Falöfaröi khö Lowalangi Daʼö Zomasi Ia

1, 2. Hadia zabu dödö Yefita faoma ononia?

FAGOHI nono alawe andrö ba wofalukhaisi namania. Omuso dödönia me no mangawuli namania moroi ba wasuwöta, lö hadia ia khönia. Manunö ia fao fanari. Tatu tokea dödönia ba nifalua hegöi niwaʼö namania börö me isika nukhania ba muʼao ia, ”Alai ndraʼo ndraʼugö onogu! Abu sibai dödögu öbeʼe.” Ifatunö khö nononia wa no fawuʼu li ia khö Yehowa ba tola tebulö waʼauri nononia ba zi no ifabuʼu. Tatu tebai mangowalu ia mazui moʼono. Hizaʼi, sökhi wanemania li namania, ifarou namania enaʼö ifalua zi no ifabuʼu khö Yehowa. Ba daʼö oroma wa faduhu sibai dödönia wa fefu niʼandrö Yehowa khönia sökhi lua-luania. (Zanguhuku 11:34-37) Me iʼila wamati nononia andrö, omuso sibai dödönia börö me iʼila wa nifaluania möi fangomusoiʼö dödö Yehowa.

² Faduhu dödö Yefita hegöi ononia ba nifalua Yehowa. Mamati ira hewaʼae abua khöra wamalua yaʼia. Omasi ira na tefaudu ba dödö Yehowa nifaluara.

3. Hadia mbörö wa moguna khöda ba ginötö andre duma-duma nifalua Yefita hegöi ononia?

³ Abua wangoromaʼö falöfaröida khö Yehowa. Moguna ’enaʼö tatimba zi faʼudu ba wamati andrö’. (Yuda 3) Enaʼö tola tafalua daʼö, datafahaʼö ita ba nifalua Yefita hegöi ononia ba gabula dödö salua khöra. Hewisa wa tola lö faröi ira khö Yehowa?

LÖ FARÖI HEWAʼAE SO ZONDRÖNISI DÖDÖDA BA GULIDANÖ ANDRE

4, 5. (a) Hadia niwaʼö Yehowa ba ndraono Gizaraʼeli me larugi Danö Gamabuʼula? (b) Simane niwaʼö ba Zinunö 106, hadia lua-luania ba ndraono Gizaraʼeli me lalawa Yehowa?

⁴ Ero maʼökhö, itörö-törö tödö Yefita faoma ononia alawe hadia lua-luania ba ndraono Gizaraʼeli me lö laʼoʼö li Yehowa. Me 300 fakhe silalö, no ifarou ndraono Gizaraʼeli Yehowa ba wamunu fefu zanömba adu ba Danö Gamabuʼula, hizaʼi lö laʼoʼö. (V Moze 7:1-4) Ato ba ndraono Gizaraʼeli zoloʼö ndrawa Ganaʼana, sanömba adu ba samalua amuata wohorö.​—Baso Zinunö 106:34-39.

⁵ Börö me faröi ndraono Gizaraʼeli, lö ilumöʼö ira Yehowa moroi ba nudura. (Zanguhuku 2:1-3, 11-15; Zinunö 106:40-43) Tatu abua ba niha sangomasiʼö Yehowa ba wangoromaʼö falöfaröira me inötö tefakao ira. Hewaʼae simanö, so niha si lö faröi nidunö-nidunö ba Zura Niʼamoniʼö simane Yefita ba ononia alawe, Elikana, Khana, ba Samueli. Lö tebulö laʼomusoiʼö dödö Yehowa.​—I Zamueli 1:20-28; 2:26.

6. Hadia zondrönisi dödö niha gulidanö ba ginötö andre, ba hadia zinangea tafalua?

⁶ Ba ginötöda andre, lagu wangera-ngera niha hegöi nifaluara fagölö simane ndrawa Ganaʼana. Awai niʼera-erara ba waʼaurira ha famalua amuata fohorö, faʼalösökhi, hegöi folohi kefe. Hizaʼi, no ifangelama ita Yehowa. Omasi ia wolumöʼö yaʼita simane wolumöʼönia ndraono Gizaraʼeli moroi ba gisö-isö dödö niha gulidanö. Hadia omasi ita tahalö wamahaʼö moroi ba zala nifaluara? (I Korindro 10:6-11) Dataforege ba wotimbagö fangera-ngera niha gulidanö. (Roma 12:2) Hadia omasi tafalua daʼa?

LÖ FARÖI YEFITA HEWAʼAE LAʼAFÖKHÖIʼÖ DÖDÖNIA

7. (a) Hadia nifalua ndraono Gizaraʼeli khö Yefita? (b) Hadia nifalua Yefita me alua zimane daʼö?

⁷ Me götö Yefita, lafakao ndraono Gizaraʼeli ira ndrawa Wilisiti hegöi ndraono Gamoni börö me lö laʼoʼö niwaʼö Yehowa. (Zanguhuku 10:7, 8) Baero daʼö, so wanandraigö moroi khö ndra talifusönia ba waʼaniha hegöi ira salawa ba ndraono Gizaraʼeli. Börö me fatuwu ira khönia ba so khöra waʼolohu, andrö wa lafofanö ia ba wondröi tanö si no tobali tana khönia. (Zanguhuku 11:1-3) Hizaʼi, lö iʼoʼö Yefita gamuatara si lö sökhi. Hezo taʼila daʼö? Ba ginötö laʼandrö wanolo khönia ira salawa, iʼoʼö ba ifalua. (Zanguhuku 11:4-11) Hadia zangoʼou Yefita ba wamalua daʼö?

8, 9. (a) Hadia goi-goi si so ba Goroisa Moze niʼogunaʼö Yefita si tobali fanuturu lala khönia? (b) Hadia zabölö iʼofönaiʼö Yefita?

⁸ Yefita andre no niha sabölö, ba aboto ba dödönia hewisa waö-waö ndraono Gizaraʼeli hegöi Goroisa Moze. Moroi ba zi no ifalua Yehowa ba nono mbanuania, iʼila hadia goi-goi Lowalangi sanandrösa ba zatulö hegöi si lö atulö. (Zanguhuku 11:12-27) Ba ginötö ihalö gangetula, iʼogunaʼö waʼaboto ba dödö si no iʼila. Aboto ba dödönia hewisa dödö Yehowa sanandrösa ba wofönu, wolau balö, ba iʼila wa omasi Lowalangi na taʼomasiʼö niha böʼö. Aefa daʼö, moroi ba Goroisa andre tefahaʼö ia hadia zinangea ifalua ba niha, mendrua manö ba niha si fatiu tödö khönia.​—Baso II Moze 23:5; III Moze 19:17, 18.

⁹ Duma-duma Yosefo zi tobali fanolo khö Yefita. Ifahaʼö ia moroi khö Yosefo me iforomaʼö waʼahakhö dödö khö ndra talifusönia hewaʼae fatiu dödöra khönia. (I Moze 37:4; 45:4, 5) Duma-duma andrö zi tobali fanolo khö Yefita ba wamalua somasi Yehowa. Hewaʼae afökhö dödönia ba nifalua ndra talifusönia, iʼofönaiʼö fasuwö ba wangoʼawögö Yehowa hegöi ono mbanuania moroi na iʼera-era zi no alua khönia. (Zanguhuku 11:9) Börö me lö faröi ia khö Yehowa, tefahowuʼö ia hegöi ndraono Gizaraʼeli.​—Heberaiʼo 11:32, 33.

10. Hewisa goi-goi Lowalangi möi fanoloda enaʼö tobali ita niha Keriso sindruhu?

¹⁰ Hewisa enaʼö tola tobali duma-duma khöda Yefita? Hadia nifaluada na afatö dödöda labeʼe ira talifusöda ba wamati mazui tamane tödöda lö sökhi lagura khöda? Lö tabaliʼö faʼafökhö dödöda tobali daha-tahada ba wangai halöwö khö Yehowa. Böi taböhöli weʼamöi ba gangowuloa mazui fariawö khö ndra talifusöda. Dataʼoʼö duma-duma Yefita ba tafalua zomasi Yehowa. Daʼa zi tobali fanolo khöda na göna ita fanandraigö enaʼö tola tobali duma-duma si sökhi ita.​—Roma 12:20, 21; Kolose 3:13.

FAʼAOHA GÖLÖ ZANGOROMAʼÖ FAMATIDA

11, 12. Hadia hölu Yefita ba hadia geluahania?

¹¹ Aboto ba dödö Yefita wa moguna wanolo moroi khö Lowalangi enaʼö tola teʼefaʼö ndraono Gizaraʼeli moroi ba danga ndraono Gamoni. Ifabuʼu khö Yehowa na möna ia, ibeʼe ’zumange nitunu’ yaʼia daʼö niha si oföna sibai mamaondragö yaʼia ba newali na mangawuli ia moroi ba wasuwöta. (Zanguhuku 11:30, 31) Hadia geluahania daʼa?

¹² Fatuwu khö Yehowa na latunu niha tobali sumange. Andrö aboto ba dödöda wa tenga daʼö geluahania wa sindruhu-ndruhu itunu niha Yefita tobali sumange. (V Moze 18:9, 10) Ba Goroisa Moze, sumange nitunu no sambua buala soʼahonoa nibeʼe niha khö Yehowa. Tobali, eluaha zumange nibeʼe Yefita yaʼia daʼö itehegö nononia ba wangai halöwö khö Yehowa ba gosali sandrohu faʼaurinia. Ifondro-ndrongo Yehowa wangandrö Yefita ba tebeʼe khönia waʼamöna. (Zanguhuku 11:32, 33) Tobali, haniha nibeʼe Yefita khö Yehowa?

13, 14. Moroi ba wehede Yefita ba Zanguhuku 11:35, hadia niʼilada sanandrösa ba wamatinia?

¹³ Angeraigö atö nidunö-dunö ba wamobörö wamahaʼö. Ba ginötö mangawuli Yefita moroi ba wasuwöta, ononia alawe niʼomasiʼönia si ha sambua, daʼö zi oföna mamaondragö yaʼia! Hadia ifalua Yefita zi no ifabuʼu? Hadia tola itehegö mangai halöwö nononia ba gosali khö Yehowa sandrohu faʼaurinia?

¹⁴ Oroisa Lowalangi zanolo Yefita ba wangai angetula si sökhi. Te itörö tödönia nisura ba II Moze 23:19, me muʼoʼou nono mbanua Lowalangi ba wameʼe sumange sabölö sökhi khö Yehowa. Imane göi ba Goroisa andrö na so zi möi ba hölu khö Yehowa, ”ba lö tola ifuli linia, yamutörö sibai niwaʼönia andrö”. (IV Moze 30:3) Ifalua zi no ifabuʼu Yefita hewaʼae iʼila hadia lua-lua khö nononia hegöi khönia samösa, simane nifalua Khana si lö faröi, sauri me götö daʼö. Börö me ba gosali mangai halöwö nononia alawe, tebai moʼono ia. Börö daʼö, lö hadöi ngaʼötö Yefita sanohugö töinia ba sangokhögö haratonia. (Zanguhuku 11:34) Hewaʼae simanö imane Yefita, ”Noa sa numalö ligu khö Yehowa, ba tebai ufuli!” (Zanguhuku 11:35) Itema Yehowa zumange nibeʼe Yefita ba ifahowuʼö ia. Hadia so khöu wamati simane Yefita?

15. Hadia hölu si no tawaʼö, ba hewisa wangoromaʼöda wa lö faröi ita?

¹⁵ Ba ginötö talulu waʼaurida khö Yehowa, no möi ita ba hölu wa tafalua gofu hadia zomasi ia. Aboto ba dödöda wa lö aoha wamalua hadia zi no tafabuʼu andrö. Hizaʼi, hadia nifaluada ba ginötö laʼandrö khöda wamalua si lö faudu ba dödöda? Na lö taböhöli ba woloʼö niwaʼö Lowalangi, daʼö dandra wa lö faröi ita ba zi no tafabuʼu. Hewaʼae afökhö ba wamalua yaʼia, hizaʼi abölö ebua howu-howu nitemada moroi khö Yehowa. (Maleakhi 3:10) Tobali, hewisa dödö nono Yefita? Hadia nifaluania börö me no fawuʼu li namania?

16. Hewisa dödö nono Yefita ba zi no ifabuʼu amania? (Faigi gambara ba wamobörö wamahaʼö.)

¹⁶ Faböʼö hölu Yefita moroi ba hölu Khana. Möi ba hölu Khana wa ibeʼe nononia Samueli wohalöwö ba gosali tobali Nazir (niha nilulu ba wangai halöwö khö Yehowa). (I Zamueli 1:11) Mutehegö mangowalu ba moʼono niha si no tobali Nazir. Hizaʼi, ono Yefita mubeʼe tobali ”sumange nitunu” soʼahonoa. Börö daʼö, lö iʼila irasoi hewisa waʼomuso dödö tobali foʼomo ira alawe hegöi tobali satua. (Zanguhuku 11:37-40) Angeraigö daʼa! Tola manö mangowalu ia ba ndra matua si tehöngö ba mbanua andrö börö me sondröniaʼö iraono Gizaraʼeli namania. Iadaʼa tobali ia enoni ba gosali. Hadia nifalua nono alawe andre? Iforomaʼö wa iʼofönaiʼö wangai halöwö khö Yehowa, imane khö namania, ”Lau khögu niwaʼöu andrö.” (Zanguhuku 11:36) Itehegö lö mangowalu ia ba lö moʼono enaʼö tola ihalö halöwö Yehowa. Hewisa enaʼö aoha gölöda wangai halöwö Yehowa simane nifaluania?

17. (a) Hewisa enaʼö tola taʼoʼö wamati Yefita hegöi ononia? (b) Simane nisura ba Heberaiʼö 6:10-12, hewisa wa tola tefarou ndraʼugö enaʼö aoha gölöu ba wangai halöwö khö Yehowa?

¹⁷ Ngahönö ndra talifusöda ono matua hegöi ono alawe latehegö lö mangowalu ira mazui lö moʼono ba ginötö andre. Hadia mbörö? Lö omasi ira na mangoloi dödöra wangai halöwö khö Yehowa. Ato göi ndra talifusöda si no atua sameʼe inötöra hegöi faʼabölöra khö Yehowa, hewaʼae sindruhunia tola laʼogunaʼö ginötöra andrö ba ndraono mazui ba maʼuwura. So zohalöwö ba konstruksi, so zi möi ba Sekolah bagi Penginjil Kerajaan, ba so göi zi findra ba mbanua niha Keriso si lö ato sanuriaigö. Tanö böʼö, ladouʼö ginötöra wangai halöwö Yehowa sagötö mbaŵa Wanörö Tödö faʼamate Yesu. Lö olifu Yehowa zi no lafalua ira talifusöda si lö faröi andre. (Baso Heberaiʼo 6:10-12.) Hewisa na yaʼugö? Hadia aoha gölöu ba wondrouʼö inötöu wangai halöwö khö Yehowa?

HADIA WAMAHAʼÖ SI TOLA TAHALÖ?

18, 19. Hadia wamahaʼö si tola tahalö moroi khö Yefita hegöi ononia si no tesura ba Zura Niʼamoniʼö, ba hewisa enaʼö tola taʼoʼö nifaluara?

¹⁸ Hadia zanolo Yefita ba wanaögö fefu gabula dödönia? Iʼodaligö Yehowa ba wameʼe fanuturu lala enaʼö tola ihalö gangetula ba waʼaurinia. Lö adöni dödönia ba nifalua niha si fasui yaʼia. Lö faröi ia hewaʼae afatö dödönia ba zi no lafalua niha khönia. Ifahowuʼö ia Yehowa hegöi ononia alawe börö me aoha gölöra wamalua daʼö ba iʼogunaʼö ira Yehowa enaʼö ato niha samosumange yaʼia. Hewaʼae labato niha böʼö ba wamalua sindruhu, hizaʼi lö faröi ira khö Yehowa.

¹⁹ Imane Sura Niʼamoniʼö, ”Enaʼö mibeʼe famaedo khömi zanema amabuʼula li andrö, ba wamati, ba ba waʼebolo dödö.” (Heberaiʼo 6:12) Dataʼoʼö nifalua Yefita hegöi ononia. Na lö faröi ita khö Yehowa, hasambalö ifahowuʼö ita.