Hewisa Wamaigi Ndra Samaduhu’ö Yehowa Niha si No Irai Farahu ba Agamara?
Dozi ita, tola taforoma’ö wa’omasi, fa’asökhi dödö hegöi famosumange. Na so samösa Zamaduhu’ö Yehowa si lö mamalua ngawalö halöwö ba wamati mazui iböhöli wamosumange Yehowa, maforege ba wame’e khönia fanolo.a Maforege wahuhuosa khönia, mafaduhu’ö wa ma’omasi’ö ia ba matolo ia ena’ö ifuli ahatö ia khö Lowalangi.—Luka 15:4-7.
Itaria, so niheta ba mbanua niha Keriso börö me no ifalua zi lö sökhi. (1 Korindro 5:13) Hiza’i, börö me ma’omasi’ö sibai ia, maforege wanolo ya’ia ena’ö lö muheta ia ba mbanua niha Keriso. Hewa’ae no muheta ia, lö tebulö maforoma’ö wa’omasi hegöi famosumange simane niwa’ö ba Zura Ni’amoni’ö.—Mareko 12:31; 1 Fetero 2:17.
Hadia mbörö wa muheta zi samösa niha ba mbanua niha Keriso?
Ifatunö khöda Sura Ni’amoni’ö na so samösa niha Keriso samalua horö sebua, ba lö omasi ia ibulö’ö gamuatania andrö, no sinangea muheta ia ba mbanua niha Keriso.b (1 Korindro 5:11-13) Ba Zura Ni’amoni’ö, ifatunö khöda hadia manö horö sebua irege tola muheta zi samösa niha. Duma-dumania, samalua amuata fohorö, tuka mabu, samunu niha, samöbözi ösi nomora hegöi sanagö-nagö.—1 Korindro 6:9, 10; Galatia 5:19-21; 1 Timoteo 1:9, 10.
Hiza’i, lö mu’anemai’ö muheta niha samalua horö sebua. Ba wamobörö, laforege ira satua sokubaloi ba mbanua niha Kerisoc ba wame’e khönia fanolo ena’ö ifalalini gera-erania. (Roma 2:4) Laforege göi ba wangoroma’ö amuata fa’asökhi dödö, falö’alio mofönu hegöi famosumange. (Galatia 6:1) Na mufalua da’ö, da’a zamasugi ba dödönia wa fasala nifaluania andrö ba ifalalini gera-erania. (2 Timoteo 2:24-26) Hewa’ae no hauga kali labe’e khönia wanolo ira satua sokubaloi ba lö ibulö’ö gamuatania molo’ö goi-goi Zura Ni’amoni’ö, hasambalö muheta ia ba mbanua niha Keriso. Labe’e gangombakhata ira satua sokubaloi ba mbanua niha Keriso, wa tenga sa’ae samösa Samaduhu’ö Yehowa ia.
Laforege ira satua sokubaloi ba wangoroma’ö amuata fa’asökhi dödö, falö’alio mofönu hegöi famosumange.
Hadia mbuania ba mbanua niha Keriso na no muheta zi samösa niha si lö mamöhöli mamalua horö sebua? Buania ya’ia da’ö lö tebulö te’alawa’ö goi-goi Lowalangi sanandrösa ba gamuata ba telumö’ö göi mbanua niha Keriso ena’ö lö tedönisi dödöra ba wamalua si lö sökhi. (1 Korindro 5:6; 15:33; 1 Fetero 1:16) Baero da’ö, tefarou göi dödö niha samalua sala andrö ena’ö ifalalini gera-erania ba lö sa’ae tedönisi dödönia ba wamalua horö sebua.—Heberai’o 12:11.
Hadia zinangea lafalua ira Samaduhu’ö Yehowa ba niha si no muheta ba mbanua niha Keriso?
Ifatunö Sura Ni’amoni’ö ena’ö ”lö fariawö” niha Keriso ba niha si no muheta ba mbanua niha Keriso ba ’böi na’i orudu manga ita khöra’. (1 Korindro 5:11) Börö da’ö, lö fariawö ndra’aga ba niha si no muheta ba mbanua niha Keriso. Hiza’i, tenga da’ö geluahania wa lö ma’ame’egö tödö mazui lö mafosumange ia. Tetehegö göi khönia we’amöi ba gangowuloa ba tola göi la’owai ia ira Samaduhu’ö Yehowa.d Tola göi i’andrö wanolo khö ndra satua sokubaloi ena’ö mangawuli ia ba mbanua niha Keriso.
Niha si no muheta ba mbanua niha Keriso, tetehegö göi khönia we’amöi ba gangowuloa
Hewisa na so niheta ba mbanua niha Keriso, hiza’i Samaduhu’ö Yehowa nasa wo’omonia hegöi iraononia? Hewa’ae tenga si sara lala wamati sa’ae ira, lö tebulö wa ya’ira andrö si sambua ösi nomo. Börö me si sambua ösi nomo ira, lö tebulö fao ira ba faoma la’omasi’ö nawöra simane si to’ölö.
Niha si no muheta ba mbanua niha Keriso, tola i’andrö ena’ö la’ondrasi ia ira satua sokubaloi ba wame’e khönia mene-mene moroi ba Zura Ni’amoni’ö si fao fa’omasi, ba la’andrö khönia ena’ö ifalalini gera-erania ba ifuli ia khö Lowalangi. (Zakharia 1:3) Na iböhöli gamuatania si fasala, ba sindruhu-ndruhu iforoma’ö wa omasi ia wolo’ö goi-goi Lowalangi sanandrösa ba gamuata, tola mutema ia mangawuli ba mbanua niha Keriso. Ira talifusö si so ba mbanua niha Keriso, tola ’labologö dödöra khönia ba larara dödönia’, simane nifalua niha Keriso si so ba Gorindro khö zi samösa niha si no mamalua horö samalalini era-erania.—2 Korindro 2:6-8.
Hewisa dödö niha si no irai muheta ba mbanua niha Keriso?
Nehegö hewisa dödö ndra Samaduhu’ö Yehowa si no irai muheta ba mbanua niha Keriso, ba gafuriatania lahalö gangetula lafuli ira khö Lowalangi.
”Ba ginötö uhalö gangetula ena’ö ufulido ba mbanua niha Keriso, so ba wangera-ngeragu wa omasi sibai ndra satua sokubaloi ba wangi’ila fefu hadia nifaluagu sagötö me no muheta ndra’o. Hiza’i, tenga da’ö zalua. Lamane khögu, ’Osambua’ö dödöu ba zi tola öfalua iada’a.’ Aefa da’ö, urasoi wa’ahono dödö.”—Maria, Amerika Serikat.
”Ira talifusöda ba mbanua niha Keriso, ladöna-döna sibai wangawuligu. Urasoi wa la’ame’egö tödö ndra’o. Lafaduhu’ö ba dödögu wa no te’efa’ö zalagu ba latolo ndra’o ena’ö u’osambua’ö dödögu ba zi so miföna. Lö tebulö labe’e khögu wanolo ira satua sokubaloi ena’ö ifuli aro wahuwusagu khö Yehowa. Latolo ndra’o ba labe’e khögu wondrara dödö wa lö tebulö i’omasi’ö ba i’ame’egö tödö nasa ndra’o Yehowa.”—Malcom, Sierra Leone.
”Omuso sibai dödögu börö me i’omasi’ö sibai Yehowa nono mbanuania ba itatugöi ena’ö lö ra’iö organisasinia. Hewa’ae so ösa niha sanguma’ö wa talafo abe’e gamakhoita da’ö, sindruhunia sa da’ö no tandra wa’omasi. U’andrö sibai saohagölö khö Namada si so ba zorugo wa ya’ia andrö Lowalangi safönu fa’omasi ba sahakhö tödö.”—Sandi, Amerika Serikat.
a Hewa’ae ha ira matua zi no mutötöi ba da’a, hiza’i moguna göi informasi hegöi artikel da’a khö ndra alawe.
b Ba wamobörö, niha samalua horö sebua si lö mamalalini era-erania mufotöi ira niha ni’efasi. Hiza’i, iada’a ma’oguna’ö ngawua wehede si so ba Zura Ni’amoni’ö ya’ia da’ö niha niheta ba mbanua niha Keriso.
c Ira satua sokubaloi si no aro ba wamati, lafaha’ö ba lakubaloi nono mbanua Yehowa moroi ba Zura Ni’amoni’ö ba wame’e fanolo hegöi famarou dödö. Lö lagazi ira ba wamalua halöwö andrö.—1 Fetero 5:1-3.
d Tanö bö’önia, tola manö so samösa niha sangodödögö wondröi banua niha Keriso, ba iforege wamakiko mazui idönisi dödö niha bö’ö ba wamalua sala. Na alua zimane da’ö, moguna ta’o’ö niwa’ö Zura Ni’amoni’ö ena’ö ’böi ta’owai ia’.—2 Yohane 9-11.