Oʼö Duma-duma Nibeʼe Zamabuʼu Faʼauri si lö Aetu

1. Hadia waʼatua-tua nibeʼe Yehowa khöda enaʼö tola taʼoʼö ia?

ME IFAZÖKHI ita Yehowa no ibeʼe khöda waʼatua-tua enaʼö tola taʼila hadia nirasoi nawöda, hewaʼae lö irai göna khöda hadia zi no alua khöra. (Baso Efeso 5:1, 2.) Hewisa wangogunaʼöda faʼatua-tua ba woloʼö khö Yehowa? Ba hadia mbörö wamoguna taʼangelamaisi wangogunaʼö Yaʼia?

2. Hewisa dödö Yehowa na göna ita abula dödö?

² No ifabuʼu khöda Yehowa wa ibeʼe waʼohahau dödö ba zi so föna, iʼefaʼö ita moroi ba gabula dödö. Niha nibayoini ba ”biri-biri böʼö” tola lasöndra waʼauri sagötö faʼara, he na ba zorugo hegöi na ba gulidanö. (Yohane 10:16; 17:3; I Korindro 15:53) Hizaʼi, aboto ba dödö Yehowa na göna ita abula dödö iadaʼa. Ba ginötö meföna, afökhö sibai dödö Yehowa ba wamaigi famakao nono mbanuania ba danö Miserai. ”tosasa ia göi.” (Yesaya 63:9) Ba gafuriata, so waʼataʼu ba nono mbanua Yehowa me inötö lafazökhi gosalinia. Aboto ba dödö Yehowa hadia nirasoira. Iʼombakhaʼö khöra Yehowa ”me no sombambaya ono hörönia zombambaya yaʼami.” (Zakharia 2:8) Simane faʼomasi nina ba ndraononia, simanö göi waʼomasi Yehowa ba wanolo ono mbanuania. (Yesaya 49:15) No taʼoʼö Yehowa na so khöda waʼaboto ba dödö hadia nirasoi nawöda, hulö na khöda alua zalua khöra.—Zinunö 103:13, 14.

IʼOʼÖ YESU WAʼOMASI YEHOWA

3. Hewisa dödö Yesu ba niha si göna abula dödö?

³ Aboto ba dödö Yesu hewisa dödö niha si göna abula dödö, hewaʼae lö irai göna khönia. Duma-dumania, iʼila wa ato niha si göna abula dödö. Lalimo ira sondröniaʼö ba agama, ba oya goi-goi niʼaʼasogöra samösa. Ato niha sataʼu ba zondröniaʼö agama simane daʼö. (Mataiʼo 23:4; Mareko 7:1-5; Yohane 7:13) Lö irai ataʼu Yesu khö ndra sondröniaʼö ba agama, ba lö irai telimo ia, tobali, aboto ba dödönia hadia nirasoi niha sato. Me iʼila Yesu wamakao si göna niha sato, ahakhö dödönia. No tefazawili ira lö sanolo, ”hulö mbiri-biri si lö kubalo”. (Mataiʼo 9:36) No ifahaʼö ia Yesu moroi khö namania ba wangomasiʼö niha ba ”sahakhö tödö ba sebua tödö”.—Zinunö 103:8.

4. Me iʼila Yesu wamakao niha sato, hadia nifaluania?

⁴ Me iʼila Yesu wamakao si göna niha sato, ibeʼe khöra wanolo börö me iʼomasiʼö ira. Fakhili ia khö namania. Duma-dumania, me fandrö-ndröu lala nitörö ndra nifahaʼönia ba weʼamöi manuriaigö, no erege dödöra ba moguna molombase. Tobali, iʼila Yesu wa ato sibai niha sombaloi yaʼira. Aboto ba dödö Yesu wa moguna latolo ira. Andrö hewaʼae erege sibai dödönia, ”ba ibörögö ifahaʼö ira, oya ngawalö”.—Mareko 6:30, 31, 34.

LALA BA WOLOʼÖ FAʼOMASI LOWALANGI

5, 6. Na omasi ita taʼoʼö waʼomasi Yehowa hadia zinangea tafalua? Beʼe duma-duma. (Faigi gambara ba ngaʼörö si 24.)

⁵ Hadia zinangea tafalua ba woloʼö faʼomasi Lowalangi? Angeraigö duma-duma andre. So samösa dalifusöda ono matua so töi Alan. Iʼangera-ngeraigö dalifusöda si no atua si tebai mofanö ba ambö iʼila niha. Itörö tödönia niwaʼö Yesu, ”Ba hadia zomasi ami lalau khömi niha, daʼö milau khöra, simanö göi.” (Luka 6:31) Imane dödönia Alan, ’Hadia zomasido lalau khögu niha?’ Itema li, ’omasido na fao ira khögu fabola.’ Tobali, tebai fagohi dalifusöda si no atua andre na fabola. Börö daʼö, si so ba wangera-ngera dalifusöda Alan yaʼia daʼö, ’Na yaʼodo enaʼö simane talifusöda satua andrö, hadia zomasido lafalua khögu niha?’

⁶ Hewaʼae awuyu Alan, itandraigö ikhalaigö hewisa na atua ia dania. Andrö wa fariawö ia khö dalifusöda si no atua andrö ba ihaogö wamondro-ndrongo na fahuhuo ia. Ibörögö aboto ba dödönia wa talifusöda satua andrö ambö iʼila-ila wombaso Sura Niʼamoniʼö ba tebai mofanö ia manuriaigö ba nomo misa. Lua-luania, iʼila Alan hewisa wanolo talifusöda si no atua andrö, ba omasi ia itolo ndrege zi sagu khönia. Na aboto ba dödöda hadia nirasoi dalifusöda tanö böʼö ba ta foromaʼö waʼomasida khönia, no taʼoʼö Yehowa.—I Korindro 12:26.

7. Hewisa enaʼö taʼila hadia mbörö wa göna ndra talifusöda abula dödö?

⁷ Itaria abua khöda worasoi hadia zabu dödö ndra dalifusöda tanö böʼö, mendrua manö na lö irai göna khöda. Duma-dumania, so dalifusöda si göna fökhö, mazui salau ba moto ma ba hondra, mazui si no atua boto. Ato göi niha sabu tödö börö me abölö iʼera-era hadia zi lö alua nasa ba hadia zi no irai göna khönia ba götö si lalö. So göi zi ha samösa ba wangebua ononia mazui ngambatönia tenga Samaduhuʼö Yehowa. Fefu niha göna fangabu dödö ba soyania si göna ira andrö lö irai tarasoi. Taʼoromaʼö waʼomasida khöra ba tabeʼe wanolo. Ba hadia zinangea tafalua? Faböʼö-böʼö zoguna ba niha.Börö daʼö, na si ndruhu-ndruhu tafondro-ndrongo hadia nitutunöra ba taʼodödögö wangila hadia nirasoira, awena taʼila hadia wanolo sinangea tabeʼe khöra. Tola tafasugi ba dödöra wa iʼila göi Yehowa hadia zigöna ira. Mazui so danö böʼö si tola tafalua si möi fanolora. Ba ginötö tafalua daʼö, no taʼoʼö Yehowa.—Baso Roma 12:15; I Fetero 3:8.

ENAʼÖ SO KHÖDA WA AHAKHÖ DÖDÖ SIMANE YEHOWA

8. Hana wa tola so khö Yesu waʼahakhö dödö?

⁸ Ahakhö dödö Yehowa ba niha fefu. (Luka 6:35) Simanö göi Yesu simane amania. Me so ia ba gulidanö, Hana wa ahakhö dödönia niha? Börö me ikhalaigö hadia nirasoi niha na iwaʼö hadia ia mazui ifalua hadia ia. Duma-dumania, samösa ndra alawe si no mamalua horö iʼondrasi Yesu. Mege-ege sibai ndra alawe andrö irege abasö gahe Yesu idanö hörönia. Iʼila wa so waniasa ba ndra alawe andrö ba so khönia wamalalini era-era. Na lö khönia faʼahakhö dödö, tola itugu abu dödö ndra alawe andrö. Daʼö wa isuno Yesu gamuata si sökhi nifalua ndra alawe andrö ba iʼefaʼö horönia. Ihaogö wehede Yesu khö ndra farizaiʼo si lö fao tödö ba nifaluania.—Luka 7:36-48.

9. Hewisa woloʼöda faʼahakhö dödö Yehowa? Beʼe duma-duma.

⁹ Hewisa enaʼö tola taʼoʼö waʼahakhö dödö Yehowa? Moguna taʼangeraigö fatua lö muhede ita mazui fatua lö tafalua hadia ia. Na tafalua daʼö, tola so khöda waʼebolo dödö ba lö taʼafökhöiʼö dödö niha böʼö. Imane Faulo wa niha keriso ”Ba böi fasoso, yamuhaogö linia ba niha fefu”. (II Timoteo 2:24) Duma-dumania, tandraigö angeraigö hewisa wangoromaʼöu faʼahakhö dödö ba zalua andre: Hadia nifaluau na so gafalou wohalöwö lö baga halöwönia? Hadia niwaʼöu khö dalifusöda si no ara lö möi ba gangowuloa, ba awena ifuli möi? Ba ginötö möiʼö manuriaigö, so niha sangumaʼö waʼoya halöwögu. Hadia tola örasoi hadia zalua khönia? Mazui manofu khöu woʼomou hana wa lö öʼombakhaʼö khönia hadia niʼera-erau. Hadia öhaogö wanema linia? Moguna takhalaigö hadia nirasoi niha tanö böʼö ba hadia zalua khönia na tawaʼö wehededa. Na tafalua daʼö, tola taʼila hewisa wamalua faʼahakhö dödö Yehowa ba nifaluada hegöi ba wehededa.—Baso Gamaedola 15:28.

ENAʼÖ TAʼOʼÖ WAʼATUA-TUA YEHOWA

10, 11. Hewisa woloʼöda faʼatua-tua Yehowa? Beʼe duma-duma.

¹⁰ Fondrege zatua-tua Yehowa, ba tola ihalö gangetula ba wa ngiʼila hadia zalua ba zi so föna. Hewaʼae lö taʼila hadia zalua ba zi so föna, ba tola so khöda waʼatua-tua. Hewisa lalania? Fatua lö tahalö gangetula, moguna taʼangeraigö hadia lua-luania khöda dania hegöi ba niha tanö böʼö. Lö omasi ita simane iraono Gizaraʼeli. Lö laʼangeraigö hadia lua-luania na lö laʼoʼö niwaʼö Yehowa. Lö ibe dödöra wahuwusara khö Yehowa ba laʼosiwawöi zi no ifalua Yehowa khöra. Börö me simanö gamuatara, aboto ba dödö Moze wa hasambalö lafalua horö iraono Gizaraʼeli. Andrö imane Moze, ”Noa sa niha si lö famobawa lala ira, niha si lö bakha tödö. Na satua-tua ira, ba aboto ba dödöra enaʼö ba lafatou-tou enaʼö luaʼlua, si so fönara.”—V Moze 31:29, 30; 32:28, 29.

¹¹ Duma-dumania, na fasita ndraʼugö, törö tödöu wa tola abölö wangisöu irege öfalua horö. Böi falua gamuata simöi famakiko fahuwusau khö Yehowa! Moguna so khöda dödö satua-tua enaʼö taʼaröuʼö ita ba gamuata si tobali famaʼalada. Fondro-ndrongo mene-mene moroi khöYehowa, ”Satua-tua, na iʼila wamakao, ba ibiniʼö ia; ba sowöhö-wöhö, ba latörö manö, ba teʼala.”—Gamaedola 22:3.

BÖI FATOU-TOU TÖDÖU GAMUATA SI LÖ SÖKHI

12. Hewisa wa tola möi famaʼalada niʼera-era dödöda?

¹² Niha satua-tua iʼangelamaisi hadia niʼera-erania. Fangera-ngera tola möi fangorifi ba tola göi möi famaʼalada, simane alitö tola moguna khöda ba tola göi tobali famaʼalada. Na tahaogö wangogunaʼö alitö, tola möi fondrino göda. Tobali na lö taʼangelamaisi wangogunaʼö yaʼia, tola akhozi nomo ibeʼe ba tola mate ita. Simanö göi na tafatou-tou tödöda duma-duma nibeʼe Yehowa, ebua gunania khöda. Tobali, na tafatou-tou tödöda wamalua horö ba na takhalaigö ita ba wamalua amuata si lö sökhi, itugu terou dödöda wamalua yaʼia irege taʼalui lala enaʼö alua zi no taʼera-era. Tola aetu wahuwusada khö Yehowa.—Baso Yakobo 1:14, 15.

13. Hewisa waʼauri nikhalaigö Khawa?

¹³ Tola tahalö khöda wamahaʼö moroi ba zalua khö Khawa, ira alawe si föföna. Ibeʼe khöra goroisa Yehowa enaʼö böi laʼa mbua geu ”famotokhi ba dödö si sökhi ba si lö sökhi”. (I Moze 2:16, 17) Tobali, imane Afökha khö Khawa, ”Maʼifu sa lö mate ami. Ba iʼila sibai sa Lowalangi miʼasiʼaikö ia, ba teboka hörömi, ba tobali simane Lowalangi ami, saboto ba dödö si sökhi ba si lö sökhi. Ikhalaigö Khawa wa sökhi sibai dödönia na yaʼia zangai angetula hadia zi sökhi ba si lö sökhi ba waʼaurinia. Daʼö manö niʼera-erania, ba me iʼila saʼae ira alawe, wa sökhi niʼa mbua geu andrö, awö wa si sökhi famaigi, awö wa no omasiö geu daʼö”, Hadia zalua aefa daʼö? ”Ba ihalö mbua, iʼa. Ba ibeʼe göi ö ngambatönia si so ba ngainia, ba iʼa göi.” (I Moze 3:1-6) Lua-luania, ”samösa niha samobörö horö awö lua-lua horö andrö ba faʼamate.” (Roma 5:12) Salua andre zangoromaʼö wa tola tobali famaʼalada na takhalaigö ita wamalua amuata si lö sökhi!

14. Hadia wamangelama nibeʼe Zura Niʼamoniʼö sanandrösa ba wangisö amuata wohorö?

¹⁴ Horö nifalua Khawa lö amakhaitania ba wangisö famalua amuata wohorö. Tobali, Sura Niʼamoniʼö zamangelama yaʼita enaʼö böi takhalaigö ita ba wamalua fangisö amuata wohorö. Imane Yesu, ”Dozi haniha zamaigi ira alawe, wangisö yaʼia, ba no ihoröni tödönia.” (Mataiʼo 5:28) Ifangelama ita Faulo, ’Böi era-era wamalua horö.’—Roma 13:14.

15. Hadia girö-girö nigohida, ba hadia mbörö?

¹⁵ Ifarou ita Sura Niʼamoniʼö enaʼö böi taböhöli woʼangeraigö hadia zi tobali fangomuso dödö Yehowa, böi taʼera-era enaʼö kayo ita. Hewaʼae kayo zi samösa niha, lö möi folumöʼönia. (Gamaedola 18:11) Imane Yesu niha sangiröʼö anaʼania (ba si lö mangofönaiʼö Yehowa ba waʼaurinia no niha si lö tödö daʼö ”si lö anaʼa ba khö Lowalangi”.) (Luka 12:16-21) Ba ginötö ”tahöna khöda girö-girö ba zorugo” ba tafalua zomasi Lowalangi, no taʼomusoiʼö dödö Lowalangi ba omuso göi dödöda. (Mataiʼo 6:20; Gamaedola 27:11) Aefa daʼö, fahuwusada khö Lowalangi abölö sökhi moroi ba danö böʼö fefu.

BÖI BUSI DÖDÖU

16. Hadia nifaluada na so gabula dödöda?

¹⁶ Na taʼalui lala enaʼö kayo ita ba gulidanö andre, oya zi tobali abula dödöda. (Mataiʼo 6:19) Imane Yesu wa niha so angera-ngeraigö wangalui kefe, abua khöra wangofönaiʼö wangalui banua Lowalangi ba waʼaurira. (Mataiʼo 13:18, 19, 22) So göi niha so abusi tödö ma dania so gabula dödö sebua salua khöra ba zi so föna. Na asese taʼabusi tödö, tola mofökhö ita, ba awuwu wamatida khö Yehowa ya faduhu dödöda wa hasambalö itolo ita Yehowa. Imane Sura Niʼamoniʼö, ”Faʼabu dödö niha, ba ihöndrögö tou dödö; ba fondrara dödö daromali nihaogö.” (Gamaedola 12:25) Na so zabu dödöu, fatunö khö dalifusöda sangila hadia zalua khöu. Satuau, foʼomou, mazui si fahuwu khöu tanö böʼö, enaʼö tola ibeʼe khöu wamarou dödö ba wamati khö Yehowa, ba itolo ndraʼugö enaʼö alö gabula dödöu.

17. Hewisa wanolo Yehowa yaʼita ba ginötö so gabula dödö?

¹⁷ Ha Yehowa zabölö mangila hadia nirasoida. Tola itolo ita enaʼö so khöda waʼohahau dödö na ibörögö so zabu dödöda. Imane Faulo, ”Böi mibusi tödö hadia ia ba gofu hadia mbörö, na so zabu dödömi, ba mibokai ba wangandrö khö Lowalangi, ba wangandrö ba bawangalulu yafao wangandrö saohagölö; ba irorogö dödömi, awö gera-erami faʼohahau dödö andrö, khö Lowalangi, sabölö moroi ba gera-era niha fefu ba khö Keriso Yesu.” (Filifi 4:6, 7) Ba ginötö so gabula dödöu, fatou-tou tödöu wanolo nibeʼe Yehowa enaʼö tola aro wahuwusau khönia, duma-dumania, tola iʼodela ndra talifusö ba wamati, ira satua sokubaloi, sawuyu si lö faröi, ira malaʼika ba Yesu.

18. Hadia gunania waʼatua-tua si so khöda na takhalaigö nirasoi niha böʼö?

¹⁸ Simane si no tafahaʼö yaʼita, dataʼoʼö Yehowa taʼodödögö wangiʼila hadia nirasoi niha tanö böʼö. (I Timoteo 1:11; I Yohane 4:8) Ohahau dödöda na so khöda waʼomasi ba faʼahakhö dödö, taʼangeraigö fatua lö tafalua hadia ia, ba taʼaröuʼö ita moroi ba gabula dödö si tenga sinangea. Da taʼodödögö woloʼö amuata Yehowa ba takhalaigö hewisa waʼauri nirasoida na alua wamatörö Lowalangi dania.—Roma 12:12.