Böi Aetu Angeraigö Mbuala moroi khö Lowalangi

1, 2. (a) Hadia mbuala nidöna-döna niha samosumange Lowalangi? (b) Hadia zanolo yaʼita ba wangosambuaʼö dödöda ba mbuala andrö? (Faigi gambara ba wamobörö wamahaʼö.)

NIHA Keriso nibayoini, laʼokhögö dötönafö si sökhi sibai. Ladöna-döna waʼauri ba zorugo. Itutunö sinenge sotöi Faulo wa dötönafö andre no ”luo zi möna andrö, ba nikaoni Lowalangi niha, moroi si yawa”. (Filifi 3:14) Ba zorugo, fao ira mamatörö khö Yesu Keriso ba Wamatörönia ba falulu fohalöwö ira ba wanolo niha enaʼö moʼahonoa. (Famaʼeleʼö 20:6) No dötönafö sahöli-höli dödö daʼö! Biri-biri böʼö, laʼokhögö göi dötönafö si faböʼö. Latötöna waʼauri si lö aetu ba gulidanö Faradaiso, ba owua-wua dödöra ba dötönafö andre!​—2 Fetero 3:13.

² Omasi Waulo ba wanolo dalifusönia niha Keriso nibayoini enaʼö lö faröi ira ba latema mbuala andrö. Imane khöra, ”Si so si yawa mifatou-tou tödömi.” (Kolose 3:2) Moguna laʼosambuaʼö dödöra ba dötönafö si sökhi niʼokhögöra ba zorugo. (Kolose 1:4, 5) Na laʼangeraigö howu-howu nibeʼe Yehowa, daʼa zanolo fefu zamosumange Lowalangi, he sanötöna sauri ba zorugo hegöi ba gulidanö ba wangosambuaʼö dödöra ba mbuala andrö.​—1 Korindro 9:24.

3. Hadia wamangelama nibeʼe Waulo ba niha Keriso?

³ Ifangelama göi niha Keriso Faulo sanandrösa ba deʼala si möi börö wa lö latema mbuala. Duma-dumania, isura ba niha Kolose sanandrösa ba niha Keriso faya soloʼö Goroisa Moze ba wangomusoiʼö tödö Lowalangi, hizaʼi lö mamati ira khö Keriso. (Kolose 2:16-18) Itutunö göi Faulo deʼala si so iadaʼa si tola manenawa yaʼita ba wanema buala. Itutunö hewisa wolawa gisö-isö dödö si fasala sanandrösa ba wohorö, ba hadia nifaluada ba ginötö fatiti ita ba nösi nomoda mazui khö ndra talifusöda ba mbanua niha Keriso. Iadaʼa, tola möi fanoloda mene-mene Waulo andre. Börö daʼö, datatutunö ösa wamangelama nibeʼe Waulo si so ba zurania ba niha Kolose.

BUNU GISÖ-ISÖ DÖDÖ SI FASALA SANANDRÖSA BA WOHORÖ

4. Hana wa gisö-isö dödö si fasala möi fanaisida ba wanema mbuala?

⁴ Me no aefa ifasugi ba dödö ndra talifusönia Faulo sanandrösa ba dötönafö si sökhi niʼokhögöra, isura, ”Mibunu saʼae ndroto-ndroto andrö, si so ba gulidanö: fohorö, ba faʼaraʼi-raʼiö, ba hokha, ba fangisö si lö sökhi, ba faʼomasi ganaʼa.” (Kolose 3:5) Tola itugu monönö gisö-isö dödö ba wamalua fohorö irege tola aetu wahuwusada khö Yehowa hegöi dötönaföda ba zi so miföna. So samösa dalifusöda ira matua samalua gisö-isö dödönia ba wohorö, hizaʼi ba gafuriata ifuli ia ba mbanua niha Keriso. Itutunö wa itugu ebua gisö-isö dödönia andrö irege iʼila wa ”no ahou ia wanimbagö daʼö”.

5. Hewisa wolumöʼöda faʼaurida na so ita ba ginötö si tola mangaʼasogö deʼala?

⁵ Moguna tahaogö taʼangenanöi ngawalö zalua si tola mondrönisi tödöda ba wanawö goi-goi Yehowa sanandrösa ba gamuata. Duma-dumania, niha si fakawa moguna latatugöi nola-ola iʼotarai ba wamobörö, simane na fagogohe, faʼuma hegöi na fao ira ba zi ha daru-darua. (Gamaedola 22:3) Teʼala tanö böʼö si tola alua yaʼia daʼö na falulu fohalöwö ndra matua khö ndra alawe mazui na fao ira ba wofanö ba wamalua si sambua halöwö. (Gamaedola 2:10-12, 16) Hadia zi tola öfalua ba wolumöʼö faʼaurimö? Fatunö khönia wa yaʼugö samösa Samaduhuʼö Yehowa. Angenanöi gamuatamö ba törö tödöu wa tola tobali teʼala na ögadu-gadu ira. Moguna göi mangelama ita ba ginötö tarasoi waʼide-ide dödö mazui falöʼawö-awö. Ba ginötö simane daʼö, omasi ita na so zondrara tödöda. Te afatö sibai dödöda irege omasi ita na lalara dödöda gofu haniha manö. No deʼala daʼa. Na örasoi zimane daʼö, böi falua hadia ia zi möi fanenawamö ba wanema buala. Hizaʼi, andrö wanolo moroi khö Yehowa hegöi khö ndra talifusöda.​—Baso Zinunö 34:19; Gamaedola 13:20.

6. Hadia zinangea tatörö tödöda ba ginötö tafili hiburan?

⁶ Ba wamunu gisö-isö dödö si fasala sanandrösa ba wohorö moguna tatimbagö hiburan soʼamakhaita ba daʼö. Iadaʼa, oya hiburan si möi famasugi ba dödöda hadia zalua ba Zodoma hegöi Gomora. (Yuda 7) Lahaogö sibai wangehaogö hiburan andre irege amuata fohorö si so ba daʼö hulö lö möi teʼala ba si toʼölö manö ba wamaigi niha. Andrö moguna mangelama ita ero inötö. Tebai tatemaʼö fefu hiburan si so ba gulidanö. Moguna tafili hiburan si lö manenawa yaʼita ba wanöndra buala faʼauri moroi khö Lowalangi.​—Gamaedola 4:23.

’ONUKHA’ WAʼOMASI HEGÖI FAʼEBUA DÖDÖ

7. Hadia gabula dödö si tola manö alua ba mbanua niha Keriso?

⁷ Omuso dödöda börö me no so ita ba mbanua niha Keriso. Ba gangowuloa, tafahaʼö ita ba Daromali Lowalangi hegöi ba wangabölöʼö nawöda zamösana. Daʼa zanolo yaʼita ba wangosambuaʼö dödöda ba mbuala andrö. Hizaʼi, itaria so waʼafaehu lala wangera-ngera ba gotaluada, irege tola alua watitisa. Na lö taʼasiwaisi gabula dödö andre, tola manö tumbu waʼabao dödö ba gotaluada.​—Baso 1 Fetero 3:8, 9.

8, 9. (a) Hadia mbua-bua zinangea taʼokhögö sanolo yaʼita ba wanema mbuala? (b) Hadia zi tola manolo yaʼita ba wondrorogö faʼatulö ba ginötö so dalifusöda zangafökhöiʼö tödöda?

⁸ Böi tatehegö waʼabao dödö möi fanaisida ba wanema mbuala. Itutunö Faulo hadia zinangea lafalua ira niha Keriso, ”Ba me no nitutuyu Lowalangi ami, niʼamoniʼö ba niʼomasiʼö, ba miʼonukha waʼahakhö dödö, ba faʼebua dödö, ba falöfayawa, ba faʼebolo dödö, ba fanaha tödö. Faoma mibologö dödömi khö nawömi, ba faoma miʼefaʼö zala nawömi khömi, na so zinegu zamösana khö nawönia; simane fangefaʼö Keriso khömi, simanö göi ami.”​—Kolose 3:12-14.

⁹ Faʼomasi ba faʼebua dödö möi fanoloda ba wangefaʼö zala niha böʼö. Na afökhö dödöda ba wehede mazui ba nifalua zi samösa niha, tola taʼangeraigö hewisa na afökhö dödö niha böʼö ba wehede mazui ba nifaluada. Ba ginötö iʼefaʼö zalada niha daʼö, tatu taʼandrö sibai saohagölö börö waʼomasi hegöi faʼebua dödönia! (Baso Zangombakha 7:21, 22.) Taʼandrö göi saohagölö me no iʼosambuaʼö ita Keriso si fao faʼebua dödö ba wamosumange satulö. (Kolose 3:15) Fefu ita taʼomasiʼö Yehowa, tafaʼema duria si fagölö ba tataögö göi ngawalö gabula dödö si fagölö. Na taforomaʼö waʼomasi, faʼebua dödö hegöi fangefaʼö sala, itugu teʼosambuaʼö mbanua niha Keriso ba tola taʼosambua dödöda ba mbuala andrö.

10, 11. (a) Hana wa no sambua teʼala na so waʼafökhö dödö? (b) Hewisa enaʼö lö khöda faʼafökhö dödö?

¹⁰ Tola möi fanaisida ba wanema mbuala na so khöda waʼafökhö dödö. Iforomaʼö Sura Niʼamoniʼö wa no deʼala sebua daʼa. Duma-dumania, afökhö dödö Gaʼino khö Habeli irege ibunu. Afökhö dödö Gora, Datano ba Abiramo khö Moze irege mamadaö ira. Afökhö dödö Razo Saulo khö Dawido irege omasi ia ibunu Dawido. Tefaudu sibai niwaʼö Daromali Lowalangi, ”Si so faʼafökhö dödö sa, ba fasosota, ba daʼö so göi wamakuyu, awö ngawalö wolau si lö sökhi, fefu.”​—Yakobo 3:16.

¹¹ Na taforege ba wangoromaʼö faʼomasi hegöi faʼebua dödö, lö alio afökhö dödöda. Imane Taromali Lowalangi, ”Faʼomasi andrö ba no sebolo tödö, no sebua tödö; faʼomasi andrö, ba lö iʼafökhöiʼö tödö nawönia.” (1 Korindro 13:4) Enaʼö lö mowaʼa waʼafökhö dödö ba waʼaurida moguna taforege ba wamaigi fefu hadia ia simane famaigi Yehowa. Fefu ita si so ba mbanua niha Keriso no sambua boto. Imane Sura Niʼamoniʼö, ”Ba na so nifosumange, ndroto-ndroto, ba oi zara, omuso dödö ndroto-ndroto böʼö andrö göi.” (1 Korindro 12:16-18, 26) Na so zi sökhi salua khö zi samösa dalifusöda, fao ita ba waʼomuso dödö ba lö afökhö dödöda khönia. Angeraigö duma-duma Yonata, ono Razo Zaulo. Lö afökhö dödö Yonata me tefili Dawido tobali razo. Ifarou dödö ba ituhini Dawido. (1 Zamueli 23:16-18) Hadia tola taʼoʼö waʼomasi hegöi faʼebua dödö niʼokhögö Yonata?

MITEMA MBUALA YAʼAMI SI SAMBUA OMO

12. Hadia mene-mene Zura Niʼamoniʼö sanolo nösi nomoda ba wanema buala?

¹² Na fefu ita yomo ba nomo tafalua goi-goi Zura Niʼamoniʼö, hasambalö tarasoi waʼatulö, faʼohahau dödö ba tola tatema mbuala. Ibeʼe Faulo mene-mene si sökhi soguna ba wongambatö, ”Yaʼami ira alawe, miʼoʼö li ndra matua; simanö zinangea, khö Zoʼaya. Yaʼami ira matua, miʼomasiʼö ndra alawe, ba böi abao dödömi khöra. Yaʼami iraono, mifondro-ndrongo li ndra amami gofu hadia ia niwaʼö khömi, daʼö sa niʼomasiʼö, ba khö Zoʼaya. Yaʼami ira ama, böi miʼandrö wönu ndraonomi, faböi adaʼu-daʼu ira.” (Kolose 3:18-21) Hadia tola möi fanolo mene-mene daʼa ba wongambatömö?

13. Hewisa samösa dalifusöda ira alawe niha Keriso tola itolo woʼomonia si tenga si sara lala wamati enaʼö ifosumange Yehowa?

¹³ Na tenga samosumange Yehowa woʼomomö ira matua, hadia nifaluamö na lö sökhi gamuatania khömö? Te mofönu ba fadaʼawa ndraʼugö khönia, hizaʼi hadia tola itugu sökhi zalua na öfalua daʼö? Hewaʼae na möna ndraʼugö fadaʼawa, hadia tola ödönisi dödönia ba wamosumange Yehowa? Tatu löʼö. Hizaʼi, na öʼameʼegö tödö woʼomomö si tobali högö yomo ba nomo, tola ötolo nösi nomomö ba worasoi faʼatulö ba tola möi fanuno Yehowa daʼö. Duma-duma si sökhi nibeʼemö, möi famarou dödö khö woʼomomö ba wamosumange Yehowa, irege tola mitema mbuala.​—Baso 1 Fetero 3:1, 2.

14. Hadia zinangea ifalua zi samösa dalifusöda ira matua niha Keriso na lö ifosumange ia foʼomonia?

¹⁴ Na tenga samosumange Yehowa woʼomomö ira alawe, hadia nifaluamö na örasoi wa lö ifosumange ndraʼugö? Na mofönu-fonuʼö khönia, hadia hasambalö ifosumange ndraʼugö? Tatu löʼö! Omasi Lowalangi na tobali ndraʼugö foʼomo ira matua safönu faʼomasi soloʼö Yesu. (Efeso 5:23) Yesu, högö ba mbanua niha Keriso, lö mamalö iʼokhögö waʼebolo dödö ba faʼomasi. (Luka 9:46-48) Na öʼoʼö Yesu, tola manö ba gafuriatania omasi woʼomomö ira alawe wefao khömö ba wamosumange Yehowa.

15. Hewisa wangoromaʼö woʼomo ira matua niha Keriso wa iʼomasiʼö woʼomonia?

¹⁵ Ibeʼe wanuturu lala Yehowa khö woʼomo ira matua, ”Yaʼami ira matua, miʼomasiʼö ndra alawe, ba böi abao dödömi khöra.” (Kolose 3:19) Foʼomo ira matua safönu faʼomasi, iforomaʼö wa ifosumange woʼomonia na ifondro-ndrongo hadia mbua wangera-ngera woʼomonia ba ifatunö wa moguna daʼö. (1 Fetero 3:7) Hewaʼae tebai ifalua fefu niʼandrö woʼomonia, hizaʼi tola tetolo ia ba wangai angetula si sökhi na ifondro-ndrongo niwaʼö woʼomonia. (Gamaedola 15:22) Foʼomo ira matua safönu faʼomasi, lö ifaso woʼomonia ba wamosumange yaʼia. Hizaʼi, iʼalui lala enaʼö tola itema daʼö. Ba ginötö iʼomasiʼö woʼomonia hegöi iraononia, itugu owua-wua dödöra ba wamosumange Yehowa ba latema mbuala faʼauri.

SI BOHOU EBUA—BÖI TEHEGÖ GOFU HADIA IA MÖI FANAISIMÖ BA WANEMA BUALA!

16, 17. Na yaʼugö si bohou ebua, hewisa enaʼö lö abao dödömö ba mene-mene nibeʼe zatuamö?

¹⁶ Na yaʼugö si bohou ebua, te örasoi wa talafo abeʼe ba lö aboto ba dödö zatuamö hadia nirasoimö. Tola manö abao dödömö irege so khömö waʼareu ba wamosumange Yehowa. Hizaʼi, na öröi Yehowa, öʼila wa lö hadöi niha böʼö baero zatuamö hegöi ira awöu ba mbanua niha Keriso sabölö mangomasiʼö yaʼugö.

¹⁷ Angeraigö daʼa: Na lö irai iteguʼö satuamö, hadia öʼila wa sindruhu-ndruhu laʼomasiʼö ndraʼugö? (Heberaiʼo 12:8) Tatu manö, lö moʼahonoa ira. Andrö wa tola manö abao dödömö ba lala wameʼera khömö degu-degu. Hizaʼi, böi osambuaʼö dödömö ba daʼö. Angeraigö hadia dani wa lawaʼö ba lafalua daʼö. Okhögö waʼebolo dödö ba böi ofönu. Imane Taromali Lowalangi, ”Sanaha bewenia, ba no si so faʼaboto ba dödö; ba sebolo tödö, ba no niha si so era-era.” (Gamaedola 17:27) Forege enaʼö tobali ndraʼugö niha saro ba wamati sanemaʼö mene-mene ba fahaʼö ndraʼugö ba daʼö gofu hewisa wamaʼema yaʼia. (Gamaedola 1:8) Böi olifu ami wa na miʼokhögö zatua sangomasiʼö Yehowa no sambua buala si sökhi daʼö. Omasi ira latolo ndraʼugö ba wanöndra faʼauri si lö aetu.

18. Hana wa lö mamalö öʼosambuaʼö dödömö ba mbuala si no mufabuʼu andrö?

¹⁸ Fefu ita taʼokhögö dötönafö si sökhi, he sauri ba zorugo mazui ba gulidanö faradaiso. Hasambalö alua dötönafö andrö. Teʼodane-dane daʼö ba zi no ifabuʼu Somböi banua siawa awö danö, sangumaʼö, ”Anönö saʼae danö waʼaboto ba dödö niha Yehowa.” (Yesaya 11:9) Lö aratö, fefu niha si so ba gulidanö ifahaʼö ira Lowalangi. Hewaʼae taforege ba wanema buala, hizaʼi hasambalö so mbuania. Börö daʼö, böi mamalö törö tödömö hadia zi no ifabuʼu Yehowa khömö ba böi tehegö gofu hadia möi fanaisimö ba wanema buala andrö!