Hadia No Öfaʼanö Ndraʼugö ba Wolulu Faʼaurimö khö Yehowa?

1-2. Hadia zinangea ifalua si samösa niha fatua lö tebayagö idanö?

SAGÖTÖ zi lima fakhe andre, töra sazuta niha nibayagö idanö tobali Samaduhuʼö Yehowa. Ato moroi ba gotaluara nifahaʼö ba zindruhu iʼotarai ”me ono sawuyu” simane Timoteo, samösa nifahaʼö me abad siföföna. (2 Ti. 3:​14, 15) So göi danö böʼönia samahaʼö yaʼira sanandrösa khö Yehowa me no tobali ira satua mazui me no alawa ndröfira. Duma-dumania ba zi hauga fakhe silalö, so samösa ndra alawe samahaʼö yaʼia khö ndra Samaduhuʼö Yehowa, tebayagö idanö ia me 97 fakhe ndröfinia!

² Na no öfahaʼö ndraʼugö iadaʼa ba Zura Niʼamoniʼö mazui laʼebuaʼö ndraʼugö ira satuamö si no tobali Samaduhuʼö Yehowa, hadia no öʼangeragö enaʼö tebayagö ndraʼugö idanö? Daʼö no ohitö dödö si sökhi! Hizaʼi fatua lö öbayagö ndraʼugö idanö, moguna ölulu waʼaurimö khö Yehowa. Ba artikel daʼa, tatutunö dania hadia geluahania folulu faʼauri ba hadia mbörö wa lö moguna aombö dödöu ba wolulu faʼaurimö ba tebayagö idanö na no tefaʼanö ndraʼugö.

HADIA GELUAHANIA FOLULU FAʼAURI?

3. Ba Zura Niʼamoniʼö, haniha manö niha nilulu faʼauri khö Yehowa?

³ Ba Zura Niʼamoniʼö, niha solulu faʼauri mazui niha nilulu faʼauri khö Yehowa mufasambua ira ba wamalua halöwö si tohude. Me föna, fefu ndraono Gizaraʼeli no mululu ira khö Yehowa. Hizaʼi, so ösa ndraono Gizaraʼeli nilulu faʼauri ba wamalua halöwö si tohude. Duma-dumania, mufasambua Gaʼaroni ba wangai halöwö tobali ere sebua ba ndraono Gizaraʼeli. Oroma daʼö ba mböbö högönia. Ba daʼö, so mbala högö si takile moroi ba ganaʼa, si tobali tandra wolulu faʼauri niʼamoniʼö. (3 Mo. 8:9) Lalulu göi waʼaurira ira niha Naziri ba wangai halöwö khö Yehowa ba lala si tohude. Eluaha ngawua wehede nazir ba li Heberaiʼo yaʼia daʼö ”Niha Nifasambua”, mazui ”Niha Nilulu Faʼauri”. So zi tohude sinangea lafalua ira niha Naziri moloʼö Oroisa Moze.—4 Mo. 6:​2-8.

4. (a) Ba ginötö ölulu waʼaurimö khö Yehowa, hadia zi no öfili? (b) Hadia geluahania ”yamuʼositengagö ia”? (Faigi göi gambara.)

⁴ Ba ginötö ölulu waʼaurimö khö Yehowa, no öfili tobali nifahaʼö Yesu Keriso hegöi ba wangofönaiʼö ohitö dödö Lowalangi ba waʼaurimö. Hewisa lalania? Imane Yesu, ”Na so zomasi moloʼö yaʼo, yamuʼositengagö ia.” (Mat. 16:24) Ngawua wehede Yunani ”yamuʼositengagö ia” tola göi mufoʼeluaha tobali ”mangumaʼö löʼö ba khönia samösa”. Na no ölulu waʼaurimö khö Yehowa, moguna ötimbagö fefu zi lö tefaudu ba gohitö dödö Lowalangi. (2 Ko. 5:​14, 15) Farahu ba daʼö ba wanimbagö amuata fohorö hegöi ngawalö ”mbua-bua nösi”. (Gal. 5:​19-21; 1 Ko. 6:18) Hadia tobali noro sabua khöu na öʼositengagö ndraʼugö? Na öʼomasiʼö Yehowa ba faduhu dödöu wa fefu goroisa nibeʼenia si sökhi khöu, tatu lö tobali noro sebua daʼö. (Si. 119:97; Yes. 48:​17, 18) Imane samösa talifusöda ira matua sotöi Nicholas, ”Tola tafili samösa hadia goi-goi Yehowa tabaliʼö ia simane kurunga sanaha yaʼita ba wamalua somasi dödöda mazui simane baʼa-baʼa siʼöli solumöʼö yaʼita moroi ba zingo.”

5. (a) Hewisa lalamö ba wolulu faʼaurimö khö Yehowa? (b) Hadia gamaehutania molulu faʼauri ba tebayagö idanö? (Faigi göi gambara.)

⁵ Hewisa lalamö ba wolulu faʼaurimö khö Yehowa? Moguna mangandrö ndraʼugö khönia ba öfabuʼu wa ha yaʼia nifosumangemö ba lö tebulö öʼofönaiʼö gohitö dödönia. Öfabuʼu khönia wa lö tebulö öʼomasiʼö Yehowa ”moroi siʼaikö ba dödöu, nosou maʼasambua, era-erau ba faʼabölöu maʼafefu”. (Mrk. 12:30) Folulu faʼauri ha yaʼugö zangila faoma Yehowa. Hizaʼi famayagö idanö, mufalua ia föna niha sato irege fefu niha laʼila wa no ölulu waʼaurimö khö Yehowa. Tebai öʼaohasi ba dödö buʼusa li nifaluamö me ölulu waʼaurimö khö Yehowa. Omasi ia na öfalua mbuʼusa limö andrö ba moguna öhalö gangetula ba wamalua yaʼia sandrohu faʼaurimö.—Sango. 5:​4, 5.

DANE-DANE WA TALULU WAʼAURIDA

6. Hadia mbörö wa omasi zi samösa niha ba wolulu faʼaurinia khö Yehowa?

⁶ Dane-dane siföföna wa ölulu waʼaurimö khö Yehowa yaʼia daʼö börö me öʼomasiʼö ia. Dane-dane waʼomasimö khönia tenga ha börö hadia nirasoimö, hizaʼi teʼodane-dane daʼö ba ”waʼaboto ba dödö si tefaudu” sanandrösa khö Yehowa hegöi ohitö dödönia. (Kol. 1:9) Börö me no öfahaʼö ndraʼugö ba Zura Niʼamoniʼö, itugu faduhu dödöu wa (1) sindruhu-ndruhu so Yehowa, (2) Sura Niʼamoniʼö andrö Taromali Lowalangi, ba (3) iʼogunaʼö organisasinia Yehowa ba wamalua ohitö dödönia.

7. Hadia zinangea tafalua fatua lö talulu waʼaurida khö Yehowa?

⁷ Niha solulu faʼaurinia khö Yehowa, moguna iʼila dane-dane wamahaʼö si so ba Daromali Lowalangi ba ifaudugö waʼaurinia ba goi-goi Zura Niʼamoniʼö. Laforege göi wanutunö ba niha böʼö hadia nifaduhusira tödö. (Mat. 28:​19, 20) Laʼomasiʼö Yehowa ba sindruhu-ndruhu ha yaʼia nifosumangera. Hadia simane daʼö göi nirasoimö? Na öʼomasiʼö Yehowa, lö ömane tödöu wa moguna ölulu waʼaurimö khö Yehowa ba tebayagö ndraʼugö idanö ha enaʼö omuso dödö niha samahaʼö yaʼugö ba Zura Niʼamoniʼö, enaʼö omuso dödö ndra satuamö, mazui börö me lafalua daʼö ira awö-awöu.

8. Hewisa wangandrö saohagölö tola möi famarou dödö zi samösa niha ba wolulu faʼaurinia khö Yehowa? (Sinunö 116:​12-14)

⁸ Ba ginötö öʼangerönusi fefu zi no ifalua khöu Yehowa, tatu tefarou dödöu ba wolulu faʼaurimö khönia. (Baso Zinunö 116:​12-14.) Imane Sura Niʼamoniʼö wa moroi khö Yehowa ”fefu mbuala si sökhi ba soʼahonoa”. (Yak. 1:17) Buala fondrege zebua nibeʼenia yaʼia me ibeʼe Nononia sotöi Yesu tobali höli. Börö me so höli, andrö wa tola fahuwu ndraʼugö khö Yehowa! Baero daʼö, ibeʼe khöu Yehowa dötönafö enaʼö tola auri ndraʼugö sagötö faʼara. (1 Yo. 4:​9, 10, 19) No iforomaʼö waʼomasinia Yehowa ba lala sabölö tohude, ba no oya howu-howu nibeʼenia khöu. Börö daʼö, no sinangea na öʼandrö saohagölö khönia ba terou dödöu ba wolulu faʼauriu khönia. (5 Mo. 16:17; 2 Ko. 5:15) Daʼö nitutunö ba mbuku Lala ba Wanöndra Faʼohahau Dödö Sagötö Faʼara! famahaʼö 46 numero 4. Ba daʼö so video faʼarania tölu menit, tuhonia Beʼe Mbualau khö Lowalangi.

HADIA NO TEFAʼANÖ NDRAʼUGÖ BA WOLULU FAʼAURIMÖ BA TEBAYAGÖ IDANÖ?

9. Hadia mbörö wa lö moguna tahalö gangetula ba waʼaösö enaʼö tebayagö ita idanö?

⁹ Te ömane tödöu wa lö nasa si tefaʼanö ndraʼugö ba wolulu faʼaurimö ba tebayagö idanö. Te so nasa zinangea öbulöʼö ba waʼaurimö ba woloʼö goi-goi Yehowa mazui moguna khöu nasa ginötö ba wangaʼaroʼö famatimö. (Kol. 2:​6, 7) Lö fefu niha nifahaʼö ba Zura Niʼamoniʼö fagölö-gölö ginötö niʼogunaʼöra ba wangoromaʼö faʼatedou ba wamati, ba lö fefu ndra si bohou ebua fagölö-gölö ndröfira me lalulu waʼaurira ba tebayagö idanö. Angeragö hewisa enaʼö tola ödouʼö ndraʼugö ba wamati ba falua hadia zi tola öfalua. Böi öfaedo-faedogö ndraʼugö ba niha böʼö.—Gal. 6:​4, 5.

10. Hewisa na lö si tefaʼanö ndraʼugö ba wolulu faʼaurimö ba tebayagö idanö? (Faigi göi kotak ”Khö Ndra si Bohou Ebua Niʼebuaʼö ba Zindruhu”.)

¹⁰ Hewaʼae na lö si tefaʼanö ndraʼugö ba wolulu faʼaurimö khö Yehowa, böi tebulö forege ba wogamö ohitö dödö andrö. Angandrö khö Yehowa enaʼö ifahowuʼö wamorege nifaluamö ba wombulöʼö faʼaurimö. (Fil. 2:13; 3:16) Tola faduhu dödömö wa hasambalö ifondrondrongo wangandrömö Yehowa ba itolo ndraʼugö.—1 Yo. 5:14.

HADIA MBÖRÖ WA SO ÖSA NIHA SI LÖ NASA MANGAI ANGETULA?

11. Hewisa Yehowa ba wameʼe khöda fanolo enaʼö lö faröi ita khönia?

¹¹ So ösa niha sanaha ba wangai angetula wolulu faʼaurira ba tebayagö idanö hewaʼae no tefaʼanö ira. Te aombö dödöra ba lamane, ’Hewisa dania na ufalua horö sebua ba laʼefasi ndraʼo?’ Na daʼö nirasoimö, yafaduhu dödöu wa hasambalö ibeʼe khöu Yehowa hadia zinangea moguna khöu enaʼö ’sinangea gamuatamö föna Yehowa ba tola öʼomusoiʼö dödönia’. (Kol. 1:10) Ibeʼe göi khöu Yehowa waʼabölö ba wamalua satulö. No ato niha nitolonia ba wamalua daʼö. (1 Ko. 10:13) Daʼö sambua dane-dane hadia mbörö wa lö ato niha niʼefasi moroi ba mbanua niha Keriso. Ba daʼa aboto ba dödöda wa no ifaʼanö nono mbanuania Yehowa enaʼö lö faröi ira.

12. Hewisa enaʼö lö tafalua horö sebua?

¹² Fefu niha si lö moʼahonoa hasambalö lataögö wondrönisi dödö ba wamalua si lö atulö. (Yak. 1:14) Hizaʼi, tola öfili samösa hadia öfalua daʼö mazui löʼö. Yaʼugö samösa zotatugöi hadia zinangea öfalua. So ösa niha sangumaʼö wa tebai lafatörö hadia nirasoira mazui nifaluara. Hizaʼi lö atulö daʼö. Tola öfahaʼö ndraʼugö ba wolawa isö-isö dödö si fasala. Hewaʼae na tumbu ba dödöu wamalua si fasala, tola ötaha dödöu enaʼö lö öfalua daʼö. Hadia zi tola manolo yaʼugö? Angandrö ero maʼökhö. Böi tebulö fahaʼö ndraʼugö ba Daromali Lowalangi. Böi böhöli weʼamöi ba gangowuloa. Tutunö ba niha böʼö hadia nifaduhusimö tödö. Na lö öböhöli wamalua fefu daʼö, so khömö waʼabölö ba wamalua buʼusa limö ba wolulu faʼauri. Ba böi olifu ndraʼugö wa hasambalö itoloʼö Yehowa.—Gal. 5:16.

13. Hadia wamahaʼö si tola tahalö moroi khö Yosefo?

¹³ Hadia nasa zi tola manolo yaʼugö enaʼö lö faröi khö Yehowa? Iʼotarai ba wamobörö moguna öhalö gangetula hadia zinangea öfalua na so wondrönisi dödö. Itutunö khöda Sura Niʼamoniʼö wa ato niha si no mamalua daʼö hewaʼae lö moʼahonoa ira, duma-dumania Yosefo. No hauga kali idönisi dödönia foʼomo Wotifa. Hizaʼi, no ihalö gangetula ba wamalua satulö fatua lö alua wondrönisi dödö. Börö daʼö, ba ginötö alua wondrönisi dödö tola itimbagö daʼö Yosefo ba imane, ”Lö duhu ufalua zi lö sökhi ba fasala ndraʼo föna Lowalangi.” (1 Mo. 39:​8-10) Iʼila Yosefo hadia zinangea ifalua fatua lö tohare wondrönisi dödö. Daʼö zanolo yaʼia irege lö faröi ia.

14. Hewisa wamaʼanöda yaʼita enaʼö tola tatimbagö wondrönisi dödö?

¹⁴ Hewisa enaʼö tola öhalö gangetula simane nifalua Yosefo? Halö gangetula iʼotarai iadaʼa hadia zinangea öfalua na so wondrönisi dödö. Fahaʼö ndraʼugö, böi taha-taha wanimbagö ngawalö zi fatuwu khö Yehowa ba böi öʼera-era manö daʼö. (Si. 97:10; 119:165) Na öfalua daʼö, ba ginötö so wondrönisi dödö, no öʼila hadia zinangea öfalua ba lö tedönisi dödöu wamalua si fasala.

15. Hewisa wangoromaʼöda wa ’taʼalui Yehowa soroi ba dödö’? (Heberaiʼo 11:6)

¹⁵ Te no aboto ba dödöu wa no ösöndra zindruhu ba omasi ndraʼugö ba wamosumange Yehowa soroi ba dödö. Hizaʼi, te ömane tödöu wa lö nifaʼanöu yaʼugö ba wolulu faʼaurimö ba tebayagö idanö. Na daʼö nirasoimö, tola öʼoʼö duma-duma Razo Dawido. Tola öʼandrö khö Yehowa, ”He Lowalangi, fareso ndraʼo ba yaʼaboto ba dödöu nösi dödögu. Fareso ndraʼo ba yaʼaboto ba dödöu gera-eragu. Faigi na so ba dödögu lala saekhu ba zi lö sökhi, ba ohe ndraʼo ba lala ba zi lö aetu.” (Si. 139:​23, 24) Na öforege enaʼö tedou ndraʼugö ba wamati irege tola ölulu waʼaurimö ba tebayagö idanö, eluahania no ’öʼalui Yehowa soroi ba dödö’. Hasambalö ifahowuʼö ndraʼugö.—Baso Heberaiʼo 11:6.

BÖI BÖHÖLI BA WANGAHATÖʼÖ YAʼUGÖ KHÖ YEHOWA

16-17. Hewisa wondröni Yehowa niha niʼebuaʼö ba zindruhu? (Yohane 6:44)

¹⁶ Iwaʼö Yesu wa Yehowa zondröni ira nifahaʼönia. (Baso Yohane 6:44.) Tandraigö angeragö hawaʼatohude ba hadia geluahania daʼö ba waʼaurimö. Iʼila Yehowa wa so zi sökhi ba dödö niha nidöninia. Ba wamaiginia yaʼira andrö ”okhötania si tohude” mazui ”niʼomasiʼönia”. (5 Mo. 7:6; nisura ba gahe zura.) Simane daʼö dödö Yehowa khöu.

¹⁷ Yaʼami si bohou ebua, na laʼebuaʼö ami ba zindruhu, te miwaʼö tödömi wa mifosumange Yehowa ha börö me miʼoʼö niwaʼö ndra satuami, tenga börö me nidöni Yehowa ami. Hizaʼi sindruhunia, Yehowa zondröni niha ero-ero samösa. Farahu ami ba daʼö, yaʼami niʼebuaʼö ba zindruhu. Lö imane tödönia wa ha si farahu ba nösi nomomi ami. Baero daʼö, imane Sura Niʼamoniʼö, ”Miʼondrasi Lowalangi ba iʼondrasi ami.” (Yak. 4:8; 1 Ng. 28:9) Na miforege ba wangahatöʼö yaʼami khö Yehowa, hasambalö wa ihatöʼö ia khömi.—Fareso göi 2 Tesalonika 2:13.

18. Hadia nitutunö ba artikel aefa daʼa? (Sinunö 40:8)

¹⁸ Ba ginötö ölulu waʼaurimö khö Yehowa ba tebayagö idanö, no öʼoʼö duma-duma Yesu. Itehegö waʼaurinia ba wamalua hadia niʼandrö Namania. (Baso Zinunö 40:8; Heb. 10:7) Ba wamahaʼö aefa daʼa, tatutunö dania hadia zanolo yaʼugö enaʼö lö faröi ba wamosumange Yehowa na no tebayagö idanö.