Fanolo Nibeʼe Yehowa Enaʼö Anau Gölöda

1. Hadia mbörö wa abua khöda wangoromaʼö faʼanau gölö, ba haniha zanolo yaʼita? (1 Fetero 5:10)

BA GINÖTÖ safuria sabua fanaögö andre, moguna sibai waʼanau gölö ba nono mbanua Yehowa. So zi göna abula dödö börö wökhö si lö iʼila döhö. So zabu tödö börö me no mate nösi nomora mazui si fahuwu khöra. So göi zabu tödö börö wolohi moroi ba nösi nomora mazui ira samatörö. (Mat. 10:​18, 36, 37) Hewaʼae simanö, gofu hadia gabula dödö salua khöu, yafaduhu dödöu wa itolo ndraʼugö Yehowa enaʼö anau gölöu.—Baso 1 Fetero 5:10.

2. Hadia zanolo yaʼita enaʼö anau gölöda?

² Niha sanau ölö yaʼia daʼö niha si lö faröi ba wamosumange Yehowa ba lö aetu dötönafönia hewaʼae göna ia abula dödö, famakao mazui fondrönisi dödö ba zi lö sökhi. Sindruhu sa wa lö anau gölöda na taʼodaligö waʼabölöda samösa. Tola tafalua daʼö börö me Yehowa zameʼe khöda ’faʼabölö sahöli-höli dödö’. (2 Ko. 4:7) Ba artikel daʼa dania, tatutunö öfa ngawalö wanolo nihenaigö Yehowa enaʼö anau gölöda ba hadia zinangea tafalua enaʼö so mbuania khöda.

FANGANDRÖ

3. Hadia mbörö wa tola tawaʼö fangandrö no buala sahöli-höli dödö?

³ Enaʼö anau gölöda, no itatugöi Yehowa enaʼö tola fahuhuo ita khönia hewaʼae niha sebua horö ita. (Heb. 4:16) Khalaigö me tola mangandrö ita khönia gofu hawaʼara ba gofu hezo, hewaʼae ba gurunga so ita mazui ba wondrege danö. (Yon. 2:​1, 2; Hal. 16:​25, 26) Tola tatutunö khönia nösi dödöda gofu hadia li niʼogunaʼöda. Mendrua manö na aombö dödöda irege lö taʼila hadia niwaʼöda khönia ba wangandrö, hasambalö aboto ba dödö Yehowa hadia nösi dödöda. (Rom. 8:​26, 27) Sindruhu-ndruhu wa fangandrö andre buala sahöli-höli dödö!

4. Hadia mbörö wa tefaudu ba gohitö dödö Yehowa na taʼandrö waʼanau gölö?

⁴ Ifaduhuʼö khöda Yehowa wa ”ifondrondrongo gofu hadia ia niʼandröda si faudu ba zomasi ia”. (1 Yo. 5:14) Hadia tola taʼandrö khö Yehowa enaʼö ibeʼe khöda waʼanau gölö? Tola, börö me tefaudu daʼö ba gohitö dödönia. Na anau gölöda ba wanaögö abula dödö, iʼila ibeʼe wanema li Yehowa khö Zatana, samobahulu yaʼia. (Amd. 27:11) Ifatunö göi khöda Sura Niʼamoniʼö wa omasi sibai Yehowa ba ’wangoromaʼö faʼabölönia salahi niha samosumange yaʼia soroi ba dödö’. (2 Ng. 16:9) Börö daʼö, faduhu dödöda wa so waʼabölö khö Yehowa ba omasi ia itolo ita enaʼö anau gölöda.—Yes. 30:18; 41:10; Luk. 11:13.

5. Hadia mbörö wa tola tobali fanoloda wangandrö irege tarasoi waʼahono dödö? (Yesaya 26:3)

⁵ Ifatunö khöda Sura Niʼamoniʼö na mangandrö ita khö Yehowa soroi ba dödö, tola ’irorogö dödöda awö gera-erada faʼohahau dödö andrö khö Lowalangi, sabölö moroi ba gera-era niha fefu’. (Fil. 4:7) Tatu taʼandrö sibai saohagölö ba daʼö. Khalaigö hewisa niha si lö mamosumange Yehowa. Na göna ira abula dödö, oya latandraigö wangalui lala enaʼö lasöndra waʼahono dödö. Hewaʼae simanö, lö eluaha daʼö na tafaedogö ia ba waʼomuso dödö nitemada moroi khö Lowalangi ba wangandrö. Na mangandrö ita khö Yehowa, no taforomaʼö wa sindruhu-ndruhu taʼodaligö ia. Börö daʼö, ’lö tebulö ibeʼe khöda waʼohahau dödö’. (Baso Yesaya 26:3.) Sambua lala nifaluania yaʼia daʼö, ifasugi ba dödöda ayati si möi fondrara dödöda. Daʼö zameʼe khöda faʼafaduhu dödö wa iʼameʼegö tödö ba iʼomasiʼö sibai ita Yehowa. Tarasoi waʼahono dödö ba fangera-ngera satulö.—Si. 62:​1, 2.

6. Hadia manö zi tola taʼangandröi? (Faigi göi gambara.)

⁶ Si tola öfalua. Na göna ndraʼugö abula dödö, ”touʼö khö Yehowa noro dödöu” ba angandrö enaʼö so khöu waʼahono dödö. (Si. 55:22) Tola göi öʼandrö waʼatua-tua enaʼö öʼila hadia zinangea öfalua. (Amd. 2:​10, 11) Baero daʼö, böi olifu ndraʼugö ba wangandrö saohagölö khö Yehowa. Törö tödöu hadia manö howu-howu nibeʼe Yehowa khöu ero maʼökhö, ba andrö saohagölö ba daʼö. (Fil. 4:6) Böi ha börö-börö gabula dödö salua khöu, olifu ndraʼugö howu-howu si no ötema.—Si. 16:​5, 6.

SURA NIʼAMONIʼÖ

7. Hadia mbörö wa möi fanoloda enaʼö anau gölöda na tafahaʼö ita ba Zura Niʼamoniʼö?

⁷ No ibeʼe khöda Zura Niʼamoniʼö Yehowa si tobali fanolo enaʼö anau gölöda. Ba Zura Niʼamoniʼö, oya sibai ayati sameʼe khöda faʼafaduhu dödö wa hasambalö itolo ita Yehowa. Duma-dumania, imane ba Mataiʼo 6:​8, ”Aboto ba dödö Namami hadia zoguna khömi, fatua lö niʼandrömi.” Yesu zangumaʼö fehede daʼö, ba ha yaʼia zabölö mangila Yehowa. Daʼö mbörö wa itörö fefu niwaʼönia sanandrösa khö Yehowa. Börö daʼö, tola tafaduhusi tödö wa hasambalö itolo ita Yehowa ba ibönökhi zoguna khöda na göna ita abula dödö. Sindruhu wa oya sibai ayati ba Zura Niʼamoniʼö samarou tödöda enaʼö anau gölöda.—Si. 94:19.

8. (a) Beʼe sambua duma-duma mene-mene Zura Niʼamoniʼö sanolo yaʼita enaʼö anau gölöda. (b) Hadia zanolo yaʼita enaʼö alio itörö tödöda mene-mene Zura Niʼamoniʼö ba ginötö moguna khöda?

⁸ So mene-mene Zura Niʼamoniʼö sameʼe khöda faʼatua-tua ba wangai angetula si sökhi. Na tafalua daʼö, tola anau gölöda. (Amd. 2:​6, 7) Duma-dumania, iʼamenesi ita Sura Niʼamoniʼö enaʼö taʼodaligö Yehowa ero maʼökhö ba böi talafo aombö dödöda ba ngawalö zi lö salua nasa. (Mat. 6:34) Na toʼölö ita wombaso hegöi ba woʼangerönusi Sura Niʼamoniʼö, alio itörö tödöda mene-mene Zura Niʼamoniʼö ba ginötö moguna khöda.

9. Hewisa waö-waö niha nitutunö ba Zura Niʼamoniʼö tobali fondrouʼö waʼafaduhu dödöda wa hasambalö itolo ita Yehowa?

⁹ Ifatunö khöda Sura Niʼamoniʼö waö-waö niha sangodaligö Yehowa ba si no manema fanolo moroi khönia. Yaʼira niha si toʼölö manö simane yaʼita. (Heb. 11:​32-34; Yak. 5:17) Na taʼangerönusi waö-waö waʼaurira, itugu aro waʼafaduhu dödöda wa ”nahia folumöʼö khöda [Yehowa] ba faʼabölöda, lö tebulö wanolonia na göna ita faʼatosasa”. (Si. 46:1) Na taʼangerönusi hewisa wangoromaʼöra famati ba faʼalöfaröi ba wamosumange Yehowa hewaʼae göna ira abula dödö, tola tefarou dödöda ba woloʼö famati hegöi faʼanau gölöra.—Yak. 5:​10, 11.

10. Enaʼö oya mbua nitemada moroi ba Zura Niʼamoniʼö, hadia zinangea tafalua?

¹⁰ Si tola öfalua. Baso Zura Niʼamoniʼö ero maʼökhö ba sura hadia manö ayati si tola manolo yaʼugö. Baero daʼö, ato zorasoi bua si sökhi ba wombaso ayati Zura Niʼamoniʼö ero sihulö wongi. Daʼa zanolo yaʼira ba wangokhögö fangera-ngera si sökhi ba zi maʼökhö daʼö. Daʼö nirasoi dalifusöda ira alawe sotöi Mariea me göna fökhö kanker ndra satuania. Hadia zanolo yaʼia irege anau gölönia ba wondrorogö ira satuania si darua andrö ofeta mate? Imane Marie, ”Ero sihulö wongi, ubaso ba uʼangerönusi ayat harian. Börö me toʼölö ufalua daʼa, tola teʼosambuaʼö dödögu khö Yehowa hegöi ngawalö zi sökhi nifahaʼönia yaʼo. Buania, lö talafo uʼabusi tödö zalua khögu.”—Si. 61:2.

IRA TALIFUSÖ SI SARA LALA WAMATI

11. Hadia mbörö wa tola anau gölöda na taʼila wa tenga ha yaʼi-yaʼita?

¹¹ No ihenaigö khöda ndra talifusö si sara lala wamati Yehowa sanolo yaʼita enaʼö anau gölöda. Ba ginötö taʼila wa ’fefu dalifusöda si sara lala wamati ba zi sagörö ulidanö, latörö göi wamakao simane nitaögöda’, aboto ba dödöda wa tenga ha yaʼi-yaʼita. (1 Fe. 5:9) Gofu hadia gabula dödö salua khöda iadaʼa, faduhu dödöda wa so göi ndra talifusöda sanaögö abula dödö simane daʼö ba anau gölöra. Börö daʼö, tola göi anau gölöda!—Hal. 14:22.

12. Hewisa enaʼö faoma tatolo nawöda? (2 Korindro 1:​3, 4)

¹² Tola göi latolo ita ira talifusöda moroi ba wehede hegöi nifaluara irege anau gölöda. No irai irasoi zimane daʼö Faulo. Me tobali ia niha nikuru ba nomo, ato sibai ndra talifusö zameʼe khönia fondrara dödö, samarou tödönia ba sanolo yaʼia. Me ifaʼoheʼö zurania Faulo, itötöi döira ero samösa-mösa, tandra wa iʼandrö sibai saohagölö ba wanolo nibeʼera. (Fil. 2:​25, 29, 30; Kol. 4:​10, 11) Iadaʼa, tola göi labeʼe khöda wondrara dödö ira talifusöda ba latolo ita enaʼö anau gölöda ba ginötö göna ita abula dödö. Ba na moguna göi khöra wanolo, datafaʼanö ita ba wanolo yaʼira.—Baso 2 Korindro 1:​3, 4.

13. Hadia zanolo talifusöda Maya irege anau gölönia?

¹³ Nehegö zalua khö dalifusöda Maya si toröi ba Rusia, si no morasoi famarou dödö moroi khö ndra talifusö si sara lala wamati. Me döfi 2020, lafareso nomonia ira folisi ba laʼohe ia ba gödo zanguhuku börö me ifalua halöwö fanuriaigö. Imane talifusöda Maya, ”Ba ginötö erege dödögu woʼangeragö salua khögu, latelefo ndraʼo ira talifusöda ba lafaʼoheʼö khögu zura. Lafaduhuʼö khögu wa laʼomasiʼö ndraʼo. . . . Aboto ba dödögu wa so nösi nomogu ba wamati sangomasiʼö yaʼo. Hizaʼi, itugu faduhu dödögu ba daʼö iʼotarai me döfi 2020.”

14. Hadia zinangea tafalua enaʼö tola tatema wanolo moroi khö ndra talifusöda? (Faigi göi gambara.)

¹⁴ Si tola öfalua. Böi fandröndröu ndraʼugö khö ndra talifusöda ba böi alawö ndraʼugö wangandrö fanolo khö ndra satua sokubaloi. Yaʼira andrö, ”no amaedola zawatö moroi ba nangi, simane naha wolumöʼö ba deu laöhö”. (Yes. 32:2.) Hizaʼi, böi olifu ndraʼugö wa lataögö göi gabula dödö ira talifusöda tanö böʼö. Börö daʼö, moguna göi tatolo ira. Na tafalua daʼö, itugu omuso dödöda ba anau gölöda ba wanaögö abula dödö salua khöda.—Hal. 20:35.

TÖTÖNAFÖ BA ZI SO MIFÖNA

15. Hewisa dötönafö ba zi so miföna tobali fanolo khö Yesu hegöi khöda iadaʼa? (Heberaiʼo 12:2)

¹⁵ Enaʼö anau gölöda, no ibeʼe khöda dötönafö saro Yehowa si lö tola löʼö alua. (Rom. 15:13) Nehegö hewisa dötönafö tobali fanolo khö Yesu irege anau gölönia ba wanaögö inötö si basaki me so ia ba gulidanö. (Baso Heberaiʼo 12:2.) Aboto ba dödö Yesu wa fao ia ba wangamoniʼö töi Namania na lö faröi ia. Idöna-döna göi hawaʼara mangawuli ia khö Namania ba tobali ia razo si fao ira talifusönia nibayoini. Simane daʼö göi dötönafö faʼauri sagötö faʼara ba gulidanö si bohou, tola möi fanoloda ba wanaögö abula dödö salua khöda ba gulidanö Zatana andre.

16. Hewisa dötönafö möi fanolo dalifusöda Alla irege anau gölönia, ba hadia wamahaʼönia khöda?

¹⁶ Nehegö hewisa dötönafö möi fanolo dalifusöda Alla si toröi ba Rusia. Laraʼu ndrongania ba labeʼe ba gurunga. Me alua daʼö imane Alla, ”Börö me ulau mangandrö ba uʼangerönusi dötönafö niʼokhögöda, lö talafo ide-ide sibai dödögu. Uʼila wa salua andre tenga amozua ba ngawalö hadia ia. Hasambalö wa si möna Yehowa, ba simanö göi ita.”

17. Hewisa wangoromaʼöda wa taʼameʼegö tödö dötönafö nibeʼe Yehowa? (Faigi göi gambara.)

¹⁷ Si tola öfalua. Haogö angeragö mbuʼusa li Yehowa sahöli-höli dödö sanandrösa ba zi so miföna. Khalaigö hewisa waʼaurimö dania ba gulidanö si bohou hegöi howu-howu nitemamö. Na öfalua daʼö, aboto ba dödöu wa gofu hadia gabula dödö salua khöu iadaʼa, ’lö abölö-bölö ba lö arara’. (2 Ko. 4:17) Baero daʼö, tutunö ba niha böʼö dötönafö niʼokhögömö. Khalaigö atö: Oya sibai gabula dödö nitaögö niha si lö mamosumange Yehowa ba lö laʼila hadia dötönafö nifabuʼu Yehowa ba zi so miföna. Börö daʼö, na ötutunö khöra sanandrösa ba dötönafö andrö hewaʼae lö arara, tola manö adöni dödöra ba omasi ira laʼila danö böʼönia.

18. Hadia mbörö wa faduhu dödöda ba zi no ifabuʼu Yehowa?

¹⁸ Me no mofozu Yobi ba wanaögö fefu wamakao salua khönia, imane khö Yehowa, ”Awena aboto ba dödögu iadaʼa wa tola öfalua fefu hadia ia, ba lö zi lö öfalua zi no öʼera-era.” (Yob. 42:2) Ifahaʼö ia Yobi wa hasambalö alua fefu zi no ifabuʼu Yehowa. Na lö olifu ita daʼö, tola anau gölöda. Duma-dumania simane daʼa: So samösa ndra alawe si no ara tefakao börö wökhö salua khönia. No ato iʼondrasi doto, hizaʼi lö hadöi si tola mamadöhö fökhönia. Daʼö mbörö wa afatö sibai dödönia. Samuza maʼökhö, falukha ia khö zi samösa doto sonekhe ba si tola mufaduhusi tödö. Iʼila doto andrö hadia wökhönia hegöi lala ba wamadöhö yaʼia. Ohahau sibai dödö ndra alawe daʼö hewaʼae lö iʼanemaiʼö döhö ia. Tola anau gölönia börö me so dötönafönia wa hasambalö döhö ia. Simane daʼö göi, tola tarorogö waʼanau gölöda börö me taʼila wa hasambalö alua nifabuʼu Yehowa sanandrösa ba Waradaiso.

19. Hewisa lalania enaʼö anau gölöda?

¹⁹ Simane si no tatutunö, tola anau gölöda börö me no ibeʼe khöda wanolo Yehowa, yaʼia daʼö fangandrö, Sura Niʼamoniʼö, ira talifusöda si sara lala wamati, hegöi tötönafö. Na tahaogö taʼogunaʼö fefu wanolo nibeʼe Yehowa, hasambalö itolo ita ba wanaögö abula dödö salua khöda irege tehori dania gulidanö nifatörö Zatana andre.—Fil. 4:13.