”Ibeʼe Waʼabölö ba Zerege Tödö”

1. Hadia manö gabula dödö nitaögöda, ba hana wa omuso dödö Yehowa ba niha samosumange yaʼia si lö faröi? (Faigi gambara ba wamobörö wamahaʼö.)

OYA gabula dödö ba gulidanö iadaʼa. Duma-dumania, ato ndra talifusömö si göna abula dödö börö wökhö sabölö-bölö. Tanö böʼönia, ira sagawuyu döfi moguna larorogö ndra talifusöra si no agatua boto. Ato göi zamorege ba wombönökhi soguna ba nösi nomora. Aboto göi ba dödöda wa ato niha sanaögö abula dödö si faböʼö-böʼö ba ginötö si fagölö! Daʼa zangohori inötö, faʼabölö hegöi kefe. Hizaʼi, tola faduhu dödömö wa hasambalö itolo ndraʼugö Yehowa. Aboto ba dödömö wa tola itugu sökhi fefu hadia ia börö me daʼö nifabuʼunia. Sindruhu-ndruhu möi fangomusoiʼö dödö Yehowa wamatimö!

2. Hewisa Yesaya 40:29 möi famarou dödöda, hizaʼi hadia zala sebua si tola tafalua?

² Hadia itaria örasoi wa abua khöu wanaögö abula dödö salua khömö? Na yaʼia, tenga ha yaʼugö zorasoi daʼö. So ösa nono mbanua Lowalangi ba götö föna sorasoi simane daʼö. (1 Razo 19:4; Yobi 7:7) Hadia zanolo yaʼira irege so khöra waʼanau gölö? Laʼodaligö Yehowa enaʼö so khöra waʼabölö. Imane Sura Niʼamoniʼö wa Lowalangi andrö ’zameʼe faʼabölö ba zerege tödö’. (Yesaya 40:29) Hizaʼi, so ösa nono mbanua Lowalangi iadaʼa sangumaʼö wa lala sabölö sökhi ba wanaögö abula dödöra yaʼia daʼö laböhöli wamosumange Yehowa ba zi sabata. Lawaʼö wa abölö oya noro dödö nitaögöra ba wamosumange Yehowa moroi ba howu-howu nitemara. Laböhöli wombaso Sura Niʼamoniʼö, feʼamöi ba gangowuloa hegöi ba wanuriaigö. Daʼö nitötöna Zatana enaʼö lafalua.

3. (a) Hewisa wotimbagöda Satana enaʼö lö ibeʼe khöda waʼawuwu? (b) Hadia nitutunöda ba wamahaʼö daʼa?

³ Omasi Gafökha na lö khöda faʼabölö. Iʼila wa tola abölö ita na oya ginötö niʼogunaʼöda ba wamosumange Yehowa. Andrö, ba ginötö marase mboto hegöi fangera-ngeramö, böi aröuʼö ndraʼugö khö Yehowa. Hatöʼö ndraʼugö khönia. Imane Sura Niʼamoniʼö, ”Iʼabölöʼö ami, iʼabeʼeʼö ami.” (1 Fetero 5:10; Yakobo 4:8) Ba wamahaʼö daʼa, tafahaʼö ita ba Yesaya 40:26-31 sanandrösa ba waʼabölö Yehowa ba wangaʼaroʼö yaʼita. Tatutunö dombua zalua si tola möi fangawuwuda ba wangai halöwö khö Yehowa, ba tafahaʼö ita hewisa wa tola möi fanoloda goi-goi Zura Niʼamoniʼö enaʼö so khöda waʼanau gölö.

DOZI SANÖTÖNA KHÖ YEHOWA LATEMA WAʼABÖLÖ

4. Hadia wamahaʼö nihalöda ba Yesaya 40:26?

⁴ Baso Yesaya 40:26. Lö hadöi si tola mangerai hawaʼoya ndröfi ba dalu mbanua. Faduhu dödö ndra sagatua-tua te so mato 400 miliar ndröfi ba galaksida. Hizaʼi, ero sambua ndröfi ibeʼe döira Yehowa. Hadia wamahaʼö nihalöda sanandrösa khö Yehowa ba daʼö? Na döfi manö iʼameʼegö tödö, khalaigö hewisa dödönia khömö! Öfosumange ia, tenga börö me no sinangea öfalua daʼö, hizaʼi börö me öʼomasiʼö ia. (Zinunö 19:2, 4, 15) Aboto ba dödö Namada sebua faʼomasi hadia ia zalua khömö. Imane Sura Niʼamoniʼö, ”Ba khömi, ba no teʼerai göi rozi mbu fefu, ba högö yawa.” (Mataiʼo 10:30) ”Iʼila Yehowa mbaŵa zadölö tödö” ba omasi ia na taʼila daʼö. (Zinunö 37:18) Sindruhu sa, iʼila Yehowa fefu gabula dödö salua khömö ba ibeʼe khöu waʼabölö ba wanaögö abula dödö andrö.

5. Hana wa faduhu dödöda wa tola ibeʼe khöda waʼabölö Yehowa?

⁵ Baso Yesaya 40:28. Yehowa andre no Umbu waʼabölö. Duma-dumania, angeragö hawaʼoya waʼabölö nibeʼenia ba luo. Imane sanura sains sotöi David Bodanis wa ero sambua detik iʼasogö waʼabölö luo simane faʼoya wamoka miliaran bom atom. So göi penelitian tanö böʼö sangumaʼö wa faʼabölö niʼasogö luo ba zi sambua detik, tola möi fanolo niha ba zi sagörö ulidanö ba wangogunaʼö listrik ba zi 200.000 fakhe faʼara! Sindruhu sa, Yehowa zameʼe faʼabölö ba luo, ba hasambalö göi ibeʼe khöda waʼabölö ba wanaögö abula dödöda.

6. Hezo oroma wa so waʼomasi ba kalo mbagi Yesu ba hadia mbuania khöda?

⁶ Baso Yesaya 40:29. Oya waʼomuso dödö nirasoida na tahalö halöwö khö Yehowa. Imane Yesu khö ndra nifahaʼönia, ”Mihareʼö khömi kalo mbagi andrö khögu.” Imane nasa, ”Ba falukha ami wolombase dödömi. Moguna sa kalo mbagi andrö, khögu, ba no aoha noro andrö khögu.” (Mataiʼo 11:28-30) Atulö daʼö! Itaria, tola manö marase ita wofanö moroi ba nomo na möi ita ba gangowuloa mazui manuriaigö. Hizaʼi, hewisa dödöda ba ginötö ifuli teʼabölöʼö ita? Tarasoi waʼowua-wua dödö ba tola taʼasiwaisi gabula dödö salua khöda. Ba daʼa taʼila wa kalo mbagi Yesu andre no faʼomasi.

7. Beʼe duma-duma sangoromaʼö wa atulö Mataiʼo 11:28-30.

⁷ Angeragö hadia zalua khö zi samösa talifusöda ira alawe. Göna ia fökhö faʼatebai, faʼafawuka wangera-ngera ba asese afökhö högönia. Itaria abua khönia wangondrasi angowuloa. Hizaʼi samuza inötö, iforege weʼamöi ba gangowuloa. Isura, ”Huhuo nifaʼema moʼamakhaita ba waʼafatö dödö. No muhaogö mufaʼema huhuo andrö si fao faʼasökhi hegöi foʼameʼegö tödö irege mowöi dawa hörögu. Tefasugi ba dödögu wa moguna sibai khögu gangowuloa.” So khönia waʼomuso dödö börö me no iforege wangondrasi angowuloa!

8, 9. Hadia geluaha niwaʼö Waulo me isura, ”Na sambö faʼabölö ndraʼo, awena abölödo”?

⁸ Baso Yesaya 40:30. Tola manö oya waʼatua-tua niʼokhögöda, hizaʼi so nasa zi tebai tafalua moloʼö faʼabölöda samösa. Daʼa zinangea tafahaʼö ita. Oya zi tola ifalua sinenge sotöi Faulo, hizaʼi lö khönia faʼabölö ba wamalua fefu zomasi ia. Ba ginötö ifatunö khö Yehowa hadia nirasoinia, imane khönia Yehowa, ”Aʼoi sa so waʼabölö andrö khögu ba wa lö abölö.” Aboto ba dödö Waulo hadia geluaha niwaʼö Yehowa khönia. Andrö wa imane, ”Na sambö faʼabölö ndraʼo, awena abölödo.” (2 Korindro 12:7-10) Hadia geluaha niwaʼönia?

⁹ Iʼila Faulo wa so zi tebai ifalua moloʼö faʼabölönia samösa. Moguna itema wanolo si otarai ba niha sabölö moroi khönia, ba eheha Lowalangi zameʼe faʼabölö khö Waulo ba ginötö tebai ia. Tenga ha daʼö nasa zi tola ifalua eheha niʼamoniʼö. Ibeʼe göi waʼabölö khö Waulo ba wangasiwaisi fefu zi tebai ifalua ba waʼabölönia samösa. Tola alua khöda zimane daʼö. Teʼabölöʼö ita ba ginötö ibeʼe khöda gehehania Yehowa!

10. Hewisa wanolo Yehowa Dawido irege tola itaögö gabula dödönia?

¹⁰ No asese irasoi Dawido hewisa geheha Lowalangi ba wangabölöʼö yaʼia. Manunö ia, ”Na ötolodo, ba ududugö göli kara, ba na awögu Lowalangigu, ba usawö mbaʼa-baʼa.” (Zinunö 18:30) Itaria, abula dödö nitaögöda hulö simane göli kara salawa si tebai tasawö. Daʼö mbörö wa moguna khöda wanolo moroi khö Yehowa ba wangasiwaisi yaʼia.

11. Hewisa wa möi fanoloda geheha niʼamoniʼö ba wanaögö abula dödö?

¹¹ Baso Yesaya 40:31. Tebai muhombo moyo ba dalu mbanua na ha faʼabölönia samösa iʼogunaʼö. Börö waʼabölö moroi ba nangi andrö wa tola muhombo ia ba dalu mbanua. Daʼa mbörö wa tola aröu muhombo moyo ba lö oya iʼogunaʼö waʼabölönia. Na so gabula dödömö sebua, angeragö duma-duma moyo andrö. Andrö khö Yehowa enaʼö ibeʼe khöu ’wanolo andrö, eheha niʼamoniʼö’ ba wangabölöʼö yaʼugö. (Yohane 14:26) Tola taʼandrö waʼabölö khö Yehowa gofu hawaʼara manö ba zi 24 za ero maʼökhö. Moguna taʼandrö wa abölö khö Yehowa ba ginötö so watötöisa khö ndra talifusöda ba gangowuloa. Hizaʼi, hana wa tola alua watötöisa?

12, 13. (a) Hana wa tola so watötöisa ba gotalua niha Keriso? (b) Hadia wamahaʼö nihalöda moroi khö Yosefo sanandrösa khö Yehowa?

¹² Tola alua watötöisa börö me lö soʼahonoa ita. Itaria, tola manö abao dödöda ba wehede mazui ba gamuata niha böʼö. Ba tola manö göi abao dödöra khöda. Daʼa zi tola manandraigö yaʼita. Hizaʼi, tola taforomaʼö wa lö faröi ita khö Yehowa na alua zimanö. Hewisa lalania? Moguna falulu fohalöwö ita si fao faʼasökhi khö ndra talifusöda. Iʼomasiʼö ira Yehowa hewaʼae lö moʼahonoa ira, moguna göi simanö ita.

¹³ Lö itimbagö Yehowa enaʼö lö tetandraigö niha samosumange yaʼia. Tola taʼila daʼö ba zalua khö Yosefo. Me awuyu-wuyu ia, so ösa ndra talifusönia safökhö tödö khönia. Lafamawa ia tobali sawuyu ba laʼohe ia ba danö Miserai. (1 Moze 37:28) Iʼila Yehowa fefu hadia ia zalua. Abu sibai dödönia me iʼila wa tefakao zi fahuwu khönia, samosumange yaʼia si lö faröi sotöi Yosefo. Hizaʼi, lö itimbagö zalua andrö Yehowa. Aefa daʼö, me lafobahulu Yosefo wa edöna ihoröni woʼomo Wotifa, labeʼe ia ba gurunga. Lö nasa itolo ia Yehowa. Hizaʼi, hadia no irai faröi khönia Lowalangi? Löʼö. Imane Sura Niʼamoniʼö, ”Itolo ia Yehowa. Fefu hadia ia nilaunia, ba mofozu ibeʼe Yehowa.”​—1 Moze 39:21-23.

14. Hadia mbua nitemada na lö mofönu ita?

¹⁴ Duma-duma tanö böʼö yaʼia daʼö Dawido. Ato niha si lö irai morasoi hadia zalua khö Dawido. Hizaʼi, niha si fahuwu khö Lowalangi andrö lö itehegö ifatörö ia faʼabao dödö si lö aetu-aetu. Isura, ”Röi wönu andrö ba böhöli waʼabao dödö; böi maoso dödöu; ha ba wamazökhi si lö sökhi aekhu daʼö.” (Zinunö 37:8) Wa ’taröi’ wönu mazui lö mofönu ita, börö me omasi ita taʼoʼö Yehowa. Iʼefaʼö zalada ba ”lö nibeʼenia dali horöda”. (Zinunö 103:10) So guna tanö böʼö na lö mofönu ita. Duma-dumania, na mofönu tola iʼasogö waʼalawa ndro, fökhö mbadu, pencernaan, fökhö tödö hegöi pankreas. Aefa daʼö, abua khöda wangokhögö fangera-ngera si sökhi na no mofönu. Tola manö tawaʼö mazui tafalua gamuata si tola mangafökhöiʼö tödö niha böʼö, ba tola göi fawuka wangera-ngerada. Daʼö mbörö waʼabölö sökhi na lö mamalö so khöda waʼebolo dödö. Imane Sura Niʼamoniʼö, ”Faʼebolo dödö ba no fangorifi mboto.” (Gamaedola 14:30) Andrö, hadia nifaluada na so niha böʼö zangafökhöiʼö tödöda, ba hewisa enaʼö tola atulö ita khö ndra talifusöda? Tola tafalua mene-mene si so ba Zura Niʼamoniʼö.

NA AFATÖ DÖDÖDA LABEʼE IRA TALIFUSÖDA

15, 16. Hadia zinangea tafalua na so niha böʼö sangafökhöiʼö tödöda?

¹⁵ Baso Efeso 4:26. Lö tokea ita na laʼafökhöiʼö dödöda niha si tenga samosumange Yehowa. Hizaʼi, na so ndra talifusöda mazui ösi nomoda sangumaʼö ma samalua hadia ia zi tola mangafökhöiʼö tödöda, tola afökhö sibai daʼö. Hewisa na abua khöda wanayaigö daʼö? Hadia lö aetu-aetu mofönu ita te ba zi hauga fakhe? Mazui, hadia taʼoʼö mene-mene Zura Niʼamoniʼö ba wangasiwai daʼö ba waʼalio? Na lö taʼanemaiʼö fahuhuo khöra, tola itugu abua khöda ba wangaʼasogö faʼatulö.

¹⁶ Hewisa na so samösa dalifusöda ira matua sangafökhöiʼö tödömö ba tebai öʼolifugö daʼö? Hadia zinangea öfalua enaʼö atulö ami? Si oföna, angandrö khö Yehowa. Andrö khönia wanolo enaʼö öʼokhögö wahuhuosa si sökhi khö dalifusöda andrö. Törö tödömö wa yaʼia andrö si fahuwu khö Yehowa. (Zinunö 25:14) Iʼomasiʼö ia Lowalangi. Sökhi dödö Yehowa ba zi fahuwu khönia, ba itötöna khöda enaʼö tafalua zimane daʼö. (Gamaedola 15:23; Mataiʼo 7:12; Kolose 4:6) Si dua, haogö angeragö hadia zinangea öwaʼö khönia. Böi so ba wangera-ngeramö wa omasi ia iʼafökhöiʼö dödömö. Te so zi fasala mazui lö aboto ba dödöu hadia zalua. Si fao fangide-ngideʼö, fatunö khönia wa te börö ndraʼugö wa alua gabula dödö andrö. Tola öbörögö wahuhuosa khönia ömane, ”Te yaʼo zalio abao tödö, hizaʼi me fahuhuoʼö khögu menewi, urasoi. . . ” Na no fahuhuoʼö khönia ba lö faʼatulö ba gotaluami, böi alio awuwu ndraʼugö. Angandrö salahinia. Andrö khö Yehowa enaʼö ifahowuʼö ia ba osambuaʼö gera-erau ba gamuatania si sökhi. Yafaduhu dödömö wa omuso dödö Yehowa ba zi no öfalua ba wangaʼasogö faʼatulö khö dalifusöu, si no tobali si fahuwu khö Lowalangi.

NA IDE-IDE DÖDÖDA BA ZALA SI NO TAFALUA BA ZILALÖ

17. Hewisa wanolo Yehowa yaʼita ba wangaʼazökhi fahuwusada khönia na no tafalua horö, ba hana wa moguna tatema wanolo moroi khönia?

¹⁷ So ösa zangumaʼö wa tenga sinangea ira wamosumange Yehowa börö zala si no irai lafalua. Fangera-ngera daʼa zi tola manayaigö khöda faʼahono dödö, faʼomuso dödö hegöi faʼabölö. Iforege Razo Dawido ba wolawa fangera-ngerania si fasala ba imane, ”Me lö uʼombakhaʼö, ba ariri dölagu, ba wangarö-ngarögu andrö, si lö mamalö-malö. Bongi maʼökhö sa tohare khögu dangau.” Hizaʼi, so waʼabarani khö Dawido ba wamalua hadia zomasi Yehowa. Ba imane, ”Uʼombakhaʼö khöu horögu” ba ”awena öʼefaʼö khögu horögu, lalögu andrö”. (Zinunö 32:3-5) Na so horö sebua si no öfalua, tola iʼefaʼö daʼö Yehowa. Omasi itolo ndraʼugö ba wangaʼazökhi fahuwusamö khönia. Hizaʼi, moguna ötema wanolo si no ihenaigö moroi khö ndra satua sokubaloi. (Gamaedola 24:16; Yakobo 5:13-15) Anemaiʼö fahuhuo khöra! Ösöndra waʼauri si lö aetu na öfalua daʼö. Hizaʼi, na lö khöu faʼahono dödö hewaʼae no ara teʼefaʼö zalamö, hadia zinangea öfalua?

18. Hewisa duma-duma Waulo möi fanolo ba niha sangokhögö fangera-ngera wa tenga sinangea ira ba wamosumange Yehowa?

¹⁸ Itaria, so wa ide-ide dödö khö Waulo börö zala si no irai ifalua ba zilalö. Imane, ”Fondrege zide-ide sa ndraʼodo, ba zinenge andrö, tenga sa sinangea labeʼe töigu zinenge, me no ugohi mbanua Lowalangi andrö.” Itohugö wangumaʼö, ”Ba börö waʼebua dödö Lowalangi, wa simanö ndraʼodo iadaʼe.” (1 Korindro 15:9, 10) Iʼila Yehowa wa lö moʼahonoa Waulo. Itema ia Yehowa ba omasi ia na faduhu dödö Waulo ba daʼö. Na sindruhu-ndruhu maniasa ndraʼugö ba zi no öfalua, fatunö khö Yehowa daʼö. Na tola, moguna göi öfatunö khö ndra satua sokubaloi. Yafaduhu dödöu wa hasambalö iʼefaʼö zalamö Yehowa ba tema wangefa moroi khönia!​—Yesaya 55:6, 7.

19. Hadia ayati ba ndröfi 2018, ba hana wa moguna daʼö?

¹⁹ Börö me itugu ahatö ita ba wangohori ulidanö si lö sökhi andre, hasambalö monönö gabula dödöda. Hizaʼi, moguna tatörö tödöda wa Yehowa andrö tola ”ibeʼe waʼabölö ba zerege tödö ba ihöna waʼabeʼe ba zi tebai”. Ibeʼe khöu gofu hadia ia niʼogunaʼömö enaʼö lö faröi ndraʼugö ba wamosumange yaʼia. (Yesaya 40:29; Zinunö 55:23; 68:20) Ba ndröfi 2018, tefasugi ba dödöda wa moguna sibai khöda zindruhu ero na möi ita ba gangowuloa ba Balai Mbanua Lowalangi ba taʼila ayati ba ndröfi andre, ”Sanötöna khö Yehowa, ba latema waʼabölö si bohou.”​—Yesaya 40:31.