Amuata Fanemaʼö Tome​—Moguna ba Möi Fangomuso Dödö!

1. Hadia manö gabula dödö salua ba niha Keriso ba götö siföföna?

TE ME döfi 62 irugi 64 M, isura zura sinenge sotöi Fetero ba ”niha si fatewu ba mbanua Wondro, Galatia, Kafadokia, Asia, hegöi Bitinia”. (1 Fetero 1:1) Ira talifusöda andre moroi ba mbanua si faböʼö-böʼö. Lataögö ”galitö fanandraigö” mazui folohi ba moguna khöra wamarou dödö hegöi fanuturu lala. Lö sökhi zalua ba götö daʼö. Isura Fetero, ”No ahatö gamozua fefu hadia ia.” Lö irugi fulu fakhe tö tedudugö Yeruzalema. Hadia zi tola manolo niha Keriso ba ginötö si lö sökhi andrö?​—1 Fetero 4:4, 7, 12.

2, 3. Hana wa ifarou ndra talifusönia ba wamati Fetero enaʼö so khöra waʼoböwö? (Faigi gambara ba wamobörö wamahaʼö.)

² Ifarou ndra talifusönia ba wamati Fetero enaʼö ’böi abua gölöra wanemaʼö tome’. (1 Fetero 4:9) Ba li Yunani, ngawua wehede ’fanemaʼö tome’ eluahania ”faʼasökhi dödö mazui faʼebua dödö ba niha si lö muʼila”. Hizaʼi, ifarou ndra talifusönia Fetero enaʼö faoma oböwö ira khö nawöra hewaʼae no laʼila nawöra ba fao ira ba wamalua hadia ia. Hadia mbuania khöra?

³ Itugu aro wahuwusara. Hewisa göi ndraʼugö? Hadia lö olifu ndraʼugö hewisa dödömö ba ginötö ikaoniʼö si samösa niha ba nomonia? Na ökaoni zi samösa niha ba nomomö, tola itugu ahatö ndraʼugö khönia. Lala si sökhi enaʼö itugu ahatö ita khö ndra talifusöda yaʼia daʼö oböwö ita khöra. Niha Keriso ba götö Wetero moguna itugu ahatö ira khö nawöra börö me itugu tedou gabula dödö. Moguna göi tafalua daʼö ba ”ngaluo safuria” andre.​—2 Timoteo 3:1.

4. Hadia wanofu-nofu nitutunöda ba wamahaʼö daʼa?

⁴ Hewisa wangoromaʼöda faʼoböwö khö ndra talifusöda? Hadia zi tola manaisi yaʼita ba wanemaʼö tome ba hewisa enaʼö tatimbagö daʼö? Hadia zanolo yaʼita enaʼö tobali tome si sökhi?

INÖTÖ NIʼOKHÖGÖDA BA WANEMAʼÖ TOME

5. Hewisa wangoromaʼöda wa omasi ita tatemaʼö dome ba gangowuloa?

⁵ Ba gangowuloa: Ikaoni ita Yehowa hegöi organisasinia weʼamöi ba gangowuloa. Tatema fefu niha sangondrasi angowuloada, mendrua manö niha sawena mangondrasi. (Roma 15:7) Yaʼira andre göi tome Yehowa, ba omasi ita na larasoi waʼahono dödö gofu hewisa zikhala mazui lagu wonukhara. (Yakobo 2:1-4) Na öʼila niha sawena möi ba gangowuloa ba ha samösa ia, hadia ökaoni ia wedadao ba zingamö? Tola omuso dödönia na ötolo ia ba wangosisiʼö waö-waö halöwö mazui ba wamokai ayati nibaso. Daʼa ginötö si sökhi enaʼö toʼölö ita ba ”wangoromaʼö faʼoböwö”.​—Roma 12:13.

6. Haʼökhö zi oföna sibai taforomaʼö waʼoböwö?

⁶ Fao wemanga: Niha ba götö Zura Niʼamoniʼö, asese lakaoni niha böʼö ba nomora ba wangoromaʼö wa omasi ira fahuwu ba atulö. (1 Moze 18:1-8; Zanguhuku 13:15; Luka 24:28-30) Haniha zi oföna takaoni? Tatu manö ira talifusöda ba mbanua niha Keriso. Börö me itugu lö sökhi gulidanö daʼa, moguna taʼodaligö ndra talifusöda ba tobali ita si fahuwu si lö faröi khöra. Me döfi 2011, lahalö gangetula ira Boto Solohe ba wamulöʼö inötö ba wamalua Famahaʼö Manuriaigö ba nösi nomo Mbetieli si so ba Amerika Serikat. Ba wamobörö, lafalua daʼö bözi 6.45 tanö owi tobali bözi 6.15 tanö owi. Hadia mbörö? Na lafalua daʼö, oya ginötö niʼokhögö nösi nomo Mbetieli ba wariawösa. Lafalua göi daʼö ba gödo ndraha si so ba soi böʼö. Buania, tola itugu fahuwu nösi nomo Mbetieli khö nawöra zamösana.

7, 8. Hewisa wangoromaʼöda faʼoböwö khö ndra talifusöda moroi ba mbanua böʼö sangolohesi huhuo?

⁷ Itaria so ndra talifusöda moroi ba mbanua niha Keriso tanö böʼö, satua samasui mazui nifatenge moroi ba Mbetieli samaʼema huhuo sebua ba mbanua niha Keriso si fao ita. Hadia taʼogunaʼö ginötö daʼö ba wangoromaʼö faʼoböwö khö ndra talifusöda andrö? (Baso 3 Yohane 5-8.) Tola takaoni ira wemanga ba nomoda.

⁸ Itörö tödö dalifusöda ira alawe si so ba Amerika Serikat imane, ”Ba zi töra hauga fakhe, yaʼo hegöi foʼomogu no asese makaoni ba nomoma ndra talifusöda sangolohesi huhuo hegöi foʼomora enaʼö fao ira khöma wemanga.” Fariawösara andre möi fangaroʼö wamatira ba larasoi waʼowua-wua dödö. Imane, ”Lö irai maniasa ndraʼaga me no makaoni ira.”

9, 10. (a) Haʼökhö manö tahenaigö nahia wemörö? (b) Niha sangokhögö omo side-ide, hadia tola lahenaigö nahia wemörö khö ndra talifusöda? Beʼe duma-duma.

⁹ Tahenaigö nahia wemöröra: Ba götö Zura Niʼamoniʼö, no toʼölö lahenaigö nahia wemörö ba dome. (Yobi 31:32; Filemo 22) Iadaʼa, tola göi tafalua zimane daʼö. Si toʼölönia, moguna lahenaigö nahia wemörö khö ndra satua samasui na laʼondrasi mbanua niha Keriso. Te göi moguna nahia wemörö khö ndra talifusöda si fao ba sekola-sekola teokratis hegöi relawan pembangunan. Hewisa na so ndra talifusöda sadudu omo börö bencana alam? Moguna göi khöra nahia wemörö fatua lö lahaogö nomora. Böi so ba wangera-ngerada wa ha niha sebua omo zi tola mamalua daʼö. Te no asese lafalua daʼö ba zilalö. Hadia tola öhenaigö nahia wemörö khö ndra talifusöda hewaʼae no ide-ide nomomö?

¹⁰ Itörö tödö dalifusöda ira matua si so ba Korea Selatan me itemaʼö ndra talifusöda si fao ba sekola-sekola teokratis. Isura, ”Ba wamobörö so khöma waʼaombö dödö börö me awena mangowalu ndraʼaga ba no ide-ide nomoma. Hizaʼi, me toröi ira ba nomoma sindruhu-ndruhu marasoi waʼowua-wua dödö. Börö me awena mongambatöga, maʼila wa so waʼowua-wua dödö ba wongambatö na fao ira ba wamosumange Yehowa ba laʼokhögö gohitö dödö ba wamati.”

11. Hana wa moguna oböwö ita khö ndra talifusöda sawena findra moroi ba mbanua niha Keriso tanö böʼö?

¹¹ Ira talifusöda si bohou ba mbanua niha Keriso: So ösa ndra talifusöda mazui ösi nomo sawena findra moroi ba mbanua niha Keriso tanö böʼö. Tola manö möi ira ba daʼö ba wanolo banua niha Keriso si so yaʼugö. Mazui ira perintis nifataro ba mbanua niha Keriso. Oya zi bohou sinangea lafaudugö ba waʼaurira. Duma-dumania, nahia waʼatoröira, banua niha Keriso si bohou hegöi li mazui si toʼölö mufalua ba daʼö. Hadia tola ökaoni ira wemanga ba nomomö? Daʼa zanolo yaʼira enaʼö so zi fariawö khöra ba tola lafaudugö waʼaurira ba daʼö.

12. Hadia duma-duma sangoromaʼö wa lö oya zinangea tafaʼanö ba wanemaʼö tome?

¹² Lö oya zinangea öfaʼanö ba wanemaʼö tome. (Baso Luka 10:41, 42.) Itörö tödö zi samösa talifusöda ira matua hadia zalua khönia hegöi foʼomonia me awena tobali ira utusan injil. Imane, ”Awuyu nasa ndraʼaga, lö oya waʼatua-tua niʼokhögöma ba halöwö daʼö ba itörö-törö tödöma mbanuama. Samuza inötö ba zibongi, itörö sibai dödö woʼomogu mbanuama si no maröi, irege tebai urara dödönia. Aefa daʼö, te bözi 19.30, so zotoko bawandruhöma. Yaʼia andre niha nifahaʼö ba Zura Niʼamoniʼö ba iʼohe tölu ngawua ndrima. Möi ia ba daʼö ba wangondrasi yaʼaga, utusan injil si bohou. Makaoni ia yomo ba mabeʼe önia idanö. Aefa daʼö mafazökhi tesi hegöi kofi. Lö maʼila li Swahili simanö göi ia lö iʼila li Inggris.” Itutunö talifusöda andre wa möi fanolora daʼö ba wangokhögö fahuwusa si sökhi khö ndra talifusöda si so ba daʼö ba larasoi waʼowua-wua dödö.

BÖI TEHEGÖ SO ZANAISI YAʼUGÖ BA WANEMAʼÖ TOME

13. Hadia mbuania khöu na ötemaʼö dome?

¹³ Hadia no irai aombö dödöu ba wanemaʼö tome? Na noa, tola manö taya ginötö niʼokhögömö ba worasoi faʼowua-wua dödö hegöi ba wanöndra si fahuwu si lö faröi. Na omasi ita ba wanemaʼö tome, ato zi fariawö khöda. Hizaʼi, hana wa so zaombö tödö ba wanemaʼö tome? Datatutunö hadia manö mbörö wa alua daʼö.

14. Hadia nifaluada na lö hadöi inötö hegöi faʼabölöda ba wanemaʼö tome?

¹⁴ Inötö hegöi faʼabölö: Oya halöwö hegöi noro dödö niʼokhögö nono mbanua Yehowa. So ösa zangumaʼö wa lö hadöi inötö hegöi faʼabölöra ba wanemaʼö tome. Na daʼö nirasoimö, moguna öfaudugö ginötömö enaʼö tola öfalua ia. Moguna sibai daʼö börö me no ifarou ita Sura Niʼamoniʼö ba wanemaʼö tome. (Heberaiʼo 13:2) Na tafalua daʼö no tafalua zi sökhi. Hizaʼi, enaʼö tola öfalua daʼö moguna öʼalösi ginötöu ba wamalua si lö eluaha.

15. Hadia mbörö wa so ösa zangumaʼö wa tebai latemaʼö dome?

¹⁵ Tawaʼö wa lö sagu khöda: Hadia no irai omasi ndraʼugö ba wanemaʼö tome, hizaʼi ömane tödöu wa lö sagu khöu? Te aila ndraʼugö mazui so khöu waʼaombö dödö ma aföli dania domemö. Te lö ebua gefemö mazui tebai öfalua simane nifalua ndra talifusöda tanö böʼö. Törö tödömö wa tenga faʼebua nomomö nifaigi. Tola omuso dödö domemö na sökhi wanemaʼöu yaʼira ba na lö taʼunö nomomö.

16, 17. Hadia nifaluamö na aombö dödöu ba wanemaʼö tome?

¹⁶ Na so khöu waʼaombö dödö ba ginötö ötemaʼö dome, tenga ha yaʼugö zorasoi daʼö. Imane samösa satua sokubaloi si so ba Inggris, ”Tola manö so khöda waʼaombö dödö ba wanemaʼö tome. Hizaʼi, na tafalua daʼö oya mbua nitemada ba so khöda waʼahono dödö börö me moʼamakhaita daʼö ba wangai halöwö khö Yehowa. Itaria, ha kofi mabadu ba fahuhuo ndraʼaga irege urasoi waʼomuso dödö.” Moguna göi taʼameʼegö tödö domeda. (Filifi 2:4) Ato niha somasi manutunö hadia zi no irai alua ba waʼaurira. Tola tarongo daʼö ba ginötö owulo ita khöra. So samösa zatua sokubaloi sanura, ”Me ukaoni ndra talifusöda ba nomogu, tola itugu ahatö ndraʼo khöra ba tola uʼila hewisa wa tola laʼila zindruhu.” Na öʼameʼegö tödö domemö, tola larasoi waʼowua-wua dödö sagötö fariawö ami.

¹⁷ Samösa dalifusöda ira alawe perintis asese ihenaigö nahia wemörö khö ndra talifusöda si fao ba sekola-sekola teokratis. Itutunö, ”Ba wamobörö so khögu waʼaombö dödö börö me no öna-öna nomogu ba tenga si bohou gama-gama niʼokhögögu. Hizaʼi, so samösa woʼomo zamomaha ba sekola andrö zondrara tödögu imane, me tobali ira satua samasui, omuso sibai dödöra börö me toröi ira khö ndra talifusöda sangokhögö famati saro, soʼöna-önaiʼö faʼaurira ba sangosambuaʼö tödöra ba wamosumange Yehowa hewaʼae lö ebua gefera. Itörö tödögu niwaʼö mamagu me ide-ide ndraʼo, ’Sökhi zi samba figa höwa, na fao waʼomasi.’” (Gamaedola 15:17) Lö moguna aombö dödöda na lö ebua gefeda börö me daʼö zabölö moguna yaʼia daʼö faʼomasida ba domeda.

18, 19. Hewisa mbua-bua wanemaʼö tome möi fanoloda ba wanimbagö fangera-ngera si lö sökhi sanandrösa ba niha böʼö?

¹⁸ Lö omasi ndraʼugö khö dalifusöda daʼö: Hadia so ndra talifusöda sangafökhöiʼö tödömö? Na lö ötayaigö ba dödöu daʼö, itugu monönö waʼabao dödöu khönia. Tola manö lö ökaoni ba nomomö ndra talifusöda na so gamuatara si lö omasiʼö. Mazui, te so zi no irai mangafökhöiʼö tödömö ba tebai öʼolifugö daʼö.

¹⁹ Iwaʼö Sura Niʼamoniʼö wa tola atulö ndraʼugö ba niha böʼö hewaʼae ba niha si faʼudu khöu, na so khömö waʼoböwö. (Baso Gamaedola 25:21, 22.) Na ökaoni zi samösa niha ba nomomö, lö khöu fanahö-nahö tödö ba öʼokhögö wahuwusa si sökhi khönia. Tola öʼila mbua-bua si sökhi niʼokhögönia simane niʼila Yehowa me ikaoni ia ba zindruhu. (Yohane 6:44) Na so khöu waʼomasi ba zi samösa niha ba ökaoni ia ba nomou hewaʼae lö manötöna ia, tola möi fanolomö daʼö ba wamörögö fahuwusa si sökhi khönia. Hewisa wangoromaʼömö wa sindruhu-ndruhu öʼomasiʼö ia? Sambua lalania yaʼia daʼö falua mene-mene si so ba Wilifi 2:3, ”Miʼide-ideʼö ami, enaʼö alawa niha böʼö miwaʼö tödömi.” Tola taʼangeragö hadia manö zi tohude ndra talifusöda moroi khöda. Tafahaʼö ita ba wamati hegöi ba waʼanau gölöra mazui ba mbua-bua niha Keriso niʼokhögöra. Na taʼangeragö gamuata si sökhi niʼokhögöra, itugu taʼomasiʼö ira ba omasi ita takaoni ira.

TOBALI TOME SI SÖKHI

20. Hana ba hewisa enaʼö tola mufaduhusi tödö ita na lakaoni ita weʼamöi ba nomo zi samösa niha?

²⁰ No irai manofu Dawido, ”He Yehowa, haniha zi iagö ose andrö khömö?” (Zinunö 15:1) Aefa daʼö, itutunö hadia manö mbua-bua niha si tola tobali tome Yehowa. Duma-dumania, niha si tola mufaduhusi tödö ”na no möi ia ba hölu ba zi teʼala ia, ba lö iwuʼai”. (Zinunö 15:4) Na no lakaoni ita weʼamöi ba zi sambua omo, hasambalö möi ita ba daʼö baero na sindruhu-ndruhu tebai saʼae möi ita. Tola manö so zi no ihenaigö. Na lö alua möi ita ba tola afatö dödönia. (Mataiʼo 5:37) So ösa niha si lö mamalua si no izazi börö me no itema undranga sabölö sökhi moroi ba niha böʼö. Hadia so waʼomasi hegöi foʼameʼegö tödö na ifalua daʼö? Moguna taʼandrö saohagölö ba zi no ihenaigö sokhö omo. (Luka 10:7) Na sindruhu-ndruhu tebai möi ita, taʼanemaiʼö tafatunö khönia. Daʼö gamuata si sökhi ba si fao faʼomasi.

21. Hewisa wa tola tobali ita tome si sökhi na taʼameʼegö tödö zasese mufalua ero sambua banua?

²¹ Moguna taʼameʼegö tödö hadia zasese mufalua ba zi sambua banua. Ba zi hauga banua, tola möi ita fatome hewaʼae lö si fazazi ita khöra. Ba mbanua böʼö, moguna talau fazazi fatua lö fatome ita khöra. Ba mbanua böʼö, so zameʼe ö si sökhi ba domera moroi ba nösi nomora. Tanö böʼönia, tome hegöi ösi nomo fagölö gö niʼara. Ba zi hauga banua, si toʼölönia tome zolohe göra, hizaʼi ba mbanua böʼö sokhö omo zameʼe gö dome. Ba nahia tanö böʼö, lahaogö wehede ba wanimbagö undranga si oföna mazui si mendrua. Hizaʼi, ba mbanua böʼö lö baga na latimbagö undranga si oföna. Andrö, moguna tafaudugö waʼaurida ero sambua banua enaʼö omuso dödö niha sogaoni yaʼita.

22. Hana wa moguna enaʼö ’böi abua gölöda wanemaʼö tome’?

²² Imane Fetero, ”No ahatö gamozua fefu hadia ia.” (1 Fetero 4:7) Lö ara tö, tataögö wamakao sabölö-bölö si lö irai alua ba gulidanö. Börö me itugu lö sökhi zalua, andrö wa moguna sindruhu-ndruhu taʼomasiʼö ndra talifusöda. Tefaudu sibai mene-mene nibeʼe Wetero, ”Böi abua gölömi wanemaʼö tome.” (1 Fetero 4:9) Moguna taʼokhögö mbua-bua wanemaʼö tome börö me daʼa zameʼe khöda faʼomuso dödö iadaʼa hegöi ba zi sagötö faʼara.