”Tobali Tua Zamati”

1, 2. Hadia zalua si faböʼö-böʼö iʼotarai me götö Noakhi, ba hadia lua-luania khö Gaberamo?

IFAKHÖLÖ ia Aberamo, no itöngö malige salawa sibai ba mbanuania sotöi Guri.a Oya li niha si kali-kaliru, ba ebua zimbo ba daʼö. Ira ere sanömba lowalangi baŵa lafaʼema zumange. Khalaigö atö, ibaliʼö ia Aberamo wamaigi ba ifalikhö-likhö högönia, ifakuru röngö-röngönia. Me itörö gotalua niha sato ba wangawulinia, te mangera-ngera ia me itugu monönö wanömba adu ba mbanua Guri. Fanömba adu si lö sökhi andre sindruhu-ndruhu no iʼanöröi fefu mbanua me götö Noakhi!

² Mate Noakhi dua fakhe fatua lö tumbu Gaberamo. Me no aefa Anönö Danö Idanö, möi baero Noakhi hegöi ösi nomonia moroi ba nowo. Ibeʼe zumange khö Lowalangi Yehowa, sangoromaʼö dumi. (I Moz. 8:20; 9:12-14) Me luo daʼö, ha sambua wamosumange sindruhu ba gulidanö yaʼia daʼö famosumange satulö. Iadaʼa, me no tefazawili ngaʼötö si mewulu moroi khö Noakhi ba zi sagörö ulidanö, ibörögö lö hadöi famosumange satulö. Dozi niha lasömba lowalangi niha baero. Ama Gaberamo manö sotöi Tara, te ifazökhi nadu. No fao ia göi ba wanömba adu.​—Yos. 24:2.

3. Me itugu ebua-bua Gaberamo, hana wa faehu ia moroi ba danö böʼö, ba hadia wamahaʼönia khöda?

³ Faböʼö Gaberamo moroi khöra. Me itugu ebua ia, oroma wa faehu ia börö wamatinia. Ba gafuriata, ifotöi ia Faulo ”tobali tua zamati”! (Baso Roma 4:11.) Datafaigi hewisa waʼatedou wamati Gaberamo enaʼö tola tafahaʼö ita hewisa lala wondrouʼö famati.

Mamosumange Yehowa Me No Aefa Anönö Danö Idanö

4, 5. Haʼökhö ifomaha ia Aberamo sanandrösa khö Yehowa, ba hana wa tola tawaʼö daʼö?

⁴ Hewisa wa tola aboto ba dödö Gaberamo Lowalangi Yehowa? Taʼila wa so zamosumange Yehowa si lö faröi ba gulidanö me luo daʼö. Samösa moroi ba gotaluara yaʼia daʼö Semi. Hewaʼae tenga ono siaʼa ia moroi khö Noakhi, hizaʼi yaʼia zi oföna latötöi börö me so khö Zemi wamati saro.b Ara me no aefa Anönö Danö Idanö, imane Noakhi wa Yehowa andrö ”Lowalangi Zemi”. (I Moz. 9:26) Semi andrö iʼalawaʼö Yehowa hegöi famosumange satulö.

⁵ Hadia faʼila Gaberamo khö Zemi? Te yaʼia. Khalaigö me ide-ide Gaberamo. Ahöli-höli dödönia me iʼila wa so ndra tuania sauri nasa si töra öfa abad ndröfinia! No iʼila Semi hewisa waʼalösökhi gulidanö fatua lö alua Molö sebua, aefa daʼö Anönö Danö Idanö ba wangehao ulidanö, famasindro ngawalö soi me itugu oya niha ba gulidanö, ba famadaö Nimerodi ba Malige Mbabeli. Lö faröi Semi ba lö fao ia ba wamadaö andrö. Tobali, me ifawukaisi Yehowa li niha sangotomosi malige andrö, lö ibato Semi hegöi ösi nomonia wangogunaʼö li sindruhu yaʼia daʼö li niʼogunaʼö Noakhi. Tefarahu göi Gaberamo ba nösi nomo Zemi. Tatu manö iʼotarai me ide-ide Gaberamo, ifosumange Zemi. Töra-töra nasa, arakhagö sandrohu faʼauri Gaberahamo lö si mate Zemi. Te moroi khö Zemi ifomaha ia Aberamo sanandrösa khö Yehowa.

6. (a) Hewisa wangoromaʼö Gaberamo wa ihalö khönia wamahaʼö si sökhi me Anönö Danö Idanö? (b) Hewisa waʼauri Gaberamo hegöi Saraʼi?

⁶ Tatu manö, no ihalö wamahaʼö si sökhi khönia Aberamo moroi ba wa Anönö Danö Idanö. Iʼodödögö wanörö lala Lowalangi, simane Noakhi itörö lala Lowalangi. Daʼö mbörö wa itimbagö wanömba adu ba faböʼö ia moroi ba niha Guri, te göi simanö ia ba nösi nomonia. Hizaʼi ba gafuriata, isöndra woʼomonia si sökhi. Mangowalu ia khö Zaraʼi, samösa ndra alawe si baga-baga ba sebua famati khö Yehowa.c Hewaʼae lö onora, oya lasöndra waʼomuso dödö börö me faoma lafosumange Yehowa. Laʼebuaʼö göi nono mbeneʼö Gaberamo si lö ama si lö ina sotöi Loti.

7. Hewisa ndra nifahaʼö Yesu woloʼöra duma-duma Gaberamo?

⁷ Lö irai faröi Gaberamo khö Yehowa ha börö wamosumange adu ba Guri. Laforomaʼö wa faböʼö ira moroi ba niha sanömba adu ba daʼö. Na omasi ita tadouʼö wamatida, moguna göi tafalua zimane daʼö. Tafaehusi ita moroi ba niha böʼö. Imane Yesu khö ndra nifahaʼönia me ”tenga awö niha gulidanö ami” andrö wa fatuwu niha khömi. (Baso Yohane 15:19.) Na no irai abu dödöu börö me lö omasi nösi nomou mazui niha si fasui yaʼugö ba gangetula nihalömö ba wamosumange Yehowa, törö tödöu wa tenga ha yaʼugö. No öʼoʼö duma-duma si sökhi moroi khö Gaberamo ba Saraʼi börö me lafosumange Lowalangi si fao famati.

”Hetaʼö ba Danömi”

8, 9. (a) Hadia zalua khö Gaberamo si tebai iʼolifugö? (b) Hadia goroisa Yehowa khö Gaberamo?

⁸ Samuza inötö, so zalua khö Gaberamo si tebai iʼolifugö. Itema goroisa moroi khö Lowalangi Yehowa! Ha maʼifu ifatunö Sura Niʼamoniʼö, hizaʼi imane wangumaʼö wa iforomaʼö ia ”Lowalangi lakhömi” föna ndra matua si so famati andre. (Baso Halöwö Zinenge 7:2, 3.) Te iʼodela ndra malaʼikania irege iʼila Aberamo lakhömi sahöli-höli dödö andrö moroi khö Wondrege Zalawa ba gulidanö. Tola takhalaigö hewisa dödö Gaberamo me iʼila waʼafaehu Lowalangi moroi ba nadu nifosumange niha me luo daʼö.

⁹ Hadia goroisa Yehowa khö Gaberamo? ”Hetaʼö ba danömi, ba ba dalifusöu ba ae ba danö niʼoromaʼögu khöu dania.” Lö nifatunö Yehowa hezo danö niwaʼönia—hizaʼi iforomaʼö dania khö Gaberamo. Si oföna, iröi mbanuania hegöi talifusönia ba waʼaniha. Si toʼölö ba Timur Tengah me föna, moguna sibai nifotöi ösi nomo. Na so ndra matua sondröi talifusönia ba waʼaniha ba findra ba mbanua saröu, lawaʼö daʼö niha si lö harazaki. So zangumaʼö, abölö lö sökhi ia moroi ba waʼamate!

10. Hadia mbörö wa abua ba afökhö gangetula nihalö Gaberamo hegöi Saraʼi ba wondröi omora ba danö Guri?

¹⁰ Tatu abua khö Gaberamo wondröi banuania. Banua Guri si rami niha ba si kayo. (Faigi kotak ”Banua Niröi Gaberamo ba Saraʼi”.) Me no laʼosisiʼö, lasöndra dandra-tandra wa oya nomo si baga-baga ba Guri me föna; so ösa nomo ngafulu mbateʼe soguna ba nösi nomo hegöi sohalöwö khöra, no ifasui golayama tanö bakha si no teʼoli kara taluzalonia. Si toʼölönia dozi omo hele-hele, naha wemondri, ba naha waniboʼö si taʼunö mazui sasao. Baero daʼö, törö tödöu wa no atua Gaberamo ba Saraʼi; te 70-an ndröfi Gaberamo, ba 60-an Zaraʼi. Omasi Gaberamo na ohahau dödö Zaraʼi—daʼö gohitö dödö woʼomo ira matua si sökhi khö ngambatönia. Khalaigö wamatunö-tunöra halöwö daʼa, oya wanofu hegöi faʼaombö-aombö dödöra. Omuso dödö Gaberamo me tola ifalua fefu daʼa Saraʼi! Simane Aberamo, itehegö iröi nomonia si sökhi.

11, 12. (a) Hadia nifaʼanö hegöi angetula nihalöra fatua lö laröi mbanua Guri? (b) Hewisa wokhalaigöda me mofanö ira ba zihulö wongi?

¹¹ Me no lahalö gangetula, oya zinangea ifalua Aberamo hegöi Saraʼi. Oya zinangea labukusi ba lafaʼanö. Hadia niʼohera ba nahia si lö irai laʼila, ba hadia zinangea laröi? Sabölö moguna, hewisa göi niha sato ba waʼurira? Hadia zinangea lafalua khö Tara börö me no atua ia? Lahalö gangetula wolohe hegöi fondrorogö yaʼia gasa-gasa waʼaurinia. Me no mututunö waö-waö Tara si no tobali furugö ba iʼohe nösi nomonia moroi ba Guri, tola tawaʼö fao dödönia wefao khöra. Tatu manö no iröi saʼae wanömba adu. Ono mbeneʼö Gaberamo sotöi Loti, fao ia göi weʼamöi mukoli.​—I Moz. 11:31.

¹² Irugi inötö wofanöra sihulö wongi. Khalaigö zato si fao khöra no owulo baero göli. No labeʼe gama-gamara yawa ba dete gondra hegöi ba hulu galide, no laʼowuloi fefu gurifö, ösi nomo ba sohalöwö khöra no owulo ba zingara.d Iadaʼa terou dödöra wofanö. Te labalo-baloi hawaʼaratö imane Aberamo mofanö ita. Fozunia, mofanö ira ba laröi mbanua Guri sagötö faʼara.

13. Hewisa nono mbanua Yehowa ba ginötö andre laforomaʼö waʼowölö-ölö simane Aberamo ba Saraʼi?

¹³ Iadaʼa, ato nono mbanua Yehowa zomasi findra ba soi böʼö si lö ato sanuriaigö. So göi, lafahaʼö ira ba li böʼö enaʼö ebolo halöwö fanuriaigö. Mazui, lahalö gangetula wamalua fanuturu lala ba wanuriaigö si lö irai latandraigö ba si lö omasi ira. Oya nitehegöra ba gangetula simane daʼö, laröi gokhötara ndrege zi tola ira. Hawaʼasökhi gamuata simane daʼö, ba sindruhu-ndruhu fakhili ira nifalua Gaberamo ba Saraʼi! Na taʼoromaʼö wamati simane daʼö, faduhu dödöda wa ibeʼe khöda Yehowa töra moroi ba zi no tabeʼe. Lö olifu ia wameʼe howu-howu ba zamati khönia. (Heb. 6:10; 11:6) Hadia daʼö nifaluania khö Gaberamo?

Laʼötö Idanö Oiferati

14, 15. Tutunö hewisa wofanö iʼotarai Guri numalö ba Harana, ba hana wa ihalö gangetula Aberamo toröi ba Harana gasa-gasa?

¹⁴ Toʼölö ira saʼae ba wofanö-fanö. Tola takhalaigö me latörö tanö ira Aberamo hegöi Saraʼi ba fataria latörö gondra. Ba ginötö fahuhuo ira, larongo-rongo riti-riti nitawi ba mbagi gurifö. Arara manö, toʼölö ira wekoli ba onekhe ira ba wamasa hegöi ba wamokai tendra, ba latolo göi Tara si no atua enaʼö ohahau dödönia wedadao ba gondra mazui ba galide. Latohugö wofanö numalö ba gaekhula ba laʼosisi Nidanö Oiferati. Falali ngaluo tobali migu, ba faböʼö-böʼö manö niʼilara ba lala.

¹⁵ Me no mofanö ira mato 960 kilometer, ofeta ira ba nose-ose simane azuni wani ba Harana, banua si kayo si so ba sifa numalö ba Timur Barat sasese latörö niha sogale. Tebato ira ba daʼö, ba toroi ira gasa-gasa ba mbanua andrö. Te marase Tara na latohugö wofanö.

16, 17. (a) Hadia mbuʼusa li somuso dödö Gaberamo? (b) Hewisa Yehowa wamahowuʼönia Aberamo me so ia ba Harana?

¹⁶ Ba gafuriata, mate Tara me 205 fakhe ndröfinia. (I Moz. 11:32) Terara dödö Gaberamo me mate namania börö me ifuli fahuhuo khönia Yehowa. Ifuli itötöi goroisania ba Guri ba itugu toʼele zi no ifabuʼu. Tobali ”soi sebua” Gaberamo ba fefu zongambatö ba gulidanö latema howu-howu börö ia. (Baso I Moze 12:2, 3.) Omuso sibai dödö Gaberamo wamondrongo nifabuʼu Lowalangi khönia ba aboto ba dödönia wa iadaʼa inötö ba wanohugö fofanöra.

¹⁷ Tobali, sakali daʼa abölö oya nifaʼanöra börö me no ifahowuʼö Gaberamo Yehowa sagötö feʼasora ba Harana. Waö-waönia zanutunö wa ”fefu nibabayara, si so khöra, awö niha andrö (sangai halöwö) nisöndrara ba Harana”. (I Moz. 12:5) Enaʼö tobali si sambua soi, moguna khö Gaberamo gefe hegöi sohalöwö khönia—sambua fongambatö sebua. Lö ero-ero ibeʼe waʼakayo Yehowa ba nono mbanuania, hizaʼi ibeʼe ngawalö zoguna khöra ba wamalua ohitö dödönia. Börö me no itema wamarou dödö, andrö iʼohe Aberamo zi fao khönia ba nahia si lö niʼilania.

18. (a) Hamega alua khö Gaberamo zi tebai iʼolifugö ba sejarah wahuwusa Lowalangi ba nono mbanuania? (b) Hadia zalua sabölö moguna me 14 Nisana? (Faigi kotak ”Tanggal si Tebai Olifu ba Sejarah Zura Niʼamoniʼö”.)

¹⁸ Me no hauga hari mofanö-fanö ira iʼotarai Harana, larugi Garikemi, nahia si toʼölö latörö-törö niha sato na laʼötö Oiferati. Te ba daʼa alua khö Gaberamo sejarah si tebai iʼolifugö ba wahuwusa Lowalangi ba nono mbanuania. Iʼohe fefu zato andrö Aberamo, laʼötö nidanö ba ngaluo si-14 ba mbaŵa nifotöi Nisana me 1943 SM. (II Moz. 12:40-43) Tanö raya, oroma danö si no ifabuʼu Yehowa khö Gaberamo. Me luo daʼö, ibörögö alua mbuʼusa li Lowalangi khö Gaberamo.

19. Hadia nitötöi Yehowa ba mbuʼusa linia khö Gaberamo, ba hadia zi möi famasugi ba dödönia?

¹⁹ Ifadege ia Aberamo tanö raya soi daʼö, ba tebato ira ahatö ba geu sebua nifotöi More, sahatö ba Zikhema. Ba daʼö zui itema Aberamo goroisa Yehowa. Nifabuʼu Lowalangi andre sanandrösa ba danömö mazui ngaʼötönia dania zangokhögö soi andrö. Hadia itörö tödö Gaberamo wamaʼeleʼö niwaʼö Yehowa si no irai iwaʼö ba kabu Edena sanandrösa ba ”maʼuwu”, mazui ngaʼötö, wa samuza inötö dania tola teʼorifi niha gulidanö? (I Moz. 3:15; 12:7) Tola manö. Ibörötaigö iʼila, hewaʼae ambö aboto ba dödönia wa fakhai ia ba gohitö dödö Yehowa.

20. Hewisa Gaberamo wangandrönia saohagölö ba döi sebua nibeʼe Yehowa khönia?

²⁰ Iʼameʼegö tödö Aberamo döi sebua nibeʼe Yehowa khönia. Me itöröi mbanua andrö—mangelama ia börö me so niha Ganaʼana ba daʼö—ifazökhi Aberamo naha wameʼe sumange khö Yehowa, si oföna sahatö ba döla geu More, aefa daʼö sahatö ba Mbetieli. Muʼao ia ba döi Yehowa, te ba wangandrö saohagölö khö Lowalangi ba iʼangeraigö göi ngaʼötönia ba zi so miföna. Te manuriaigö ia göi ba niha Ganaʼana. (Baso I Moze 12:7, 8.) Tatu manö, oya wanandraigö salua ba waʼauri Gaberamo. Lö itörö tödönia zi no numalö, omo hegöi nahania waʼohahau dödö me so ia ba danö Guri. Imane ba Heberaiʼo 11:10 sanandrösa khö Gaberamo, ”Ibaze-bazeʼö sa mbanua andrö, saro dane-dane, ba zi no möi tuka ba sotomo Lowalangi.”

21. Hawaʼoya zaboto ba dödöda sanandrösa ba Mbanua Lowalangi moroi khö Gaberamo, ba hadia zadöni dödöu sinangea öfalua?

²¹ Yaʼita si no mangai halöwö khö Yehowa iadaʼa, tatu manö abölö oya taʼila moroi khö Gaberamo sanandrösa ba zi no amaedola mbanua andrö—Banua Lowalangi. Taʼila wa no mamatörö Mbanua Lowalangi ba zorugo ba lö aratö iheta fefu ngawalö waʼalösökhi ba gulidanö andre, ba taʼila göi zi no ifabuʼu wa no mamatörö Maʼuwu Gaberamo sotöi Yesu Keriso iadaʼa ba Mbanua Lowalangi. Sindruhu-ndruhu no sambua töi sebua khöda na taʼila dania tesusugi Gaberamo ba iʼila fefu zi no mufabuʼu andrö! Hadia omasiʼö öʼila fefu zi no ifabuʼu Yehowa? Moguna sibai öfalua zimane nifalua Gaberamo. Oromaʼö wa so khöu waʼaohagölö, foloʼö, ba fangandrö saohagölö ba döi sebua nibeʼe Yehowa khöu. Oʼö wamati Gaberamo. Börö zimanö ’ama fefu niha samati’ tola göi tobali amamö!