Somuso Tödö Niha Samosumange ”Lowalangi Somuso Tödö”

1. Hana wa no somuso tödö ndra Samaduhuʼö Yehowa? (Faigi gambara ba wamobörö wamahaʼö.)

IRA Samaduhuʼö Yehowa no niha somuso tödö. Na owulo ira, he ba gangowuloa, kebaktian mazui acara ramah tamah, faoma fahuhuo ba maʼiki ira khö nawöra. Hana wa omuso sibai dödöra? Börö me laʼokhögö waʼaboto ba dödö khö Yehowa, ”Lowalangi somuso tödö”. Lafosumange ba laforege woloʼö yaʼia. (1 Timoteo 1:11; Zinunö 16:11) Yehowa no Umbu waʼomuso dödö, andrö wa omasi ia na omuso dödöda. Oya lala nibeʼenia sameʼe khöda faʼomuso dödö.​—5 Moze 12:7; Zangombakha 3:12, 13.

2, 3. (a) Hadia geluahania waʼomuso dödö? (b) Hana wa itaria abua khöda ba worasoi faʼomuso dödö?

² Hewisa göi ndraʼugö? Hadia omuso dödömö? Niha somuso tödö so khönia waʼohahau dödö ba faʼahono dödö mazui faʼowua-wua dödö ba waʼauri. Itutunö Sura Niʼamoniʼö wa niha nifahowuʼö Yehowa daʼö zangokhögö faʼomuso dödö sindruhu. Hizaʼi, hana wa abua khöda ba worasoi faʼomuso dödö?

³ Itaria abua khöda worasoi faʼomuso dödö na alua khöda gabula dödö, simane na mate niha niʼomasiʼöda mazui na laʼefasi ia ba gangowuloa, fabali auri mazui na aheta ita ba halöwöda. Abua göi khöda worasoi faʼomuso dödö na lö faʼohahau dödö yomo ba nomo börö me asese faʼudu, laʼoʼaya ita ira awöda sekola mazui awöda wohalöwö, lafakao mazui labeʼe ita ba gurunga börö wamosumange Yehowa. Mazui itugu alö waʼabölöda, abölö-bölö wökhöda mazui tataögö depresi. Hizaʼi, törö tödömö wa Yesu Keriso, ”Samatörö somuso tödö” omasi ia ibeʼe wondrara dödö hegöi faʼomuso dödö ba niha. (1 Timoteo 6:15; Mataiʼo 11:28-30) Ba Huhuo Yesu ba Hili, so ösa nitutunönia sanolo yaʼita ba wangokhögö faʼomuso dödö ba ginötö tataögö gabula dödö börö me auri ita ba gulidanö Zatana.

LÖ TASÖNDRA WAʼOMUSO DÖDÖ NA LÖ YEHOWA

4, 5. Hadia zi tola tafalua enaʼö tarasoi ba lö mamalö taʼokhögö waʼomuso dödö?

⁴ Si oföna nitutunö Yesu daʼö zabölö moguna. Imane, ”Yaʼahowu niha soʼameʼegö tödö soguna ba wamati, me khöra dania Wamatörö Lowalangi ba zorugo andrö.” (Mataiʼo 5:3) Na taʼameʼegö tödö zoguna ba wamati, aboto ba dödöda wa moguna taʼila haniha Lowalangi ba moguna khöda wanolo hegöi fanuturu lala moroi khönia. Tola taforomaʼö daʼö na tafahaʼö ita ba Zura Niʼamoniʼö, taʼoʼö niwaʼö Lowalangi, ba taʼofönaiʼö wamalua somasi ia ba waʼaurida. Na tafalua daʼa, tarasoi waʼomuso dödö. Itugu aro göi waʼafaduhu dödöda wa lö ara tö alua zi no ifabuʼu Lowalangi. Baero daʼö, ”dötönafö si möi fangomuso dödö” ba Zura Niʼamoniʼö möi famarou dödöda.​—Tito 2:13.

⁵ Moguna taʼaroʼö wahuwusada khö Yehowa enaʼö tola tarasoi waʼomuso dödö gofu hadia zalua ba waʼaurida. Isura sinenge sotöi Faulo, ”Böi mamalö-malö waʼomuso dödömi ba khö Zoʼaya. Sakalitö uwaʼö: Miʼomusoiʼö dödömi!” (Filifi 4:4) Enaʼö itugu aro wahuwusada khö Yehowa, moguna khöda waʼatua-tua moroi khö Lowalangi. Imane Taromali Lowalangi, ”Yaʼahowu zanöndra faʼatua-tua, awö niha sogamö faʼaboto ba dödö. Eu sowua fangorifi ia, ba zi olembai yaʼia, ba yaʼahowu zi lö mamöhöi.”​—Gamaedola 3:13, 18.

6. Hadia nasa zinangea tafalua enaʼö lö mamalö tarasoi waʼomuso dödö?

⁶ Hizaʼi enaʼö lö mamalö tarasoi waʼomuso dödö, moguna lö aetu tafalua hadia zi no tafahaʼö ita ba Zura Niʼamoniʼö. Itandrösaigö daʼa Yesu me imane, ”No aboto ba dödömi daʼa fefu, ba abölö ohahau dödömi na mifalua.” (Yohane 13:17; baso Yakobo 1:25.) Moguna sibai daʼa enaʼö tola taʼameʼegö tödö zoguna ba wamati ba lö mamalö tarasoi waʼomuso dödö. Hizaʼi, hewisa enaʼö tarasoi waʼomuso dödö ba ginötö oya zangafatöiʼö tödöda? Datafaigi hadia nasa niwaʼö Yesu ba Huhuo ba Hili.

BUA-BUA SAMEʼE KHÖDA FAʼOMUSO DÖDÖ

7. Hewisa wa tola irasoi waʼomuso dödö niha sabu tödö?

⁷ ”Yaʼahowu niha sabu tödö, me yaʼira nirara tödö dania.” (Mataiʼo 5:4) Te manofu ita, ’Hewisa wa tola irasoi waʼomuso dödö niha sabu tödö?’ Eluaha niwaʼö Yesu tenga fefu niha sabu tödö. Ato niha si lö sökhi sabu tödö börö me oya gabula dödö nitaögöra ba ”mbaŵa si lö sökhi” ba ”ngaluo safuria” andre. (2 Timoteo 3:1) Ha yaʼira samösa niʼangeragöra, lö laʼangeragö Yehowa irege lö laʼokhögö wahuwusa khönia ba lö larasoi waʼomuso dödö. Nitutunö Yesu yaʼia daʼö niha soʼameʼegö tödö zoguna ba wamati. Abu dödöra börö me laʼila wa ato niha si lö manemaʼö Lowalangi mazui si lö mamaudugö faʼaurira ba zomasi Lowalangi. Aboto ba dödöra wa no niha sebua horö ira ba laʼila hadia manö zi lö sökhi salua ba gulidanö andre. Inehegö niha sabu tödö Yehowa, iʼogunaʼö Daromalinia ba wameʼe khöra fondrara dödö hegöi faʼomuso dödö ba waʼauri.​—Baso Hezekieli 5:11; 9:4.

8. Hana wa tarasoi waʼomuso dödö na so khöda wangide-ngideʼö?

⁸ ”Yaʼahowu niha sangide-ngideʼö yaʼia, me yaʼira zangokhögö ulidanö dania.” (Mataiʼo 5:5) Hana wa tarasoi waʼomuso dödö na so khöda wangide-ngideʼö? Ato niha somasi faʼudu ba sofönu-fönu manö irege oya gabula dödö niʼasogöra. Hizaʼi, ba ginötö lafahaʼö ira ba zindruhu, labulöʼö ba ’labohouni gamuatara’. Iadaʼa, laforomaʼö ”waʼomasi, faʼahakhö dödö, faʼasökhi dödö, fangide-ngideʼö, falöʼalio mofönu, ba faʼebolo dödö”. (Kolose 3:9-12) Buania, larasoi waʼahono dödö, fahuwusa si sökhi ba niha böʼö hegöi faʼomuso dödö. Baero daʼö, no ifabuʼu Taromali Lowalangi wa yaʼira dania ”zokhö tanö”.​—Zinunö 37:8-10, 29.

9. (a) Hadia geluahania me iwaʼö Yesu wa niha sangide-ngideʼö ”zangokhögö ulidanö”? (b) Hana wa tola omuso dödö niha ”solofo ba sowökhi tödö ba zindruhu”?

⁹ Hadia geluaha me iwaʼö Yesu wa niha sangide-ngideʼö ”zangokhögö ulidanö”? Niha nibayoini laʼokhögö gulidanö ba ginötö mamatörö ira tobali razo hegöi ere. (Famaʼeleʼö 20:6) Zuta niha si lö mangokhögö fanötöna ba zorugo, laʼokhögö gulidanö ba ginötö latehegö khöra toröi ba daʼö sagötö faʼara. Moʼahonoa ira ba larasoi waʼahono dödö hegöi faʼomuso dödö. Yaʼira niwaʼö Yesu me imane, ”Yaʼahowu niha solofo ba sowökhi tödö ba zindruhu.” (Mataiʼo 5:6) Ba ginötö ihori waʼalösökhi Yehowa, ba daʼö tola lafalua zatulö moloʼö somasi dödöra. (2 Fetero 3:13) Ba gulidanö si bohou, omuso dödö niha satulö tödö ba lö saʼae irai larasoi waʼabu dödö ba nifalua niha si lö sökhi.​—Zinunö 37:17.

10. Hadia geluahania waʼahakhö dödö?

¹⁰ ”Yaʼahowu niha sohakhösi tödö niha böʼö, me yaʼira nihakhösi tödö dania.” (Mataiʼo 5:7) Faʼahakhö dödö eluahania lö alio mofönu, iʼokhögö waʼomasi ba iʼameʼegö tödö niha si göna abula dödö. Hizaʼi, lö ibönö na ha ba dödö so ia. Ifahaʼö ita Sura Niʼamoniʼö wa tola taforomaʼö waʼahakhö dödö na tafalua hadia zi tola manolo niha böʼö.

11. Hadia wamahaʼö nihalöda ba gamaedola sanandrösa ba niha Zamaria si sökhi tödö?

¹¹ Baso Luka 10:30-37. Gamaedola Yesu sanandrösa ba niha Zamaria si sökhi tödö, daʼö zangoromaʼö geluaha waʼahakhö dödö. Niha Samaria andrö so khönia woʼameʼegö tödö ba faʼahakhö dödö irege omasi ia itolo niha nifakao andrö. Imane Yesu me no aefa itutunö gamaedola daʼö, ”Ofanö ba falua göi zimane daʼö.” Andrö, datasofu khöda samösa, ’Hadia no ufalua zimane daʼö? Hadia no ufalua nifalua niha Zamaria andrö? Ba ginötö so gabula dödö niha böʼö, hadia so nifaluagu ba wanolo yaʼira? Duma-dumania, hadia tola utolo niha si no alawa döfi ba mbanua niha Keriso, lakha mbanua mazui iraono si lö mamosumange Yehowa zatuania? Hadia tola ubeʼe wehede ’fondrara dödö’ khöra?’​—1 Tesalonika 5:14; Yakobo 1:27.

12. Hana wa omuso dödöda ba ginötö taforomaʼö waʼahakhö dödö?

¹² Hana wa tarasoi waʼomuso dödö na taʼokhögö waʼahakhö dödö? Na taforomaʼö waʼahakhö dödö ba niha böʼö, no mamuala ita khöra, ba iwaʼö Yesu wa tasöndra waʼomuso dödö na mamuala ita. Aefa daʼö, taʼila göi wa omuso dödö Yehowa na tafalua daʼö. (Halöwö Zinenge 20:35; baso Heberaiʼo 13:16.) Imane Razo Dawido sanandrösa ba niha sahakhö tödö, ”Irorogö ia Yehowa ba iʼanauʼö nosonia; ohahau dödönia ba danö.” (Zinunö 41:2, 3) Na taforomaʼö waʼahakhö dödö ba foʼameʼegö tödö ba niha böʼö, ihakhösi tödö göi ita Yehowa ba tasöndra waʼomuso dödö sagötö faʼara.​—Yakobo 2:13.

OMUSO DÖDÖ ”NIHA SATULÖ TÖDÖ”

13, 14. Hana wa moguna taʼokhögö ’waʼatulö dödö’?

¹³ Imane Yesu, ”Yaʼahowu niha satulö tödö, me yaʼira zangila Lowalangi dania.” (Mataiʼo 5:8) Ba wangokhögö faʼatulö dödö, moguna tarorogö wangera-ngerada hegöi somasi dödöda enaʼö lö raʼiö. Moguna sibai daʼa na omasi ita itema Yehowa wamosumange nifaluada.​—Baso 2 Korindro 4:2; 1 Timoteo 1:5.

¹⁴ Niha sangokhögö faʼatulö dödö, tola iʼokhögö wahuwusa si sökhi khö Yehowa sangumaʼö, ”Yaʼahowu niha si no manasai barura sebua andrö.” (Famaʼeleʼö 22:14) Hadia geluahania ’no lasasai mbarura sebua’? Ba niha Keriso nibayoini, eluahania daʼö lö raʼiö ira ba wamaigi Yehowa. Ibeʼe khöra waʼauri si lö aetu ba zorugo ba lasöndra waʼomuso dödö sagötö faʼara. Ba ngawawa sato sangokhögö dötönafö ba gulidanö, eluahania daʼö itehegö khöra Yehowa tobali si fahuwu khönia börö me atulö ira ba wamaiginia. Iwaʼö Sura Niʼamoniʼö wa ”no lasasai nukhara sebua ba laʼafusiʼö ba ndro Nono Mbiri-biri”.​—Famaʼeleʼö 7:9, 13, 14.

15, 16. Hewisa niha satulö tödö tola ’laʼila Lowalangi’?

¹⁵ Imane Yehowa, ”Löʼö sa auri niha, na iʼila ndraʼodo!” (2 Moze 33:20) Hewisa niha satulö tödö tola ’laʼila Lowalangi’? Ba li Yunani, ngawua wehede ’mangila’ tola mufoʼeluaha ia mokhalaigö, mamaigi mazui mangokhögö faʼaboto ba dödö. Tobali, ’mangila Lowalangi’ eluahania aboto ba dödönia hewisa zindruhunia Lowalangi ba iʼomasiʼö mbua-buania. (Efeso 1:18) Moʼahonoa Yesu ba woloʼö mbua-bua Lowalangi, andrö wa tola imane, ”Dozi si no mangila yaʼo ba no göi iʼila Nama.”​—Yohane 14:7-9.

¹⁶ Baero daʼö, tola ’taʼila Lowalangi’ na tarasoi wanolonia ba waʼaurida. (Yobi 42:5) Tola göi ’taʼila’ mazui taʼosambuaʼö dödöda ba ngawalö zahöli-höli dödö nifabuʼu Yehowa ba niha satulö tödö hegöi ba niha samosumange yaʼia si lö faröi. Niha nibayoini sindruhu-ndruhu tola laʼila Yehowa na tesusugi ira ba möi ira ba zorugo.​—1 Yohane 3:2.

TOLA TARASOI WAʼOMUSO DÖDÖ HEWAʼAE SO GABULA DÖDÖDA

17. Hana wa larasoi waʼomuso dödö niha sangaʼasogö faʼatulö?

¹⁷ Aefa daʼö imane Yesu, ”Yaʼahowu niha sangaʼasogö faʼatulö.” (Mataiʼo 5:9) Na taforege wangaʼasogö faʼatulö ba niha böʼö, tola tarasoi waʼomuso dödö. Imane Yakobo, ”Tanömö gamuata si sökhi lafazaewe ba waʼatulö ba niha sangaʼasogö faʼatulö.” (Yakobo 3:18) Andrö, na abua khömö wangokhögö faʼatulö ba niha si so ba mbanua niha Keriso mazui ba nösi nomomö, andrö wanolo khö Yehowa. Ibeʼe khömö gehehania Yehowa sanolo yaʼugö ba wangoromaʼö bua-bua niha Keriso hegöi ba worasoi faʼomuso dödö. Itutunö Yesu wa moguna sibai taʼofönaiʼö ita ba wangaʼasogö faʼatulö me imane, ”Andrö, na öʼohe zumange nibeʼeu ba naha wanunu sumange, ba itörö tödöu ba daʼö so zala dalifusöu khömö, röi nibeʼemö andrö ba naha wanunu sumange. Alui dalifusömö andrö, ba atulöʼö ua ndraʼugö khönia. Aefa daʼö, fuliʼö ba wameʼe sumange nibeʼeu.”​—Mataiʼo 5:23, 24.

18, 19. Hana wa tola larasoi waʼomuso dödö ira niha Keriso hewaʼae göna ira folohi?

¹⁸ ”Yaʼahowu ami na laʼoʼaya, lafakao, ba laböbögö khömi ngawalö zi lö duhu börö ndraʼo.” Hadia geluaha niwaʼö Yesu? Imane nasa, ”Simanö göi wamakao si göna ndra samaʼeleʼö me föna. Miʼomusoiʼö dödömi ba miʼowua-wuaʼö dödömi, me ebua luomi ba zorugo.” (Mataiʼo 5:11, 12) Me laböbözi ndra sinenge ba lafaretakö ira enaʼö labato wanuriaigö, ’mofanö ira föna Zangetuʼö Huku, omuso dödöra’. Tatu manö, lö omasi ira laböbözi. Hizaʼi, omuso dödöra ”börö me no sinangea laʼoʼaya ira” ba döi Yesu.​—Halöwö Zinenge 5:41.

¹⁹ Iadaʼa, anau gölö nono mbanua Yehowa si fao faʼomuso dödö ba ginötö göna ira folohi börö döi Yesu. (Baso Yakobo 1:2-4.) Simane ira sinenge, tatu lö omuso dödöda na göna ita famakao mazui folohi. Hizaʼi, na lö faröi ita khö Yehowa, ibeʼe khöda waʼabarani enaʼö anau gölöda. Angeragö zalua khö Henryk Dornik hegöi talifusönia matua. Me baŵa si Walu 1944, labeʼe ira ba kamp konsentrasi. Lamane ira samakao yaʼira, ”Tebai mafaso ira ba woloʼö zomasi dödöma. Omuso dödöra na mate ira börö wamatira.” Itutunö Henryk, ”Hewaʼae lö omasido mate börö wamatigu, omuso dödögu börö me tola utaögö wamakao si fao faʼabarani ba lö faröido khö Yehowa.” Imane nasa, ”Fangandrö soroi ba dödö zangahatöʼö yaʼo khö Yehowa, ba sindruhu-ndruhu tobali Sanolo ia khögu.”

20. Hana wa omuso dödöda ba wamosumange ”Lowalangi somuso tödö”?

²⁰ Na omuso dödö Yehowa khöda, ”Lowalangi somuso tödö”, tola tarasoi waʼomuso dödö hewaʼae göna ita folohi, lasaisi ita ösi nomoda, göna ita fökhö mazui itugu atua ita. (1 Timoteo 1:11) Tarasoi göi waʼomuso dödö börö me Lowalangi nifosumangeda si ”tebai falimo”, no ifabuʼu khöda ngawalö zahöli-höli dödö. (Tito 1:2) Na ifalua daʼö Yehowa, lö saʼae tatörö tödöda gabula dödö salua iadaʼa. Sindruhunia, tebai takhalaigö hewisa waʼohahau dödö ba faʼomuso dödö nirasoida ba Waradaiso! ’Owua-wua dödöda ba waʼafahöna wangorifi.’​—Zinunö 37:11.