”Ba Famoʼahonoa Dania Waʼanau Gölö Andrö”

1, 2. (a) Hadia wamahaʼö si tola tahalö ba waʼanau gölö Gideono hegöi si 300 ndra matua si fao khönia? (Faigi gambara ba wamobörö wamahaʼö.) (b) Moloʼö nisura ba Luka 21:19, hadia mbörö wa moguna so khöda waʼanau gölö?

KHALAIGÖ hewisa waʼafökhö hegöi faʼamarase ba wasuwöta nifalua zaradadu ndraono Gizaraʼeli ba wolawa nudura, nidöniaʼö Gideono samösa Zanguhuku. Gideono hegöi si fao khönia, lagohi ndraono Midiano hegöi soi si faʼawö khöra sara wongi waʼara, faʼaröunia mato 32 kilometer! Ifatunö Sura Niʼamoniʼö hadia zalua, ”Ba me no irugi Yoridano Gideono ba me no iʼötö, awö zi 300 andrö, si fao khönia, ba si no erege tödö.” Lö nasa si möna ira ba wasuwöta, so 15.000 zaradadu sinangea lalawa nasa. Ba zi haʼuga fakhe no tefakao ndraono Gizaraʼeli moroi ba nudura, andrö lö laböhöli wolohi nudura irege möna ira!​—Zanguhuku 7:22; 8:4, 10, 28.

² Simanö göi ita, tafalua wasuwöta safökhö ba si möi fangerege dödöda. Nududa yaʼia daʼö Satana, ulidanö tana khönia, ba falömoʼahonoada. So ba gotaluada zi no haʼuga fakhe molawa nudura. Tola möna ita börö wanolo moroi khö Yehowa. Hizaʼi, lö sawai nasa wasuwötada. Itaria erege dödöda wolawa yaʼia, mazui marase ita wombaseʼö faʼatekiko gulidanö si lö sökhi andre. Ifangelama ita Yesu wa göna ita fanandraigö hegöi folohi ba luo safuria andre. Hizaʼi, na anau gölöda, tola möna ita. (Baso Luka 21:19.) Hadia geluahania waʼanau gölö? Hadia zanolo yaʼita enaʼö anau gölöda? Hadia wamahaʼö si tola tahalö ba niha si so faʼanau gölö? Ba hewisa enaʼö ’moʼahonoa waʼanau gölöda’?​—Yakobo 1:4, NW.

HADIA GELUAHANIA WAʼANAU GÖLÖ?

3. Hadia geluahania waʼanau gölö?

³ Ba Zura Niʼamoniʼö, faʼanau gölö tenga ha ba wanaögö abula dödö, tobali hewisa lala wangera-ngerada hegöi tödöda sanandrösa ba wanandraigö salua andrö. Na so khöda waʼanau gölö, lö khöda faʼataʼu, lö faröi ita, ba so waʼebolo dödö. So zangumaʼö wa faʼanau gölö zi tola manolo yaʼita enaʼö aro dötönaföda ba lö awuwu ita na so wanandraigö. Hewaʼae göna ita fanandraigö sabölö-bölö, lö mangiwa dödöda. Lö taʼera-era sibai waʼafökhö wanandraigö salua khöda, hizaʼi tabeʼe ba duduma höröda howu-howu nitemada.

4. Hana wa tola tawaʼö na so khöda waʼomasi, so khöda waʼanau gölö?

⁴ Tola anau gölöda na so khöda waʼomasi. (Baso I Korindro 13:4, 7.) Hezo manö taforomaʼö ia? Na taʼomasiʼö Yehowa, tola tataögö fefu hadia ia nitehegönia. (Luka 22:41, 42) Na taʼomasiʼö ndra talifusöda, tenga falömoʼahonoara nifaigida. (I Fetero 4:8) Ba wongambatö, so ”wamakao” hewaʼae so waʼohahau dödö yomo ba nomo. Hizaʼi, na so khöda waʼomasi, tola anau gölöda ba wanaögö famakao ba aro wongambatöda.​—I Korindro 7:28.

HADIA ZANOLO YAʼITA ENAʼÖ ANAU GÖLÖDA?

5. Hana wa ha Yehowa zanolo yaʼita enaʼö so khöda waʼanau gölö?

⁵ Andrö wanolo moroi khö Yehowa. Yehowa andrö ”Lowalangi waʼebolo dödö, Lowalangi wondrara dödö”. (Roma 15:5) Ha yaʼia zangila fefu hadia ia zalua khöda, hegöi nösi dödöda. Ibeʼe khöda wanolo enaʼö anau gölöda. Imane Sura Niʼamoniʼö, ”Iʼoʼö zomasi zangataʼufi yaʼia, ifondro-ndrongo weʼaora ba itolo.” (Zinunö 145:19) Hizaʼi, hewisa wanema Lowalangi wangandröda enaʼö so khöda waʼanau gölö?

6. Simane si no ifabuʼu ba Zura Niʼamoniʼö, hewisa wa ”ifaigi [Yehowa] göi waʼawai” ba wanandraigö salua khöda?

⁶ Ba ginötö taʼandrö wanolo moroi khö Yehowa enaʼö anau gölöda, ifabuʼu khöda wa ”ifaigi göi waʼawai”. (Baso I Korindro 10:13.) Hewisa wamaluania daʼö? Na inötönia, iheta wanandraigö andrö. Hizaʼi, sasesenia ibeʼe khöda waʼabölö ’enaʼö aʼoi so khöda wanaha tödö, awö waʼebolo dödö, ba enaʼö omuso dödöda’. (Kolose 1:11) Börö me iʼila Yehowa walömoʼahonoada, lö irai itehegö alua khöda wanandraigö si tebai tataögö irege faröi ita khönia.

7. Beʼe duma-duma hadia mbörö wa moguna khöda gö wamati enaʼö anau gölöda.

⁷ Ogunaʼö gö wamati enaʼö aro wamatiu. Hadia mbörö wa moguna gö wamati andrö? Duma-dumania, ba wanösö Hili Everest, iʼogunaʼö 6.000 kalori si samösa niha ero maʼökhö. Enaʼö anau gölö ba wanösö hili andrö, moguna oya iʼa gö si so kalori moroi ba zi toʼölö laʼogunaʼö niha. Simanö göi ita, moguna gö ba wamati enaʼö anau gölöda ba wogamö ohitö dödöda. Böi tebulö tabeʼe ginötöda ba wamahaʼö yaʼita samösa ba Zura Niʼamoniʼö hegöi weʼamöi ba gangowuloa. Daʼa zi tola manolo yaʼita enaʼö aro wamatida.​—Yohane 6:27.

8, 9. (a) Moloʼö Yobi 2:4, 5, hadia zi tefarahu na tetandraigö ita? (b) Ba ginötö so gabula dödö, hadia zinangea ökhalaigö?

⁸ Törö tödöu waʼalöfaröimö khö Lowalangi. Na göna ita fanandraigö, tefakao ita. Hizaʼi tenga ha daʼö, tetandraigö göi waʼalöfaröida khö Lowalangi. Oroma ba nifaluada hadia faduhu dödöda wa Yehowa Zamatörö banua si yawa awö danö na göna ita fanandraigö. Hewisa wa alua daʼa? Satana, nudu Lowalangi sodaʼawaini famatörönia, iböbögö zi lö duhu khö Yehowa, imane wa awena lafosumange Lowalangi niha börö me tana khöra niʼera-erara. Imane Satana, ”Fefu hadia ia, okhöta niha, ba ilulu, asala auri ia!” Imane nasa sanandrösa khö Yobi, ”Ba tema oroʼö dangau, babaya nösinia, ba lö zi lö ikaoni ba mbawau, wa iʼerogö ndraʼugö!” (Yobi 2:4, 5) Hadia no tebulö Zatana iʼotarai me iböbögö zi lö duhu andrö? Löʼö! Haʼuga fakhe aefa daʼö, me tetiboʼö ia moroi ba zorugo, lö aetu ifobahulu nono mbanua Lowalangi si lö faröi. (Famaʼeleʼö 12:10) Ba ginötö andre, ifobahulu niha Satana wa lafosumange Lowalangi börö me ha tana khöra niʼera-erara. Omasi sibai ia iʼila na tatimbagö wamatörö Lowalangi ba tabato wangai halöwönia.

⁹ Ba ginötö tefakao ndraʼugö, khalaigö daʼa. So Zatana faoma bekhu ba zingau. Lafaigi-faigi hadia nifaluau ba laböbögö zi lö duhu wa hasambalö awuwu ndraʼugö. Ba zi tambai göi so Yehowa, so Razoda Yesu Keriso, ngahönö ndra malaʼika hegöi niha si no tebayoini si no tesusugi ba zorugo. Lafaigi-faigi göi ndraʼugö ba wanaögö famakao andre, hizaʼi labeʼe khöu wamarou dödö! Omuso dödöra na laʼila so khöu waʼanau gölö hegöi falöfaröi khö Yehowa. Örongo me imane Yehowa khöu, ”Yaʼatua-tua ndraʼugö, yaʼugö onogu; omusoiʼö dödögu, enaʼö uʼila ubuʼa, na so zanandrawaisi yaʼodo.”​—Gamaedola 27:11.

10. Hewisa enaʼö tola öʼoʼö waʼanau gölö Yesu?

¹⁰ Angeraigö mbuania. Khalaigö atö na mofanöʼö ba zaröu. Ötörö dögi narö hili ba no ogömi-gömi lala nitöröu. Hizaʼi, aboto ba dödöu wa tola öʼila zi haga na lö öböhöli wanörö yaʼia. Simanö göi ba waʼauri andre, oya gabula dödö nitaögöu irege marase ndraʼugö ba wanaögö yaʼia. No irasoi Yesu zimane daʼö. Me tefakao ia ba döla geu, laʼoʼaya ia ba irasoi waʼafökhö. Tola manö daʼa ginötö sabölö afökhö ba waʼaurinia! Hana wa tola anau gölönia? Imane Sura Niʼamoniʼö wa idöna-döna ”waʼomuso dödö andrö, si no so fönania”. (Heberaiʼo 12:2, 3) Lö mangoloi dödö Yesu ba wamaigi buala nibeʼe khönia börö me lö faröi ia ba woʼamoniʼö töi Lowalangi hegöi ba wotuhini famatörönia. Aboto ba dödönia wa ha sabata wamakao nitaögönia andre ba hasambalö itema luonia ba zorugo irugi zi lö aetu. Iadaʼa, te oya göna khöu wanandraigö si tebai ötaögö, hizaʼi böi olifuʼö wa fefu zalua daʼa ha ba zi sabata.

”NIHA SANAU ÖLÖ”

11. Hana wa moguna taʼangeraigö duma-duma moroi ba ”niha sanau ölö”?

¹¹ Tenga ha yaʼita zanaögö abula dödö. So niwaʼö Wetero ba niha Keriso enaʼö tola lataögö wamakao moroi khö Zatana. Imane, ”Daʼö mitimba, miʼabeʼeʼö ami, ba wamati, me no miʼila, simanö göi wamakao, sanörö talifusömi andrö, ba niha ba gulidanö.” (I Fetero 5:9) Salua moroi ba ”niha sanau ölö” tola tobali famahaʼö khöda enaʼö lö faröi ita. Faduhu dödöda wa tola tataögö fefu hadia ia, ba böi olifu ita wa tatema mbua na anau gölöda. (Yakobo 5:11, NW) Datafaigi duma-dumania.^[1]—Faigi gonönöta.

12. Hadia wamahaʼö khöda moroi ba duma-duma ndra kerubi nifataro ba kabu Edena?

¹² Kerubi yaʼia daʼö malaʼika si so dadaoma salawa. Me no aefa lafalua horö Adamo ba Khawa, ifatenge kerubi Yehowa ba wangai halöwö si bohou ba gulidanö. Faböʼö sibai halöwöra andre moroi ba zi toʼölö lafalua ba zorugo. Duma-dumara andre tola tobali famahaʼö khöda enaʼö anau gölöda na so halöwö sabua nibeʼe khöda. Imane Sura Niʼamoniʼö wa ”ifataro kerubi [Yehowa] föna kabu Edena, tanö ba gatumbukha luo khönia, kerubi si so föda si takile, nifaligoi, ba wanaro lala ba geu fangorifi andrö”.^[2] (Faigi gonönöta.) (I Moze 3:24) Lö si tesura ba Zura Niʼamoniʼö wa mokökö ndra kerubi mazui lamane tödöra wa yaʼira zinangea nifatenge ba halöwö si bohou andrö. Lö aföli mazui awuwu ira. Töra 1.600 fakhe lö tebulö lahalö halöwö andrö irugi awai, te me Anönö Danö Idanö!

13. Hewisa wa tola anau gölö Yobi ba wanaögö fanandraigö?

¹³ Yobi niha si lö faröi. Itaria afökhö dödöu börö wehede nawöu mazui soroi yomou. Tola manö göna khöu wökhö sabölö-bölö mazui abula dödö börö me mate niha niʼomasiʼöu. Hewaʼae oya ngawalö zalua, tola ösöndra wondrara dödö moroi ba duma-duma Yobi. (Yobi 1:18, 19; 2:7, 9; 19:1-3) Lö aboto ba dödö Yobi hana wa iʼozumaigö göna ia ngawalö wanandraigö, hizaʼi lö irai awuwu ia. Hana wa tola anau gölönia? Si oföna sibai, börö me iʼomasiʼö Yehowa ba lö omasi iʼafökhöiʼö dödö Yehowa. (Yobi 1:1) Omasi Yobi wangomusoiʼö dödö Lowalangi, he ba waʼomuso dödö mazui ba ginötö so gabula dödö. Iforomaʼö göi waʼabölönia Yehowa, ifatunö khö Yobi fefu zahöli-höli dödö moroi ba zi no iwöwöi. Ba daʼa tola faduhu dödö Yobi wa iheta wanandraigö andrö Yehowa ba ginötö si tefaudu. (Yobi 42:1, 2) Daʼö zalua, ”Ba ifadöhö wamakao Yobi andrö Yehowa, . . . ifabali saʼae khö Yobi fefu zi so khönia föna.” Ba ”no atua sibai ia ba me no aföli ia waʼauri”.​—Yobi 42:10, 17.

14. Moloʼö II Korindro 1:6, hewisa wa tola möi fanolo niha tanö böʼö waʼanau gölö Waulo?

¹⁴ Faulo, samösa sinenge. Hadia göna ndraʼugö folohi mazui famakao? Hadia abu dödöu börö me oya halöwö nibeʼe khöu me no tobali ndraʼugö satua sokubaloi mazui pengawas wilayah? Na simanö, tola tetolo ndraʼugö na öfaigi duma-duma Waulo. Hewaʼae abölö-bölö wamakao salua khönia, hizaʼi so so dödönia ndra talifusö si so ba mbanua niha Keriso. (II Korindro 11:23-29) Duma-dumania andre zamarou tödö niha böʼö börö me lö awuwu ia ba wamati. (Baso II Korindro 1:6.) Simanö göi na anau gölöu, tola möi famarou dödö niha böʼö.

HADIA ’MOʼAHONOA WAʼANAU GÖLÖ ANDRÖ’ KHÖU?

15, 16. (a) Hewisa wa tola moʼahonoa waʼanau gölö andrö khöda? (b) Beʼe duma-duma hewisa wa ’moʼahonoa waʼanau gölö andrö’.

¹⁵ Tebeʼe geheha khö Yakobo ba wanura daʼa, ”Ba famoʼahonoa dania waʼanau gölö andrö, enaʼö moʼahonoa ami, si lö sala, ba böi ambö hadia ia.” (Yakobo 1:4, NW) Hewisa wa tola moʼahonoa waʼanau gölöda? Na göna ita fanandraigö, moguna so khöda waʼebolo dödö, fangandrö saohagölö, mazui faʼomasi. Na anau gölöda ba wanaögö fefu hadia zalua andre, tola tafahaʼö ita enaʼö itugu taforomaʼö nasa gamuata andrö, ba taʼaʼazökhi mbua-bua waʼaniha Keriso.

¹⁶ Na so khöda waʼanau gölö tola tobali ita niha Keriso si sökhi. Lö tasawö goroisa Yehowa ha enaʼö tola aefa ita moroi ba wanandraigö. Duma-dumania, na öforege wolawa wangera-ngerau si lö sökhi ba wamalua amuata fohorö, böi awuwu ndraʼugö! Andrö wanolo moroi khö Yehowa enaʼö tola ötimbagö wangera-ngera si lö sökhi andrö. Hadia so nösi nomou zolohi yaʼugö? Böi awuwu ndraʼugö! Böi aetu öhalö halöwö Yehowa. Buania, itugu aro waʼafaduhu dödöu khö Yehowa. Törö tödöu, enaʼö iʼomasiʼö ita Lowalangi, moguna anau gölöda.​—Roma 5:3-5; Yakobo 1:12.

17, 18. (a) Beʼe duma-duma hana wa moguna so khöda waʼanau gölö irugi gamozua. (b) Börö me no ahatö ginötö, hadia zi tola faduhu dödöda?

¹⁷ Moguna anau gölöda irugi gamozua, tenga ha moʼinötö. Khalaigö atö na so göfa sahöndrö. Niha si so yawa ba göfa moguna molangi ira irugi mbewe nasi enaʼö tola teʼorifi ira. Na so zomböhöli ba wolangi, tola ahöndrö ia ba mate. Simanö göi ita, na lö khöda faʼanau gölö irugi gamozua tola mate ita. Na omasi ita auri ba gulidanö si bohou, moguna anau gölöda. Yafao dödöda ba wehede Waulo me iwaʼö, ”Lö maʼila waʼataʼu.”​—II Korindro 4:1, 16.

¹⁸ Simane Faulo, faduhu dödöda wa hasambalö itolo ita Yehowa na so khöda waʼanau gölö irugi gamozua. Imane Faulo, ”Ba möna sibai ita, ibeʼe si no mangomasiʼö yaʼita. Noa sa faduhu dödögu, he faʼamate, ba he faʼauri, he malaʼika, ba he samatörö, he si so iadaʼe, ba he si so dania, he sabölö, ba he faʼalawa ba he faʼabakha, ba he hadia ia mböʼönia nifazökhi Lowalangi, ba lö iʼila ifabali ita ba waʼomasi Lowalangi andrö ita, ba khö Keriso Yesu, Soʼaya yaʼita.” (Roma 8:37-39) Atulö sa wa itaria erege dödöda. Hizaʼi, dataʼoʼö Gideono hegöi niha si fao khönia. Hewaʼae erege dödöra, lö awuwu ira ba ”wolohi [emali andrö]”.​—Zanguhuku 8:4.