide-ngideʼö. (Mataiʼo 23:12) Niha gulidanö iadaʼa, abölö tohude ira ba wamaigira moroi ba niha böʼö. Hizaʼi, na so khöda wangide-ngideʼö taʼameʼegö tödö ndra talifusöda sondröniaʼö ba mbanua niha Keriso, ba taʼoʼö wanuturu lala nibeʼera. Ha daʼö lala enaʼö so wahasara dödö ba mbanua niha Keriso. Sabölö tohudenia, na so khöda wangide-ngideʼö tola taʼomusoiʼö dödö Lowalangi börö me, ”itimba sa Lowalangi zi fayawa, ba iʼebuaʼö dödönia ba zangide-ngideʼö yaʼira”.​—1 Fetero 5:5.

11. Hana wa tola möi fanoloda ba wangaʼasogö fahasara dödö na taʼangeragö hadia geluaha roti hegöi agu niʼogunaʼö ba Wanörö Tödö?

¹¹ Hadia lala si dua sinangea tafalua ba wangaʼasogö fahasara dödö? Yaʼia daʼö na tahaogö taʼangeragö hadia geluaha roti hegöi agu. Tafalua daʼö fatua lö mubörögö Wanörö Tödö ba töra-töra saʼae ba mbongi daʼö. (1 Korindro 11:23-25) Roti si lö muʼaisöni no amaedola mboto Yesu soʼahonoa nibeʼenia tobali sumange. Agu andre no amaedola ndronia. Hizaʼi, tenga ha asala aboto ba dödöda daʼö. Moguna tatörö tödöda wa höli si no ibeʼe Yesu andre no faʼomasi niforomaʼönia hegöi Amania. Ibeʼe Nononia Yehowa ba ibeʼe khöda waʼaurinia Yesu. Na taʼangeragö waʼomasira, tola tefarou dödöda ba wangomasiʼö yaʼira. Faʼomasida khö Yehowa zangaʼaroʼö fahasara dödöda.

12. Ba gamaedola sanandrösa khö zi samösa razo ba sawuyunia, hewisa wa tola taʼila wa omasi Yehowa na taʼefaʼö zala niha böʼö?

¹² Hadia lala si tölu sinangea tafalua ba wangaʼasogö fahasara dödö? Yaʼia daʼö na taʼefaʼö zala niha böʼö. Ba ginötö tafalua daʼö, taforomaʼö wa taʼandrö saohagölö khö Yehowa me no iʼefaʼö horöda börö höli nibeʼe Yesu. Enaʼö tola taʼila wa moguna sibai wangefaʼö sala, itutunö Yesu sambua gamaedola sanandrösa khö zi samösa razo ba sawuyunia. Baso Mataiʼo 18:23-34 ba sofu khöu samösa: ’Hadia tefarou dödögu wamalua hadia nifahaʼö Yesu? Hadia ebolo dödögu ba ufaudugö wangera-ngeragu khö ndra talifusöda? Hadia edöna ndraʼo wangefaʼö sala niha si fasala khögu?’ Sindruhu sa wa so ösa zala sabölö ebua moroi ba danö böʼö. Tola manö, börö me yaʼita niha si lö moʼahonoa abua khöda wangefaʼö yaʼia. Hizaʼi, tola taʼila hadia niʼandrö Yehowa khöda moroi ba gamaedola nibeʼe Yesu. (Baso Mataiʼo 18:35.) Iforomaʼö khöda Yesu wa lö iʼefaʼö zalada Yehowa na lö taʼefaʼö zala ndra talifusöda si no mamalalini era-erara. Moguna tahaogö taʼangeragö daʼö. Enaʼö lö taya ba aro wahasara dödöda, moguna taʼefaʼö zala niha böʼö simane nifahaʼö Yesu khöda.

13. Hana wa tola taʼasogö wahasara dödö na taforege waʼatulö ba niha böʼö?

¹³ Na taʼefaʼö zala niha böʼö, no tarorogö waʼatulö khö ndra talifusöda. Iwaʼö Faulo wa moguna taforege ba wangaʼasogö fahasara dödö hegöi faʼatulö ba gotaluada. (Efeso 4:3) Andrö, sagötö Fanörö Tödö ba töra-töra ba mbongi daʼö, haogö angeragö hadia nifaluamö ba niha böʼö. Sofu khöu samösa: ’Hadia laʼila ira si fahuwu khögu wa lö saʼae mofönu ndraʼo ba niha si no mangafökhöiʼö tödögu? Hadia laʼila niha böʼö wa uforege ba wangaʼasogö faʼatulö hegöi fahasara dödö?’ Daʼa wanofu-nofu sinangea muhaogö muʼangeragö.

14. Hewisa wangoromaʼöda wa ’tabologö dödöda khö nawöda ba taʼomasiʼö ia’?

¹⁴ Hadia lala si öfa sinangea tafalua ba wangaʼasogö fahasara dödö? Yaʼia daʼö taʼoʼö Yehowa ba wangoromaʼö faʼomasi. (1 Yohane 4:8) Lö omasi ita tawaʼö, ”No atulö ndraʼo khö ndra talifusögu, hizaʼi lö omasido ahatö khöra.” Na taʼokhögö wangera-ngera simane daʼö, lö niʼoʼöda mene-mene Waulo me iwaʼö, ”mibologö dödömi khö nawömi, miʼomasiʼö ia”. (Efeso 4:2) Nehegö hadia niwaʼö Waulo, tenga ha asala ’tabologö dödöda khö nawöda’ hizaʼi, moguna ’taʼomasiʼö ia’. No aröu faehu daʼa. No faböʼö-böʼö niha si so ba mbanua niha Keriso, ba no ikaoni ira Yehowa enaʼö ahatö khönia. (Yohane 6:44) Iʼomasiʼö ira Yehowa börö me so khöra mbua-bua si sökhi. Na no sinangea iʼomasiʼö ira Lowalangi, hadia tola tawaʼö wa tenga sinangea taʼomasiʼö ira? Moguna taʼomasiʼö sibai ira simane niʼandrö Yehowa khöda.​—1 Yohane 4:20, 21.

HAWAʼARA LÖ MUFALUA SAʼAE WANÖRÖ TÖDÖ?

15. Hezo tola taʼila wa lö mufalua saʼae Wanörö Tödö?

¹⁵ So dania ginötönia, lö saʼae tafalua Wanörö Tödö. Hewisa wa tola taʼila daʼö? Iwaʼö Faulo ba niha Keriso nibayoini, na latörö tödöra waʼamate Yesu ero röfi, no ’laʼombakhaʼö waʼamate Zoʼaya, irugi so ia’. (1 Korindro 11:26) Ba wamaʼeleʼö nibeʼenia sanandrösa ba luo safuria, no itutunö Yesu ’weʼasonia’. Na itugu ahatö wamakao sabölö-bölö imane Yesu, ”Aefa daʼö, ba oroma dandra Nono niha andrö ba mbanua si yawa, ba mege-ege fefu soi ba gulidanö, ba laʼila dania Nono niha, si so moroi si yawa, ba dete lawuo ba mbanua, fao waʼabölö ba lakhömi sebua. Ba ifatenge malaʼikania, telau dorofe sebua li, ba laʼowuloi khönia nitutuyunia andrö, moroi ba zi fasui, iʼotarai wondrege danö, numalö ba wondregenia tanö sa.” (Mataiʼo 24:29-31) ’Iʼowuloi nitutuyunia’ Yesu ba ginötö iʼohe ba zorugo fefu niha Keriso nibayoini si so ba gulidanö. Alua daʼö na no tebörögö wamakao sabölö-bölö hizaʼi fatua lö alua wasuwöta ba Hamagedo. Ba wasuwöta andrö, Yesu hegöi si 144.000 lasuwö razo si so ba gulidanö ba hasambalö möna ira. (Famaʼeleʼö 17:12-14) Tafalua Wanörö Tödö safuria, fatua lö ”so” Yesu ba wangowuloi niha nibayoini si toröi.

16. Hana wa hasambalö öʼondrasi Wanörö Tödö ba ndröfi daʼa?

¹⁶ Böi zi lö tola löʼö ondrasi Wanörö Tödö ba tanggal 31 mbaŵa si Tölu 2018. Andrö khö Yehowa enaʼö itolo ndraʼugö ba wamalua hadia zinangea öfalua enaʼö teʼosambuaʼö ita tobali ono mbanuania. (Baso Zinunö 133:1.) Samuza inötö, lö saʼae tafalua Wanörö Tödö. Gasa-gasa daʼö, dataforomaʼö wa taʼokhögö wahasara dödö ero röfi ba Wanörö Tödö si no tobali angowuloa sabölö tohude khöda.