Hana Wa Taʼosinangegö Zondröniaʼö?

1, 2. (a) Fanuturu lala haniha niʼoʼöda? (b) Hadia wanofu nitutunöda ba faza daʼa?

ME IDE-IDE ndraʼugö, te no irai iʼandrö khöu satuamö wamalua hadia ia si lö omasi öfalua. Öʼomasiʼö ira ba öʼila wa moguna öʼoʼö lira. Hizaʼi, itaria lö omasi ndraʼugö woloʼö niwaʼöra.

² Aboto ba dödöda wa iʼomasiʼö ita Amada Yehowa. Iʼameʼegö tödö ita ba lö zi lö iʼasogö zoguna khöda ba waʼauri. Ibeʼe khöda wanuturu lala enaʼö mofozu waʼaurida, ba iʼogunaʼö göi niha böʼö ba wameʼe khöda fanuturu lala ba ginötönia. Moguna taʼosinangegö wamatörö Yehowa. (Gamaedola 24:21) Hizaʼi, hana wa itaria abua khöda woloʼö fanuturu lala? Hana wa iʼandrö khöda Yehowa woloʼö fanuturu lala? Hewisa wangoromaʼöda wa taʼosinangegö wamatörönia?​—Faigi Gonönöta 9.

HANA WA ABUA?

3, 4. Hadia mbörö wa lö moʼahonoa niha gulidanö? Hana wa tola abua khöda wanema fanuturu lala moroi ba niha böʼö?

³ Yaʼita niha gulidanö, alio sibai mamadaö ita. Daʼa zalua iʼotarai me aekhu ba horö niha siföföna, Adamo ba Khawa. Hewaʼae moʼahonoa ira me muwöwöi, lalawa wamatörö Lowalangi. Iʼotarai daʼö, lö moʼahonoa niha gulidanö. Daʼa mbörö wa abua khöda woloʼö fanuturu lala moroi khö Yehowa hegöi niha gulidanö. Baero daʼö, lö moʼahonoa göi niha niʼogunaʼö Yehowa ba wameʼe khöda fanuturu lala.​—1 Moze 2:15-17; 3:1-7; Zinunö 51:7; Roma 5:12.

⁴ Börö me lö moʼahonoa ita, alio so khöda wayawasa. Andrö wa abua khöda wanema fanuturu lala. Duma-dumania, ba götö ndraono Gizaraʼeli me föna, ifili Moze Yehowa ba wondröniaʼö ono mbanuania. So samösa ndra matua sotöi Kora, si no ara mangai halöwö khö Yehowa, fayawa ia irege lö ifosumange Moze. Hewaʼae Moze zondröniaʼö ono mbanua Lowalangi, lö fayawa ia. Ba götönia, ha yaʼia zabölö mangokhögö fangide-ngideʼö. Hizaʼi, lö itema Kora wanuturu lala nibeʼe Moze. Idönisi dödö niha sato wefao khönia ba wolawa Moze. Hadia zalua khö Gora hegöi niha samadaö tanö böʼö? Labunu ira. (4 Moze 12:3; 16:1-3, 31-35) Ba Zura Niʼamoniʼö, oya duma-duma samahaʼö yaʼita wa teʼala ita na fayawa.​—2 Ngaʼötö 26:16-21; faigi Gonönöta 10.

5. Hewisa wangogunaʼö niha kuasora ba zi lö atulö?

⁵ Te no irai örongo wehede daʼa, ”Itugu ebua kuaso niha, itugu lö sökhi wamatörönia.” Iʼotarai me föna, ato zangogunaʼö kuasora ba zi lö atulö. (Baso Zangombakha 8:9.) Duma-dumania, sökhi gamuata Zaulo ba so khönia wangide-ngideʼö me ifili ia Yehowa tobali razo ba ndraono Gizaraʼeli. Hizaʼi, itehegö tumbu ba dödönia wayawasa ba faʼafökhö dödö irege ifakao Dawido, niha satulö tödö andrö. (1 Zamueli 9:20, 21; 10:20-22; 18:7-11) Ba gafuriata, tefataro Dawido tobali razo, ba yaʼia razo fondrege zi sökhi me luo daʼö ba ndraono Gizaraʼeli. Hizaʼi, no irai iʼogunaʼö kuasonia ba zi lö atulö. Mohorö ia khö Mbaseba, foʼomo Guria, ba ibiniʼö horönia andrö me ifatenge Guria enaʼö mate ba wasuwöta.​—2 Zamueli 11:1-17.

HANA WA TAʼOSINANGEGÖ KUASO YEHOWA

6, 7. (a) Börö me taʼomasiʼö Yehowa, hadia nifaluada? (b) Hadia zanolo yaʼita ba woloʼö niwaʼönia hewaʼae abua wamalua yaʼia?

⁶ Taʼoʼö wanuturu lala nibeʼe Yehowa börö me taʼomasiʼö ia. Börö me abölö taʼomasiʼö Yehowa moroi ba danö böʼö, omasi ita taʼomusoiʼö dödönia. (Baso Gamaedola 27:11; Mareko 12:29, 30.) Iʼotarai me tewöwöi niha siföföna ba Kabu Edena, omasi Zatana na ambö faduhu dödö niha ba kuaso Yehowa. Omasi Gafökha na tumbu ba wangera-ngerada wa tenga sinangea iʼandrö khöda Yehowa wamalua hadia ia. Hizaʼi, taʼila wa faya daʼö. Fao dödöda ba ayati daʼa, ”No sinangea ötema zumange, lakhömi, faʼabölö, yaʼugö Yehowa Lowalangima, börö me yaʼugö zamazökhi fefu hadia ia.”​—Famaʼeleʼö 4:11.

⁷ Me iraono ndraʼugö, tatu no lafahaʼö ndraʼugö ira satuamö ba woloʼö lira hewaʼae na lö omasiʼö öfalua. Simanö göi zalua ba nono mbanua Yehowa, abua khöra woloʼö. Hizaʼi, taʼomasiʼö ba tafosumange Yehowa, andrö wa taforege woloʼö niwaʼönia. No ibeʼe khöda duma-duma Yesu. Iʼoʼö niwaʼö Yehowa hewaʼae abua mazui lö tefaudu ba dödönia. Daʼö mbörö wa imane khö Namania, ”Böi fatörö ba zomasi ndraʼo, yaʼitörö zomasi ndraʼugö.”​—Luka 22:42; faigi Gonönöta 11.

8. Hadia manö lala niʼogunaʼö Yehowa ba wameʼe khöda fanuturu lala? (Faigi kotak ”Fondrondrongo Mene-Mene”.)

⁸ Iadaʼa, oya lala niʼogunaʼö Yehowa ba wanuturu lalada. Duma-dumania, ibeʼe khöda Zura Niʼamoniʼö. Ifataro göi ndra satua sokubaloi ba mbanua niha Keriso ba wameʼe fanuturu lala. Na taʼosinangegö ira, daʼö dandra wa taʼosinangegö kuaso Yehowa. Na tatimbagö wanolora, hulö no tatimbagö Yehowa. Lö iʼaohasi ba dödö Yehowa me iʼila latimbagö Moze iraono Gizaraʼeli, hulö na yaʼia nitimbagöra.​—4 Moze 14:26, 27; faigi Gonönöta 12.

9. Hewisa waʼomasi möi famarou dödöda woloʼö fanuturu lala?

⁹ Na taʼosinangegö zondröniaʼö, no taforomaʼö wa taʼomasiʼö göi ndra talifusöda. Angeragö atö daʼa. Sasesenia na alua bencana alam, falulu fohalöwö niha sameʼe fanolo ba wolumöʼö niha fefu. Enaʼö mofozu halöwöra, moguna so samösa zondröniaʼö, ba fefu zi fao ba daʼö lö tola löʼö laʼoʼö wanuturu lala nibeʼenia. Hizaʼi, hewisa na so zanimbagö fanuturu lala andrö ba ifalua zomasi dödönia? Hewaʼae sökhi menaʼö gohitö dödönia, tola manö teʼala ndra awönia börö me itimbagö wanuturu lala andrö. Simanö göi na lö taʼoʼö wanuturu lala moroi khö Yehowa hegöi niha nifataronia, tola tefakao niha böʼö. Hizaʼi, na taʼoʼö niwaʼö Yehowa, daʼö dandra wa taʼosinangegö nifakhoinia ba taʼomasiʼö ndra talifusöda.​—1 Korindro 12:14, 25, 26.

10, 11. Hadia nidunö-dunöda iadaʼa?

¹⁰ Oi si sökhi khöda fefu niʼandrö Yehowa. Sökhi lua-luania na taʼosinangegö zondröniaʼö ba nomoda, ba mbanua niha Keriso, hegöi ira samatörö.​—5 Moze 5:16; Roma 13:4; Efeso 6:2, 3; Heberaiʼo 13:17.

¹¹ Na taʼila hana wa iʼandrö khöda Yehowa enaʼö taʼosinangegö niha böʼö, daʼa zanolo yaʼita ba wamalua yaʼia. Datazara-zara wanutunö hewisa lalada wangoromaʼö wa taʼosinangegö zondröniaʼö moroi ba zi tölu faosatö niʼilada ba waʼauri.

TAʼOSINANGEGÖ NÖSI NOMODA

12. Hewisa wangoromaʼö foʼomo ira matua wa iʼosinangegö halöwönia?

¹² Yehowa zamasindro fongambatö ba ibeʼe halöwöra zamösana. Na laʼila hadia manö niʼandrö Yehowa khöra, lö fawuka halöwöra ba latema mbua. (1 Korindro 14:33) Ifataro woʼomo ira matua Yehowa tobali högö yomo ba nomo. Eluahania, itötöna khönia Yehowa enaʼö iʼameʼegö tödö woʼomonia hegöi iraononia, ba idöniaʼö ira si fao faʼomasi. Yaʼia zamaduhuʼö föna Yehowa hewisa gamuatania ba nösi nomonia. Moguna so waʼomasi khö woʼomo ira matua niha Keriso, sökhi gamuatania, ba idöniaʼö nösi nomonia simane fondröniaʼö Yesu banua niha Keriso. Na ifalua daʼa, no iforomaʼö wa iʼosinangegö Yehowa.​—Efeso 5:23; faigi Gonönöta 13.

13. Hewisa wangoromaʼö foʼomo ira alawe wa iʼosinangegö nösi nomonia?

¹³ No tebeʼe halöwö sebua ba si sökhi khö woʼomo ira alawe niha Keriso. Ituhini halöwö woʼomonia enaʼö tobali sondröniaʼö si sökhi yomo ba nomo. Fao ira ba wamahaʼö iraonora. Sambua lala si tola ifalua enaʼö lafosumange ia iraononia, yaʼia daʼö ibaliʼö ia duma-duma. (Gamaedola 1:8) Ifosumange ba ituhini gangetula woʼomonia. Hewaʼae na lö fao dödönia ba gangetula daʼö, ihaogö itutunö nösi dödönia si fao famosumange. Tatu faböʼö gabula dödö nitaögö dalifusöda ira alawe na tenga Samaduhuʼö Yehowa woʼomonia. Hizaʼi, na lö tebulö iʼomasiʼö ba ifosumange woʼomonia, tola manö samuza inötö ifahaʼö ia sanandrösa khö Yehowa ba tobali samaduhuʼö khönia.​—Baso 1 Fetero 3:1.

14. Hewisa wangoromaʼö iraono wa laʼosinangegö zatuara?

¹⁴ Iraono andrö no omasiö Yehowa ba moguna lalumöʼö ba labeʼe khöra wanuturu lala. Omuso dödö zatua na laʼoʼö lira iraonora. Sabölö moguna, na laʼoʼö li zatuara, daʼö dandra wa no lafosumange Yehowa ba laʼomusoiʼö dödönia. (Gamaedola 10:1) Ba zi hauga fongambatö, ha samösa zatua sangebuaʼö iraono. Abua sibai zalua andre khö zatua hegöi iraono. Na so woloʼö ba ndraono ba falulu fohalöwö ira khö ninara mazui amara, tola larasoi waʼohahau dödö. Gofu hadia zalua, lö hadöi fongambatö soʼahonoa. Hizaʼi, tola laʼokhögö waʼowua-wua dödö na dozi ira laʼoʼö wanuturu lala moroi khö Yehowa. Na lafalua daʼö, tefolakhömi Yehowa, Samasindro fongambatö.​—Efeso 3:14, 15.

TAʼOSINANGEGÖ NDRA TALIFUSÖ BA MBANUA NIHA KERISO

15. Hewisa wangoromaʼöda wa tafosumange ndra talifusöda ba mbanua niha Keriso?

¹⁵ No ibeʼe Yehowa kuaso khö Yesu ba wamatörö banua niha Keriso börö me daʼö lala niʼogunaʼö Yehowa ba wameʼe khöda fanuturu lala. (Kolose 1:18) Yesu zamatarö ’sawuyu si lö faröi ba satua-tua’ ba wondrorogö ono mbanua Lowalangi ba gulidanö. (Mataiʼo 24:45-47) Ba ginötö andre, ’sawuyu si lö faröi ba satua-tua’ yaʼia daʼö Boto Solohe. Yaʼira zangaʼasogö soguna khöda ba wamati ba ginötö si tefaudu, enaʼö lö tebulö teʼaroʼö ita. Ira satua sokubaloi, enoni, hegöi satua samasui, latolo mbanua niha Keriso ba zi sagörö ulidanö ba latema wanuturu lala moroi khö Mboto Solohe. Laʼonorogö tödö halöwöra ba wondrorogö yaʼita ba lafaduhuʼö föna Yehowa hewisa wamaluara daʼö. Andrö, na tafosumange ira, no tafosumange Yehowa.​—Baso 1 Tesalonika 5:12; Heberaiʼo 13:17; faigi Gonönöta 14.

16. Hana wa tola tawaʼö wa tefili ndra satua sokubaloi hegöi ira enoni börö wanuturu lala moroi ba geheha niʼamoniʼö?

¹⁶ Ira satua sokubaloi hegöi enoni zanolo banua niha Keriso enaʼö aro ba wamati ba so wahasara dödö. Lö moʼahonoa ira simane yaʼita. Hewisa wa tola tefili ira? Moguna lafalua nifakhoi Zura Niʼamoniʼö irege sinangea tefili ira ba halöwö andrö. (1 Timoteo 3:1-7, 12; Tito 1:5-9) Iʼogunaʼö gehehania Yehowa ba wanolo ira sanura Sura Niʼamoniʼö ba wanutunö hadia manö nifakhoi andrö. Ba laʼandrö göi geheha niʼamoniʼö ira satua sokubaloi na latatugöi haniha dalifusöda si tola mangai halöwö tobali satua sokubaloi mazui enoni. Ba daʼa oroma wa Yesu hegöi Yehowa zameʼe fanuturu lala ba mbanua niha Keriso. (Halöwö Zinenge 20:28) Fefu zi no tefataro ba wanolo hegöi ba wondrorogö yaʼita andrö no buala Lowalangi.​—Efeso 4:8.

17. Hadia zi tola ifalua talifusöda ira alawe ba wangoromaʼö wa iʼosinangegö nifakhoi Yehowa?

¹⁷ Itaria lö hadöi satua sokubaloi mazui enoni si tola mangai halöwö ba mbanua niha Keriso. Na alua zimane daʼö, talifusöda ira matua si no tebayagö idanö zi tola mangai halöwö. Ba na lö hadöi, talifusöda ira alawe zi tola mangai halöwö si toʼölö ifalua dalifusöda ira matua si no tebayagö idanö. Ba moguna ifake mbalu-balu högö, simane lembe mazui tofi. (1 Korindro 11:3-10) Daʼa dandra wa iʼosinangegö nifakhoi Yehowa me itatugöi haniha zi tobali högö, he yomo ba nomo hegöi ba mbanua niha Keriso.​—Faigi Gonönöta 15.

TAʼOSINANGEGÖ NDRA SAMATÖRÖ

18, 19. (a) Hadia wamahaʼö nihalöda ba Roma 13:1-7? (b) Hewisa wangoromaʼöda wa tafosumange ndra samatörö?

¹⁸ Iadaʼa, itehegö Yehowa na lafalua halöwöra ira samatörö ba moguna tafosumange ira. Lafatörö soi hegöi ono mbanuara enaʼö lö tetaha halöwöra ba laʼasogö wanolo ba niha. Moguna laʼoʼö ira niha Keriso wanuturu lala ba Roma 13:1-7. (Baso.) Tafosumange ”ndra samatörö” ba taʼoʼö huku nifakhoi ba nono mbanua mazui ba soi si toröi ita. Tola molua-lua huku andrö ba nösi nomoda, halöwöda, mazui ba gokhötada. Duma-dumania, tabuʼa pajak ba tafoʼösi zura-sura niʼandröra. Hizaʼi, hewisa na laʼandrö khöda wamalua si fatimba ba goroisa Lowalangi? Imane sinenge sotöi Fetero, ”Abölö sökhi woloʼö khö Lowalangi me yaʼia zamatörö yaʼaga moroi ba woloʼö ba niha.”​—Halöwö Zinenge 5:28, 29.

¹⁹ Na fahuhuo ita khö ndra samatörö, simane sanguhuku mazui folisi, moguna tafosumange ira. Niha Keriso si bohou ebua moguna lafosumange gurura hegöi ira sohalöwö ba zekola. Moguna göi tafosumange nawöda wohalöwö, hewaʼae lö lafosumange ia ira sohalöwö tanö böʼö. Na tafalua daʼö, no taʼoʼö zinenge sotöi Faulo, samosumange ndra samatörö hewaʼae itaria abua wamalua yaʼia. (Halöwö Zinenge 26:2, 25) Hasambalö tafosumange niha böʼö hewaʼae lö lafosumange ita.​—Baso Roma 12:17, 18; 1 Fetero 3:15.

20, 21. Hadia zi sökhi si tola alua na tafosumange niha böʼö?

²⁰ Niha ba zi sagörö ulidanö, sindruhu-ndruhu wa ambö lafosumange nawöra. Hizaʼi, tenga simane daʼö nono mbanua Yehowa. Tahalö gangetula ba wamosumange awöda. Taʼoʼö wanuturu lala nibeʼe Wetero, ”Mifosumange fefu niha.” (1 Fetero 2:17) Na tafosumange ira, hasambalö toröi-röi ba dödöra. Imane Yesu, ”Andrö, yamohaga göi ami föna niha sato enaʼö laʼila mbua-buami si sökhi ba lafolakhömi Namami.”​—Mataiʼo 5:16.

²¹ Na tafosumange nösi nomoda, ira talifusöda ba mbanua niha Keriso, hegöi niha böʼö ba zi fasuida, tola manö möi famarou dödöra nifaluada andrö ba wamahaʼö yaʼira sanandrösa khö Yehowa. Ba na tafosumange niha böʼö, no tafosumange Yehowa. Omuso dödönia, ba daʼa dandra waʼomasida khönia.