Teʼefaʼö Ndraʼugö Börö Waʼebua Dödö Lowalangi si Tenga Sinangea Mutema

1, 2. Hewisa wa tola itolo ita Roma 5:12?

IMANE Roma 5:12, ”Andrö, simane böröta horö andrö ba gulidanö, wa no ha samösa niha zamobörö, awö lua-lua horö andrö, faʼamate, awö wa no ikhamö niha fefu faʼamate andrö, börö wa no dozi samazökhi horö ira.” Asese tarongo ayati daʼa ba asese taʼogunaʼö ia ba ginötö tafahaʼö niha ba Zura Niʼamoniʼö.

² Asese so ayati daʼa ba mbuku Apa yang Sebenarnya Alkitab Ajarkan? hegöi Hadia Nifahaʼö Zura Niʼamoniʼö Khöda? Ba ginötö tafahaʼö ndraonoda hegöi niha böʼö ba faza 3, 5, ba 6, hasambalö tabaso Roma 5:12. Tola manö taʼogunaʼö ayati daʼa ba wanolo yaʼira enaʼö aboto ba dödöra hana wa tenga faradaiso saʼae gulidanö andre, hana wa moguna khöda höli, ba hana wa mate ita. Hizaʼi, ayati daʼö göi zanolo yaʼita fefu enaʼö taʼandrö saohagölö ba wahuwusada khö Yehowa. Daʼö göi zanolo yaʼita enaʼö itugu taʼosambuaʼö dödöda ba wangomusoiʼö dödönia ba enaʼö lö aetu manötöna ita ba zi no ifabuʼu sanandrösa ba zi so miföna.

3. Hadia zi lö tola löʼö tatörö tödöda ba zalua khöda?

³ Fefu ita oi samalua horö. Tafalua zala ero maʼökhö. Hizaʼi, iforomaʼö waʼahakhö dödönia Yehowa. Iʼila wa lö moʼahonoa ita ba edöna ia ibeʼe khöda wangefa. (Zinunö 103:13, 14) Ifarou ita Yesu wa moguna taʼandrö khö Lowalangi enaʼö iʼefaʼö zalada. (Luka 11:2-4) Ba ginötö iʼefaʼö Yehowa zala si no tafalua ba zilalö, böi saʼae taʼangera-ngeraigö daʼö. Datatutunö hewisa wangefaʼö Yehowa zalada.

LALA WANGEFAʼÖ YEHOWA ZALADA

4, 5. (a) Hadia zanolo yaʼita enaʼö aboto ba dödöda Roma 5:12? (b) Hadia geluaha ”faʼebua dödö” si tenga sinangea mutema?

⁴ Ba mbuku Roma, töra-töra ba faza 6, itolo ita enaʼö aboto ba dödöda hewisa wangefaʼö Yehowa zalada. Ba faza 3, tafahaʼö ita wa fefu niha ”noa sa ahori mamazökhi horö”. Aefa daʼö, itutunö göi Faulo, ”Saohagölö wa iwaʼö Lowalangi satulö ira, faʼebua dödönia, börö wangöhöli andrö, ba khö Keriso Yesu.” (Roma 3:23, 24) Ba li Yunani, ngawua wehede ’faʼebua dödö’ eluahania yaʼia daʼö amuata si sökhi si lö mangandrö sulö, si tenga sinangea menaʼö mutema daʼö.

⁵ Itutunö samösa sarjana, ba li Yunani asese lafoʼamakhaita ngawua wehede daʼö ba nifalua Lowalangi hegöi Keriso ba wangefaʼö niha moroi ba horö hegöi faʼamate. Andrö, ngawua wehede Yunani andre, lafoʼeluaha ia ba Terjemahan Dunia Baru ba li Inggris tobali ”faʼebua dödö”. Datatutunö hadia zi no ifalua Lowalangi khöda, ba hewisa waʼebua dödönia si tenga sinangea mutema so mbuania khöda iadaʼa ba ibeʼe khöda dötönafö ba zi so miföna.

6. Haniha zanöndra mbua moroi ba waʼebua dödö Lowalangi si tenga sinangea mutema, ba hewisa?

⁶ Börö me no ifalua horö Adamo, fefu niha lö moʼahonoa, lua-luania lafalua horö ba mate ira. Daʼö mbörö wa imane Sura Niʼamoniʼö ”ha samösa sa mbörö, wa no salawa waʼamate”. Hizaʼi, iforomaʼö Yehowa waʼebua dödönia si tenga sinangea mutema ba ibeʼe ”zi ha samösa andrö, Yesu Keriso”, si tobali lala ba wangefaʼö fefu niha. (Roma 5:12, 15, 17) ”Ba woloʼö zi ha samösa andrö, noa göi möi börö wangaʼatulö ba zato.” Ba latötöna ”waʼauri si lö aetu, börö Yesu Keriso, Soʼaya yaʼita”.​—Roma 5:19, 21.

7. Hadia mbörö wa no buala faʼebua dödö Lowalangi si tenga sinangea mutema höli andrö?

⁷ Angeraigö daʼa: Tenga sinangea ibeʼe Nononia Yehowa si tobali höli. Hizaʼi, ifalua daʼö ba wangoromaʼö faʼebua dödönia si tenga sinangea mutema ba wangefaʼö yaʼita ba horö hegöi faʼamate. Lö ba gotaluada sinangea manema nifalua Lowalangi hegöi Yesu khöda. Taʼandrö saohagölö me tola teʼefaʼö zala si no tafalua ba tola taʼokhögö waʼauri si lö aetu! Tola taforomaʼö ba waʼaurida wa taʼandrö sibai saohagölö khö Lowalangi.

TAʼANDRÖ SAOHAGÖLÖ BA WAʼEBUA DÖDÖ LOWALANGI SI TENGA SINANGEA MUTEMA

8. Hadia wangera-ngera sinangea tatimbagö?

⁸ Taʼila wa edöna iʼefaʼö horöda Lowalangi, hewaʼae horö sebua daʼö. Hizaʼi, böi irai taʼogunaʼö waʼebua dödö Yehowa si tenga sinangea mutema andrö ba wamalua sala, ba tamane tödöda wa ’hasambalö ibeʼe khögu wangefa Yehowa’. Ba götö siföföna, me lö sahori mate nasa ndra sinenge, so niha Keriso sangokhögö mbua-bua simane daʼö. (Baso Yuda 4.) Iadaʼa, moguna tarorogö gera-erada enaʼö böi idönisi ita niha böʼö ba wangokhögö fangera-ngera simane daʼö.

9, 10. Hewisa wa tola teʼefaʼö Waulo hegöi niha tanö böʼö ba horö hegöi faʼamate?

⁹ Imane Faulo ba niha Keriso wa fasala ira na lawaʼö tödöra ibeʼe khöra wangefa Lowalangi hewaʼae lö aetu lafalua horö. Iʼamenesi ira Faulo wa moguna latimbagö wangera-ngera simane daʼö börö me ”si no mate ba horö” ira. (Baso Roma 6:1, 2.) Hadia geluahania?

¹⁰ Börö höli wa tola ibeʼe aefa Lowalangi zala si no ifalua Faulo hegöi niha Keriso tanö böʼö ba götö siföföna. Ibayoini ira Yehowa si fao ehehania enaʼö tobali ira iraononia. Na anau gölöra, tola auri ira ba zorugo ba fao khö Keriso ba wamatörö. Hewaʼae so ira nasa ba gulidanö, hana wa lawaʼö ”no mate ba horö” ira? Iʼogunaʼö wamatimbaisi Faulo ba wangoromaʼö wa no tebulö lala waʼaurira. Iwaʼö khöra wa me no aefa mate Yesu, tesusugi ia tobali boto eheha si tebai mate. Daʼö mbörö wa ”löʼö saʼae ilawa ia faʼamate”. Simane daʼö göi niha Keriso, hulö si no mate ira. Sindruhu-ndruhu tebulö waʼaurira börö me lö latehegö ifatörö ira gisö-isö dödöra si fasala. Iʼotarai daʼö, laforege ba wangomusoiʼö tödö Lowalangi ba waʼaurira. ”Si no mate sa, ba horö, ami, . . . ba sauri ba khö Lowalangi, börö Keriso Yesu”.​—Roma 6:9, 11.

11. Hewisa wa hulö zi ”no mate ba horö” niha Keriso?

¹¹ Hewisa göi ita? Hewisa wa ”si no mate ba horö” ita? Ba zilalö, oya zala si no tafalua ba lö aboto ba dödöda hewisa dödö Yehowa ba nifaluada andrö. Hulö simane ”sawuyu zi raʼiö ba sawuyu wanawö oroisa” ita, yaʼia daʼö ”sawuyu horö”. (Roma 6:19, 20) Hizaʼi, ba ginötö tafahaʼö ita ba Zura Niʼamoniʼö ba taʼila hadia nitötöna Lowalangi khöda, tabulöʼö waʼaurida, talulu waʼaurida khönia, ba tafabayagöʼö ita idanö. Omasi sibai ita taʼoʼö Yehowa ba tafaudugö lala waʼaurida ba zomasi ia. ’No muʼefaʼö ita ba horö, ba no tobali enoni zatulö ita’.​—Roma 6:17, 18.

12. Hadia zinangea tafili ba waʼaurida?

¹² Hizaʼi, moguna tafili. Imane Faulo, ”Böi abölö horö ba mbotomi andrö, si mate, ba woloʼö fangisönia.” (Roma 6:12) Tola tafili hadia taʼoʼö wangera-ngera hegöi isö-isö dödöda si fasala mazui tatimbagö ia. Sofu khöu samösa, ’Hadia utehegö tedou-dou manö gisö-isö dödögu si fasala irege ufalua horö? Mazui, hadia iʼanemai utimbagö ia?’ Na taʼandrö sibai saohagölö ba waʼebua dödö Lowalangi si tenga sinangea mutema, hasambalö taforege ba wangomusoiʼö tödönia.

TOLA ÖLAWA HORÖ

13. Hana wa tola faduhu dödöda wa tola tafalua zatulö?

¹³ Ba götö siföföna, so ösa niha Korindro sanagö-nagö, sohoröni donga zodonga, samosumange adu, si mabu-mabu, ba orudu ndra matua ba nawönia ira matua. Hizaʼi, me aboto ba dödöra Yehowa ba laʼomasiʼö ia, labulöʼö waʼaurira. Aila ira ba zi no lafalua me mböröta. (Roma 6:21; I Korindro 6:9-11) Niha Keriso ba Roma, moguna göi labulöʼö lala waʼaurira. Iwaʼö khöra Faulo, ”Ba böi ba horö mitehe ndroto-ndrotomi, fangöna ba zi lö atulö, miʼoroʼö ami khö Lowalangi, simane si no auri, si otarai waʼamate, ba Lowalangi mitehe ndroto-ndrotomi, fangöna ba zatulö.” (Roma 6:13) Faduhu dödö Waulo wa tola lafalua zatulö ba lö aetu lasöndra mbua ba waʼebua dödö Lowalangi si tenga sinangea mutema.

14, 15. Hadia zinangea tasofu khöda samösa?

¹⁴ Simanö göi iadaʼa. So ösa ndra talifusöda si no irai mangokhögö mbua-bua simane niha Korindro me föna. Hizaʼi, me no aboto ba dödöra Yehowa, labulöʼö waʼaurira. Ba hulö zi no musasai ira. Ba wangomusoiʼö dödö Yehowa, moguna tabulöʼö waʼaurida. Iadaʼa, omasi ita taʼandrö saohagölö ba waʼebua dödö Lowalangi si tenga sinangea mutema. Ba tahalö gangetula ba wolawa gisö-isö dödöda si fasala ba taʼogunaʼö waʼaurida ba wamosumange Yehowa.

¹⁵ Tatu manö, moguna tatimbagö wamalua horö sebua simane nifalua niha Korindro. No fasala sibai ita na tafalua horö simane daʼö ba tatötöna wa hasambalö iforomaʼö waʼebua dödönia Lowalangi ba ibeʼe aefa khöda horö nifaluada. Hizaʼi, hewisa sanandrösa ba horö side-ide? Hadia tahalö gangetula ba wamalua zabölö sökhi ba woloʼö khö Yehowa ba ngawalö hadia ia?​—Roma 6:14, 17.

16. Hewisa tola taʼila wa moguna tatimbagö ngawalö horö si lö musura ba I Korindro 6:9-11?

¹⁶ Angeraigö sanandrösa khö Waulo. Isura, ”Ösi niha ndraʼodo, niʼamawa ba horö andrö. Hadia nilaugu sa, ba no si lö aboto ba dödögu. Tenga sa somasi ndraʼo nilaugu, si faʼudu ndraʼo, daʼö ulau.” (Roma 7:14, 15) Hewaʼae lö nifaluania ngawalö zala simane si no tesura ba I Korindro 6:9-11, hizaʼi aboto ba dödö Waulo wa lö si tebulö wa niha si so horö ia nasa. Omasi ia iʼomusoiʼö dödö Yehowa, andrö wa iforege ba wotimbagö wamalua fefu hadia ia zi fasala. (Baso Roma 7:21-23.) Tola taʼoʼö duma-dumania ba taforege ba woloʼö Yehowa.

17. Hadia mbörö wa omasiʼö ötörö zindruhu?

¹⁷ Duma-dumania, taʼila wa ba wamosumange Yehowa, moguna tatörö zindruhu. (Baso Gamaedola 14:5; Efeso 4:25.) Lö omasi ita tobali simane Satana, si no tobali ”ama zofaya”. Moguna göi tatörö tödöda wa börö walimosa, andrö wa mate Anania hegöi foʼomonia. (Yohane 8:44; Halöwö Zinenge 5:1-11) Hizaʼi, fanörö sindruhu andrö tenga ha asala lö tawaʼö waya. Na sindruhu-ndruhu taʼandrö saohagölö ba waʼebua dödö Lowalangi si tenga sinangea mutema, moguna tatörö zindruhu ba ngawalö hadia ia.

18, 19. Hadia geluahania tatörö zindruhu?

¹⁸ Tola manö lö itörö zindruhu si samösa niha hewaʼae lö falimo ia. Duma-dumania, imane Yehowa ba ndraono Gizaraʼeli, ”Böi managö ami ba böi mofaya ba böi falimo.” Hadia mbörö wa moguna lafalua daʼö? Imane Yehowa, ”Ya niʼamoniʼö ami, me no niʼamoniʼö ndraʼodo, yaʼodo andre, Yehowa, Lowalangimi.” (III Moze 19:2, 11) Hewaʼae lö falimo ita, hizaʼi na tabeʼe faduhu dödö niha böʼö ba zi lö atulö nasa, eluahania daʼö lö tatörö zindruhu.

¹⁹ Duma-dumania, imane samösa ira matua khö gafalonia wohalöwö mazui awönia wohalöwö wa alio mangawuli ia börö me möi ia ifareso wökhönia. Hizaʼi, tenga sa ba daʼö möi ia. Möi ia manörö-nörö, andrö wa alio mofanö ia. Iwaʼö wa möi ia ”ifareso wökhönia”, sindruhunia sa ha ba apotek mazui ba wamuʼa gömönia ba rumah sakit möi ia. Hadia no itörö zindruhu, mazui no ilimo niha böʼö? Ibeʼe faduhu dödö niha böʼö ba zi lö atulö. Itaria falimo niha enaʼö tola lasöndra hadia zomasi dödöra mazui enaʼö lö lahuku ira. Hizaʼi, taʼoʼö Yehowa me iwaʼö wa ”böi mofaya” ita. Omasi ita tafalua hadia ia zatulö ba niʼamoniʼö ba wamaiginia.​—Roma 6:19.

20, 21. Na taʼandrö saohagölö ba waʼebua dödö Lowalangi si tenga sinangea tatema, hadia zi lö tola löʼö tatimbagö?

²⁰ Tatu manö taʼaröuʼö ita ba gamuata wohorö, femabu-mabu hegöi horö sebua tanö böʼö. Töra-töra nasa, omasi ita tatimbagö fefu zi lö omasi Yehowa. Duma-dumania, tenga ha taʼaröuʼö ita moroi ba gamuata wohorö, hizai taʼaröuʼö ita göi ba hiburan soʼamakhaita ba wohorö. Tatu lö omasi ita mabu, tobali böi göi tabadu duo irege arakhagö mabu ita. Tola manö abua khöda wanimbagö fanandraigö daʼa, hizaʼi tola mofozu ita ba wotimbagö yaʼia.

²¹ Moguna taʼokhögö gohitö dödö simane Waulo me imane, ”Böi abölö horö ba mbotomi andrö, si mate, ba woloʼö fangisönia.” (Roma 6:12; 7:18-20) Atulö sa wa tebai tatimbagö wamalua fefu ngawalö horö. Hizaʼi, ba ginötö taforege ba wolawa fefu ngawalö horö, no taforomaʼö wa taʼandrö sibai saohagölö ba waʼebua dödö Lowalangi hegöi Keriso si tenga sinangea tatema.

22. Hadia howu-howu nitemada na taʼandrö saohagölö ba waʼebua dödö Yehowa si tenga sinangea tatema?

²² Ibeʼe aefa fefu zala si no tafalua Yehowa ba lö aetu ifalua daʼö. Taʼandrö sibai saohagölö ba waʼebua dödönia si tenga sinangea mutema andrö! Dataforege ba wanimbagö wamalua hadia manö zi fasala ba wamaiginia, hewaʼae so niha tanö böʼö sangumaʼö wa lö fasala gamuata daʼö. Na tafalua daʼö, hadia howu-howu nitemada? Imane Faulo, ”Ba iyaʼe, me no aefa ami ba horö, me no tobali enoni Lowalangi ami, ba no so haremi ba wangohau-hau, ba fozunia, ba faʼauri si lö aetu.”​—Roma 6:22.