Beʼe Balazi Yehowa Fefu Zabu Dödöu

1, 2. (a) Hana wa so khöda waʼaombö-aombö dödö? (Faigi gambara ba wamobörö wamahaʼö.) (b) Hadia nidunö-dunöda ba wamahaʼö andre?

IADAʼA, Satana ”itörö sa danö, hulö zingo sindröndrö-ndröndrö, iʼalu-alui, haniha niʼania”. (I Fetero 5:8; Famaʼeleʼö 12:17) Lua-luania, ato zi no fawuka wangera-ngera ba so khöra waʼaombö-aombö dödö. Ono mbanua Lowalangi me götö föna hegöi iadaʼa larasoi göi zimane daʼö. Duma-dumania, imane Sura Niʼamoniʼö wa itaria so waʼaombö-aombö dödö khö Razo Dawido. (Zinunö 13:3) Imane göi Faulo wa ’iʼabusi tödö mbanua misa, fefu’. (II Korindro 11:28) Hizaʼi, hadia zi tola tafalua ba ginötö tebai saʼae tataögö zalua andrö?

² Amada si so ba zorugo safönu faʼomasi, itolo nono mbanuania me föna enaʼö lö khöra faʼaombö-aombö dödö saʼae, ba omasi göi ia ifalua simane daʼö khöda iadaʼa. Ifarou dödöda Sura Niʼamoniʼö, ”Mibeʼe balazi ia, na so zabu dödömi, gofu hadia ia, so so sa dödönia ami.” (I Fetero 5:7) Hizaʼi, hewisa wamaluada daʼa? Datatutunö öfa ngawalö lala. Tola ölau (1) mangandrö, (2) öbaso ba öʼangerönusi Daromali Lowalangi, (3) tehegö itolo ndraʼugö eheha niʼamoniʼö siʼotarai khö Yehowa, ba (4) fatunö ba niha nifaduhusimö tödö hadia manö nirasoimö. Ba ginötö tadunö-dunö zi öfa ngawalö lala andre, tandraigö angeraigö hadia manö zinangea öbulöʼö.

”BEʼE NORO YEHOWA NOROU ANDRÖ”

3. Hewisa wa tola ’öbeʼe noro Yehowa noro dödömö’?

³ Fangandrö soroi ba dödö no lala si oföna ba wotouʼö föna Yehowa fefu zabu dödöda. Ba ginötö tataögö gabula dödö, Amada safönu faʼomasi si so ba zorugo, omasi ia na tatutunö khönia fefu hadia nirasoida. Sanura zinunö sotöi Dawido, ilau mangandrö khö Yehowa, ”Beʼe mbörö dalingau, yaʼugö Lowalangi, ba wangandrögu andre.” Ba ayati tanö böʼö, imane nasa Dawido, ”Beʼe noro Yehowa norou andrö, ba iʼorifiʼö.” (Zinunö 55:2, 23) Na no öforege ba wanaögö abula dödö salua khömö, abölö sökhi na ötutunö khö Yehowa ba wangandrö hadia manö nirasoimö, moroi na lö aetu öʼabusi tödö zalua khömö. Hizaʼi, hewisa wa möi fanoloda wangandrö enaʼö böi talafo taʼabusi tödö zalua khöda?​—Zinunö 94:18, 19.

4. Ba ginötö abu dödöda, hana wa moguna sibai wangandrö?

⁴ Baso Filifi 4:6, 7. Hewisa wameʼe Yehowa fanema li ba wangandröda soroi ba dödö hegöi si lö mamalö-malö? Tola itolo ita enaʼö tarasoi waʼahono dödö ba tatimbagö wangera-ngera hegöi tödö si fasala. Andrö lö moguna ataʼu ba aombö dödöda, itolo ita Lowalangi ba wangokhögö faʼohahau dödö sindruhu si lö irai tarasoi. Ato ndra talifusöda si no irai morasoi daʼö. Ba tola göi örasoi zimane daʼö. ”Faʼohahau dödö andrö, khö Lowalangi” zanolo yaʼugö ba wanaögö gofu hadia ia gabula dödö! Tola öfaduhusi tödö hadia zi no ifabuʼu Yehowa, ”Böi tokeaʼö, Lowalangiu sa ndraʼodo; uʼabeʼeʼö ndraʼugö ba utoloʼö.”​—Yesaya 41:10.

FAʼOHAHAU DÖDÖ MOROI BA DAROMALI LOWALANGI

5. Hewisa wanolo Daromali Lowalangi ndraʼugö ba wanöndra faʼohahau dödö?

⁵ Lala si dua enaʼö tasöndra waʼohahau dödö yaʼia daʼö na tabaso ba taʼangerönusi ayati Zura Niʼamoniʼö. Hana wa moguna sibai daʼa? Börö me Sura Niʼamoniʼö no Taromali Lowalangi. Ba oya waʼaboto ba dödö hegöi mene-mene si sökhi moroi khö Zomböi yaʼita. Ba ginötö abu dödömö, tola öhaogö öʼangeraigö hewisa wangera-ngera Lowalangi ba angerönusi hewisa enaʼö tola öʼogunaʼö mene-menenia andrö ba wangaʼaroʼö yaʼugö. Daʼa zanolo yaʼugö ba wanaögö, wangalösi, hegöi ba wangeheta abula dödö andrö. Iwaʼö Yehowa ba niha sombaso Taromalinia wa ’teʼabölöʼö ba teʼabeʼeʼö’ ira’, ba ’lö ataʼu hegöi mangiwa dödöra’.​—Yosua 1:7-9.

6. Hewisa wa tola möi fanolomö wehede Yesu?

⁶ Ba Daromali Lowalangi, tabaso hewisa me fahuhuo Yesu ba niha. Omasi sibai ira wamondro-ndrongo hadia nifaʼemania börö me fehedenia möi fondrara dödö ba fangokafu dödö, mendrua manö ba niha si tebai, ba si no atata era-era. (Baso Mataiʼo 11:28-30.) Sindruhu-ndruhu wa iʼameʼegö tödö hadia nirasoi niha böʼö Yesu. (Mareko 6:30-32) No ifabuʼu Yesu wa hasambalö itolo ndra nifahaʼö si fao khönia, ba itolo göi ita iadaʼa. Tenga dali falukha ita khö Yesu awena tola itolo ita. Si tobali Razo ba zorugo, lö mamalö-malö iforomaʼö Yesu wa iʼomasiʼö ita. Andrö, ba ginötö so khöda waʼaombö-aombö dödö, tola faduhu dödöda wa hasambalö itolo ita ba ginötö si tefaudu. Ibeʼe khöda dötönafö hegöi famarou dödö Yesu, sanolo yaʼita ba wanaögö abula dödö.​—Heberaiʼo 2:17, 18; 4:16.

BUA-BUA NIʼOKHÖGÖ BÖRÖ GEHEHA LOWALANGI

7. Hewisa wa tola tasöndra mbua moroi ba geheha niʼamoniʼö siʼotarai khö Lowalangi?

⁷ No ifabuʼu Yesu wa ibeʼe khöda gehehania Amada ba ginötö taʼandrö khönia. (Luka 11:10-13) Hewisa lala si tölu andre möi fanoloda ba wangaʼalösi faʼaombö-aombö dödö? Eheha niʼamoniʼö, mazui faʼabölö moroi khö Lowalangi, daʼö zi tola manolo yaʼita ba wondrouʼö mbua-bua si sökhi simane niʼokhögö Lowalangi. (Kolose 3:10) Ba Zura Niʼamoniʼö, bua-bua simane daʼa lafotöi ia ”bua-bua geheha”. (Baso Galatia 5:22, 23.) Tola itugu sökhi wahuwusada ba niha böʼö na taʼokhögö mbua-bua si sökhi andre, ba tola tatimbagö ngawalö zalua si tola mameʼe faʼaombö-aombö dödö. Datatutunö hewisa mbua-bua geheha andre ba wanolonia yaʼita.

8-12. Hewisa mbua-bua geheha Lowalangi tola manolo ndraʼugö?

⁸ ’Faʼomasi, faʼomuso dödö, faʼohahau dödö.’ Tola alö waʼaombö-aombö dödömö na öfosumange niha böʼö. Hewisa wa tola? Ba ginötö öforomaʼö waʼomasi, öhaogö-haogö wehedemö, ba na öfosumange ndra talifusöda, tola teʼaröuʼö ndraʼugö moroi ba waʼafatö dödö, fönu, ba faʼafawuka wangera-ngera. Tola atulö ndraʼugö ba niha böʼö.​—Roma 12:10.

⁹ ”Faʼebolo dödö, faʼasökhi dödö, faʼebua dödö.” Imane Sura Niʼamoniʼö, ”Faoma mihaogö-haogö khö nawömi, faoma mihakhösi tödö, faoma mibeʼe aefa zala nawömi.” (Efeso 4:32) Ba ginötö taʼoʼö mene-mene daʼa, tola sökhi wahuwusada ba niha böʼö, ba tola aheta ita moroi ba ngawalö hadia ia zameʼe faʼaombö-aombö dödö. Tola göi aoha khöda ba wanaögö abula dödö salua börö walömoʼahonoada.

¹⁰ Famati. Iadaʼa, asese aombö dödöda sanandrösa ba gefe hegöi harato. (Gamaedola 18:11) Hewisa enaʼö tola tatimbagö waʼaombö-aombö dödö ba daʼö? Moguna taʼoʼö mene-mene nibeʼe zinenge sotöi Faulo, ”Yaʼabönö khömi zi ho so.” Famati saro khö Yehowa zanolo yaʼita enaʼö faduhu dödöda wa si fao faʼomasi ibönökhi fefu zoguna khöda. No ifabuʼu khöda, ”Löʼö manö faröido khöu, ba löʼö manö uʼositengagö ndraʼugö.” Daʼö mbörö wa imane Faulo, ”Soaya [Yehowa] zanolo yaʼo, lö ataʼu ndraʼo. Hadia nilau niha khögu?”​—Heberaiʼo 13:5, 6.

¹¹ ”Falömofönu, ba famoni.” Angeraigö hewisa waʼamoguna ba möi fanolo khöu na öʼokhögö mbua-bua daʼa. Bua-bua daʼa göi zi tola manegu yaʼugö ba wamalua mazui ba wangumaʼö ngawalö hadia ia zi tola mameʼe khöu faʼaombö-aombö dödö. Tola göi ötema mbua na ötimbagö ’ngawalö watötöisa, ba faʼabao dödö, ba fönu ba fagua-guasa, ba fanandrawa’.​—Efeso 4:31.

¹² Moguna khöda wangide-ngideʼö enaʼö tola faduhu dödöda ba ”danga Lowalangi andrö, sabölö” ba enaʼö ’tabeʼe balazi ia na so zabu dödöda’. (I Fetero 5:6, 7) Na so khöu wangide-ngideʼö, itolo ba irorogö ndraʼugö Yehowa. Na aboto ba dödömö hadia zi tola ba si tebai öfalua, ba daʼö öʼila wa tebai öʼodaligö ndraʼugö samösa. Tola alö waʼaombö-aombö dödömö börö me öʼodaligö Lowalangi.​—Mikha 6:8.

”BÖI MIʼABUSI TÖDÖ”

13. Hadia geluaha wehede Yesu me iwaʼö, ”Böi miʼabusi tödö”?

¹³ Ba Mataiʼo 6:34 (baso), so mene-mene si sökhi nibeʼe Yesu, ”Böi miʼabusi tödö.” Lö aoha ba wamalua mene-mene si sökhi andrö. Hizaʼi, hadia geluaha niwaʼö Yesu? No tafahaʼö ita wa itaria so waʼaombö-aombö dödö khö Dawido hegöi Faulo. Tenga daʼö geluaha wehede Yesu wa lö irai so waʼaombö-aombö dödö ba niha samosumange Lowalangi. Hizaʼi, itolo ndra nifahaʼönia Yesu enaʼö aboto ba dödöra wa lö möi fangasiwai gabula dödö na labusi sibai dödöra mazui na lö hadöi zi tobali mbörö waʼabu dödöra. Oya gabula dödö nitaögöda ero maʼökhö, andrö wa lö moguna saʼae lanönö gabula dödöra ira niha Keriso ba woʼangera-ngeraigö gabula dödö si no irai alua mazui si lö alua nasa. Hewisa mene-mene Yesu möi fanolou enaʼö böi talafo aombö-aombö sibai dödömö?

14. Simane Dawido, hewisa enaʼö böi talafo aombö dödöda?

¹⁴ Itaria, so zaombö-aombö tödö börö zala si no irai ifalua me mböröta. Itahi-tahigö manö ia tödönia, hewaʼae na no arara ifalua zala andrö. Itaria abu sibai dödö Razo Dawido börö zala nifaluania. Imane, ”Mangarö-ngarö ndraʼo, ebua ligu.” (Zinunö 38:4, 5, 9, 19) Ba zalua andre, ihalö gangetula si fao faʼatua-tua Dawido. Fahudu dödönia wa fahöna waʼahakhö dödö khö Yehowa ba iʼefaʼö zala niha. Ba omuso dödö Dawido me iʼila wa iʼefaʼö zalania Yehowa.​—Baso Zinunö 32:1-3, 5.

15. (a) Hadia nasa wamahaʼö si tola tahalö khö Dawido? (b) Hadia zi tola öfalua ba wangaʼalösi faʼaombö-aombö dödö? (Faigi kotak ”Lala ba Wangaʼalösi Faʼaombö-aombö Dödö”.)

¹⁵ Te aombö dödömö ba zalua khömö iadaʼa. Duma-dumania, ba ginötö isura Dawido Zinunö 55, ataʼu sibai ia börö me so zomasi mamunu yaʼia. (Zinunö 55:3-6) Hewaʼae simanö, lö itehegö awuwu wamatinia khö Yehowa ha börö waʼaombö-aombö dödönia. Iʼandrö wanolo moroi khö Yehowa, hizaʼi iʼila wa moguna göi so zinangea ifalua. (II Zamueli 15:30-34) Tola öhalö wamahaʼö moroi ba zalua khö Dawido. Moroi na talafo öʼabusi tödö zalua khömö, moguna öforege ba wangasiwai gabula dödö andrö, ba döna-döna wa hasambalö irorogö ndraʼugö Yehowa.

16. Hewisa wa möi fangaro wamatiu geluaha döi Lowalangi?

¹⁶ Itaria so niha Keriso, aombö dödöra ba gabula dödö salua miföna. Hizaʼi, lö moguna öbusi tödö zi lö alua nasa. Hadia mbörö? Börö me sasesenia, salua andrö tenga simane nikhalaigöda. Moguna göi tatörö tödöda wa lö hadöi zalua si tebai ifatörö Lowalangi. Eluaha döinia yaʼia daʼö ”Yaʼia Mbörö Wa Alua”. (II Moze 3:14, NW) Andrö, lö moguna aombö dödöda ba zalua miföna, börö töi Lowalangi zangoromaʼö wa fefu gohitö dödönia ba niha gulidanö hasambalö alua. Tola faduhu dödöda wa hasambalö ifahowuʼö niha si lö faröi khönia Lowalangi ba itolo ira ba wangaʼalösi faʼaombö-aombö dödöra sanandrösa me mböröta, iadaʼa, hegöi ba zi so miföna.

FATUNÖ BA NIHA NIFADUHUSIMÖ TÖDÖ

17, 18. Hadia lala si öfa si tola tafalua ba wangaʼalösi faʼaombö-aombö dödö, ba hana wa moguna daʼö?

¹⁷ Lala si öfa si tola manolo yaʼugö ba ginötö örasoi waʼaombö-aombö dödö, yaʼia daʼö na ötutunö ba niha nifaduhusimö tödö hadia manö nirasoimö. Awöu ba waʼauri, si fahuwu khömö, mazui ira satua sokubaloi ba mbanua niha Keriso, tola latolo ndraʼugö enaʼö öʼokhögö wangera-ngera satulö sanandrösa ba zalua khömö. Imane Sura Niʼamoniʼö, ”Faʼabu dödö niha, ba ihöndrögö tou dödö; ba fondrara dödö daromali nihaogö.” (Gamaedola 12:25) Imane nasa Sura Niʼamoniʼö, ”Na lö famagölö, ba tobali lö boto niwaʼö; ba na ato zi so ba huhuo, ba mofozu.”​—Gamaedola 15:22.

¹⁸ Ba mbanua niha Keriso si so yaʼita, mufalua gangowuloa si tola manolo yaʼita ba wangaʼalösi faʼaombö-aombö dödö. Ba gangowuloa ero migu, oya ginötöda khö ndra talifusöda soʼameʼegö tödö yaʼita ba somasi mamarou tödöda. (Heberaiʼo 10:24, 25) ”Famarou tödö” simane daʼö, möi fangaʼaroʼöu ba si tobali fanolo khöu ba wanaögö ngawalö faʼaombö-aombö dödö.​—Roma 1:12.

FAHUWUSAMÖ KHÖ LOWALANGI ZANGAʼAROʼÖ YAʼUGÖ

19. Hana wa faduhu dödömö wa fahuwusamö khö Yehowa tola möi fangaʼaroʼömö?

¹⁹ Irasoi samösa satua sokubaloi ba Kanada wa moguna sibai tatouʼö khö Yehowa na so zabu dödöda. Halöwönia yaʼia daʼö guru ba zekola. Tobali, daʼö zameʼe fawuka wangera-ngerania. Mofökhö göi ia. Fökhönia yaʼia daʼö alio sibai so khönia waʼaombö dödö. Hadia zanolo yaʼia enaʼö so khönia waʼabölö? Si oföna sibai, iforege ba wangaʼaroʼö wahuwusania khö Yehowa. Ira si fahuwu khönia göi, latolo ia sagötö itaögö zalua andrö. Ba ifatunö fefu khö woʼomonia hadia nirasoinia. Baero daʼö, latolo ia göi ira satua sokubaloi hegöi satua samasui enaʼö simane famaigi Yehowa wamaiginia salua khönia andrö. Aefa daʼö, iʼandrö göi wanolo moroi khö doto ba itatugöi ginötönia wolombase hegöi fa-olahraga. Ba gafuriatania, iʼila hewisa lala ba wanaögö zalua khönia hegöi nirasoinia. Na so zi tebai itaögö, iʼandrö wanolo moroi khö Yehowa.

20. (a) Hewisa wa tola tatouʼö khö Yehowa fefu zabu dödöda? (b) Hadia nidunö-dunöda ba wamahaʼö ba migu fönada?

²⁰ Ba wamahaʼö andre, tafahaʼö ita wa moguna tatouʼö khö Lowalangi fefu zabu dödöda, ba tola tafalua ia na talau mangandrö khö Yehowa, tabaso ba taʼangerönusi Daromalinia. Tafahaʼö ita göi wa moguna tatehegö itolo ita eheha niʼamoniʼö moroi khö Yehowa, tafatunö ba niha nifaduhusida tödö hadia nirasoida, ba möita ba gangowuloa niha Keriso. Ba wamahaʼö migu fönada, tafahaʼö ita hewisa wa tola möi fanoloda buala si no ifabuʼu Yehowa.​—Heberaiʼo 11:6.