Hadia Möi Famolakhömi Lowalangi Lala Wonukhamö?

1, 2. Hadia mbörö wa laʼokhögö goi-goi lala wonukha si sökhi ira Samaduhuʼö Yehowa? (Faigi gambara ba wamobörö wamahaʼö.)

SAMBUA koran ba Belanda itutunö lala wonukha ira sondröniaʼö ba gereja ba gangowuloara. Imane, ”Ato zamake nukha si lö taʼio, guʼi sadogo-dogo, mendrua manö na aukhu zino.” Hizaʼi, isura göi koran daʼö wa tenga simanö lala wonukha ndra Samaduhuʼö Yehowa na so ira ba kebaktian. Itutunö wa iraono matua hegöi ira matua laʼogunaʼö jas hegöi dalilehe. Iraono alawe hegöi ira alawe laʼogunaʼö guʼi saganau maʼifu hizaʼi si bohou modenia. Asese lasuno ndra Samaduhuʼö Yehowa börö lala wonukhara. Iwaʼö Waulo wa lala wonukha niha Keriso ”yafao waʼaila ba faʼamoadu” si tefaudu khö nono mbanua Lowalangi. (I Tim. 2:9, 10) Hewaʼae khö ndra alawe iwaʼö daʼa Waulo, moguna göi daʼö ba ndra matua niha Keriso.

² Moguna goi-goi lala wonukha si sökhi khöda, ono mbanua Yehowa. Ba moguna göi daʼö khö Lowalangi nifosumangeda. (I Moz. 3:21) Itutunö Sura Niʼamoniʼö wa Yehowa, Samatörö banua si yawa awö danö, iʼokhögö goi-goi sanandrösa ba lala wonukha nono mbanuania. Andrö, ba ginötö tafili nukha, moguna böi ha ba zomasi ita, hizaʼi sabölö moguna khö Yehowa, Lowalangida Fondrege Zalawa.

3. Hadia wamahaʼö si tola tahalö sanandrösa ba lala wonukha moroi ba Goroisa Lowalangi khö ndraono Gizaraʼeli?

³ Ba Goroisa Moze so goi-goi zolumöʼö ndraono Gizaraʼeli moroi ba lala waʼauri soi böʼö si fahatö khöra samalua gamuata fohorö. Iforomaʼö Goroisa andrö wa lö omasi Yehowa lala wonukha si lö mangoromaʼö hezoso ndra matua ba ira alawe. Iadaʼa, lala wonukha simane daʼö lafotöi ia lala wonukha unisex. (Baso V Moze 22:5.) Moroi ba Goroisa andrö, taʼila wa lö omasi Yehowa lala wonukha ndra matua hulö simane ndra alawe hegöi lala wonukha ndra alawe simane ira matua, mazui lala wonukha zameʼe abua wamaböʼöni hezoso ndra matua ba ira alawe.

4. Hadia zanolo niha Keriso ba wangai angetula si sökhi sanandrösa ba lala wonukha?

⁴ Tola itolo ita goi-goi Zura Niʼamoniʼö ba wangai angetula si sökhi sanandrösa ba lala wonukha. Goi-goi andre moguna ia gofu hezoso manö toröi ita, he baŵa deu hegöi baŵa lökhö, mazui si toʼölö laʼogunaʼö niha. Lö moguna khöda waö-waö hadia manö si tola laʼogunaʼö ba hadia zi tebai. Goi-goi Daromali niʼoʼöda, zanehegö yaʼita ba wamili samösa hadia zomasi ita. Datatutunö goi-goi Zura Niʼamoniʼö sanolo yaʼita wotatugöi ”hadia zi sökhi, hadia waʼomasinia [Lowalangi] ba hadia zoʼahonoa” ba ginötö tafili nukha niʼogunaʼöda.​—Rom. 12:1, 2.

”AMUATA GENONI LOWALANGI GAMUATAMA”

5, 6. Hadia lua-lua lala wonukhada ba niha böʼö?

⁵ Tebeʼe khö Waulo wanuturu lala ba wanura goi-goi zoguna si so ba II Korindro 6:4. (Baso.) Ato niha zotatugöi haniha ita sindruhunia moloʼö lala wonukhada hegöi wangehao mbotoda. (I Zam. 16:7) Börö me samosumange Lowalangi ita, lö taʼogunaʼö nukha ha ba zomasi dödöda. Na ta oʼö goi-goi Zura Niʼamoniʼö, tatimbagö wangogunaʼö nukha si no fadroli-droli, sanifi-nifi mazui sadogo-dogo. Eluahania, lö taʼogunaʼö nukha zangoromaʼö ösi mbotoda. Böi abu dödö niha mazui laholeʼö höröra ba wamaigi nukhada.

⁶ Na sökhi lala wonukhada, lö taʼunö, hegöi moadu, abölö laʼangenanöi ita niha böʼö tobali ono mbanua Yehowa, Lowalangi Fondrege Zalawa. Ba tola manö, omasi laʼila haniha Lowalangi nifosumangeda, abölö laʼangenanöi organisasida, hegöi omasi ira ba wamondro-ndrongo turia nifaʼemada, sangefaʼö waʼauri.

7, 8. Hawara si tohudenia abölö moguna taʼogunaʼö nukha soadu?

⁷ Moguna taʼogunaʼö nukha si möi famolakhömi Yehowa hegöi turia nifaʼemada, enaʼö tola tafosumange Lowalangi niʼamoniʼö, ira dalifusöda ba wamati hegöi niha zi fasui yaʼita. (Rom. 13:8-10) Abölö taʼangenanöi lala wonukhada na möi ita ba gangowuloa niha Keriso mazui ba wanuriaigö. Moguna taʼogunaʼö lala wonukha soadu si tefaudu ba niha samosumange Lowalangi (I Tim. 2:10) Tatu manö, lala wonukha si tola laʼogunaʼö ba zi sambua mbanua tola manö tebai laʼogunaʼö daʼö ba mbanua böʼö. Hewaʼa simanö, gofu hezoso manö toröi ita, böi irege tetutu dödö niha böʼö ba lala wonukhada börö me yaʼita Samaduhuʼö Yehowa.

⁸ Baso I Korindro 10:31. Ba ginötö möi ita ba kebaktian, moguna taʼogunaʼö nukha soadu hegöi si öna-öna. Böi tagoʼö lala wonukha si lö sökhi moroi ba gulidanö andre. Taʼogunaʼö lala wonukha si sökhi fatua lö mubörögö hegöi na no awai kebaktian, na so ita ba hotel hegöi ba ginötö kalua ita moroi ba daʼö. Na tafalua daʼö, lö aila ita ba wangumaʼö wa yaʼita andre Samaduhuʼö Yehowa, ba tola manuriaigö ita ero inötö.

9, 10. Hadia mbörö wa molua-lua Filifi 2:4 ba lala wonukhada?

⁹ Baso Filifi 2:4. Hadia mbörö wa moguna taʼangeraigö lua-lua lala wonukhada khö ndra talifusöda niha Keriso? Fanema linia, börö me laforege ono mbanua Lowalangi ba woloʼö mene-mene andre, ”Ba mibunu saʼae ndroto-ndroto andrö, si so ba gulidanö, fohorö, ba faʼaraʼiraʼiö, ba hokha.” (Kol. 3:2, 5) So dalifusöda si no mondröi gamuata fohorö, hizaʼi moguna laforege nasa ba wotimbagö gisö-isö si fasala. Na lö mangelama ita, lala wonukhada tola tobali daha-taha khöra ba woloʼö mene-mene Zura Niʼamoniʼö hegöi ba wolawa gisö-isö si fasala andrö. (I Kor. 6:9, 10) Tatu lö omasi ita ba wanaisi famorege si no lafalua. Hadia faduhu dödöu ba daʼö?

¹⁰ Ba ginötö so ita ba gotalua ndra talifusöda ba wamati, telumöʼö ita moroi ba niha somasi mamalua gamuata fohorö. Lala wonukhada tola möi fotuhini nahia si lö taʼunö andre, he na möi ita ba gangowuloa mazui ba nahia böʼö. Hewaʼae tola tafili samösa nukha niʼogunaʼöda, hizaʼi lala wonukhada sinangeania manolo niha ba wororogö fangera-ngera, fehede hegöi amuata si sökhi föna Lowalangi. (I Fet. 1:15, 16) Faʼomasi sindruhu andrö ”lö ilau zi lö moadu, lö iʼalui dana khönia”.​—I Kor. 13:4, 5.

NUKHA SI SÖKHI BA GINÖTÖ HEGÖI BA NAHIA SI TEFAUDU

11, 12. Hewisa Zangombakha 3:1, 17 möi fanolo khöda enaʼö itugu atua-tua?

¹¹ Ba ginötö lahalö gangetula ira ono mbanua Lowalangi ba ngawalö niʼonukhara, laʼila wa ”fefu hadia ia nitörö ba hadia ia nilau, ba noa sa ifakhoi ginötö”. (Zango. 3:1, 17) He baŵa lökhö, baŵa deu, salua ba zi fasui yaʼita mazui salua khöda samösa, tola molua-lua ba niʼonukhada. Hizaʼi, lö tebulö goi-goi Yehowa.​—Mal. 3:6.

¹² Ba mbanua saukhu zino, lö aoha ba wofili nukha si tefaudu hegöi soadu. Laʼangenanöi ita ira talifusöda ba wamati na taʼogunaʼö nukha si lö fadroli-droli mazui talafo ebua irege oroma nösi mbotoda. (Yob. 31:1) Simanö göi, moguna moadu nukhada ba ginötö so ita ba nahia wolangi mazui ba nasi. (Gamd. 11:2, 20) Hewaʼae ato zangogunaʼö baru wolangi si lö moadu, moguna taʼangeraigö wa hadia niʼonukhada möi famolakhömi Lowalangida niʼamoniʼö, Yehowa.

13. Hadia mbörö wa molua-lua mene-mene si so ba I Korindro 10:32, 33 ba gangetula nihalöda sanandrösa ba wonukha?

¹³ So goi-goi tanö böʼö sinangea tafatimbaisi si tola molua-lua ba lala wonukhada. Moguna mangelama ita enaʼö böi tatandrawaisi tödö side-ide niha böʼö. (Baso I Korindro 10:32, 33.) Böi taʼogunaʼö nukha sameʼe tetutu dödö ndra talifusöda ba wamati hegöi niha si tenga samosumange Yehowa. Isura Faulo, ”Dozi ita, taʼoʼö khö nawöda, enaʼö moguna khönia, enaʼö tedou-dou ba zi sökhi nawöda.” Imane nasa, ”Simanö sa göi Keriso, lö iʼomasiʼö ia.” (Rom. 15:2, 3) Simane nifalua Yesu, abölö moguna ba wamalua gohitö dödö Lowalangi hegöi ba wanolo niha böʼö moroi ba zomasi ita samösa. Andrö, böi taʼogunaʼö nukha sameʼe lö omasi niha ba wanema turia nifaʼemada hewaʼae omasi ita lala wonukha simane daʼö.

14. Hewisa zatua wamahaʼö iraonora ba wamolakhömi Lowalangi moroi ba lala wonukhara?

¹⁴ Satua si no tobali niha Keriso laʼokhögö halöwö ba wamahaʼö iraonora woloʼö goi-goi Zura Niʼamoniʼö. Duma-dumania, laʼameʼegö tödö lala wonukha hegöi fangehao mbotora samösa hegöi iraonora, irege möi fangomusoiʼö dödö Lowalangi. (Gamd. 22:6; 27:11) Hewisa zatua wamahaʼö iraonora ba wamosumange Lowalangi niʼamoniʼö hegöi goi-goinia? Moguna labeʼe duma-duma khö ndraonora. Moguna lafahaʼö ndraonora si fao faʼomasi hezoso laʼöli nukha soadu hegöi lala ba wamili yaʼia. Sinangeania, böi lafili iraono nukha ha ba zomasi dödöra. Hizaʼi, sabölö moguna yaʼia daʼö lafili nukha si möi famolakhömi Lowalangi nisalahinira, Yehowa.

YAʼATUA-TUA NDRAʼUGÖ BA WANGOGUNAʼÖ SI NO TETEHEGÖ KHÖMÖ

15. Hadia wanolo khöda ba wangai angetula si fao faʼatua-tua?

¹⁵ Sura Niʼamoniʼö tobali fanuturu lala soguna khöda ba wangai gangetula si fao faʼatua-tua si möi famolakhömi Lowalangi. Hewaʼae simanö, so zomasi dödöda göi. Mode somasi ita mazui nukha zi sagu khöda wowöli tola manö faböʼö ba niha böʼö. Hizaʼi, sinangeania sökhi nukha niʼogunaʼöda, lö taʼunö, moadu, si öna-öna, tefaudu ba zifasui yaʼita mazui fatema ba niha si so ba mbanua andrö.

16. Hadia mbörö wa tenga zaya-zaya gölö na sökhi lala wonukhada?

¹⁶ Lö aoha wangalui nukha si tefaudu hegöi soadu. Oya toko zamawa ha mode nukha somasi niha sato. Andrö, moguna oya ginötö niʼogunaʼöda hegöi taforege ba wangalui guʼi, nukha, baru, mazui ba wamili jas, hegöi sarewa soadu. Hizaʼi, lafaigi ba laʼangenanöi ita ira talifusöda ba wamati na taforege ba wangogunaʼö nukha soadu ba si sökhi wamaigi. Owua-wua dödöda börö me no tafolakhömi Namada ba zorugo safönu faʼomasi. Daʼa no sambua sumange sebua nibeʼeda enaʼö lala wonukhada möi famolakhöminia.

17. Hadia manö zinangea lafatimbaisi ira talifusöda ndra matua ba wangai gangetula ba wangokhögö gambi mazui rambe?

¹⁷ Hadia tefaudu na laʼogunaʼö gambi mazui rambe ira dalifusöda ira matua? Ba Goroisa Moze, fefu ndra matua lö tola löʼö laʼokhögö gambi mazui rambe. Hizaʼi, tenga barö Goroisa Moze so niha Keriso iadaʼa, ba lö moguna laʼoʼö daʼö. (III Moz. 19:27; 21:5; Gal. 3:24, 25) So ösa mbanua, lafosumange niha sangokhögö gambi mazui rambe, ba tola lö mangoloiʼö fangera-ngera niha ba duria nifaʼemada. Sindruhunia, so ösa dalifusöda sangai halöwö zangokhögö gambi mazui rambe. Hewaʼae simanö, so göi zi lö omasi mangokhögö daʼö. (I Kor. 8:9, 13; 10:32) Ba mbanua böʼö, lö ato niha zangokhögö gambi mazui rambe, ba tola manö lö moadu khö sanuriaigö niha Keriso si toröi ba daʼö. Tola manö, na so niha zangokhögö daʼö eluahania lö ifolakhömi Lowalangi hegöi ”mosinegu” ia.​—I Tim. 3:2, 7; Rom. 15:1-3.

18, 19. Hewisa Mikha 6:8 möi fanolo khöda?

¹⁸ Taʼandrö sibai saohagölö börö me lö ibeʼe khöda Yehowa waö-waö sanau sanandrösa hadia manö zi tola mazui si tebai ba wonukha hegöi ba wangehao mboto. Hizaʼi, itehegö khöda ba wangai angetula samösa, si teʼodane-dane moroi ba goi-goi Zura Niʼamoniʼö. Andrö, ba ginötö tahalö gangetula sanandrösa ba lala wonukhada mazui ba wangehao mboto, moguna taforomaʼö wa yaʼita andre samosumange Lowalangi.​—Mi. 6:8.

¹⁹ Si fao fangide-ngideʼö tawaʼö wa Yehowa no niʼamoniʼö, sohau-hau, ba goi-goinia no tobali fanuturu lala sabölö sökhi khöda. Na omasi ita öna-öna waʼaurida ba taʼokhögö wangide-ngideʼö, tatu tafalua goi-goinia andrö ba waʼaurida. Na tafalua simanö daʼö, daʼö zanolo yaʼita ba woʼameʼegö tödö hadia niwaʼö niha böʼö hegöi hewisa dödöra.

20. Hadia lua-lua lala wonukha hegöi fangehao mbotoda ba niha böʼö?

²⁰ Sinangeania, lala wonukhada mangoromaʼö wa yaʼita ono mbanua Yehowa. Iʼokhögö Yehowa goi-goi salawa, ba taʼoʼö daʼö si fao faʼomuso dödö. Ato dalifusöda ba wamati sinangea lasuno börö lala wonukhara hegöi amuatara si sökhi irege tola adöni dödö niha satulö tödö ba wamondro-ndrongo turia fangefaʼö moroi ba Zura Niʼamoniʼö, ba lafosumange hegöi laʼomusoiʼö dödö Yehowa. Ba ginötö tahalö gangetula si fao faʼatua-tua sanandrösa ba wonukhada, lö aetu tafolakhömi Samösa ’salawa ba lakhömi nukhania’.​—Zin. 104:1, 2.