FAMAHAʼÖ 42
Hadia Niwaʼö Zura Niʼamoniʼö Sanandrösa ba Wangowalu hegöi Falömangowalu?
Ato niha sangumaʼö wa lö isöndra waʼohahau dödö si samösa niha na lö sangowalu ia. Hizaʼi, sindruhunia lö fefu zi no mangowalu lasöndra waʼohahau dödö, ba lö göi fefu zi lö sangowalu abu dödöra. Ifatunö khöda Sura Niʼamoniʼö wa fangowalu hegöi falömangowalu, no buala daʼö moroi khö Yehowa.
1. Hadia manö hare na lö mangowalu?
Imane Sura Niʼamoniʼö, ”Niha sangowalu si sökhi nifaluania. Mendrua manö niha si lö mangowalu, sabölö sökhi nasa nifaluania.” (Baso 1 Korindro 7:32, 33, 38.) Hana wa muwaʼö ’abölö sökhi nasa nifalua’ niha Keriso si lö mangowalu? Niha si lö mangowalu, lö moguna iʼabusi tödö zoguna khö ngambatönia. Börö daʼö, oya zi tola ifalua. Duma-dumania, so ösa niha Keriso si lö sangowalu, oya latehegö ginötöra ba weʼamöi manuriaigö ba lasöndra waʼomuso dödö. Tola möi ira ba soi tanö böʼö ba wanuriaigö turia somuso dödö. Ba sabölö tohudenia, oya ginötöra ba wangahatöʼö yaʼira khö Yehowa.
2. Hadia manö hare na no tefaduhuʼö wangowalu?
Simane niha si lö mangowalu, so göi howu-howu nitema niha si no mangowalu. Imane Sura Niʼamoniʼö, ”Sökhi zi darua moroi na ha samösa.” (Sangombakha 4:9) Daʼö nirasoi ndra niha Keriso samalua goi-goi Zura Niʼamoniʼö ba wongambatöra. Na no tefaduhuʼö wangowalu zi darua niha, eluahania no fawuʼu li ira wa faoma laʼomasiʼö, lafosumange ba laʼameʼegö tödö nawöra zamösana. Buania, abölö larasoi waʼahono dödö moroi ba niha samalua faʼorudu si toröi ba zi sambua omo si lö mufaduhuʼö. Baero daʼö larasoi göi waʼahono dödö iraonora.
3. Hewisa wamaigi Yehowa nifotöi fangowalu?
Me awena ifobörö wangowalu siföföna Yehowa, imane, ”Iröi dania namania niha awö ninania, ba falemba dödönia khö ngambatönia.” (1 Moze 2:24) Iʼandrö Yehowa ba niha si no mongambatö enaʼö faoma laʼomasiʼö nawöra ba tebai fabali ira sandrohu faʼauri. Hizaʼi, na fazamösa no mamalua horö, itehegö Yehowa khö ngambatö si lö fasala ba wangai angetula hadia omasi ia fabali moloʼö huku mazui löʼö.a (Mataiʼo 19:9) Lö itehegö Yehowa ba niha Keriso na lafodombua ndrongara.—1 Timoteo 3:2.
ODÖDÖGÖ NASA WANGALUI
Tatutunö dania hewisa enaʼö tola ösöndra waʼomuso dödö ba hewisa göi enaʼö öʼomusoiʼö dödö Yehowa, he na no mangowalu ndraʼugö he na löʼö.
4. Haogö wangogunaʼö buala falömangowalu
Iwaʼö Yesu wa falömangowalu andrö no buala göi daʼö. (Mataiʼo 19:11, 12) Baso Mataiʼo 4:23, ba beʼe wanema li ba wanofu daʼa:
Börö me lö mangowalu Yesu, hewisa wangogunaʼönia daʼö ba wangai halöwö khö Yehowa hegöi ba wanolo niha böʼö?
Niha Keriso si lö sangowalu tola larasoi waʼomuso dödö na laʼogunaʼö ginötöra simane nifalua Yesu. Futa VIDEO, ba beʼe wanema li ba wanofu daʼa:
Hadia manö zi tola lafalua ira niha Keriso si lö sangowalu ba wangogunaʼöra inötö?
Hadia öʼila?
Lö itatugöi Sura Niʼamoniʼö hawaʼalawa ndröfi zi samösa niha na omasi ia mangowalu. Hizaʼi, iʼamenesi fefu niha somasi mangowalu enaʼö so khöra wombaloi irege ’no ikhamö döfira’. Eluahania, abölö sökhi na mangowalu zi samösa niha na no italuʼi ginötö faʼabölö wehulu dödö ba wamalua faʼorudu irege tola ihalö gangetula si sökhi.—1 Korindro 7:36.
5. Fili woʼomomö si fao faʼatua-tua
Sambua gangetula sebua sinangea tahalö ba waʼaurida yaʼia daʼö ba wamili haniha zi tobali ngambatöda. Baso Mataiʼo 19:4-6, 9, ba beʼe wanema li ba wanofu daʼa:
Hana wa tebai mangaösö-ngaösö zi samösa niha Keriso na omasi ia mangowalu?
Itolo ita Sura Niʼamoniʼö ba wangiʼila hewisa mbua-bua zi samösa niha si tobali foʼomo si sökhi. Sabölö öʼofönaiʼö yaʼia daʼö alui zangomasiʼö Yehowa.b Baso 1 Korindro 7:39 hegöi 2 Korindro 6:14. Aefa daʼö, beʼe wanema li ba wanofu-nofu daʼa:
Hadia mbörö wa abölö sökhi na mangowalu niha Keriso samosumange Yehowa khö zi sara lala wamati khönia?
Moloʼö yaʼugö, hewisa dödö Yehowa na mangowalu ita ba niha si lö mangomasiʼö yaʼia?
Na muhareʼö kalo mbagi ba hulu gurifö si dua ngaʼeu si faböʼö faʼebua, fagölö-gölö tefakao ira. Simane daʼö göi niha Keriso sangowalu ba zi tenga si sara lala wamati, oya gabula dödö salua khöra
6. Oʼö lala wangera-ngera Yehowa sanandrösa ba wangowalu
Ba götö ndraono Gizaraʼeli me föna, so ösa ndra matua samabali foʼomonia moloʼö huku enaʼö tola lafalua zomasi-masi dödöra. Baso Maleakhi 2:13, 14, 16, ba beʼe wanema li ba wanofu daʼa:
Hana wa fatuwu khö Yehowa wabalisa si lö teʼodane-dane ba Zura Niʼamoniʼö?
Sindruhu-ndruhu wa afökhö dödö ngambatö si lö fasala hegöi iraononia, na mohorö ngambatönia mazui alua wabalisa moloʼö huku
Futa VIDEO, ba beʼe wanema li ba wanofu daʼa:
Na tenga samosumange Yehowa woʼomomö, hadia zi tola öfalua enaʼö misöndra waʼohahau dödö ba wongambatö?
7. Oʼö goi-goi Yehowa sanandrösa ba wangowalu
Te so zinangea iforege si samösa niha ba woloʼö goi-goi Yehowa sanandrösa ba wangowalu.c Hizaʼi tenga zaya-zaya gölö daʼö. Ifahowuʼö Yehowa niha soloʼö goi-goinia. Futa VIDEO.
Baso Heberaiʼo 13:4, ba beʼe wanema li ba wanofu-nofu daʼa:
Moloʼö yaʼugö, hadia tola taʼoʼö goi-goi Yehowa sanandrösa ba wangowalu? Hana wa öwaʼö zimanö?
Na so niha Keriso somasi mangowalu mazui fabali moloʼö huku, iʼandrö Yehowa enaʼö lafasuraʼö daʼö, börö me oya soi samazökhi amakhoita simane daʼö. Baso Dito 3:1, ba beʼe wanema li ba wanofu daʼa:
Na no mangowalu ndraʼugö, hadia no tefaduhuʼö wangowalumö andrö moloʼö huku?
TE SO ZANOFU: ”Hana wa moguna nasa tefaduhuʼö wangowalu?”
Hewisa wameʼemö fanema li?
RAHU-RAHU WAMAHAʼÖ
Fangowalu hegöi falömangowalu, no buala daʼö moroi khö Yehowa. Niha si lö mangowalu mazui si no mangowalu, tola larasoi waʼomuso dödö ba ahono dödöra na laʼoʼö zomasi Yehowa.
Hadia Wamahaʼö si Tola Öhalö?
Hewisa zi lö sangowalu wangogunaʼöra inötö si sökhi fatua lö sangowalu ira?
Hadia mbörö wa iwaʼö Sura Niʼamoniʼö enaʼö ha ba zi sara lala wamati mangowalu ita?
Moloʼö Sura Niʼamoniʼö, hadia dane-dane saro wa tola fabali moloʼö huku?
ALUI NASA DANÖ BÖʼÖ
Hadia geluahania mangowalu ”asala ba khö Zoʼaya”?
Faigi zi dombua ngawua video sadogo-dogo si tola manolo yaʼugö ba wangai angetula si sökhi sanandrösa ba wangowalu hegöi na fakawa.
Faigi hadia mbörö wa irasoi si samösa talifusöda wa abölö ebua mböli nibeʼe Yehowa khönia moroi ba zi no iröi.
Hadia zinangea ifatimbaisi si samösa niha fatua lö ihalö gangetula na omasi ia fabali moloʼö huku mazui fasambua ia moroi khö woʼomonia?
”Ameʼegö Tödö Nifakhoi Lowalangi Sanandrösa ba Wongambatö” (Manuriaigö, Baŵa si Felendrua 2018)
a Faigi Gonönöta 4 sanandrösa ba wabalisa na lö hadöi ngambatö si no mamalua fohorö.
b Ba zi hauga banua, satua zotatugöi haniha zi tobali foʼomo nononia. Na simane daʼö, satua si sökhi ifili niha sangomasiʼö Yehowa. Ba wamaigira, abölö tohude daʼö moroi ba waʼatehöngö mazui ba waʼebua gokhöta.
c Na fao ami zi samösa ira matua mazui ira alawe ba lö si tefaböbö ami ba wangowalu, tola öhalö gangetula hadia öröi ia mazui mangowalu ami.