Miheta Ami ba Zogömi-gömi—Böi Tebulö Miʼagö Haga

1-2. (a) Hadia zalua khö Waulo me isura zurania ba niha Efeso, ba hana wa ifaʼoheʼö khöra zura? (b) Hadia dania wanofu-nofu nitutunöda?

ME LAKURU Waulo ba zi sambua omo ba Roma, omasi ia ifarou dödö ndra talifusönia si sara lala wamati. Hizaʼi, börö me tebai iʼondrasi ira, andrö wa isura zura. Sambua moroi ba gotalua zura andrö, ifaʼoheʼö daʼö ba niha Nefeso. Isura ia te me döfi 60 mazui 61 M.—Ef. 1:1; 4:1.

² Te arakhagö fulu fakhe silalö, iʼogunaʼö ginötönia Faulo ba wanuriaigö hegöi ba wamahaʼö niha ba mbanua Nefeso. (Hal. 19:​1, 8-10; 20:​20, 21) Iʼomasiʼö sibai ndra talifusö si so ba daʼö ba omasi ia itolo ira enaʼö tola larorogö waʼalöfaröira khö Yehowa. Hizaʼi, hana wa isura ba niha Keriso si no tebayoini sanandrösa ba waʼogömi-gömi hegöi haga? Ba hadia wamahaʼö nihalö niha Keriso maʼafefu sanandrösa ba mene-mene andrö? Datatutunö wanema li moroi ba wanofu-nofu daʼa.

MOROI BA ZOGÖMI-GÖMI NUMALÖ BA HAGA

3. Hadia ngawua wehede niʼogunaʼö Waulo ba zurania khö ndra niha Nefeso?

³ Imane Faulo khö ndra niha Keriso ba Nefeso, ”Me mböröta, ba zogömi-gömi so ami, iadaʼa no so ami ba haga.” (Ef. 5:8) Iʼogunaʼö Faulo ngawua wehede ’sogömi-gömi’ hegöi ”haga” ba woʼamaedolagö hewisa waʼatebulö salua khö ndra talifusö ba daʼö. Datatutunö hana wa iwaʼö Faulo ”ba zogömi-gömi” so niha Nefeso me mböröta.

4. Hewisa wa tola so niha Nefeso ba waʼogömi-gömi börö wamahaʼö sofaya?

⁴ Faʼogömi-gömi ba wamati börö wamahaʼö sofaya. Fatua lö lafahaʼö ira ba zindruhu ba tobali niha Keriso, no teʼosawuyu niha Nefeso ba wamahaʼö sofaya ba lafaduhusi tödö wakelemusa. Ba mbanua Nefeso, so ba daʼö nahia wamosumange lowalangi faya sotöi Aritemi. Ba wamaigi niha me luo daʼö, farahu nahia daʼa ba gotalua zi fitu keajaiban dunia. Möi niha ba daʼö ba wamosumange adu. Ato zanöndra kefe sebua ba daʼö börö me lafazökhi ba lafamawa nadu mazui si no amaedola nahia wamosumange. (Hal. 19:​23-27) Baero daʼö, ato göi niha Nefeso samalua fakelemusa.—Hal. 19:19.

5. Hewisa wa tola so niha Nefeso ba waʼogömi-gömi börö gamuata wohorö?

⁵ Faʼogömi-gömi ba wamati börö gamuata wohorö. Ato sibai niha Nefeso samalua amuata fohorö ba si lö faʼaila. Arakhagö fefu nidunö-dunö ba teater hegöi owasa nifalua ba nahia wamosumange lowalangira, moʼamakhaita daʼö ba gamuata fohorö. (Ef. 5:3) Ato niha Nefeso ”lö ola khöra ba wamalua horö”, mazui ba li sindruhunia ”lö saʼae larasoi waʼafökhö”. (Ef. 4:​17-19) Fatua lö lafahaʼö ira ba goi-goi Yehowa sanandrösa ba zatulö hegöi si fasala, lö itegu-tegu ira tödöra hewaʼae no lafalua zala. Lö göi laʼangeragö hewisa dödö Yehowa ba nifaluara. Börö daʼö, iʼamaedolagö ira Faulo simane niha si no ”ogömi-gömi wangera-ngerara, ba fandröndröu ira ba waʼauri si otarai khö Lowalangi”.

6. Hana wa iwaʼö Faulo ’no so ba haga iadaʼa’ niha Nefeso?

⁶ Hizaʼi, so ösa niha Nefeso zondröi faʼogömi-gömi andrö. Imane Faulo sanandrösa khöra, ”Iadaʼa no so ami ba haga börö me tana khö Zoʼaya ami.” (Ef. 5:8) Iʼadaʼa lafaudugö waʼaurira ba Daromali Yehowa, si no amaedola haga sanuturu lalara. (Si. 119:105) Laröi ngawalö nifalua ba agama sofaya hegöi amuata fohorö. Tobali ira ’soloʼö khö Lowalangi’ ba lafalua wondrege zi sökhi ba wamosumange hegöi ba wangomusoiʼö tödönia.—Ef. 5:1.

7. Hadia manö zalua ba niha Keriso si so ba Nefeso salua khöda iadaʼa?

⁷ Simane niha Nefeso, fatua lö tafahaʼö ita ba zindruhu, no so ita ba waʼogömi-gömi wamati hegöi amuata. So ösa ba gotaluada zamalua gowasa soʼamakhaita ba agama sofaya, ba so zangokhögö lala waʼauri safönu amuata fohorö. Hizaʼi, me no tafahaʼö ita ba goi-goi Yehowa sanandrösa ba zatulö hegöi si fasala, tabulöʼö waʼaurida. Ibörögö tafaudugö waʼaurida ba lala somasi ia, irege oya mbua si sökhi nirasoida ba waʼauri. (Yes. 48:17) Hizaʼi, moguna nasa taforege ba wangaʼaröuʼö yaʼita moroi ba waʼogömi-gömi si no taröi, ba ’böi taböhöli wanörö lala haga’. Hewisa wamaluada daʼö?

Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0

HETAʼÖ BA ZOGÖMI-GÖMI

8. Moloʼö Efeso 5:​3-5, hadia zinangea lafalua ira niha Efeso?

⁸ Baso Efeso 5:​3-5. Enaʼö lö tebulö aröu ira moroi ba waʼogömi-gömi, moguna latimbagö ira niha Keriso ba Nefeso wamalua ngawalö zi lö omasi Yehowa. Tenga ha sanandrösa ba gamuata wohorö, hizaʼi manandrösa göi daʼö ba wehede si lö eluaha mazui bude-bude hokha. Ifasugi ba dödöra Faulo enaʼö latimbagö daʼö na omasi ira laʼokhögö ”gondröita ba Wamatörö Lowalangi, nifatörö Keriso”.

9. Hana wa moguna mangelama ita enaʼö lö tafalua ngawalö zi möi fondrönisi dödöda ba wamalua fohorö?

⁹ Böi tebulö taforege enaʼö lö aekhu ita ba dandrawa ”ba wamalua amuata waʼogömi-gömi andrö”. (Ef. 5:11) Moloʼö sasese alua, niha samaigi, samondrondrongo mazui samadunö-dunö ngawalö zi raʼiö mazui soʼamakhaita ba wohorö, aoha sibai tedönisi dödönia wamalua horö. (1 Mo. 3:6; Yak. 1:​14, 15) Ba zi sambua soi, ato ndra talifusöda samazökhi sambua grup ba media sosial ba laʼogunaʼö daʼö ba wo-chat awöra si sara lala wamati. Ba wamobörö, ato ba gotaluara zamahuhuosi sanandrösa ba wamati. Hizaʼi arara manö, ibörögö lafahuhuosi zi lö mangomusoiʼö tödö Yehowa. Sabölö oya ladunö-dunö yaʼia daʼö soʼamakhaita ba seks. Ba gafuriata, so ösa zamaduhuʼö wa huhuora si no raʼiö tobali fondrönisi dödöra wamalua fohorö.

10. Hadia zomasi Zatana enaʼö so ba wangera-ngerada? (Efeso 5:6)

¹⁰ Iforege ulidanö Satana ba wolimo yaʼita, enaʼö faduhu dödöda wa lö atulö fefu niwaʼö Yehowa sanandrösa ba gamuata si raʼiö hegöi fohorö. (2 Fe. 2:19) Lö tokea ita ba daʼö! Lö tebulö iʼalui lala Afökha ba wamaelungu niha irege lö laʼila hezo zatulö hegöi si fasala. (Yes. 5:20; 2 Ko. 4:4) Oya sibai film, acara TV, hegöi nisura ba web, samarou niha sato ba wolawa goi-goi Yehowa satulö! Omasi Zatana na so ba wangera-ngerada wa fefu gamuata si raʼiö hegöi lagu waʼauri safönu amuata fohorö, no si toʼölö manö daʼö, ha si möi fangomuso dödö ba lö salania na tafalua.—Baso Efeso 5:6.

11. Hewisa zalua khö Angela tobali tandra khöda wa moguna tafalua mene-mene si sökhi nisura ba Efeso 5:7? (Faigi göi gambara.)

¹¹ Omasi Zatana na fahuwu ita ba niha sanaisi yaʼita ba woloʼö goi-goi Yehowa. Daʼö mbörö wa ifarou sibai Faulo niha Nefeso, ”Böi mifariawö khöra,” yaʼia daʼö niha samalua ngawalö zi lö atulö föna Lowalangi. (Ef. 5:7) Hizaʼi, moguna abölö mangelama ita moroi ba niha Nefeso me föna börö me iadaʼa tola manö tahorigö ginötöda fariawö ba media sosial, tenga dali falukha ita. Angela,a si toröi ba Asia, ba gafuriata iʼila hadia manö deʼala si so ba media sosial. Imane, ”Itugu ara, itugu tebulö lala wangera-ngeragu. Lö saʼae itegu-tegudo tödögu na ’fariawö’ ndraʼo ba niha si lö moʼameʼegö tödö goi-goi Zura Niʼamoniʼö. Sindruhunia, ibörögö so ba wangera-ngeragu wa lö salania na ibörögö uʼokhögö lagu waʼauri si lö mangomusoiʼö tödö Yehowa.” Hizaʼi, so ndra satua sokubaloi safönu faʼomasi sanolo Angela ba wombulöʼö mangawuli lala wangera-ngerania. Imane Angela, ”Iadaʼa, uʼosambuaʼö dödögu khö Yehowa hegöi lala wangera-ngerania moroi na ufaigi-faigi manö media sosial.”

12. Hadia zanolo yaʼita enaʼö lö tebulö taʼoʼo goi-goi Yehowa?

¹² Moguna taforege wolawa fangera-ngera gulidanö wa fatema gamuata fohorö. Taʼila wa fasala daʼö. (Ef. 4:​19, 20) Moguna tasofu khöda samösa, ’Na lö moguna sibai, hadia utimbagö fariawö khö ndra awögu sekola, awögu wohalöwö mazui niha böʼö si lö moʼameʼegö tödö goi-goi Yehowa? Hadia si fao faʼabarani uʼoʼö goi-goi Yehowa hewaʼae so zangumaʼö wa lö uʼameʼegö tödö niha böʼö?’ Simane nisura ba 2 Timoteo 2:​20-22, te moguna göi mangelama ita ba ginötö tafili zi fahuwu khöda bakha ba mbanua niha Keriso. Datatörö tödöda wa tola manö so ösa zi lö mamarou tödöda ba wondrorogö faʼalöfaröida ba wamosumange Yehowa.

”BÖI MIBÖHÖLI WANÖRÖ LALA HAGA”

13. Hadia geluahania ”böi miböhöli wanörö lala haga”? (Efeso 5:​7-9)

¹³ Ifarou niha Keriso ba Nefeso Faulo tenga ha enaʼö laheta ira moroi ba zogömi-gömi, hizaʼi enaʼö ’böi laböhöli wanörö lala haga’. (Baso Efeso 5:​7-9.) Hadia geluahania? Moguna tarorogö gamuata niha Keriso sindruhu ero inötö. Sambua lala ba wamalua daʼö, yaʼia na owölö-ölö ita wombaso hegöi ba wamahaʼö yaʼita ba Zura Niʼamoniʼö hegöi publikasida si teʼodane-dane ba Zura Niʼamoniʼö. Moguna sibai daʼö enaʼö tola tanehegö duma-duma hegöi famahaʼö nibeʼe Yesu Keriso, ”haga gulidanö”.—Yoh. 8:12; Amd. 6:23.

14. Hewisa wanolo geheha niʼamoniʼö ita?

¹⁴ Moguna göi khöda wanolo moroi ba geheha niʼamoniʼö enaʼö ’lö taböhöli wanörö lala haga’. Hadia mbörö? Börö me lö aoha wondrorogö faʼalöraiʼö ba gulidanö safönu amuata fohorö andre. (1 Te. 4:​3-5, 7, 8) Tola itolo ita eheha niʼamoniʼö ba wolawa lala wangera-ngera gulidanö si lö tefaudu ba lala wangera-ngera Lowalangi. Tola göi itolo ita eheha niʼamoniʼö ba wamalua ”ngawalö zi sökhi [ba] faʼatulö”.—Ef. 5:9.

15. Hadia zinangea tafalua enaʼö tatema geheha niʼamoniʼö? (Efeso 5:​19, 20)

¹⁵ Sambua lala enaʼö tatema geheha niʼamoniʼö yaʼia daʼö na taʼandrö ia. Iwaʼö Yesu wa ”ibeʼe [Yehowa] geheha niʼamoniʼö ba niha sangandrö khönia”. (Luk. 11:13) Tola göi tatema ia na fao ita khö ndra talifusöda ba wanuno Yehowa ba gangowuloa. (Baso Efeso 5:​19, 20.) Bua moroi ba geheha niʼamoniʼö, daʼö zanolo yaʼita ba wamaudugö faʼaurida ba lala sangomusoiʼö tödö Lowalangi.

16. Hadia zanolo yaʼita ba wangai angetula si sökhi? (Efeso 5:​10, 17)

¹⁶ Ba ginötö tahalö gangetula si tohude, moguna taʼalui ”hadia zomasi Yehowa” ba tafaudugö gangetulada ba daʼö. (Baso Efeso 5:​10, 17.) Na taʼalui goi-goi Zura Niʼamoniʼö si tefaudu ba zalua khöda, sindruhunia no taʼalui lala wangera-ngera Lowalangi sanandrösa ba daʼö. Na tafalua goi-goi daʼö, tola tahalö gangetula si sökhi.

17. Hewisa enaʼö atua-tua ita wangogunaʼö inötö? (Efeso 5:​15, 16) (Faigi göi gambara.)

¹⁷ Iʼamenesi göi niha Keriso ba Nefeso Faulo enaʼö atua-tua ira wangogunaʼö inötö. (Baso Efeso 5:​15, 16.) Ududa Satana, omasi ia na arörö ita ba ngawalö zi so ba gulidanö daʼa irege lö inötöda ba wamosumange Lowalangi. (1 Yo. 5:19) Tola manö ibörögö iʼosambuaʼö dödönia si samösa niha Keriso ba wolohi kefe, sekola salawa mazui halöwö, irege lö inötönia ba wamosumange Yehowa. Na ifalua daʼö, no iforomaʼö wa ibörögö iʼokhögö lala wangera-ngera gulidanö daʼa. Tatu manö lö fasala daʼö fefu, hizaʼi böi taʼofönaiʼö ia ba waʼaurida. Enaʼö lö taböhöli ”wanörö lala haga”, moguna ’tahaogö wangogunaʼö inötö’, eluahania taʼosambuaʼö dödöda ba zabölö moguna.

18. Hadia nifalua Donald irege atua-tua ia wangogunaʼö inötönia?

¹⁸ Alui lala enaʼö abölö oya ginötö niʼogunaʼömö ba wangai halöwö khö Yehowa. Daʼö nifalua Donald, si toröi ba Afrika Selatan. Imane, ”Uʼangeragö sanandrösa ba waʼaurigu ba asese ulau mangandrö enaʼö itolodo Yehowa irege oya zi tola ufalua ba wangai halöwö khönia. Uʼandrö enaʼö tola usöndra halöwö si lö manaha yaʼo irege oya ginötögu wanuriaigö. Börö wanolo moroi khö Yehowa, usöndra halöwö simane daʼö. Yaʼo hegöi foʼomogu ibörögö mahalö halöwö safönu inötö khö Yehowa.”

19. Hewisa enaʼö lö tebulö ’tatörö lala haga’?

¹⁹ Sura nibeʼe Waulo ba niha Nefeso sindruhu-ndruhu möi fanolora irege lö faröi ira wamosumange Yehowa. Moroi khö Yehowa mene-mene Waulo andre, ba möi fanoloda irugi iadaʼa. Simane si no tatutunö, möi fanoloda daʼö ba wamili hiburan mazui si fahuwu khöda si fao faʼatua-tua. Daʼö göi zamarou yaʼita enaʼö lö tebulö tafahaʼö ita ba Zura Niʼamoniʼö irege möi fanuturu ladada haga zindruhu andrö ba ngawalö nifaluada. Daʼö göi zangoromaʼö wa moguna sibai geheha niʼamoniʼö, sanolo yaʼita ba wangaurifagö bua-bua si sökhi. Na tafalua hadia nisura Waulo andre, tola tetolo ita wangai angetula si sökhi, si tefaudu ba lala wangera-ngera Lowalangi. Na tafalua fefu daʼö, tola mofozu ita ba wondröi faʼogömi-gömi ba gulidanö andre, ba lö tebulö so ita ba haga!