FAʼAURI NIHA KERISO

Si Bohou ba Gangowuloa Barö Migu

Ba gangowuloa barö migu iʼotarai mbaŵa si Sara 2018, tatutunö gonönöta hegöi media moroi ba edisi wamahaʼö New World Translation of the Holy Scriptures (nwtsty-E) si no tehenaigö ba Internet, hewaʼae lö si so edisi wamahaʼö andre ba li niʼogunaʼömö. Moguna sibai gangombakhata si so ba daʼö ba ginötö öfaʼanö ndraʼugö ba gangowuloa. Sabölö tohude, tola itugu ahatö ndraʼugö khö Namada sebua faʼomasi, Yehowa!

GONÖNÖTA

Gonönöta sanandrösa ba ayati Zura Niʼamoniʼö, soʼamakhaita ba zi toʼölö mufalua, geografis hegöi li.

Mataiʼo 12:20, NW

Fandru si no alö haga: Ba wohagaini nomo, si toʼölönia laʼogunaʼö dambala side-ide nifazökhi moroi ba dambu laʼuri, ösinia fanikha zaitun. So tali wandru ba daʼö sosisiö fanikha irege tola mohola ia. Ba li Yunani, ngawua wehede ”fandru si no alö haga” [NW] tola mufoʼeluaha ia fandru si lö saʼae mosimbo börö me arakhagö mate mazui no mate hola-holania hewaʼae so nasa mbonia. Famaʼeleʼö si so ba Yesaya 42:3, iʼamaedolagö waʼahakhö dödö Yesu. Lö irai ibunu dötönafö si ha maʼifu niʼokhögö niha si so fangide-ngideʼö hegöi niha nifakao.

Mataiʼo 26:13

Sindruhu niwaʼögu khömi: Ngawua wehede Yunani a·menʹ nifoʼeluaha moroi ba li Heberaiʼo ’a·menʹ, eluahania ”yaʼalua” mazui ”ya simanö”. Asese iʼogunaʼö ngawua wehede daʼa Yesu ba wamobörö huhuonia na ibeʼe wamaduhuʼö, mbuʼusali mazui famaʼeleʼö. Daʼö zangoromaʼö wa atulö ba tola lafaduhusi tödö wehedenia. So zangumaʼö wa ngawua wehede ”sindruhu niwaʼögu khömi” mazui yaduhu niʼogunaʼö Yesu, ha ba daromali tesöndra ia. Na latötöi ia dua kali (a·menʹ a·menʹ), simane si so ba Injil Yohane, ngawua wehede Yesu andre lafoʼeluaha ia tobali ”sindruhu-ndruhu”.—Yoh 1:52.

MEDIA

Koda, gambara, video hegöi animasi si lö li sangoromaʼö ngawalö nitutunö bakha ba Zura Niʼamoniʼö.

Betifage, Hili Zaitun hegöi Yeruzalema

Video daʼa zangoromaʼö hewisa lala weʼamöi ba Yeruzalema iʼotarai gatumbukha, moroi ba mbanua nifotöi et-Tur iadaʼa. Te daʼö mbanua nitutunö ba Zura Niʼamoniʼö nifotöi Betifage—tanö sabölö alawa ba Hili Zaitun. Betania so ia tanö ba gatumbukha mbanua Mbetifage, ba gahe Hili Zaitun tanö ba gatumbukha. Me so Yesu ba Yeruzalema, asese toröi ia hegöi ira nifahaʼönia ba Mbetania. Iadaʼa lafotöi ia el-ʽAzariyeh (El ʽEizariya). Töi daʼö ba li Arab eluahania ”Nahia Lazaro”. Tatu no toröi Yesu ba nomo Marata, Maria hegöi Lazaro. (Mat 21:17; Mrk 11:11; Luk 21:37; Yoh 11:1) Me mowaö-waö ira numalö ba Yeruzalema, tola manö lala si so ba video daʼa nitörö Yesu. Me 9 Nisana 33 M, me itörö galide Yesu iʼotarai Hili Zaitun numalö ba Yeruzalema, tola manö mofanö ia iʼotarai Mbetifage ba itörö lala daʼa.

Lala siʼotarai Mbetania numalö ba Mbetifage
Betifage
Hili Zaitun
Daso Kidorona
Hili Gosali

Osö-osö ba Döla Mbörö Sisi

Daʼa duma-duma gambara döla mbörö sisi niha nifahö gosö-osö, faʼanaunia 11,5 cm. Lasöndra zindruhu döla andrö me 1968, me so wogao tanö ba Yeruzalema tanö yöu. Töla andre moroi ba götö Romawi. Daʼa zangaʼaroʼö tödö ndra arkeolog wa tola manö asese muʼogunaʼö gosö-osö ba ginötö lahuku mate zi samösa niha, enaʼö tetaru ia ba döla geu. Osö-osö daʼa te fagölö ia ba gosö-osö niʼogunaʼö zaradadu Romawi me laʼosö Yesu Keriso ba döla geu. Lasöndra daʼa ba zi sambua kotak nifazökhi moroi ba gara niʼogunaʼö tobali nahia döla niha si mate si no oköli me no ahori nagolenia. Daʼa zangoromaʼö wa niha nihuku mate ba döla geu tola lakoʼo.—Mat 27:35.